Manaʻo Wehe Na Ko
HTA Pelekikena A Luna Hoʻokele John De Fries
|
|
Aloha kākou,
Ma ka holo ʻana o kēia makahiki i ka hapahā ʻelua, lana aʻe ka manaʻo no ke ala i mua o kākou ma ka ʻimi ʻana i ka ʻoihana hoʻokipa hoʻoulu hou. Ke mālie mai nei nā mea kūlanalana o ka wā maʻi ahulau, me ka ulu o ka ʻoluʻolu o ka poʻe i ka huakaʻi hele a me ke emi ʻana iho o ka ʻoʻoleʻa o nā lula ma nā mākeke kauʻāina.
I kēia pule aʻe, e hoʻokipa ana ʻo Hawaiʻi i kekahi hui no ka Japan Association of Travel Agents (JATA), kahi e hui ai mākou me nā pāʻoihana koʻikoʻi me nā pakanā ʻoihana hoʻokipa, pau pū me nā ʻelele pāpaho huakaʻi o Iāpana, no ka nānā i nā lanakila a me nā ālaina i koe no ka hoʻomau ʻana i ka huakaʻi i waena o Hawaiʻi me ko mākou mākeke kauʻāina nui loa. E heluhelu ma lalo iho nei no ka ʻike hou no kēia mākeke a me nā mākeke ʻē aʻe.
Mau nō ke kia o ko mākou kime ma ka hoʻokō i nā pahuhopu o nā Papahana Mālama ʻĀina Hoʻokipa ma ke alu like ʻana me nā kaiāulu o kēlā me kēia mokupuni, me ka hoʻomau pū i ka hoʻonaʻauao i nā hoa kipa no ko lākou kuleana e Mālama Kuʻu Home, he kuleana e ʻauamo like ʻia me nā kamaʻāina, ma ka ʻimi ʻana i nā hoa kipa kūpono no ka ʻāina nei.
Mahalo no kou kākoʻo mau ʻana mai!
|
|
John De Fries
Pelekikena a Luna Hoʻokele
Keʻena Kuleana Hoʻokipa O Hawaiʻi
|
|
Ke Aliʻi Makaʻāinana
He kamāliʻi kāne ʻo Jonah Kūhiō Kalanianaʻole i mālama i kona poʻe. Hānau ʻia ʻo ia ma ka lā 26 o Malaki, makahiki 1871 a ua nui kona kuleana. ʻOiai he ʻohana keiki i ka Mōʻī Kalākaua, hoʻokohu ʻia ʻo ia e kona ʻanakala i ka ʻaha kuhina o Hawaiʻi. Ma hope mai i lilo ʻo ia he ʻelele o ka ʻAhaʻōlelo o ʻAmelika Hui Pū ʻIa, a nāna nō i alakaʻi i ka ka Hawaiian Homes Commission Act. Nāna nō i hoʻōla pū i ka Royal Order of Kamehameha I a me ka Hawaiian Civic Club. ʻO kona inoa kapakapa ʻo Kealiʻi Makaʻāinana, he mea ia e hoʻohanohano a hoʻomanaʻo hoʻi i kona ʻano mālama. A i mea e mālama hoʻi i kona hoʻoilina, eia nō mākou e ʻauamo like ana i ke kuleana o ka mālama ʻana i ko kākou Hawaiʻi.
|
|
HTA + NaHHA
No mākou nei ma HTA ke kuleana o ka hāpai ʻana a’e i ko kākou kaiaulu – nā alakaʻi naʻauao hoʻi e ʻauamo like ana me mākou nā ʻano a pau e hoʻōla hou i ko kākou moʻomeheu Hawaiʻi, keu hoʻi ka ʻōlelo, a me kona ʻano ʻoiaʻiʻo ma Hawaiʻi nei. He leo mahalo kēia iā NaHHA no ka ʻimi ʻana i ia mau ala hoʻōla i laha ma Hawaiʻi a i waena o ka lehulehu huakaʻi hele ia mea o ka hoʻokipa Hawaiʻi ʻoiai ua mākaukau nā ʻaoaʻo ʻelua e mālama i ko Hawaiʻi.
“I kaʻu ʻike, kēia manawa, ua mākaukau ka lehulehu huakaʻi hele no ka ʻike i ka ʻoiaʻiʻo o nā ʻāina e kipa ʻia,” wahi a ka Luna Mālama Pilina Kānaka o HTA.
I kona manaʻo, makemake ka poʻe malihini e hoʻihoʻi iā Hawaiʻi ma kā lākou kipa ʻana a ʻo ia nō ka ʻīkoi o ka hoʻokipa a ʻo ia nō ka pahuhopu o NaHHA mai ka hoʻomaka – ka hoʻōla hou ʻana i kēia ʻano o ke kipa i pili hoʻi i ke kumu hoʻokipa hoʻoulu hou.
Eia hou, wahi a Ilihia: “Ma o ka hana alulike ʻana me nā pakanā e like me NaHHA, a me nā pakanā o nā papahana Kūkulu Ola a Aloha ʻĀina a pēlā aku, pēlā e hōʻea ai i kēlā pahuhopu.”
E nanea mai i kēia wikiō a e kele aku nō i nā waihona kūlelepaho HTA no nā moʻolelo hou aku no ko HTA kākoʻo i ka ʻŌlelo Hawaiʻi. |
|
Hoʻohanohano ʻia ʻo Laʻiʻōpua 2020 e HTA no ka Hoʻōla Moʻomeheu Hawaiʻi
ʻO kekahi pahuhopu o Laʻiʻōpua 2020 ʻo ia ka mālama ʻana i ke ahupuaʻa a kaiaulu o Kealakehe ma ka Mokupuni o Hawaiʻi a ʻo ia kekahi pahuhopu like o ka polokalamu Kūkulu Ola a HTA ma o ka hāpai ʻana aku i nā alakaʻi ma Hawaiʻi. No Laʻiʻōpua 2020, ʻo ka haʻi moʻolelo a me ka hoʻonui ʻike ma o kā lākou polokalamu ʻo “Ola ka Lāhui” ke ʻano a lākou e kūkulu ola.
“Nui ko mākou mahalo i ke kākoʻo o HTA i kā mākou hana ma o Kūkulu Ola a nui ko mākou hauʻoli e kaʻana i ka lehulehu ākea,” wahi a ka Luna Hoʻokō o Laʻiʻōpua 2020, ʻo Kawehi Inaba hoʻi. “He waiwai lua ʻole iā mākou, ka hiki ke paʻi wikiō a kaʻana aku i nā moʻolelo o nā kupa o kēia ʻāina i ola mau i waena o nā hanauna e hiki mai ana.”
Ua mālama ʻia ka hanana Ola ka Lāhui mua ma ka lā 26 o Malaki ma ka Lā Kūhiō hoʻi. No ka ʻikepili hou aku, e heluhelu i ka moʻolelo nūhou. |
|
Ke puka nei nō kākou ma kahi ʻaoʻao o ka maʻi ahulau COVID-19 a ua ʻike ʻia nō ka holomua ma STAH, keu hoʻi ma ko lākou ʻimi ʻana e mālama i nā kumuwaiwai kūlohelohe a me ka moʻomeheu Hawaiʻi.
Ke kālele nei ʻo STAH ma ʻekolu kumuhana nui - ʻo ka palapala mākaʻikaʻi makaʻala kūhelu, ka ʻoihana aʻoaʻo, a me ka hoʻākea ʻana i ia ʻike mākaʻikaʻi. He 35 hui e hōʻano hou ana i ko lākou palapala mākaʻikaʻi a ua kāinoa he ʻelima hou aku. Ua hoʻāla hou ʻia kā STAH pūnaewele aʻo i kū i nā SDG a ka United Nations a ke haku nei ʻo STAH i kekahi ʻano hou e ʻume ʻia ai nā hui ʻē aʻe.
Maikaʻi wale kēia papahana a hoihoi nō mākou e ʻike i kona ulu aʻe ʻana me kēia ʻike mālama a makaʻala hoʻi.
|
|
Ka Hoʻolauna iā Hawaiʻi ma o ka Papahana Mālama ʻĀina Hoʻokipa
Komo koke ana kākou i loko o ke kauwela a i loko nō o ka paʻahana loa o ia wā no ka nui o ka huakaʻi hele ʻana o kānaka, he wā kūpono nō ia e aʻoaʻo like i nā hoa kipa o kākou i ke ʻano e kipa mai ai i Hawaiʻi. He mea ia i hāpai pinepine ʻia ma ka Papahana Mālama ʻĀina Hoʻokipa a eia nō mākou e kākoʻo ana i ke kō o kēia ma o nā hoʻolaha mai ka hoʻopaʻa mokulele a ma o ka huakaʻi ʻana, ma ka pūnaewele a ma ka ʻāina a ma nā hanana kekahi.
Ua ʻike paha ʻoe i ia mau wikiō ma ke ao pāpaho na Hawaiʻi Tourism USA e paipai ana i ka holomua o ka papahana Mālama ʻĀina Hoʻokipa a me ko kākou kuleana ma ke kaiaulu – keu hoʻi me nā pakanā o nā Papahana Hoʻoulu Kaiāulu, Kūkulu Ola a Aloha ʻĀina. ʻO ka hopena ʻo ia ke komo like ʻana o nā kamaʻāina a malihini i ka hana e mālama iā Hawaiʻi.
Eia ma lalo iho nei nā hana maikaʻi hou aku a kēlā me kēia mākeke.
|
|
ʻUme ʻia Ma ʻŌ Aku o ka 1,400 Kānaka i kā Travel Weekly Hanana ʻo Hawaiʻi Loves Travel Advisors
He mea kākoʻo ʻo HTUSA i ka hanana ʻo Hawaiʻi Loves Travel Advisors a Travel Weekly ma ka lā 16 o Pepeluali, kahi i hōʻea aku ai he 1,422 kānaka. ʻO kekahi kuleana o HTUSA ma ua hanana nei, ʻo ia ka hōʻikeʻike i 720 kānaka kauleo ma ka ʻoihana huakaʻi hele e kālele ana i nā koina huakaʻi, nā ʻano kūikawā o kēlā me kēia mokupuni a me ka manaʻo ʻo Mālama Hawaiʻi ma o ka nānā ʻana i nā wikiō o ʻehā ʻelele o ua papahana nei i mea e mahalo ka poʻe i kahi a me ka poʻe a lākou e kipa ana. Ua kūkulu pū ʻia kekahi kaunoʻo kikohoʻe na HTUSA e kaʻana aku i nā kumuwaiwai ma ka pūnaewele he 2,000 a ʻoi e laʻa hoʻi me gohawaii.com i ke 620 kānaka i hōʻea aku.
|
|
Hoʻohanohano ʻia ka ʻŌlelo Hawaiʻi ma ka Mahina ʻŌlelo Hawaiʻi ʻUmi
ʻOiai ʻo ka piha makahiki ʻumi kēia o ka Mahina ʻŌlelo Hawaiʻi, ua hoʻohanohano ʻia ka ʻōlelo Hawaiʻi e Hawaiʻi Tourism Japan ma nā ʻano like ʻole o ke ao pāpaho. ʻO ke kaʻana ʻana i nā ʻōlelo noʻeau kekahi a ʻo nā hōʻike hōʻoia kekahi aku a ua mahalo ʻia kēia ʻike e 1.1 miliona kānaka. ʻO ka 550,000 ka ʻawelike o ka nui poʻe i ʻike i ia mau mahele.
ʻO kā lākou moʻolelo nūhou i hoʻolaha aku no ka Mahina ʻŌlelo Hawaiʻi kekahi i ʻike ʻia e ka nui poʻe, ma kahi o ke 41 miliona ka nui. A no kā lākou mau papa i mālama ʻia ma ka pūnaewele i kēlā me kēia Poʻaono, ua hōʻea he 2,793 haumāna e makemake ana e hoʻomau i ke aʻo i ka ʻōlelo Hawaiʻi a me ka moʻomeheu kekahi.
|
|
Hoʻomākaukau ana no JATA a me ka Trade Media Press Tour
Ke hoʻomākaukau nei nō ʻo HTJ no JATA a me ka Trade Media Press Tour e mālama ʻia ana ma Hawaiʻi ma ʻApelila 3 i ka 8. E hoʻokipa ʻia ana he 18 poʻo o nā pāʻoihana huakaʻi hele nui e ko Hawaiʻi a e launa pū ana me nā poʻo o Hawaiʻi e hoʻomākaukau pono no ka hoʻokipa hoʻihoʻi a hoʻoulu hou ma Hawaiʻi.
E komo ana nō nā pakanā pāpaho ʻo Wing Travel, Travel Watch, Travel Voice a me Travel Vision i nā hanana hoʻokipa hoʻihoʻi me ke kaiaulu e aʻo i ka moʻomeheu Hawaiʻi a me ke ʻano e mahalo maoli iā Hawaiʻi. ʻO ia ke kumu i hoʻoholo ʻia ʻo Mālama Hawaiʻi ʻo ia ka mākia o ia hanana nui.
|
|
Hōʻemi ʻia ka ʻOʻoleʻa o nā Koina Lele ma Iāpana
Ua hōʻemi ʻia ka ʻoʻoleʻa o nā koina lele e ke aupuni ma Iāpana ma o ka hoʻonui ʻana i ka heluna kānaka i hiki ke lele i ka ʻāinai ka 5,000 mai ka 3,500 ma Malaki 1 a laila i ka 7,000 ma Malaki 14. Ua emi pū mai nā koina no nā ʻōiwi e hoʻi ana i ka ʻāina.
ʻOiai i hoʻoholo pū ʻia e noa ka lele ʻana mai Hawaiʻi i Iāpana, ua kāpae ʻia kekahi o nā koina hoʻomalu maʻi – aia i ka lāʻau koʻokoʻo a hōʻike paha.
|
|
Hōʻemi ʻia ka ʻOʻoleʻa o nā Koina COVID-19 no ka Lele ʻana ma Kanakā
No ka poʻe lāʻau koʻokoʻo ʻia, ʻaʻole pono e hōʻoia me ka hōʻike PCR no ke komo ʻana i Kanakā. Eia hou, ua ʻāpono ʻia nā hōʻike rapid-antigen i makaʻala ʻia e kekahi ʻelele kūhelu. No nā keiki ma lalo o ka 12 makahiki i lāʻau koʻokoʻo ʻole ʻia, ʻaʻole pono e hoʻomalu maʻi ma hope o ka hōʻea ʻana aku i Kanakā.
|
|
Hoʻopuka ʻia ka Hoʻolaha hou no Hawaiʻi e HTCAN a me Baxter Media
E hana like ana ʻo Hawaiʻi Tourism Canada me me Baxter Media e hoʻopuka i kekahi moʻolelo e pili ana iā Hawaiʻi i kēlā me kēia mahina o kēia makahiki ma ka makakina ʻo Travel Courier. ʻO nā kumuhana e kālele ʻia ʻo ia hoʻi ka moʻomeheu Hawaiʻi, ʻo Mālama Hawaiʻi, nā hoʻolauleʻa a me nā ʻaoʻao kūikawā o kēlā me kēia mokupuni. ʻO Baxter Media kekahi o nā hui pāpaho helu ʻekahi ma Kanakā.
|
|
Ua lāʻau koʻokoʻo ʻia he 94% o ko Aotearoa a me ko ʻAukekulelia poʻe. Eia hou, ʻo nā hōʻike PCR ai ʻole rapid-antigen ma mua o ka haʻalele a ma mua o ka hoʻi mai wale nō ke koina no ka huakaʻi ʻana. Eia naʻe, mau nō ka pilikia ka ʻoihana huakaʻi hele ma Aotearoa i ka maʻi ahulau COVID-19 Omicron. |
|
Hōʻikeʻike ʻo HTO ma ka Personal Travel Managers State Meeting Melbourne
Ma ka lā 28 o Pepeluali i hōʻikeʻike ai ʻo Hawaiʻi Tourism Oceania ma PTM State Meeting Melbourne me 60 a ʻoi manakia huakaʻi hele pilikino. ʻO ia ka makamua o ka hui alo a he alo ma ka holo ʻana o ʻelua makahiki. Ua kaʻana aku ʻo HTO e pili ana iā Mālama Hawaiʻi a no kēlā me kēia mokupuni. Mai laila aku i hoʻopaʻa kūhelu ʻia nā huakaʻi no nā kānaka lawelawe ma Melbourne, Brisbane a me sydney.
|
|
Kaʻana ʻia nā Mea Hawaiʻi ma ka International Media Marketplace
Ua ʻākoakoa nā ʻoihana a ʻelele pāpaho he 320 ma Sydney i kēlā mahina aku nei e launa a e aʻo no nā mea e Hawaiʻi ai ʻo Hawaiʻi. Ma laila i noho ai ka Luna Mālama Pilina Kanaka ʻo Anna Riedel lāua ʻo Kris Phadungkiatipong, ka Manakia ʻOihana Mākaʻikaʻi a Pakanā hoʻi me 22 ʻāhaʻilono i hoihoi i ka hoʻopuka moʻolelo no ke ʻano kūpono e huakaʻi ai i Hawaiʻi.
|
|
Nā Kiʻi mai kā HTO Kaunoʻo Kiʻi ma Mardi Gras Fair Day
E nanea mai i kēia mau kiʻi leʻaleʻa a HTO i paʻi ai ma kā lākou kaunoʻo kiʻi ma ka Mardi Gras Fair Day i mālama ʻia ma Sydney ma ka lā 20 o Pepeluali. Ua kūkulu ʻia kēia kaunoʻo me Prince Waikiki a me Sheraton Waikiki no kahi hoʻokūkū a i mea hoʻi e paipai i ka poʻe LGBTQIA+ e kipa iā Hawaiʻi.
|
|
Ua mālama ʻia ka hanana ʻo “The Story of Pele” e ka Hawaiʻi Culture and Art Center ma Shangai i ka hoʻomaka o kēia makahiki a ua kono ʻo Hawaiʻi Tourism China i nā pakanā o ka ʻoihana hoʻokipa e laʻa hoʻi me nā hui mokulele, nā hui huakaʻi hele a me nā ʻelele Brand USA – he 15 kānaka koʻikoʻi hoʻi e hōʻea like me ka 200 a ʻoi kānaka. Ma ia hanana nei i hoʻolele ai ʻo HTC i nā wikiō Mālama Hawaiʻi ma ka ʻaha wehena a laila hoʻi ma o nā waihona kūlelepaho ʻo WeChat, Weibo, Little Red Book a me Douyin. Ua kaʻana pū ko HTC i nā hanana nui ʻē aʻe kekahi, e like hoʻi me ka Lunar New Year a me ko ka Papahana Hoʻoulu Kaiāulu. Ua ʻume ʻia he 1.6 miliona kānaka i ka eʻe aku a 114,000 manaʻo i hāpai a kaʻana ʻia.
No ka wā e hiki mai ana, ke hoʻomākaukau nei ʻo HTC i kahi papahana WeChat kahi a lākou e kaʻana aku i ka ʻikepili o ka pae ʻāina o Hawaiʻi i huki a unuhi ʻia mai gohawaii.com a me meethawaii.com. ʻO ka manaʻo lana, ʻo ia ke kele ʻana aku nō o ka 1.26 biliona kānaka i kēlā me kēia mahina. ʻO ka 20 miliona o kēlā no ʻAmelika nō.
|
|
Ua hoʻopuka ʻo Hawaiʻi Tourism Korea i kekahi papahana pāpaho e aʻoaʻo ana i ka poʻe no nā polokalamu Mālama Hawaiʻi ma Oʻahu, Maui, Kauaʻi a ma Hawaiʻi Mokupuni. Ma ka hopena i helu ʻia he 22,000 hou kānaka i kele aku i ka nānā a launa. ʻO kekahi papahana hou a lākou e hoʻolaha ana, ʻo ia hoʻi ʻo #OnoHawaii e paipai ana i ka hanauna Z e kākoʻo i nā pāʻoihana Made in Hawaiʻi ma o ka mea ʻai. ʻO kekahi mau lāʻana a lākou i hoʻolaha aku, ʻo ia hoʻi ke kokoleka i hoʻomākaukau ʻia me ke kope o Kona, ka mea ʻono acai, ka mea ʻai KuaʻAina Sandwich a me ke kulina pūlehu.
Ke hoʻomākaukau pū nei ʻo HTK i nā huakaʻi hoʻokamaʻāina no nā luna hoʻokele o nā hui huakaʻi hele nui a me nā kānaka hoʻopaipai kūlelepaho e hōʻea mai i Hawaiʻi ke hoʻomaka hou ʻo Asiana Airline i ka lele ʻana. E hōʻea ana nō he 10 kānaka lawelawe a me kekahi manakia nui o Asiana Airline i Oʻahu no ka ʻike maka i ka manaʻo ʻo Mālama Hawaiʻi. E lele mai ana he ʻeono kānaka hoʻopaipai kūlelepaho i Oʻahu a i Maui kekahi no ka paipai ʻana i ka poʻe Kōlea e lele mai kekahi, ʻo Hawaiʻi ko lākou koho mua ma hope o ka pāpā ʻia o ka lele ʻana. ʻO kekahi mau mea a lākou e hōʻikeʻike ai, ʻo ia hoʻi ko Hawaiʻi ʻano palekana, maʻemaʻe, ka waiwai o nā kumuwaiwai kūlohelphe a me ke koʻikoʻi o ka hoʻokipa hoʻoulu hou.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
