Rhagfyr 2022
‌
* Nadolig Llawen *
* * * *
* * *
Cyfarchion y tymor a dymuniadau
da ar gyfer y Flwyddyn Newydd gan bawb
yn Iechyd a Gofal Digidol Cymru.
Mae meddygon sy'n hedfan ar fwrdd Ambiwlans Awyr Cymru yn defnyddio Porth Clinigol Cymru i arbed amser a helpu i achub bywydau
 
Pan fydd y meddygon sy'n hedfan ar fwrdd Ambiwlans Awyr Cymru yn cael eu galw am gymorth, mae'r criw yn barod i ddelio â sefyllfaoedd bywyd a marwolaeth. Maent yn mynd â'u sgiliau yn syth i'r lleoliad, gan wneud penderfyniadau cyflym a phwysig sy'n pennu'r gofal a'r driniaeth sydd eu hangen mewn argyfwng.

Hyd at 2017, roedd meddygon yr ambiwlans awyr yn dibynnu ar bapur, radio a ffonau i gasglu gwybodaeth am iechyd neu hanes meddygol y claf. Pan fydd pob eiliad yn cyfrif, gallai'r broses hon gymryd llawer o amser ac oedi penderfyniadau hollbwysig ynghylch gofal y claf.

Ond mae technoleg newydd ar ffurf cofnodion cleifion electronig bellach yn cyflymu'r broses, gan wneud gofal yn fwy diogel ac yn helpu i achub bywydau. 

Diolch i waith ar y cyd rhwng Gwasanaeth Adalw a Throsglwyddo Meddygol Brys (EMRTS) Cymru, Gwasanaethau Digidol Bwrdd Iechyd Prifysgol Bae Abertawe ac Iechyd a Gofal Digidol Cymru mae gan yr ambiwlans awyr fynediad ar unwaith i gofnod meddygol unigol claf a hanes meddygol trwy Borth Clinigol Cymru, gan alluogi penderfyniadau cyflymach, mwy gwybodus.

Mae cofnodion nyrsio yn cael eu digideiddio ac yn cipio gwobr yng ngwobrau MediWales

Mae nyrsys ledled Cymru yn gweld gwir effaith digideiddio wrth iddynt fabwysiadu technoleg arloesol i gofnodi gofal. 

Mae ffurflenni papur wedi’u disodli gan ddogfennau safonol sy’n cael eu defnyddio ar ddyfeisiau digidol megis cyfrifiaduron llechen sy’n rhyddhau amser i staff nyrsio ac yn gwella diogelwch a phrofiad cleifion. 

Bellach, mae effaith Cofnod Gofal Nyrsio Cymru (WNCR) newydd ar gyfer cleifion mewnol sy'n oedolion wedi'i gydnabod yng Ngwobrau MediWales 2022, gan ennill gwobr iechyd a gofal y beirniaid. 

Dywedodd y beirniaid, “mae’r WNCR yn trawsnewid y ffordd y mae nyrsys yn storio, rhannu a chyrchu gwybodaeth am gleifion. Mae hwn yn brosiect gwych ac mae’r gwahaniaeth cadarnhaol y mae’n ei wneud i nyrsio yng Nghymru wedi gwneud argraff fawr arnom.” 

Fis diwethaf, cyflawnodd WNCR garreg filltir fawr wrth gael ei osod yn Ysbyty Athrofaol y Grange yng Nghasnewydd sy'n golygu bod y gwasanaethau bellach ar gael ac yn cael eu gweithredu ym mhob bwrdd iechyd ac ymddiriedolaeth iechyd yng Nghymru.  

Wedi’i datblygu gan Iechyd a Gofal Digidol Cymru mewn partneriaeth â Bwrdd Iechyd Prifysgol Bae Abertawe, ac wrth weithio ar y cyd â gweithwyr nyrsio proffesiynol, mae’r system wedi’i chydnabod fel cam enfawr ymlaen yn rhan o’r cofnod digidol sengl i gleifion. 
Prosiect dylunio ar y cyd yn cael cymeradwyaeth trwy ennill dwy wobr

Mae tîm Iechyd a Gofal a Digidol Cymru (DHCW) wedi cael cydnabyddiaeth am ei waith ar y cyd ar ôl derbyn dwy wobr gan HETT, sef Rhagoriaeth Gofal Iechyd Trwy Dechnoleg.

Datblygodd y tîm Gwasanaethau Gwybodaeth Iechyd Meddwl a Chymunedol gynllun digidol cenedlaethol i gynorthwyo’r broses ofal ar gyfer gwasanaethau Plant sy’n Derbyn Gofal yng Nghymru. Datblygodd y prosiect, a noddir gan Lywodraeth Cymru, safonau gwybodaeth cenedlaethol ar gyfer rhannu gwybodaeth rhwng ymarferwyr a sefydliadau. Cafodd y rhain eu datblygu trwy CareDirector, system ddigidol sy’n rhan o raglen waith WCCIS (System Gwybodaeth Gofal Cymunedol Cymru) o fewn DHCW.
 
Roedd y cynllun yn sicrhau bod data’n cael eu mewnbynnu unwaith ond yn cael eu defnyddio droeon, gan ganiatáu i’r wybodaeth gywir fod ar gael ar yr amser cywir – gan helpu i sicrhau bod y penderfyniad cywir yn cael ei wneud. Oherwydd bod llai o amser yn cael ei dreulio yn mewnbynnu data, mae mwy o amser gan ymarferwyr i ddarparu gofal.

Derbyniodd y tîm dlysau gan HETT mewn dau gategori – gwobr ‘Fydd hynny byth yn gweithio' – am y datrysiad mwyaf creadigol ac aflonyddgar, gan gydnabod 'datrysiadau beiddgar sydd wedi llwyddo' ym maes arloesi, a’r wobr ‘Gwaith ar y cyd gorau ym maes Gofal Integredig’ am brosiectau, cyfarwyddebau a mentrau ar y cyd sy’n dangos y pŵer sydd gan ofal integredig i’w gynnig.
Canmoliaeth uchel i Iechyd a Gofal Digidol Cymru yng Ngwobrau Go Wales

Derbyniodd tîm caffael IGDC canmoliaeth uchel yng Ngwobrau Go Cymru yn y categori caffael cydweithredol, am eu gwaith ar Gytundeb Menter Microsoft Cymru Gyfan.

Mae gwobrau Go yn dathlu llwyddiannau caffael o bob rhan o sefydliadau sector cyhoeddus, preifat a thrydydd sector Cymru. Canmolwyd tîm Iechyd a Gofal Digidol Cymru am ei waith gyda byrddau iechyd ac ymddiriedolaethau i sicrhau cytundeb pum mlynedd i ddarparu’r cynhyrchion, offer a gwasanaethau Microsoft diweddaraf i GIG Cymru. 

Dywedodd Matthew Perrott, yr Uwch Arweinydd Caffael, “Cafodd y tîm negodi ei gefnogi gan arweinwyr digidol, cyllid a thechnegol o bob rhan o Gymru, a hebddynt ni fyddai’r fargen wedi bod yn bosibl. Mae’r wobr hon yn gydnabyddiaeth am eu holl amser, ymdrechion ac ymddiriedaeth wrth weithio gyda thîm Gwasanaethau Masnachol Iechyd a Gofal Digidol Cymru i sicrhau canlyniad o safon fyd-eang.”
Gweler ein Cynllun Iaith Gymraeg

Mae Iechyd a Gofal Digidol Cymru yn sefydliad cenedlaethol sydd wedi ymrwymo i ddefnyddio ac i hyrwyddo'r Gymraeg.

Mae ein Cynllun Cymraeg yn adeiladu ar y gwaith blaenorol a wnaed fel sefydliad a letywyd gan Ymddiriedolaeth GIG Prifysgol Felindre. Mae'r Cynllun Cymraeg yn ein galluogi i ddangos ein hymrwymiad i ddefnyddio a hyrwyddo'r Gymraeg ar draws ein sefydliad ac i ddatblygu gwasanaethau dwyieithog cryfach wrth i'r gofynion ar draws y GIG newid ac ehangu.

Mae'r Cynllun Cymraeg hwn yn berthnasol i’r sefydliad cyfan, ac mae gan bob un ohonom gyfrifoldeb i fod yn gyfarwydd â'r gofynion a amlinellir ynddo. Byddwn yn chwilio'n barhaus am ffyrdd o wella ein defnydd ac o hyrwyddo'r Gymraeg yn fewnol a chyda rhanddeiliaid allanol.

Gweler ein Cynllun Iaith Gymraeg. Mae’r Cynllun hwn yn nodi sut y bydd Iechyd a Gofal Digidol Cymru yn gweithredu’r egwyddor a sefydlwyd gan Ddeddf Iaith Gymraeg 1993, wrth gynnal y busnesau cyhoeddus, y dylid trin y Saesneg a’r Gymraeg ar sail cydraddoldeb.
Cydweithrediad llyfrgelloedd GIG Cymru yn ennill gwobr 'Tîm y Flwyddyn' ar gyfer rhaglen hyfforddi genedlaethol
 
Mae cydweithrediad rhwng Gwasanaethau Llyfrgell a Gwybodaeth GIG Cymru (NHSWLKS) ac e-Lyfrgell GIG Cymru wedi ennill ‘Gwobr Tîm Llyfrgell Cymru y Flwyddyn 2022’ CILIP Cymru Wales am gynhyrchu rhaglen arloesol o hyfforddiant byw ac wedi’i recordio ymlaen llaw i ddefnyddwyr llyfrgell staff y GIG ledled Cymru.

Yn ystod pandemig COVID-19, datblygodd NHSWLKS raglen hyfforddi genedlaethol o’r newydd gan wneud chwilio am lenyddiaeth a thystiolaeth yn llai llethol ac yn fwy cyraeddadwy i bawb – yn enwedig i’r rhai sy’n gweithio o bell. Cefnogodd e-lyfrgell GIG Cymru y rhaglen drwy ddarparu cymorth technegol a chynhyrchu gweminarau hyfforddiant ag arweiniad ar gyfer defnyddwyr.

Er bod y pandemig yn lleddfu, mae’r gweminarau a recordiwyd yn parhau i fod yn offer poblogaidd ar gyfer hyfforddiant, wedi’u cynllunio i gyd-fynd ag amserlenni gwaith prysur a heriol a heb yr angen i ddefnyddwyr fod yn gysylltiedig â rhwydwaith GIG Cymru.