ᒪᐃ 2021                                                                
ᓴᓇᕝᕕᐅᔪᓄᑦ ᐊᑦᑕᕐᓇᖅᑕᐅᓕᒪᓂᖅ
ᐃᖅᑲᐃᓯᒋᐊᕈᑏᑦ ᐃᑲᔫᑎᒃᓴᓪᓗ

ᐊᐅᔭᒃᑯᑦ ᓴᓇᕝᕕᐅᔪᖅ ᑎᑭᒃᑭᕗᖅ. ᑕᐃᒪᐃᓕᕌᖓᑦ ᐊᕐᕌᒍᒥᑦ ᐊᒥᓱᑦ ᐃᖅᑲᓇᐃᔭᖅᑏᑦ ᓄᑖᓂᒃ ᐃᖅᑲᓇᐃᔭᓕᖃᑦᑕᕐᒪᑕ, ᓄᑖᑦ ᐃᖅᑲᓇᐃᔭᖅᑏᑦ, ᓄᑖᑦ ᐃᖅᑲᓇᐃᔭᕐᕕᖕᓂᑦ ᖃᓄᐃᓕᖓᓂᐅᔪᑦ, ᐊᒻᒪᓗ ᓄᑖᓪᓚᕆᐊᓗᐃᑦ ᐃᖅᑲᓇᐃᔭᕐᕕᖕᓄᑦ ᐃᓃᑦ. ᐃᒪᐃᒃᑲᓗᐊᖅᐊᑦ ᑲᒻᐸᓂᒋᔭᐃᑦ ᐱᓕᕆᖃᑦᑕᕋᓗᐊᕈᓂ ᓴᓇᕝᕕᐅᔪᓂᑦ ᐅᕝᕙᓘᓐᓃᑦ ᐊᓯᖏᓐᓂᒃ, ᐃᓱᒪᒋᒍᒃ ᖃᓄᖅ ᐊᐅᔭᒃᑯᑦ ᓴᓇᕝᕕᐅᔪᕐᓄᑦ ᐱᓕᕆᓃᑦ ᐊᒃᑐᐃᓂᐊᕐᒪᖔᑦ ᐃᖅᑲᓇᐃᔭᕐᕕᖕᓂᑦ. ᐃᒡᓗᓕᐅᖅᐸᓪᓕᐊᕚᑦ ᑕᐃᑲᓂ ᐅᕝᕙᓘᓐᓃᑦ ᖃᓂᒋᔭᖓᓂᑦ ᑎᑎᕋᕐᕕᐅᑉ ᐱᓕᕆᕝᕕᐅᔫᑉ ᐃᓂᐊᖓᓂᓘᓐᓃᑦ? ᐊᖅᑯᑏᑦ ᒪᑐᔭᐅᓯᒪᕚᑦ ᐊᖅᑯᑏᑦ ᓴᓇᔭᐅᕙᓪᓕᐊᓪᓗᒋᑦ ᐃᖅᑲᓇᐃᔭᕐᕕᓕᐊᕆᐊ ᐊᖅᑯᑎᖏᑦ? ᐃᖅᑲᓇᐃᔮᑦ ᐊᔾᔨᖃᐸᓗᒃᐹ ᐊᕐᕌᒍ ᐃᓚᐃᓐᓇᖓᑕ ᐃᓗᐊᓂ ᐅᓄᖅᓯᒋᐊᖃᖅᑕᖅᑐᓄᑦ ᐱᓕᕆᐊᒃᓴᓄᑦ? ᐱᑕᖃᖅᑐᑦ ᐃᑲᔫᑎᒃᓴᓂᒃ ᑕᕝᕙᓂ ᑎᑎᕋᖅᑕᐅᓯᒪᔪᒥᑦ ᐃᑲᔪᕐᓂᐊᖅᑐᑦ ᓇᖕᒥᓂᖁᑎᖕᓂᑦ.

ᐃᖅᑲᐃᓯᒋᐊᕈᑏᑦ
  • ᐋᓐᓂᖅᑐᓕᕆᓂᖅ ᒪᓕᒐᒃᑯᑦ ᐊᓯᔾᔨᖅᓯᒪᔪᑦ − 2021-ᒥᑦ, ᐊᓯᔾᔨᖅᑐᖃᓚᐅᖅᑐᑦ ᐋᓐᓂᖅᑐᓕᕆᓂᕐᒧᑦ ᒪᓕᒐᕐᒧᑦ ᓄᓇᕘᒥᑦ ᐊᒻᒪᓗ ᓄᓇᑦᓯᐊᒥᑦ. ᒪᓕᒐᒃᑯᑦ ᐊᓯᔾᔨᐅᑏᑦ ᐊᒃᑐᐃᓂᖃᖅᑐᑦ ᖃᐃᓄᑦᑐᓂᒃ ᐊᒻᒪᓗ ᖃᔅᓯᐅᔭᕆᐊᖃᕐᓂᖏᑦ ᐋᓐᓂᖅᑐᓕᕆᓂᕐᒧᑦ ᐴᖅᑲᖅᓯᒪᔪᑦ ᐱᑕᖃᕆᐊᓖᑦ ᓴᓇᕝᕕᖕᓂᑦ, ᐊᒻᒪᓗ ᐅᓄᕐᓂᖏᑦ ᐃᓄᐃᑦ ᐃᓕᓐᓂᐊᖅᓯᒪᔭᕆᐊᓖᑦ. ᖄᒃᑲᓐᓂᐊᒍᑦ, ᖁᐊᖅᓵᕐᓇᕈᓐᓇᖅᑐᓄᑦ ᖃᐅᔨᓴᕈᑏᑦ ᐱᐊᓂᒃᑕᐅᖃᑦᑕᕆᐊᖃᓕᖅᑐᑦ ᐊᑐᓂ ᐃᖅᑲᓇᐃᔭᕐᕕᖕᓄᑦ ᐃᓂᓄᑦ. ᐊᑐᖃᑦᑕᕐᓂᐊᖅᐳᓯ ᓄᑖᖑᓛᓂᒃ ᑐᓴᐅᒪᔾᔪᑎᓂᒃ ᐃᐊᓂᒃᓯᓕᕌᖓᔅᓯ ᐋᓐᓂᐊᖅᑐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᑕᖃᖅᑎᑦᑎᔪᑦ ᐃᑲᔫᑎᒃᓴᑦ ᐃᑲᔪᕐᓂᐊᖅᑐᑦ ᐃᓕᖕᓂᒃ ᐊᑐᓕᖅᑎᑦᑎᓇᓱᐊᖅᑎᓪᓗᑎᑦ ᑕᒪᒃᑯᓂᖓ ᒪᓕᒐᒃᑯᑦ ᐊᓯᔾᔨᖅᓯᒪᔪᓂᒃ.
  • ᖁᐊᖅᓵᕐᓇᖅᑐᒻᒪᕆᖕᒥᒃ ᐱᓕᕆᐊᖃᕐᓂᕐᒧᑦ ᖃᐅᔨᒃᑲᐅᔾᔪᑎ − ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᑦ ᓄᓇᕘᒥᑦ ᐊᒻᒪᓗ ᓄᓇᑦᓯᐊᒥᑦ ᐅᖃᖅᓯᒪᔪᑦ ᑐᓂᓯᔭᕆᐊᖃᖅᑐᑎᑦ ᖃᐅᔨᒃᑲᐃᔾᔪᑎᓂᒃ ᐊᑦᑕᕐᓇᖅᑕᐃᓕᑎᑦᑎᔨᒻᒪᕆᖕᒧᑦ ᕿᓚᒻᒥᐅᔪᒃᑯᑦ ᐱᒋᐊᖅᑳᖅᑎᓐᓇᑎᑦ ᖁᐊᖅᓵᒃᓇᖅᑐᒻᒪᕆᖕᒥᒃ ᐱᓕᕆᐊᖃᓂᕐᒥᒃ. ᒪᓕᒐᖅᑎᒍᑦ, ᓄᑖᑦ ᐊᐅᓚᓃᑦ ᓴᓇᕝᕕᐅᔪᓂᑦ ᓇᓗᓇᐃᖅᑕᐅᓯᒪᔪᑦ ᑕᑕᑎᕆᔭᕆᐊᓖᑦ ᖁᐊᖅᓵᕐᓇᖅᑐᒻᒪᕆᖕᒥᒃ ᐱᓕᕆᐊᖃᕐᓂᐊᖅᑎᓪᓗᒋᑦ. ᐅᖃᖃᑎᒋᓗᒍ ᐊᑦᑕᕐᓇᖅᑕᐃᓕᑎᑦᑎᔨᒻᒪᕆᒃ ᐅᓪᓗᒥ ᓄᑖᒥᒃ ᐃᒡᓗᓕᐅᓂᕐᒧᑦ ᐱᒋᐊᓛᓕᕈᔅᓯ.
  • ᑲᔪᓯᒋᐊᕈᓐᓇᖅᓯᓂᕐᒧᑦ ᑐᒃᓯᕋᐅᑎᓄᑦ ᑎᑎᖅᑲᖅ − ᐃᖅᑲᓇᐃᔭᓕᖅᑎᑦᑎᓂᐊᕈᕕᑦ ᑳᓐᑐᖄᒃᑎᓂᒃ ᐅᕝᕙᓘᓐᓃᑦ ᑳᓐᑐᕌᒃᓯᒃᑲᓐᓂᐅᔭᕐᓂᐊᖅᑐᓂᒃ ᑕᒪᑐᒪᓂ, ᐃᒪᐃᓕᐅᓯᒪᒋᐊᕐᓂᐊᖅᐳᑎᑦ  ᑎᑎᖅᑲᖅᑖᕐᓗᑎᑦ ᐱᓕᕆᑦᑎᐊᕐᓂᕐᒧᑦ ᑖᒃᑯᓇᙵᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓂᑦ ᐱᒋᐊᖅᑳᖅᑎᓐᓇᑎᑦ. ᑖᓐᓇ ᑎᑎᖅᑲᖅ ᐱᔪᓐᓇᖅᑕᐃᑦ ᐊᑐᕐᓗᑎᑦ ᖃᕆᑕᔭᒃᑯᑦ WSCC Connect. ᐊᑐᖅᖢᑎᑦ ᐃᖅᑲᓇᐃᔭᖅᑎᒧᑦ ᐋᓐᓂᖅᑐᖅᓯᐅᑎᓕᕆᔨᒃᑯᑦ ᒪᓕᒐ(ᑦ), ᐸᓯᔭᒃᓴᐅᔪᓐᓇᕋᕕᑦ ᐊᑭᓕᖅᑕᐅᓯᒪᙱᑦᑐᓄᑦ ᖃᐅᔨᓴᕈᑎᓄᑦ ᑳᓐᑐᕌᒃᑎᑖᕆᔭᕐᓄᑦ. ᑖᓐᓇ ᐱᓕᕆᐊᒃᓴᖅ ᐱᐊᓂᒃᓯᒪᓕᖅᐸᑦ, ᐱᔭᕆᐊᖃᖅᑕᑦ ᑭᖑᓪᓕᖅᐹᒥᒃ ᑲᔪᓯᒋᐊᕈᓐᓇᖅᓯᓂᕐᒧᑦ ᐸᓯᔭᒃᓴᐅᙱᔾᔪᑎᒃᓴᕐᓄᑦ ᐱᓪᓗᒋᑦ ᑳᓐᑐᕌᒃᑎᕕᑦ ᐊᑭᓕᐅᑎᖏᖏᑦ.
  • ᐊᖁᓪᓗᓂ ᐊᑦᑕᕐᓇᖅᑕᐃᓕᒪᓂᖅ  − ᐊᖅᑯᑎᓕᒫᑦ ᓴᓇᔭᐅᑎᓪᓗᒋᑦ ᐱᓕᕆᐊᒃᓴᐅᔪᑦ, ᐊᑕᐅᓯᕐᒥᒃ ᐅᕝᕙᓘᓐᓃᑦ ᐅᖓᑖᓄᑦ  ᐃᖏᕐᕋᔪᓂᒃ ᐊᐅᓚᑦᑎᓂᕐᒧᑦ ᐱᓕᕆᔨᑕᖃᖃᑦᑕᕐᒪ(ᑦ) ᐊᐅᓚᑦᑎᓪᓗᓂ ᐃᖏᕐᕋᓂᖏᓐᓂᒃ ᐃᖏᖏᕐᕋᔭᒃᑐᑦ. ᑭᓇᑐᐃᓐᓇᖅ ᐊᖁᑎᓪᓗᒍ ᑲᒻᐸᓂᒋᔭᕐᓄᑦ ᐊᖁᖃᑦᑕᕆᐊᓕᒃ ᐊᑦᑕᕐᓇᙱᓪᓗᓂ ᑕᐃᑲᓂ ᐊᒻᒪᓗ ᖃᓂᒋᔭᖓᓂᑦ ᓴᓇᕝᕕᐅᔫᑉ ᐃᓂᐅᑉ ᓴᐳᑎᓯᒪᖁᓪᓗᒋᑦ ᐃᖅᑲᓇᐃᔭᖅᑏᑦ ᐱᐅᓯᒋᐊᕆᓴᓱᐊᖅᑎᓪᓗᒋᑦ ᐊᖅᑯᑎᑦᑎᓐᓂᒃ. ᐃᖅᑲᐅᒪᔾᔪᑎᑦᑎᐊᕙᐅᒧᖅ ᐊᑕᖏᕐᓗᒋᑦ ᐃᖅᑲᓴᐃᔭᖅᑏᑦ ᑕᐃᑯᙵᐅᖃᑦᑕᖅᑐᑦ ᐃᖅᑲᓇᐃᔭᕐᕕᖕᒧᑦ.
  • ᐃᓕᓐᓂᐊᕐᓂᖅ ᐊᒻᒪᓗ ᐱᓕᕆᖃᑎᒌᖕᓂᖅ − ᐱᓕᕆᑎᓪᓗᓯ ᐅᕝᕙᓘᓐᓃᑦ ᐱᓕᕆᕝᕕᓯ ᓅᒃᑳᖓᑦ ᐊᖅᑭᒋᐊᖅᑕᐅᒑᖓᓪᓘᓐᓃᑦ, ᐃᖅᑲᐅᒪᓂᐊᖅᐳᑎᑦ ᐃᓕᓐᓂᐊᖅᑎᓪᓗᒋᑦ ᐃᖅᑲᓇᐃᔭᖅᑏᑦ ᓄᑖᓂᒃ ᖁᐊᖅᓵᕐᓇᕈᓐᓇᖅᑐᓂᒃ ᐅᕝᕙᓘᓐᓃᑦ ᐊᓯᔾᔨᖅᑐᓂᒃ ᐱᓕᕆᐊᒃᓴᕆᔭᐅᔪᓂᑦ ᐊᒻᒪᓗ ᐃᖅᑲᓇᐃᔭᕐᕕᐅᑉ ᐃᓂᖏᓐᓂᒃ. ᑲᑎᒪᑎᑦᑎᑲᔪᖃᑦᑕᕐᓂᐊᖅᐳᑎᑦ, ᐊᒻᒪᓗ ᑲᔪᖏᖅᓴᕐᓗᒋᑦ ᐃᖅᑲᓇᐃᔭᖅᑏᑦ ᓴᖅᑮᖃᑦᑕᖁᓪᓗᒋᑦ ᐊᐱᕆᔪᓐᓇᖁᓪᓗᒋᑦ ᐅᕝᕙᓘᓐᓃᑦ ᐃᓱᒫᓘᑎᖏᓐᓂᒃ. ᐊᑦᑕᕐᓇᖅᑕᐃᓕᒪᓂᖅ ᐱᓕᕆᖃᑎᒌᒍᑕᐅᔭᕆᐊᓕᒃ, ᐊᒻᒪᓗ ᑕᑯᔭᐅᖅᑳᖃᖅᑕᖅᑐᑦ ᐃᖅᑲᓇᐃᔭᖅᑏᑦ ᐱᐅᓛᖑᓪᓗᑎᒃ ᐃᑲᔫᑎᒃᓴᐅᓪᓗᑎᒃ ᐃᓕᖕᓄᑦ ᐱᐅᓯᒋᐊᕈᓐᓇᖁᓪᓗᒍ ᐊᑦᑕᕐᓇᖅᑕᐃᓕᒪᔾᔪᑎᑎᑦ.
ᐃᑲᔫᑎᒃᓴᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᓕᕆᔾᔪᑎᖏᑦ ᐊᒻᒪᓗ ᐃᑲᔫᑎᒃᓴᖏᑦ ᐃᑲᔪᖁᓪᓗᒋᑦ ᐃᓕᖕᓂᒃ ᐊᑦᑕᕐᓇᖅᑕᐃᓕᒪᓂᖅ ᐃᓱᒪᒌᓐᓇᖁᓪᓗᒍ ᓴᓇᕝᕕᖕᓂᑦ ᓴᓇᕝᕕᖕᒥᑦ.
  •  ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᖃᕆᓴᐅᔭᒃᑰᕈᑎᐊ − ᐱᐅᔪᓪᓚᕆᒃ ᐊᑐᖅᑕᐅᔪᓐᓇᖅᑐᑦ ᑭᓇᑐᐃᓐᓇᕐᒧᑦ ᐃᖅᑲᓇᐃᔭᕐᕕᖕᒦᖏᑎᓪᓗᑎ! ᑖᓐᓇ ᐅᖄᓚᐅᑎᕋᓛᒃᑰᕈᑎ ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒐᕐᓕᓂᒃ ᐊᒻᒪᓗ ᐃᑲᔫᑎᒃᓴᖏᑦ ᑎᒍᒥᐊᕈᓐᓇᖅᑎᑦᑎᔪᖅ. ᐅᖄᓚᐅᑎᕋᓛᕐᓄᐊᕈᖕᓂ, ᐅᖄᓚᐅᑎᕋᓛᒃᑰᕈᑎ ᑕᑯᔪᓐᓇᖅᑕᐃᑦ ᖃᕆᑕᐅᔭᒃᑰᕈᓐᓇᐅᑎᖃᙱᒃᑲᓗᐊᕈᕕᑦ ᐊᒻᒪᓗ ᐱᓯᒪᐃᓐᓇᕈᓐᓇᖅᑕᑎᑦ ᐃᑲᔫᑏᑦ ᐅᖄᓚᐅᑎᕋᓛᕐᓂᑦ.
  • ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ − ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ ᑎᑎᖅᑲᐅᔪᑦ ᓇᐃᓈᖅᓯᒪᓪᓗᑎᒃ ᐊᒻᒪᓗ ᐅᓂᒃᑳᖅᓯᒪᔪᑦ ᓄᓇᑦᓯᐊᒥᑦ ᓄᓇᕘᒻᒥᓗ ᐊᑦᑕᕐᓇᖅᑕᐃᓕᒪᔾᔪᑎᓄᑦ ᒪᓕᒐᕐᓂᒃ. ᓇᓗᓇᐃᔭᖅᓯᓯᒪᔪᑦ ᐱᓕᕆᐊᒃᓴᕆᔭᐅᔪᓂᒃ ᐃᖅᑲᓇᐃᔭᖅᑎᑦᑎᔨᓄᑦ, ᐊᖏᔪᖅᑳᓄᑦ, ᐊᒻᒪᓗ ᐃᖅᑲᓇᐃᔭᖅᑎᓄᑦ ᐊᑐᐃᓐᓇᐅᑎᑦᑎᓪᓗᑎᒃ ᑕᑕᑎᕆᐊᓕᖕᓂᒃ ᐊᒻᒪᓗ ᐃᑲᔫᑎᒃᓴᓄᑦ ᐱᐅᓯᒋᐊᖁᓪᓗᒋᑦ ᐊᑦᑕᕐᓇᖅᑕᐃᓕᒪᔾᔪᑎᖕᓄᑦ.
  •  ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᑦ − ᓴᖅᑭᔮᖅᑎᖃᑦᑕᕐᓗᒋᑦ ᑎᑎᕋᖅᑕᐅᓯᒪᔪᑦ ᑎᑎᕋᕐᑯᖕᒥᑦ, ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐃᕐᖐᓐᓈᕈᓐᓇᐅᑎᒃᑯᑦ ᓇᒃᓯᐅᑎᕙᒡᓗᒋᑦ ᐃᖅᑲᓇᐃᔭᖅᑎᖁᑎᖕᓄᑦ. ᐃᖅᑲᐃᓯᒋᐊᕈᑎᐅᔪᓐᓇᖅᑐᑦ ᐱᒻᒪᕆᐅᔪᓄᑦ ᐊᑦᑕᕐᓇᖅᑕᐃᓕᒪᔾᔪᑎᓄᑦ ᐊᖃᐅᓯᐅᕙᒃᑐᓄᑦ.
  • ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᑦ − ᑲᔪᖏᖅᓴᖅᑕᐅᔭᕆᐊᖃᕈᕕᑦ ᐅᓪᓛᒃᑯᑦ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᕐᓄᑦ ᑲᑎᒪᓂᕐᓂᑦ, ᑕᒪᒃᑯᐊ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓃᑦ ᐃᓕᖕᓄᑦ ᓴᓇᔭᐅᓯᒪᔪᑦ! ᑕᒪᒃᑯᐊ ᒪᓕᒃᑕᐅᔪᓐᓇᖅᑐᑦ ᐅᖃᓪᓚᒃᑎᓪᓗᑎᑦ ᐅᖃᐅᓯᖃᖅᖢᑎᒃ ᐊᒥᓱᒐᓚᖕᓂᒃ ᐅᖃᐅᓯᒃᓴᐅᔪᓐᓇᖅᑐᓂᒃ, ᐊᒥᓱᑦ ᐊᒃᑐᐊᔪᑦ ᓴᓇᕝᕕᐅᔪᓂᑦ ᐱᓕᕆᖑᕙᒃᑐᓂᒃ. ᐃᓚᓕᖃᑦᑕᕈᓐᓇᖅᑐᑎᑦ ᓇᓕᐊᖕᓂᑐᐃᓐᓇᖅ ᐃᓂᓄᑦ−ᑖᒃᑯᓄᖓᓪᓚᕆᒃ ᑎᑎᖅᑲᓂᒃ. 
ᐊᐱᖅᑯᑎᒃᓴᖃᕈᔅᓯ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᖕᓄᑦ ᑲᔪᖏᖅᓴᐃᔾᒧᑎᑖᕈᒪᒍᕕᑦ, ᐊᖃᖃᑎᒋᒍᒃ ᑕᐃᒪᐃᑎᑦᑎᑦᑕᐃᓕᔩᑦ ᓴᓇᔨ ᐅᓪᓗᒥ. ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᓴᖅᑎ ᖁᕕᐊᓱᖕᓂᐊᖅᑐᑦ ᐃᓕᖕᓂᒃ ᐃᑲᔪᖅᓯᕆᐊᒃᓴᖅ ᓴᖅᑮᓇᓱᐊᖅᑎᓪᓗᑎᑦ ᐊᑦᑕᕐᓇᙱᓐᓂᖅᓴᒥᒃ ᓴᓇᕝᕕᐅᔪᒥᒃ.


ᓄᑖᑦ, ᐃᖅᑲᓇᐃᔭᓚᐅᒃᑲᒃᑐᑦ, ᐊᒻᒪᓗ ᐃᓅᓱᒃᑐᑦ ᐃᖅᑲᓇᐃᔭᖅᑏᑦ
ᐃᑲᔫᑏᑦ ᓄᑖᓄᑦ ᐊᒻᒪᓗ ᐅᑎᑦᐸᓪᓕᐊᔪᓄᑦ ᐃᖅᑲᓇᐃᔭᖅᑎᓄᑦ

ᐃᒪᐃᒃᑲᓗᐊᕈᓂ ᐃᖅᑲᓇᐃᔭᕐᓗᑎᒃ ᐊᑕᐅᓯᕐᒧᑦ ᐱᓇᓱᐊᕈᓯᕐᒧᑦ, ᐊᑕᐅᓯᕐᒧᑦ ᑕᖅᑭᕐᒧᑦ, ᐅᕝᕙᓘᓐᓃᑦ ᑭᓇᑐᐃᓐᓇᖅ ᐃᖅᑲᓇᐃᔭᓕᖅᑎᑕᐃᑦ ᓯᕗᓂᒃᓴᒥ, ᐃᖅᑲᓇᐃᔭᖅᑎᓗᒃᑖᑦ ᐱᔪᓐᓇᐅᑎᖃᖅᑐᑦ ᐊᑦᑕᕐᓇᙱᑦᑐᒥᒃ ᐃᖅᑲᓇᐃᔭᕐᕕᖃᕐᓗᑎᒃ. ᐊᕐᕌᒍ ᐃᓚᐃᓐᓇᖓᑕ ᐃᓗᐊᓂ ᐃᖅᑲᓇᐃᔭᕐᓃᑦ ᐊᒥᓱᓂᒃ ᐅᔾᔨᒌᙱᑦᑐᓂᒃ ᖃᓄᑐᐃᓐᓈᕈᓐᓇᖅᑐᑦ ᐃᖅᑲᓇᐃᔭᕐᓃᑦ ᐃᖅᑲᐃᓇᐃᔭᖅᑕᐅᔪᓐᓇᖅᑐᑦ: ᐃᖅᑲᓇᐃᔭᐃᓐᓇᐅᔭᖅᑐᑦ, ᐃᓕᓐᓂᐊᖅᐸᓪᓕᐊᔪᒃ ᑭᓱᓕᕆᔨᓪᓚᑦᑖᖑᕐᒧᑦ, ᓄᑖᑦ, ᐊᒻᒪᓗ ᐃᖅᑲᓇᐃᔭᓚᐅᑲᒃᑐᑦ. ᑖᒃᑯᐊ ᐃᖅᑲᓇᐃᔭᖅᑏᑦ ᓇᐃᓴᐅᑎᑎᒍᑦ ᐊᑐᖅᓯᒪᓂᖅᓴᐅᔪᑦ ᖃᓄᐃᓪᓕᓂᕐᓂᒃ ᐅᕝᕙᓘᓐᓃᑦ ᐋᓐᓂᖅᐸᒃᑐᓂᒃ ᓲᖃᐃᒻᒪ ᓄᑖᖑᒐᒥᒃ ᐃᖅᑲᓇᐃᔮᒧᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᖕᓄᑦ.

ᐃᓕᓐᓂᐊᖅᐸᓪᓕᐊᔪᒃ ᑭᓱᓕᕆᔨᓪᓚᑦᑖᖑᕐᒧᑦ ᐊᒻᒪᓗ ᐃᓅᓱᒃᑐᑦ ᓴᓇᔩᑦ ᐃᖅᑲᓇᐃᔭᖅᑏᑦ

ᑭᓇᑐᐃᓐᓇᖅ ᐃᖅᑲᓇᐃᔭᕐᕕᖕᓂᑦ ᑐᖔᓂᑦ 25 ᐊᕐᕌᒍᓖᑦ ᐃᓱᒪᖏᔭᐅᔪᑦ ᐃᓅᓱᒃᑑᔪᑦ ᐃᖅᑲᓇᐃᔭᖅᑏᑦ. ᐃᓅᓱᒃᑐᑦ ᐃᖅᑲᓇᐃᔭᑏᑦ. ᐊᕐᕌᒍᒐᓴᖕᓂᒃ ᐃᖅᑲᓇᐃᔭᖅᓯᒪᙱᒻᒪᑕ ᐃᑲᔪᕋᔭᖅᑐᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓱᒪᓕᐅᕈᑎᓂᒃ ᐊᒻᒪᓗ ᐃᓕᓴᕆᔪᓐᓇᕐᓗᒋᑦ ᐃᖅᑲᓇᐃᔭᕐᕕᖕᒥᑦ ᖁᐊᖅᓵᓇᒐᔪᒃᑐᑦ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᒥᓱᒐᓚᖕᓕᒃ ᐃᑲᔫᑎᒃᓴᓂᒃ ᓴᖅᑮᓯᒪᔪᑦ ᐃᓅᓱᒃᑐᓄᑦ ᐃᖅᑲᓇᐃᔭᖅᑎᓄᑦ, ᑎᑎᕋᖅᓯᒪᓪᓗᑎᒃ ᒪᓕᒃᑕᐅᔪᓐᓇᖅᑐᑦ ᑐᙵᕕᖃᖅᖢᑎᒃ ᐊᑦᑕᕐᓇᖅᑕᐃᓕᒪᓂᕐᒧᑦ. ᐊᑐᕈᓐᓇᖅᑕᑎᑦ ᑕᒪᒃᑯᐊ ᓴᓇᕐᕈᑏᑦ ᐃᑲᔪᖅᑯᓪᓗᒋᑦ ᐃᖅᑲᓇᐃᔭᕐᕕᖕᓄᑦ−ᑖᔅᓱᒧᖓᓪᓚᕆᒃ ᐃᓕᓐᓂᐊᖅᑎᓪᓗᑎᑦ. 
  • ᐃᓅᓱᒃᑐᑦ ᐃᖅᑲᓇᐃᔭᖅᑏᑦ ᓇᓗᓇᐃᒃᑯᑎᑖᕐᓂᕐᒧᑦ ᐃᓕᓐᓂᐊᒐᒃᓴᖅ − 2−ᐃᑲᕐᕋᓄᑦ ᖃᕆᑕᐅᔭᒃᑯᑦ ᐃᓕᓐᓂᐊᒐᒃᓴᖅ ᐃᓕᓐᓂᐊᖅᑎᑦᑎᓯᒪᔪᖅ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᑐᖅᑕᐅᒐᔪᒃᑐᓂᒃ. ᐱᐅᔪᒻᒪᕆᒃ ᐱᒋᐊᕈᑎᒋᓗᒋᑦ ᐃᓕᓐᓂᐊᕈᑎᖏᑦ.
  • ᐃᓅᓱᒃᑐᑦ ᐃᖅᑲᓇᐃᔭᖅᑏᑦ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᑦ − ᓴᓇᕝᕕᖕᓄᑦ − ᑕᒪᒃᑯᐊ ᐃᓕᓐᓂᐊᖅᑎᑦᑎᔨᓂᒃ ᐊᒻᒪᓗ ᐃᓕᓐᓂᐊᖅᑐᓂᒃ ᒪᓕᒃᑕᐅᔪᓐᓇᖅᑐᑦ ᐅᖃᐅᓯᖅᑲᖅᑐᑦ ᐅᖃᐅᓯᒃᓴᓂᒃ ᐊᒃᑐᐊᔪᓂᒃ ᓴᓇᕝᕕᐅᔪᒥᑦ ᐱᓕᕆᐊᖑᔪᓂᒃ. ᐃᓅᓱᒃᑐᑦ ᐃᖅᑲᓇᐃᔭᖅᑏᑦ ᕿᒥᕐᕈᑎᑦᑐᓐᓇᖅᑕᑎᑦ ᐃᓕᓐᓂᐊᖅᑎᓄᑦ ᒪᓕᒃᑕᐅᔪᓐᓇᖅᑐᓂᒃ ᐊᒻᒪᓗ ᐊᑐᕐᓗᒋᑦ ᐃᓕᓐᓂᐊᖅᑎᑦᑎᔨᓄᑦ ᒪᓕᒃᑕᐅᔪᓐᓇᖅᑐᑦ ᐅᖃᓪᓚᒃᐸᓪᓕᐊᓇᓱᐊᖅᑎᓪᓗᑎᑦ. ᑕᒪᒃᑯᐊ ᐱᔭᕆᐅᖅᓴᑎᑦᑎᔪᓕᕆᓃᑦ ᑐᙵᕕᐅᓂᐊᖅᑐᑦ ᐃᖅᑲᓇᐃᔭᖅᑏᑦ ᓯᕗᓂᒃᓴᒥᑦ ᐃᖅᑲᓇᐃᔮᕇᓐᓇᕈᓐᓇᖅᑕᖏᓐᓂᒃ, ᐊᒻᒪᓗ ᐋᖅᑭᒃᓯᓂᐊᖅᑐᑦ ᐊᑐᖅᑕᐅᒐᔪᒃᑐᓂᒃ ᖃᓄᖅ ᐃᓅᓱᒃᑐᑦ ᐃᖅᑲᓴᐃᔭᖅᑏᑦ ᐃᓱᒪᔭᕆᐊᖃᕐᒪᖔᑕ ᐃᖅᑲᓇᐃᔭᕐᕕᖕᒥᑦ ᐊᑦᑕᕐᓇᖅᑕᐃᓕᒪᓂᐅᑉ ᒥᒃᓵᓄᑦ.
  • ᓱᖏᐅᓴᓂᕐᒧᑦ ᒪᓕᒃᑕᐅᔪᓐᓇᖅᑐᑦ ᐊᒻᒪᓗ ᖃᐅᔨᒋᐊᕈᑏᑦ - ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᖃᕐᒥᔪᑦ ᓱᖏᐅᓴᓂᕐᒧᑦ ᒪᓕᒃᑕᐅᔪᓐᓇᖅᑐᓂᒃ ᓄᑖᓄᑦ ᐊᒻᒪᓗ ᐃᓅᓱᒃᑐᓄᑦ ᐃᖅᑲᓇᐃᔭᖅᑎᓄᑦ. ᓇᓗᓇᐃᔭᐃᔪᖅ ᐃᓕᓐᓂᐊᒐᒃᓴᐃᑦ ᑲᔪᓯᕙᓪᓕᐊᓂᖏᓐᓂᒃ ᐃᖅᑲᓇᐃᔭᖅᑎᒧᑦ ᓄᑖᖑᔪᒧᑦ ᐱᓕᕆᐊᖑᓇᓱᒃᑐᓄᑦ ᐃᖅᑲᓇᐃᔭᕐᕕᖕᓂᑦ. ᐃᓚᐅᑎᑦᑎᔪᖅ ᖃᐅᔨᒋᐊᕈᑎᓂᒃ ᐊᑐᕈᓐᓇᖅᑕᕐᓂᒃ ᑎᑎᖅᑲᖁᑎᖃᖁᓪᓗᑎᑦ ᐃᖅᑲᓇᐃᔭᖅᑏᑦ ᐃᓕᓐᓂᐊᒐᒃᓴᖏᓐᓂᒃ, ᐱᓯᒪᔪᓐᓇᖅᑕᑎᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔮᖏᓐᓄᑦ ᑎᑎᖅᑲᖁᑎᓂᑦ ᐊᑦᑕᕐᓇᖅᑕᐃᓕᒪᔾᔪᑎᓄᑦ ᑎᑎᖅᑲᖁᑎᒋᓗᒋᑦ.
ᓄᑖᑦ ᐊᒻᒪ ᐃᖅᑲᓇᐃᔭᓚᐅᑲᖃᑦᑕᖅᑐᑦ

ᐃᒪᐃᒃᑲᓗᐊᖅᑎᓪᓗᒍ ᐃᖅᑲᓇᐃᔭᓚᐅᖅᓯᒪᒐᓗᐊᖅᑎᓪᓗᒋᑦ, ᑲᖐᓱᒋᐊᖃᙱᑦᑐᑎᑦ ᓄᑖᑦ ᐅᕝᕙᓘᓐᓃᑦ ᐃᖅᑲᓇᐃᔭᓚᐅᒃᑲᒃᑐᑦ ᖃᐅᔨᒪᔪᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᔾᔪᓯᕐᓂᒃ ᑖᒃᑯᓄᖓᓪᓚᕆᒃ ᐃᖅᑲᓇᐃᔭᕐᕕᖕᓄᑦ ᐃᓂᓄᑦ. ᑐᓂᖃᑦᑕᕐᓗᒋᑦ ᐊᑕᖏᑦᑎᐊᖅᓯᒪᔪᓂᒃ ᐃᖅᑲᓇᐃᔮᒧᑦ ᐃᓕᓐᓂᐊᕈᑎᓂᒃ ᐃᖅᑲᓇᐃᔭᖅᑎᓗᒃᑖᓄᑦ ᐃᖅᑲᓇᐃᔭᕆᐊᖅᑐᓄᑦ ᐃᖅᑲᓇᐃᔭᕐᕕᖕᓄᑦ. ᐊᒥᓱᑦ ᐃᓅᓱᒃᑐᑦ ᐃᖅᑲᓇᐃᔭᖅᑎᓄᑦ ᑎᑎᖅᑲᖁᑏᑦ ᐊᑐᖅᑕᐅᔪᓐᓇᖅᑐᑦ ᓄᑖᓄᑦ ᐊᒻᒪᓗ ᐃᖅᑲᓇᐃᔭᓚᐅᑲᒃᐸᒃᑐᓄᑦ, ᑭᓯᐊᓂᓕ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᑭᐊᖅᑭᕕᖓᑦ ᐃᓗᓕᖃᕐᒥᔪᖅ ᑖᒃᑯᓄᖓᓪᓚᕆᒃ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᑎᑎᕋᖅᓯᓯᒪᔪᑦ ᐃᓕᓐᓂᐊᖅᑎᑦᑎᔨᓂᒃ, ᐅᓄᖅᑐᓕᐅᖅᑕᐅᔪᓐᓇᖅᑐᓂᒃ ᐃᑲᔫᑎᒃᓴᓂᒃ, ᐊᒻᒪᓗ ᑕᑕᑎᕆᐊᓕᖕᓂᒃ ᑎᑎᖅᑲᖁᑎᓂᒃ ᐊᑑᑎᔪᓐᓇᖅᑐᑦ ᓇᖕᒥᓂᖁᑎᖕᓄᑦ.

ᓄᑖᖑᒐᓗᐊᖅᐸᑕ ᐃᖅᑲᓇᐃᔮᓄᑦ, ᐅᕝᕙᓘᓐᓃᑦ ᓄᑖᑦ ᐃᖅᑲᓇᐃᔭᕐᕕᖕᓄᑦ, ᐊᑕᖏᖅᖢᑎᒃ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖃᖅᑐᑦ ᐃᑲᔪᖅᓯᖅᑕᐅᔾᔪᑎᓂᒃ ᐱᓕᕆᑦᑎᐊᕈᓐᓇᖁᓪᓗᒋᑦ ᐊᑦᑕᕐᓇᙱᑦᑐᒃᑯᑦ ᖃᐅᑕᒫᑦ.


ᓄᑖᖑᔪᖅ: ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ
ᑭᕕᒃᓯᓰᑦ ᐊᒃᖢᓈᑦ, ᑭᕕᒃᓯᓰᑦ, ᑭᕕᒃᓯᔾᔪᑏᑦ, ᐊᒻᒪ ᑭᕕᒃᓯᔾᔪᑏᒃᑲᓐᓃᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓴᖅᑮᓵᖅᑐᑦ ᓄᑖᓂᒃ ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᖅ ᓇᓗᓇᐃᔭᐃᔪᑦ ᐱᓕᕆᐊᒃᓴᖏᓐᓂᒃ, ᐃᓕᓐᓂᐊᖅᓯᒪᔭᕆᐊᖃᖅᑕᖏᓐᓂᒃ, ᐊᑦᑕᕐᓇᙱᑦᑐᒃᑯᑦ ᐊᐅᓚᓂᕐᒧᑦ ᐊᐅᓚᓂᐅᕙᒃᑐᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑲᒪᓂᕐᒧᓪᓗ ᒪᑯᓂᖓ ᑭᕕᒃᓯᓰᑦ ᐊᒃᖢᓈᑦ, ᑭᕕᒃᓯᓰᑦ, ᑭᕕᒃᓯᔾᔪᑏᑦ, ᐊᒻᒪ ᑭᕕᒃᓯᔾᔪᑏᒃᑲᓐᓃᑦ. ᐊᑕᖏᖅᖢᒋᑦ ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ, ᑖᒃᓇ ᑎᑎᖅᑲᖅ ᓇᓗᓇᐃᔭᐃᑦᑎᐊᖅᓯᒪᔪᖅ ᐱᓕᕆᐊᒃᓴᖏᓐᓂᒃ ᐃᖅᑲᓇᐃᔭᕐᕖᑦ, ᐊᖏᔪᖅᑳᑉ, ᐊᒻᒪᓗ ᐃᖅᑲᓇᐃᔭᖅᑎᐅᑉ ᐊᐅᓚᑦᑎᔫᑉ ᑭᕕᒃᓯᓯᓂᒃ. ᑖᒃᑯᓂᖓᓪᓚᕆᒃ ᐊᑦᑕᕐᓇᖅᑕᐃᓕᒪᔾᔪᑎᓂᒃ ᐊᑐᖅᑕᐅᔭᕆᐊᖃᓪᓚᕆᒃᑐᓂᒃ ᒪᓕᒐᖅᑎᒍᑦ, ᐊᒻᒪᓗ ᐊᑐᐃᓐᓇᕈᐃᓯᒪᓪᓗᓂ ᑕᑕᑎᑦᑕᐅᔭᕆᐊᓕᖕᓂᒃ ᐊᒻᒪᓗ ᖃᐅᔨᒋᐊᖅᑕᐅᔭᕆᐊᓕᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᖅᑲᓇᐃᔭᕐᕕᖕᓂᑦ.

ᑐᓴᐅᒪᔾᔪᑏᑦ ᐅᑭᐅᖅᑕᖅᑐᒥᑦ ᐃᖅᑲᓇᐃᔭᕐᕕᐅᔪᓄᑦ

ᐱᓕᕆᖃᑦᑕᖅᑐᒍᑦ ᐊᒻᒪᓗ ᓄᓇᖃᖅᖢᑕ ᐊᔾᔨᐅᙱᑦᑐᒥᒃ ᓄᓇᕐᔪᐊᑉ ᐃᓚᖓᓂᑦ, ᐊᒻᒪᓗ ᐊᑦᑕᕐᓇᖅᑕᓕᒪᓂᖅ ᐱᒻᒪᕆᐅᓪᓗᓂ ᐃᖅᑲᓇᐃᔭᕐᕕᓗᒃᑖᓂᑦ. ᑕᒪᓐᓇ ᐊᑐᖅᑕᐅᔭᕆᐊᓕᒃ ᐱᕙᒌᔭᖅᑕᐅᓯᒪᔪᖅ ᑖᒃᑯᓇᙵᓪᓚᕆᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒐᕐᓄᑦ ᓄᓇᕗᒻᒥᑦ ᐊᒻᒪᓗ ᓄᓇᑦᓯᐊᒥᑦ. ᐊᒻᒪᓗᑦᑕᐅᖅ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᓚᓕᐅᔾᔨᓯᒪᔪᑦ ᐊᕕᒃᑐᖅᓯᒪᔪᓂᒃ ᖃᐅᔨᒪᓪᓚᑦᑖᖁᓪᓗᓯ ᖃᓄᖅ ᐱᓕᕆᔭᕆᐊᒃᓴᖅ ᐊᑦᑕᕐᓇᙱᑦᑐᒥᑦ ᓂᒡᓚᓱᒡᔪᐊᖃᑦᑕᖅᑎᓪᓗᒍ ᓯᓚᖓ ᐊᑐᖅᐸᒃᑕᕗᑦ. ᐊᕕᒃᑐᖅᓯᒪᔪᓂᑦ ᐱᑕᖃᖅᑐᑦ ᐱᓕᕆᓂᕐᒥᒃ ᓂᒡᓚᓱᒡᔪᐊᖅᑐᒥᑦ, ᓇᓗᓇᐃᔭᐃᓪᓗᓂᓗ ᐊᒃᑐᐃᓂᖏᑦ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐊᐅᓚᐅᑎᓂᒃ ᓂᒡᓚᓱᒃᑎᓪᓗᒍ, ᐃᓚᐅᓪᓗᑎᒃ ᐃᓄᐃᓴᒃᖠᒋᐊᖅᓯᒪᖃᑦᑕᕐᓃᑦ ᐊᐅᓚᓂᕐᒧᑦ ᐱᓗᐊᙱᔾᔪᑎᓂᒃ.

ᓇᓂᔪᓐᓇᖅᑕᐃᑦ ᑕᒪᓐᓇ ᐱᓕᕆᓂᕐᒧᑦ ᑕᐃᑲᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᓯᖏᓐᓂᒃ ᒪᓕᒃᑕᐅᔭᕆᐊᖃᖅᑐᖁᑎᖏᓐᓂᒃ ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ ᑎᑎᕋᖅᓯᒪᔪᖅ ᐃᑭᐊᖅᑭᕕᑦᑎᓐᓂᑦ. ᐊᐱᖅᑯᑎᒃᓴᖃᕈᕕᑦ, ᐅᕝᕙᓘᓐᓃᑦ ᐅᖃᖃᑎᖃᑦᑎᐊᒻᒪᕆᒍᒪᒍᕕᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᓴᖅᑎᒥᒃ, ᐅᖃᖃᑎᒋᑎᒍᑦ ᐅᓪᓗᒥ.


ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ
ᐊᕐᕌᒎᑉ ᐃᓚᐃᓐᓇᖓᓂ ᐃᖅᑲᓇᐃᔭᕐᓂᖅ ᐊᒻᒪ ᑕᖃᓯᒪᓂᖅ

ᓴᓇᓐᓇᖅᓯᓂᖅ ᐅᑭᐅᖅᑕᖅᑐᒥᑦ ᑐᑭᖃᒐᔪᒃᑐᑦ ᐱᓕᕆᕐᔪᐊᓪᓚᕆᒐᓱᒡᓗᑕ ᐊᔪᕐᓇᙱᓐᓂᓕᒫᖓᓂᑦ ᐊᒥᓲᙱᑦᑐᓄᑦ ᑕᖅᑭᕐᓄᑦ ᐅᖅᑯᓚᐅᑲᒃᑎᓪᓗᒍ. ᐃᑲᕐᕋᖅᑯᖅᑐᔪᑦ, ᐱᖃᓯᐅᓪᓗᒍ ᑎᒥᒃᑯᑦ ᑕᖃᓐᓇᖅᑐᑦ ᐱᓕᕆᓃᑦ ᓴᓇᓂᕐᒧᑦ ᑐᑭᖃᖅᑐᑦ ᐃᖅᑲᓇᐃᔭᕐᕕᖕᒥᑦ ᑕᖃᓯᒪᓂᖅ ᖁᐊᖅᓵᕐᓇᕈᓐᓇᖅᓯᔪᓐᓇᕐᒪᑦ ᐃᖅᑲᓇᐃᔭᖅᑎᓄᑦ. ᑕᖃᓯᒪᓂᖅ ᖁᐊᖅᓵᕐᓇᖅᑐᒧᐊᖅᑎᑦᑎᒃᑲᓐᓂᐅᔭᓲᖅ ᖃᓄᐃᑦᑐᖃᕈᓐᓇᖅᖢᓂ ᐊᒻᒪᓗ ᐋᓐᓂᖅᑐᖃᕈᓐᓇᖅLᓂ ᑕᒪᓐᓇᓗ ᓱᓐᓂᐅᒪᔪᖅᑎᑑᖅᑐᑦ. ᐱᒻᒪᕆᐅᔪᖅ ᐃᖅᑲᓇᐃᔭᖅᑏᑦ ᐅᔾᔨᑦᑎᐊᕐᓗᑎᒃ ᐃᖅᑲᓇᐃᔭᕐᓂᖏᓐᓂᒃ.

3−ᖑᔪᑦ ᑕᖃᓗᐊᖅᑕᐃᓕᒪᔾᔪᑏᑦ ᐃᖅᑲᓇᐃᔭᕐᕕᖕᓂᑦ

ᑕᖃᔭᓐᓇᑦᑕ, ᐱᓕᕆᐊᒃᓴᖃᐅᖅᖢᑕ ᐃᓅᓯᖃᕋᑦᑕ ᐊᒻᒪᓗ ᐱᓕᕆᕐᔪᐊᖅᐸᒃᖢᑕ. ᒪᑯᓂᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᐱᖅᓱᖃᑦᑕᖁᔨᔪᑦ ᐅᖃᓪᓚᓕᕌᖓᔅᓯ ᖃᓄᖅ ᑕᖃᓯᒪᓪᓗᓂ ᑕᖃᓯᒪᓗᐊᓕᕐᓇᖅᐸ. ᑕᖃᓯᒪᓂᖅ ᓯᕗᓂᖃᕈᓐᓇᖅᑐᑦ ᖁᐊᖅᓈᕐᓇᕐᓂᖅᓴᓂᒃ ᖃᓄᐃᓐᓂᐅᔪᖅᑕᖃᖅᑎᑦᑎᓗᓂ ᐊᒻᒪᓗ ᐃᓚᓕᐅᑎᒐᔪᒃᖢᓂ ᐱᔾᔪᑕᐅᓪᓗᓂ ᐃᖅᑲᓇᐃᔭᕐᕕᖕᓂᑦ ᐋᓐᓂᕐᓂᕐᓄᑦ. ᑭᓱᑦ ᐃᓱᒪᒋᔭᐅᖃᓯᐅᑎᓪᓗᐊᖅᐸᑦ:
  1. ᐊᑯᓚᐃᓕᕇᓂᒃ ᖃᐅᔨᒋᐊᖅᐸᒡᓗᒋᖅ ᐃᖅᑲᓇᐃᔭᖅᑎᖁᑎᑎᑦ. ᑲᔪᖏᖅᓱᕐᓗᒋᑦ ᐃᒻᒥᒧᑦ−ᖃᐅᔨᒋᐊᕐᓂᕐᒧᑦ ᐊᒻᒪᓗ ᐅᖃᖅᐸᒡᓗᑎᒃ ᐱᓕᕆᔪᓐᓇᕋᓱᒋᙱᑦᑕᕌᖓᒥᒃ ᐱᓕᕆᐊᒃᓴᒥᖕᓂᒃ ᐊᑦᑕᕐᓇᙱᑦᑐᒃᑯᑦ. ᑕᖃᓯᒪᓗᐊᖅᐸᑕ, ᑎᑎᕋᖅᓯᒪᔪᓂᒃ ᐱᓕᕆᐊᒃᓴᓂᒃ ᐊᑐᐃᓐᓇᐅᑎᑦᑎᕙᒡᓗᑎᑦ ᐃᖅᑲᓴᐃᔭᖅᑏᑦ ᐱᓕᕆᔪᓐᓇᖅᑕᖏᓐᓂᒃ ᐊᑦᑕᕐᓇᕈᓐᓃᖅᐸᑦ ᑭᓯᐊᓂ ᐱᓕᕆᐊᕆᒐᔪᒃᑕᖏᓐᓂᒃ ᐱᓕᕆᔪᓐᓇᖅᓯᖅᑰᔨᒍᓂ.
    • ᐱᓗᐊᖅᑐᓂᑦ, ᐊᖏᕐᕋᐅᓚᐅᑲᖁᔭᕆᐊᖃᖅᑕᑎ ᐃᖅᑲᓴᐃᔭᖅᑏᑦ ᑕᖃᐃᑦᑎᐊᕋᓱᖕᓂᖏᓐᓂᒃ. ᖃᐅᔨᒋᐊᕐᓗᒋᓪᓗ ᐅᖃᒪᔭᖃᑎᒋᓗᒋᑦ ᖃᓄᖅ ᐱᓕᕆᔪᓐᓇᕐᒪᖔᑕ ᑕᐃᒪᐃᒃᑲᓐᓂᖁᓇᒋᑦ ᓯᕗᓂᒃᓴᒥᑦ.
  2. ᐊᓯᔾᔨᖃᖅᑕᕐᓗᒋᑦ ᐱᓕᕆᐊᒃᓴᖏᑦ ᐊᒻᒪᓗ ᑎᓕᐅᖃᑦᑕᕐᓗᒋᑦ ᓄᖅᑲᖓᓚᐅᑲᖃᑦᑕᖁᓗᒋᑦ. ᐃᖅᑲᓇᐃᔭᖅᑎ ᑖᒃᑯᓂᖓᔅᓴᐃᓐᓇᖅ ᐱᓕᕆᖃᑦᑕᕈᓂ ᐃᑲᕐᕋᒐᓴᖕᓄᑦ, ᑕᖃᓂᖅᓴᐅᓂᐊᖅᑐᑦ. ᑕᖃᓯᒪᓂᖅ ᐅᖃᐅᓯᖃᖅᑐᑦ ᐃᓱᒪᒃᑯᑦ ᑕᖃᓃᑦ ᐅᕝᕙᓘᓐᓃᑦ ᑎᒥᒃᑯᑦ ᑕᖃᓃᑦ ᐱᓕᕆᐊᓂᒃ ᑎᒥᒃᑯᑦ ᑕᖃᓂᕐᒧᑦ ᐅᕝᕙᓘᓐᓃᑦ ᓂᐱᖅᑯᖅᑐᔪᒦᑲᑕᒡᓗᓂ, ᖃᐅᒪᓗᐊᖅᑐᒦᑲᑕᒡᓗᓂ ᐅᕝᕙᓘᓐᓃᑦ ᓇᔭᒃᓴᓗᒃᑐᓃᑲᑕᒡᓗᓂ. ᓄᖅᑲᖓᓚᐅᑲᖕᓃᑦ ᐊᒻᒪᓗ ᐊᓯᖏᓐᓂᒃ ᐱᓕᕆᑲᑕᖕᓂᖅ ᐱᒻᒪᕆᐅᔪᖅ ᖃᓄᐃᓪᓕᔪᖃᖅᑎᑦᑎᑦᑕᐃᓕᒪᓂᕐᒧᑦ.
  3. ᓈᒻᒪᒃᑐᓂᒃ ᐃᖅᑲᓇᐃᔭᕐᓂᕐᒧᑦ ᐃᑲᕐᕋᖃᕐᓂᖅ. ᒪᑐᕝᕕᒃᓴᐃᑦ ᕿᓚᒻᒥᐅᔪᓐᓇᕐᒪᑕ, ᐊᒻᒪᓗ ᐱᓕᕆᓃᑦ ᐱᒻᒪᕆᐅᓪᓗᑎᒃ ᐱᐊᓂᒃᓯᒪᔭᕆᐊᖃᕆᓪᓗᑎᒃ. ᑭᓯᐊᓂ, ᐱᒻᒪᕆᐅᔪᖅ ᐃᖅᑲᓇᐃᔭᖅᑏᑦ ᓈᒻᒪᒃᑐᒥᒃ ᑕᖃᐃᖅᓯᖃᑦᑕᕐᓗᑎᒃ, ᓴᐃᓕᕙᒡᓗᑎᒃ ᐊᒻᒪᓗ ᑲᒪᒋᖃᑦᑕᕐᓗᓂᔾᔪᒃ ᐃᒻᒥᒧᑦ ᐱᓯᒪᔭᕆᐊᖃᖅᑕᖏᑦ ᐃᖅᑲᓇᐃᔭᕐᓇᐅᑉ ᐊᑯᓐᓂᖏᓐᓂᑦ. ᐃᑲᕐᕋᖃᖅᐸᒡᓗᓯ ᐃᖅᑲᓇᐃᔭᖅᑎᓂᒃ ᐃᒻᒥᒧᑦ ᐱᓯᒪᔭᕆᐊᖃᖅᑕᖏᓐᓂᒃ ᑲᒪᔪᓐᓇᖁᓪᓗᒋᑦ ᐃᒻᒥᒧᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ ᖃᓄᐃᙱᑦᑎᐊᕐᓂᕐᒧᑦ, ᓲᖃᐃᒻᒪ ᐊᒃᑐᐃᕙᖕᒪᑕ ᐆᒻᒪᕆᖕᓂᖏᓐᓂᒃ ᐊᒻᒪᓗ ᐅᔾᔨᕈᓱᑦᑎᐊᕐᓂᖏᓐᓂᒃ ᐃᖅᑲᓇᐃᔭᖅᑎᓪᓗᒋᑦ.
ᐊᕐᕌᒍ ᐃᓚᐃᓐᓇᖓᑕ ᐃᓗᐊᓂ ᓴᓇᓃᑦ ᐱᓕᕆᐊᑦ ᐱᒻᒪᕆᐅᔪᑦ ᓄᓇᓕᕗᑦ ᐊᐅᓚᐃᓐᓇᖁᓪᓗᒋᑦ! ᐃᖅᑲᓇᐃᔭᖅᑏᑦ ᑲᒪᒋᔭᐅᖃᑦᑕᕐᓗᑎᒃ ᐱᓕᕆᓗᐊᕐᓇᐅᑎᓪᓗᒍ ᐱᓕᕆᕝᕕᐅᔪᓂᑦ. ᐋᓐᓂᐊᖃᖅᑕᐃᓕᒪᓂᖅ ᐊᒻᒪᓗ ᖃᓄᐃᙱᑦᑎᐊᖅᑐᑦ ᐃᖅᑲᓇᐃᔭᖅᑏᑦ ᐱᒻᒪᕆᐅᖕᒪᑕ ᓄᓇᓕᑦᑎᓐᓂᑦ. ᐅᖃᖃᑎᒋᒋᐊᒃᑭᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐅᖃᖃᑎᖃᕈᒪᒍᕕᑦ ᐃᖅᑲᓇᐃᔭᕐᕕᖕᒥᑦ ᓱᓐᓂᐅᒪᔾᔪᑕᐅᕙᒃᑐᓂᒃ, ᐊᒻᒪᓗ ᖃᓄᖅ ᑕᐃᒪᐃᑎᑦᑎᑦᑕᐃᓕᓂᕐᒥᒃ ᐃᖅᑲᓇᐃᔭᕐᕕᖕᓂᑦ.


ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑎᑎᕋᕐᕕᖏᑦ ᒪᑐᓂᐊᕐᓂᖏᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑎᑎᕋᕐᕕᖓᑦ ᒪᑐᓯᒪᓂᐊᖅᑐᑦ ᓄᓇᖃᖅᑳᖅᓯᒪᔪᑦ ᐅᓪᓗᖓᓂᑦ ᓇᒡᒐᔾᔭ, ᔫᓂ 21, ᐊᒻᒪᓗ ᐅᒃᑯᐃᒃᑲᓐᓂᓛᖅᖢᓂ ᐊᐃᑉᐹ, ᔫᓂ 22, 8:30 ᐅᓪᓛᒃᑯᑦ.

ᐅᖃᓗᒋᑦ 1-800-661-0792-ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.

ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᕋᓴᐅᔭᑎᒍᑦ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ WSCC Connect.


wscc.nt.ca   /  1.800.661.0792   *   wscc.nu.ca  /  1.877.404.4407