ᓯᑎᐱᕆ 2022

ᑭᕕᒃᓱᒍᕕᑦ ᐅᖁᒪᐃᑦᑐᒥᑦ ᐅᔾᔨᖅᓱᖏᓪᓗᑎᑦ, ᐋᓐᓂᕈᑎᒋᓂᐊᖅᑕᖅᓴᕆᔭᐃᑦ. ᓄᓇᑦᓯᐊᕐᒥᑦ ᐊᒻᒪ ᓄᓇᕗᒻᒥᑦ, ᑭᕕᒃᓯᓂᕐᒧᑦ ᐋᓐᓂᕈᑕᐅᒐᔪᓐᓂᖅᐹᖑᓚᐅᖅᑐᖅ 2021-ᒥᑦ ᐊᔾᔨᐅᙱᑦᑐᒧᑦ ᑎᒥᐅᑉ ᐊᐅᓚᔾᔭᕐᓂᖓᓄᑦ ᐅᕝᕙᓘᓐᓃᑦ ᓴᖑᓂᕐᒥᑦ ᑭᕕᒃᓯᓯᓐᓈᑦ ᐅᕝᕙᓘᓐᓃᑦ ᐊᔾᔭᖅᓯᓪᓗᓂ ᐅᖁᒪᐃᑦᑐᒥᑦ.

ᑭᕕᒃᓯᓂᖅ ᐊᒻᒪ ᓴᓂᒧᑦ ᓵᓪᓗᓂ ᐋᓐᓂᕈᑕᐅᒍᓐᓇᖅᑐᑦ ᓇᒥᑐᐃᓐᓇᖅ ᓴᓇᔨᕐᔪᐊᓄᑦ. ᐅᑯᐊ ᓇᓗᓇᐃᒃᑯᑎᐅᔪᑦ ᐃᓚᖏᑦ ᖃᓄᐃᓕᐅᕈᑕᐅᓲᓂᑦ ᐃᖅᑲᓇᐃᔭᖅᑎ ᐋᓐᓂᑐᐃᓐᓇᕆᐊᖃᕐᓗᓂ:

• ᖃᓗᕋᐅᑎᒧᑦ ᐊᐳᑕᐅᔭᐃᓂᕐᒥᑦ ᐅᕝᕙᓘᓐᓃᑦ ᑐᐊᐸᖕᒥᑦ (ᑭᕕᒃᓯᓂᖅ) ᐊᒻᒪ ᓴᖑᓂᕐᒥᑦ ᓈᕕᑦᑎᓂᐊᕐᓗᓂ (ᓴᓂᒧᑦ ᓵᓐᓂᖅ)
•  ᐅᖁᒪᐃᑦᑐᓂᒃ ᑭᕕᒃᓯᑲᑕᖕᓂᖅ ᐊᔭᐅᕈᑎᒥ (ᑭᕕᒃᓯᓂᖅ) ᐊᒻᒪ ᐃᓕᓗᒋᑦ ᐃᓕᔾᔨᕕᖕᒧᑦ ᐃᓯᒐᑎ ᐊᐅᓚᔾᔭᓚᐅᙱᓪᓗᒋᒃ (ᓴᓂᒧᑦ ᓵᓐᓂᖅ)
• ᐲᖅᓯᓂᕐᒥᑦ ᖃᒧᑕᐅᔭᕐᒥᑦ ᐊᐳᒻᒥᑦ ᐊᔪᖅᓯᓯᒪᔪᒥᑦ (ᑭᕕᒃᓯᓂᖅ ᐊᒻᒪ ᓴᓂᒧᑦ ᓵᓐᓂᖅ)

ᐅᓗᕆᐊᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᑭᕕᒃᓯᓂᕐᒧᑦ ᐊᒻᒪ ᓴᓂᒧᑦ ᓵᓐᓂᕐᒧᑦ, ᐃᖅᑲᓇᐃᔭᖅᑏᑦ ᑲᒪᖃᑦᑕᖅᑐᑦ ᖃᓄᐃᑦᑐᑐᐃᓐᓇᕐᓂᑦ ᐅᖁᒪᐃᑦᑐᓂᑦ ᖃᐅᔨᒪᑦᑎᐊᕆᐊᓖᑦ ᓈᒻᒪᑦᑐᓂᑦ ᑭᕕᒃᓯᓂᕐᒧᑦ ᐱᓕᕆᓂᐅᔪᓂᑦ. ᐋᓐᓂᖅᑕᐃᓕᒪᓂᕐᒧᑦ ᐸᕐᓇᐅᑎᒥᑦ ᐋᖅᑭᒃᓱᐃᓪᓗᐊᖅᑐᑦ ᐱᓕᕆᖃᑎᖃᕐᓗᑎᒃ ᑲᒪᔨᐅᔪᒥᑦ ᐊᒻᒪ ᐃᖅᑲᓇᐃᔭᖃᑎᒌᖑᔪᓂᑦ. ᐅᕝᕙᐅᑯᐊ ᐱᔾᔪᑎᖃᖅᑎᑦᑎᔪᑦ ᐃᓱᒪᒋᓗᒋᑦ ᐋᓐᓂᖅᑕᐃᓕᒪᓂᕐᒧᑦ:

• ᐅᖁᒪᐃᓐᓂᖓ ᑭᕕᒋᐊᓕᐅᑉ (ᐅᖁᒪᐃᑉᐸ ᐅᕝᕙᓘᓐᓃᑦ ᐅᕿᑉᐸ?)
• ᐅᖓᓯᖕᓂᖓ ᑎᒥᖕᓄᑦ (ᖃᓂᑦᑐᖅ ᐅᖓᓯᖕᓂᖓ ᐅᖓᓯᑦᑐᖅ?)
• ᐊᖏᓂᖓ ᐊᒻᒪ ᖃᓄᐃᓕᖓᓂᖓ (ᑎᒍᔭᒃᓴᐅᑎᐊᖅᐹ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᖅᐱ?)
• ᐅᖓᓯᖕᓂᖓ ᐊᒡᔭᕆᐊᖃᖅᑕᕐᓄᑦ (ᐊᑐᕆᐊᖃᕐᐲ ᑭᕕᒃᓯᓂᕐᒧᑦ/ᐊᔾᔭᖅᓯᓂᕐᒧᑦ ᐃᑲᔫᑎᒥᑦ?)
•  ᖃᓄ ᐊᑯᓂᐅᓇᔭᕐᒪᖔᑦ ᐊᒡᔭᕐᓂᖓ (ᕿᓚᒥᑯᓗᒃ ᐅᕝᕙᓘᓐᓃᑦ ᐊᑯᓂᐊᓗᒃ?)
• ᖃᔅᓯᐊᖅᑎ ᑭᕕᒃᓯᒋᐊᖃᕐᒪᖔᖅ ᐱᔭᕇᖅᓯᓂᕐᒧᑦ (ᐅᓄᖏᑦᑐᑦ ᐅᕝᕙᓘᓐᓃᑦ ᐊᒥᓱᐊᖅᑎ?)
• ᐊᐅᓚᓂᖓ (ᓱᒃᑲᓂᖓ ᑭᕕᒃᓯᓂᐊᕐᓗᓂ)

ᐱᕙᒌᔭᐃᓗᓂ ᐋᓐᓂᖅᑕᐃᓕᒪᓂᕐᒧᑦ ᐸᕐᓇᐅᑎᒥᑦ, ᖃᐅᔨᒪᑦᑎᐊᕆᐊᕐᓗᑎᑦ ᐊᑐᓂ ᓇᓗᓇᐃᒃᑯᑕᖅ ᑎᑎᕋᖅᓯᒪᔪᖅ ᖁᓛᓂ ᐱᐅᔪᒥᑦ ᐊᒻᒪ ᐱᐅᙱᑦᑐᒥᑦ ᐱᖃᖅᑐᖅ. ᐊᔾᔭᖅᓯᓪᓗᓂ ᐅᖁᒪᐃᓐᓂᖅᓴᓂᑦ, ᐊᒥᓲᙱᓐᓂᖅᓴᓂᑦ ᑭᕕᒃᓯᖃᑦᑕᕋᔭᖅᑐᑎᑦ ᐃᖅᑲᓇᐃᔭᕐᓂᕐᓂ ᐅᓪᓗᖓᓂ ᑭᓯᐊᓂ ᕿᑏᑦ ᓴᓂᒧᑦ ᓵᑎᖃᑦᑕᕐᓗᒍ ᑭᕕᒃᓯᓯᓐᓈᑦ ᐋᓐᓂᕈᑕᐅᕐᔪᐊᑐᐃᓐᓇᕆᐊᓕᒃ. ᐅᕿᓐᓂᖅᓴᒥᑦ ᐊᔾᔭᖅᓯᖔᕐᓗᓂ ᐊᑦᑕᕐᓇᖔᑐᐃᓐᓇᕆᐊᓕᒃ: ᐃᖅᑲᓇᐃᔭᖅᑏᑦ ᐃᓚᖏᑦ ᐅᖓᓯᑦᑐᒥᑦ ᑎᒍᓯᒋᐊᑐᐃᓐᓇᕆᐊᓖᑦ ᐱᖁᑎᒥᑦ, ᐊᑦᑕᕐᓇᕐᓂᖅᓴᐅᒍᓐᓇᖅᑐᖅ ᐊᔾᔭᖅᓯᓂᕐᒥᑦ ᐅᖁᒪᐃᑦᑐᒥᑦ ᑎᒥᐅᑉ ᖃᓂᒋᔭᖓᓂ.

ᖃᐅᔨᒋᐊᒃᑲᓐᓂᕈᒪᒍᕕᑦ ᐋᓐᓂᖅᑕᐃᓕᒪᓂᕐᒥᑦ ᑭᕕᒃᓯᓯᓐᓈᑦ, ᑕᑯᒋᐊᕐᓗᒍ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᓄᑦ ᒪᒃᐱᒐᖓ.

ᐅᑭᐊᒃᓴᑉᐸᓪᓕᐊᓕᖅᑎᓪᓗᒍ ᓯᓚ ᓂᓪᓚᓱᓕᕐᓂᖓ ᐃᒃᐱᖕᓇᖅᓯᕙᓪᓕᐊᔪᖅ. ᑖᖅᑭᕙᓪᓕᐊᓕᖃᑦᑕᓕᖅᑎᓪᓗᒍ ᐊᒻᒪ ᓱᒃᑲᓕᔪᒥᑦ ᖃᐅᒪᓂᖅ ᐊᓯᔾᔨᕐᓂᖓ ᑕᑯᒃᓴᐅᑦᑎᐊᕐᓇᖅᑐᓂᑦ ᐊᓐᓄᕌᖅᓯᒪᓇᖅᐳᖅ, ᐃᖅᑲᓇᐃᔭᕈᕕᑦ ᓯᓚᒥᑦ ᐅᕝᕙᓘᓐᓃᑦ ᐱᓱᑐᐃᓐᓇᕈᕕᑦ ᐊᖏᕐᕋᓄᑦ ᑎᑎᕋᕐᕕᖕᓂᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒋᔭᑉᐱᑦ ᐃᓂᖓᓂ.

ᖃᐅᔨᓴᕐᓂᐊᕐᓗᓂ ᑕᑯᒃᓴᐅᑦᑎᐊᕆᐊᖃᕐᓂᕐᒥᑦ, ᐃᓱᒪᒋᒋᐊᕐᓗᒋᑦ ᐅᓪᓘᔪᖅ ᐊᒻᒪ ᖃᐅᒪᓂᖓᑕ ᖃᓄᐃᓕᖓᓂᖏᑦ ᐃᕝᕕᑦ ᐃᖅᑲᓇᐃᔭᕐᕕᒋᓂᐊᖅᑕᖓᓂ. ᐅᓪᓘᑎᓪᓗᒍ, ᖃᐅᒪᔪᑦ ᑕᖅᓴᓖᑦ ᐊᒻᒪ ᑕᑯᒃᓴᐅᑦᑎᐊᕐᓇᖅᑐᑦ ᖃᓪᓗᓈᖅᑕᑦ ᓈᒻᒪᒃᑐᑦ. ᓯᓚᒦᒃᑯᕕᑦ ᖃᐅᒪᑦᑎᐊᙱᑦᑐᒥᑦ, ᓲᕐᓗ ᑖᖅᑭᕙᓪᓕᐊᑎᓪᓗᒍ ᐅᕝᕙᓘᓐᓃᑦ ᖃᐅᒪᓕᕋᑖᖅᑎᓗᒍ, ᑕᑯᒃᓴᐅᑦᑎᐊᕐᓇᖅᑐᑦ ᐊᒥᐊᑦ, ᖃᐅᒪᕝᕕᐅᓲᕐᓗ ᖃᓪᓗᓈᖅᑕᑦ, ᐃᑲᔫᑎᖃᕐᓂᖅᓴᐅᓂᐊᖅᑐᑦ. ᑖᖅᑭᓪᓗᒍ, ᖃᐅᔨᒪᑦᑎᐊᖅᑐᑦ ᓱᓇᒃᑯᑖᑦ ᐊᑑᑎᖃᙱᓐᓂᖅᓴᐅᔪᑦ, ᑕᒪᓐᓇ ᑐᑭᖃᖅᐳᖅ ᐊᓐᓄᕌᓂᑦ ᐊᑐᕆᐊᖃᖅᑐᑎᑦ ᖃᓪᓗᓈᖅᑕᓂᑦ ᖃᐅᒪᓲᒥᑦ ᖃᐅᒪᕝᕕᐅᑎᓪᓗᒍ. ᖃᓪᓗᓈᖅᑕᖅ ᑕᐃᒪᐃᑦᑐᖅ ᑕᐃᒎᓯᓕᒃ ᖃᐅᔨᒪᕝᕕᐅᓲᖅ.

ᖃᐅᔨᓴᕐᓂᕐᒥᑦ ᐅᓗᕆᐊᓇᕈᑎᓂᑦ ᖃᓄᐃᑦᑑᓂᖓᓄᑦ ᐱᓕᕆᐊᖑᔪᖅ ᐊᒻᒪ ᐃᓂᖓ ᑕᐃᒪᐃᒋᐊᖃᕐᒥᔪᖅ ᖃᐅᔨᓇᓱᓂᐊᕐᓗᓂ ᖃᓄᐃᑦᑐᒥᑦ ᑕᑯᒃᓴᐅᑦᑎᐊᖅᑐᒥᑦ ᐊᓐᓇᕌᓂᑦ ᐊᑐᕆᐊᖃᕐᒪᖔᑦ. ᖃᓄᑎᒋ ᐅᖓᓯᑎᒋᕙ ᐃᓯᒐᕐᒥᑦ ᐃᖅᑲᓇᐃᔭᖅᑎᓂᑦ ᐊᒻᒪ ᓴᓇᔪᓕᕆᓂᕐᒧᑦ ᐱᖁᑎᓂᑦ? ᐃᖅᑲᓇᐃᔭᖅᑏᑦ ᖃᓂᒋᔭᖃᖅᐸᑕ ᐊᒡᒋᖅᐸᓪᓕᐊᔪᓂᑦ ᓄᓇᓯᐅᑎᓂᑦ, ᓄᓇᓯᐅᑏᑦ ᖃᓄᑎᒋ ᓱᒃᑲᑎᒋᕙᑦ? ᖃᓄᐃᓕᐅᕈᑕᐅᔪᑦ ᐅᔾᔨᖅᓱᑦᑎᐊᖅᑎᑦᑎᙱᓛᑦ ᐃᖅᑲᓇᐃᔭᖅᑎᐅᑉ ᐅᔾᔨᖅᓱᕐᓂᕆᔭᖏᓂ ᐊᒡᒋᖅᐸᓪᓕᐊᔪᓂᑦ ᓄᓇᓯᐅᑎᓂᑦ ᐅᕝᕙᓘᓐᓃᑦ ᐊᓯᖓᓂ ᐅᓗᕆᐊᓇᖅᑐᒥᑦ? ᐱᓕᕆᐊᕆᔭᐅᔪᑦ ᐃᓂᒋᔭᒦᑉᐹᑦ ᑕᑯᒃᓴᐅᓂᖏᑦ ᑕᓕᓯᒪᓪᓗᑎᒃ ᓱᓇᒃᑯᑖᓄᑦ, ᐃᒡᓗᕐᔪᐊᕐᒧᑦ ᐅᕝᕙᓘᓐᓃᑦ ᐊᕙᑎᒥᑦ ᐅᕝᕙᓘᓐᓃᑦ ᓄᓇᐅᑉ ᖃᓄᐃᓕᖓᓂᕆᔭᖓᓄᑦ? ᑕᒪᒃᑯᐊ ᐃᓚᐃᓐᓇᕆᔭᖏᑦ ᐊᐱᖅᑯᑎᒋᒋᐊᖃᖅᑕᑎᑦ ᐃᓕᖕᓄᑦ.

ᐊᒥᓱᒃᑲᓐᓂᕐᓂᒃ ᐃᓱᒪᒋᔭᖃᕆᐊᖃᖅᐳᖅ ᓂᕈᐊᕐᓂᐊᕐᓗᓂ ᑕᑯᒃᓴᐅᑦᑎᐊᕐᓇᖅᑐᓂᑦ ᓱᓇᒃᑯᑖᓂᑦ. ᖃᐅᔨᒋᐊᒃᑲᓐᓂᕈᒪᒍᕕᑦ, ᑕᑯᒋᐊᕐᓗᒍ ᓇᖕᒥᓂᖅ ᐋᓐᓂᖅᑕᐃᓕᔾᔪᑏᑦ ᐱᖁᑏᑦ: ᐊᓐᓄᕌᑦ ᓴᖅᑭᔮᑦᑎᐊᕐᓇᖅᑐᑦ ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ. ᐅᖃᖃᑎᖃᕐᓂᕐᒧᑦ ᐊᑦᑕᓇᔾᔭᐃᖅᓯᒪᔪᓕᕆᔨᒥᑦ ᐱᓕᕆᔾᔪᓯᑦᑎᐊᕙᐅᓛᓄᑦ ᑖᒃᑯᓄᖓ ᑕᑯᒃᓴᐅᑦᑎᐊᖅᑐᓄᑦ ᐱᖁᑎᓄᑦ, ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᕕᐅᑕ ᐅᓪᓗᒥ. 

ᒫᓐᓇᓕᓴᐅᔪᒥ ᐃᖅᑲᓇᐃᔭᖅᑎᑖᖅᓯᒪᒍᕕᑦ ᒪᒃᑯᒃᑐᓂᑦ ᓄᑖᖑᔪᓂᑦ ᐃᖅᑲᓇᐃᔭᓕᓵᖅᑐᓂᑦ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᑲᔫᑎᒃᓴᖃᖅᑐᑦ ᐃᓕᓐᓂᐊᑎᑕᐅᓂᐊᕐᒪᑕ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒥᑦ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ “ᐃᖅᑲᓇᐃᔭᕆᐊᑐᐃᓐᓇᕆᐊᖃᓕᖅᐲᑦ?” ᑎᑎᖅᓯᕕᒃ ᓯᕗᓪᓕᖅᐹᖑᓪᓗᓂ ᑎᑎᖅᑲᐅᔪᖅ ᕿᒥᕐᕈᐊᖃᑎᒋᓗᒋᑦ ᒪᒃᑯᒃᑐᑦ ᐃᖅᑲᓇᐃᔭᖅᑏᑦ. ᑕᑯᒃᓴᐅᑎᑦᑎᔪᖅ ᐱᒻᒪᕆᐅᔪᓂᑦ ᑐᑭᓯᒋᐊᕈᑎᒃᓴᓂᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒧᑦ, ᓲᕐᓗ ᐱᖓᓱᑦ ᐱᔪᓐᓇᐅᑎᒋᔭᐅᔪᑦ ᐃᖅᑲᓇᐃᔭᖅᑎᓕᒫᓄᑦ ᐊᒻᒪ ᐱᔭᒃᓴᕆᔭᖏᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒧᑦ.

ᐃᓇᖏᖅᓯᖏᑦᑐᖅ ᐃᓂᒋᔭᐅᔪᒥᑦ ᐃᓕᓐᓂᐊᖅᑎᑦᑎᓂᕐᒥᑦ, ᑖᓐᓇ ᒪᒃᑯᒃᑐᓄᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᓇᓗᓇᐃᒃᑯᑕᑖᕐᓂᕐᒧᑦ ᐃᓕᓐᓂᐊᕈᑎᒃᓴᖅ ᐱᒋᐊᕈᑎᑦᑎᐊᕙᐅᔪᖅ ᐃᓕᓐᓂᐊᕐᓂᕐᒧᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒧᑦ. ᑖᓐᓇ ᐊᑭᖃᙱᑦᑐᖅ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᒃᓴᖅ ᐃᑲᕐᕋᓄᑦ ᒪᕐᕉᓐᓄᑦ ᐊᒻᒪ ᓇᓗᓇᐃᒃᑯᑕᖅᑖᕐᓇᖅᑐᖅ ᐱᔭᕇᖅᓯᓂᕐᒧᑦ. ᐅᖃᖃᑎᒋᒍᒪᑐᐃᓐᓇᕆᐊᖃᕐᒥᔭᑎᑦ ᐱᔪᓐᓇᐅᑎᖏᑦ ᐊᒻᒪᓗ ᐱᓕᕆᐊᒃᓴᖏᑦ ᑐᕌᖓᔪᒥᑦ ᐃᓱᒪᐅᑉ ᖃᓄᐃᙱᑦᑎᐊᕐᓂᖓᓄᑦ ᐃᖅᑲᓇᐃᔭᕐᕕᖕᒥᑦ.

ᐃᖅᑲᓇᐃᔭᖅᑎᑖᓵᑎᑦ ᖃᐅᔨᒪᑦᑎᐊᕋᓗᐊᕐᒪᖔᑦᑕ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒥᑦ, ᐊᑐᕋᓐᓇᖅᑕᑎᑦ ᒪᒃᑯᒃᑐᖅ ᐃᖅᑲᓇᐃᔭᖅᑎᐅᑉ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᕐᒧᑦ. ᑖᒃᑯᐊ ᐊᔾᔨᒌᙱᑦᑐᑦ ᓇᐃᑦᑑᑏᑦ ᒪᓕᒋᐊᓖᑦ ᐃᓕᓐᓂᑦ ᐃᑲᔪᕐᓂᐊᖅᑐᑦ ᐱᒋᐊᖅᑎᑦᑎᓂᕐᒥᑦ ᐃᖅᑲᓇᐃᔭᕐᕕᖕᒥᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᖃᑎᒌᓂᕐᒧᑦ ᐃᓚᖏᓐᓄᑦ ᐃᖅᑲᓇᐃᔭᕐᕕᖕᒥᑦ ᐊᕙᑎᒋᔭᐅᔪᓂᑦ.

ᐃᖅᑲᐃᑎᑦᑎᔾᔪᑦ: ᖃᐅᔨᓴᖅᑕᐅᓂᕐᒧᑦ ᐊᑭᓕᐅᑎ ᑐᓂᔭᐅᔭᕆᐊᓕᒃ 

ᐃᖅᑲᓇᐃᔭᖅᑎᖁᑎᓖᑦ ᐊᑭᓕᖅᓱᐃᔪᑦ ᐊᕕᑦᑐᖅᓯᒪᔪᑎᒍᑦ ᐃᖅᑲᐃᑎᑕᐅᒋᐊᖅᑐᑦ ᑭᖑᓪᓕᖅᐹᒥᑦ ᖃᐅᔨᓴᕐᓂᕐᒧᑦ ᐊᑭᓕᐅᑎᖓ ᒫᓐᓇᐅᔪᖅ ᐊᕐᕌᒍᒧᑦ ᐊᑭᓕᖅᑕᐅᒋᐊᓕᒃ ᓯᑎᐱᕆ 30, 2022 ᖄᖏᓚᐅᖅᑎᓐᓇᒍ. ᐊᕕᒃᑐᖅᓯᒪᓂᐅᔪᓂ ᓇᓕᒧᑦᑐᓂ ᐊᑭᓖᖃᑦᑕᕈᕕᑦ ᐊᒻᒪᓗ ᐊᑭᓖᕙᒡᓗᑎᑦ ᐊᖏᖅᑕᐅᓯᒪᕙᒌᖅᑐᒥ ᐊᑭᓕᒃᓴᓂᒍᒻᒪᐅᑎᒧᑦ ᐊᐅᒃᑕᔫᒧᑦ ᐅᕝᕙᓘᓐᓃᑦ ᑭᖑᓂᐊᒍᑦ−ᐅᓪᓗᓕᖅᓯᒪᔪᓂ ᓯᒃᑭᓂ, ᕿᒥᕐᕈᒍᒃ ᐊᑭᓖᓪᔪᑎᖕᓂ ᐱᓕᕆᔾᔪᓯᖓᓐᓂ ᓇᓗᓇᐃᖅᓯᓂᕐᒧᑦ ᒫᓐᓇᒨᒐᓗᐊᖅᓯᒪᓂᖓᓂ. ᐊᑭᓖᓂᐅᔪᑦ ᐅᕘᓈᖅᑎᑕᐅᔪᓐᓇᖅᑐᑦ WSCC Connect.

ᒪᓕᒐᖅᑎᒍᑦ ᐊᑭᓕᒃᓴᖅᑖᕐᓇᖅᑐᖅ 2%-ᒥ ᐃᓚᒋᐊᕐᓯᒪᓗᓂ ᑕᖅᑭᑕᒫᑦ ᑭᖑᕙᖅᓯᒪᔪᓄᑦ ᐊᑭᓕᒃᓴᓄᑦ ᐊᑭᓕᖅᑕᐅᖏᑉᐸᑕ ᐊᕕᑦᑐᖅᓯᒪᔪᓂᑦ ᐊᑭᓕᖅᑕᐅᓯᒪᒋᐊᖃᓕᖅᐸᑦ ᐅᓪᓗᖓᓂ.

ᐅᖃᖃᑎᖃᕈᒪᒍᕕᑦ ᑭᒡᒐᖅᑐᐃᔨᐅᔪᒧᑦ ᐃᖅᑲᓇᐃᔭᖅᑐᖁᑎᓕᖕᓄᑦ ᐱᔨᑦᑎᕋᕐᓂᕐᒧᑦ, ᖃᕋᓴᐅᔭᑎᒍᑦ ᑎᑎᕋᕐᓗᑎᑦ employer@wscc.nt.ca ᓄᓇᑦᓯᐊᕐᒧᑦ, employernu@wscc.nu.ca ᓄᓇᕗᒻᒧᑦ, ᐅᕝᕙᓘᓐᓃᑦ ᐅᖄᓚᓗᑎᑦ 1 (800) 661-0792−ᒧᑦ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑎᑎᕋᕐᕕᖏᑦ ᒪᑐᓂᐊᕐᓂᖏᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᑎᑎᕋᕐᕕᖏᑦ ᒪᑐᓯᒪᓛᖅᑐᑦ ᑲᓇᑕᒥ ᓱᓕᔪᓄᑦ ᐊᒻᒪ ᓴᐃᒻᒪᖃᑎᒌᓂᕐᒧᑦ ᐅᓪᓗᖓᓂ ᐅᓪᓗᑐᐃᓐᓇᖅ, ᓯᑎᐱᕆ 30 ᐊᒻᒪ ᒪᑐᐃᒃᑲᓐᓂᕐᓗᑎ ᓇᒡᒐᔾᔭᐅ, ᐅᑐᐱᕆ 3-ᒥᑦ.

ᐅᖃᓗᒋᑦ 1 (800) 661-0792-ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.

ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᕋᓴᐅᔭᑎᒍᑦ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ WSCC Connect.