Այս շաբթուան “Crossroads”ին համար, Ամենայն Սրբոց եկեղեցւոյ (Կլենվիու, Իլինոյ) դպիր եւ Դանիէլ Վարուժան շաբաթօրեայ վարժարանի աշակերտ Գարուն Գրիգորեան կը կարդայ Ս. Ներսէս Շնորհալիի «Հաւատով խոստովանիմ»ի եօթներորդ աղօթքը։
|
|
ՆԵՐԿԱՅԱՑՈՒՑԻՉՆԵՐՈՒ ՏՈՒՆԸ ՋԱԽՋԱԽԻՉ ՄԵԾԱՄԱՍՆՈՒԹԵԱՄԲ
ՃԱՆՉՑԱՒ ՀԱՅՈՑ ՑԵՂԱՍՊԱՆՈՒԹԻՒՆԸ
|
|
Երեքշաբթի, 29 Հոկտեմբերին, ԱՄՆ Գոնկրէսի Ներկայացուցիչներու Տունը ջախջախիչ մեծամասնութեամբ (405 թեր, 11 դէմ, 3 ձեռնպահ) վաւերացուց թիւ 296 բանաձեւը, որ կը ճանչնայ Հայոց Ցեղասպանութիւնը՝ հուժկու հարուած մը տալով թրքական ուրացման քաղաքականութեան։ Քսաներեք ատենախօսներ արտայայտուեցան ի նպաստ բանաձեւի վաւերացման, ներառեալ՝ Ներկայացուցիչներու Պալատի ամենէն ազդեցիկ անդամներէն շատեր, ինչպէս եւ երկու հայազգի անդամուհիները՝ Ճէքի Սփայըր եւ Աննա Իշու։
Այս բանաձեւը կը հաստատէ՝ իբրեւ ամերիկեան քաղաքականութեան նիւթ, ա) ցեղասպանութեան ուրացման մերժումը, բ) ոճիրին պաշտօնական ճանաչումը եւ յիշատակումը ԱՄՆի կառավարութեան կողմէ, գ) Հայոց Ցեղասպանութեան նուիրուած դաստիարակութեան աջակցութիւն՝ մերօրեայ վայրագութիւններ կանխելու նպատակով։ Վաւերացուած բանաձեւին աշխատանքները գլխաւորած էին Ատամ Շիֆ եւ Կուս Պիլիրաքիս։ Նմանօրինակ բանաձեւ մը ներկայացուած է Ծերակոյտի նկատառման՝ ծերակուտականներ՝ Ռոպըրթ Մէնէնտէզի եւ Թէտ Գրուզի կողմէ։
1970ական թուականներէն ի վեր, երրորդ անգամն է, որ Ներկայացուցիչներու Տունը Հայոց Ցեղասպանութեան ճանաչման բանաձեւ մը կը վաւերացնէ։ Նախորդ վաւերացումները տեղի ունեցած էին 1975ին եւ 1984ին։
|
|
ԱՌԱՋՆՈՐԴ ՍՐԲԱԶԱՆ ՀԱՅՐԸ` ԱՆԹԻԼԻԱՍ
|
|
Այս շաբաթասկզբին Անուշաւան Սրբազան Հայրը Լիբանան ճամբորդեց մասնակցելու Կաթողիկոսարանի Կրօնական եւ Ազգային Վարչութեանց ժողովին։ Ժողովի ընթացքին անդրադարձան Կաթողիկոսարանի եւ Առաջնորդարանին վերաբերող տարբեր նիւթերու։
|
|
ԱՌԱՋՆՈՐԴ ՍՐԲԱԶԱՆ ՀԱՅՐԸ ԽՈՐԱՆԻՆ ԾԱՌԱՅՈՂՆԵՐ
ՊԻՏԻ ՁԵՌՆԱԴՐԷ
|
|
Այս շաբաթավերջին Անուշաւան Սրբազան Հայրը Լիբանանի ժողովէն վերադարձին պիտի մեկնի Շիքակօ, ուր Շաբաթ օր դպիրներ պիտի ձեռնադրէ, Ամենայն Սրբոց եկեղեցւոյ 76-րդ տարեդարձի նշման ներկայ պիտի գտնուի, իսկ Կիրակի օր պիտի պատարագէ, սարկաւագի ձեռնադրութիւն կատարէ եւ աւագ սարկաւագի աստիճան նուիրէ։
Առաջնորդ Սրբազան Հայրը Երկուշաբթի, Նոյեմբեր 4ի երեկոյեան ժամը 7։30ին պիտի մասնակցի Լիբանանի համար կայանալիք Միջ-եկեղեցական արարողութեան, «
Օur Lady of Lebanon»
Մարոնիթ եկեղեցւոյ մէջ, Պրուքլին, Նիւ Եորք։
|
|
ԱՌԱՋՆՈՐԴ ՍՐԲԱԶԱՆ ՀԱՅՐԸ՝ ՈՒԱՅԹԸՆԶՎԻԼԻ ՄԷՋ
|
|
Առաջնորդ Սրբազան Հայրը Ուայթընզվիլի ծխականներու հետ
|
|
Կիրակի, 27 Հոկտեմբերին, թեմիս բարեջան առաջնորդ՝ Գերշ. Տ. Անուշաւան արք. Դանիէլեան, քարոզեց ու պատարագեց Ուայթընզվիլի (Մասաչուսեթս) Ս. Աստուածածին եկեղեցւոյ մէջ՝ ծուխի 62ամեակին առիթով, Գիւտ Խաչի Տօնին օրով։
Այնուհետեւ, Սրբազան Հայրը նախագահեց յոբելինական ճաշկերոյթին, որ տեղի ունեցաւ The Highfields Golf and Country Clubին մէջ (Կրաֆթըն, Մասաչուսեթս)։ Ճաշկերոյթին գլխաւոր խօսնակը Ռիչըրտ Քանարեանն էր, իսկ Ռաֆֆի Սամքիրանեան՝ եկեղեցւոյ խնամակալութեան ատենապետը, իր «բարի գալուստ»ի խօսքով խանդավառութիւն բերաւ ներկաներուն մէջ։
Այս առիթով, Անուշաւան Արքեպիսկոպոս գնահատական վկայագիրներ յանձնեց՝ Բրիսիլա Ալթունեանին, Մերի Ամբակումեանին եւ Վիքթորիա Օվեանին եկեղեցւոյ համար իրենց մատուցած տարիներու ծառայութեան համար։ Առաջնորդ Սրբազան Հայրը եւ Տէր Միքայէլ քհն․ Խոսրովեան Սուրբ Աստուածածնի «
Youth Award» երիտասարդական մրցանակը տուին Լիա Կարապետեանին, իսկ տիար Լուիզ Թուսինոյին՝ Սուրբ Աստուածածին եկեղեցւոյ Երախտագիտութեան Վկայագիր յանձնեցին։ Տիար Թուսինօ Տակլըս, Մասաչուսեթսի մէջ Guaranteed Builders Incorporated-ի սեփականատէրն ու հիմնադիրն է, լռելեայն նուիրատուութիւն ըրած է Սուրբ Աստուածածին եկեղեցւոյ, որ շատ անկեղծ եւ սիրելի վերաբերմունք է։ Երբ որ կանչուած է, անվերապահօրէն իր ծառայութիւնը մատուցած է ան, առանց ճանաչման կամ շնորհակալութեան ակնկալութիւններու։ Տիար Թուսինոյի միակ մղումը եղած է օգնել եկեղեցւոյ եւ անոր առաքելութեան հասանելիութեան համայնքէն ներս։ Տիար Թուսինօ Տակլըսի խոնարհ ոգին եւ առատաձեռնութիւնը օրինակելի է բոլորիս, որուն կ՛արժէ հետեւիլ։
Էրեբունի պարախումբը քանի մը հայկական պարեր կատարեց։
Տօնախմբումը աւարտեցաւ Առաջնորդ Սրբազան Հօր խօսքով, ուր շնորհաւորեց Սուրբ Աստուածածին եկեղեցւոյ համայնքը իր 62րդ տարեդարձին առիթով եւ աղօթեց գաղութին բարգաւաճման համար։
|
|
Ձախէն՝ Տէր Միքայէլ Քահանայ, Քլոտիա Անդրանիկեան, Առաջնորդարանի գնահատագիր ստացած Բրիսիլա Ալթունեան, Վիքթորիա Օվեան եւ Մերի Ամբակումեան, Անուշաւան Սրբազան Հայր եւ Ռաֆֆի Սամքիրանեան՝ եկեղեցւոյ խնամակալութեան ատենապետ
|
|
Առաջնորդ Սրբազան Հայր եւ Ս․ Աստուածածին եկեղեցւոյ Երիտասարդական Մրցանակ «
Youth Award
» ստացած՝ Լիա Կարապետեան
|
|
Առաջնորդ Սրբազան Հայրը եւ Տէր Հայրը Սուրբ Աստուածածին եկեղեցւոյ Երախտագիտութեան Վկայագիր ստացած՝ տիար Լուիզ Թուսինօ
|
|
ԳՈՀԱԲԱՆՈՒԹԵԱՆ ՕՐՈՒԱՆ ՃԱՇԿԵՐՈՅԹԻՆ ՕՐԸ ԿԸ ՄՕՏԵՆԱՅ
ԿԻԶԱԿԷՏԸ՝ ՀԱՅԱՍՏԱՆԻ ԵՒ ԱՐՑԱԽԻ ԲԱՐԵՍԻՐԱԿԱՆ ԾՐԱԳԻՐՆԵՐԸ
|
|
17 Նոյեմբերի Գոհաբանութեան Օրուան տոմսակներու եւ նուիրատուութիւններու ժամկէտը շատ մօտ է։ Վերջին վայրկեանին մի՛ սպասէք, որովհետեւ կ՚ակնկալուի, որ ճաշկերոյթին տոմսակները սպառին։
|
|
Ամէն տարի, «Առաջնորդարանի Գոհաբանութեան Օր»ը շեշտը պիտի դնէ Ազգ. Առաջնորդարանի բազմակողմանի առաքելութեան մէկ երեսին վրայ։ Այս նոր աւանդութեան հիմքը պիտի դրուի Կիրակի, 17 Նոյեմբերին։ Որպէս օրուան սկիզբ, Անուշաւան Արքեպիսկոպոս պիտի պատարագէ Ս. Սարգիս եկեղեցւոյ մէջ (Տակլըսթըն), առաւօտեան ժամը 10:30ին։ Յաւարտ Ս. Պատարագի, Գոհաբանութեան ճաշկերոյթը տեղի պիտի ունենայ՝ Terrace on the Parkի մէջ (Քուինզ, Նիւ Եորք)։ Հիւրասիրութիւնը պիտի սկսի ժամը 2:00ին, իսկ ճաշկերոյթն ու յայտագիրը՝ ժամը 3:00ին։
Առաջնորդ Սրբազան Հայրը բացատրեց, որ «Առաջնորդարանի Գոհաբանութեան Օր»ը յղացուած է «մեր ժողովուրդին, առանց բացառութեան, շնորհակալութիւն յայտնելու՝ Առաջնորդարանի հովանաւորած ծրագիրներուն՝ անոր բերած անսակարկ նուիրումին համար։ Հետեւաբար, ամէն տարի յատուկ ուշադրութիւն պիտի դարձնենք տարբեր ծրագրի մը։ Առաջին ձեռնարկին որոշած ենք մեծարել հայրենիքի մէջ, Առաջնորդարանին կողմէ հաստատուած «Մեծն Ներսէս» Բարեգործական ու Ընկերային Կազմակերպութեան բերած ծառայութիւնը Հայաստանի ու Արցախի մեր ժողովուրդին։ Թէեւ այս աշխատանքին արմատները կը հասնին մինչեւ 1988ի երկրաշարժը, բարեգործական գրասենեակին պաշտօնական հաստատումը տեղի ունեցաւ աւելի քան 25 տարի առաջ։ Արդարեւ, «Մեծն Ներսէս» պաշտօնապէս նշած է իր 25ամեակը։ Հետեւաբար, Նոյեմբեր 17ին պիտի նշենք անոր 25 + 1 տարեդարձը, այսինքն՝ Հայաստանի ու Արցախի մէջ 26 տարուան սիրոյ գործը»։
Ձեր տեղերը պահելու կամ նուիրատուութիւն կատարելու համար,
սեղմեցէք այստեղ։
Եթէ կը նախընտրէք, կրնաք հեռաձայնել Ազգ. Առաջնորդարանի գրասենեակ (212-689-7810)։
|
|
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄ
|
|
ԿԻՐԱԿԻ, 3 ՆՈՅԵՄԲԵՐ
Ը. ԿԻՐԱԿԻ ԽԱՉՎԵՐԱՑԷՆ ԵՏՔ
ԱՒԵՏԱՐԱՆ ԸՍՏ ՂՈՒԿԱՍԻ 8:17-21
Չկայ ծածուկ բան որ չյայտնուի եւ կամ գաղտնի բան՝ որ չգիտցուի եւ երեւան չգայ: Ուրեմն ուշադիր եղէք թէ ի՛նչպէս կ’ընդունիք այս խօսքերը, որովհետեւ ունեցողին պիտի տրուի, իսկ չունեցողէն պիտի առնուի նոյնիսկ այն՝ ինչ որ կը կարծէ թէ ունի:
Յիսուսի մայրն ու եղբայրները իրեն եկան, բայց խուռն բազմութեան պատճառով չկրցան իրեն մօտենալ: Լուր տուին իրեն, ըսելով.
–
Մայրդ եւ եղբայրներդ դուրսն են եւ կ’ուզեն քեզ տեսնել:
Յիսուս ըսաւ.
–
Մայրս ու եղբայրներս ասոնք են, որոնք Աստուծոյ խօսքը կը լսեն եւ կը գործադրեն:
ԹՈՒՂԹ ԵՓԵՍԱՑԻՆԵՐՈՒՆ 1:1-14
Ես՝ Պօղոս, Աստուծոյ կամքով Քրիստոս Յիսուսի առաքեալը, կը գրեմ Եփեսոս բնակող եղբայրներուդ, Քրիստոս Յիսուսի հաւատացողներուդ: Թող Աստուած մեր Հայրը եւ Տէր Յիսուս Քրիստոս շնորհք եւ խաղաղութիւն պարգեւեն ձեզի:
Օրհնեալ է Աստուած, մեր Տիրոջ Յիսուս Քրիստոսի Հայրը, որ Քրիստոսով մեզ օրհնեց երկինքի մէջ ամէն տեսակ հոգեւոր օրհնութեամբ: Անիկա աշխարհի գոյութենէն իսկ առաջ մեզ ընտրած էր՝ Քրիստոսի միջոցաւ իրեն պատկանելու համար, որպէս սուրբ եւ անարատ ժողովուրդ, եւ իր սիրով մեզ նախասահմանեց՝ Յիսուս Քրիստոսի ձեռքով իր որդիները ըլլալու, որովհետեւ ա՛յդ էր իր կամքը եւ ծրագիրը:
Ուստի գովենք զինք այն փառքին համար, որ մեզի շնորհեց իր սիրելի Որդիին միջոցաւ: Արդարեւ, անով փրկուեցանք եւ անոր արիւնով մեր մեղքերուն թողութիւն գտանք: Որքա՜ն մեծ է իր շնորհքը, որ առատօրէն տուաւ մեզի՝ ամենայն իմաստութեամբ եւ գիտութեամբ: Որովհետեւ իր կամքին համաձայն մեզի յայտնեց շատ կանուխէն պատրաստած իր ծրագիրը, որ Քրիստոսով պիտի իրագործուի: Եւ այդ ծրագիրը սա է, որ երբ ժամանակները իրենց լրումին հասնին, Քրիստոս իրմով պիտի բովանդակէ ամէն ինչ որ կայ երկինքի մէջ եւ երկրի վրայ:
Քրիստոսի միջոցաւ է որ ժառանգորդ դարձանք փրկութեան: Աստուած, որ ամէն ինչ կը յաջողցնէ ըստ իր առաջադրած ծրագրին ու կամքին, անով առաջուց հրաւիրեց մեզ՝ իր փառքը գովերգելու. մենք՝ որ Քրիստոսի յուսացողներուն առաջիններէն եղանք: Դուք ալ, երբ լսեցիք ճշմարիտ քարոզութիւնը, այսինքն Աւետարանը որ ձեզի փրկութիւն բերաւ, հաւատացիք Քրիստոսի եւ խոստացուած Սուրբ Հոգիով կնքուեցաք: Եւ Սուրբ Հոգին գրաւական է, թէ պիտի ժառանգենք Աստուծոյ խոստումը, երբ Աստուած պիտի փրկէ իր սեփական ժողովուրդը, որպէսզի իր փառքը գովերգենք։
ՃՇ․ ԸՆԹԵՐՑՈՒՄ
Ես 22։15-25
|
|
Այսօր, Հինգշաբթի, 31 Հոկտեմբերին, Հայաստանեայց Եկեղեցին կ՚ոգեկոչէ Ս. Յովհան Ոսկեբերանը`
նշանաւոր եկեղեցական ու քարոզիչ Սուրիոյ եւ Կ. Պոլսոյ մէջ
։ Այս հոգեւորականը, որ իբրեւ սուրբ ճանչցուած է Ուղղափառ Եկեղեցւոյ կողմէ, նշանաւոր էր իր պերճախօսութեամբ, ուրկէ կու գայ անոր Ոսկեբերան անուանումը։ Սուրբը մեծարուած է նաեւ Կաթողիկէ ու Անկլիքան Եկեղեցիներուն կողմէ։
Ոսկեբերան 21 տարեկանին քրիստոնէութիւնը ընդունած է 368 թուականին։ Հրաժարած է մեծ ժառանգութենէ եւ խոստմնալից իրաւաբանական ասպարէզէ, քաշուելով լեռնային քարանձաւ մը՝ Աստուածաշունչը ուսումնասիրելու։ Եկեղեցական օծուելէ ետք, անոր քարոզները մեծ լսարաններ հրապուրած են։ Քննադատած է հարուստ քրիստոնեաներ, որոնք պարզապէս թանկագին իրեր կը նուիրէին՝ եկեղեցիներու մէջ ցուցադրուելու համար։
Յովհան Ոսկեբերանի սուր քննադատութիւնները լուրջ պատճառ եղած են, որ քանիցս աքսորուի։ Անոր խօսքն ու գործը խոր ազդեցութիւն ունեցած են Հայց. Եկեղեցւոյ վարդապետութեան ու աստուածաբանութեան վրայ, քանի որ աքսորի վերջին տարիները Հայաստանի մէջ անցուցած է։ Ոսկեբերանի քանի մը կարեւոր գործեր մեզի հասած են միայն հայերէն թարգմանուած ձեռագիրներու միջոցաւ։
Ոսկեբերան հռչակուած է Ընդհանրական
Եկեղեցւոյ Վարդապետ՝
451 թուականին, Չորրորդ Տիեզերական ժողովին (Քաղկեդոնի Ժողով) եւ դասուած քարոզիչներու հովանաւոր՝ Հռոմի Բիոս 10րդ Պապին կողմէ:
|
|
Շաբաթ, 2 Նոյեմբերին, Հայաստանեայց Եկեղեցին կը նշէ Ամենայն Սրբոց տօնը, Նորոց եւ Հնոց, Յայտից եւ Անյայտից։ Այս տօնը կը ներառնէ բոլոր այն սուրբերը, որոնք Եկեղեցւոյ ցանկէն կրնան բացակայ ըլլալ եւ որոնք մեզի յայտնի չեն։ Արեւմտեան եկեղեցիները նոյն տօնը Նոյեմբեր 1ին կը նշեն։ Ըստ մեր եկեղեցական աւանդութեան, թուականը փոփոխական է ու կապուած՝ Խաչի տօնին հետ։ Հետեւաբար, Հոկտեմբերի վերջաւորութեան կամ Նոյեմբերին կրնայ նշուիլ։
|
|
Այս շաբաթ նաեւ կը յիշուին
|
|
Երկուշաբթի, 4 Նոյեմբեր՝
Սուրբ Ստեփանոս, Հռոմի հայրապետ
Երեքշաբթի, 5 Նոյեմբեր՝
Ակիփսիմեայ Եպիսկոպոս
|
|
ՍԵՄԻՆԱՐ՝ ՄԿՐՏՈՒԹԵԱՆ ՄԱՍԻՆ
|
|
Շաբաթ, 2 Նոյեմբերին, Քրիստոնէական Դաստիարակութեան Բաժանմունքի վարիչ՝ Շանթ Ա. սրկ. Գազանճեան, միօրեայ սեմինար մը պիտի վարէ՝ «Մկրտութիւն-Դրոշմ. Մեր քրիստոնէական կեանքի հիմքը» նիւթին շուրջ, Ռէյսինի (Ուիսքանսըն) Ս. Յակոբ եկեղեցւոյ մէջ։ Տեղեկութիւններու եւ արձանագրութեան համար՝ հեռաձայնել տիկ. Շիրլի Սարեանին՝ 414-282-1919 թիւին։
|
|
Ս․ ՍՏԵՓԱՆՈՍ ԱՄԷՆՕՐԵԱՅ ՎԱՐԺԱՐԱՆԷՆ ՆԵՐՍ՝
ՀԱՅ ՄՇԱԿՈՅԹԻ ՕՐ
|
|
Տաղանդներու ցուցադրութեան պահուն՝ «Talent Show»էն Հայ Մշակոյթի Օրուան ընթացքին
|
|
Այս տարի Մասաչուսեթս, Ուոթըրթաունի Ս․ Ստեփանոս Նախակրթարանի Հայ Մշակոյթի Օրուան հիւր-խօսնակը «Project Save»-ի տնօրէն՝ Ցոլին Սարեանն էր, որ խօսեցաւ լուսանկարներու արխիւներու մասին, թէ ինչպէս անոնք վկաներն ու ժամանակացոյցն են մշակոյթի եւ պատմութեան։ Շրջանաւարտ Մեղրի Տէր Վարդանեան ցուցադրութիւնը ըրաւ իր Արարատ լերան արշաւի մասին․ 5րդ դասարանի աշակերտութիւնը ներկայացուց աշխատանք մը նշանաւոր հայ գիտնականներու մասին, ինչպէս՝ աստղագէտ Վիքթոր Համբարձումեանի, օդանաւերու ձեւաւորող Արտեմ Միկոյեանի, ֆիզիքոս Արտեմ Ալիխանեանի, հայագէտ Յովսէփ Օրբելիի եւ MRI-ի գիւտարար Էտմընտ Տամատեանի։ Ինչպէս նաեւ տեղի ունեցաւ տաղանդներու ցուցադրութիւն՝ «Talent Show» 1-5րդ դասարանի աշակերտներուն կողմէ, հայ երաժիշտներու եւ բանաստեղծներու գործերով։
|
|
Շրջանաւարտներ՝ Մեղրի Տէր Վարդանեանը կը խօսի իր Արարատ լերան արշաւի մասին
|
|
Երիտասարդ ջութակահարները կը մասնակցին «Talent Show»ին:
|
|
Ս. ՍԱՐԳԻՍ ԵԿԵՂԵՑՒՈՅ ԽՈՒՄԲԻ ԱՌԱՋԻՆ
ՁԵՌՆԱՐԿԸ
|
|
19-20 Հոկտեմբերի շաբաթավերջին, Ս. Սարգիս եկեղեցւոյ (Տակլըսթըն, Նիւ Եորք) “Salt and Light” երիտասարդական խումբը իր առաջին առանձնացման ձեռնարկը կատարեց՝ Wading Riverի (Նիւ Եորք) Camp DeWolfeի մէջ։ Եղանակի գեղեցկութիւնն ու տեսարանները, ընկերական մթնոլորտն ու յայտագիրը նպաստեցին այս ձեռնարկի յաջողութեան։
Շաբաթավերջի ծրագիրը կ՚ընդգրկէր կրօնական դաստիարակութիւն, մարզանք, բնութեան մէջ զուարճալիք, երեկոյեան խարուկահանդէս, եւ անշուշտ՝ հայկական երաժշտութիւն ու պար։
Ս. Պատարագի ներկայացում ու բացատրութիւն կատարուեցաւ։ Իւրաքանչիւր համադրող մէկ բաժին ստանձնած էր։ Համադրողներն ու Նարեկ քհնյ. Թրթռեան կատարեցին բոլոր խորհրդանիշերուն բացատրութիւնը՝ եկեղեցւոյ ճարտարապետութենէն մինչեւ պատարագիչի զգեստաւորումը ու Հաղորդութեան իմաստը եւ Պատարագի շարականներն ու աղօթքները։ Խօսուեցաւ նաեւ եկեղեցական պատշաճ վարուելակերպի մասին։ Այս բոլորը առիթը տուաւ զանազան քննարկումներու, որոնք տեւեցին մինչեւ Շաբաթ երեկոյ։ Բացատրութիւնները միահիւսուած էին քայլարշաւով՝ բնութեան ծոցին մէջ, եւ զանազան մարզական խաղերով։
Ընթրիքէն ետք, խարոյկի շուրջ, «Կիլիկիա» երգի խօսքերն ու երաժշտութիւնը սորվեցան բանակումի մասնակցողները։ Աւելի ուշ, բոլորը հաւաքուեցան գլխաւոր սրահին մէջ՝ պարելով, ընկերական շրջանակներ կազմելով եւ տարբեր խաղեր խաղալով։
Կիրակի օր, նախորդ օրուան սորվածները գործնական կիրարկումը տեսնելու համար, խումբը յատուկ Ս. Պատարագի մը մասնակցեցաւ՝ եկեղեցիի վերածուած սրահին մէջ։
|
|
«ՍԻԱՄԱՆԹՕ» ԼՍԱՐԱՆԸ ԿԸ ՍԿՍԻ 2 ՆՈՅԵՄԲԵՐԻՆ
|
|
Ազգային Ուսումնական Խորհուրդի «Սիամանթօ» լսարանին առաջին հանդիպումը տեղի պիտի ունենայ Շաբաթ, 2 Նոյեմբերին, ժամը 10:00էն 12:30, Ազգային Առաջնորդարանիս յարկէն ներս։
Հանդիպումները առայժմ կը շարունակուին ամիսը մէկ անգամ՝ ունենալով մասնագէտ հիւր դասախօսներ։ Դասընթացքին մասնակցողները պիտի հետեւին, պատմականին կողքին՝ այժմէական նիւթերու, ինչպէս միշտ, իրենց արմատներուն կողքին զիրենք կապելու նաեւ առօրեային։ Լսարանս միաժամանակ առիթ պիտի ըլլայ նոր ընկերներու ծանօթանալու։
Ազգ. Առաջնորդարանի որոշմամբ այս տարուան դասընթացքը անվճար է։
Տեղեկութիւններու եւ արձանագրութեան համար, հաճեցէք հեռաձայնել Ուսումնական Խորհուրդի գրասենեակի տնօրէնուհի Մարի Կիւլիւմեանին՝ 212-689-7231 թիւին։ Ել-նամակ՝
ANEC@armenianprelacy.org
։
|
|
Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Անոնց նամակներէն նմոյշներ կը ներկայացնենք՝ միայն անունները յիշելով, ինքնութիւնը գաղտնի պահելու համար։
Այս շաբթուան նամակը գրած է 8 տարեկան Էմման, որուն կը հովանաւորէ Մարիամ Գրիգորեանը։ Էմման կը պատմէ թէ ի՛նչ ըրած է այս ամառ։
|
|
Ինչպէս եմ անցկացրել ամառային արձակուրդները
Անցան ամառուայ ջերմ ու տաք հաճելի օրերը, իսկ աշնան սառը ու տխուր եղանակը ստիպում է յիշել անցած օրերը։
Սիրում եմ ամառը, որովհետեւ այդ ժամանակ ես ինձ լաւ եմ զգում, հագնում եմ թեթեւ, դրսում խաղում եմ որքան ցանկանամ, եւ գրեթէ ամէն օր մասնակցում միջոցառումների, հանդէսների, ընտանեկան հաւաքոյթների։
Երկար մտածելուց յետոյ ես որոշեցի ինքս կազմակերպել իմ ամառային առօրեան։ Խնդրեցի մայրիկիս մեր բակում փոքրիկ ճամբար պատրաստել։
Ընկերներիս օգնութեամբ շատ արագ կատարեցինք այդ աշխատանքը։ Շուտով մեզ մօտ եկան ուրիշ երեխաներ եւ ճամբարն սկսեց գործել։ Առաւօտեան յանձնարարութիւններ էինք ստանում, ծրագիր կազմում, իսկ երեկոյեան մեծ հանդիսատեսների ներկայութեամբ երգում, պարում, արտասանում էինք։ Յաճախ ընկերներով երազում էինք մեծանալ ու ճանապարհորդել Հայաստանի պատմական վայրերով, լինել թանգարաններում, բացօթեայ զուարճանքի ակումբներում, դիտել կինոնկարներ, լինել Երեւանի տեսարժան վայրերում։ Ուզում եմ շուտ մեծանալ ու ապրել հետաքրքիր կեանքով եւ շատ եմ ուզում, որ մայրիկս լինի առողջ ու միշտ ժպտայ...
Էմմա
|
|
Եթէ կ՚ուզէք Ազգ. Առաջնորդարանի ցուցակին մէջ սպասող որբ երեխայ մը հովանաւորել,
սեղմեցէք այստեղ
արագ ու դիւրին առցանց հովանաւորութեան համար։ Այլապէս, կրնաք Առաջնորդարանիս հետ կապուիլ ելեկտրոնային նամակով
(sophie@armenianprelacy.org)
կամ հեռաձայնով (212-689-7810)՝ դիմելով Սոֆիին։
|
|
ՀԱՅ ՄԱՄՈՒԼԻՆ ՆՈՒԻՐՈՒԱԾ ԳԻՏԱԺՈՂՈՎ
|
|
Անուշաւան Սրբազան Հայր՝ Հայ Մամուլի գիտաժողովի մասնակիցներու հետ
|
|
Շաբաթ, 26 Հոկտեմբերին, Նիւ Եորքի Ս. Լուսաւորիչ Մայր Եկեղեցւոյ մէջ տեղի ունեցաւ Ազգ. Առաջնորդարանի եւ «Հայրենիք» Հաստատութեան հովանաւորած մամուլի գիտաժողովը` Հայ Մամուլի Տարուան, «Հայրենիք»ի 120ամեակի եւ «Արմինիըն Ուիքլի»ի 85ամեակի առիթով: Մեսրոպ քհնյ. Լագիսեանի բարի գալուստի խօսքէն ետք, խօսք առին Արեւելեան թեմիս առաջնորդ՝ Գերշ. Տ. Անուշաւան արք. Դանիէլեան, Հ.Յ.Դ. Արեւելեան ԱՄՆի անդամ՝ Խաժակ Մկրտիչեան, «Հայրենիք» շաբաթաթերթի խմբագիր՝ Զաւէն Թորիկեան եւ «Արմինիըն Ուիքլի»ի փոխ խմբագիր՝ Լիզա Առաքելեան:
Ազգ. Առաջնորդարանի դիւանապետ՝ դոկտ. Վարդան Մատթէոսեան զեկուցում մը կարդաց, ուր անդրադարձաւ մամուլի եւ ելեկտրոնային միջոցներու փոխյարաբերութեան, մամուլի դերին՝ լեզուի եւ ինքնութեան առնչութեամբ, եւ մամուլի ու հայկական պահանջատիրութեան կապին: Կլոր սեղաններ վարեցին Ռուբէն Ճանպազեան («Արմինիըն Ուիքլի»ի նախկին խմբագիր) եւ Վահագն Գարագաշեան (Մոնթրէալ «Հորիզոն» շաբաթաթերթի խմբագիր), մասնակցութեամբ՝ Ճորճի-Անն Օշականի («Արմինիըն Ուիքլի»ի նախկին խմբագիր), Արամ Արքունի («Արմինիըն Միրրըր-Սփէքթէյթըր»ի փոխ խմբագիր), դոկտ. Արա Սանճեանի (Միշիկըն-Տիրպըրն համալսարանի Հայկական Հետազօտութեան Կեդրոնի տնօրէն), դոկտ. Խաչիկ Մուրատեանի («Արմինիըն Ուիքլի»ի նախկին խմբագիր) եւ Վրէժ-Արմէն Արթինեանի («Հորիզոն»ի նախկին խմբագիր): Ճորճ Աղճայեան կատարեց «Հայրենիք»ի այսօրուան իրավիճակին մասին ներկայացում մը։
|
|
ՄԱՐԻԱ ԵԱՔՈՊՍԸՆ (ծնունդ՝ 6 Նոյեմբեր,
1882)
|
|
Մարիա Եաքոպսըն՝ Լիբանանի մէջ եւ Քարէն Եփփէ՝ Սուրիոյ մէջ։ Երկու դանիացիներ՝ զանազան պաշտօնակիցներու մէջ, որոնք մայրերու դեր կատարեցին ցեղասպանութեան վերապրող որբերուն, անձնուիրաբար իրենց կեանքը նուիրաբերելով անոնց։ Անոնք նաեւ կենդանի վկայութիւն դարձան՝ 1915ի իրադարձութիւններուն մասին։
Եաքոպսըն ծնած էր կեդրոնական Դանիոյ Սիմ քաղաքին մէջ, 6 Նոյեմբեր 1882ին։ Մանկութեան տարիներուն, ապրած է Հորսենս քաղաքը՝ երկրի արեւելեան ծովեզերքին վրայ, իր ծնողներուն հետ։ Համիտեան ջարդերուն մասին իմացած է դանիական մամուլէն։ 1898ին անգլիացի ֆեմինիստ գործիչ Ճեսի Փէն-Լուիս ժամանած է Դանիա, օժանդակելով Կա
նանց
Ա
ռա
քե
լու
թեան
Աշ
խա
տող
ներ (KMA՝ դանիերէն սկզբնատառերով) կազմակերպութեան հիմնադրութենէն երկու տարի ետք։
Նոր կազմակերպութիւնը հովանաւորած է Մշոյ, Վանի, Մարաշի եւ Խարբերդի գերմանական որբանոցներուն մէջ ապրող հայ որբերուն։ Հիւանդապահուհիի դասընթացքներ աւարտելէ ետք, 1906ին Մարիա Եաքոպսըն KMAի անդամ դարձած է։ Յաջորդ տարի մեկնած է Խարբերդ՝ իբրեւ միսիոնար։ Հիւանդանոց տնօրէնուհի նշանակուած է եւ կարճ ժամանակով հայերէն սորված։ Սկսած է գրել իր մեծարժէք օրագրութիւնը Սեպտեմբեր 1907ին եւ շարունակած է յաջորդ տասներկու տարիներուն ընթացքին։
Մեծ Եղեռնի տարիներուն, Եաքոպսըն իր օրագրութեան մէջ ցնցիչ վկայութիւններ բերած է՝ տեղահանութեան բացայայտ նպատակին, տարագիրներու անմարդկային պայմաններուն եւ թրքական ջարդարարական քաղաքականութեան մասին։ Այս տարիներուն, ան երեք որբեր որդեգրած է։
Ա. Աշխարհամարտէն ետք, Մերձաւոր Արեւելքի Նպաստամատոյցի աշխատողներու աջակցութեամբ, Մարիա Եաքոպսըն հաւաքած է աւելի քան 3.600 թափառական որբեր, որոնց մեծամասնութիւնը վարակիչ հիւանդութիւններէ կը տառապէր եւ կմախքի վերածուած էր։ 1919ին Օսմանեան Կայսրութիւնը ձգած է՝ որբերէն հիւծախտէ վարակուելու պատճառով։ Դանիա վերադառնալէ ետք, հրաւիրուած է Միացեալ Նահանգներ, ուր ջարդերու մասին հրապարակային դասախօսութիւններ տուած եւ որբերու համար դրամ հաւաքած է։ Փորձած է Խարբերդ վերադառնալ 1920-1921ին, բայց անոր մուտքը Օսմանեան Կայսրութիւն արգիլուած է։ Այնուհետեւ, մեկնած է Լիբանան, ուր շարունակած է իր գործունէութիւնը։
Մեծ թիւով որբեր տեղափոխած է Պէյրութ, Յունուար 1922ին, ուրիշ դանիացի միսիոնարուհիի մը՝ Քարէն Մարի Փեթերսընի հետ։ Վեց ամիս ետք, Կիլիկիայէն 208 որբերով հաստատուած է Զուք Միխայիլ՝ Ժպէյլի եւ Պէյրութի միջեւ, որ դարձած է KMAի առաջին որբանոցը։ Աւեի ուշ, Սայտա անցնելէ ետք, 1928ին Ժպէյլի մէջ KMAն Մերձաւոր Արեւելքի Նպաստամատոյցէն գնած է տեղւոյն հայկական որբանոցի շէնքը։ Հոն հաստատուած է դանիական «Թռչնոց բոյն» որբանոցը։ Իր կարգավիճակով, «Թռչնոց բոյնը» աւելի դպրոց էր, քան որբանոց, քանի որ հոն կը գործադրուէր լիբանանեան հանրային դպրոցներու ծրագիրը՝ տարբեր արհեստներու զուգընթաց ուսուցումով։
Որբերը Մարիա Եաքոպսընը կը կոչէին՝ «Մամա Եաքոպսըն»։ Ան յաճախ Աստուածաշունչը հայերէնով կը կարդար անոնց։ Ամուսնացած է հայ ատամնաբոյժի մը հետ։
Դանիացի միսիոնարուհիին մարդասիրական գործունէութիւնը արժանացած է իր հայրենիքի գնահատանքին։ Ստացած է Դանիոյ ոսկէ մետալը 1945ին, հանդիսանալով երկրի առաջին կինը, որ այդ բարձրագոյն պարգեւին արժանացած է։ 1954ին լիբանանեան կառավարութիւնը պարգեւած է պատուոյ ոսկէ մետալը՝ հայ համայնքին իր ծառայութեան ու նուիրումին համար։
Մարիա Եաքոպսըն մահացած է 6 Ապրիլ, 1960ին։ Ըստ անոր կտակին, թաղուած է «Թռչնոց բոյն»ի շրջափակին մէջ։ Անոր օրագրութիւնը, զոր ան գաղտնաբար հանած էր Թուրքիայէն, հայերէնի թարգմանուած ու երկլեզու՝ դանիերէն ու հայերէն հրատարակութեամբ լոյս տեսած է՝ 1979ին։ Անգլերէն թարգմանութիւնը լոյս տեսած է 2001ին։ Եաքոպսընի կիսանդրին զետեղուած է Գալիֆորնիոյ մէջ, իսկ Իջեւան քաղաքի (Հայաստան) մանկապարտէզ մը անոր անունը կը կրէ։
|
|
Սեղմեցէք այստեղ՝
կարդալու համար Մարիա Եաքոպսընի մասին յուշագրութիւն մը, որ սկզբնապէս հրատարակուած է “Outreach”ի Փետրուար 1993ի թիւին մէջ, ու ապա վերատպուած՝ ընթերցողներու պահանջով, Ապրիլ 1996ի թիւին մէջ։
|
|
ԴԱՇՆԱԿԱՀԱՐՈՒՀԻ ԿԱՐԻՆԷ ՊՕՂՈՍԵԱՆ՝ ԳԱՌՆԸԿԻ ՀՈԼԻ ՄԷՋ
|
|
Երկուշաբթի, 4 Նոյեմբերին, համերգային դաշնակահարուհի Կարինէ Պօղոսեան կը վերադառնայ Քառնըկի սրահի «Զանգել» սրահ՝ նշելու իր նոր «Ռախմանինով եւ Ստրավինսկի» ձայնասկաւառակի հրապարակումը: Համերգին կը ներկայացուին թէ՛ այդ երաժիշտներուն եւ թէ այլոց գործեր, իսկ համերգէն ետք տեղի կ՚ունենայ ձայնասկաւառակի մակագրումը:
Կ. Պօղոսեան 2004ին Առաջնորդարանի տարեկան «Միւզիքըլ Արմինիա» համերգին մասնակցող արուեստագէտներէն մէկն էր՝ Քառնըկիի «Ուէյլ» սրահին մէջ։ Մրցանակակիր դաշնակահարուհին լայն գովասանքի արժանացած է իր կատարած գործերուն խորքը թափանցելու իր կարողութեան համար: Տոմսերը կարելի է ձեռք ձգել հեռաձայնելով Carnegie Charge՝ 212-247-7800 թիւին:
|
|
Այս լուսանկարը առնուած է 24 Ապրիլ, 1990ին Վըրճինիայի Արլինկթըն գերեզմանատան “Argonne Cross” յուշարձանին առջեւ։ Հայոց Ցեղասպանութեան 75ամեակին առիթով, Արլինկթըն գերեզմանատան մէջ քանի մը արարողութիւններ տեղի ունեցան, որոնց շարքին՝ յիշեալ յուշարձանին առջեւ, որ նուիրուած է ամերիկացի զինուորականներուն, որոնք մահացած են Ֆրանսայի մէջ, կռուելով՝ Ա. Աշխարհամարտի ընթացքին, յատկապէս՝ 26 Սեպտեմբեր-11 Նոյեմբեր, 1918ի Միւս-Արկոն յարձակման ժամանակ։ Յուշարձանը կանգնեցուած է 13 Նոյեմբեր, 1923ին։ Մեսրոպ արք. Աշճեան խաչին առջեւն է՝ ղեկավարելով եկեղեցական դասը, հոգեհանգստեան ժամանակ։ (Նկարը՝ Հարրի Նալչայեան, «Ուաշինկթըն Փոսթ»)։
|
|
ՆԱՄԱԿՆԵՐ ԵՒ ԹՂԹԱԿՑՈՒԹԻՒՆՆԵՐ
|
|
Հաճոյքով կ՚ընդունինք ու կը հրատարակենք խմբագրութեան ուղղուած ձեր անգլերէն կամ հայերէն նամակները, որոնք
crossroads@armenianprelacy.org
հասցէին պէտք է յղուին։
“Crossroads”ին նիւթեր յանձնելու պայմանաժամը՝ Չորեքշաբթի կէսօր է։
|
|
ՆԻՒ ԵՈՐՔ ԹԱՅՄԶ — «Հայոց Ցեղասպանութեան Ուշացած ճանաչում մը»
|
|
Երէկուան Նիւ Եորք Թայմզ թերթը հրատարակեց յօդուած մը Սամանթա Փաուըրի ստորագրութեամբ՝
ԱՄՆի Գոնկրէսի Ներկայացուցիչներու Տան կողմէ
Հայոց Ցեղասպանութեան ճանաչման առթիւ։ Յօդուածը ամբողջութեամբ կրնաք կարդալ
այստեղ
։
|
|
1-2 Նոյեմբեր
—Ս. Ստեփանոս եկեղեցւոյ (Ուոթըրթաուն, Մասաչուսեթս) տարեկան 63րդ պազար՝ Հայ Մշակութային եւ Կրթական Կեդրոնին մէջ, 47 Nichols Ave, Watertown, MA։
1-3 Նոյեմբեր
—Ս. Վարդանանց եկեղեցի (Ռիճֆիլտ, Նիւ Ճըրզի)։ Տարեկան կերակուրի փառատօն։ Շաբաթ օր՝ Օննիկ Տինքճեանի ելոյթ։ Տեղեկութիւններ համար՝ 201-943-2950։
9-10 Նոյեմբեր
—Armenian Fest 2019։ Փրաւիտընսի (Ռոտ Այլընտ) Սրբոց Վարդանանց եկեղեցւոյ տարեկան ճաշերու փառատօն, Rhodes-on-the-Pawtuxet, 60 Rhodes Place, Cranston։ Շաբաթ՝ կէսօրէն մինչեւ երեկոյեան ժամը 9:00, Կիրակի՝ կէսօրէն մինչեւ երեկոյեան ժամը 7:00։ Տեղեկութիւններու համար՝ 401-831-6399։
10 Նոյեմբեր
—Գոհաբանութեան Օրուան ճաշկերոյթ, կազմակերպութեամբ՝ ՀՕՄի «Մայր» մասնաճիւղին կողմէ (Նիւ Եորք), ի նպաստ՝ Արցախի Մեծ Թաղերի ՀՕՄի մանկապարտէզին։ Byblos ճաշարան, 80 Madison Avenue, New York City, կէսօրէ ետք ժամը 2:00էն մինչեւ 5:30։ Տեղեկութիւններու համար՝ Մինա (917-741-2966) եւ Անայիս (917-225-4326).
16 Նոյեմբեր
—Ս. Ստեփանոս ամէնօրեայ վարժարանի 35ամեակի տօնակատարութիւն, թեմիս առաջնորդ՝ Գերշ. Տ. Անուշաւան արք. Դանիէլեանի հովանաւորութեամբ, Westin Waltham պանդոկին մէջ։ Ընդունելութիւն՝ երեկոյեան ժամը 6:30ին, ընթրիք եւ յայտագիր՝ ժամը 7:30ին։ Տոմսերու առցանց ապահովում՝
https://mkt.com/ssaes
։
16 Նոյեմբեր
—Նիւ Ինկլընտի սարկաւագներու շրջանային սեմինար (Holy Trinity Church, 635 Grove Street, Worcester, Massachusetts) առաւօտեան ժամը 9:00էն մինչեւ երեկոյեան ժամը 5:00, Արեւելեան թեմի շրջանի եկեղեցիներուն մէջ ծառայող բոլոր սարկաւագներուն եւ կիսասարկաւագներուն համար։
17 Նոյեմբեր
—Ազգ. Առաջնորդարանի Գոհաբանութեան ճաշկերոյթ՝ Terrace on the Parkի մէջ, կէսօրէ ետք ժամը 2:00ին։ Պիտի մեծարուի Առաջնորդարանի «Մեծն Ներսէս» բարեսիրական կազմակերպութեան 26 տարուան աշխատանքը Հայաստանի ու Արցախի մէջ։
23 Նոյեմբեր
—
Գոհաբանութեան Օրուան ընթրիք, կազմակերպութեամբ՝ Ուայթընզվիլի Ս. Աստուածածին եկեղեցւոյ Կիրակնօրեայ վարժարանի, կէսօրէ ետք ժամը 5:00ին՝ եկեղեցւոյ սրահին մէջ։ Տեղեկութիւններու/տեղ ապահովելու համար՝ 508-234-3677։
5 Դեկտեմբեր-
«Կոմիտաս-150» գիրքի ներկայացում, հրատարակութիւն՝ Ազգ. Առաջնորդարանի։ Մանրամասնութիւնները՝ յետագային։
7 Դեկտեմբեր—
Ս. Աստուածածին եկեղեցւոյ (Ուայթընզվիլ, Մասաչուսեթս) տարեկան պազար (Pleasant Street Christian Reform Church Hall, 25 Cross Street, Whitinsville), առաւօտեան ժամը 10:00էն մինչեւ կէսօրէ ետք ժամը 4:30։ Ընթրիքը պիտի սպասարկուի ժամը 11:30ին։
19 Դեկտեմբեր—
Մայքլ Փափազեանի “The Doctor of Mercy: The Sacred Treasures of St. Gregory of Narek” գիրքի (The Liturgical Press) նոր հրատարակութիւն։ Ներկայացումը տեղի կ՚ունենայ երեկոյեան ժամը 7:00ին Ազգ. Առաջնորդարանին մէջ (138 E. 39th Street, New York City), հեղինակին ներկայութեամբ։
31 Դեկտեմբեր
—Ս. Վարդանանց եկեղեցի (Ռիճֆիլտ, Նիւ Ճըրզի)։ Նոր Տարուան ընթրիք-պարահանդէս։
15 Մարտ, 2020
— Ազգ. Առաջնորդարանի 37րդ տարեկան «Միւզիքըլ Արմինիա» համերգ, կէսօրէ ետք ժամը 2:00ին, Carnegie Hallի Weill համերգասրահին մէջ (West 57th Street at Seventh Avenue, New York City)։
28 Մարտ, 2020
—“Faith Building Women 2020 Symposium”։ Աստուածաշունչի մէջ կիներու ներկայութիւնը ընդգծելու կոչուած համագումար մը՝ Ս. Պետրոս եկեղեցւոյ չափահասներու քրիստոնէական դաստիարակութեան բաժանմունքի կազմակերպութեամբ։ Համագումարը տեղի պիտի ունենայ Ս. Երրորդութիւն եկեղեցւոյ մէջ (Գեմպրիճ, Մասաչուսեթս)։ Գլխաւոր բանախօսներ՝ դոկտ. Ռոպերթա Ըրվայն եւ Արփի Նագաշեան։
13-16 Մայիս, 2020
—Արեւելեան թեմի Ազգային Երեսփոխանական Ժողով, հիւրընկալութեամբ՝ Ֆիլատելֆիայի Ս. Գրիգոր Լուսաւորիչ եկեղեցւոյ։ Հոգեւորականաց համագումարը պիտի սկսի Չորեքշաբթի, 13 Մայիսին, իսկ Երեսփոխանական Ժողովը՝ Հինգշաբթի, 14 Մայիսին։ Ժողովը իր աւարտին կը հասնի Շաբաթ, 16 Մայիսին։
|
|
Follow us on Social Media
|
|
The Armenian Prelacy
Tel: 212-689-7810 ♦ Fax: 212-689-7168 ♦ Email: email@armenianprelacy.org
|
|
|
|
|
|
|
