I kēlā māhina aku nei, ua hoʻolauna ʻia ʻo Makaliʻi i mea e nalu ai ma luna o ka makahiki i hala iho nei a me ka hoʻomākaukau no ka makahiki e hiki mai ana, a me nā mea i ʻike ʻia iho nei i pono ai ka ʻoni ʻana. Ua lilo ka hū ʻana aʻe o Maunaloa he hoʻomanaʻo iā kākou, he aliʻi nō ka ʻāina a he kauā nō kākou, nā kānaka, no laila ka mea nui ʻo ko kākou mālama ʻana i kēia wahi. Lilo ka nahu ʻia o ke kanaka na ka manō he hoʻomanaʻo i ke kaʻana like ʻia o nā kumuwaiwai, ke kuleana i ka palekana, a me ka mālama ma kā kākou mau pilina. Lilo ke anilā ʻino he hoʻomanaʻo i ke koʻikoʻi ʻo ka pili pū ʻana ma ke kōkua i nā mea e pono ai. Pā nō kākou i ka loli o ko kākou wahi a ma ka ʻimi ʻana i ka pono o ko Hawaiʻi poʻe. ʻO ia nā mea e mau ai ko kākou ʻonipaʻa ʻana ma kā kākou mau hana e like me ka Mōʻī Kamehameha V, ma nā hana a nā kūpuna o kēia wahi i kaʻikaʻi mua ma kēia ala, a no ka pono o ko Hawaiʻi no kēia mua aku. E aʻo hou no ka Mōʻī Kamehameha V ma kēia pukana a pēlā pū ka hana e hana ʻia nei no kāna hoʻoilina.

Ua mālama ʻia na ke Keʻena Kuleana Hoʻokipa o Hawaiʻi kona ʻAha ʻOihana Hoʻokipa 2022 na Hawaiian Airlines ma ke Kikowaena Hālāwai o Hawaiʻi ma ka lā 8 a 9 o Kekemapa. He 500 a ʻoi lālā hōʻea o nā alakaʻi ʻoihana, nā lālā ʻaha ʻōlelo, nā mea kiʻi maka nui, a me nā lālā kaiaulu i komo i ka ʻaha o kēia makahiki, ʻo ia hoʻi, he mau hanana launa pū a me nā papa hoʻonui ʻike ʻeiwa e kālele ana ma luna o nā hana hoʻokele wahi huakaʻi, ko Hawaiʻi ʻoihana hoʻokipa hoʻomauō o ka wā e hiki mai ana, a me ka moʻomeheu Hawaiʻi. Ua hōʻike ke Keʻena Kuleana Hoʻokipa o Hawaiʻi a me kona Global Marketing Team i ka nūhou no nā hana kauʻāina, ka ʻoihana hoʻokipa holo moku, nā hālāwai poepoe honua, nā ʻaha a papa hana (MCI), a me nā mākeke nui e kipa ana iā Hawaiʻi — ʻAmelika Hui Pū ʻIa, Iāpana, Kanakā, Moananuiākea, Kolea, a me Kina.

I ka wā o ka ʻaina awakea Tourism Legacy Awards e kālele ana i ka mālama, ua hoʻohanohano ko ke Keʻena Kuleana Hoʻokipa o Hawaiʻi i ka ʻekolu kānaka a hui no ka maikaʻi o kā lākou hana no ka pono nui: ʻo ke Kenekoa Kenneth Brown, ʻo ia kekahi lālā hoʻokumu o ka Native Hawaiian Hospitality Association a ʻo ia ka mea kākau o “The Mālama Ethic in Planning for Hawaiʻi’s Future”; Ernie Lau, manakia a ʻenekinia alakaʻi o ka Board of Water Supply; a me Kuaʻāina ʻUlu ʻAuamo, he hui kū i ka ʻauhau ʻole i alakaʻi i ka papa hana 2022 Year of the Limu.

Ua mālama ʻia nā hana lima moʻomeheu ma ka ʻaha ma ka Hoʻokipa Exhibitor Showcase na Keoua Nelson, he mea ulana lau hala no Nāpoʻopoʻo, he ʻeono hanauna ka mole ʻana o kona ʻike, Mele Kahalepule Chun i aʻo i ka pua hulu mai ka piha ʻana o kona makahiki ʻelima, a me Nalu Andrade o Nā Maka Kahiko i aʻo i nā lālā komo i ka ʻohe kāpala.

Mahalo i ka poʻe i kākoʻo i ka ʻaha o kēia makahiki. E kōmi ma ʻaneʻi e ʻike ai i nā kiʻiaka hōʻikeʻike. Lana ka manaʻo i ka ʻike aku iā ʻoe i kēia makahiki aʻe!

Ua hoʻokumu ʻia na ka hui kū i ka ʻauhau ʻole o Hawaiʻi ʻo KUPU, ke ʻimi nei ka Hawaiʻi Youth Conservation Corps (HYCC) i ka paikomo, hoʻomākaukau, a hana pū me ka 120 a ʻoi kānaka mākua ʻōpio ma nā hana e kākoʻo ana i ka mālama ʻia o nā kumuwaiwai ao kūlohelohe o Oʻahu, Kauaʻi, Maui, Hawaiʻi, a me Molokaʻi. E kākoʻo nā papa hana HYCC i ka waele ʻia o nā lāhulu komo hailapu, ka hoʻoikaika ʻana i nā kaianoho meakanu a holoholona ʻōiwi, ka mālama ʻana i nā ala, ka hoʻokele ʻana i ka pau ʻana o ka ʻāina a me ka mālama ʻia o nā wahi moʻomeheu Hawaiʻi, i ka wā e hoʻoulu ana i nā mea komo me ke kahukahu ʻana i nā mākau ola mālama kumuwaiwai ao kūlohelohe. E kōmi ma ʻaneʻi no ka ʻike hou aku a no ke noi ʻana paha i ko HYCC papa hana kauwela 2023 a no ke aʻo hou aku no KUPU.

Ma nā lā e hiki ana i ka ʻAha ʻOihana Hoʻokipa Hawaiʻi, ua komo pū nā limahana o ke Keʻena Kuleana Hoʻokipa o Hawaiʻi a me ke kime Global Marketing Team ma ka lā hana ma ke ahupuaʻa ʻo Heʻeia me ka hui kū i ka ʻauhau ʻole ʻo Kākoʻo ʻŌiwi. He 38 limahana i hui me ka Luna Hoʻokele o Kākoʻo ʻŌiwi ʻo Kānekona Kūkea Schultz nāna i hōʻike no nā makahiki hoʻomaka a me ke kūpaʻa i ka hoʻōla i ka hana mahi ʻai ma ka 405 ʻeka ʻāina loʻi e hōʻoia ana i ka mau o kēia wahi pana no nā hanauna e hiki mai ana. Ua hana pū ke kime ma ka loʻi e huki kalo ana me ka ʻohiʻohi lau pū, a ua kōkua pū i ka waele ma ke kapa kai. E aʻo hou aku no Kākoʻo ʻŌiwi, he hui papa hana Aloha ʻĀina ma ʻaneʻi.

Ua hānau ʻia ʻo Lota Kapuāiwa Kalanimakua Aliʻiōlani Kalanikuapapaʻīkalaninui, i kapa ʻia ma hope mai ʻo Kamehameha V, ma ka lā 11 o Kekemapa, 1830, a hala aku ma ka lā 11 o Kekemapa, 1872. Iā ia e noho mōʻī ʻana, ua ʻike ʻia ka piʻi ʻana aʻe o ka huakaʻi i Hawaiʻi, a ma ke ʻano he mea maʻa i ka huakaʻi, ua paʻa kona kahua nona iho kahi i mole ai ke ʻano o kona hoʻoholo ʻana no ka pono o Hawaiʻi. Ua ʻōlelo ʻia ʻo ia e Mark Twain he mōʻī naʻauao no kona ʻike i ka poepoe honua, he naʻauao a he mea hoʻokō, a ua kūlia ʻo ia i ka pono o kona poʻe. Ua kūpaʻa ʻo ia ma hope o kona poʻe a ua hilinaʻi pū ʻia—ua lilo kāna mākia: “ʻonipaʻa” he mea e ʻike ʻia ai kāna hana kūpaʻa i ka hoʻōla i nā hana kuʻuna Hawaiʻi i waena o kona poʻe no kona poʻe. ʻO ia kāna hoʻoilina, ʻo ka waele ʻana i ke ala i ka ʻike no kona poʻe e holomua ai, a ʻo ka hana e koe mai, na ko Hawaiʻi ia e hoʻoholomua. I mea e hoʻohanohano ai iā ia, hoʻohanohano ʻia ka Royal Order of Kamehameha a me ka Prince Lot Hula Festival, he hanana e kākoʻo ʻia nei na ke Keʻena Kuleana Hoʻokipa o Hawaiʻi ma lalo o kona Papa Hana Hoʻoulu Kaiaulu. E ola ka inoa ʻo Lota Kapuāiwa Kalanimakua Aliʻiōlani Kalanikupuapaʻīkalaninui — Kamehameha V. E ʻonipaʻa kākou!

Aia ma ka ʻaoʻao Kona o Oʻahu, ke lawelawe nei ʻo Ulu Aʻe Learning Center i ka hoʻonaʻauao moʻomeheu a ʻāina i nā keiki a ʻohana o Honouliuli. Ke kūlia nei ko ka hui Ulu Aʻe Kaiāulu Project is hoʻoikaika i ko ke kaiaulu ʻike i kona mōʻaukala a moʻomeheu ma o kekahi mau papa hana e kia ana ma luna o ka hoʻoulu mākaukau, ʻike, a mālama ma ke kaiaulu. Hoʻomau nā papa hana ʻekolu—ʻo ka Puʻukapolei Stewardship Program, ka papa hana ʻIke Kuʻuna Workshop, a me ka Noʻeau Learning Box Delivery Service—i ko Hawaiʻi mau kumuwaiwai moʻomeheu a ao kūlohelohe me ke kūkulu mākaukau no ka mau o ka moʻomeheu Hawaiʻi no nā hanauna e hiki mai ana. E aʻo hou aku no Ulu Aʻe Learning Center ma ʻaneʻi.

Ke hoʻolako ʻia nei he 20 lako ʻaila pale lā minelala ma nā kahakai hele nui ʻia o ke kalana o Maui na ka Maui Visitors and Convention Bureau ma ka hana pū ʻana me Raw Elements, State Department of Land and Natural Resources, Maui County Park and Recreation, Pūlama Lānaʻi, Whalers Village, a me kekahi mau hui kaiaulu. Ua mālama ʻia kekahi ʻaha kūikawā ma ka lā 12 o Kekemapa ma ka Whalers Village i mea e hoʻolaʻa ʻia ai ka papa hana, e kākoʻo ana hoʻi i nā hana hoʻokele wahi huakaʻi a me ka Maui County Council Ordinance e pāpā ana i ka hoʻohana ʻia o nā ʻaila pale lā minelala ʻole i mea e mālama ʻia ai ke kaiaola o ke kai. E aʻo hou aku ma kēia ʻatikala Maui Now.

Ma ke ʻano he māhele o nā hana hoʻokele wahi huakaʻi, ʻoliʻoli ke Keʻena Kuleana Hoʻokipa o Hawaiʻi i ke kākoʻo i ko Hawaiʻi mau ʻona pāʻoihana a me nā mea hana noʻeau. Ua walaʻau ʻo Caroline Anderson, ko ke Keʻena Kuleana Hoʻokipa o Hawaiʻi Luna Hoʻokele Hoʻolālā, me ka ʻāhaʻilono o Hawaiʻi News Now ʻo Lacy Deniz ma kēia pukana HI Now no nā hana e kākoʻo ana i ka poʻe o Kauaʻi a me ka paipai i nā mea kipa e kūʻai kūloko, e laʻa ʻo Alakoko Store ma Līhuʻe. E aʻo hou aku no ka hui kū i ka ʻauhau ʻole ʻo Alakoko ma ʻaneʻi.

Ma mua iho o ka ʻAha ʻOihana Hoʻokipa, ua komo nā limahana HTA me nā kime hokona honua ma ka lā hoʻihoʻi honua ma Heʻeia me ka hui ʻo Kākoʻo ʻŌiwi. He kanakolukūmāwalu ka nui o nā kānaka i hui pū me ka luna hoʻokele o Kākoʻo ʻŌiwi, ʻo Kānekoa Kūkea Shultz, no ke aʻo no ka hoʻokumu ʻia o ia hui me ka hoʻohiki e hoʻihoʻi ʻia ke ola ehuehu i ia ʻāina he 405 ʻeka ka nui, he wahi pana e mālama ʻia no nā hanauna e hiki mai ana. Ua huli nā lima i lalo no ka huki kalo a ʻohi lau, me ka huki pū i nā meakanu malihini i ia ʻāina. E aʻo hou no kēia papahana Aloha ʻĀina ʻo Kākoʻo ʻŌiwi ma ʻaneʻi.

Ua hoʻohanohano ʻia iho nei ʻo Meet Hawaiʻi na Meeting Today ma kona ʻana kūmakahiki Best of Awards ʻo ia kekahi Best West CVB/DMO. Hoʻohanohano ʻia ma ua makana nei ko ka poepoe honua hui ʻaha a hoʻokipa malihini, nā hui hokona wahi huakaʻi, a me nā hale hālāwai.

“This prestigious award reinforces Hawai‘i as a world-class meetings, convention and incentive destination for attendees and business travelers,” i ʻōlelo ai ʻo John Reyes, ko Meet Hawai‘i’s hope pelekikena alakaʻi a luna hoʻokō kāloaʻa MCI. “With an intimate understanding of client needs and insider knowledge about the nuances of hosting events in the Hawaiian Islands, our experienced Meet Hawai‘i team is an invaluable resource for meeting planners to execute their event successfully.”

Ua koho ʻia nā mea lanakila na ka lehulehu o Meet Today a me ke kime hua ma ke koho pāloka ʻana. Ua loiloi ʻia ke ʻano o ka wahi hālāwai, nā lumi hoʻokipa malihin, nā lawelawe hoʻokipa malihini, ka meaʻai a meainu, ka wikiwiki a nui kōkua o nā limahana, ke kaʻawale a maikaʻi o ka ʻenehana, nā hana nanea, ka maʻemaʻe a me nā kiʻina COVID-19, a me ka maikaʻi o ka wahi ma ka laulā. E kōmi ma ʻaneʻi e ʻike ai i nā mea lanakila a pau o ko Meet Hawaiʻi 2022 Best of Awards.

Ua mālama ʻia na ka American Medical Association (AMA) kona hālāwai 2022 House of Delegates ma ke Kikowaena Hālāwai o Hawaiʻi, mai nā lā 12-15 o Nowemapa, i hōʻea ai he 2,500 a ʻoi ʻelele a i loaʻa mai ai he 20 miliona a ʻoi kēlā i ka ʻoihana hoʻokele waiwai o Hawaiʻi. Ma ua hālāwai nei i hiki ai i ka poʻe ke launa pū a pēlā pū ka loaʻa o nā hana hoʻonaʻauao no ko Hawaiʻi ʻoihana lapaʻau. He mea nui nā ʻaha lapaʻau e laʻa ka AMA iā Hawaiʻi no ka loaʻa o ka nūhou no nā hana lapaʻau a olakino hou loa i ko Hawaiʻi ʻoihana lapaʻau e pōmaikaʻi ai ko Hawaiʻi mau mea noho.

Ua puka lanakila pū ka hālāwai House of Delegates o ka hui kauʻāina no ko ka Hawaiʻi Medical Association (HMA) mālama ʻana i kona hālāwai iho i ka wā e holo ana ka papa hana AMA me ka hoʻolale pū i nā ʻelele o Hawaiʻi e komo i ka hālāwai kauʻāina. Ma ka ʻike ʻan i ko ka HMA kuleana koʻikoʻi i ko ka AMA, ua kākoʻo pū ko Meet Hawaiʻi i ko ka HMA hanana hoʻoulu kālā kūmakahiki i komo nui ʻia e nā ʻelele koʻikoʻi o ka AMA. Ke hoʻokūkū pū nei ʻo Meet Hawaiʻi no ka hālāwai 2027 House of Delegates.

Ua komo ko Meet Hawaiʻi a me kekahi hui o nā hoa kākoʻo Hawaiʻi i ka hālāwai kūmakahiki Financial Insurance Conference Planners i Bosetona, Makakukeka, mai nā lā 13-16 o Nowemapa. He 250 a ʻoi mea hoʻolālā hālāwai ʻinikua a kālā a he 325 hoa kākoʻo ʻoihana hoʻokipa i hōʻea aʻe i ua hanana nei e kālele like ana i ka hoʻoholomua i ka ʻoihana.

Ua lilo ka mākia o kēia makahiki—“Creating a New History”—he wā e komo ai nā mea komo i nā papa hoʻonui ʻike hoʻonaʻauao e launa ana me ke ʻano e pili ai, ka huakaʻi a me ke kūkulu pilina e paʻa ai nā pilina no nā hanauna e ʻoi aku ai ka maikaʻi o ka hana ma nā ʻaha, nā papa hana, a ma ka huakaʻi pilikino. Ua hōʻike ko Meet Hawaiʻi i ke kālele ma ka huakaʻi pono ʻana, a ua ʻoliʻoli nō i ka lohe no ka manaʻo hoʻokahi o nā hui koʻikoʻi. I ka wā e hiki mai ana, makemake e lilo nā wahi huakaʻi e hoʻohiki ana i ka huakaʻi pono, ʻo ia nā wahi huakaʻi makakoho.

Ua hōʻea pū nā lālā o ka Fairmont Orchid Hawai‘i a me ka Fairmont Kea Lani, MC&A, Hilton Waikoloa Village a me ka Hilton Hawaiian Village Waikīkī Resort, Westin Hāpuna Beach Resort a me ka Mauna Kea Resort, Mauna Lani Auberge Resorts Collection, Island Style Innovations, Hyatt Hawai‘i, Ritz-Carlton Maui Kapalua, Four Seasons Resorts Hawai‘i, Island Partners Hawai‘i, a me Meet Hawai‘i.

Hawai‘i Tourism USA

Ua hōʻea aʻe nā ʻelele o Hawaiʻi Tourism USA (HTUSA) a me ka Island Chapters i ka ʻaha Signature Travel Network i Las Vegas, Nevada, mai nā lā 8-11 o Nowemapa. Ma ke ʻano he hui limahana a he hui kū i ka ʻauhau ʻole, he hui ʻo Signature e kū ʻelele ana no nā limahana ʻoihana huakaʻi mai ʻō a ʻō o nā wahi huakaʻi he 470 o ʻAmelika Hui Pū ʻIa a me Kanakā, a me ka 176 wahi huakaʻi kauʻāina. Ma ko HTUSA komo ʻana i ka ʻaha i mālama ʻia ai he papa hoʻonui ʻike i komo ʻia e ka 175 aʻoaʻo huakaʻi e kālele ana i ka hoʻokele wahi huakaʻi, Mālama Hawaiʻi a me ka nūhou no kēlā me kēia mokupuni, a he ʻike laulā no nā kumuwaiwai aʻoaʻo huakaʻi. Ua mālama ʻia he 144 hālāwai e ke kime i ka wā e holo ana ka ʻaha i pā ai ka 342 aʻoaʻo huakaʻi a me ka 1,195 mea komo ma ka ʻaha he ʻelua lā ka lōʻihi.

Ma ka lā 5 o Kekemapa, ua kāpae ʻo Mike McCartney, ka Luna Hoʻokele kahiko a Luna o ka Hui Kūʻai no ka Department o Business, Economic Development and Tourism (DBEDT), i ka haʻawina kālā o ka lā 22 o Iune no ka hoʻokūkū kālā 22-01 o ke Keʻena Kuleana Hoʻokipa o Hawaiʻi: Hokona Wahi Huakaʻi Hawaiʻi a Lawelawe Hoʻokele no ka Mākeke ʻAmelika Hui Pū ʻIa.

Ma lalo o ka malu o ke kānāwai kūʻai o ka mokuʻāina a me ke alakaʻi ʻia e ka Papa Alakaʻi HTA, e ʻimi hou ana ʻo HTA i nā hui e hoihoi ana i ka hana pū mai – hoʻokahi hui no ka hōʻalowelo, a hoʻokahi hui no ka mālama kulāiwi. He puka mai koe o ka ʻike hou.

Ua ʻāpono pū ʻia e ka papa alakaʻi ka hoʻolōʻihi ʻana – me ka ʻae o ke Keʻena Kūʻai Mokuʻāina – i nā ʻaelike no nā keʻena mokupuni, nā lawelawe kākoʻo, a me ka hokona a hōʻalowelo ma ʻAmelika, a i ka lā 30 o Iune 2023.

Ua mālama ʻia ko Hawaiʻi Tourism Japan (HTJ) Japan Mission mai nā lā 15-18 o Nowemapa, a he papa hana e lawelawe ʻia ana na ka ʻehiku hui mokulele a hui huakaʻi nui, he seminā no nā hui huakaʻi nui, he hanana mahalo no nā kiʻi maka nui, a me kekahi ʻaina awakea pāpaho. Ua ʻike pū ʻia nā nūhou mai kēlā me kēia Island Chapter, a ua hōʻike nā hui mokulele a hui huakaʻi i nā manaʻo alakaʻi huakaʻi o ka MH 2023 a me nā nūhou hoʻomohala hua e ʻāwili ʻia ai nā hana Mālama Hawaiʻi.

Ua lilo ka mālama hou ʻia o ka Japan Mission ma hope o ka hoʻomoe ʻia no ka 3 makahiki i ka maʻi ahulau COVID-19 he mea i ʻākoakoa ai ka 204 mea komo i ka seminā a he 291 mea komo i ka ʻaina awakea. ʻO ka ʻaina awakea mahalo ka mea i hōʻea nui ai ka poʻe o nā hanana Japan Mission, he hōʻailona maikaʻi o ko Hawaiʻi kūlana i ka wā e hoʻoikaika nei ka ʻoihana huakaʻi. Ua mālama ʻia na nā Island Chapter a me Meet Hawaiʻi nā hōʻikeʻike hoʻonaʻauao no Mālama Hawaiʻi, nā papa hana ʻoihana hoʻokipa hoʻomauō, ka nūhou no kēlā me kēia mokupuni, a me ka holomua Destination Management Action Plan.

He 68 ʻelele pāpaho i hōʻea aʻe i ka ʻaina awakea pāpaho o ka Japan Mission ma ka Palace Hotel Tokyo, e manaʻo ana e kālele ma luna o Hawaiʻi, e pili pū ai me ka 28 mea kuleana o ka 23 hui, a pēlā pū nā ʻelele Island Chapter a Keʻena Kuleana Hoʻokipa o Hawaiʻi. Ua hōʻike ko HTJ i ka nūhou no Hawaiʻi a me nā kūkā pānela me nā Island Chapter e hōʻike ana i nā manaʻo hāpai no nā papa hana Mālama Hawaiʻi o ka wā e hiki mai ana.

Ke hoʻoikaika nei nā hui huakaʻi koʻikoʻi i ka hoʻonaʻauao kūloko ma o ka hoʻonui ʻike i Hawaiʻi. Ua hana pū iho nei ko HTJ me nā hui huakaʻi o Iāpana e hōʻoia ʻia ai ka ʻāwili ʻia o nā papa hana Mālama Hawaiʻi ma nā huakaʻi hoʻokamaʻāina (FAM). Ua hoʻouna ka hui huakaʻi ʻo HIS, nāna e kūʻai aku nei i ka Mākaʻikaʻi Mālama Hawaiʻi mua, i kona mau ʻāuna mua he 10 i Oʻahu a me Maui i kēia māhina e lilo ai he mea hoʻomākaukau no Hawaiʻi. Ua kōkua ʻo HTJ ma ka hoʻolālā i nā hana Mālama Hawaiʻi i pili i nā huakaʻi hoʻokamaʻāina—ʻo nā hana hoʻomaʻemaʻe kahakai i kai a me ka waele loʻi kalo i uka—i hana ʻia iho nei. Ua kākoʻo pū ko HTJ i kekahi huakaʻi hoʻokamaʻāina no kekahi ʻāuna he 15 lālā ka nui no JTB, mai nā lā 9-13 o Nowemapa, me ka hoʻolālā pū he hana Mālama Hawaiʻi ma ka loʻi kalo me ko Heʻeia hui kū i ka ʻauhau ʻole ʻo Kākoʻo ʻŌiwi. Ua komo piha nā mea komo i ka moʻomeheu Hawaiʻi.

Ua mālama ʻia na ko HTJ he hanana Instagram Live i ka wā o ka hoʻolauleʻa Made in Hawaiʻi i Nowemapa e hoʻolauna ai i nā mea kālepa hoʻolauleʻa a me ka hōʻike ʻana no nā hua a me kahi e loaʻa ai i nā mea e nānā ana. Ua mālama pū ko HTJ he papa hana hoʻopaipai e noi ana i nā mea nānā e hoʻouka manaʻo no nā hua made-in-Hawaiʻi. Ua hōʻike manaʻo kekahi hapa nui no ka lana o ka manaʻo i ke kipa iā Hawaiʻi me ke kūʻai pū i nā hua made-in-Hawaiʻi. He 45,480 kānaka i pā i ua hoʻolele ʻīwā nei i loaʻa pū ai he 59,521 pā ʻana. Ua hoʻopuka pū ko HTJ i ka ʻike no nā hanana made-in-Hawaiʻi, nā hua, a me nā mea hana noʻeau ma kona kahuapaʻa, allhawaii, a ma kona mau kahua kūlelepaho pū kekahi.

Ua mālama ko Hawaiʻi Tourism Canada (HTCAN) he huakaʻi hoʻokamaʻāina pāpaho ma Oʻahu a me Kauaʻi, mai nā lā 2-9 o Nowemapa, nona ka manaʻo nui ʻo “Culinary & Culture.” He ʻehā ʻāhaʻilono e kū ʻelele ana no Toronto a me Kanakā Komohana i komo i ka huakaʻi hoʻokamaʻāina. Ke wānana ʻia nei nā moʻolelo ma ka Vancouver Sun, Zoomer, Vacay.ca, West of the City, Foodism, a me ka Faze.

Ua kālele ka huakaʻi hoʻokamaʻāina HTCAN ma luna o ka moʻomeheu Hawaiʻi a me ka papa hana Mālama Hawaiʻi. Ua komo nā ʻāhaʻilono i ko ka ʻĀina Mahi ʻo Kualono papa hana Mālama Hawaiʻi e hana ana i ka loʻi kalo i ka ʻauinalā a me ke aʻo no nā ala he nui e hiki ai i ka malihini ke mālama i ka wā e kipa ana i ka pae ʻāina ʻo Hawaiʻi. Ua kipa pū ka hui i ka Hale Aliʻi ʻo ʻIolani a me ka Hale Hōʻikeʻike o Kauaʻi.

ʻO kekahi kālele o ka huakaʻi hoʻokamaʻāina ka hōʻikeʻike ʻana i ka ʻoi o ko Hawaiʻi meaʻai. Ua kono ʻia ka hui i ʻelua hanana Hawaiʻi Food and Wine Festival i ka wā ma Oʻahu a ua hui pū me nā mea kuke o Hawaiʻi a me nā mea kuke kauʻāina. Ma Kauaʻi, ua ʻai hele i ka ʻai kūloko ma kekahi mākaʻikaʻi meaʻai o Hanalei a ma kekahi lūʻau ma ka Sheraton Kauaʻi Coconut Beach Resort.

Ua hoʻopuka na HTCAN he kahuapaʻa ma ka pau ʻana o kona hanana Aloha Canada 2022 e ʻae ana i nā aʻoaʻo huakaʻi i nā kumuwaiwai no Hawaiʻi. Ua ʻike koke ʻia ka puka lanakila o ua kahuapaʻa nei ma ke kāinoa ʻana o nā aʻoaʻo huakaʻi mai ʻō a ʻō o ka pae ʻāina e nānā ai i nā wikiō hoʻonui ʻike, ka nūhou no kēlā me kēia mokupuni o ka pae ʻāina ʻo Hawaiʻi, a pēlā pū ka hoʻoili i nā kumuwaiwai hokona. Hoʻokomo ʻakomi ʻia nā inoa o nā aʻoaʻo huakaʻi e kāinoa ana i ke kahuapaʻa ma kekahi hoʻokūkū e loaʻa ai he makana. Paipai pū ʻia ma ke kahuapaʻa ko nā aʻoaʻo huakaʻi hoʻolaha ʻana no Mālama Hawaiʻi ma ke kamaʻilio ʻana me nā ʻōhua no nā hana manawaleʻa ma Hawaiʻi — e laʻa ka hoʻomaʻemaʻe kahakai a me ke kanu meakanu ʻōiwi — me nā hui kū i ka ʻauhau ʻole a hui kaiaulu. Ma ka pau ʻana o Nowemapa, he 112 aʻoaʻo huakaʻi i kāinoa i ke kahuapaʻa.

Mai nā lā 5-12 o Nowemapa, ua hoʻokipa ʻia na ko Hawaiʻi Tourism Oceania (HTO) he ʻelima ʻelele pāpaho ma Maui a me Kauaʻi e hōʻike ana i ka pae ʻāina ʻo Hawaiʻi he wahi kohu loa no ka ʻaha male a pō ʻaha male. Ua noho ka hui ma ke Grand Hyatt Kauaʻi Resort and Spa, a ma Maui ma ka Wailea Beach Resort. Ua mālama ʻia he mākaʻikaʻi helikopa o Kauaʻi me Blue Hawaiian Helicoptors, he mākaʻikaʻi iā Nāpali mā i ka napoʻo ʻana o ka lā me Holo Holo Charters, he mau mākaʻikaʻi ʻana o ka Hale Hōʻikeʻike o Kauaʻi a me ko ka National Tropical Botanical Garden McBryde and Allerton Gardens, he ʻaina ahiahi ʻāina mahi a pākaukau ma ka Timbers Kauaʻi Ocean Club and Residences, he mākaʻikaʻi o uka o Maui, a me ke kilo hōkū ma ka Pāka Aupuni o Haleakalā.

Ua kākau ʻia he moʻolelo uila na ka mea kākau ʻo Molly Floyd o ka New Zealand Herald ma hope o kona komo ʻana i ka huakaʻi o Kepakemapa i Oʻahu me ko Aotearoa hui kū i ka ʻauhau ʻole ʻo Sea Cleaners. ʻO ka hoʻoulu ʻana i ka makakau o ka lehulehu no ke ola kūlanalana o ke kai kekahi māhele nui o ko ka hui mākia. Ua hoʻopuka ʻia kā Floyd moʻolelo New Zealand Herald ʻo “Sustainable Travel in Hawaiʻi: Sea Cleaners Help to Rid the Pacific of Plastic” i Nowemapa. Ua kōkua pū ko ka HTO i ka mea hoʻolele lēkiō ʻo Chris Smith no ke kānela 2GB 873 AM, no Sydney, Nūhōlani, ma ka hoʻolaukaʻi ʻana he mākaʻikaʻi helikopa o ka lua pele ʻo Maunaloa ma ka mokupuni ʻo Hawaiʻi — he ʻikena ʻokoʻa o ka hū pele iho nei e kōkua ana i ke emi mai o ka poʻe piʻi i luna o laila.

Ua komo ke kime HTO i ka TravelManagers Market Days ma Brisbane i ka lā 18 o Nowemapa, a ma Sydney ma ka lā 28 o Nowemapa, he mea i ʻākoakoa ai he 60 a ʻoi manakia huakaʻi pilikino i mea e launa pū ai a e loaʻa ai ka nūhou mai nā hui huakaʻi mai ʻō a ʻō o Nūhōlani. Ma kona ʻaoʻao ʻo ia kekahi o ko ka ʻāina mau hui huakaʻi koʻikoʻi, aia ke kāmau nei ʻo TravelManagers ma ke ala e kō ikaika ai nā pahuhopu o ka MH 2022 ma ke kō hou ʻana o nā pahuhopu kāloaʻa no ka makahiki ma Nowemapa.

Ma ka hana pū ʻana o ko Hawaiʻi Tourism Korea (HTK) me Hawaiian Airlines, ua hoʻolālā ʻia he huakaʻi pāpaho no kekahi kime no ka makasina Bar and Dining o Kolea e kālele ana i ka ʻai ʻoi loa o Hawaiʻi a me ka Hawaiʻi Food and Wine Festival (HFWF). Ma ke kākoʻo ʻia o ka huakaʻi na ka HFWF a me nā hokele Alohilani Resort Waikīkī Beach a me ka Halekūlani, ua kipa kekahi mea hoʻoponopono a mea paʻi kiʻi no Bar and Dining iā Oʻahu, mai nā lā 2-6 o Nowemapa, a komo akula i nā papa hana HFWF like ʻole.

Ua hua mai he moʻolelo he 20 ʻaoʻao ka lōʻihi no ka pukana o Kekemapa 2022 o ka makasina a me ka ʻelima hua kūlelepaho, i hua mai ai kona waiwai pāpaho he $120,000. Ma ua moʻolelo nei i nīnauele ʻia ai ka Luna Hoʻokō o ka HFWF ʻo Denise Yamaguchi, ka Mea Kuke ʻo Masaharu Morimoto o Morimoto Asia Waikīkī, ka Mea Kuke ʻo Andrew Le o The Pig and The Lady, ka Mea Kuke ʻo Esther Choi o MŎKBAR, a me ka Mea Kuke ʻo Robynne Mai o Fete. Ua kālele pū ʻia ka Mākeke Kaupokulani o Kakaʻako, ka Hale Aliʻi ʻo ʻIolani, ka Hale Hōʻikeʻike ʻo Pīhopa, ka Hawaiʻi Theatre, a me ke Awāwa ʻo Waimea.

Ua mālama ʻia na ko HTK kona 2022 Hawaiʻi Travel Mission ma nā lā 21 a 22 o Nowemapa ma ka Four Seasons Seoul e mālama ana i nā papa hana like ʻole no nā hoa kākoʻo ʻoihana o Hawaiʻi a me nā aʻoaʻo huakaʻi nui o Kōlea e pili pū ai. Ua hoʻomaka ka papa hana ma ka nānā laulā i ka mākeke o Kōlea no nā hoa kākoʻo ʻoihana o Hawaiʻi, ma hope mai he seminā wahi huakaʻi Hawaiʻi, he wā launa huakaʻi no Hawaiʻi, a he ʻaina awakea kiʻi maka nui. Ua hōʻike ko HTK i ka nūhou no ka wahi huakaʻi a me kekahi ʻike laulā no ka papa hana Mālama Hawaiʻi ma ka seminā wahi huakaʻi. Ua hoʻolauna ʻia na nā Island Chapter kēlā me kēia mokupuni a he 18 hoa kākoʻo ʻoihana o Hawaiʻi i hōʻike nūhou. He 62 hoa kākoʻo Kōlea no nā hui mokulele, hui kālepa lako, hui huakaʻi pūnaewele, a hui pāpaho i komo i ka seminā.

Ma ka ʻaina awakea kiʻi maka nui o kekahi lā, ua hōʻike ko ka HTK i ka papa hana Mālama Hawaiʻi me ka hoʻolele pū he wikiō pōkole e kālele ana i nā hana e pili pū ana. Ua kono pū ko ka HTK i ka luna hoʻopuka kīwī kaulana a luna kuhikuhi ʻo Na Yeong-seok he hoa kipa hoʻopūʻiwa e hōʻike no kāna mau huakaʻi i Hawaiʻi no kona kipa ʻana i kona mau hoa ma mua aku nei o ka makahiki. Ua mālama pū ʻia nā hōʻikeʻike hula ma ka Hawaiʻi Travel Mission na nā ʻōlapa hula a puʻukani o Hōkūaulani Productions.

Ua nīnauele pū ʻia ko ke Keʻena Kuleana Hoʻokipa o Hawaiʻi Luna Hoʻokō Alowelo ʻo Kalani Kaʻanāʻanā na nā hui pāpaho o Korea Travel Times a me Digital Chosun Iibo. Ua kipa pū ko ka HTK a me Kalani i ko Korean Air a me Asiana Airlines e lohe ai i ka nūhou no ka hoʻāla hou ʻia o nā lelena i Honolulu, nā lauana ʻōhua lele, ka papa manawa huakaʻi, nā kumuloli nui ʻōhua, a me ka hoʻopaʻa mikiʻala ʻia o ka huakaʻi. Ua hui pū ʻo Kalani me ka pelekikena o ka Seoul Tourism Association ʻo Yang Moo-seung. He 13 moʻolelo — a he ʻelua nīnauele me Kalani — i hoʻopuka ʻia ma hope o ka huakaʻi.

E mālama ko ka Hawaiʻi Tourism China he hōʻikeʻike e hāpai ʻia ai ʻo Hawaiʻi he wahi huakaʻi makakoho — e kālele ana i nā kahua kolepa o ka mokuʻāina a me nā kumuwaiwai huakaʻi — i nā lālāo ka Shanghai Tianma Country Golf Club (TCGC) ma nā lānui Kalikimaka a Nūia. ʻO ka TCGC kekahi o ko Kina mau hale kolepa koʻikoʻi, a he 1,000 a ʻoi mau lālā kiʻi maka nui. E mālama pū ʻia na ka hale kolepa he mau papa hana kolepa kūikawā no Hawaiʻi i kona mau lālā he pono keu ma ka MH 2023.