Chwefror 2022 CROESO I'R GIG CYMRU CYLCHLYTHYR NYRSIO DIGIDOL Bydd y cylchlythyr hwn yn helpu i roi'r wybodaeth ddiweddaraf i randdeiliaid am safoni a digideiddio dogfennau nyrsio yng Nghymru, yn ogystal â diweddariadau ynghylch y cymwysiadau digidol y bydd nyrsio'n eu defnyddio.

Neges gan y Prif Swyddog Nyrsio Fel y Prif Swyddog Nyrsio, rwy'n falch iawn o weld y cynnydd ar draws GIG Cymru o ran cefnogi dull digidol cenedlaethol o gynnal asesiadau nyrsio cleifion mewnol. Mae hwn wedi bod yn ddull mor gadarnhaol a rhagweithiol o weithredu ar gyfer Cymru Gyfan. Edrychaf ymlaen at weld y byrddau iechyd a'r ymddiriedolaethau sy'n weddill yn gweithredu Cofnod Gofal Nyrsio Cymru (WNCR) a bod y gwasanaeth hwn yn cael ei ystyried yn fusnes fel arfer. Bydd yn dipyn o gyflawniad ac yn un i'w ddathlu.  Rwy’n gwybod bod y tîm yn parhau i weithio ar safoni dogfennau ymhellach ac rwy'n ddiolchgar i bawb sy'n gysylltiedig â'r gwaith hwn. Mae'r gwaith hwn yn bwysig iawn a bydd yn gwella ansawdd y gwasanaethau a ddarperir. Bydd data asesu ar gael ar draws y system gofal iechyd. Bydd hyn yn cefnogi gwneud penderfyniadau gwell ac ansawdd gofal gwell i gleifion yn y pen draw. Cymaint o gyfleoedd i’w harchwilio wrth inni ei alinio â’r system ddigidol nyrsio ehangach.  Mae technoleg ddigidol wedi bod yn allweddol i'r ffordd rydym wedi ymateb i'r pandemig. Ac oherwydd y cyflymder o ran hyn, rydym mewn sefyllfa ddelfrydol fel arweinwyr yn y maes hwn i'n proffesiwn ddylanwadu ar y blaenoriaethau.   Gan ein bod bellach yn y drydedd flwyddyn lle’r ydym yn delio â'r effaith ryfeddol y mae'r pandemig yn parhau i'w chael ar draws y system ac, yn wir, ar ein bywydau, yr wyf mor ddiolchgar i bawb sydd wedi bod yn ymwneud â chefnogi cyflwyno'r WNCR ac sydd wedi gwneud cofnodion nyrsio digidol yn realiti. Roeddwn yn falch iawn o fod wedi cael cyfle i weld hyn yn "fyw" yng Nghwm Taf yn ddiweddar ac rwy’n ddiolchgar i Christian Smith am yr arddangosiad. Mae brwdfrydedd y rhai sy'n defnyddio'r system yn heintus. Mae cael dull cenedlaethol o ddigido cofnodion nyrsio yn amhrisiadwy, yn yr un ffordd ag y mae cael cynllun datblygu clir ar gyfer ein gweithlu nyrsio a bydwreigiaeth mewn sgiliau digidol arbenigol a rolau gwybodeg glinigol. Mae gan y blaenoriaethau hyn fy nghefnogaeth a'm hymrwymiad llawn fel Prif Swyddog Nyrsio. Diolch i chi i gyd am bopeth rydych wedi'i wneud ac yn parhau i'w wneud yn gyflym ac edrychaf ymlaen at lwyddiant parhaus y gwaith hwn.   Sue Tranka Prif Swyddog Nyrsio  Llywodraeth Cymru / Welsh Government

Cofnod Gofal Nyrsio Cymru (WNCR)

Digwyddiadau Ymgysylltu â Rhanddeiliaid Cofnod Gofal Nyrsio Cymru (WNCR) Mawrth 2022

Fel Uwch Berchennog Cyfrifol (SRO) ar gyfer digideiddio dogfennaeth nyrsio, hoffwn ddiolch i chi am eich cefnogaeth barhaus i brosiect cenedlaethol Cofnod Gofal Nyrsio Cymru (WNCR).   Rydym yn cynnal ystod o ddigwyddiadau ymgysylltu un awr ym mis Mawrth 2022 a hoffwn eich gwahodd i fynychu a darganfod sut rydym yn gweithredu'r system nyrsio ddigidol, Cofnod Gofal Nyrsio Cymru (WNCR), ar draws GIG Cymru drwy sicrhau ansawdd a safoni.   Hoffem rannu cynnydd ein prosiect gyda chi a sut y gall Cofnod Gofal Nyrsio Cymru gefnogi staff GIG Cymru.   Gweler rhagor o wybodaeth (ar y dde) am y digwyddiadau, ac rwy'n edrych ymlaen at ymuno â chi i gyd ym mis Mawrth.   Claire Bevan Uwch Berchennog Cyfrifol Rhaglen Digideiddio Dogfennaeth Nyrsio

Mae tri digwyddiad:   Cyflwyniad i WNCR ar gyfer nyrsys dan hyfforddiant Dydd Iau, 3 Mawrth 2022, 14:30 Pwrpas y digwyddiad yw rhannu taith Cofnod Gofal Nyrsio Cymru (WNCR) hyd yn hyn gyda chi, sut y gall WNCR gynorthwyo gyda phrofiad a dysgu myfyrwyr drwy ddefnyddio'r WNCR mewn wardiau cleifion mewnol sy’n oedolion ledled Cymru.   Rydym yn gwerthfawrogi adborth gan brifysgolion a myfyrwyr ledled Cymru i lywio datblygiad parhaus Cofnod Gofal Nyrsio Cymru fel defnyddwyr system cyfredol a nyrsys GIG Cymru yn y dyfodol.   Gallwch gofrestru ar gyfer y digwyddiad hwn yma.   Taith, datblygiadau technegol ac arloesedd Cofnod Gofal Nyrsio Cymru Dydd Iau, 17 Mawrth 2022, 14:30 Bydd y digwyddiad hwn yn cyflwyno taith Cofnod Gofal Nyrsio Cymru, y gwersi a ddysgwyd a bydd yn canolbwyntio ar ddatblygiadau technegol a chamau nesaf y system ddigidol.   Gallwch gofrestru ar gyfer y digwyddiad yma.   Safoni a gweithredu dogfennaeth nyrsio Cofnod Gofal Nyrsio Cymru Dydd Iau, 24 Mawrth 2022, 14:30 Bydd y digwyddiad hwn yn cyflwyno'r fethodoleg safoni i ddogfennaeth nyrsio yng Nghymru a phwysigrwydd safonau gwybodaeth ar draws systemau clinigol. Bydd y gwersi a ddysgwyd o weithredu Cofnod Gofal Nyrsio Cymru ar wardiau cleifion mewnol sy’n oedolion ledled Cymru hefyd yn cael eu harchwilio.   Gallwch gofrestru ar gyfer y digwyddiad hwn yma.   Am ragor o wybodaeth, anfonwch e-bost at dhcw-enquiries@wales.nhs.uk

Mae Betsi Cadwaladr yn paratoi i'w lansio! Siaradodd Jane Brady, Prif Swyddog Gwybodeg Nyrsio Bwrdd Iechyd Prifysgol Betsi Cadwaladr â ni yn ddiweddar am ba mor gyffrous yw ei thîm am lansio Cofnod Gofal Nyrsio Cymru ym mis Mawrth.       Gwyliwch isod 👇

Ymchwil a gwerthusiad o Gofnod Gofal Nyrsio Cymru Mae Prifysgol Bangor yn cefnogi yr adolygiad a’r gwerthusiad o Gofnod Gofal Nyrsio Cymru. Bydd y gwerthusiad yn archwilio effeithiau Cofnod Gofal Nyrsio Cymru sy'n cael ei ariannu gan Brif Swyddog Nyrsio Cymru a Chyfarwyddwr Technoleg, Digidol a Thrawsnewid Llywodraeth Cymru. Bydd y gwerthusiad yn cael ei gwblhau gan Lois Wiggins sydd ar hyn o bryd yn gweithio gyda Bwrdd Iechyd Prifysgol Betsi Cadwaladr fel Cydlynydd Gofal Iechyd Parhaus yn yr Is-adran Iechyd Meddwl ac Anabledd Dysgu.   Cymhwysodd fel Nyrs Anabledd Dysgu Gofrestredig ac enillodd Baglor mewn Nyrsio o Brifysgol Bangor yn 2018 a gwnaeth gais llwyddiannus i gwblhau gradd Meistr drwy Ymchwil fel rhan o raglen academaidd glinigol ym Mhrifysgol Bangor mewn partneriaeth ag Iechyd a Gofal Digidol Cymru.

Yn ystod y gwerthusiad, bydd Lois yn edrych ar wybodaeth a gasglwyd eisoes gan Iechyd a Gofal Digidol Cymru ac adborth cynnar gan ddefnyddwyr Cofnod Gofal Nyrsio Cymru.   Yn ogystal, bydd Lois yn ymgysylltu â chynrychiolwyr o wahanol Fyrddau Iechyd ac yn sefydlu fforymau i archwilio profiad defnyddwyr o Gofnod Gofal Nyrsio Cymru ymhellach.

**Mynd yn fyw yr wythnos sy’n cychwyn 01/02/2022**

Gwaith gwefan Cofnod Gofal Nyrsio Cymru Mae'r tîm yn Iechyd a Gofal Digidol Cymru wedi diweddaru gwefan Cofnod Gofal Nyrsio Cymru yn sylweddol ac mae golwg a theimlad newydd iddi.   Mae'r dudalen yn haws ei defnyddio a'i darllen ac mae'n cynnwys adrannau ar gyfer diweddariadau, digwyddiadau, cylchlythyrau a mwy.  Ewch i’r  dudalen WNCR bwrpasol a chroesewir adborth i dhcw-comms@wales.nhs.uk Diweddariad Dogfennaeth Newydd:  Mae'r gwaith yn parhau ar safoni'r set nesaf o ddogfennau ac mae'n cynnwys:  ·      Siartiau Bwyd a Hylifau   ·      Gofal briwiau  ·      Asesiad risg Gofal y Geg  ·      Cynlluniau gofal  ·      Bwndeli Gofal Mewnwythiennol a Chathetr  ·      Monitro Glwcos Gwaed  ·      Diwedd Oes  ·      Siart Ysgarthion Bryste  ·      Offeryn Eiddilwch Clinigol   ·      Siart Ailosod  ·      Asesiad Risg Atal Heintiau   Asesiad Cynllunio ar gyfer Rhyddhau

System Wybodaeth Gofal Dwys Cymru (WICIS) Mae System Wybodaeth Gofal Dwys Cymru yn cael ei datblygu ar hyn o bryd gyda byrddau iechyd ledled Cymru. Bydd datrysiad digidol newydd i ddisodli siartiau papur a'r arsylwadau a ysgrifennir â llaw a ddefnyddir i gofnodi arwyddion bywyd hanfodol. Yr Uned Gofal Dwys newydd yn Ysbyty Athrofaol y Faenor ym Mwrdd Iechyd Prifysgol Aneurin Bevan fydd y gyntaf o'r 14 uned gofal critigol i oedolion yng Nghymru i fabwysiadu'r gwasanaeth digidol newydd.   Mae'r datrysiad digidol newydd a reolir yn llawn yn gallu disodli'r holl siartiau sy'n bodoli eisoes. Bydd yn casglu gwybodaeth amser real yn awtomatig o'r dyfeisiau monitro, pympiau ac offer anadlol a ddefnyddir ar gyfer gofal pob claf, gan ddarparu mynediad hawdd at ddata a mewnwelediadau hanfodol, gan roi trosolwg cyflym a chlir i staff rheng flaen o statws cleifion a dyfeisiau ar draws y ward.

O ystyried bod dros 10,000 o bobl yn cael eu derbyn am ofal critigol mewn ysbytai yng Nghymru bob blwyddyn, ynghyd â phwysau cynyddol ar ofal dwys, bydd gwella Unedau Gofal Dwys yn ddigidol yn gwella gofal trwy symleiddio prosesau, darparu gwybodaeth glinigol hanfodol ac arbed staff nyrsio rhag dogfennu wrth wely claf.   Os hoffech gael rhagor o wybodaeth am y rhaglen, gallwch fynd i'r dudalen webwrpasol, neu gallwch e-bostio Geraint.Walker@wales.nhs.uk.

System Wybodaeth Gofal Cymunedol Cymru (WCCIS) Mae Llywodraeth Cymru wedi cymeradwyo strategaeth o gydweithio'n agosach rhwng y gwasanaethau Iechyd a Gofal Cymdeithasol a'r awydd i gefnogi mwy o bobl gartref. Mae dogfennau polisi a strategol megis y Ddeddf Gwasanaethau Cymdeithasol a Llesiant (2014), Darparu Iechyd a Gofal Cymdeithasol Integredig (2013), wedi nodi'n gyson yr angen am wasanaethau Gofal Cymdeithasol ac Iechyd sydd wedi’u cydlynu a’u hintegreiddio’n well.   I gefnogi hyn, mae Awdurdodau Lleol o bob rhan o Gymru wedi gweithio gyda sefydliadau GIG Cymru i bennu a dewis un System Wybodaeth Gofal Cymunedol Cymru (WCCIS) ar gyfer Gwasanaethau Gofal Cymdeithasol, Cymunedol a Gwasanaethau nyrsio, Iechyd, Iechyd Meddwl a Therapi plant, ar draws ffiniau sefydliadol a daearyddol.   Os hoffech ragor o wybodaeth am y rhaglen, cysylltwch â Barry.Morgan2@wales.nhs.uki gael manylion am wasanaethau iechyd meddwl ac Abigail.Swindail3@wales.nhs.uk, ar gyfer nyrsio cymunedol a nyrsio plant.

Rhagnodi Electronig a Gweinyddu Meddyginiaethau Gofal Eilaidd Rhagnodi Electronig a Gweinyddu Meddyginiaethau (EPMA) yw'r rhaglen ddigidol newydd nesaf a fydd yn digideiddio'r broses rhagnodi a'r broses o weinyddu meddyginiaethau mewn ysbytai. Bydd yn cefnogi:       • Rhagnodi meddyginiaeth a gweinyddu meddyginiaeth yn fwy diogel • Prosesau busnes meddyginiaethau effeithlon, megis cysoni a gwirio meddyginiaethau, a chynnwys 5 hawl rhoi meddyginiaethau • Disodli'r siart bapur ar gyfer meddyginiaethau   Mae gofynion nyrsio wedi cael eu casglu drwy ddigwyddiadau gweithdy amrywiol. Cadwch lygad allan am fwy o newyddion wrth i ni symud ymlaen.

Awgrymiadau defnyddiol Cadwch lygad ar agor am eicon ar y chwith. Bydd hyn yn ymddangos ar eich bwrdd gwaith ac yn mynd â chi'n uniongyrchol i gymhwysiad Cofnod Gofal Nyrsio Cymru.

Mae Canolfan Hyfforddi Ar Alw bellach ar gael ar gyfer Cofnod Gofal Nyrsio Cymru lle gallwch ddod o hyd i fwy o arweiniad ac awgrymiadau defnyddiol.