Cylchlythyr Mis Tachwedd 2023

Ar hyn o bryd, rydym yn gwerthuso sut i gael y gorau o’n cylchlythyr allanol gydag arolwg byr 5 munud o hyd. Mae eich adborth chi fel rhywun sy’n cael cylchlythyr misol DHCW yn allweddol i’r broses hon.

Llenwi’r arolwg

RHANNU CYFLEOEDD AR GYFER DEFNYDDIO GWYBODAETH DDIGIDOL I YSGOGI NEWID MEWN DIGWYDDIAD CYNLLUNIO

Daeth mwy na 220 o gydweithwyr o dimau Cynllunio, y Gweithlu a Chyllid ar draws GIG Cymru ynghyd yr wythnos diwethaf ar gyfer digwyddiad cynllunio a dysgu cenedlaethol diweddaraf y Rhaglen Gynllunio ar gyfer Dysg.

Hwn oedd y tro cyntaf i Iechyd a Gofal Digidol Cymru gynnal y digwyddiad. Mae’r digwyddiad yn cael ei gynnal ddwywaith y flwyddyn gan sefydliad GIG Cymru gwahanol bob tro.

Roedd cyflwyniadau yn ystod y dydd yn canolbwyntio ar y thema ‘sut y gall gwybodaeth ddigidol gefnogi cynllunio ac ysgogi newid, gan arwain at ddarparu gwasanaethau mwy cynaliadwy.’ Mae hyn yn adeiladu ar rôl DHCW fel partner dibynadwy ar gyfer gwasanaethau digidol a data ar draws GIG Cymru.

Roedd Eluned Morgan, y Gweinidog Iechyd a Gwasanaethau Cymdeithasol yn bresennol ynghyd â Judith Paget, Prif Weithredwr GIG Cymru. Bu’r Gweinidog yn trafod strategaeth ddigidol a data Llywodraeth Cymru ar gyfer iechyd a gofal cymdeithasol yng Nghymru a gyhoeddwyd ym mis Gorffennaf 2023, a fydd yn helpu i lywio’r broses o ddarparu gofal a chymorth drwy dechnoleg a’r defnydd o ddata.

Darllenwch ragor ar wefan DHCW

LANSIAD Y GWASANAETH RHAGNODI ELECTRONIG CYNTAF YNG NGHYMRU

Cleifion yn y Rhyl yw'r rhai cyntaf yng Nghymru i elwa ar wasanaeth rhagnodi electronig newydd (EPS), sy'n galluogi meddygon teulu i anfon presgripsiynau yn ddiogel ar-lein i fferyllfa gymunedol o ddewis y claf, heb fod angen presgripsiwn papur.

Mae'r gwasanaeth newydd, sy'n cael ei lansio'n swyddogol heddiw, yn gwneud rhagnodi a dosbarthu meddyginiaethau i gleifion a gweithwyr gofal iechyd proffesiynol yn haws, yn fwy diogel ac yn fwy effeithlon.

Mae lansio presgripsiynau electronig yng Nghymru yn ganlyniad i 20 mis o waith gan y Portffolio Trawsnewid Gweinyddu Meddyginiaethau’n Ddigidol (DMTP), sydd wedi troi ymrwymiad Llywodraeth Cymru i ddigideiddio presgripsiynau yn realiti.

Darllenwch ragor ar wefan DHCW

CWBLHAU CAM UN PROSIECT DARGANFOD YN YMWNEUD AG IECHYD MEDDWL

Nodwyd yr angen am gofnod electronig Cymru gyfan i helpu i wella cynllunio a darpariaeth iechyd meddwl yng Nghymru yn dilyn cam un o brosiect darganfod gan Iechyd a Gofal Digidol Cymru.

Nod y prosiect yw nodi meysydd lle y gall digidol, data a thechnoleg ychwanegu gwerth at wasanaethau iechyd meddwl. Mae'n dilyn ymlaen o waith Iechyd a Gofal Digidol Cymru i ddatblygu set ddata iechyd meddwl genedlaethol yn unol â Strategaeth Llywodraeth Cymru, Law yn Llaw at Iechyd Meddwl.

Bu Iechyd a Gofal Digidol Cymru yn gweithio’n agos gyda'r rhai sy'n darparu gwasanaethau iechyd meddwl yn ardal Cwm Taf Morgannwg ar gyfer cam un y prosiect. Mae hyn yn cynnwys Bwrdd Iechyd Prifysgol Cwm Taf Morgannwg, Awdurdodau Lleol a Gofal Sylfaenol.

Dywedodd Elaine Lorton, Cyfarwyddwr Gwasanaeth Iechyd Meddwl Bwrdd Iechyd Prifysgol Cwm Taf Morgannwg:



“Fel bwrdd iechyd, mae CTM wedi chwarae rhan allweddol yn y gwaith cwmpasu hwn gydag Iechyd a Gofal Digidol Cymru a phartneriaid eraill, ac mae wedi rhoi’r cyfle i ni helpu i lunio syniadau a phenderfyniadau yn y dyfodol yn y maes ymarfer pwysig hwn.

Rydym yn gwybod y bydd symud i system ddigidol ddiogel sydd wedi’i halinio’n well, yn gwneud gwahaniaeth gwirioneddol i ddefnyddwyr gwasanaethau iechyd meddwl yn ein cymunedau.”

Darllenwch ragor ar wefan DHCW