ᐊᐃᕐᕆᓕ 8, 2020                                                                     
SafetyNet ᐊᓯᐊᒎᖅᑐᒥ ᑎᑎᕋᖅᑕᐅᓯᒪᓂᐅᔪᖅ: ᓄᕙᒡᔪᐊᕐᓇᖅ-19 (COVID-19)  
ᐅᖃᐅᓯᒃᓴᑦ ᐊᖓᔪᖅᑳᑦᑎᓐᓂᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᖏᖅᓯᒪᓂᖃᖅᐳᑦ ᒥᒃᖠᒋᐊᖅᓯᓂᕐᒥ ᐅᓗᕆᐊᓇᕐᓂᖓᓂ ᐊᒻᒪ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19−ᒥ ᐊᒻᒪ ᐊᒃᓱᕈᖅᖢᑎᒃ ᐱᓕᕆᕗᑦ ᐃᑲᔪᖅᓱᐃᓂᕐᒥ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᖁᑎᓕᖕᓂᑦ, ᓴᓇᔩᑦ, ᐃᓅᓕᓴᐃᓂᕐᒧᑦ ᐱᓕᕆᔨᐅᔪᓄᑦ ᐊᒻᒪ ᐱᓕᕆᖃᑎᒋᔭᑦᑎᓐᓂ ᐊᑦᑕᓇᔾᔭᐃᖅᓯᒪᓂᕐᒧᑦ ᓵᙵᐃᓐᓇᖅᑎᓪᓗᑕ ᐆᒥᖓ ᐊᒃᓱᕈᕐᓇᖅᑑᔪᒥ ᐱᓕᕆᖃᑎᒌᖕᓂᑦᑎᓐᓂ. 
 
ᐊᓯᓲᔪᑎᑐᑦ ᐃᖅᑲᓇᐃᔭᖅᑎᖁᑎᓕᖕᓂᑦ, ᐊᓯᔾᔩᔭᕆᐊᖃᓚᐅᖅᐳᒍᑦ ᓴᐳᔾᔨᓯᒪᓂᕐᒧᑦ ᐃᖅᑲᓇᐃᔭᖅᑎᓐᓂ, ᐳᓚᕋᖅᑐᓂ ᐊᒻᒪ ᓄᓇᖃᖅᑎᐅᔪᓂ ᐅᑭᐅᖅᑕᖅᑐᓕᒫᒥ. ᒪᑐᓯᓯᒪᕗᒍᑦ ᑎᑎᕋᕐᕕᑦᑎᓐᓂ ᔭᓗᓇᐃᕝᒥ, ᐃᓅᕕᒃ ᐊᒻᒪ ᐃᖃᓗᖕᓂ ᐊᒻᒪ ᓅᖦᖢᑎᒍᑦ ᑲᒪᕐᒥᒐᓚᖕᓂ ᐃᖅᑲᓇᐃᔭᖅᑎᑦᑎᓐᓂ ᐱᓕᕆᓂᖏᓐᓂ ᐊᖏᕐᕋᖏᓐᓂ. ᓇᓗᓇᐃᖅᓯᔪᒪᕗᒍᑦ ᑕᒪᒃᑭᑦ ᐃᖅᑲᓇᐃᔭᖅᑎᖁᑎᓕᑦ ᐊᒻᒪ ᓴᓇᔨᓂᑦ "ᒪᑐᐃᖓᑦᑎᐊᕐᓂᑦᑎᓐᓂ ᐱᓕᕆᓂᕐᒧᑦ". ᐃᓱᒪᓕᐅᕇᓐᓇᖅᐳᒍᑦ ᐊᒻᒪ ᐊᐅᓚᑦᑎᓂᕐᒥ ᓄᑖᖑᔪᓂ ᐊᒻᒪ ᐱᑕᖄᓂᒃᑐᓂ ᑮᓇᐅᔭᖅᑖᕋᓱᐊᖅᑐᓄᑦ. ᑭᐅᖏᓐᓇᖅᐳᒍᑦ ᐃᖅᑲᓇᐃᔭᕐᕕᒻᒥᑦ ᖃᓄᐃᓕᓂᐅᔪᓂᑦ ᐊᒻᒪ ᐋᓐᓂᖅᑐᓄᑦ. ᑐᓂᓰᓐᓇᖅᐳᒍᑦ ᐱᔨᑦᑎᕋᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᓄᑦ.
 
ᖁᔭᓕᕗᒍᑦ ᑕᐃᒃᑯᓄᖓᓗᒃᑖᖅ ᓴᓇᔨᐅᔪᓄᑦ ᓇᓗᓇᐃᖅᓯᔪᓂ ᐃᖏᕐᕋᐃᓐᓇᕐᓂᖓᓂ ᐱᖁᑎᒃᓴᓄᑦ ᐊᒻᒪ ᑐᓂᓯᓂᐅᔪᒥ ᐱᒻᒪᕆᐅᔪᓂ ᐱᔨᑦᑎᕋᕐᓂᕐᒧᑦ ᓄᓇᑦᑎᓐᓄᑦ; ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᐅᔪᓄᑦ, ᐱᓕᕆᐊᖃᖅᑐᓄᑦ ᐃᖅᑲᓇᐃᔭᖅᑎᓂᑦ, ᐅᓯᑲᑦᑕᖅᑎᐅᔪᑦ ᐊᒻᒪ ᖃᖓᑕᓲᓕᕆᔨᓄᑦ, ᓴᓗᒻᒪᖅᓴᐃᔨᓄᑦ, ᓂᐅᕕᕐᕕᖕᓂ ᓂᐅᕕᖅᑎᐅᔪᑦ, ᓄᓇᓕᖕᓂ ᐱᔨᑦᑎᕋᕐᓂᕐᒧᑦ, ᐱᖅᑯᓯᑐᖃᖅᑎᒍᑦ ᐊᖑᓇᓱᒃᑏᑦ ᐊᒻᒪ ᐊᓯᓕᒫᖏᓐᓄᑦ. ᖃᓂᑦᑐᒥ ᐱᓕᕆᖃᑎᖃᖅᐳᒍᑦ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔪᓐᓇᕐᓂᖃᕐᓂᖏᓐᓂ ᐃᑲᔪᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᓂᑦ ᑭᓱᓕᒫᑦᑎᐊᓂ ᐱᓕᕆᓂᖏᓐᓂ ᐊᑦᑕᓇᔾᔭᐃᖅᓯᒪᓂᕐᒧᑦ.
 
ᑕᒪᑐᒪᓂ ᐱᓇᓱᐊᕈᓯᐅᔪᒥ, ᐅᖃᐅᓯᖃᓚᐅᖅᐳᒍᑦ ᐃᑲᔪᕈᑎᒃᓴᓂ ᐱᓕᕆᐊᖑᔪᓂ ᓇᖕᒥᓂᖃᖅᑎᓄᑦ ᐊᒃᓱᕈᖅᑐᓂ ᖃᔨᐃᓴᕐᓂᕐᒧᑦ ᐊᑭᓕᐅᑎᓕᐅᕐᓂᕐᒥ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19−ᒧᑦ ᑐᐊᕕᕐᓇᕐᓂᐅᔪᒥ. ᐱᒋᐊᕐᓗᓂ ᐊᐃᕐᕆᓕ 1, 2020, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᓄᖅᑲᖅᑎᑦᑎᓯᒪᕗᑦ ᑭᖑᕙᕐᓂᕐᒧᑦ ᐊᑭᓕᐅᑎᒃᑲᓐᓂᕐᓂᒃ ᕿᑐᕐᖏᐅᕐᓂᕐᓄᑦ ᐊᑭᓕᒃᓴᓂ ᐊᒻᒪᓗ ᐅᖓᕙᕆᐊᕐᓯᒃᑲᓐᓂᕐᖢᑎᒃ ᐊᑭᓕᕐᓱᐃᒍᑎᒃᓴᓂᒃ ᑭᖑᓪᓕᖅᐹᖅ ᐊᑭᓕᕐᕕᒃᓴᒥᑦ ᐅᕗᖓ ᐋᒡᒌᓯ 1, 2020-ᒧᑦ. ᐱᔾᔪᑎᒋᔭᖓ ᐅᑯᓄᖓ ᐊᓯᔾᔨᕐᓂᐅᔪᓄᑦ ᐊᑯᓂᐅᓂᖅᓴᒥ ᐱᕕᒃᓴᖃᕐᓂᕐᒧᑦ ᐋᖅᑭᒋᐊᖅᓯᓂᕐᒧᑦ ᑮᓇᐅᔭᓕᐊᖑᔪᓄᑦ ᐊᑭᓖᔾᔪᑎᓂᑦ ᓇᓚᐅᑦᑖᕆᔭᐅᓂᖏᓐᓄᑦ 2020−ᒧᑦ ᐊᒻᒪᓗ ᐊᑭᓕᐅᑎᓕᐅᕐᓂᕐᒧᑦ ᖃᖓᒃᑲᓐᓂᐅᔪᒥ ᐊᕐᕌᒍᒥ ᓵᙵᖏᓪᓗᑎᒃ ᖃᓄᐃᓕᐅᖅᑕᐅᓂᐅᔪᓂ.
 
ᐊᔭᐅᕆᕗᒍᑦ ᑕᒪᒃᑭᓂ ᐃᖅᑲᓇᐃᔭᖅᑎᖁᑎᓕᖕᓂᑦ ᐱᔭᕆᐊᖃᙱᑦᑐᓄᑦ ᐅᖓᕙᕆᐊᖅᑕᐅᔪᒥ ᐃᓱᓕᕝᕕᒃᓴᖓᓂ ᐃᖏᕐᕋᐃᓐᓇᕐᓂᖏᓐᓂ ᐸᕐᓇᒃᑕᐅᓯᒪᔪᓂ ᐊᑭᓖᓂᖏᓐᓄᑦ ᒪᓕᒃᑕᒃᓴᓄᑦ. ᖃᓂᑦᑐᒥ ᓇᐅᑦᑎᖅᓱᐃᓐᓇᕐᓂᐊᖅᐳᒍᑦ ᖃᓄᐃᓐᓂᐅᔪᒥ ᐊᒻᒪᓗ ᐃᓱᒪᓕᐅᕆᓂᕐᒥ ᓇᓕᒧᑎᑦᑎᔪᓂ ᐱᔭᕆᐊᖃᕐᓂᐅᔪᓂ ᐃᖅᑲᓇᐃᔭᖅᑎᖁᑎᓕᖕᓄᑦ ᑕᒪᑐᒪᓂ ᓂᕆᐅᒋᔭᐅᙱᑦᑐᒥ ᖃᓄᐃᓐᓂᐅᔪᒥ ᐊᖏᖅᓯᒪᓂᑦᑎᓐᓂ ᐸᐸᑦᑏᓐᓇᕐᓂᕐᒧᑦ ᐃᖅᑲᓇᐃᔭᖅᑏᑦ ᓴᐳᔾᔨᓯᒪᓂᕐᒧᑦ ᑮᓇᐅᔭᖁᑎᖏᓐᓂᑦ ᓯᕗᓂᒃᓴᒧᑦ.
 
ᐅᖃᓕᒫᕐᓗᒍ ᑐᑭᓯᒋᐊᕈᑎᒃᓴᑦ ᐊᑖᓂ ᑭᐅᔾᔪᑎᓄᑦ ᐃᓚᖏᓐᓄᑦ ᐊᐱᕆᔭᐅᒐᔪᒃᑐᓄᑦ ᐃᖅᑲᓇᐃᔭᖅᑎᕗᑦ ᐱᕙᖕᓂᖏᓐᓂ ᐊᑭᓕᐅᑎᓄᑦ, ᐃᑲᔪᖅᓯᖅᑕᐅᓂᕐᒥ ᐅᓗᕆᐊᓇᖅᑐᒥ ᖃᐅᔨᓴᕐᓂᐅᔪᓂᑦ, ᑮᓇᐅᔭᓕᐊᓄᑦ ᐊᑭᓖᔾᔪᑏᑦ ᐋᖅᑭᒋᐊᖅᑕᐅᓂᖏᓐᓂ ᐊᒻᒪ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᕐᓂᕐᒧᑦ ᑐᑭᓯᒋᐊᕈᑎᒃᓴᑦ ᐊᒃᑐᐃᓂᖃᑐᐃᓐᓇᕆᐊᓕᖕᓂ ᑲᑐᔾᔨᖃᑎᒌᔅᓯᓐᓂ ᐅᕝᕙᓘᓐᓃᑦ ᐋᓐᓂᖅᓯᒪᔪᓄᑦ ᓴᓇᔨᐅᔪᓄᑦ.

ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᓱᓕ ᐊᖏᓛᖑᓪᓗᓂ ᓯᕗᓪᓕᐅᔾᔭᐅᑎᑕᐅᕗᖅ.
 
ᖁᔭᓐᓇᒦᒃ | Thank you | Quana | Merci | Mahsi Cho

ᑕᐱ ᒪᓗᐊᐃ, ᐊᖓᔪᖅᑳᖅ ᐊᒻᒪᓗ ᐊᐅᓚᑦᑎᔨᒻᒪᕆᒃ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ.



ᒫᓐᓇᒨᓕᖓᐃᓐᓇᕆᑦ

ᐊᐱᕆᕗᒍᑦ ᑕᒪᒃᑭᓂ ᐃᖅᑲᓇᐃᔭᖅᑎᖁᑎᓕᖕᓂ ᐊᒻᒪ ᓴᓇᔨᐅᔪᓂ ᖃᓂᑦᑐᒥ ᒪᓕᖕᓂᖏᓐᓂ ᐅᖃᐅᔾᔨᓂᐅᔪᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᖓᔪᖅᑳᖑᔪᒥ (CPHO) ᑕᒪᒃᑭᓂ ᐅᑭᐅᖅᑕᖅᑐᓂ ᐊᒻᒪᓗ ᐃᓱᒪᓕᐅᕆᓗᓯ ᒪᓕᒃᑐᓂᒃ ᑭᖑᓕᖅᐹᓂᒃ ᑐᓴᒐᒃᓴᓂᒃ ᐊᒻᒪᓗ ᑕᒪᒃᑭᓂ ᑎᓕᐅᕈᑕᐅᔪᓂ ᐊᒻᒪ ᐅᖃᐅᔾᔨᓂᐅᔪᓂ ᑐᓂᔭᐅᔪᓂ ᐱᔾᔪᑎᖃᖅᑐᓂ ᓇᖕᒥᓂᖃᕐᓂᐅᔪᓂ ᒪᑐᔭᐅᓂᖏᓐᓂ, ᐱᔾᓚᕆᐅᔪᓂ ᐱᔨᑦᑎᕋᕐᓂᕐᒧᑦ, ᐃᓄᑑᔪᒦᑦᑕᕆᐊᖃᕐᓂᕐᒥᒃ, ᐃᓅᖃᑎᒥᑦ ᐅᖓᓯᒃᓴᕆᐊᖃᕐᓂᕐᒥᒃ ᐊᒻᒪ ᐊᐅᓪᓚᑲᑕᖕᓂᕐᒧᑦ.

ᓄᑖᙳᕆᐊᖅᑎᑕᐅᓂᐅᔪᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᕐᓂᕐᒧᑦ
 
ᑎᑎᕋᕐᕕᒃᐳᑦ ᒪᑐᓯᒪᕗᑦ ᐃᓄᓕᒫᓄᑦ ᑭᓯᐊᓂ ᐃᖅᑲᓇᐃᔭᖅᑎᕗᑦ ᓱᓕ ᐊᑐᐃᓐᓇᐅᕗᑦ. ᐅᖃᓗᐃᓐᓇᕈᓐᓇᖅᐳᑎᑦ ᐅᖃᓗᒡᕕᓪᓗᐊᑕᐅᔪᒧᑦ ᐅᕗᖓ (877) 404-4407 ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᑎᑎᕋᕐᕕᐅᔪᓐᓇᖅᑐᖅ info@wscc.nt.ca ᐅᕝᕙᓘᓐᓃᑦ  info@wscc.nu.ca ᐊᒻᒪ ᑐᕌᖅᑎᑕᐅᓂᐊᖅᐳᑎᑦ ᐱᔨᑦᑎᕋᕐᓂᕐᒧᑦ ᐱᔭᕆᐊᖃᖅᑕᕐᓄᑦ. ᐊᑯᓂᐅᓂᖅᓴᒥ ᐅᑕᖅᑭᔭᕆᐊᖃᕐᓂᐊᖅᑐᒃᓴᐅᕗᑎᑦ ᐱᔨᑦᑎᕋᕐᓂᕐᒧᑦ ᐅᕝᕙᓘᓐᓃᑦ ᐅᑎᖅᑎᑕᒧᑦ ᐅᖃᓗᒡᕕᐅᓂᕐᒧᑦ. ᖁᔭᓕᕗᒍᑦ ᕿᓄᐃᓵᕐᓂᕐᓂ ᑕᒪᑐᒪᐅᔪᒥ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᓱᖏᐅᔾᔨᓴᖅᐳᑦ ᐱᔨᑦᑎᕋᕐᓂᑦᑎᓐᓂ ᓇᓗᓇᐃᖅᓯᓂᕐᒧᑦ ᑲᔪᓯᓇᓱᒃᖢᑕ ᐃᖅᑲᓇᐃᔭᖅᑎᓄᑦ ᐱᔭᐅᔭᕆᐊᓕᖕᓄᑦ, ᐃᖅᑲᓇᐃᔭᖅᑎᑦᑎᔨᓄᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ. ᑕᒪᕐᒥ ᐱᔨᑦᑎᕋᐅᑎᑦ ᐋᖅᑭᒋᐊᖅᑕᐅᕙᓪᓕᐊᔪᑦ ᐅᕘᓇ ᓄᑖᖑᔪᒥ  ᓄᕙᒡᔪᐊᕐᓇᖅ-19−ᒥ ᐃᓚᖓᓐᓂ ᖃᕋᓴᐅᔭᑎᒍᑦ ᐃᑭᐊᕿᕕᖕᒥᑦ ᓴᖅᑭᔮᖅᑎᑕᐅᑲᑕᖕᓂᐊᖅᑐᑦ ᐊᑐᐃᓐᓇᐅᓕᑐᐊᕌᖓᑕ.

ᖃᔨᐃᓴᕐᓂᕐᒧᑦ ᐊᑭᓕᐅᑎᑦ

ᐱᒋᐊᕐᓗᓂ ᐊᐃᕐᕆᓕ 1, 2020, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᓄᖅᑲᖅᑎᑦᑎᓯᒪᕗᑦ ᑭᖑᕙᕐᓂᕐᒧᑦ ᐊᑭᓕᐅᑎᒃᑲᓐᓂᕐᓂᒃ ᕿᑐᕐᖏᐅᕐᓂᕐᓄᑦ ᐊᑭᓕᒃᓴᓂ ᐊᒻᒪᓗ ᐅᖓᕙᕆᐊᕐᓯᒃᑲᓐᓂᕐᖢᑎᒃ ᐊᑭᓕᕐᓱᐃᒍᑎᒃᓴᓂᒃ ᑭᖑᓪᓕᖅᐹᖅ ᐊᑭᓕᕐᕕᒃᓴᒥᑦ ᐅᕗᖓ ᐋᒡᒌᓯ 1, 2020-ᒧᑦ.

ᖃᓄᖅ ᓄᑖᙳᕆᐊᖅᑎᑦᑎᔪᓐᓇᖅᐳᖓ ᐊᑭᓕᖅᓱᖅᑕᐅᒍᑎᒃᓴᐅᓇᔭᖅᑐᓂᑦ?

ᐊᑭᓕᖅᓱᖅᑕᐅᒍᑎᒃᓴᐅᓇᔭᖅᑐᑦ ᓇᓚᐅᑦᑖᕆᔭᐅᓂᑯᑦ ᑐᓂᔭᐅᔪᓐᓇᖅᑐᖅ ᐊᓯᔾᔨᖅᑕᐅᓗᑎᒡᓘᓐᓃᑦ ᖃᕋᓴᐅᔭᑎᒍᑦ ᐅᑯᑎᒎᓇᖅ WSCC Connect. ᖃᕋᓴᐅᔭᒃᑯᑦ ᑐᑭᒧᐊᕈᑎᓂᒃ ᑕᑯᔪᓐᓇᖅᑐᓯ ᐅᕘᓇ WSCC Connect ᐃᑲᔪᕐᕕᒃᑯᑦ. ᐃᑲᔪᖅᑕᐅᒃᑲᓐᓂᕈᒪᒍᕕᑦ, ᐅᖄᓚᓗᑎᑦ (877) 404-4407 ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᑎᑎᕋᕐᕕᐅᔪᓐᓇᖅᑐᖅ Employer Services.

ᐊᑭᓖᓂᕐᒧᑦ ᐃᖅᑲᓇᐃᔭᖅᑎᓄᑦ ᑐᓴᒐᒃᓴᑦ ᐋᓐᓂᖅᓯᒪᔪᓄᑦ ᓴᓇᔨᐅᔪᓄᑦ

ᐊᑭᓕᐅᑎᒃᓴᑦ ᐋᓐᓂᖅᓯᒪᔪᓄᑦ ᐃᖅᑲᓇᐃᔭᖅᑎᓄᑦ ᑲᔪᓯᓂᐊᖅᑐᖅ ᐋᖅᑭᒃᓯᒪᓂᖏᑦᑎᒍᑦ. ᐋᓐᓂᖅᓯᒪᔪᒥ ᓴᓇᔨᒥ ᒫᓐᓇᐅᔪᒥ ᐱᕙᒃᑯᓂ ᓯᒃᑭᓂ ᐊᑭᓕᐅᑎᓂᑦ, ᑭᓯᐊᓂ ᓴᖑᖔᕈᒪᒍᓂ ᖃᕋᓴᐅᔭᑎᒍᑦ ᑮᓇᐅᔭᓄᑦ ᓅᑕᐅᓂᖓᓂ, ᐊᔭᐅᕆᕗᒍᑦ ᖃᐅᔨᒋᐊᕐᓂᖏᓐᓂ ᐱᓕᕆᐊᖃᖅᑐᒥ ᐊᐅᓚᑦᑎᔨᐅᔪᒧᑦ ᑮᓇᐅᔭᒃᑯᕕᖓᑕ ᑐᑭᓯᒋᐊᕈᑎᒃᓴᖏᓐᓂᑦ ᐅᖃᓗᒡᓗᓂ (877) 404-4407 ᐅᕝᕙᓘᓐᓃᑦ ᖃᕋᓴᐅᔭᑎᒍᑦ ᑎᑎᕋᕐᓗᓂ Claims Services.

ᓴᓇᔨᐅᔪᒥ ᐊᑭᓕᖅᑕᐅᔪᒪᔾᔪᑎᓕᐅᕈᓐᓇᖅᐸ ᐅᒃᐱᕈᓱᒃᑯᑎᒃ ᐱᓚᐅᕐᓂᖏᓐᓂ ᓄᕙᒡᔪᐊᕐᓇᖅ-19−ᒥ ᐃᖅᑲᓇᐃᔭᕐᕕᖓᓐᓂ?

ᐊᐃᑦᑐᖅᑕᐅᔪᓐᓇᖅᑐᒥ ᐋᓐᓂᐊᕐᓇᕐᒥᑦ ᓲᕐᓗ ᓄᕙᒡᔪᐊᕐᓇᖅ-19−ᒥ ᐱᑕᖃᖅᑎᓪᓗᒍ ᓄᓇᓕᖕᓂ, ᐃᓄᐃᑦ ᐅᓗᕆᐊᓇᖅᑐᒦᑉᐳᑦ ᐱᓂᖏᓐᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ ᐅᕘᓇ ᖃᐅᑕᒫᒥ ᖃᓄᐃᓕᐅᕐᓂᖏᓐᓄᑦ. ᖃᓄᐃᓐᓂᒐᓚᑦ ᑕᒪᒃᑭᑲᓴᖕᓂ ᓄᕙᒡᔪᐊᕐᓇᖅ-19−ᒧᑦ ᐃᖅᑲᓇᐃᔮᒧᑦ ᐱᑎᑕᐅᓯᒪᙱᓚᑦ. ᑭᓯᐊᓂ, ᓴᓇᔨᐅᔪᒥ ᐊᑐᕐᓂᖃᕈᓂ ᐋᓐᓂᐊᕈᑕᐅᖃᑦᑕᖅᑐᓄᑦ ᐊᒻᒪ ᐅᒃᐱᕈᓱᒃᑯᑎᒃ ᐱᓚᐅᕐᓂᖏᓐᓂ ᓄᕙᒡᔪᐊᕐᓇᖅ-19 ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ ᑐᕌᖓᓂᖃᓪᓚᕆᒃᑐᒥ ᐃᖅᑲᓇᐃᔮᖓᓄᑦ, ᖃᐅᔨᒋᐊᕐᕕᒋᒍᒃ ᑎᑎᕋᕐᕕᑦᑎᓐᓄᑦ ᐅᕗᖓ (877) 404-4407 ᐊᒻᒪ ᓂᕈᐊᕐᓗᒍ ᑮᓇᐅᔭᖅᑖᕋᓱᐊᖅᑐᓄᑦ ᐱᓕᕆᕝᕕᖓᓄᑦ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᐃᓱᒪᓕᐅᕆᓇᔭᕐᑐᑦ ᖃᓄᖅ ᑮᓇᐅᔭᖅᑖᕋᓲᑎ ᐊᒃᑐᐊᖕᒪᖔᑦ ᐃᖅᑲᓇᐃᔮᒧᑦ ᐊᒻᒪ ᖃᓄᐃᑦᑐᓂᒃ ᐱᕚᓪᓕᕈᑏᑦ ᑐᓂᔭᐅᓂᐊᕐᓂᖏᓐᓂ ᑐᙵᕕᖃᖅᑐᒥ ᓇᓗᓇᐃᖅᑕᐅᓯᒪᔪᒥ ᖃᓄᐃᓐᓂᐅᔪᒥ ᐊᑐᓂ ᐃᓄᖕᒧᑦ ᐱᓕᕆᓂᐅᔪᒥ.

ᑕᑯᒃᓴᐅᑎᑕᐅᔪᖅ ᐃᑲᔪᕈᑎᒃᓴᑦ: ᐊᑦᑕᓇᖅᑐᒥ ᖃᐅᔨᓴᕐᓂᖅ ᐱᓪᓚᕆᐅᔪᓄᑦ ᐃᖅᑲᓇᐃᔭᖅᑎᓄᑦ ᐃᖅᑲᓇᐃᔭᕐᕕᒋᔭᖏᑕ ᐃᓂᒋᔭᖓᓂ

ᑕᒪᕐᒥᒃ ᐃᖅᑲᓇᐃᔭᖅᑎᖁᑎᓖᑦ ᐊᑐᓪᓗᐊᖅᐳᑦ ᐊᑦᑕᓇᖅᑐᒥ ᖃᐅᔨᓴᕐᓂᖅ ᐊᒻᒪ ᐃᖅᑲᓇᐃᔭᖅᕕᖕᒥᑦ ᐅᔾᔨᕐᓱᕆᐊᓖᑦ ᖃᐅᔨᓇᓱᒡᓗᑎᑦ ᑭᒡᓕᐅᔪᒥ ᐊᑦᑕᓇᕐᓂᖓᓂ ᓴᖅᑭᔮᕐᕕᐅᓂᕐᒥᑦ ᓄᕙᒡᔪᐊᕐᓇᖅ-19-ᒧ ᐱᓪᓚᕆᐅᔪᓄᑦ ᓴᓇᔨᐅᔪᓄᑦ ᐃᖅᑲᓇᐃᔭᕐᕕᒋᔭᖏᑕ ᐃᓂᒋᔭᖓᓂ. ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᕙᓪᓕᐊᑎᑦᑎᓚᐅᖅᐳᑦ ᐆᒥᖓ ᒪᓕᒋᐊᓕᖕᒥ ᐅᖃᖃᑎᖃᓚᐅᖅᑎᓪᓗᒋᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ. ᐃᖅᑲᓇᐃᔭᖅᑎᖁᑎᓖᑦ ᐱᓕᕇᓐᓇᓪᓗᐊᖅᐳᑦ ᑕᒪᒃᑭᓂ ᐱᔭᕆᐊᓕᖕᓂ ᐱᓕᕆᐊᖑᔪᓂ ᓴᐳᔾᔨᓯᒪᓂᕐᒧᑦ ᓴᓇᔨᐅᔪᓂᑦ:
  • ᐅᖃᓪᓚᖃᑎᖃᓗᑎ ᐃᖅᑲᓇᐃᔭᖅᑎᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑲᑎᒪᔨᕋᓛᓂᒃ ᐊᑦᑕᓇᖅᑐᓂᒃ ᖃᐅᔨᓴᕈᒪᓂᕐᒧᑦ.
  • ᖃᐅᔨᓴᕐᓂᖅ ᐃᓚᒋᔭᐅᓕᕋᔭᕐᑐᖅ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐅᓗᕆᐊᓇᙱᑦᑐᒦᓐᓂᕐᒧᑦ ᐸᕐᓇᐅᑎᒋᔭᕐᓄᑦ ᐃᖅᑲᓇᐃᔭᖅᑎᓄᓪᓗ ᑐᓴᐅᒪᑎᓪᓗᒋᑦ.
  • ᖃᐅᔨᓴᒃᑲᓐᓂᕐᓗᒍ ᐊᒻᒪ ᓄᑖᙳᕆᐊᕐᓗᒋ ᖃᓄᐃᓐᓂᕐᒨᖓᔪᓄᑦ ᐊᓯᔾᔨᕈᑎᐅᔪᑦ ᐅᕝᕙᓘᓐᓃᑦ ᓄᑖᓂᒃ ᐊᑦᑕᓇᖅᑐᓂᒃ ᓇᓗᓇᐃᕐᓯᓗᑎᒃ.
ᑐᓂᓯᔭᕆᐊᖃᙱᓚᑎᑦ ᐱᔭᕇᖅᓯᒪᔪᒥ ᐊᑦᑕᓇᕈᑎᐅᔪᓐᓇᖅᑐᓂᑦ ᖃᐅᔨᓴᐃᓂᕐᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ.
  • ᐊᑦᑕᓇᖅᑐᓂᒃ ᖃᐅᔨᓴᕈᑎᐅᔪᑦ ᐱᐊᓂᒃᓯᒪᔪᑦ ᐱᓯᒪᓗᒋᑦ,
  • ᕿᒥᕐᕈᐊᕐᐸᒡᓗᒋᑦ ᓴᐳᔾᔨᓯᒪᓂᐅᔪᒥ ᐱᓕᕆᐊᖑᔪᓂ ᐃᖅᑲᓇᐃᔭᖅᑎᓄᑦ ᖃᐅᔨᒪᔪᐃᓐᓇᐅᖁᓪᓗᒋ ᐊᒻᒪ ᑐᑭᓯᓯᒪᓗᑎᒃ ᐃᖅᑲᓇᐃᔭᖅᑎᖁᑎᓕᒃ ᖃᓄᐃᓕᐅᕆᐊᖃᕐᓂᖓᓂᒃ ᐊᑦᑕᓇᔾᔭᐃᖅᓯᓯᒪᓂᕐᒧᑦ ᐊᒻᒪᓗ ᖃᓄᐃᓕᐅᕆᐊᖃᕐᓂᖏᓐᓂᒃ ᐃᖕᒥᖕᓂᒃ ᓴᐳᑎᓯᒪᒐᓱᒡᓗᑎᒃ ᓴᖅᑭᔮᕐᕕᐅᓂᕐᒥ ᓄᕙᒡᔪᐊᕐᓇᖅ-19-ᒥᑦ.
ᐃᑲᔪᖅᑕᐅᔪᓐᓇᖅᑐᑎ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᖃᐅᔨᓴᖅᑎᒥ ᖃᐅᔨᓴᕐᑎᓪᓗᑎ ᐊᑦᑕᓇᖅᑐᓂᒃ, ᖃᕋᓴᐅᔭᒃᑯᓪᓘᓐᓃᑦ ᑎᑎᕋᕐᓗᓯ ᐅᕗᖓ Covid-19@wscc.nu.ca

ᐊᓯᖏᓐᓄᑦ ᐃᓱᒫᓘᑎᓄᑦ ᐊᒃᑐᐊᔪᓂᒃ ᓄᕙᒡᔪᐊᕐᓇᖅ-19-ᒧᑦ, ᐅᓇ ᑕᑯᒋᐊᕐᓗᒍ   https://www.gov.nu.ca/iu/aanniaqangnanngittulirijikku/information/aniqsaaqturnikkut-qanimannaq-19 .

ᐱᓕᕆᖃᑎᒌᖕᓂᕐᒥ ᓴᓇᔨᕗᑦ ᐊᑦᑕᓇᔾᔭᐃᖅᓯᒪᓂᕐᒧᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑲᑎᙵᓂᐅᔪᑦ ᐊᒃᓱᕈᖅᖢᑎᒃ ᐱᓕᕆᕗᑦ ᐱᕙᓪᓕᐊᑎᑦᑎᓂᕐᒧᑦ ᐃᑲᔪᕈᑎᒃᓴᓂ ᐅᑭᐅᖅᑕᖅᑐᒥ ᐃᖅᑲᓇᐃᔭᖅᑎᖁᑎᓕᖕᓄᑦ ᐊᒻᒪ ᓴᓇᔨᐅᔪᓄᑦ. ᑕᒪᒃᑭᑦ ᓄᑖᑦ ᐃᑲᔪᕈᑎᒃᓴᐃᑦ ᓴᖅᑭᑎᑕᐅᓂᐊᖅᐳᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖕᒥᑦ ᐅᕙᓂ  ᓄᕙᒡᔪᐊᕐᓇᖅ-19 ᐃᓚᖓᓐᓂ ᐊᑐᐃᓐᓇᕈᑐᐊᖅᐸᑕ, ᐊᒻᒪ ᐃᓅᖃᑎᒌᓄᑦ ᓯᐊᒻᒪᖅᑎᑦᑎᓂᐅᔪᒃᑯᑦ ᒪᒃᐱᖅᑐᒐᑦᑎᓐᓂ. ᐱᐅᒋᓗᒍ ᐊᒻᒪ ᒪᓕᒃᑎᒍᑦ ᒫᓐᓇᒨᖑᔪᓄᑦ ᑐᑭᓯᒋᐊᕈᑎᒃᓴᓄᑦ, ᐊᒻᒪ ᑕᒪᒃᑭᓂ ᓄᑖᖑᓛᖑᔪᓂ ᑐᓴᒐᒃᓴᓂᑦ.

ᐱᒃᑲᓐᓂᕆᐊᖃᕈᕕᑦ ᑐᑭᓯᒋᐊᕈᑎᒃᓴᓂᑦ ᐊᒻᒪ ᐊᔪᕆᖅᓱᐃᓂᐅᔪᒥ ᓴᓇᔨᖦᓯᓐᓂ ᐊᑦᑕᓇᔾᔭᐃᖅᓯᒪᓂᕐᒧᑦ, ᑕᑯᒋᐊᕆᒃ ᐊᑖᓂ ᑎᑎᕋᖅᓯᒪᓂᐅᔪᓂ ᑲᑐᔾᔨᖃᑎᒌᖑᔪᓄᑦ ᓴᖅᑭᑎᑦᑏᓐᓇᖅᑐᓂ ᐱᒻᒪᕆᐅᔪᓂ ᐃᑲᔪᕈᑎᒃᓴᓂ ᓄᕙᒡᔪᐊᕐᓇᖅ-19 ᑐᐊᕕᕐᓇᕐᓂᐅᔪᒥ:
ᑲᑎᙵᓗᑕ ᓱᒃᑲᐃᒡᓕᒋᐊᖅᑎᑦᑎᓂᐊᖅᐳᒍᑦ ᐊᒻᒪ ᓄᖅᑲᖅᑎᓪᓗᒍ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19−ᒥ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᑐᓴᐅᒪᑎᑦᑎᖃᑦᑕᕐᓂᐊᖅᑐᑦ ᓄᑖᓂᒃ ᓴᖅᑭᑦᑐᖃᕌᖓᑦ. ᐊᐱᖅᑯᑎᒃᓴᖃᕈᔅᓯ ᐃᓱᒫᓘᑎᖃᕈᔅᓯᓘᓐᓃᑦ, ᐅᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᓄᓇᑦᓯᐊᕐᒥ ᐅᖄᓚᕕᒋᓗᒋᑦ ᐅᕗᖓ (867) 920-3888, ᐊᑭᖃᙱᑦᑐᒧᑦ (800) 661-0792 ᐅᕝᕙᓘᓐᓃᑦ ᓄᓇᕗᒻᒥ (867) 979-8500, ᐊᑭᖃᙱᑦᑐᒧᑦ (877) 404-4407, 8:30-ᒥᑦ 5:00-ᒧᑦ ᐅᓪᓗᒃᑯᑦ.


wscc.nt.ca   /  1.800.661.0792   *   wscc.nu.ca  /  1.877.404.4407