Mawrth 2023
‌
Mae Cofnod Gofal Nyrsio Cymru yn mynd o nerth i nerth

Mae Cofnod Gofal Nyrsio Cymru yn parhau i fynd o nerth i nerth ar ôl casglu mwy na 3.9 miliwn o gofnodion nyrsio cleifion mewnol yn ystod y 23 mis diwethaf.

Mae’r system ddigidol, sydd wedi trawsnewid y ffordd y mae nyrsys yn cofnodi, storio a chael mynediad at wybodaeth am gleifion, wedi gweld mwy nag 13,000 o ddefnyddwyr yn fisol a 3.3 miliwn o asesiadau risg digidol rhwng Ebrill 2021 a Chwefror 2023.

O ran asesiadau risg, mae mwy na 1.8 miliwn o asesiadau poen wedi'u cwblhau. Roedd mwy na 394,000 o asesiadau ar gyfer wlserau pwysau ar y croen a mwy na 223,000 ar gyfer cwympiadau.
Mae'r system brechu yn cefnogi 9 miliwn o bigiadau

Bydd System Imiwneiddio Cymru (WIS) a ddatblygwyd gan Iechyd a Gofal Digidol Cymru yn cefnogi rhaglen brechiadau atgyfnerthu y Gwanwyn yng Nghymru a fydd yn dechrau ar 1 Ebrill 2023.

Mae system WIS wedi darparu 8.9miliwn o frechiadau ers dechrau’r pandemig, ac wedi darparu 1.1miliwn o frechiadau yn ystod rhaglen gaeaf 2022 rhwng mis Medi a mis Rhagfyr. 

Cymru yw'r unig ran o'r DU i ddatblygu datrysiad rheoli brechu mewn modd digidol gan ddefnyddio tîm meddalwedd mewnol sy'n bodoli eisoes.

Bu’r tîm o Iechyd a Gofal Digidol Cymru yn gweithio gyda phartneriaid, gan gynnwys Llywodraeth Cymru, Byrddau Iechyd ac Ymddiriedolaethau i ddarparu’r datrysiad digidol ar gyfer rheoli, dosbarthu ac adrodd ar y rhaglen frechu Covid 19.
Clinigwyr i ddweud eu dweud ar systemau digidol ledled Cymru

Bydd arolwg newydd yn casglu adborth gan glinigwyr sy’n gweithio i GIG Cymru ar effeithiolrwydd y systemau digidol sy’n cael eu defnyddio ar hyn o bryd.

Mae'r arolwg o ddefnyddioldeb systemau digidol wedi cael ei lansio ar 27fed Mawrth 2023 a dyma'r astudiaeth ymchwil fwyaf o'i bath dan arweiniad defnyddwyr yn y wlad. Bydd clinigwyr sy’n gweithio ar draws y saith bwrdd iechyd yng Nghymru, a staff rheng flaen yn Ymddiriedolaeth GIG Prifysgol Felindre, yn cael eu gwahodd i roi eu barn.

Bydd yr arolwg, a lansiwyd gan Iechyd a Gofal Digidol Cymru (DHCW), yn casglu adborth ar lefel genedlaethol ac yn rhoi sgôr bersonol i bob sefydliad ar gyfer eu systemau eu hunain. Bydd cymorth pwrpasol yn cael ei gynnig fel y gall sefydliadau ddeall yr hyn mae’r canlyniadau’n ei olygu a gwneud newidiadau cadarnhaol.
Iechyd a Gofal Digidol Cymru (DHCW) yn Rewired 2023

Daeth DHCW a'r gymuned iechyd digidol at ei gilydd am ddau ddiwrnod o ddysgu a rhwydweithio yn Digital Health Rewired yn gynharach y mis hwn. Roedd sefydliadau'r GIG a gofal cymdeithasol, darparwyr gofal iechyd preifat a chyflenwyr yn bresennol yng Nghanolfan Dylunio Busnes Llundain.

Roedd rhaglen gynhwysfawr o siaradwyr yn ganolbwynt i'r digwyddiad, ac roedd saith aelod o DHCW yn tynnu sylw at rôl DHCW yn y broses ddigidol o drawsnewid iechyd a gofal yng Nghymru. 
Sbotolau ar Ymchwil ac Arloesi yng Nghymru

Gwahoddwyd Rachael Powell, Cyfarwyddwr Cyswllt Gwybodaeth, Deallusrwydd ac Ymchwil Iechyd a Gofal Digidol Cymru a Rachel Gemine, Pennaeth Ymchwil ac Arloesi, i fod yn bresennol yn nigwyddiad BioCymru yn Llundain ar Mawrth 14 2023 fel siaradwyr gwadd i gyflwyno sesiwn ar 'Gweithio gyda GIG Cymru’ gan drafod trawsnewid digidol, cefnogi ymchwil ac arloesi trwy fynediad at ddata a phwysigrwydd partneriaethau effeithiol.

Dywedodd Rachael Powell, “Ar ôl cyhoeddi Strategaeth Ymchwil ac Arloesi Iechyd a Gofal Digidol Cymru, roedd yn wych ymuno â chydweithwyr ledled Cymru a phartneriaid diwydiant ac academaidd posibl i siarad am ein cynlluniau ar gyfer cydweithio i wella’r gwaith arloesi yng Nghymru trwy wella cyfleoedd data a digidol.”