Սեղմեցէք իւրաքանչիւր ձեռնարկի վրայ՝ համապատասխան կայքէջ երթալու համար |
|
Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻ ՀԱՄԱԶԳԱՅԻՆ ԶՕՐԱԿՈՉԸ
Ի ՊԱՇՏՊԱՆՈՒԹԻՒՆ ԱՐՑԱԽԻ ՈՒ ՀԱՅԱՍՏԱՆԻ
|
|
Կիրակի, 25 Հոկտեմբերին, Ն.Ս.Օ.Տ.Տ. Արամ Ա. Կաթողիկոս համազգային զօրակոչ մը արձակեց։ Իր պատգամին մէջ, Վեհափառ Հայրապետը խօսեցաւ Արցախի եւ Հայաստանի զինեալ ուժերու զոհողութեան մասին՝ դիմագրաւելով թուրք-ատրպէյճանական յարձակումները։
1. «Հայոց բանակը հերոսաբար կը շարունակէ պաշտպանել ազատ ու անկախ Արցախի Հանրապետութիւնը եւ Արցախի ճամբով՝ Հայաստանի Հանրապետութեան անվտանգութիւնը, եւ Հայաստանի ճամբով համայն հայութեան ամուր գոյութիւնը։ Այս հայեցակէտով հարկ է դիտել ու արժեւորել Արցախի պատերազմը։ Հետեւաբար, սովորական պատերազմ մը չէ սա. հայութեան ու հայրենիքին ճակատագիրը վճռող պատերազմ մըն է»։ Վեհափառը աւելցուց, որ հայրենիքին ի խնդիր պայքարիլը ո՛չ միայն պարտականութիւն է, այլեւ պատիւ եւ հպարտութեան առիթ։
2. Այս պատերազմին, Թուրքիա կանգնած է Ատրպէյճանի կողքին, ըսաւ Կաթողիկոսը։ Թուրքիա կը փորձէ ծաւալել իր ներկայութիւնը Միջերկրականէն դէպի արեւելեան Եւրոպա՝ համաթրքական նոր ծրագրի մը միջոցով։ «Ահա թէ ինչու Արցախի պատերազմը անհրաժեշտ է դիտել Արցախէն անդին՝ Թուրքիոյ կողմէ հեռաւոր նպատակներ հետապնդելու միտող լայն շրջագծէն ներս»։ Դժբախտաբար, աւելցուց, «այս բոլորին գինը կը վճարէ հայ ժողովուրդը»։
3. «Ո՞ւր է աշխարհը ու յատկապէս՝ Արեւմուտքը, ի տես Թուրքիոյ ցեղապաշտական, ցեղասպանական, կայսերապաշտական եւ բանթուրանական քաղաքականութեան», հարցուց Վեհափառ Հայրապետը։ «Արդարեւ, երբ կը խօսինք 1915-ի ցեղասպանութեան մասին, յաճախ հարց կու տանք թէ ո՞ւր էր Արեւմուտքը երբ ազգ մը ենթակայ դառնար Օսմանեան Թուրքիոյ բնաջնջումի ծրագրին»։ 105 տարի ետք, դարձեալ «հարց կու տանք՝ ո՞ւր է միջազգային համայնքը, երբ նոյն ցեղասպանական ծրագիրը հետապնդող ցեղասպանը ազատօրէն կր շրջագայի իր անմիջական սահմաններէն շա՜տ հեռու վայրերու մէջ»։
Արամ Ա. Կաթողիկոս աւելցուց, որ «փաստօրէն հզօր պետութիւններ զանազան կերպերով գործնապէս մասնակից կը դառնան մեր «փոքր ածուի»ին դէմ շղթայազերծուած ահաւոր պատերազմին»։ Ան մէջբերեց Մովսէս Խորենացիի յայտնի խօսքը՝ մեր «փոքր ածու»ին մէջ կատարուած «արութեան գործեր»ուն մասին, վեր հանելով հայ զինուորներուն հերոսութիւնը Արցախի մէջ, որոնք գիտակցօրէն իրենց կեանքը կը զոհեն ի պաշտպանութիւն հայրենիքին։
«Արցախի ժողովուրդը իր ինքնորոշման իրաւունքը հաստատած է գործնապէս՝ իր անկախ պետականութեամբ», ըսաւ։ «Միջազգային օրէնքի հիմնարար սկզբունքներէն մէկն է ժողովուրդի ինքնորոշման իրաւունքը, որպէս իր ազատ կամքի արտայայտութիւնը»։ Այդ իրաւունքէն նահանջ չկայ, աւելցուց Վեհափառը։
«Հետեւաբար, սա պահուն Անթիլիասի Մայրավանքէն համազգային զօրակոչ կը յայտարարենք, որուն մասնակից պէտք է դառնայ իւրաքանչիւր հայ, զանազան կերպերով իր ներդրումը կատարելու Արցախի հողին անկախութեան ու անվտանգութեան պաշտպանութեան սրբազան պատերազմին», ըսաւ։
Այս իմաստով, ան կոչ ուղղեց Հայաստանի իշխանութեան, որ իր շուրջ համախմբէ Հայաստանի թէ Սփիւռքի բոլոր կազմակերպութիւնները՝ «Արցախի ու Հայաստանի գոյութեան սպառնացող ներկայ վտանգը յաղթահարելու կարելիութիւններու շուրջ»։
Սփիւռքը, յայտնեց Վեհափառ Հայրապետը, կարեւոր դեր ունի կատարելիք այս զօրակոչին մէջ, իր յարաբերական, քարոզչական, մարդուժի եւ նիւթականի լայն կարելիութիւնները օգտագործելով, եւ Արցախի անկախութեան միջազգային ճանաչում ապահովելու գծով մթնոլորտ ստեղծելով։
Ան եզրափակեց կոչ ուղղելով, որ «մտածենք, ծրագրենք ու գործենք՝ ի պաշտպանութիւն Արցախի անկախութեան, Հայաստանի հզօրութեան ու մեր ազգի յաւերժութեան»։
|
|
ԱՆՈՒՇԱՒԱՆ ԱՐՔԵՊԻՍԿՈՊՈՍ՝ ՄԱՅՐ ԵԿԵՂԵՑՒՈՅ ՄԷՋ |
|
Կիրակի, 8 Նոյեմբերին, Անուշաւան Արքեպիսկոպոս պիտի նախագահէ Ս. Պատարագին եւ քարոզէ Ս. Լուսաւորիչ Մայր Եկեղեցւոյ մէջ (Նիւ Եորք)։ Պիտի պատարագէ Մայր Եկեղեցւոյ հոգեւոր հովիւ՝ Տ. Մեսրոպ Քհն. Լագիսեան։ Մեր հաւատացեալները կրնան արարողութեան հետեւիլ ուղիղ սփռումով։
|
|
ՔԱՌԱՍՆՕՐԵԱՅ ՀՈԳԵՀԱՆԳԻՍՏ՝
ԱՐՑԱԽԻ ԱՆՄԱՀ ՀԵՐՈՍՆԵՐՈՒ ՅԻՇԱՏԱԿԻՆ
|
|
Սեպտեմբեր 27ի Արցախեան մեր հայրենիքին վրայ Ատրպէյճանի կառավարութեան շղթայազերծած պատերազմէն արդէն իսկ քառասուն օրեր անցած են, եւ մեր ժողովուրդը դիւցազնական ոգիով կը շարունակէ պայքարիլ այս ոտնձգութեան դէմ, որ կը վայելէ թրքական բանակի ամբողջական աջակցութիւնը, մասնակցութեամբ հազարաւոր ահաբեկիչ վարձկաններու։ Որքան որ դատապարտելի է մեր ազգի դահիճներուն երկրորդ ցեղասպանութիւն գործադրելու այս ծրագիրը, նոյնքան եւ աւելի ցաւալի է, ինչ ինչ պատճառներէ մղուած համայն աշխարհի լռութիւնը՝ ի տես 21րդ դարուն մարդկութեան դէմ գործադրուած սադայէլական այս ոճիրին։
Քառասուն օրերէ ի վեր իւրաքանչիւր օր եւ ժամ Հայ զինուորը կը պաշտպանէ Հա՛յ հողը, Հա՛յ հաւատքը, Հա՛յ ինքնութիւնը եւ Հա՛յ իրաւունքը իր ամենաթանկագին արիւնով։ Ծաղիկ հասակի թեւակոխած հազարէ աւելի խոստմնալից երիտասարդներ իրենց կեանքը նուիրեցին ազատութեան խորանին։ Բազմահարիւր երիտասարդներ իրենց վէրքերով կը տուայտին, իսկ ուրիշներ գերեվարուած՝ անգութ կերպով կը խոշտանգուին։
Առ այդ, յառաջիկայ Կիրակի, 8 Նոյեմբեր, 2020ին, յաւարտ Սուրբ Պատարագի, քառասնօրեայ հոգեհանգիստ պիտի կատարուի Թեմիս բոլոր եկեղեցիներուն մէջ։
Աստուածամօր նուիրուած աղօթքի բառերը կրկնելով կ՛ըսենք․- «Ո՛վ Սուրբ Աստուածամայր, աղաչէ՛ քեզմէ ծնած Աստուածորդւոյն որ պատերազմները լռեն, թշնամիի յարձակումները դադրին, եւ սէր ու արդարութիւն տնկուի երկրի վրայ»։
Առաջնորդ
Ամերիկայի Արեւելեան Թեմին
|
|
ԱՌԱՋՆՈՐԴ ՍՐԲԱԶԱՆ ՀՕՐ ՔԱՐՈԶԸ |
|
Այսօր, Սուրբ Խաչի տօնի ութերորդ Կիրակի օրուան Աւետարանի ընթերցումը Ղուկաս Աւետարանիչէն է (18.16-21): Մեր Տէրը յաճախակի կերպով առակներ կը գործածէր յաւիտենական ճշմարտութիւններ ըմբռնելի դարձնելու համար: Առիթով մը մեր Տէրը կարգ մը առակներ պատմելէ ետք, որպէս եզրակացութիւն՝ կըսէ. «Չկայ ծածուկ բան՝ որ չյայտնուի եւ կամ գաղտնի բան՝ որ չգիտցուի եւ երեւան չգայ»:
Ստեղծագործութեան առաջին սկզբունքը, ինչպէս կը կարդանք Ծննդոց գրքին մէջ, տեսանելիութիւնն է ՝ լուսաւորութեամբ: Աստուած առաջին անգամ լոյս ստեղծեց՝ նախապայմանը կեանքի, որպէսզի իր ստեղծագործութեան թագը հանդիսացող Մարդ արարածը թափանցիկ յարաբերութիւն մշակէ Իր եւ աշխարհին հետ:
Աստուծոյ պատկերը կրող արարածներս կոչուած էինք լոյս ճառագայթելու, ազատ ըլլալու բոլոր խաւար ու ժխտական բաներէ, որոնք պատնէշներ, մտահոգութիւններ եւ նենգութիւններ կը յառաջացնեն: Դժբախտաբար, Անկումին պատճառաւ աստուածային մեր ինքնութիւնը եղծուեցաւ: Ճիշդ է, որ մարդիկ շատ յաճախ իրենց մտածումները կը թաքցնեն, սակայն ոչինչ ծածուկ կը մնայ Ամենագէտ Աստուծմէ:
Աստուածաշունչ մատեանէն կը սորվինք, որ երբ մեր նախահայրն ու նախամայրը ձախողեցան Աստուծոյ պատուիրանը պահել, երբ Կայէն սպաննեց իր եղբայրը, երբ Սառա ծիծաղեցաւ հրեշտակի խոստումին որ իր յառաջացած տարիքին զաւակ պիտի ունենայ, նաեւ Նոր Կտակարանին մէջ՝ երբ Յովսէփ արդար մարդ ըլլալով կը մտածէր իր նշանածը՝ Մարիամը արձակել, կամ երբ Փարիսեցիներն ու Մաքսաւորները նենգաբար հարցումներ կը հարցնէին Յիսուսի, վերոյիշեալ բոլոր պարագաներուն ոչինչ անյայտ էր Աստուծմէ, «որ կը կարդայ սրտերը», ինչպէս Սաղմոսասացը կ՛ըսէ (Սղ 44.21), եւ ըստ այնմ Ան կը հատուցանէ:
Մեր Տիրոջ անժամանցելի այս յայտարարութիւնը յաւերժական ճշմարտութիւն է որ կը պատշաճի բոլոր սերունդներու անհատներուն, հաւաքականութեանց եւ ազգերուն: Արդարեւ, բազմահազար անմեղ զոհերու կեանքը եւ միլիառաւոր հարստութիւն կը խնայուէին եթէ ներկայ համավարակը գաղտնի չպահուէր, եւ աւելի ուշ՝ թագաձեւ ժահրին բոլոր անորոշութիւններն ու սպառնալիքները նկատի ունենալով, կանխարգելիչ առաջնահերթութիւններ չուշացուէին: Աւելին՝որպէս Հայ ժողովուրդ շատ աւելի ահռելի ողբերգութիւն ապրեցանք, երբ ամրան սկիզբին Հայաստանի վրայ Ատրպէյճանական բանակի անակնկալ յարձակումէն ետք, Կիրակի, 27 Սեպտեմբերին՝ Վարագայ Խաչի տօնին, Ատրպէյճանի կառավարութիւնը կանխամտածուած պատերազմ յայտարարեց Թուրքիոյ անվերապահ աջակցութեամբ եւ հազարաւոր ահաբեկիչ վարձկաններու մասնակցութեամբ: Անցնող հինգ շաբաթներուն ի յայտ եկաւ, որ 1915ի Հայոց ցեղասպանութեան եւ 1920ի Շուշիի ջարդերուն դահիճները ուշագրաւ կերպով զարգացած ու յառաջացած էին ո՛չ միայն գերարդիական զինամթերք ամբարելով, այլ նաեւ ստելու, նենգափոխելու եւ Ճշմարտութիւն ուրանալու իրենց ունակութեան մէջ:
Աւելին՝ միջազգային լրատուական միջոցներու մեղսակցութեամբ անոնք ամենայն ճարտարութեամբ իրենց զազրելի ոճիրները կը վերագրեն Հայուն։
Որքան որ դատապարտելի է մեր ազգի դահիճներուն երկրորդ ցեղասպանութիւն գործադրելու ծրագիրը, նոյնքան եւ աւելի ցաւալի է վկայել, որ այսպէս կոչուած քաղաքակիրթ աշխարհը, ինչ ինչ պատճառներէ մղուած, կը նախընտրէ կոյր, խուլ եւ համր մնալ Ճշմարտութեան հանդէպ։ Հազուագիւտ են այն պարկեշտ ղեկավարները, որոնց սրտերը արդարութեան համար կը տրոփեն, մինչ մեծամասնութիւնը կը մնայ լուռ՝ հաստատելով ոչ-պայմանական (non-conventional) զէնքերու գործածումը եւ ազգի մը իր նախահայրերու հողին վրայ բնաջնջումը։
Զօրաւոր եւ մեծ երկրի մը հիմքերը կը կայանան ո՛չ միայն ուժեղ տնտեսութեան ու բանակի գերակայութեան վրայ, այլ նաեւ Արժէքներու վրայ, որոնց վրայ ընկերութիւնը, առ հասարակ, եւ Ամերիկայի Միացեալ Նահանգները, ի մասնաւորի, հաստատուած են հիմնադիր հայրերու կողմէ եւ փոխանցուած՝ մեզի։ Արդարութիւն հետապնդելով մենք հաւատարիմ կը մնանք այն առաքելութեան, որ մեզի փոխանցուած է Աստուծոյ կողմէ, որ իր օրհնութիւնները կը տեղացնէ առատապէս մեր վրայ։ Ուստի, հատատ մնալով մեր կոչումին մէջ՝ որպէս ախոյեաններ Ճշմարտութեան, ջանանք աշխարհը աւելի լաւ վայր դարձնել խաղաղութեան, եւ ժառանգենք յաւիտենական խաղաղ ու երջանիկ կեանքը, փառաւորելով Ամենասուրբ Երրորդութիւնը։ Ամէն։
Առաջնորդ
Ամերիկայի Արեւելեան Թեմին
|
|
Ազգ. Առաջնորդարանի ազգային տուրքի արշաւը կը շարունակուի։ Երախտապարտ ենք մեր բազմաթիւ անդամներուն եւ բարեկամներուն իրենց առատաձեռն օժանդակութեան համար։
Ձեր աջակցութիւնը աւելի քան երբեք անհրաժեշտ է՝ մեր ծրագիրները զարգացնելու համար, քաջալերելով մեր յարատեւ յանձնառութիւնը։ «Իւրաքանչիւրը թող տայ՝ նայած իր սրտի յօժարութեան եւ ո՛չ թէ չկամութեամբ կամ պարտաւորուած զգալով. որովհետեւ Աստուած զուարթառատ կերպով նուիրողը կը սիրէ» (Բ. Կր 9.7):
|
|
Մեր հաւատացեալներու նուիրատուութեան եւ եկեղեցիներու գործակցութեան շնորհիւ, Ազգային Առաջնորդարանի դրամահաւաքը լիբանանահայ մեր եղբայրներուն եւ քոյրերուն համար հասած է 365.259 տոլարի գումարին։ Ձեր նուիրատուութիւնը լիբանանահայ համայնքին կը բաշխուի Լիբանանի Հայոց Թեմի Առաջնորդ՝ Գերշ. Տ. Շահէ արք. Փանոսեանի գլխաւորած Լիբանանահայութեան Վերականգնումի Մարմնին կողմէ։
|
|
Սեղմեցէք այստեղ՝ նուիրատուութիւններու տասներրորդ ցանկը, եւ այստեղ՝ ամբողջական ցանկը կարդալու համար։
|
|
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ |
|
ԿԻՐԱԿԻ, 8 ՆՈՅԵՄԲԵՐ
Թ. ԿԻՐԱԿԻ ԽԱՉՎԵՐԱՑԷՆ ԵՏՔ
ՃՇ. ԸՆԹԵՐՑՈՒՄ
Ես 24:1-13
ԱՒԵՏԱՐԱՆ ԸՍՏ ՂՈՒԿԱՍԻ 8:49-57
Մինչ Յիսուս կը խօսէր, ժողովրդապետին տունէն մէկը եկաւ եւ անոր ըսաւ.
– Աղջիկդ մեռաւ, այլեւս մի՛ յոգնեցներ Վարդապետը:
Յիսուս ասիկա լսելով, ըսաւ ժողովրդապետին.
– Մի՛ վախնար, միայն հաւատա՛ եւ աղջիկդ պիտի ապրի:
Երբ Յիսուս ժողովրդապետին տունը հասաւ, չձգեց որ ոեւէ մէկը ներս մտնէ՝ բացի Պետրոսէն, Յակոբոսէն, Յովհաննէսէն եւ աղջկան հօրմէն ու մօրմէն: Ներս գտնուողները բոլորն ալ կու լային ու կ’ողբային: Յիսուս ըսաւ անոնց.
– Մի՛ լաք, աղջիկը մեռած չէ, այլ կը քնանայ:
Անոնք զինք կը ծաղրէին, որովհետեւ գիտէին որ աղջիկը մեռած է: Յիսուս բոլորն ալ դուրս հանեց, ապա բռնեց աղջկան ձեռքէն եւ բարձրաձայն ըսաւ.
– Աղջի՛կս, ոտքի՛ ել:
Անմիջապէս անոր հոգին վերադարձաւ եւ ոտքի կանգնեցաւ: Ապա Յիսուս հրամայեց որ ուտելիք տան աղջկան, մինչ ծնողները ապշահար եղած էին: Յիսուս անոնց պատուիրեց որ պատահածին մասին ոեւէ մէկուն բան չըսեն:
ԹՈՒՂԹ ԵՓԵՍԱՑԻՆԵՐՈՒՆ 5:15-33
Հետեւաբար ձեր ապրելակերպին ուշադրութիւն ըրէք: Մի՛ ապրիք անմտօրէն, այլ՝ իմաստուններու պէս: Օգտագործեցէ՛ք ժամանակը, որովհետեւ այս օրերը չար են: Ուստի անմտութիւն մի՛ ընէք. հասկցէք թէ ի՛նչ կ’ուզէ Տէրը ձեզմէ: Գերին մի՛ դառնաք գինիին, որ անառակութեան կը տանի. այլ մասնաւորաբար Սուրբ Հոգիով լեցուեցէք, իրարու հետ սաղմոսներով, օրհնութիւններով եւ հոգեւոր երգերով խօսեցէք, եւ ձեր սիրտերուն մէջ միշտ երգեցէք ու սաղմոս ըսէք Տիրոջ, ամէն բանի համար միշտ շնորհակալութիւն յայտնելով Հօր Աստուծոյ, մեր Տիրոջ Յիսուս Քրիստոսի անունով:
Քրիստոսի հանդէպ ձեր պատկառանքը արտայայտեցէք՝ իրարու հնազանդելով:
Կինե՛ր, հնազանդեցէ՛ք ձեր ամուսիններուն, ինչպէս Տիրոջ պիտի հնազանդէիք. որովհետեւ ամուսին մը իր կնոջ գլուխն է, այնպէս՝ ինչպէս Քրիստոս գլուխն է եկեղեցիին, իր մարմինին, որուն Փրկիչն է ինք: Հետեւաբար, ինչպէս եկեղեցին Քրիստոսի կը հնազանդի, այնպէս ալ կիները ամէն բանի մէջ իրենց ամուսիններուն թող հնազանդին:
Այրե՛ր, սիրեցէ՛ք ձեր կիները այնպէս՝ ինչպէս Քրիստոս սիրեց եկեղեցին եւ իր կեանքը տուաւ անոր համար, որպէսզի ջուրի լուացումով զայն մաքրէ եւ իր խօսքով սրբէ, այնպէս մը՝ որ եկեղեցին իրեն ներկայանայ ամբողջական փառքով, առանց ոեւէ արատի կամ խորշոմի կամ ուրիշ թերութեան, այլ՝ ըլլայ սուրբ եւ անարատ: Ճիշդ նոյն ձեւով, ամուսիններ պարտին իրենց կիները սիրել որպէս իրենց մարմինը. որովհետեւ իր կինը սիրողը իր սեփական մարմինը սիրած կ’ըլլայ, եւ չկայ մէկը որ իր մարմինը անտեսէ. ամէն մարդ ալ կը սնուցանէ եւ կը խնամէ իր մարմինը, ինչպէս Քրիստոս կը սնուցանէ եւ կը խնամէ եկեղեցին՝ իր մարմինը, որուն անդամներն ենք բոլորս, անոր մարմինէն ու ոսկորներէն: Սուրբ գիրքին մէջ գրուած է. «Ահա այս պատճառով այրը պիտի թողու իր հայրն ու մայրը եւ իր կնոջ միանայ, եւ երկուքը մէկ մարմին պիտի ըլլան»: Աստուծոյ ծրագրին կապուած կարեւոր ճշմարտութիւն մըն է ասիկա, որ ըստ իս՝ Քրիստոսի եւ եկեղեցիին կը վերաբերի: Բայց նոյնը կը վերաբերի նաեւ ձեզմէ իւրաքանչիւրին, որովհետեւ իւրաքանչիւր այր պէտք է իր կինը սիրէ իր անձին պէս, եւ ամէն կին պէտք է յարգէ իր ամուսինը:
|
|
ՄԻՔԱՅԷԼ ԵՒ ԳԱԲՐԻԷԼ ՀՐԵՇՏԱԿԱՊԵՏՆԵՐԸ |
|
Այս Շաբաթ օր` Նոյեմբերի 9-ին, Հայաստանեայց Եկեղեցին կը յիշէ Միքայէլ եւ Գաբրիէլ հրեշտակապետները: «Հրեշտակ» բառը կը նշանակէ՝ սուրհանդակ: Հրեշտակապետ տիտղողը կը տրուի երկնային նուիրապետութեան մէջ բարձր կարգի հրեշտակներուն: Միքայէլ եւ Գաբրիէլ միակ հրեշտակներն են, որոնք «հրեշտակապետ» տիտղոսը ստացած են:
Միքայէլ (եբրայերէն կը նշանակէ «Ան որ Աստուծոյ պէս է») բոլոր հրեշտակներուն իշխանն է եւ երկնային զօրքերու առաջնորդը: Ան ընդհանրապէս կը համարուի քրիստոնեաներու պահապանը, եւ մասնաւորապէս զինուորներունը, ինչպէս եւ ուղղափառ հաւատքի պահապանն ու հերձուածներու դէմ պաշտպանը:
Գաբրիէլ (եբրայերէն կը նշանակէ «Աստուծոյ ոյժ») Աստուծոյ գլխաւոր պատգամաբերն է։ Ան յայտնուեցաւ Դանիէլ մարգարէին, բացայայտելով տեսիլքի մը (Դանիէլ 8:16-26) եւ մարգարէութեան մը վաւերականութիւնը (Դանիէլ 9:21-27)։ Ան կանխատեսած է Յովհաննէս Մկրտիչի ծնունդը եւ Քրիստոսի յառաջիկայ ծնունդը յայտարարող սուրհանդակը եղած է (Ղուկաս 1:11-21)։
«Մի՛ մոռնաք հիւրասէր ըլլալ, որովհետեւ այդպիսով ոմանք առանց գիտնալու հրեշտակներ հիւրասիրեցին» (Եբր 13։2)։
Այս շաբաթ նաեւ կը յիշատակուին՝
7 Նոյեմբեր – Ս. Հայրապետներ՝ Մետրոփանոս, Աղեքսանդրոս, Պօղոս Խոստովանող եւ նօտարներ՝ Մարկիանոս եւ Մարտիրոն։
11 Նոյեմբեր – Ս. Մելիտոս Անտիոքացի եւ Ս. Մինաս Եգիպտացի
12 Նոյեմբեր – Ս. Դեմետրիոս
|
|
ՔՍԱՆ ՀԱԶԱՐ ՏՈԼԱՐԻ ՆՈՒԻՐԱՏՈՒՈՒԹԻՒՆ՝ ՄԱՅՐ ԵԿԵՂԵՑՒՈՅ |
|
Ս. Լուսաւորիչ Մայր Եկեղեցին ուրախութեամբ կը յայտարարէ, որ 20.000 տոլարի նուիրատուութիւն մը ստացած է տէր եւ տիկ. Էտուըրտ եւ Լուիզ Թաշճեաններէն։ Գումարը պիտի գործածուի Արցախի օգնութեան համար։ Թաշճեան ամոլը պսակուած է Ս. Լուսաւորիչի մէջ՝ լուսահոգի Տ. Արսէն Ա. Քհն. Սիմէոնեանցի կողմէ, իսկ անոնց երեք զաւակներէն երկուքը մկրտուած են եկեղեցւոյ մէջ։ Իր նամակին մէջ, պրն. Թաշճեան լաւագոյնս կը մաղթէ հոգեւոր հովիւ՝ Տ. Մեսրոպ Քհն. Լագիսեանին եւ Ս. Լուսաւորիչ Մայր Եկեղեցւոյ։ Տէր Հայրը, գնահատելով Թաշճեանի ընտանիքի այս առատաձեռն նուիրատուութիւնը, վեր հանեց այն իրողութիւնը, որ «առանց մեր հայրենակիցներու անձնուիրուութեան եւ առատաձեռնութեան, պիտի չկարենայինք շատ մը բաներ իրագործած ըլլալ մեր ծուխերուն մէջ։ Թաշճեան ընտանիքին այս նուիրատուութիւնը նոր օրինակ մըն է Մայր Եկեղեցւոյ ընտանիքի հաւատարմութեան»։
Այս առթիւ, թեմիս բարեջան առաջնորդ՝ Գերշ. Անուշաւան Արքեպիսկոպոս, անձնապէս կապուելով բարերարին, բարձրօրէն գնահատեց անոր հաւատարմութիւնը իր արմատներուն եւ ինքնութեան։
|
|
«Մեծն Ներսէս» բարեսիրական հասարակական կազմակերպութեան կողմէ կատարուող որբերու հովանաւորութիւնը կը շարունակէ մնալ Ազգ. Առաջնորդարանի Հայաստանի ու Արցախի ծրագիրներուն առանցքը՝ 1993էն ի վեր։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Այդ նամակներէն նմոյշներ կը ներկայացնենք ամէն շաբաթ, յիշելով միայն գրողներուն անունները՝ անոնց ինքնութիւնը գաղտնի պահելու համար։
Այս շաբթուան նամակի հեղինակը Էրիկն է, որ կը հովանաւորուի տէր եւ տիկ. Վահէ եւ Յասմիկ Տոմպալակեաններու կողմէ։
|
|
«Բարեւ Ձեզ,
Ես … Էրիկն եմ։ Բնակւում եմ Վանաձոր քաղաքի Բազում թաղամասում։ Մեր փոքրիկ բնակարանում ապրում ենք՝ մայրս, քոյրս եւ ես։ Մայրս տնային տնտեսուհի է, ես եւ քոյրս յաճախում ենք Վանաձորի No. 25 հիմնական դպրոցը։
Երբ քոյրս կամ մայրս ժպտում են, ես դառնում են աշխարհի ամենաերջանիկը։
Քանի որ ամբողջ աշխարհում թեւածում է “Covid 19”, ես պահպանում եմ բոլոր կանոնները եւ մնում եմ տանը։ Իմ փոքրիկ ընտանիքում երեկոյեան շատ հետաքրքիր է անցնում, խաղում ենք տարբեր ուսուցանող խաղեր։
Երբ դպրոցս աւարտեմ, ես ցանկանում եմ դառնալ իրաւաբան, որ կարողանամ մարդկանց պաշտպանել իրենց իրաւունքները։
Ես իմ խորին շնորհակալութիւնն եմ յայտնում Ձեզ իմ ընտանիքին օգնելու համար»։
|
|
Այստեղ սեղմեցէք համալսարանական ուսում ստացող որբերու առցանց հովանաւորութեան համար
Դուք միշտ կրնաք դիմել Ազգային Առաջնորդարանին՝ ելեկտրոնային նամակով ( sophie@armenianprelacy.org) կամ հեռաձայնով (212-689-7810), «Մեծն Ներսէս» կազմակերպութեան որբերու հովանաւորութեան ծրագրին մասնակցելու համար |
|
ԶԻՆՈՒՈՐՆԵՐՈՒ ԱՊԱՀՈՎԱԳՐՈՒԹԵԱՆ ՀԻՄՆԱԴՐԱՄԸ |
|
2016ի քառօրեայ պատերազմէն ետք, Հայաստանի Ազգային Ժողովը վաւերացուց զինուորներու կեանքին կամ առողջութեան պատճառուած վնասներու հատուցման մասին օրէնք մը, որուն հիմամբ 2017ին ստեղծուեցաւ Զինծառայողների Ապահովագրութեան Հիմնադրամը։
Հիմնադրամին նպատակը հայրենիքի պաշտպանութեան համար զոհուած կամ վիրաւորուած եւ հաշմանդամ դարձած զինուորներուն եւ անոնց ընտանիքներուն օժանդակութիւնն է՝ տրամադրելով կայուն, երկարաժամկէտ եւ հաւասար ապահովագրական հատուցումներ։
Հիմնադրամին միջոցները հիմնականին կը գոյանան Հայաստանի եւ Արցախի պետական եւ ոչ պետական համակարգի պաշտօնեաներու աշխատավարձերէն՝ ամսական 1000 դրամի վճարումներու ձեւով, ինչպէս նաեւ Հայաստանէն ու Սփիւռքէն ստացուած նուիրատուութիւններու միջոցով։
Հիմնադրամին մուտքը ցարդ կազմած է շուրջ 31 միլիառ դրամ եւ կատարուած են մօտ 2,5 միլիառ դրամի հատուցումներ` 416 զինուորներու եւ անոնց ընտանիքի անդամներուն։ Ի հարկէ, հիմնադրամը նաեւ հատուցումներ պիտի կատարէ այս պատերազմին զոհուած կամ հաշմանդամ դարձած զինուորներուն ու անոնց ընտանիքներուն։
Հիմնադրամը զոհուած, առաջին կարգի հաշմանդամութիւն ստացած եւ անհետացած զինուորի համար կը վճարէ մէկ անգամէն 10 միլիոն դրամ (20.200 տոլար), իսկ այնուհետեւ՝ 200.000-300.000 դրամ (400-600 տոլար)՝ 20 տարուան ընթացքին։ Իսկ երկրորդ կարգի հաշմանդամութիւն ունեցող զինուորներու պարագային, անոնց կը վճարուի 5 միլիոն դրամ, այնուհետև` 100,000-200,000 (200-400 տոլար) դրամ` նոյնպէս 20 տարի շարունակ:
Հիմնադրամը ո՛չ միայն սիրով կ՚ընդունի մէկ անգամ կատարուող նուիրատուութիւններ, այլեւ կը քաջալերէ ամսական նուիրատուութիւնները՝ առնուազն 2 տոլարի (նոյն 1000 դրամը) գումարով։ Նշուած նուիրատուութիւնները կարելի է կատարել www.1000plus.am կայքէջի միջոցով։
|
|
«ՊԱՏՄՈՒԹԻՒՆ ԶԷՅԹՈՒՆԻ (1409-1921)»
ՄԻՍԱՔ ՍԻՍԵՌԵԱՆ
|
|
Երկրորդ Աշխարհամարտի ընթացքին գրուած այս գործը կը ներկայացնէ Զէյթունի պատմութիւնը, ուր միահիւսուած են թէ՛ զանազան աղբիւրներ եւ թէ՛ հեղինակին անձնական յուշերը՝ ճոխ ատաղձ մը կազմելով ապագայ պատմաբանին համար։ Հեղինակը գրած է. «Ու այսպէս, յետ այսու մեզի համար ամէն առիթ եւ միջոց գրեթէ կորսուած է, ուստի մեր ընելիքը լոկ համեստ եւ կարելի փորձ մը եղած պիտի ըլլայ Զէյթունի հնագոյն անցեալին եւ վաղնջական ժամանակներուն հոն ապրած ժողովուրդներուն մասին, մասամբ տրամաբանութեան ուժով եւ մասամբ ցարդ մէջտեղ ելած տուեալներով, հաստատումներ ընելու համար»։ |
|
Այս գիրքը տրամադրելի է Ազգային Առաջնորդարանի գրախանութէն։
|
|
ՎԱՆՈՒՇ ԽԱՆԱՄԻՐԵԱՆ (ծնունդ՝ 5 Նոյեմբեր, 1927) |
|
Ծնած է Նոյեմբեր 5, 1927ին։ Հայրը գնդակահարուած է ստալինեան մաքրագործումներու տարիներուն։ Աւարտած է Ստեփան Շահումեանի անուան միջնակարգ դպրոցը, իսկ 1941ին՝ Երեւանի պարարուեստի ուսումնարանը։ Նոյն տարին, մտած է Ալ. Սպենդիարեանի անուան օփերայի եւ պալէի թատրոնին մէջ, ուր մենապարող եղած է մինչեւ 1971։ Առաջին գլխաւոր դերը կատարած է «Վալպուրգեան գիշեր» բեմադրութեան մէջ։ Պարած է Արամ Խաչատուրեանի «Գայիանէ», «Սպարտակ» եւ «Սպարտակ», Ալեքսանդր Սպենդիարեանի «Խանդութ» եւ «Ալմաստ», Էդգար Յովհաննիսեանի «Մարմար» պալէներուն, Արմէն Տիգրանեանի «Անուշ» օփերային մէջ, եւ այլն։ 1941-1969ին թատրոնի օփերային գրեթէ բոլոր բեմադրութիւններու պարային հատուածներուն կա՛մ գլխաւոր մենակատարը եւ կա՛մ բեմադրիչը եղած է։
1953թ., երբ Երուանդ Քոչար կը քանդակէր «Սասունցի Դաւիթ» արձանը, տեսնելով «Խանդութ» պալէի մէջ Վ. Խանամիրեանի՝ Դավիթի կերպարի փայլուն մարմնաւորումը, որոշած է արձանի դէմքը անոր պատկերով քանդակել։
1963ին Խանամիրեան արժանացած է Հայաստանի ժողովրդական արուեստագէտի տիտղոսին։ 1968-1992 թուականներուն Հայաստանի պարի պետական համոյթի գեղարուեստական ղեկավարը եղած է։ Դասական պարէն դէպի ժողովրդական պարարուեստ անցումը փայլուն արդիւնք ունեցած է։
Ան ժողովրդական պարի գեղագիտութիւնը բեմ բերելով, աշխարհին ներկայացուցած է հայկական պարը։ 1962էն ետք, հիւրախաղեր ունեցած է աշխարհի տարբեր երկիրներու մէջ։ Բեմադրած է տասնեակներով ներկայացումներ՝ «Գայիանէ», «Բախչիսարայի շատրուանները», «Սպարտակ», «Լոռեցի Սաքոն», «Ռայմոնդա», «Խանդութ», «Կարապի լիճը», պարային համարներ՝ «Տօնական սուիթ», «Կարաւան», «Անմահութիւն», Կոմիտաս վարդապետի «Վաղարշապատի պար», Արամ Խաչատուրեանի «Էնզելի», «Կակաչներ», ազգագրական պարերու շարք, եւ այլն։
Սփիւռքի տարբեր համայնքներու մէջ, աշխատած է իր աշակերտներուն եւ հետեւորդներուն հետ՝ հայկական պարը զարգացնելու համար։ 1998ին մեծարուած է «Մովսէս Խորենացի» պետական մետալով։ 2000ին հիմնած ու մինչեւ մահ ղեկավարած է Հայաստանի Պարարուեստի Գործիչներու Միութիւնը, որ 2009ին իր անունը կը կրէ։ 2004ին ստեղծած է վեթերան պարուսոյցներու «Վանուշ» պարախումբը, իսկ 2010ին՝ «Բարդիներ» պարախումբը։
Խանամիրեան մահացած է 5 Հոկտեմբեր 2011ին, Երեւանի մէջ։
|
|
ՀԵՐՈՍՆԵՐ՝ ԲՈԼՈՐ ԺԱՄԱՆԱԿՆԵՐՈՒՆ |
|
Մեր պատմութիւնը հերոսական երանգ մը ունեցած է առաջին օրէն իսկ, երբ աւելի քան 45 դար առաջ, ըստ աւանդական ժամանակագրութեան, Հայկ նահապետ սպաննեց Բէլ հսկան։
Այդ առասպելական ժամանակներուն, հերոսները միայն այն մարդիկը չէին, որոնք առաւելագոյն զոհողութիւնը կը գործադրէին՝ իրենց կեանքին գնով, կամ կը տառապէին բարձրագոյն իտէալի մը ի խնդիր։ Հերակլէս, Աքիլէս եւ յունական դիցաբանութեան բազմաթիւ այլ անուններ նաեւ հերոսներ էին, որովհետեւ կիսաստուածներ էին։ Մովսէս Խորենացի Հայկը կը կոչէ դիւցազն, ինչ որ կը նշանակէ «հերոս»։ Այս բարդ բառը բաղկացած է դիք («աստուած») եւ ազն («սերունդ, ազգ») բառերէն։ Մինչեւ այսօր, այս բառն ու անկէ բխած այլ բառեր, ինչպէս դիւցազնական, դիւցազներգութիւն, եւ այլն, գործածութեան մէջ են։ Սիամանթոյի բանաստեղծական երախայրիքը եղած է «Դիւցազնօրէն» հատորը։
Այսուհանդերձ, դիւցազն բառը գրաբարին կը պատկանէր։ Աշխարհաբառը փոխ առած է հերոս բառը, որ հին բառին տեղը գրաւած է խօսակցական լեզուի մէջ։ Ահա այստեղ է, որ հայերէնի եւ անգլերէնի ճամբաները խաչաձեւուած են։ Երկու լեզուներուն բուն աղբիւրը յունարէն heros բառն է, բայց անոր յանգած են տարբեր ուղիներով։ Հայերէնը ուղղակի փոխառութիւն մը կատարած է (թէեւ կայ նաեւ արդի ֆրանսերէն հéros) բառը, իսկ անգլերէնը իբրեւ աղբիւր ունեցած է հին ֆրանսերէն հeroe բառը, որ իր կարգին բխած է լատիներէն հerosէն։
Հայ հերոսները հերոսութիւններ կը գործեն եւ հերոսամարտեր կը վարեն, ինչ որ մեր հերոս զինուորները կ՚ընեն այսօր՝ արցախեան պատերազմին։ Անոնք կը մղեն անհաւասար պայքար մը, ինչպէս ըրած են Հայկն ու անհամար ուրիշ հերոսներ պատմութեան ընթացքին։
|
|
ԱԶԳԱՅԻՆ ԱՌԱՋՆՈՐԴԱՐԱՆԻ 2021Ի ՅՈՒՇԱՏԵՏՐԸ |
|
Առաջնորդարանիս 2021ի յուշատետրի ցրուումը արդէն սկսած է։ Նուիրուած է Կիլիկիոյ բռնագաղթի 100ամեակին, երբ Մեծի Տանն Կիլիկիոյ Կաթողիկոսութիւնը ստիպուեցաւ փոխադրել Սիսի պատմական Աթոռը։ Սահակ Բ. Կաթողիկոս Խապայեան յաջորդ ինը տարիներուն պիտի դեգերէր տարբեր վայրերու մէջ, մինչեւ որ 1930ին Կաթողիկոսութիւնը իր վերջնական կայքը պիտի գտնէր Պէյրութի արուարձան Անթիլիասի մէջ, ուր կառուցուած է մայրավանքը։ Յուշատետրի կողքը կը ներկայացնէ Սահակ Բ. Կաթողիկոսը, իսկ անոր ետին՝ Սիս բերդաքաղաքի եւ Անթիլիասի մայրավանքի նկարները։ Յուշատետրը Հայ Եկեղեցւոյ եւ այլ նիւթերու մասին օգտակար տեղեկատու մըն է։
Ազգային Առաջնորդարանը յուշատետրը կը հրատարակէ 1974էն ի վեր՝ ամէն տարի յատուկ թեմայով մը։ Շնորհակալ ենք տարիներու ընթացքին ձեր աջակցութեան եւ քաջալերանքին համար։
|
|
ՄԻ՛ ՄՈՌՆԱՔ
Լիբանանահայութիւնը ձեր օգնութեան պէտք ունի աւելի քան երբեք
կամ
ձեր նուիրատուութիւնը ղրկեցէք հետեւեալ հասցէին՝
Armenian Prelacy
138 E. 39th Street
New York, NY 10016
Ձեր չէքերը գրեցէք՝ Armenian Apostolic Church of Americaին
(Memo: Lebanon Relief Fund)
|
|
Սիրով կ՚ընդունինք ձեր հայերէն կամ անգլերէն նամակները, ինչպէս եւ թղթակցութիւններ, լուսանկարներ եւ ժամանակացոյցի համար նիւթեր։ Պայմանաժամը՝ Երեքշաբթի երեկոյ։ Մեր հասցէն՝ crossroads@armenianprelacy.org։
|
|
ՁԵՌՆԱՐԿՆԵՐՈՒ ԺԱՄԱՆԱԿԱՑՈՅՑ |
|
Ս. ԳԻՐՔԻ ՍԵՐՏՈՂՈՒԹԻՒՆ— Հոկտեմբեր 14-Դեկտեմբեր 2ին։ Առցանց, նուիրուած՝ Պօղոս Առաքեալի Փիլիպպեցիներուն ուղղուած թուղթին։ Չորեքշաբթի օրերը, երեկոյեան, արեւելեան ժամով 8:00-9:00ին։ Տեղեկութիւններու համար, գրեցէք shant@armenianprelacy.org հասցէին։
21 Նոյեմբեր —Ս. Երրորդութիւն եկեղեցւոյ (Ուստըր, Մասաչուսեթս) ուտեստեղէնի տարեկան տօնավաճառ։
6 Դեկտեմբեր —Ս. Գրիգոր եկեղեցւոյ (Կրանիթ Սիթի, Իլինոյ) 66րդ տարեդարձ, ընդ նախագահութեամբ՝ Գերշ. Տ. Անուշաւան Արքեպիսկոպոսի։
|
|
Follow us on Social Media |
|
The Armenian Prelacy
Tel: 212-689-7810 ♦ Fax: 212-689-7168 ♦ Email: email@armenianprelacy.org
|
|
|
|
|
|
|
