Cylchlythyr Mis Awst 2023

Y NEWYDDION DIWEDDARAF

DHCW HETT

Mae Iechyd a Gofal Digidol Cymru wedi cadarnhau nifer o siaradwyr yn y sioe Rhagoriaeth Gofal Iechyd Trwy Dechnoleg (HETT) fis Medi yma yn ExCeL Llundain. Mae’r digwyddiad sydd am ddim i’r GIG a’r sector cyhoeddus yn cynnig dau ddiwrnod o sesiynau addysgol, gweithdai a sesiynau grŵp rhyngweithiol sy’n archwilio’r systemau a’r seilwaith sy’n sail i GIG sy’n seiliedig ar ddata ac yn ei alluogi.

Mae Iechyd a Gofal Digidol Cymru yn gyffrous i fod yn arddangos ein gwaith a’n datblygiadau diweddar i dros 4,500 o bobl a fydd yn bresennol.

Darllenwch ragor ar wefan DHCW

CYRRAEDD CARREG FILLTIR ALLWEDDOL YN Y CYNLLUN I DDARPARU GWASANAETH RHAGNODI ELECTRONIG YNG NGHYMRU

Mae carreg filltir gyffrous wedi’i chyrraedd yn y cynllun i newid y ffordd y caiff presgripsiynau eu rhoi ym maes gofal sylfaenol yng Nghymru. Mae profion byw ar fin dechrau ar Wasanaeth Rhagnodi Electronig (EPS) newydd a fydd yn golygu bod presgripsiynau'n cael eu hanfon yn electronig o bractis meddyg teulu i'r fferyllfa o ddewis claf, heb fod angen presgripsiwn papur.

Bydd symud oddi wrth broses bapur i wasanaeth digidol yn dod â manteision i gleifion, meddygfeydd, fferyllfeydd a’r amgylchedd, gan arbed hyd at 40 miliwn o ffurflenni papur bob blwyddyn.

Mae'r gwaith yn rhan allweddol o’r Portffolio Trawsnewid Gweinyddu Meddyginiaethau’n Ddigidol sy’n dwyn ynghyd y rhaglenni a'r prosiectau a fydd yn sicrhau manteision dull rhagnodi cwbl ddigidol ym mhob lleoliad gofal yng Nghymru.

Darllenwch ragor ar wefan DHCW

DHCW YN CROESAWU STRATEGAETH DDIGIDOL A DATA AR EI NEWYDD WEDD

Mae Iechyd a Gofal Digidol Cymru (DHCW) wedi croesawu cyhoeddi Strategaeth Digidol a Data ar gyfer Iechyd a Gofal Cymdeithasol Llywodraeth Cymru ar ei newydd wedd.

Mae’r strategaeth wedi’i diweddaru yn darparu cyfeiriad cenedlaethol ar gyfer digidol a data i wella profiad staff a defnyddwyr iechyd a gofal cymdeithasol, yn mynd i’r afael â heriau strategol allweddol sy’n wynebu’r sectorau ac yn helpu pobl i fyw bywydau hapusach, iachach a hirach.

Darllenwch ragor ar wefan DHCW

DIWEDDARIADAU PELLACH

Mae tîm Sicrwydd Ansawdd a Chydymffurfiaeth Reoleiddiol DHCW wedi cyrraedd rownd derfynol Gwobrau GIG Cymru 2023. Mae’r gwobrau yn dathlu rhagoriaeth mewn iechyd a gofal ledled Cymru. Mae’r tîm wedi cyrraedd y rhestr fer yn y categori ar gyfer cyfoethogi llesiant, gallu ac ymgysylltiad y gweithlu iechyd a gofal.

Darllenwch ragor ar wefan DHCW

Yn ddiweddar, cynhaliodd y tîm gwybodeg glinigol, gweithwyr gofal iechyd proffesiynol sydd i gyd yn chwarae rhan allweddol mewn safoni a digideiddio dogfennaeth yn y sector, eu huwchgynhadledd dymhorol i rannu gwybodaeth, dysgu a thrafod cyfleoedd i gydweithio.

I ddysgu rhagor am swyddogion Gwybodeg Clinigol a'r hyn y maent yn eu gwneud, gwrandewch ar ein podlediad swyddogion Gwybodeg Clinigol ar wefan DHCW.

DIGWYDDIADAU I DDOD

12 Medi 2023

Cynhadledd ac Arddangosfa Flynyddol Conffederasiwn GIG Cymru

Iechyd ar yr ymyl: Beth sydd angen ei newid?

Gan ddod ag arweinwyr ynghyd o bob rhan o iechyd a gofal a thu hwnt, bydd cynrychiolwyr yn clywed gan arbenigwyr yn y diwydiant, yn cymryd rhan mewn gweithdai rhyngweithiol ac yn cael digon o gyfle i rwydweithio â chynrychiolwyr ac arddangoswyr eraill.

Byddwn yn ymdrin â meysydd gan gynnwys y gweithlu, integreiddio, iechyd y boblogaeth, arloesi, rôl iechyd yn yr economi, cyllid a rhagor.

I gael rhagor o wybodaeth, ewch i: Iechyd ar yr ymyl: Beth sydd angen ei newid? | Conffederasiwn y GIG

12 Medi 2023

Uwchgynhadledd Iechyd a Gofal techUK

Mae techUK yn falch iawn o gyhoeddi ein Uwchgynhadledd Iechyd a Gofal gyntaf. Bydd yn dod â gwaith techUK ar draws y sectorau hyn ynghyd a darparu fforwm i arweinwyr y diwydiant gyfarfod a thrafod materion allweddol y sector.

Bydd yr Uwchgynhadledd yn cynnig diwrnod o sesiynau difyr ac amrywiol, gan gynnwys: prif areithiau gan lunwyr polisi lefel uchel, trafodaethau bord gron, paneli ar bynciau fel AI a Systemau Gofal Integredig.

I gael rhagor o wybodaeth ewch i: Uwchgynhadledd Iechyd a Gofal techUK

Cyfarfod Bwrdd Deufisol Iechyd a Gofal Digidol Cymru

Ymunwch â ni ar 28 Medi ar gyfer ein cyfarfod bwrdd deufisol. Fel rhan o’n hymrwymiad i ddidwylledd a thryloywder rydym yn cynnal cyfarfodydd bwrdd gyda gwahoddiad i’r cyhoedd fod yn bresennol neu i wylio trwy’r ffrwd fyw.

Bydd y manylion i ymuno â’r cyfarfod ar gael ar ein gwefan wythnos o flaen llaw neu cadwch lygaid ar ein cyfryngau cymdeithasol i gael rhagor o fanylion.

Noder: bydd gwasanaeth cyfieithu ar y pryd Cymraeg ar gael ym mhob cyfarfod bwrdd.

dhcw-enquiries@wales.nhs.uk

dhcw.nhs.wales

igdc.gig.cymru