|
Սիրելի ընկեր-ընկերուհիներ,
Տարիներու աւանդութիւնը շարունակելով՝ ամէն տարուան Փետրուար ամսուն աշխարհի չորս ծագերուն կ'անմահացնենք յիշատակը միութեան հիմնադիր սերունդին ու անոր շարքերուն մէջ իրենց անսակարկ ծառայութիւնը մատուցած ՀՕՄ-ական բոլոր ննջեցեալներուն՝ խնդրելով Ամենակալէն, որ անոնց հոգիները լոյսի մէջ պահէ եւ երկնքի արքայութեան արժանացնէ:
115 տարիներ առաջ՝ 1910-ին, Հայ օգնութեան միութիւնը ծնունդ առաւ տէր ու պաշտպան կանգնելու հայ ժողովուրդին:
115 տարի շարունակ, հակառակ բազում մարտահրաւէրներուն, փոխուող պայմաններուն, միութիւնը ապաւէնն ու նեցուկը եղաւ իւրաքանչիւր հայու, մնաց պատնէշի վրայ եւ առանց ընկրկումի կը շարունակէ իր առաքելութիւնը։
Մեր պարտքն է յաջորդող հարիւրամեակը մուտք գործել վերանորոգ թափով՝ նոր շունչ ու եռանդ ներարկելով հայ նոր սերունդներուն։ Մեր առաքելութիւնն է շարունակել պանծալի միութեան սրբազան գործը, որպէսզի արժանի ըլլանք ՀՕՄ-ը հիմնած, անոր ծառայած ՀՕՄ-ուհիներու հսկայ փաղանգին ժառանգորդները կոչուելու։
Ննջէ՜ք հանգիստ, մեզմէ հեռու, սակայն անդէնականէն միշտ մեզի հետ եղող ու միութենական աշխատանքին հսկող ընկերուհիներ, ձեր վառած ջահը անմար պահելու նպատակով կը շարունակէ գործել մեծաթիւ փաղանգ մը՝ միշտ հաւատարիմ ՀՕՄ-ի ուխտին։
ՀՕՄ-ի Գանատայի Շրջանային վարչութիւնը իր 10 մասնաճիւղերով նշեց յիշատակը մեզմէ առ յաւէտ բաժնուած նուիրեալ ՀՕՄ-ի հիմնադրիրներուն, բարերարներուն եւ մահացած ընկեր-ընկերուհիներուն հոգւոյն ի յիշատակ։
Հոգեհանգստեան պաշտօնները տեղի ունեցան Կիրակի՝ 23 Փետրուար 2025-ին Գանատայի տարածքին զանազան եկեղեցիներու մէջ՝ Համլիթնի Սբ. Մարիամ, Թորոնթոյի Ս․ Աստուածածին Հայոց Առք․ Եկեղեցւոյ, Մոնթրէալի Սբ. Յակոբ, Գէմպրիճի Սբ. Նշան, Վանգուվըրի Ս․ Գրիգոր Լուսաւորիչ, Օթթաուայի Սբ. Մեսրոպ եւ Լաւալի Սբ. Գէւորգ եկեղեցիներուն մէջ:
Այս առթիւ յատկապէս հոգեհանգիստ խնդրուեցաւ հետեւեալ բարերարներուն հոգւոյն ի յիշատակ:
Խաչատուր Մալումեանի
Լեւոն եւ Սոֆիա Յակոբեանի
Արաքսի Բրուտեանի
Սամուէլ եւ Աղաւնի Երեմեանի
Հայկանուշ Կարապետեանի
Նուպար Ճէսուրեանի
Բաստրմաճեան եղբայրներու
Մաննիկ Տայլէրեանի
Պօղոս Քէլեան Լինթեանի
Յարութիւն Եսայեանի
Անի Տէմիրճեանի
Վանուհի Իսաջանեանի
Յիշատակն արդարոց օրհնութեամբ եղիցի։
Խունկ եւ աղօթք իրենց անմար յիշատակին։
Ընկերական բարեւներով՝
Հ.Օ.Մ-ի Գանատայի Շրջանային Վարչութիւն
| 
