ᐅᑐᐱᕆ 2021
‌
ᓄᕙᒡᔪᐊᕐᓇᖅ-
19-ᒧᑦ ᐃᑲᔪᕈᑎᒃᓴᑦ
ᓄᑖᙳᕆᐊᖅᑕᐅᔪᑦ ᑎᑎᕋᕐᕕᐅᔪᓐᓇᖅᑐᑦ ᐊᒻᒪ ᑕᑕᑎᕆᐊᓖᑦ
Face Mask 1
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᓄᑖᙳᕆᐊᖅᑎᑦᑎᓚᐅᕐᒪᑕ ᓄᕙᒡᔪᐊᕐᓇᖅ-19-ᒧᑦ ᐃᑲᔪᕈᑎᒋᔭᑦᑎᓐᓂᒃ ᑕᒪᒃᑯᐊ ᓄᑖᖑᓛᒃᑰᖅᑎᑦᑎᓯᒪᓇᓱᒃᖢᑎᒃ ᐊᒻᒪ ᐊᑐᒐᒃᓴᐅᓂᕐᓴᐅᓇᓱᒃᖢᑎᒃ. ᒫᓐᓇ ᓄᕙᒡᔪᐊᕐᓇᖅ-19-ᒧᑦ ᐊᑐᖁᔭᐅᔪᓂᒃ ᐊᑐᑲᑕᒡᓗᓯ ᓄᓇᔅᓯᓐᓂ. ᐃᖅᑲᐅᒪᒋᑦ ᖃᐅᑕᒪᑦ ᐱᕐᕈᓗᐊᕿᑦᑕᐃᓕᓂᕐᒧᑦ ᐸᕐᓇᒃᓯᒪᔭᕆᐊᖃᕐᓂᕐᒥᒃ ᐊᒻᒪ ᐅᓗᕆᐊᓇᑐᐃᓐᓇᕆᐊᓕᖕᓂ ᖃᐅᔨᓴᖃᑦᑕᕆᐊᖃᕐᓂᕐᒥᒃ ᐃᖅᑲᓇᐃᔭᕐᕕᒋᔭᕐᓂ. 

ᐱᕐᕈᓗᐊᕿᑦᑕᐃᓕᓂᕐᒧᑦ ᐃᑲᔪᕈᑎᒃᓴᑦ ᐃᖅᑲᓇᐃᔭᕐᕕᒋᔭᕐᓂ

ᐱᐅᓂᕐᓴᐅᓪᓗᓂᓗ ᐸᕐᓇᐅᑎᒋᔭᑎᒃ ᕿᒥᕐᕈᐊᖃᑦᑕᕐᓗᒋᑦ ᐊᒻᒪ ᖃᐅᔨᓇᓱᒃᐸᒡᓗᓯ ᑭᓱ ᓄᑖᖑᓕᕆᐊᒃᓴᖏᓐᓂᒃ ᐊᒻᒪᓗ ᐃᖅᑲᓇᐃᔭᕐᕕᒋᔭᕐᓄᑦ ᐸᕐᓇᐅᑏᑦ ᓄᑖᖑᕐᓯᒪᑎᑉᐸᒡᓗᒋᑦ ᐊᒻᒪ ᐊᑐᕈᓐᓇᕐᓗᑎᒃ. ᐅᑯᐊ ᓄᑖᙳᕆᐊᖅᑕᐅᓯᒪᔪᑦ ᑕᑕᑎᕆᐊᖃᖅᑐᑦ:

  • ᐃᖅᑲᓇᐃᔭᕐᕕᖕᒥ ᐊᑦᑕᓇᖅᑐᒥ ᖃᐅᔨᓴᕐᓂᖅ – ᖃᓄᐃᐃᓱᒪᒋᔭᐅᒃᑲᓐᓂᕆᐊᖃᖅᐸᑦ ᐊᒻᒪ ᓄᑖᖑᓛᑦ ᑐᓴᒐᒃᓴᐃᑦ.
  • ᓴᓇᔨᒧᑦ ᐅᓗᕆᐊᓇᖅᑐᖃᕐᒪᖔᑦ ᖃᐅᔨᓴᕐᓂᖅ – ᐊᑐᒐᕐᓂᕐᓂᖅᓴᖅ “ᐄ/ᐋᒃᑲ” ᖃᐅᔨᓴᕈᑎ.
  • ᖃᖓᒃᑯᑦ ᐊᒻᒪ ᖃᓄᖅ ᖃᓂᕐᒥ ᒪᑐᐊᕐᓯᒪᔭᕆᐊᖃᕐᓂᖅ ᐊᑐᐊᒐᖅ – ᐱᒻᒪᕆᐊᓗᐃᑦ ᓄᑖᖑᓛᑦ ᑐᓴᒐᒃᓴᐃᑦ.
  • ᐱᔨᑦᑎᕋᖅᑕᐅᔪᑦ/ᑲᒪᒋᔭᐅᔪᓂᒃ ᐊᒻᒪ ᐃᖅᑲᓇᐃᔭᖅᑐᓂᒃ ᖃᐅᔨᓴᕈᑎᑦ – ᑲᐱᔭᐅᒃᑲᓐᓂᕐᓂᕐᒧ ᖃᓄᐃᓕᖓᓕᕐᒪᖔᑦ ᐊᐱᖅᑯᑎᑦ.

ᑎᑎᕋᕐᕕᒃᓴᐅᔪᓐᓇᕐᑐᑦ ᐊᑐᐃᓐᓇᐅᓕᕐᑐᑦ ᒪᐃᑯᓵᕝ ᑎᑎᕋᕈᓐᓇᐅᑎᒃᑯᑦ (Microsoft Word) ᐃᖅᑲᓇᐃᔭᖅᑎᑦᑎᔪᓄᑦ ᖃᕋᓴᐅᔭᓄᑦ ᓴᕿᑎᒐᒃᓴᖅ ᐊᒻᒪ ᐋᖅᑭᒃᓱᖅᑕᐅᔪᓐᓇᖅᖢᓂ ᐃᖅᑲᓇᐃᔭᕐᕕᖏᓐᓅᖓᓕᕐᓗᓂ. ᑕᑯᒋᐊᕐᓗᒍ ᓄᕙᒡᔪᐊᕐᓇᖅ-19-ᒧ ᐃᑲᔪᕈᑎᒃᓴᑦ ᒪᒃᐱᒐᖓ ᖃᕋᓴᐅᔭᒃᑯ ᓴᖅᑭᔮᒐᑦᑎᓐᓂ ᐃᑲᔪᕈᑎᒃᓴᓂ ᕿᓂᕈᓐᓇᕐᓂᐊᕋᔅᓯ. ᐊᐱᖅᑯᑎᒃᓴᖃᕈᕕᑦ ᐊᒃᑐᐊᔪᓂᒃ ᐅᕗᖓ ᓄᕙᒡᔪᐊᕐᓇᖅ-19-ᒧ ᐱᕐᕈᓗᐊᕿᑦᑕᐃᓕᓂᕐᒧᑦ ᐃᖅᑲᓇᐃᔭᕐᕕᖕᓂᒃ, ᖃᕋᓴᐅᔭᒃᑯᑦ ᑎᑎᕋᕈᓐᓇᖅᑐᓯ.
ᐋᓐᓂᖅᑐᓕᕆᓂᕐᒧᑦ ᐱᖁᔭᐃᑦ ᐊᓯᔾᔨᖅᑕᐅᔪᑦ
ᐃᖅᑲᐃᑎᑦᑎᔾᔪᑦ: ᐃᓱᖃᕐᕕᖃᓕᒑᔪᑦ
ᐊᓯᙳᖅᑕᐅᓂᑯᑦ ᐋᓐᓂᐊᖅᑐᓕᕆᓂᕐᒧᑦ ᐱᖁᔭᐃ ᐊᑐᓕᕐᓂᐊᖅᑐᑦ ᑕᒪᑐᒪᓂ ᐊᕐᕌᒍᒥ. ᐊᓯᔾᔨᕈᑎᑦ ᐊᒃᑐᐃᔪᑦ ᐃᓚᖓ 5-ᒥ – ᐋᓐᓂᖅᑐᓕᕆᓂᖅ ᐅᕙᓂ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᐱᖁᔭᖏᑦ ᐅᑯᐊ ᓄᓇᑦᓯᐊᖅ ᐊᒻᒪ ᓄᓇᕗᑦᒥ. 

ᖃᓄᐃᑦᑐᓂ ᖃᐅᔨᒪᔭᕆᐊᖃᕐᒪᖔᑦ

  • ᐋᓐᓂᖅᑐᓕᕆᓂᕐᒧᑦ ᐅᓗᕆᐊᓇᕋᔭᖅᑐᓂᒃ ᖃᐅᔨᓴᕐᓂᖅ ᐱᐊᓂᒃᑕᐅᓯᒪᔭᕆᐊᓕᒃ ᑕᒪᐃᓐᓂ ᐃᖅᑲᓇᐃᔭᕐᕕᖕᓂᒃ. ᐅᑯᐊ ᖃᐅᔨᓴᕈᑎᐅᔪᑦ ᐃᒪᓐᓇ ᓇᓗᓇᐃᕐᓯᔾᔪᑎᐅᓇᔭᖅᑐᑦ:
  • ᖃᔅᓯᓂᒃ ᐋᓐᓂᖅᑐᖅᓯᐅᑎᓂᒃ ᐱᖃᕆᐊᖃᖅᐸᑦ, ᐊᒻᒪᓗ ᖃᓄᐃᑦᑐᓂᒃ ᐋᓐᓂᖅᑐᒃᓯᐅᑎᓂ ᐱᖃᕆᐊᖃᖅᐸᑦ ᐱᓕᕆᕝᕕᒋᔭᐅᔪᓕᒫᓂᒃ.
  • ᐱᐅᑎᒋᓂᖏᑦ ᐊᒻᒪᓗ ᐋᓐᓂᖅᑐᓕᕆᔨᓂᒃ ᐱᑕᖃᕆᐊᖃᖅᑐᖅ ᐱᓕᕆᕝᕕᖕᒥᑦ.
  • ᒪᓕᒐᓕᕆᓂᒃᑯᑦ ᐊᓯᙳᖅᑎᑕᐅᓂᐅᔪᑦ ᐊᒃᑐᐃᒍᑎᖃᕐᓂᖏᑦ ᐋᓐᓂᖅᑐᖅᓯᐅᑎᓂᒃ ᐱᔭᐅᓯᒪᔭᕆᐊᓕᖕᓂᒃ ᐱᓕᕆᕝᕕᖕᒥ, ᐊᒻᒪᓗ ᐋᓐᓂᖅᑐᖅᓯᐅᑎᑦ ᐃᓗᓕᒃᓴᖏᓐᓂᒃ. 
  • ᑭᖑᓪᓕᖅᐹᑦ ᐱᐊᓂᒃᓯᓇᓱᒡᓗᓂ ᐋᓐᓂᖅᑐᓕᕆᓂᕐᒧᑦ ᐅᓗᕆᐊᓇᕈᑎᐅᓇᔭᖅᑐᓂᒃ ᖃᐅᔨᓴᕐᓂᕐᒥᒃ ᐊᒻᒪᓗ ᐱᖁᑎᑖᒃᑲᓐᓂᕆᐊᖃᕐᓂᖅ ᐋᓐᓂᖅᑐᓕᕆᓂᕐᒧᑦ ᐃᖅᑲᓇᐃᔭᕐᕕᒋᔭᕐᓂᒃ ᐅᓇᐅᔪᖅ:
  • ᓄᓇᑦᓯᐊᖅ: ᔮᓐᓄᐊᕆ 1, 2022
  • ᓄᓇᕗᑦ: ᕕᕝᕗᐊᕆ 12, 2022
  • ᐋᓐᓂᖅᑐᓕᕆᓂᕐᒧᑦ ᓇᓗᓇᐃᒃᑯᑎ ᐃᓱᓕᓚᐅᙱᓐᓂᖓᓂᒃ ᐊᑐᕈᓐᓇᐃᓐᓇᖅᑐᖅ. 

ᑕᑯᒋᐊᕐᓗᒍ ᐋᓐᓂᖅᑐᓕᕆᓂᕐᒧᑦ ᒪᒃᐱᒐᖅ ᖃᕋᓴᐅᔭᒃᑯᑦ ᓴᖅᑭᔮᒐᑦᑎᓐᓂᒃ ᑕᑯᔪᓐᓇᕐᓂᐊᕋᕕᒋᑦ ᓇᐃᓈᕐᓯᒪᔪᑦ ᐅᖃᐅᓯᒃᓴᑦ ᐊᒻᒪ ᐃᑲᔪᕈᑎᐅᔪᓐᓇᖅᑐᑦ ᒪᓕᒐᐃᑦ ᐊᓯᙳᖅᑕᐅᓚᐅᖅᑎᓪᓗᒍ. ᐅᓇ ᐃᓕᓗᒍ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᖃᕋᓴᐅᔭᕐᒧᐊᕈᑎ ᑕᒪᒃᑯᐊ ᑐᓴᒐᒃᓴᐃ ᐱᓯᒪᔪᓐᓇᕐᓂᐊᕋᕕᒋᑦ, ᓴᓇᕝᕕᖕᒦᙱᑎᓪᓗᑎ ᐊᒻᒪ ᐊᑐᐃᓐᓇᐅᓗᓂ ᖃᖓᓕᒫᖅ. ᐊᐱᖅᑯᑎᒃᓴᖃᕈᔅᓯ ᖃᓄᖅ ᑕᒪᒃᑯᐊ ᒪᓕᒐᓂᒃ ᐊᓯᔾᔨᕈᑎᐅᔪᑦ ᐊᒃᑐᐃᖕᒪᖔᑦ ᐱᓕᕆᐊᕐᓄᑦ ᐅᕙᑦᑎᓐᓄ ᖃᐅᔨᒋᐊᕐᓗᑎᑦ ᐅᓪᓗᒥ.
ᐊᓯᔾᔨᖅᑕᐅᔪᒪᔪᑦ ᐃᑦᑐᖅᓯᐅᑎᑖᕈᑎᓕᕆᓂᕐᒧᑦ
ᑐᒡᓕᖓᓂ ᑲᑎᖃᑎᒌᖕᓂᖃᓛᖅᑐᑦ ᖃᓂᑦᑐᒃᑯᑦ
ᐱᒋᐊᕐᓗᓂ ᓄᕕᐱᕆ 2021, ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᑐᓴᖅᑎᑕᐅᒃᑲᓐᓂᕈᒪᓂᐊᕐᑐᑦ ᒪᓕᒐᐃᑦ ᐊᓯᔾᔨᖅᑕᐅᔪᒪᓂᖏᓐᓂᒃ ᐅᕙᓂ ᐃᖅᑲᓇᐃᔭᖅᑎᓄᑦ ᓇᓪᓕᐅᒃᑯᒫᓄᑦ ᒪᓕᒐᖅᓂᒃ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᐊᒃᑐᐊᔪᓂᒃ ᑮᓇᐅᔭᖅᑖᕈᑎᐅᖃᑦᑕᕋᔭᖅᑐᓂᒃ ᐃᖅᑲᓇᐃᔭᕐᕕᒃᒥᑦ ᐋᓐᓂᖅᑐᕕᓂᕐᓄᑦ ᐅᕝᕙᓘᓐᓃᑦ ᐋᓐᓂᐊᓕᖅᑐᕕᓂᕐᓄᑦ. 

ᐅᓇ ᑐᒃᓯᕋᕈᑎᐅᔪᖅ ᓄᑖᙳᕆᐊᖅᑎᑦᑎᔾᔪᑎ ᐅᑯᓂᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓂᒃ (WSCC) ᐱᓕᕆᐊᖃᕈᓐᓃᕋᔭᕐᑐᑦ ᐋᓐᓂᖅᑐᖅᓯᐅᑎᑖᖅᑎᑦᑎᕙᖕᓂᕐᒥᒃ ᐃᓅᓯᕐᒧᑦ ᐃᖅᑲᓇᐃᔭᖅᑎᓄᑦ ᐋᓐᓂᖅᑐᕕᓂᕐᓄᑦ ᐃᖅᑲᓇᐃᔭᕐᕕᖏᓐᓂᒃ ᐃᒪᓐᓇ ᖃᓄᑎᒋ ᐋᓐᓂᖅᓯᒪᓂᖏᑦᑎᒍᑦ ᐊᒻᒪ ᑮᓇᐅᔭᓕᐊᕆᔭᕕᓂᖏᑦᑎᒍᑦ ᐋᓐᓂᓚᐅᙱᓐᓂᖏᓐᓂᒃ, ᐃᒪᓐᓇᙶᖅ ᒪᕐᕈᐃᓕᖓᔪᓂᒃ ᑮᓇᐅᔭᓕᐅᕈᑎᐅᓇᔭᖅᑐᓂᒃ ᐊᓯᐅᔨᓂᕐᒧᑦ ᐊᒻᒪ ᐊᑯᓂᐊᓗᒃ ᑮᓇᐅᔭᓕᐅᕈᑎᐅᓇᔭᖅᑐᓄᑦ ᐃᖅᑲᓇᐃᔭᖅᑎᓪᓚᕆᖕᓄᑦ.

ᖃᓄᐃᒻᒫ ᐅᖃᖃᑎᒌᑲᑕᒃᑲᓐᓂᕈᒪᕕᑖ?

ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᑐᓴᖅᑎᑕᐅᓚᐅᕐᒪᑕ ᓯᕗᓪᓕᕐᒥ ᐅᖃᓪᓚᖃᑎᖃᑲᑖᓪᓚᓚᐅᖅᖢᑎᒃ ᒪᑯᓂᖓ ᐋᓐᓂᖅᑐᖅᓯᐅᑎᑖᕈᑎᐅᕙᒃᑐᓂᒃ 2020-ᖑᑎᓪᓗᒍ ᒪᐅᓇ ᖃᕋᓴᐅᔭᒃᑯᑦ ᖃᐅᔨᓇᓱᖕᓂᒃᑯᑦ ᐊᒻᒪᓗ ᐅᖃᓪᓚᖃᑎᖃᑲᑕᖕᓂᒃᑯᑦ. 

ᐅᓄᕈᓘᔭᕐᑐᑦ ᐃᓚᐅᔪᑦ ᓯᕗᓪᓕᕐᒥ ᑐᓴᒃᑲᓐᓂᕈᒪᓚᐅᕐᓯᒪᖕᒪᑕ ᖃᓄᖅ ᓄᑖᖅ ᐱᓕᕆᔾᔪᑎ ᐊᑐᖅᑕᐅᓇᔭᕐᓂᖓᓂᒃ. ᑖᒃᑯᓂᖓ ᑭᐅᓇᓱᖕᓂᐊᕐᓗᑎᒃ ᐅᖃᐅᓯᐅᔪᓄᑦ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐋᖅᑭᒃᓯᓚᐅᕐᒪᑕ ᐊᑐᐊᒐᓂᒃ ᑎᑎᕋᖅᓯᒪᔪᑦ ᓇᓗᓇᐃᔭᐃᓯᒪᓪᓗᑎᒃ ᐊᐅᓚᑦᑎᔾᔪᑎᒋᔭᐅᓂᐊᕐᑐᒥᒃ ᓄᑖᒧᑦ ᐋᓐᓂᖅᑐᖅᓯᐅᑎᓕᕆᓂᕐᒧᑦ ᐊᒻᒪᓗ ᑕᒪᕐᒥ ᑐᒃᓯᕋᕈᑎᒋᔭᐅᔪᖅ ᓴᖅᑭᑎᑕᐅᓂᐊᖅᖢᓂ ᑐᓴᕈᒪᓪᓗᑎᒃ ᑖᔅᓱᒥᖓ ᓄᕕᐱᕆ 8, 2021-ᒥ ᑎᑭᓪᓗᒍ ᑎᓯᐱᕆ 8, 2021.

ᖃᓄᕐᓕ ᐃᓚᐅᔪᓐᓇᕋᔭᕋᕕᑦ

ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᑐᙵᓱᒃᑎᑦᑎᔪᑦ ᑕᒪᑐᒥᖓ ᑐᓴᐅᒪᔪᒪᔪᓂᒃ ᐊᒻᒪ ᑲᑐᔾᔨᖃᑎᒌᓂᒃ ᑕᑯᒋᐊᖁᔨᓪᓗᑎᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᓄᕕᐱᕆ 8, 2021 ᐊᓂᒍᓚᐅᕐᑎᓪᓗᒍ ᕿᒥᕐᕈᐊᕐᓂᐊᕋᔅᓯ ᐊᓯᙳᖅᑎᑕᐅᔪᒪᔪᓂᒃ. ᕿᒥᕐᕈᐊᕌᓂᒃᑯᕕᑦ ᑐᓴᒐᒃᓴᕆᔭᐅᔪᓂᒃ, ᑐᓴᕐᕕᒋᔪᒪᕙᑦᑎᒋᑦ ᐃᓱᒪᒋᔭᔅᓯᓐᓂᒃ. ᐃᓚᐅᖃᑕᐅᔪᓐᓇᕋᔭᕋᕕ ᖃᕋᓴᐅᔭᒃᑯᑦ ᖃᐅᔨᔾᔪᑎᒋᓇᓱᒃᑕᑦᑎᓐᓂᒃ, ᑲᑎᒪᔪᓂ ᐃᓚᐅᔪᓐᓇᕐᓗᑎ ᐅᕝᕙᓘᓐᓃᑦ ᐅᕙᑦᑎᓐᓄ ᐅᖃᓪᓚᒍᓐᓇᕐᓗᑎᑦ. 

ᖃᐅᔨᒃᑲᓐᓂᕈᒪᒍᕕᑦ, ᐅᕙᑦᑎᓐᓄ ᖃᐅᔨᒋᐊᕈᓐᓇᖅᑐᓯ PensionFeedback@wscc.nu.ca ᓄᓇᕗᒥᑦ, ᐊᒻᒪ PensionFeedback@wscc.nt.ca ᓄᓇᑦᓯᐊᕐᒥ. ᐅᕙᑦᑎᓐᓄ ᐅᖄᓚᔪᓐᓇᕐᒥᔪᓯ ᐅᕗᖓ 1 (800) 661-0792. 
ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐊᐅᓚᑦᑎᓂᕐᒧᑦ ᑲᑎᒪᔨᖏᑦ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᐅᖃᐅᓯᐅᔪᓂ ᐃᓱᒪᓕᐅᕆᓚᐅᙱᓐᓂᖏᓐᓂᒃ ᒪᓕᒐᖅᑎᒍᑦ ᐊᓯᙳᖅᑎᑦᑎᓂᕐᒥᒃ.
ᖁᐊᐃᔭᕿᓐᓃᑦ, ᐹᓪᓚᖕᓃᑦ, ᐊᒻᒪ ᑲᑕᖕᓃᑦ
ᓂᕈᐊᕐᓂᖅ ᐱᐅᓛᓂᒃ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᒃᓴᓂᒃ (PPE)

ᓂᒡᓚᖅᐸᓪᓕᐊᓕᕐᒥᖕᒪᑦ. ᐃᖅᑲᐅᒪᓂᐊᕐᐳᓯ, ᖁᐊᐃᑦᑖᕐᓇᖅᑐᓂᒃ ᐱᑕᖃᖃᑦᑕᕐᓂᐊᓕᕐᒥᖕᒪᑦ ᐊᐳᑎᒧᑦ ᓂᓚᖕᒧᓪᓘᓐᓃᑦ. ᑖᒃᑯᐊ ᐋᓐᓂᕈᑎᐅᓛᖑᔭᓐᓂᖏᓐᓄᑦ ᐅᑭᐅᕐᑕᖅᑐᕐᒥ, ᑕᒪᕐᑕ ᖃᓄᐃᓕᐅᕈᓐᓇᕋᑦᑕ ᐱᒻᒪᕆᐊᓗᖕᒥ ᐅᕙᑦᑎᓐᓄᓕᒫᖅ.

ᓈᒻᒪᒃᑐᓂᒃ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᖃᕐᓂᖅ ᐊᓯᖏᓐᓂᒡᓗ

ᓈᒻᒪᒃᑐᓂᒃ ᑲᒪᖃᕐᓂᖅ ᐊᒻᒪᓗ ᖁᐊᐃᔭᐃᑯᑎᖃᑦᑎᐊᕐᓗᓂ ᐋᓐᓂᙱᓐᓂᕐᓴᐅᓐᓇᖅᑐᖅ. ᐱᓱᖕᓂᐊᕋᓗᐊᕈᕕᑦ ᓄᓇᓯᐅᑎᖕᓂᒃ ᑎᑎᕋᕐᕕᖕᒧᑦ ᐅᕝᕙᓘᓐᓃᑦ ᐃᖅᑲᓇᐃᔭᕈᕕᑦ ᓯᓚᒥ ᐱᓕᕆᕝᕕᐅᔪᒥᒃ, ᑭᓇᑐᐃᓐᓇᖅ ᓈᒻᒪᒃᑐᓂᒃ ᑲᒥᒃᓯᒪᔭᕆᐊᖃᖅᑐᖅ ᓯᓚᒧᑦ.

ᖃᓄᐃᓕᐅᕈᓐᓇᖅᐸᓪᓕ ᐃᖅᑲᓇᐃᔭᖅᑎᑦᑎᔨᐅᔪᑦ? 

ᐅᓄᕈᓘᔭᕐᒪᑕ ᐱᕐᕈᓗᐊᕿᑎᑦᑎᑦᑕᐃᓕᔾᔪᑎᐅᔪᓐᓇᖅᑐᑦ ᐱᖁᑎᑦ ᐊᒻᒪ ᖃᓄᐃᓕᐅᕈᑎᑦ (ᑲᒥᖃᑦᑎᐊᕐᓂᐅᑉ ᐊᓯᐊᒍᑦ) ᖁᐊᐃᑦᑖᙱᔾᔪᑎᐅᔪᓐᓇᖅᑐᓂᒃ:

  • ᑕᒪᒃᑯᐊ ᓯᑯᒐᓛᙳᖅᓯᒪᔪᑦ ᑲᒪᒋᑲᐅᑎᒋᕙᒡᓗᒋᑦ. ᐅᓇ ᑲᒪᒋᔪᓐᓇᖅᑕᖅ ᖄᖓ ᓯᐅᕋᓕᕐᓱᕐᓗᒍ ᐊᒻᒪ ᑕᕆᐅᓕᕐᓱᕐᓗᒍ, ᐊᐳᑕᐃᔭᖅᐸᒡᓗᒍ ᐊᒻᒪᓗ ᓇᓗᓇᙱᑦᑎᐊᖅᑐᓂᒃ ᑎᑎᖃᓂᒃ ᓇᓗᓇᐃᒃᑯᑎᖃᐅᕐᓗᓂ ᒪᑯᓄᖓ ᕿᕿᔭᑦᑐᓄᑦ. 
  • ᐹᑎᒍᑦ ᑎᑎᕋᖅᓯᒪᔪᓂᒃ ᐋᖅᑭᒃᓯᓯᒪᕙᒡᓗᓯ ᐃᖅᑲᓇᐃᔭᖅᑎᐅᔪᑦ ᓈᒻᒪᒃᑐᓂᒃ ᑲᒥᒃᓯᒪᔭᕆᐊᖃᕐᓂᖏᓐᓂᒃ.
  • ᐃᖅᑲᓇᐃᔭᖅᑐᒥᒃ ᑭᖑᕙᖅᑐᖃᕋᓗᐊᖅᐸᑦ ᖃᐅᔨᒪᓗᑎᒃ ᖁᐊᐃᑦᑖᕐᓇᖅᑐᒥᓐ.
  • ᐃᖅᑲᐅᒪᑎᓪᓗᒋᑦ ᐃᖅᑲᓇᐃᔭᖅᑐᑦ ᓱᒃᑲᐃᔾᔫᒥᖃᑦᑕᖁᓗᒋᑦ, ᐅᓚᕕᓗᐊᖅᑕᐃᓕᕙᒡᓗᑎᒃ (ᐅᖄᓚᐅᑎᕋᓛ ᑎᒍᒥᐊᕐᓗᓂ ᐱᓲᔭᕐᓗᓂ) ᐊᒻᒪᓗ ᓈᒻᒪᒃᑐᓂᒃ ᑲᒥᒃᓯᒪᕙᔅᓗᓯ ᐃᒡᓗᒥ ᐊᓂᓕᕌᖓᑕ.

ᖃᐅᔨᒃᑲᓐᓂᕈᒪᒍᕕᑦ ᖁᐊᐃᑦᑕᐃᓕᓂᕐᒥᒃ, ᐹᓪᓚᔭᓐᓂᕐᒥᒃ, ᐊᒻᒪ ᐅᕐᕈᔭᓐᓂᕐᒥᒃ ᑕᑯᒋᐊᕐᓗᒍ ᐅᓇ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᖅ ᒪᒃᐱᒐᖅ ᓴᖅᑭᔮᒐᑦᑎᓐᓂᒃ. ᖃᐅᔨᒃᑲᓐᓂᕈᒪᒍᕕᑦ ᓂᕈᐊᕐᓂᕐᒥᒃ ᓈᒻᒪᒃᑐᓂᒃ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᓂᒃ (PPE) ᖃᓄᐃᑦᑐᑐᐃᓐᓇᕐᓄᑦ ᐱᓕᕆᓂᕐᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ, ᑕᑯᒋᐊᕐᓗᒍ ᐅᓇ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ ᐱᓕᕆᔾᔪᑎᒃᓴᑦ ᓯᕗᓂᒃᓴᒥ.

ᐊᑐᐊᒐᐃᑦ ᐊᓯᔾᔨᕐᓂᖏᑦ
ᐊᐅᓚᑦᑎᓂᕐᒧᑦ ᑲᑎᒪᔨᑦ. ᑐᑭᒧᐊᕈᑎᖏᑦ ᕿᒥᕐᕈᐊᖅᑕᐅᓚᐅᕐᒪᑕ ᐊᖏᖅᑕᐅᓪᓗᑎᒡᓗ ᐅᑯᐊ ᐊᑐᐊᒐᐃᑦ ᐊᒻᒪᓗ ᐊᐅᓚᑦᑎᓂᕐᒧᑦ ᑲᑎᒪᔩᑦ (GC) ᑐᑭᒧᐊᕈᑎᖏᑦ ᓯᑎᐱᕆ 2021-ᒥ ᑲᑎᒪᑎᓪᓗᒋᑦ:

  • ᐊᑐᐊᒐᖅ 00.02 – ᐃᓱᒪᒃᓴᖅᓯᐅᒃᑲᓐᓂᕐᓂᖅ ᐃᓱᒪᓕᐅᕈᑕᐅᔪᒧᑦ
  • ᐊᑐᐊᒐᖅ 00.04 – ᐊᕐᕌᒍᑕᒫᑦ ᖁᑦᑎᓛᖓᓂ ᓇᓪᓕᐅᒃᑯᒫᓕᐅᖅᑕᐅᓂᕐᒧᑦ (YMIR)
  • ᐊᑐᐊᒐᖅ 03.07 – ᐋᖅᑭᑦᑕᐅᓂᖏᑦ ᐊᑭᓕᐅᑎᐅᑲᐃᓐᓇᖅᑐᑦ
  • ᐊᐅᓚᑦᑎᓂᕐᒧᑦ ᑲᑎᒪᔨᑦ ᑐᑭᒧᐊᕈᑎᖏᑦ B-009 – ᓲᖑᓂᖅᓴᓄᑦ ᐋᖅᑭᒋᐊᒃᑲᐃᔩᑦ ᑲᑎᒪᔨᖏᑦ ᑲᑎᒪᔾᔪᑎᑖᕆᕙᒃᑕᖏᑦ ᐊᒻᒪ ᐊᐅᓪᓚᕈᑎᖏᑦ
  • ᐊᐅᓚᑦᑎᓂᕐᒧᑦ ᑲᑎᒪᔨᑦ ᑐᑭᒧᐊᕈᑎᖏᑦ B-011 – ᓲᖑᓂᖅᓴᓄᑦ ᐋᖅᑭᒋᐊᒃᑲᐃᔩᑦ ᑮᓇᐅᔭᖅᑖᕋᓱᒍᑎᖏᑦ

ᑕᑯᒋᐊᕐᓗᒍ ᑖᓐᓇ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑐᐊᒐᕐᓄᑦ ᐅᖃᓕᒫᒐᖅ ᕿᒥᕐᕈᐊᓂᕐᒧᑦ ᑕᒪᐃᓐᓂ ᐃᕐᒃᑲᓇᐃᔭᕐᒃᑎᓄᑦ ᐊᑦᑕᓇᕐᒃᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᕐᑲᐅᔨᓴᕐᒃᑏᑦ ᐊᑐᐊᒐᖁᑎᖏᓐᓂᒃ ᐅᕝᕙᓘᓐᓃᑦ ᑖᓐᓇ ᐊᐅᓚᑦᑎᓂᕐᒧᑦ ᑲᑎᒪᔨᑦ ᑐᑭᒧᐊᕈᑎᖏᑦ ᕿᒥᕐᕈᐊᓂᕐᒧᑦ ᑕᒪᐃᓐᓂᒃ ᐊᐅᓚᑦᑎᓂᕐᒧᑦᑐᑭᒧᐊᕈᑎᓂ.

ᓄᑕᖅ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᑲᕐᕋᖏᑦ ᐃᖅᑲᓇᐃᔭᕐᓇᒥᓐ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᑲᕐᕋᖏᑦ ᖃᖓᑦᑎᐊᓵᖅ ᐋᖅᑭᒃᑕᐅᓚᐅᕐᒪᑕ. ᖃᐅᔨᒪᒋᑦᑎ ᐅᐸᒍᑎᓂᒃᑯᑦ ᐱᔨᑦᑎᕋᐅᑎᓕᕆᓂᖅ ᐃᓄᒋᐊᒍᓐᓇᕐᓂᖏᑦ ᐋᖅᑭᒃᑕᐅᓯᒪᑐᐃᓐᓇᕆᐊᓖᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔭᖏᑦ ᒪᓕᒃᑕᐅᓗᑎᒃ, ᑭᓯᐊᓂᓕ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐃᖅᑲᓇᐃᔭᖅᑎᖏ ᐃᖅᑲᓇᐃᔭᕋᔭᕐᑐᑦ ᐊᖏᕐᕋᖏᓐᓂᒃ. ᐅᐸᒍᓐᓇᕆᐊᒃᓴᐃᑦ ᖃᐅᔨᒋᐊᕈᓐᓇᖅᑐᑎᑦ ᐅᓇ ᖁᓛᓃᑦᑐᖅ ᑕᑯᒋᐊᕐᓗᒍ ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᓴᖅᑭᔮᒐᖓ.

ᓄᑖᑦ ᐃᑲᕐᕋᖏᑦ:

  • ᐃᖃᓗᐃᑦ: 8:30 ᐅᓪᓛᒃᑯᑦ – 4:30 ᐅᓐᓄᓴᒃᑯᑦ ᕿᑭᖅᑖᓘᑉ ᖃᐅᔨᓴᐅᑖ ᒪᓕᒃᖢᒍ (ᒪᑐᓯᒪᓪᓗᓂ 12:00-ᒥ 1:00-ᒧ ᐅᓐᓄᓴᒃᑯ)
  • ᔭᓗᓇᐃᕝ: 8:00 ᐅᓪᓛᒃᑯᑦ – 4:00 ᐅᓐᓄᓴᒃᑯᑦ ᐅᐊᓕᓂᕐᒥᐅᑦ ᖃᐅᔨᓴᐅᑖ ᒪᓕᒃᖢᒍ (ᒪᑐᓯᒪᓪᓗᓂ 12:00-ᒥ 1:00-ᒧ ᐅᓐᓄᓴᒃᑯ)
  • ᐃᓅᕕᒃ: 8:30 ᐅᓪᓛᒃᑯᑦ – 5:00 ᐅᓐᓄᓴᒃᑯᑦ ᐅᐊᓕᓂᕐᒥᐅᑦ ᖃᐅᔨᓴᐅᑖ ᒪᓕᒃᖢᒍ (ᒪᑐᓯᒪᓪᓗᓂ 1:00-ᒥ 2:00-ᒧ ᐅᓐᓄᓴᒃᑯ)

ᐃᖅᑲᓇᐃᔭᖅᑎᒧ ᐅᖃᓪᓚᒍᒪᒍᕕ ᐅᕗᖓ ᐅᖄᓚᓗᑎᑦ 1 (800) 661-0792. ᐃᖅᑲᓇᐃᔭᕐᕕᒃᒥ ᖃᓄᐃᓕᐅᔪᖃᕐᔪᐊᖅᐸᑦ ᐋᓐᓂᖅᑐᖃᖅᐸᓪᓘᓐᓃᑦ ᑕᑯᓗᒍ WSCC Connect.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑎᑎᕋᕐᕕᖏᑦ ᒪᑐᓂᐊᕐᓂᖏᑦ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᑎᑎᕋᕐᕕᖏ ᒪᑐᓯᒪᓂᐊᕐᑐᑦ ᐃᖅᑲᐅᒪᓐᓇᒥᒃ ᑎᓴᒻᒥᖅ, ᓄᕕᐱᕆ 11, ᐊᒻᒪ ᒪᑐᐃᓛᖅᖢᓂ ᑕᓪᓕᕐᒥᖅ, ᓄᕕᐱᕆ 12-ᒥ. 

ᐅᖃᓗᒋᑦ 1-800-661-0792-ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.

ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᕋᓴᐅᔭᑎᒍᑦ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ WSCC Connect.

Workers' Safety and Compensation Commission of the Northwest Territories and Nunavut,
5022 49th Street, 5th Floor, Centre Square Tower, Box 8888, Yellowknife, NT X1A 2R3 Canada