ԹԵՄԻՍ ԱՌԱՋՆՈՐԴ ԳԵՐՇ. Տ. ԱՆՈՒՇԱՒԱՆ ԱՐՔ. ԴԱՆԻԷԼԵԱՆ

ՆԵՐԿԱՅԱՑՈՒՑԻՉՆԵՐՈՒ ՏԱՆ ԲԱՑՄԱՆ ԱՂՕԹՔԸ ԿԸ ԿԱՏԱՐԷ

Թեմիս բարեջան առաջնորդ՝ Գերշ. Տ. Անուշաւան արք. Դանիէլեան, հիւր հոգեւորականն էր, որ Միացեալ Նահանգներու Ներկայացուցիչներու Տան բացման աղօթը կատարեց Երկուշաբթի, 15 Յուլիսին։ Աղօթքը ուղղակի սփռուեցաւ C-SPAN կայանէն եւ HouseLive.gov կայքէջէն։ Առաջնորդ Սրբազան Հօր հրաւէրը յղուած էր Գալիֆորնիոյ 14րդ վարչաշրջանի ներկայացուցիչ` հայազգի Ճէֆի Սփայըրի կողմէ։  Դիտեցէ՛ք տեսերիզը այստեղ։

Անուշաւան արքեպիսկոպոսի կատարած աղօթքը.

«Երկնաւոր Հայր, Քու զաւակներդ՝ ժողովրդավարութեան ու ազատութեան այս սրբավայրին մէջ հաւաքուած, Քեզի շնորհակալութիւն կը յայտնեն՝ տեսանելի ու անտեսանելի օրհնութիւններու Քու Նախախնամական հոգատարութեան համար։ Առաջնորդէ այս վսեմ Ժողովը Քու Ոգիով՝ անոր վստահուած առաքելութիւնը իրագործելու համար։ Շնորհէ Քու իմաստութիւնդ ու սէրդ այս Ժողովի անդամներուն, որպէսզի հետեւին Քու կամքիդ եւ կատարեն իրենց հիանալի պարտականութիւնը ազատներու երկրին եւ աշխարհին հանդէպ։ Թող արդարութիւնն ու խաղաղութիւնը բխին անոնց որոշումներէն, ինչպէս նաեւ բարգաւաճումն ու հրճուանքը տիրեն Մարդկութեան վրայ։ Թող այս ու ամէն օր նշուի որպէս «գլուխ գործոց» բոլոր անոնց կեանքին մէջ, որոնք ժողովուրդին կը ծառայեն Քու փառքիդ համար, որպէսզի արժանի ըլլան լսելու Քու կանչդ։ “Եկէ՛ք, Հօրս կողմէ օրհնեալներ, եւ ժառանգեցէք այն արքայութիւնը, որ ձեզի համար աշխարհի սկիզբէն պատրաստուած է” ( Մատթէոս 25:34)։ Ամէն»։



Անուշաւան արքեպիսկոպոս ,  Տ. Սարգիս քհնյ. Ագթաւուգեան, Ազգ. Վարչութեան ատենադպրուհի Սիւզըն Չթճեան-Էրիքսըն, Ի Պաշտպանութիւն Քրիստոնեաներու կազմակերպութեան գործադիր տնօրէն Սթիվըն Հաուըրտ եւ Ամերիկայի Հայ Դատի Յանձնախումբի անդամներ՝ ներկայացուցիչ Ճէքի Սփայըրի գրասենեակին մէջ, աղօթքէն առաջ

Քափիթոլի աստիճաններուն վրայ՝ Հայ Դատի Յանձնախումբի ամառնային փորձաշրջանի հետեւողներու հետ

 

ՄԻՋ-ԵԿԵՂԵՑԱԿԱՆ ԱՐԱՐՈՂՈՒԹԻՒՆ ՔԱՓԻԹՈԼԻ ՄԷՋ

Երկուշաբթի, 15 Յուլիսին եւս, Ի Պաշտպանութիւն Քրիստոնեաներու (IDC) կազմակերպութեան հրաւէրով, Անուշաւան արքեպիսկոպոս միացաւ Միջին Արեւելքի քրիստոնեայ առաջնորդներու եւ ամերիկացի հաւատքի ղեկավարներու՝ ոչ-կուսակցական աղօթք կատարելու ի խնդիր՝ Միջին Արեւելքի քրիստոնեաներուն, որոնք կը շարունակեն «հալածանքի եւ նախապաշարումի» զոհերը ըլլալ։ Արարողութեան մասնակցեցան նաեւ Արեւելեան թեմի առաջնորդ՝ Գերշ. Տ. Մուշեղ արք. Մարտիրոսեան եւ Արեւմտեան թեմի առաջնորդական փոխանորդ՝ Գերպ. Տ. Սահակ Ծ. վրդ. Եմիշեան։ Արարողութիւնը, որ կը կոչուէր «Վաղ քրիստոնէական եկեղեցին. միջ-եկեղեցական աղօթք մը Միջին Արեւելքի լեզուներով», կ՚ընդգրկէր՝ արաբերէնը, արամէերէնը, հայերէնը, ղպտերէնն ու յունարէնը։

Ի Պաշտպանութիւն Քրիստոնեաներու (IDC) կազմակերպութիւնը հիմնուած է 2014ին՝ Միջին Արեւելքի մէջ քրիստոնէութեան վտանգուածութիւնը ընդգծելու համար, ինչպէս եւ այն փաստը, որ պատմական քրիստոնեայ համայնքներու վերապրումը անհրաժեշտութիւն մըն է՝ բոլոր ազգերուն եւ ժողովուրդներուն համար։ Կազմակերպութեան նպատակն է՝ Միջին Արեւելքի քրիստոնեաներու միասնականութիւնը, ինչպէս նաեւ ամերիկացի քրիստոնեաներու միութիւնը՝ ի պաշտպանութիւնը իրենց միջին արեւելքցի կրօնակիցներուն։   

Մեծի Տանն Կիլիկիոյ Կաթողիկոս Արամ Ա. բազմիցս հաստատած ու գրած է, որ քրիստոնեաները ո՛չ նորեկներ են եւ ո՛չ ալ դրսեցիներ շրջանին մէջ, եւ ո՛չ ալ պէտք է երկրորդ կարգի քաղաքացիներ նկատուին, քանի որ անոնց պատմութիւնը խոր արմատներ ունի Միջին Արեւելքի մէջ։ 



Անուշաւան արքեպիսկոպոս՝ Արեւմտեան թեմի առաջնորդ Մուշեղ արք. Մարտիրոսեանի, Արեւելեան թեմի առաջնորդական փոխանորդ Սահակ Ծ. վրդ. Եմիշեանի, Ս. Խաչ եկեղեցւոյ հոգեւոր հովիւ Սարգիս քհնյ. Ագթաւուգեանի, Արեւելան թեմի Ազգային Վարչութեան անդամներու, Ամերիկայի Հայ Դատի Յանձնախումբի անդամներու եւ «Լէօ Սարգիսեան» ամառնային փորձաշրջանի հետեւողներու հետ՝ Ուաշինկթընի Քափիթոլի շէնքին մէջ։

ՀԱՅԱՍՏԱՆԻ ԱԶԳԱՅԻՆ ԺՈՂՈՎԻ ԽՕՍՆԱԿ

ԱՐԱՐԱՏ ՄԻՐԶՈՅԵԱՆԻ ՀԵՏ ՀԱՆԴԻՊՈՒՄ

Երկուշաբթի, 15 Յուլիսին, Անուշաւան  արքեպիսկոպոս  այցելութիւն մը տուաւ Ուաշինկթընի հայկական դեսպանատունը, ընկերակցութեամբ Արեւմտեան թեմի առաջնորդ Գերշ. Տ. Մուշեղ արք. Մարտիրոսեանի, Կիլիկիոյ Կաթողիկոսութեան Ազգ. Կեդր. Վարչութեան անդամ տոքթ. Տրդատ Մանկիկեանի եւ Պեթեստայի (Մէրիլէնտ) Ս. Խաչ եկեղեցւոյ հոգեւոր հովիւ Տ. Սարգիս քհնյ. Ագթաւուգեանի։  Անոնք հանդիպեցան Հայաստանի Հանրապետութեան Ազգային Ժողովի խօսնակ Արարատ Միրզոյեանին, խորհրդարանական «Իմ քայլը» խմբակցութեան պետ Լիլիթ Մակունցին եւ ԱՄՆի մօտ Հայաստանի դեսպան Վարուժան Ներսէսեանին։

Այցելուները իրենց ցաւակցութիւնները յայտնեցին ԱՄՆի մօտ Հայաստանի նախկին դեսպան Արման Կիրակոսեանի անժամանակ մահուան  առիթով

ԱՌԱՋՆՈՐԴ ՍՐԲԱԶԱՆ ՀԱՅՐԸ Կ՚ԸՆԴՈՒՆԻ

ՀԱՅԱՍՏԱՆԻ ՓՈԽ-ՎԱՐՉԱՊԵՏ՝ ՏԻԳՐԱՆ ԱՒԻՆԵԱՆԸ 

Չորեքշաբթի , 17 Յուլիսի առաւօտեան , Հայաստանի Հանրապետութեան պաշտօնական պատուիրակութիւն մը այցելեց Նիւ Եորքի Ս . Լուսաւորիչ Մայր Եկեղեցին , գլխաւորութեամբ փոխ-վարչապետ՝ Տիգրան Աւինեանի , որուն մաս կը կազմէին անոր գրասենեակի ղեկավարը՝ Վարագ Սիսեռեան , խորհրդական՝ Զարուհի Մաթեւոսեան , եւ Կայուն Զարգացման Նպատակների Ազգային Նորարարական Կենտրոնի վարիչ՝ Ստեփան Մարգարեան։ Պատուիրակութեան կ՚ընկերանար ՄԱԿի մօտ Հայաստանի մշտական ներկայացուցիչ՝ Մհեր Մարգարեան։ Հիւրերը ընդունուեցան Գերշ . Տ .  Անուշաւան   արք .  Դանիէլեանին կողմէ , որուն կ՚ընկերանային Ս . Լուսաւորիչ Մայր Եկեղեցւոյ հոգեւոր հովիւ՝ Տ . Մեսրոպ քհնյ . Լագիսեան , Ս . Սարգիս եկեղեցւոյ հոգեւոր հովիւ՝ Տ . Նարեկ քհնյ . Թրթռեան , Ազգ . Առաջնորդարանի դիւանապետ՝ դոկտ . Վարդան Մատթէոսեան , Ս . Լուսաւորիչ Մայր Եկեղեցւոյ հոգաբարձութեան փոխատենապետ՝ Բարշ . Տ . Շանթ Ա . սրկ . Գազանճեան , եւ հոգաբարձութեան այլ անդամներ։



Մայր Եկեղեցին կարճ այցելութենէ մը եւ աղօթքէ մը ետք , այցելուները նախաճաշի նիստ մը ունեցան « Ճոն Բաշալեան » սրահին մէջ։ Առաջնորդ Սրբազան Հայրը բարի գալուստի խօսքով ընդունեց այցելուները , անդրադառնալով Եկեղեցւոյ դերին՝ մշտապէս կանգնելով Հայաստանի եւ հայ ժողովուրդի կողքին։ Փոխ-վարչապետ Աւինեան խօսեցաւ Հայաստանի եւ Սփիւռքի յարաբերութիւնները նոր որակի հասցնելու կարեւորութեան մասին։ Նախաճաշի ընթացքին , յարգելի հիւրը պատասխանեց զանազան հարցումներու , առիթ տալով շահեկան խօսակցութեան ։

ՏԱԹԵՒԱՑԻՆԵՐԸ ԻՐԵՆՑ ԻՍԿ ԽՕՍՔԵՐՈՎ

30 Յունիսէն մինչեւ 7 Յուլիս, 13էն 18 տարեկան 40 պատանիներ մասնակցեցան «Ս. Գրիգոր Տաթեւացի» 33րդ ամառնային քրիստոնէական ուսմանց ծրագրին՝ St. Mary of Providence կեդրոնին մէջ, Էլվըրսըն, Փենսիլվանիա։ Ստորեւ կու տանք մասնակիցներէն քանի մը սրտաբուխ արտայայտութիւններ ծրագրի մասին:

Տաթեւ երթալը կեանքս փոխեց եւ սիրտս Աստուծոյ բանալու առիթ եղաւ։ Դասերը շատ ներշնչող են, եւ երբ կ՚ուսուցուի առաքինութիւններու եւ մոլութիւններու մասին, ինքնաքննութեան կ՚ենթարկես դուն քեզ եւ հաշուելով թէ ինչ առաքինութիւններ ունիս եւ ինչ մոլութիւններ, ինքնաճանաչման կը հասնիս։

– Կարօ Մինասեան (4րդ տարուան աշակերտ)

Հետաքրքրական էին դասերը եւ նիւթերը՝ հոյակապ։ Հոգեւոր հայրերը մեր հարցերուն պատասխանեցին։ Զուարճալի միջոցառումներուն բոլորը մասնակցեցան անխտիր։

– Աննա Թէքէեան (3րդ տարուան աշակերտ)

Տաթեւը հաճելի փորձառութիւն մըն էր։ Շատ բաներ, որոնք Կիրակնօրեայ դպրոցէն չի տար, հոս սորվեցայ։ Տարբեր շրջաններէ հայ քրիստոնեաներու հանդիպեցայ։ Բայց ամենէն կարեւորը՝ այս մէկ շաբթուան մէջ հաւատքս զօրացաւ։    

– Մարի Աշպահեան (2րդ տարուան աշակերտ)

Տաթեւը կեանքս դէպի աւելի լաւին ուղղեց ու փոխեց։ Անցնող երկու տարիներուն ընթացքին, քրիստոնէութեան եւ Հայ Առաքելական Եկեղեցւոյ մասին շատ բան սորվեցայ։ Նաեւ նաեւ նոր ընկերներ ունեցայ ու հանդիպեցայ երկրի տարբեր կողմերէ հոգեւորականներու։ Տաթեւը կեանքիս վրայ գեղեցիկ ազդեցութիւն ձգեց եւ անհամբեր կը սպասեմ յաջորդ տարուան։

– Մայքըլ Սիմոնեան (2րդ տարուան աշակերտ)

Տաթեւը շատ հաւասարակշռուած ծրագիր մը ունի, որ կը տարուբերի աղօթքի, ազատ ժամանցի եւ այլ միջոցառումներու միջեւ։ Շատ ուրախ եմ մասնակցելու որոշում տալուս, ու կը յուսամ որ յաջորդ տարի ալ կը վերադառնամ։

– Արփի Տօնոյեան (1ին տարուան աշակերտ)

Տաթեւը լաւ տեղ էր ընկերական կապեր հաստատելու եւ քրիստոնեայի առաքինութիւններուն մասին սորվելու։

– Անդրանիկ Թաթարեան (1ին տարուան աշակերտ)

«Տաթեւ»ի մասին ուրիշ տպաւորութիւններու համար (անգլերէն),  սեղմեցէք այստեղ։

ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ

ԿԻՐԱԿԻ, 21 ՅՈՒԼԻՍ

Զ. ԿԻՐԱԿԻ ՀՈԳԵԳԱԼՈՒՍՏԷՆ ԵՏՔ

ԲԱՐԵԿԵՆԴԱՆ ՎԱՐԴԱՎԱՌԻ ՊԱՀՔԻ

ԹՈՒՂԹ ՀՌՈՄԱՅԵՑԻՆԵՐՈՒՆ 11:13-24

Բայց ձեզի՝ հեթանոսներուդ կ’ըսեմ.- Հեթանոսներուն առաքեալ ըլլալու իմ պաշտօնովս կը պարծենամ, մտածելով որ թերեւս այս ձեւով ազգակիցներուս նախանձը գրգռեմ եւ յաջողիմ անոնցմէ ոմանք փրկել: Որովհետեւ, եթէ Աստուած զանոնք մերժեց, որպէսզի հեթանոս աշխարհը հաշտեցնէ իրեն հետ, կը նշանակէ թէ երբ վերստին ընդունի զանոնք՝ մեռելներու յարութիւնը տեղի պիտի ունենայ:

Թէ Աստուած վերստին պիտի ընդունի զանոնք՝ յստակ է, որովհետեւ երբ բերքին երախայրիքը Աստուծոյ ընծայուած է, կը նշանակէ թէ ամբողջը Աստուծոյ ընծայուած է. նոյնպէս, եթէ ծառին արմատները Աստուծոյ նուիրուած են, կը նշանակէ թէ ճիւղերն ալ Աստուծոյ նուիրուած են: Ճիշդ է որ այդ ճիւղերէն ոմանք կտրուեցան, եւ դուն՝ որ վայրի ձիթենի մըն էիր՝ անոնց տեղ պատուաստուեցար եւ այդ ձիթենիին արմատներէն եկող հարուստ աւիշը ըմպեցիր: Բայց մի՛ պարծենար եւ մի՛ արհամարհեր կոտրած ճիւղերը. մի՛ մոռնար որ դո՛ւն արմատներուն վրայ հաստատուած ես եւ ո՛չ թէ արմատները քու վրադ: Հիմա պիտի ըսես՝ «Աստուած այդ ճիւղերը կտրեց՝ զիս պատուաստելու համար»: Իրաւ է, անոնք՝ Հրեաները կտրուեցան, որովհետեւ չհաւատացին, եւ դուն՝ հեթանոսդ, հաւատալուդ համար արմատին վրայ հաստատուեցար. բայց մի՛ հպարտանար, այլ՝ վախցիր: Որովհետեւ եթէ Աստուած բուն ճիւղերուն չխնայեց, թերեւս քեզի երբեք չխնայէ: Տե՛ս թէ ո՛րքան բարի է Աստուած եւ խիստ՝ միաժամանակ: Խիստ է հաւատքի մէջ կործանածներուն հանդէպ եւ բարի՝ քեզի հանդէպ, պայմանաւ որ շարունակես անոր բարութեան արժանի մնալ. այլապէս դուն ալ պիտի կտրուիս: Նոյնպէս ալ, եթէ Հրեաները թողուն իրենց անհաւատութիւնը, կրկին պիտի պատուաստուին արմատին վրայ, որովհետեւ Աստուած կրնայ զանոնք վերստին պատուաստել: Եթէ դուն, որ իսկականին մէջ վայրի ձիթենի մըն էիր, կտրուեցար եւ պատուաստուեցար ընտանի ձիթենիին վրայ, որ քու բունդ չէր, որքա՜ն աւելի դիւրութեամբ պիտի պատուաստուին նոյն այդ ձիթենիին բնական ճիւղերը:

 

ՄԱՏԹԷՈՍԻ ԱՒԵՏԱՐԱՆ 14:13-21

Երբ Յիսուս Յովհաննէսի գլխատումը լսեց, առանձինը նաւակ մտնելով՝ այդտեղէն գնաց ամայի վայր մը: Շրջանի քաղաքներուն բնակիչները լսելով ասիկա, քալելով հետեւեցան իրեն: Երբ Յիսուս նաւակէն դուրս ելաւ, տեսաւ մեծ բազմութիւնը, գթաց անոնց վրայ եւ հիւանդները բժշկեց:

Երեկոյեան, իր աշակերտները մօտեցան իրեն եւ ըսին.

  – Ամայի տեղ ենք եւ ժամանակն ալ ուշ է. արձակէ՛ ժողովուրդը, որպէսզի երթան շրջակայ գիւղերը իրենց համար ուտելիք գնելու:

Յիսուս ըսաւ.

– Իրենք պէտք չունին երթալու: Դո՛ւք տուէք անոնց ուտելիքը:

Անոնք ըսին Յիսուսի.

– Հոս գրեթէ ոչինչ ունինք, բացի հինգ հացէ եւ երկու ձուկէ:

Յիսուս ըսաւ.

– Հո՛ս բերէք ատոնք:

Եւ հրամայեց որ ժողովուրդը նստեցնեն խոտին վրայ: Ապա առաւ հինգ հացը եւ երկու ձուկը, աչքերը երկինք բարձրացուց, օրհնեց, կտրեց հացերը եւ տուաւ աշակերտներուն, որոնք բաժնեցին ժողովուրդին: Բոլորն ալ կերան ու կշտացան. եւ աշակերտները աւելցած կտորները հաւաքելով՝ տասնըերկու սակառ լեցուցին: Իսկ ուտողները շուրջ հինգ հազար հոգի էին, կիներն ու մանուկները չհաշուած:

ՃՇ. ԸՆԹԵՐՑՈՒՄ

Եսայի 3:1-11



ՔՐԻՍՏՈՍԻ ՏԱՍՆԵՐԿՈՒ ԱՇԱԿԵՐՏՆԵՐԸ

ԵՒ Ս. ՊՕՂՈՍ՝ 13ՐԴ ԱՌԱՔԵԱԼԸ 

Շաբաթ, 20 Յուլիսին, Հայաստանեայց Եկեղեցին կը յիշատակէ Քրիստոսի տասներկու առաքեալներու եւ Ս ․ Պօղոսի տօնը, որ կը համարուի «տասներրորդ առաքեալ»ը։

Քրիստոս տասներկու առաքեալ ընտրեց, որպէսզի Իր Գործը շարունակէին եւ յորդորեց անոնց քարոզել եւ մկրտել հաւատացեալներ աշխարհի չորս ծագերուն (Մատթ 28։19-20)։ Տասներկու օգնականները «Առաքեալ» կոչեց (Ղուկ. 6։13, Մատթ. 3։14)։ Առաքեալ (apostle) բառը կու գայ յունարէն apostellein բառէն («առաքեալ»՝ հայերէնով)։ Առաքեալները իրենց կեանքը նուիրեցին ԽՕՍՔը (Բանը) տարածելու եւ իրենց վստահուած սուրբ առաքելութիւնը կատարելու։ Իրենց պարտականութիւնը պարզապէս ԽՕՍՔը փոխանցել չէր, այլ զայն գործադրութեան դնել, առօրեայի վերածել։

Պօղոս սկզբունքով թշնամի եւ հալածող էր քրիստոնէութեան։ Դամասկոսի ճամբուն վրայ տեսիլք մը ունեցաւ ու դարձի եկաւ, քրիստոնէութիւնը ընդունեց եւ նոր կրօնքի արագ սփռման պատճառ դարձաւ ինք անձամբ։ Նոր Կտակարանի մեծ մասը (Չորս Աւետարաններէն զատ) Պօղոս առաքեալի հեղինակութիւնն է։

Հայ Եկեղեցին առաքելականութեան եւ անոր յաջողութեան մէջ իր խոր արմատները ունի (Թադէոս եւ Բարթուղիմէոս), ահա անոր համար ալ կը կոչուի «առաքելական»: Առաքեալներն ու իրենց անմիջական յաջորդները (այդ շարքին եւ Հայ Եկեղեցին) պաշտպանեցին ուղղափառ հաւատքը եւ զայն բիւրեղեայ պահեցին:

«Անճառելի դրախտին աստէն տեսող եւ երրորդ երկնից ․ նըկատող բարձանց , խորոց բանալի ․ երեքտասան սուրբ առաքեալ Պօղոս հայր համատարած ․ բարեխօս լեր առ Քրիստոս»։



(Անճառելի դրախտը եւ երրորդ երկինքը այ աշխարհէն տեսնող, բարձունքները նկատող, խորութիւնները բացող Պօղոս տասնեւերրորդ սուրբ առաքեալ, հայր ընդհանրական, մեզի համար Տիրոջ մօտ ․․․ )

ԵՂԻՇԷ ՄԱՐԳԱՐԷՆ

Այսօր, Հինգշաբթի, 18 Յուլիս, Հայաստանեայց Եկեղեցին կը նշէ Եղիշէ մարգարէի տօնը։ Անոր կեանքն ու գործը արձանագրուած են Թագաւորներու Ա. եւ Բ. գիրքերուն մէջ։ Եղիշէ (եբր. «Աստուած փրկութիւն է») աշակերտ էր Եղիա մարգարէին, որ Աստուծոյ հրամանով պարզ գիւղացի մը՝ Եղիշէն, իր յաջորդը նշանակեց, այն ձեւով, ինչպէս Յիսուս շատ աւելի ուշ պիտի ընէր իր աշակերտներով՝ Գալիլիոյ մէջ։ Եղիշէ հրաշքներ գործեց հիւանդները առողջացնելով եւ մեռելները կենդանացնելով, տեսակ մը կանխագուշակում՝ Աւետարանի հրաշքներուն։ Ան կը պատգամէր իր հետեւորդներուն, որ վերադառնային կրօնական աւանդութեան եւ ընդունէին Աստուծոյ գերիշխանութիւնը կեանքի բոլոր երեսներուն վրայ։ Երբ ան հիւանդները կը բժշկէր, կ՚ուզէր փաստել Աստուծոյ իշխանութիւնը կեանքի ու մահուան վրայ, իսկ երբ կ՚օգնէր մարտի պահուն, կ՚ուզէր փաստել Աստուծոյ իշխանութիւնը ազգերու վրայ։ 

ԲԱՐԵԿԵՆԴԱՆ ՎԱՐԴԱՎԱՌԻ ՊԱՀՔԻ

Այս Կիրակի, 22 Յուլիսին, Հոգեգալստեան յաջորդող վեցերորդ Կիրակին, Այլակերպութեան Տօնի Բարեկենդանն է –հնգօրեայ (Երկուշաբթիէն Ուրբաթ) պահեցողութեան շրջանը, որ կը նախորդէ Այլակերպութեան Տօնին կամ Վարդավառին, զոր պիտի տօնենք Կիրակի, 28 Յուլիսին։ 

ԱՐՄԷՆ ԱՐՄԷՆԵԱՆ (մահ՝ 20 Յուլիս, 1965)

ԺԹ. դարու վերջաւորութեան եւ Ի. դարու սկզբնաւորութեան, հայ թատրոնի պատմութիւնը կերտեց անուններու համաստեղութիւն մը, որուն աստղերէն մէկն էր Արմէն Արմէնեանը։

Բուն անունով՝ Արմէն Իփէկեան, ան Սփիւռքի յայտնի թատերական եւ հանրային գործիչ՝ Գասպար Իփէկեանի (1883-1952) աւագ եղբայրն էր։ Ծնած է Կ. Պոլիս, 10 Սեպտեմբեր 1871ին։ Ուսումը ստացած ծննդավայրի տարբեր դպրոցներու մէջ՝ Բերայի տարրական դպրոցը, Բրայի գերմանական դպրոցը, Գատըքէօյի Մխիթարեան միաբանութեան գիշերօթիկ դպրոցը, Օրթագիւղի դպրոցը եւ, վերջապէս, նորաբաց Կեդրոնական վարժարանը։

Նորաւարտ, Պետրոս Ադամեանի տաղանդը զինք հիացուցած է 1889-1890ին։ Պայքարած է ընտանիքին դէմ, որ դէմ էր անոր թատերական ու դերասանական հետաքրքրութիւններուն, եւ ի վերջոյ, անոնց հաւանութիւնը ստացած՝ ընտանեկան անունը չգործածելու պայմանով։ Այսպէս ծնած է Արմէն Արմէնեան անունը, եւ նորաբողբոջ դերասանը իր առաջին դերը ստանձնած է Ալեքսանդր Տիւմա որդիի «Կամելիազարդ տիկինը»ի մէջ։

Հայրը զինք ղրկած է Համպուրկ (Գերմանիա), 1894ին, որպէսզի ընտանիքի առեւտրական գործերով զբաղի։ Միջոցին, ան նաեւ դիտած է իտալացի հռչակաւոր դերասանուհի Էլէոնորա Տիւզէի, իսկ աւելի ուշ՝ ֆրանսացի ուրիշ համբաւաւոր դերասանուհիի մը՝ Սառա Պեռնարի խաղը։ Փարիզ փոխադրելով, մտած է Սառա Պեռնարի թատրոնը, ուր անխօս դերեր կատարած է եւ ապա՝ թեքնիք բեմադրիչի օգնականը եղած է, հետեւելով Պեռնարի, Մունէ-Սիւլիի եւ Փօլ Մունէի արուեստին, այլ դերասաններու շարքին։ 1895-1897ին, Փօլ Մունէի արուեստանոցին մէջ հետեւած է առոգանութեան, դասական ողբերգութեան եւ դասական կատակերգութեան դասերու։ Աւելի ուշ, իբրեւ դերասան աշխատած է «Պուֆ տիւ Նոր» թատրոնին եւ «Քոմետի Ֆրանսէզ»ի մէջ։

1902 ին հրաւիրուած է Թիֆլիս, ուր բեմադրած է ֆրանսական թատերախաղեր, միաժամանակ դերեր վերցնելով։ Այնուհետեւ, Պաքու անցած է՝ ղեկավարելու տեղական հայկական թատերախումբը։ 1904ին տեղափոխուսած է Նոր Նախիջեւան ու թատերախումբ մը կազմած, շրջապտոյտներ կատարելով Հիւդիդային Կովկասի եւ Ռուսաստանի հայ համայնքներուն մէջ։

1908 ին, Արմէնեան դարձած էր լաւ ծանօթ բեմադրիչ ու դերասան մը, եւ միացած է Յովհաննէս Աբելեանի՝ «Աբելեան-Արմէնեան» թատերախումբը կազմելով, որ մեծ յաջողութիւն վայելեց իր հինգ տարուան գոյութեան ընթացքին՝ Օսմանեան կայսրութեան, Կովկասի եւ Ռուսաստանի մէջ բազմաթիւ ելոյթներով։ Արմէնեան, որ Լեւոն Շանթի «Հին աստուածներ»ու առաջին բեմադրիչը եղած էր, նաեւ նշանաւոր դերասան մըն էր Եակոյի ու Շայլոքի (Շէյքսփիրի «Օթելլօ» եւ «Վենետիկի վաճառականը»), Ֆրանցի (Ֆրիտրիխ Շիլլըրի «Աւազակները»), Հարփակոնի (Մոլիէռի «Երեւակայական հիւանդը») եւ այլ դերերով։

Արմէնեան շարունակած է իր թատերական գործունէութիւն, նախ՝ Կովկասի մէջ, 1914-1917ին, եւ ապա՝ Իրանի մէջ, 1917-1921ին։ Վերադարձած է Խորհրդային Միութիւն 1921ին, աշխատելով Հիւսիսային Կովկասի, Պաքուի, Թիֆլիսի, Ալեքսանդրապոլի (այժմ՝ Գիւմրի) եւ այլ վայրերու մէջ։ Թատրոններ ղեկավարած է Ալեքսանդրապոլի եւ Սուխումիի մէջ։ 1935էն աշխատած է Լենինականի (Գիւմրիի անունը՝ 1924-1991ին) պետական թատրոնին մէջ, նոյն տարին արժանանալով Խորհրդային Հայաստանի ժողովրդական արուեստագէտի տիտղոսին։ Աւելի քան 100 թատերախաղեր բեմադրած է իր կեանքին ընթացքին, խաղալով շուրջ 150 դերեր։ 1954ին հրատարակած է իր յուշերը՝ «Վաթսուն տարի հայ բեմին վրայ»։

Արմէն Արմէնեան մահացած է Լենինականի մէջ, 20 Յուլիս 1965ին, 93 տարեկան հասակին։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org )

ՄԵՐ ԾՈՒԽԵՐԷՆ

ՓՐԱՒԻՏԸՆՍԻ 5ՐԴ ՏԱՐԵԿԱՆ ԱՄԱՌՆԱՅԻՆ ԲԱՆԱԿՈՒՄԸ

Աշակերտներ եւ պատասխանատուներ, Սրբոց Վարդանանց եկեղեցի, Փրաւիտընս, Ռոտ Այլընտ

«Մինչեւ Հրատ եւ անկէ անդին (Տեսէք թէ Աստուծոյ ուժը մինչեւ ուր կրնայ տանիլ ձեզ)» Փրաւիտընսի (Ռոտ Այլընտ) Սրբոց Վարդանանց եկեղեցւոյ ամառնային Ս. Գրային 5րդ տարեկան բանակումի բնաբանն էր: Անգամ մը եւս Փրաւիտընսի եկեղեցին ողողուած էր բանակումի մասնակցողներուն ուրախ ձայներով։ Մօտ քառասուն մասնակիցներ կը վայելեն դասերն ու միջոցառումները, ընթացքին հաճելի ժամանակ անցընելով միասին ու իրենց անցնող տարիներու ընկերներու ցանցը կ՛ընդարձակեն նորերով։ Աւելի քան քսան պատասխանատուներ կ՚առաջնորդեն մանուկները Աստուածաշունչի սերտողութեան, խաղերու, ձեռային աշխատանքներու, երգ ու երաժշտութեան եւ այլ միջոցառումներու, որպէսզի լաւ ըմբռնեն այս տարուան բնաբանը։ Անոնց հաճոյք պատճառեց Moo-Mobile Ice Cream Truckի այցելութիւնը, իսկ տոքթ ․ Ռոպերթ Նազարեանի դասախօսութիւնը, որ կապեց գիտութիւնը Աստուածաշունչին, խիստ ներշնչող էր։

Շաբաթը իր լրումը պիտի գտնէ ծնողներուն եւ ընկերներուն մատուցուելիք հանդէսով մը, ուր մասնակից մանուկները պիտի ցուցադրեն իրենց սորվածն ու վայելածը։

Ս. ՍԱՐԳԻՍ ԵԿԵՂԵՑՒՈՅ ԱՄԱՌՆԱՅԻՆ ՃԱՄԲԱՐԻ 14ՐԴ ՏԱՐԻՆ 

Չորեքշաբթի, 17 Յուլիսին, Անուշաւան արքեպիսկոպոս այցելեց Ս. Սարգիս եկեղեցւոյ ամառնային ճամբարը Տակլըսթընի մէջ (Նիւ Եորք)։ Առաջնորդ Սրբազան Հայրը ուրախութեամբ նշեց, թէ ճամբարը կը բոլորէ իր 14ամեակը 137 խանդավառ մասնակիցներով, 20 նուիրեալ սկսնակ օգնականներով եւ 25 հոգինոց փորձառու անձնակազմով։

Մասնակիցները եւ անձնակազմը հետեւեցան եկեղեցական արարողութիւններու եւ իրենց հաւատքի մասին նոր բաներ սորվեցան։ Այս ամառուան կրօնական դաստիարակութեան նիւթը տասը պատուիրաններն էին, որոնք ներկայացուեցան Ս. Սարգիս եկեղեցւոյ հոգեւոր հովիւ` Տ. Նարեկ քհնյ. Թրթռեանի կողմէ։

Ճամբարը իր աւարտին պիտի հասնի Ուրբաթ, 19 Յուլիսին։ Այս երկու շաբթուան ընթացքին, մասնակիցները բազմաթիւ շահեկան եւ զուարճալի պահեր անցուցած են տարբեր միջոցառումներով՝ քարերու պարտէզի շինութիւն, գեղարուեստի ու ձեռարուեստի փորձեր, թատրոնի դաս, գիտութեան ցուցադրութիւն, կախարդանքի ցուցադրութիւն, ողջ կենդանիներու հետ հանդիպում, տարբեր մարզախաղեր, եոկա, պար, եւ այլն։

ՆԱՄԱԿ ՀԱՅԱՍՏԱՆԷՆ

Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Անոնց անունները միայն կը յիշենք՝ ինքնութիւնը պահպանելու համար, երբ նամակներէն նմոյշներ պարբերաբար կը ներկայացնենք “Crossroads”ի մէջ։ Այս շաբաթ, 17ամեայ Նանան կը գրէ իր հովանաւորին՝ տիկ. Ալիս Բրուտեան-Թոփալեանին (Փոմփանօ Պիչ, Ֆլորիտա):

«Բարեւ Ձեզ, տիկին Ալիս,

Հերթական նամակը Ձեզ է գրում Նանան՝ Կապան քաղաքից։ Իմ կեանքում տեղի ունեցաւ մեծ իրադարձութիւն՝ ես եւ իմ դասընկերները հրաժեշտ տուեցինք դպրոցին։ Պահը ե՛ւ շատ ուրախալի էր, ե՛ւ շատ յուզումնալից, թւում էր թէ դպրոցը աւարտելով շատ մեծ աշխատանք եմ կատարել, բայց այդ պահին հասկացայ, որ մանկութեան պէս այդ 12 տարիներն էլ անդարձ գնացին, հասկացայ որ շատ դժուարութիւնների միջով պիտի անցնեմ, որպէսզի հասնեմ իմ նպատակներին ու կայունանամ կեանքում...

Տիկին Ալիս, յունիսի 4-ից ՀՀ-ում մեկնարկել են բուհական միասնական քննութիւններ, ես եւս մասնակցել ու յանձնել եմ աշխարհագրութիւն առարկան, եւ ասեմ, որ բարձր՝ 19 ցուցանիշով։ Կը յանձնեմ նաեւ անգլերէն, բայց դա արդէն մի քիչ աւելի ուշ։

Բացի միասնական քննութիւններից՝ կը յանձնեմ նաեւ աւարտական քննութիւն հայոց լեզուից եւ պատմութիւնից։ Ես իմ փաստաթղթերը յանձնել եմ Պետական համալսարանի «Սերվիս» (սպասարկման ոլորտ) բաժինը, եւ ամէն ինչ կ՚անեմ որպէսզի միւս քննութիւնս էլ յանձնեմ բարձր միաւորով, որովհետեւ ես ինքս իմ առջեւ խնդիր ու նպատակ եմ դրել, եւ ուզում եմ, որ յաղթահարեմ կեանքի բոլոր խնդիրները եւ հասնեմ իմ նպատակներին։

Թերեւս այսքանն էին փոփոխութիւնները իմ կեանքում։

Իսկ Ձեզնից անչափ շնորհակալ եմ աջակցութեան համար։

Յարգանքներով՝ Նանա»։

ՀՈՎԱՆԱՒՈՐՆԵՐ ԿԸ ՓՆՏՌՈՒԻՆ

Եթէ կ՚ուզէք հովանաւորի սպասող մեր ցուցակի որբերէն մէկը հովանաւորել, հաճեցէք կապուիլ Ազգ. Առաջնորդարանին հետ՝ Սոֆիին դիմելով կա՛մ ելեկտրոնային նամակով ( sophie@armenianprelacy.org ) եւ կա՛մ հեռաձայնով (212-689-7810)։  

ՅԻՍՈՒՆ ՏԱՐԻ ԱՌԱՋ՝ ՄԱՐԴԸ ԼՈՒՍԻՆ ԿԸ ՀԱՍՆԷՐ

Այնքան թարմ է յիշողութիւնը անոնց համար, որոնց տարիքը կը թոյլատրէ յիշել Լուսնի վրայ էջքը յիսուն տարի առաջ, որ դէպքը կրնար երէկ տեղի ունեցած ըլլալ։ Տարբեր աշխարհ մըն էր, եւ բազմաթիւ առումներով՝ խառն ժամանակաշրջան մը։ Սակայն, այս անգամ վկայ եղանք ամերիկացիներու ամէն գոյնի ու ազգութեան՝ միասնական ազգի մը, որ կ՚աղօթէր Apollo 11 առաքելութեան ապահով էջքին ու վերադարձին համար։ Հրթիռարձակումը տեղի ունեցաւ Քէյփ Քանավերալի մէջ, 16 Յուլիս 1969ին, իսկ լուսնէջքը կատարուեցաւ 20 Յուլիսին, արեւելեան ժամով կէսօրէ ետք 4:17ին։ 1960ական թուականներու սկզբնաւորութեան, նախագահ Ճան Ֆ. Քենետի թերահաւատ ազգի մը յայտնած էր իր նպատակը՝ տիեզերագնաց մը Լուսին հասցնելու եւ զինք Երկիր վերադարձնելու «տասնամեակի աւարտէն առաջ»։ Դժբախտաբար, նախագահը չապրեցաւ իր կանխատեսումին ճշմարտացիութիւնը ստուգելու համար, ոչ ալ «Արծիւը էջք կատարած է» խօսքերը լսելու, երբ տիեզերանաւը ապահով էջք կատարեց Լուսնի վրայ։ Ազգը, եթէ ոչ ամբողջ աշխարհը, փակած էր հեռատեսիլին (մեծամասնութեամբ՝ սեւ ու ճերմակ գոյներով) եւ ձայնասփիւռին, ականատես դառնալով դէպքի մը, որ քիչ ժամանակ առաջ գիտա-երեւակայական վէպի նիւթ համարուած էր։ Յիսուն տարի անցած է եւ բազում ուրիշ դէպքեր պատահած, ոմանք՝ շատ աւելի կարեւոր, բայց ո՛չ մէկը գերազանցած է միասնական ազգի ուրախ ու երախտապարտ հակազդեցութեան՝ լուսնէջքի առիթով։ Հարցուցէք այդ ժամանակ ապրող ոեւէ մէկուն. կրնամ ձեզի վստահեցնել, որ ան կրնայ ըսել ճիշդ ո՞ւր էր եւ ինչպէ՞ս իմացաւ էջքի մասին։ Ես ինքնաշարժի մը մէջ ձայնասփիւռը կը լսէի ամուսինիս, չորս տարեկան որդիիս եւ կեսրոջս հետ, մինչ քաղաք կը վերադառնայինք Քէթսքիլ լեռներէն։ Կեանքիս ամենէն վառ յիշատակներէն մէկն է։ (Այրիս Փափազեան)



ԳՐԵՑԷ՛Ք ՄԵԶԻ

Եթէ ըսելիք մը ունիք, մեզի իմացուցէք։ Գրեցէ՛ք ձեր մտածումները crossroads@armenianprelacy.org հասցէին՝ հայերէնով կամ անգլերէնով։



4 Օգոստոս —Ս. Վարդանանց եկեղեցւոյ (Փրաւիտընս, Ռոտ Այլընտ) տարեկան

դաշտահանդէս Քէմփ «Հայաստան»ի մէջ (Ֆրէնքլին, Մասաչուսեթս), հովանաւորութեամբ՝ Անուշաւան արքեպիսկոպոսի։ Խաղողօրհնէք եւ մատաղ՝ կէսօրէ ետք ժամը 3:30ին։ Տեղեկութիւններու համար՝ եկեղեցւոյ գրասենեակ (401) 831-6399։

11 Օգոստոս — Ս. Ստեփանոս եկեղեցւոյ (Ուոթըրթաուն, Մեսեչուսեթս) տարեկան դաշտահանդէս Քէմփ «Հայաստան»ի մէջ, հովանաւորութեամբ՝ Անուշաւան արքեպիսկոպոսի։ Խաղողօրհնէք եւ մատաղ՝ կէսօրէ ետք ժամը 3:00ին։ Տեղեկութիւններու համար՝ 617-924-5762։

11 Օգոստոս — Ուստրի (Մասաչուսեթս) Ս. Երրորդութիւն եկեղեցւոյ տարեկան դաշտահանդէս։ Խաղողօրհնէք՝ կէսօրէ ետք ժամը 1:00ին, Անուշաւան արքեպիսկոպոսի նախագահութեամբ։

9-12 Հոկտեմբեր —Սրբոց Թարգմանչաց տօնին առիթով Արեւելեան, Արեւմտեան եւ Գանատական թեմերու եկեղեցականաց համաժողով տեղի պիտի ունենայ՝ Մոնթեպելլոյի մէջ (Գալիֆորնիա)։ Մանրամասնութիւնները՝ յետագային։

12 Հոկտեմբեր —Ս. Վարդանանց եկեղեցւոյ 60ամեակի շարունակութիւն՝ Էլի Պէրպէրեանի եւ իր նուագախումբին մասնակցութեամբ։  Տեղեկութիւններու համար՝ 201-943-2950։

19 Հոկտեմբեր —«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մեսեչուսեթս)։ 



17 Նոյեմբեր —Ազգ. Առաջնորդարանի Գոհաբանութեան ճաշկերոյթ՝ Terrace on the Parkի մէջ։ Մանրամասնութիւնները՝ յետագային։

May 13-16, 2020 — Արեւելեան թեմի Ազգային Երեսփոխանական Ժողով, հիւրընկալութեամբ՝ Ֆիլատելֆիայի Ս. Գրիգոր Լուսաւորիչ եկեղեցւոյ։ Հոգեւորականաց համագումարը պիտի սկսի Չորեքշաբթի, 13 Մայիսին, իսկ Երեսփոխանական Ժողովը՝ Հինգշաբթի, 14 Մայիսին։ Ժողովը իր աւարտին կը հասնի Շաբաթ, 16 Մայիսին։

Follow us on Social Media

The Armenian Prelacy 

Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/