ՆԻՒ ՃԸՐԶԻԻ Ս. ՎԱՐԴԱՆԱՆՑ ԵԿԵՂԵՑՒՈՅ 60ԱՄԵԱԿ
|
|
Կիրակի, 5 Մայիսին, պիտի նշուի Ռիճֆիլտի (Նիւ Ճըրզի) Ս. Վարդանանց եկեղեցւոյ օծման 60ամեակը։ Թեմիս բարեջան առաջնորդ՝ Գերշ. Տ. Անուշաւան արք. Դանիէլեան պիտի պատարագէ ու քարոզէ։ Յաւարտ Ս. Պատարագի, եկեղեցւոյ մեծ սրահին մէջ ճաշկերոյթ մը տեղի պիտի ունենայ։ Շաբաթներ առաջ, ճաշկերոյթին տոմսակները սպառած էին ու սպասման ցուցակ մը գոյացած։ Ճաշկերոյթին ընթացքին, սերունդէ-սերունդ եկեղեցւոյ ծխական ու աջակից հանդիսացած` Սարաճեան, Նաճարեան, Միրաքեան եւ Կարապետեան ընտանիքները մեծարանքի պիտի արժանանան։
|
|
Տ. Ստեփան քհնյ. Պալճեան Ս. Պատարագ կը մատուցանէ 24 Ապրիլին
|
|
Չորեքշաբթի, 24 Ապրիլին, Նորթ Անտովըրի (Մասաչուսեթս) Ս. Գրիգոր եկեղեցւոյ հոգեւոր հովիւ՝ Տ. Ստեփան քհնյ. Պալճեան պատարագեց ու քարոզեց Նիւ Եորք Ս. Լուսաւորիչ Մայր Եկեղեցւոյ մէջ, Հայոց Ցեղասպանութեան Սրբոց Նահատակաց տօնին առիթով։ Ս. Պատարագին մասնակցեցան նաեւ Տակլըսթընի (Նիւ Եորք) Ս. Սարգիս եկեղեցւոյ հոգեւոր հովիւ՝ Տ. Նարեկ քհնյ. Թրթռեան, Մայր Եկեղեցւոյ հոգեւոր հովիւ՝ Տ. Մեսրոպ քհնյ. Լագիսեան եւ Նիւ Պրիթընի (Քենեթիքըթ) Ս. Ստեփանոս եկեղեցւոյ այցելու հովիւ՝ Տ. Վահան քհնյ. Գույումճեան։
Յաւարտ Ս. Պատարագի, «Արդարութեան քայլարշաւ» մը տեղի ունեցաւ դէպի թրքական հիւպատոսարանը, որ կը գտնուի Նիւ Եորքի 3րդ պողոտային վրայ։ Քայլարշաւը կազմակերպուած ու հովանաւորուած էր Ազգ. Առաջնորդարանին, Նիւ Եորք Հայ Դատի Յանձանխումբին եւ Հայ Երիտասարդաց Դաշնակցութեան Նիւ Եորքի մասնաճիւղերուն կողմէ։
|
|
«Արդարութեան քայլարշաւ»էն պատկերներ
|
|
ԲԱԶՄՈՒԹԻՒՆ ՄԸ ԿԸ ՄԱՍՆԱԿՑԻ ԹԱՅՄԶ ՍՔՈՒԷՐԻ ՀԱՒԱՔԻՆ
|
|
Թայմզ Սքուէրի տարեկան հաւաքոյթէն տեսարան մը՝ Հայոց Ցեղասպանութեան 104րդ ամեակի ոգեկոչման առիթով
|
|
Մասնակիցներու տպաւորիչ թիւ մը ներկայ էր Հայոց Ցեղասպանութեան տարեկան հաւաքին, որ տեղի կ՚ունենայ Թայմզ Սքուէրի մէջ։ Կիրակի, 28 Ապրիլի հաւաքը ոգեկոչեց Մեծ Եղեռնի 104ամեակը՝ աղօթքներով, հայկական երգերով ու պարերով, եւ Քոնկրէսի անդամներու, հայկական քաղաքական ու բարեսիրական կազմակերպութիւններու ուղերձներով։ Թայմզ Սքուէրի ձեռնարկը հովանաւորուած է Վարդանանց Ասպետներու եւ Դուստրերու կողմէ՝ 1985էն ի վեր, երբ առաջին անգամ յղացուած ու կազմակերպուած էր հանգուցեալ Սէմ Ազատեանի կողմէ, որ մնացած էր գործօն կազմակերպիչ ու մասնակից մինչեւ իր մահը։
Խօսք առնող Քոնկրէսի անդամներն էին՝ Ծերակոյտի փոքրամասնութեան ղեկավար՝ Չաք Շումըր (դեմոկրատ, Նիւ Եորք), ծերակուտական Ռոպըրթ Մէնէնտէզ (դեմոկրատ, Նիւ Ճըրզի), Քոնկրէսի հայկական խումբի համա-ատենապետ, ներկայացուցիչ՝ Ֆրէնք Փալոն (դեմոկրատ, Նիւ Ճըրզի) եւ ներկայացուցիչ՝ Քարոլին Մալոնի (դեմոկրատ, Նիւ Եորք)։
Անուշաւան արքեպիսկոպոս բացման աղօթքը կատարեց այսպէս. «Ողորմած Տէր, կը հայցենք Հայոց Ցեղասպանութեան մեր թանկագին նահատակ սուրբերուն միջնորդութիւնը՝ այս հաւաքոյթն ու անոր մասնակիցները օրհնելու համար . . . Հզօրացուր խաչի ուժն ու “կենդանի նահատակութեան” ոգին մեր մէջ, որպէսզի քու սուրբ պատուիրաններդ կատարենք այնպիսի կեանքով ու ծառայութեամբ, որոնք գործիք ըլլան քու խաղաղութեան եւ արդարութեան այս երկրագունդի պայքարին՝ յանուն ազատութեան եւ մարդկային իրաւունքներու, որոնք քու ընծաներդ են բոլոր արարածներուդ»։
Սեղմեցէ՛ք ստորեւ՝ Անուշաւան արքեպիսկոպոսի բացման պատգամը դիտելու համար
։
|
|
Անուշաւան արքեպիսկոպոս՝ ծերակուտական Ռոպըրթ Մենենտէզի հետ, Ուաշինկթընի մէջ, Քոնկրէսի Հայոց Ցեղասպանութեան նուիրուած ձեռնարկին (10-11 Ապրիլ)։ Ծերակուտական Մենենտէզ հաւատարմօրէն կը մասնակցի Թայմզ Սքուէրի ամենամեայ հաւաքոյթին։
|
|
ՀԱՄԱՏԵՂ Ս. ՊԱՏԱՐԱԳԸ ԿԸ ԽՄԲԷ ՇՐՋԱՆԻ ԵԿԵՂԵՑԻՆԵՐԸ
|
|
Եկեղեցականներն ու խորանի ծառայողները՝ Սրբոց Նահատակաց տօնին առիթով տեղի ունեցած պատարագէն ետք, որուն մասնակցած էին Նիւ Ինկլընտի շրջանի չորս եկեղեցիներ
|
|
Կիրակի, 28 Ապրիլին, յատուկ համատեղ Ս. Պատարագ մը տեղի ունեցաւ՝ Սրբոց Նահատակաց տօնին առիթով, Հարթֆըրտի (Քենեթիքըթ) Ս. Գէորգ եկեղեցւոյ մէջ։ Իրենց մասնակցութիւնը բերին Ս. Գէորգ, Ս. Յարութիւն (Նիւ Պրիթըն), Ս. Մարկոս (Սփրինկֆիլտ) եւ Ս. Ստեփանոս (Նիւ Պրիթըն) եկեղեցիներու հոգեւորականներն ու հաւատացեալները։
|
|
Ս. Պատարագին մասնակցեցան (ձախէն աջ)՝ Արման սրկ. Գալստեան, Տ. Վահան քհնյ. Գույումճեան, Տ. Գաբրիէլ քհնյ. Մուրաճեան եւ Տ. Սեւակ քհնյ. Գաբրիէլեան
|
|
ԱՅՑԵԼՈՒԹԻՒՆ՝ ԱՍՈՐԻ ՈՒՂՂԱՓԱՌ ԵԿԵՂԵՑՒՈՅ ԱՌԱՋՆՈՐԴԱՐԱՆ
|
|
Երեքշաբթի, 30 Ապրիլին, թեմիս բարեջան առաջնորդ՝ Գերշ. Տ. Անուշաւան արք.
Դանիէլեան, ընկերակցութեամբ՝ Մեսրոպ քհնյ. Լագիսեանի, Յովնան քհնյ. Պօզոյեանի,
Նարեկ քհնյ. Թրթռեանի եւ Շանթ Ա. սրկ. Գազանճեանի, այցելութիւն մը տուաւ Ասորի
Ուղղափառ Եկեղեցւոյ ԱՄՆի արեւելեան շրջանի պատրիարքական փոխանորդ՝ Դիոնիսիուս
Քաուաքին։ Հանդիպումը տեղի ունեցաւ Մար Եփրեմ կեդրոնին մէջ (Փարամըս, Նիւ
Ճըրզի)
|
|
ԱՌԱՋՆՈՐԴ ՍՐԲԱԶԱՆ ՀԱՅՐԸ Կ՚ԱՂՕԹԷ
ՀԱՅ ԻՐԱՒԱԲԱՆՆԵՐՈՒ ԸՆԿԵՐԱԿՑՈՒԹԵԱՆ ՁԵՌՆԱՐԿԻՆ
|
|
Անուշաւան արքեպիսկոպոս բացման աղօթքը կը կատարէ Հայ Իրաւաբաններու Ընկերակցութեան՝ հանրային ծառայողներու նուիրուած ընթրիքին
|
|
Հինգշաբթի, 25 Ապրիլին, Անուշաւան արքեպիսկոպոս օրհնութիւնը տուաւ Հայ Իրաւաբաններու Ընկերակցութեան տարեկան հանրային ծառայողներու ընթրիքին, որ տեղի ունեցաւ Նիւ Եորք քաղաքի Եէյլ ակումբին մէջ։ Այս տարուան հանրային ծառայութեան մրցանակով պարգեւատրուեցան
․-
Ռոպըրթ Հ. Թէմպէքճեան՝ Նիւ Եորք նահանգի Դատական Վարքագծի յանձնախումբի վարիչ ու փաստաբան, եւ Ռոտ Ճ. Ռոզենսթայն՝ Միացեալ Նահանգներու ընդհանուր փոխդատախազ։ Այս առիթով Ռոզենսթայնի արտասանած խօսքերը անոր առաջին հրապարակային ելոյթն էր՝ ԱՄՆ-ի Արդարադատութեան Բաժնի Յատուկ Խորհրդատու՝ Ռոպըրթ Միւլըրի հանրայայտ տեղեկագրի հրապարակումէն ի վեր։ Ռոզենսթայնի բանախօսութիւնը լայն արձագանգ ունեցաւ ամերիկեան մամուլին մէջ։ Ընթրիքին ներկայ էին 70 նահանգային դատաւորներ, 15 այժմու եւ նախկին ԱՄՆի դատախազներ, ԱՄՆի մօտ Հայաստանի դեսպան՝ Վարուժան Ներսէսեան եւ ՄԱԿի մօտ Հայաստանի մշտական ներկայացուցիչ՝ Մհեր Մարգարեան։
Անուշաւան Սրբազան Հօր փակման աղօթքէն բաժին մը. «Յաւերժ ու յաւիտենական Աստուած, առաջնորդէ մեզ եւ արժանի ըրէ այն մարտահրաւէրներուն, զորս կը շարունակենք դիմագրաւել։ Տուր մեզի կարողութիւնը՝ ճիշդն ու սխալը զանազանելու, եւ մեզ գործիք դարձուր քու ողորմութեանդ՝ բոլոր անոնց հանդէպ, որոնք կարիքի մէջ են։ (...) Օրհնէ բոլոր անոնք, որոնք այստեղ համախմբուած են՝ Հայ Իրաւաբաններու Ընկերակցութեան կողմէ։ Տուր անոնց վճռակամութիւնը՝ մարդկութեան իրենց ծառայութիւնը շարունակելու ճշմարտութեամբ ու արդարութեամբ»։ Վայրկեանին լրջութիւնը թեթեւցնելով, Սրբազան Հայրը բոլորին մաղթեց «բարի մարսողութիւն եւ բարի վերադարձ», բան մը, որ ընդհանուրին գնահատանքին արժանացաւ։
|
|
Անուշաւան արքեպիսկոպոս եւ ընդհանուր փոխդատախազ՝ Ռոտ Ռոզենշթայն, անցեալ շաբթուան Հայ Իրաւաբաններու Ընկերակցութեան ընթրիքին
|
|
ՀՕՄ-Ի «ԱԿՆՈՒՆԻ» ՄԱՍՆԱՃԻՒՂԻՆ ԱՅՑԵԼՈՒԹԻՒՆԸ
|
|
ՀՕՄի Նիւ Ճըրզիի «Ակնունի» մասնաճիւղի անդամներ այսօր յետմիջօրէին այցելեցին Ազգ. Առաջնորդարան եւ հանդիպում ունեցան Առաջնորդ Սրբազան Հօր հետ։ ՀՕՄի ներկայացուցիչները շնորհաւորեցին Սրբազան Հայրը իր ընտրութեան ու արքեպիսկոպոսական աստիճանի տուչութեան առիթով եւ յանձնեցին յուշատախտակ մը՝ իբրեւ գնահատում համայնքիս անոր ծառայութեան։ Մտքեր փոխանակուեցան համայնքի եւ ապագայ ծրագիրներու մասին։
|
|
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
|
|
ԿԻՐԱԿԻ, 5 ՄԱՅԻՍ
ԿԱՆԱՉ ԿԻՐԱԿԻ
Ընթերցումներուն մասին.
Երկուշաբթի, 29 Ապրիլէն մինչեւ Հոգեգալուստ (9 Յունիս), իւրաքանչիւր օր չորս աւետարանները հետեւեալ կարգով կը կարդացուին. 1) Առաւօտեան՝ Ղուկաս, 2) Կէսօրին՝ Յովհաննէս, 3) Երեկոյեան՝ Մատթէոս, 4) Երեկոյեան աւարտին՝ Մարկոս։ Հոգեգալուստին, չորս աւետարանները կը կարդացուին մինչեւ խաչելութեան պատումը։
1 ՊԵՏՐՈՍ 2:1-10
Հետեւաբար, մէկդի՛ ձգեցէք ամէն տեսակի չար մտածում ու նենգութիւն, կեղծաւորութիւն ու նախանձ եւ ամէն տեսակի չարախօսութիւն: Որպէս հաւատքի նորածին մանուկներ, Աստուծոյ խօսքին անխարդախ կաթին փափաքեցէք, որպէսզի անով աճիք եւ փրկութեան հասնիք: «Անգամ մը որ Տիրոջ խօսքին համը առնէք, պիտի տեսնէք թէ քաղցր է ան»:
Մօտեցէ՛ք անոր, Քրիստոսի, որովհետեւ ի՛նքն է այն կենդանի վէմը, որ թէպէտ մարդոցմէ մերժուած, բայց Աստուծմէ ընտրուած պատուական վէմն է: Այսպիսով դո՛ւք ալ, որպէս կենդանի քարեր, Քրիստոսի վէմին վրայ կը կառուցուիք՝ իբրեւ հոգեւոր տաճար. իւրաքանչիւրդ կը դառնաք անարատ քահանաներ եւ Յիսուս Քրիստոսի միջոցաւ հոգեւոր ընդունելի պատարագ կը մատուցանէք Աստուծոյ: Որովհետեւ մարգարէութեան մէջ գրուած է.-
«Ահա ես Սիոնի մէջ կը դնեմ ընտրուած վէմ մը, պատուական անկիւնաքարը մը. անոր հաւատացողը յուսախաբ պիտի չըլլայ»:
Քանի դուք հաւատացիք Քրիստոսի, անիկա ձեզի համար պատուական վէմը եղաւ. մինչդեռ չհաւատացողներուն համար, անիկա
«Այն քարն է, որ թէպէտ շինողները մերժեցին գործածել, բայց ինք անկիւնաքարը եղաւ»,
կամ՝ «Այն քարն է, որ գլորումի եւ գայթակղութեան առիթ»
պիտի ըլլայ անոնց համար, որոնք Աստուծոյ խօսքը անհամոզիչ գտնելով կը գայթակղին, ինչպէս որ Աստուած նախատեսած էր:
Գալով ձեզի, դուք ընտրուած ցեղ մըն էք, թագաւորելու կոչուած քահանաներ, սուրբ ազգ մը, Աստուծոյ սեփական ժողովուրդը. եւ ձեր պարտականութիւնն է քարոզել զօրութիւնը անոր՝ որ ձեզ խաւարէն իր սքանչելի լոյսին կանչեց: Որովհետեւ հիմա Աստուծոյ ժողովուրդն էք, մինչ նախապէս չէիք. հիմա իր ողորմութիւնը կը վայելէք, մինչ նախապէս զրկուած էինք անկէ:
ՅՈՎՀ. 2:23-3:12
Զատիկի տօնին, մինչ Յիսուս Երուսաղէմ կը գտնուէր, շատեր հաւատացին իրեն, երբ տեսան անոր գործած հրաշքները: Սակայն Յիսուս ինքզինք չէր վստահեր անոնց, որովհետեւ բոլորն ալ կը ճանչնար եւ պէտք չունէր ոեւէ մէկուն մասին ուրիշին վկայութեան, քանի ինք գիտէր թէ ի՛նչ կայ մարդոց սիրտին մէջ:
Նիկոդեմոս անունով Փարիսեցի մարդ մը կար, Հրեայ իշխան մը, որ գիշերով Յիսուսի քով եկաւ եւ ըսաւ անոր.
– Վարդապե՛տ, գիտենք որ դուն Աստուծոյ կողմէ ղրկուած ուսուցիչ մըն ես, որովհետեւ ո՛չ ոք կրնայ գործել քու կատարած հրաշքներդ, եթէ Աստուած անոր հետ չըլլայ:
Յիսուս պատասխանեց անոր.
– Լաւ գիտցիր, որ եթէ մէկը վերստին չծնի՝ չի կրնար տեսնել Աստուծոյ արքայութիւնը:
Նիկոդեմոս հարցուց անոր.
– Ծեր մարդ մր ինչպէ՞ս կրնայ ծնիլ: Կարելի՞ բան է որ ան կրկին մտնէ իր մօր որովայնը եւ ծնի:
Յիսուս պատասխանեց.
– Հաստատ գիտցիր, որ եթէ մէկը ջուրէն եւ Հոգիէն չծնի՝ չի կրնար Աստուծոյ արքայութիւնը մտնել, որովհետեւ մարմինէն ծնածը մարմին է, իսկ հոգիէն ծնածը՝ հոգի: Դուն մի՛ զարմանար, որ քեզի ըսի՝ թէ պէտք է վերստին ծնիք: Հովը ո՛ւր որ ուզէ՝ կը փչէ. դուն անոր ձայնը կը լսես, բայց չես գիտեր թէ ուրկէ՛ կու գայ եւ ո՛ւր կ’երթայ: Նոյնպէս են բոլոր անոնք, որոնք Հոգիէն կը ծնին:
Նիկոդեմոս հարցուց.
– Ինչպէ՞ս կրնայ պատահիլ ատիկա:
Յիսուս պատասխանեց.
– Դուն որ Իսրայէլի ժողովուրդին վրայ ուսուցիչ կարգուած ես, ատիկա չե՞ս գիտեր: Լաւ գիտցիր, թէ ինչ որ գիտենք՝ կը խօսինք եւ ինչ որ տեսանք՝ անոր մասին կը վկայենք, բայց մեր վկայութիւնը չէք ընդունիր: Եթէ երկրաւոր բաներու մասին խօսեցայ ձեզի եւ չէք հաւատար, ինչպէ՞ս պիտի հաւատաք ինծի, եթէ երկնաւոր բաներու մասին խօսիմ:
ՃՇ. ԸՆԹԵՐՑՈՒՄ
Ղուկ. 6:12-45, Գործ. 9:23-31, Մատթ. 8:18-9:8, Մարկ. 3:6-12
|
|
ԿԱՆԱՉ ԿԻՐԱԿԻ՝ ԱՇԽԱՐՀԱՄԱՏՐԱՆ ԿԻՐԱԿԻ
|
|
Զատկուան Կիրակիին կը յաջորդէ յիսուն օրուան շրջան մը (Յինունք)՝ Յարութենէն մինչեւ Հոգեգալուստ, որ նուիրուած է Յարութեան փառաբանման։ Յինունքի եօթը Կիրակիներէն իւրաքանչիւրը յատուկ անուն մը ունի։ Կիրակի, 5 Մայիս, Կանաչ Կիրակի է, նաեւ կոչուած Աշխարհամատրան Կիրակի, որովհետեւ կը նշուի առաջին քրիստոնէական եկեղեցւոյ հաստատումը Երուսաղէմ, հոն ուր Քրիստոս հանդիպեցաւ Առաքեալներուն՝ վերնատան մէջ։
Կանաչ Կիրակին, ամենայն հաւանականութեամբ, իր ծագումը առած է գարնանային հինաւուրց տօնակատարութենէ մը։ Մեր նախահայրերը, տեսնելով, որ մայր հողը կը ծաղկէր երկար ձմեռէն ետք, Արարիչը փառաբանած են գոհաբանութեան արարողութեամբ՝ կանաչութեամբ զարդարելով եկեղեցին ու իրենք զիրենք։ Բնութեան զարթօնքը կը խորհրդանշէ Յարութիւնը։ Կանաչը կեանքի, թարմութեան ու խոստումի գոյնն է։ Ամուլ ձմեռէ մը ետք, Յարութիւնը մեզ կը պարուրէ յոյսով, կեանքով ու սիրով։
Կանաչ Կիրակին լաւագոյն ժամանակն է, որպէսզի յիշենք եւ զօրացնենք մեր պարտաւորութիւնը իբրեւ երկրի բարի տնտեսներ ու Աստուծոյ պարգեւներու պահապաններ։
«Որք արժանաւորեցայք ի կոչումն փառաւորութեան քրիստոսի աստուծոյ մերոյ. եկայք ժողովուրդք երգեցէք տեառն երգ նոր. երգեցէք զանուն նորա ձայնիւ ցնծութեամբ յօրհնութիւն ի նոր։ Զօրացեալքս ի քեզ քրիստոս ժողովուրդք հաւատացելոց, ճշմարիտ խոստովանութեամբ օրհնեմք զխորհուրդ աստուածային կենսաբեր տնօրէնութեան քո. փառաւորելով զահաւոր եւ զսքանչելի անուն քո, տէր տէր մեծ ի վերայ ամենայն երկրի։ Ուրախ լեր եկեղեցի սուրբ հարսն երկնաւոր խորհրդոյն ի փառս ամենասուրբ երրորդութեանն. որ համագոյ իշխանութեամբն իւրոյ զարդարեաց ծագմամբ լուսոյ, պսակէ զքեզ ի պատիւ ամենայն սրբովք իւրովք»։
(Ժողովուրդներ, դուք որ մեր Քրիստոս Աստուծոյ փառաւորութեան կոչին արժանացաք, եկէ՛ք Տիրոջ նոր երգ երգեցէք, անոր անունը ցնծութեան ձայնով նոր օրհնութեամբ երգեցէք։ Քրիստոս, քեզմով զօրացած հաւատացեալներու բազմութիւններս ճշմարիտ խոստովանութեամբ կ՚օրհնենք քու մարդեղութեանդ աստուածային կենսաբեր խորհուրդը, փառաւորելով ահաւոր եւ սքանչելի անունդ Տէ՛ր, մեծ Տէր ամբողջ երկրի վրայ։ Սուրբ եկեղեցի, երկնաւոր խորհուրդին հարս, ուրախացիր փառաւորելով ամենասուրբ Երրորդութիւնը որ իր համագոյ իշխանութեամբ կը զարդարէ քեզ լոյսին ծագումով եւ կը պսակէ պատուելով իր բոլոր սուրբերով)։
|
|
ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎ
|
|
Արեւելեան թեմի Ազգային Երեսփոխանական Ժողովը տեղի պիտի ունենայ Մայիսի 16-18, Ուայթընսվիլի (Մասաչուսեթս) Ս. Աստուածածին եկեղեցւոյ հիւրընկալութեամբ։ Հոգեւորականներու համագումարը պիտի սկսի Չորեքշաբթի, 15 Մայիսին։ Տիկնանց Միութիւններու Ընկերակցութեան տարեկան համագումարը տեղի պիտի ունենայ Երեսփոխանական Ժողովին զուգահեռ։
Ազգային Երեսփոխանական Ժողովը Արեւելեան թեմի եկեղեցական ու վարչական բարձրագոյն մարմինն է։ Անոր կազմին մէկ եօթներորդը եկեղեցական են, իսկ մնացեալը՝ աշխարհական երեսփոխաններ։ Եկեղեցական երեսփոխանները կ՚ընտրուին հոգեւորականներու համագումարին, իսկ աշխարհական երեսփոխանները՝ իրենց ծուխերուն կողմէ։ Ծխական երեսփոխաններու թիւը կախում ունի ծխական անդամներու թիւէն։ Ծուխի մը երեսփոխաններու նուազագոյն թիւը՝ երկու է, իսկ առաւելագոյնը՝ եօթը։
|
|
«ՏԱԹԵՒ» ԱՄԱՌՆԱՅԻՆ ԾՐԱԳՐԻ ԱՐՁԱՆԱԳՐՈՒԹԻՒՆ
|
|
Ազգ. Առաջնորդարանի Քրիստոնէական Դաստիարակութեան բաժանմունքի «Ս. Գրիգոր Տաթեւացի» ամառնային ծրագրի արձանագրութիւնը բացուած է։ Կրօնական բովանդակութեամբ այս եզակի ծրագրին կը մասնակցին 13-18 տարեկան պատանիներ։ Այս տարի տեղի պիտի ունենայ 30 Յունիսէն մինչեւ 7 Յուլիս՝ Էլվըրսընի (Փենսիլվենիա) St. Mary of Providence կեդրոնին մէջ։ Տեղեկութեան եւ արձանագրութեան համար, հաճեցէք սեղմել
այստեղ
։
|
|
Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Ծրագրին մաս կը կազմէ հովանաւորուած երեխաներուն թղթակցութիւնը իրենց հովանաւորին հետ։
Նամակները յուզիչ ընթերցանութեան նիւթ են։ Պարբերաբար այդ նամակներէն նմոյշներ կը ներկայացնենք “Crossroads”ի միջոցով։ Այս շաբթուան նամակը գրած է Արամը, որ արդէն տասնութը տարեկան պիտի դառնայ եւ ըստ օրէնքի՝ շուտով պիտի ձգէ որբերու հովանաւորութեան ծրագիրը։ Ան 18 տարեկանին պէտք է զինուորական ծառայութեան մտնէ։
|
|
«Բարեւ ձեզ, սիրելի բարերար,
Յուսով եմ լաւ էք։ Գրում եմ Ձեզ վերջին անգամ, ուստի եւ կամենում եմ երախտագիտական ու շնորհակալական ամբողջ կուտակուած զգացողութիւնը գոնէ կէս չափ այս նամակովս արտայայտեմ։ Ես Ձեզ միշտ սիրով եմ գրել, ես միշտ սպասել եմ, որ նամակ գրելու ժամանակը գայ։ Ես միշտ դժուարացել եմ Ձեզ գրել, շատ երկար եմ մտածել մի ամբողջ նամակ գրելուց առաջ ու ամէն տողը գրել եմ իմ յոյզերից ու հոգուց։ Ամէն ինչ Ձեզ պատմել ու Ձեզ հետ կիսել եմ, արել եմ անշահ ու անեսասէր...։ Արել եմ, որովհետեւ Դուք կրկնակին էք արել ինձ համար, որ պարտաւոր չէիք էլ, բայց գիտեմ նաեւ, որ Ձեզ ինքներդ էք պարտաւորուած միշտ օգնել նրան ով ունի դրա կարիքը, ուստի խոնարհւում եմ Ձեր մարդկային բարձր որակների առջեւ։ Թող Աստուած էլ աւելին նպաստի Ձեզ, որ Դուք իմ նման անյոյս մնացած մանուկների ցաւն ու հոգսը կիսէք Ձեր սրտանց մտահոգութիւններով։
Ես կարծել եմ ու կը կարծեմ միշտ, որ ծնողները երեխաների յոյսն ու հաւատն են։ Հայրը՝ յոյսը, իսկ մայրը՝ հաւատը։ Սէրն էլ պիտի ինքը երեխան գտնի ու ապրի ինքն իր կեանքում։
Իսկ ես Ձեզ կամենում եմ մեծ հաւատքի պտուղներ, անպակաս յոյսի յաջողութիւններ ու անսահման մաքրամաքուր սիրոյ պարգեւներ։
Թւում է թէ կեանքը վերջանում է, երբ մեծանում են, բայց ամէն օր էլ սկսւում է ու ամէն օրուայ հետ էլ վերջանում է։
Մինչ մտածում ենք թէ վերջ ունի կեանքը, թէ չէ կորցնում ենք ապրելու գիտակցումը։ Ես արդէն մեծ եմ եւ համարում եմ, որ պատւով եմ անցուցլ մանկութեանս բոլոր խոչընդոտներն ու աւերիչ դժուարութիւնները։
Ու հիմա գրում եմ Ձեզ, որպէս մեծ ու հասուն մարդ, ով ինքն արդէն պիտի լինի իր գլխի տէրը ու ինքն իր գրպանի պիտի լցնի։ Մնում է սովորեմ քրտնել կեանքում, աշխատել ու վաստակել։ Իսկ այդ հարցում կարծում եմ ինձ կ՚օգնի իմ ծառայութիւնը հայրենիքիս առաջ կատարելիս, որ շուտով պիտի գայ ժամանակը։
Ես ուրախ էի ու ուրախ եմ Ձեզ թէկուզ այս կերպ ճանաչելու ու շփուելու համար։
Անչափ շնորհակալ եմ այն ամէնի համար, ինչ մինչ այսօր ու ընդմիշտ կատարեցիք ինձ համար։
Բարին Ձեզ հետ թող լինի միշտ ու թող Ձեր կեանքն ու Դուք օրհնուէք Աստծոյ օրհնութեամբ Ձեր մարդ տեսակի համար։
Սիրում եմ Ձեզ...
Սրտանց շնորհաւորում եմ գալիք Ամանորի կապակցութեամբ։ Թող առողջութեան ու յաջողութեան տարի լինի Ձեզ եւ Ձեր ընտանիքին»։
|
|
Ներկայիս մանուկներ կան, որոնք կը սպասեն որբերու հովանաւորութեան ցուցակին մէջ։ Եթէ կը փափաքիք հովանաւորել մանուկ մը, հաճեցէք կապուիլ Ազգ. Առաջնորդարանին հետ ելեկտրոնային նամակով (
sophie@armenianprelacy.org
) կամ հեռաձայնով (212-689-7810)՝ դիմելով Սոֆիին։
|
|
Տ. Վահան քհնյ. Գույումճեան Ս. Զատկուան պատարագը կը մատուցանէ Նիւ Պրիթընի (Քենեթիքըթ) Ս. Ստեփանոս եկեղեցւոյ մէջ
|
|
SHADOW TOLE ԱՐՈՒԵՍՏԻ ՑՈՒՑԱՀԱՆԴԷՍ
ԱԶԳԱՅԻՆ ԱՌԱՋՆՈՐԴԱՐԱՆԻՆ ՄԷՋ
|
|
Արփի Նարտոնէի Shadow Tole արուեստը, որ հիմնուած է 17-րդ դարու նկարչական ձեւի մը վրայ, պիտի ցուցադրուի Ազգ. Առաջնորդարանի «Վահագն եւ Յասմիկ Յովնանեան» սրահին մէջ։ Նկարին մէջ՝ Վարդգէս Սուրէնեանցի «Աստուածամայրը եւ Յիսուս մանուկը» գործի մեկնաբանութիւնը։
|
|
Ուրբաթ, 3 Մայիսին, երեկոյեան ժամը 7:00էն 9:00, տեղի պիտի ունենայ Արփի Նարտոնէի Shadow Tole արուեստի ցուցադրութիւնը Ազգ. Առաջնորդարանին մէջ (138 East 39րդ փողոց)՝ «Համազգային»ի Նիւ Եորքի մասնաճիւղի կազմակերպութեամբ եւ Անուշաւան արքեպիսկոպոսի հովանաւորութեամբ։
Արփի Նարտոնէ եւ իր արուեստը միջազգային ճանաչում ստացած են, յատկապէս՝ Չարլզ Տիքընսի Լոնտոնը վերարտադրող Անթոն Փիքի նկարներուն վրայ հիմնուած անոր ստեղծագործութիւններով։ Անոր գործերը ցուցադրուած են «Քարթիէ» նշանաւոր ընկերութեան կողմէ, ինչպէս եւ տարբեր քաղաքներու (Նիւ Եորք, Շիքակօ, Հիւսթըն, Սան Ֆրանսիսքօ, Սքոթստէյլ եւ Պեւըրլի Հիլզ) պատկերասրահներու մէջ։
Ցուցահանդէսը պիտի բացուի հանրութեան Հինգշաբթի, 2 Մայիսին, երեկոյեան ժամը 6:00էն 9:00։ Պիտի շարունակուի Ուրբաթ, 3 Մայիսին (երեկոյեան ժամը 5:00էն 9:00) եւ Շաբաթ, 4 Մայիսին, ժամը 2:00էն 8:00։
|
|
ԳՐԻԳՈՐ ՂԱՓԱՆՑԵԱՆ (մահ՝ 3 Մայիս, 1957)
|
|
Անցեալ դարու առաջին կէսին, Գրիգոր Ղափանցեան հայկական լեզուաբանութեան եւ հին պատմութեան ամենէն ազդեցիկ անուններէն մէկը հանդիսացաւ։
Ղափանցեան ծնած է Աշտարակ, 17 Փետրուար, 1887ին։ Իր տարրական կրթութիւնը ստանալէ ետք ծննդավայրին մէջ, 1899ին մեկնած է Ս. Փեթերպուրկ, ուր ընդունուած է ռուսական գիմնազիա։ Շրջանաւարտ ըլլալէ ետք, տեղւոյն համալսարանի արեւելեան լեզուներու ճիւղի հայ-վրացական բանասիրութեան բաժինը մտած է, ուր իր ուսուցիչներուն շարքին էր վրացի յայտնի լեզուաբան ու հայագէտ Նիկողայոս Մառը։
1913ին համալսարանաւարտ ըլլալով, Ղափանցեան վերադարձած է Հայաստան։ Հայագիտական նիւթեր դասաւանդած է Ս. Էջմիածնի Գէորգեան ճեմարանին մէջ, իսկ 1914ին մասնակցած է Մառի կատարած պեղումներուն Անիի մէջ։ Նոյն տարին, հրատարակած է առաջին գիրքը՝ «Լեզուաբանական դիսցիպլինաներ եւ լեզու»։ Երբ ճեմարանը փակուած է 1917ին, հաստատուած է Երեւան։ 1918ին մասնակցած է Սարդարապատի հերոսամարտին։
1921ին Ղափանցեան հրաւիրուած է Երեւանի համալսարան, ուր դասաւանդած է մինչեւ կեանքին վերջը եւ ղեկարած՝ ընդհանուր լեզուաբանութեան ամպիոնը (մինչեւ 1954)։ Դասաւանդած է գրաբար, հայոց լեզուի պատմա-համեմատական քերականութիւն, ուրարտերէն եւ ընդհանուր լեզուաբանութիւն, միաժամանակ մասնագէտներ պատրաստելով այդ ճիւղերուն մէջ։
1932ին ստացած է փրոֆեսորի տիտղոսը, իսկ 1942ին արժանացած՝ բանասիրական գիտութիւններու դոկտորի տիտղոսին, առանց աւարտաճառ պաշտպանելու։ Նոյն տարին, Խորհրդային Հայաստանի գիտական վաստակաւոր գործիչի տիտղոսը ստացած է։ 1943ին Հայաստանի Գիտութիւններու Ակադեմիայի հիմնադիր անդամ դարձած է, ընտրուելով հասարակագիտական բաժանմունքի ակադեմիկոս-քարտուղար։ Հր. Աճառեանի անուան Ակադեմիայի լեզուի հիմնարկի տնօրէն եղած է 1950-1955ին։
Ժամանակին, Ղափանցեան հայ իրականութեան հազուագիւտ մասնագէտներէն էր Փոքր Ասիոյ մեռած լեզուներու՝ հիթիթերէն, ուրարտերէն եւ խուռերէնին, ու այսպէս, անոր ուսումնասիրութիւնները կարեւոր տարր մը կ՚աւելցնէին հայոց հին լեզուի ու պատմութեան հետազօտութեան։ 1930 թուականներէն սկսած է իր ամենէն բեղուն շրջանը, երբ հրատարակած է զանազան գիրքեր ռուսերէն եւ հայերէն. “Chetto-Armeniaca” (1931, ռուսերէն), «Լեզուական ընդհանուր տարրեր ուրարտական եւ խեթական լեզուների միջեւ» (1936), «Խեթական աստուածները հայերի մօտ» (1940), «Հին Հայաստանի տեղանունների պատմալեզուաբանական նշանակութիւնը», (1940), «Արա Գեղեցկի պաշտամունքը» (1945), եւ այլն։
Ղափանցեանի լեզուաբանական հմտութիւնը, համադրուելով անոր պատմական ու հնագիտական գիտելիքներուն հետ, գիտական կարեւոր յայտնագործումներու դուռ բացին։ Ան իր եզրակացութիւններէն շատերը ամփոփեց կարգ մը ծանրակշիռ մենագրութիւններու մէջ՝ «Ուրարտուի պատմութիւնը» (1940), «Հայասա՝ հայերի բնօրրանը» (1948, ռուսերէն) եւ «Հայոց լեզուի պատմութիւն (հնագոյն շրջան)» (1961)։ Ան իր ուսումնասիրութիւններուն մէջ ներկայացուց երկու շերտերու գոյութիւնը հայերէնի մէջ՝ հնդեւրոպական եւ տեղական (փոքրասիական եւ կովկասեան լեզուներ)։ Ղափանցեան նաեւ զբաղած է ընդհանուր լեզուաբանութեան խնդիրներով, ու հրատարակած է «Ընդհանուր լեզուաբանութիւն» (1937, 1939) հատորը։
Ակադ. Գրիգոր Ղափանցեան մահացած է Երեւանի մէջ, 3 Մայիս 1957ին։ Աշտարակի մէջ անոր անունով դպրոց մը կոչուած է, ուր կայ նաեւ անոր գիտական վաստակին նուիրուած թանգարան մը։ Ղափանցեանի պրոնզեայ կիսանդրին զետեղուած է Երեւանի պետական համալսարանի գլխաւոր շէնքի նախասրահին մէջ, խորհրդանշելով անոր կարեւորութիւնը իբրեւ գիտնական եւ մանկավարժ՝ համալսարանական ուսման զարգացման մէջ։
|
|
“CROSSROADS”Ի ԺԱՄԿԷՏԻՆ ՄԱՍԻՆ
|
|
Կը յիշեցնենք, որ եթէ “Crossroads” ելեկտրոնային լրատուին մէջ հրատարակելիք նիւթեր եւ լուսանկարներ ունիք, հաճեցէք զանոնք հասցնել ամէն շաբաթ մինչեւ Չորեքշաբթի կէսօր։ Աւելի ուշ հասած նիւթերը կը տեղաւորուին յաջորդ շաբթուան թիւին մէջ։ Ձեր գործակցութիւնը թոյլ կու տայ, որ “Crossroads”ի հրատարակութիւնը տեղի ունենայ ճիշդ ժամանակին։
|
|
ՆՈՐ ԳԻՐՔԵՐ՝ ԱՌԱՋՆՈՐԴԱՐԱՆԻ ԳՐԱԽԱՆՈՒԹԻՆ ՄԷՋ
|
|
The Armenian Highland
Western Armenia and the First Armenian Republic of 1918
By Matthew Karanian
Այս յատուկ յոբելինական հրատարակութիւնը կը հանդիսանայ Մէթիւ Քարանեանի կողմէ հեղինակուած (բնագիր եւ լուսանկարներ) վերջին գործը։ Հեղինակին միւս գիրքերուն եւ ուղեցոյցերուն պէս, գեղեցիկ է թէ՛ դիտելու եւ թէ՛ կարդալու համար։
Գիրքը լաթակազմ է (312 էջ)։ Ունի 207 գունաւոր լուսանկարներ եւ քարտէսներ, ինչպէս եւ 42 պատմական եւ անտիպ լուսանկարներ։
Գինը՝
65 տոլար,
առաւել՝ առաքման ծախս։
|
|
Նոյն հեղինակէն նախորդ գործի մը քանի մը օրինակներ տրամադրելի են՝
Matthew Karanian
Historic Armenia After 100 Years: Ani, Kars, and the Six Provinces of Western Armenia
Պատմական Հայաստանի այս ուղեցոյցը՝ 2015ին հրատարակուած, հայկական յուշարձաններու եւ իրերու պատմութիւնն ու մշակոյթը կը նկարագրէ։ Լուսանկարները կը վաւերագրեն այս վայրերուն ներկայ վիճակը, եւ, ըստ կարելւոյն, հարիւրամեայ պատկերներ ալ ընդգրկուած են։ Գիրքը կ՚ընդգրկէ Օսմանեան կայսրութեան հայկական վեց նահանգները։
Գիրքը թղթակազմ է (176 էջ)։ Ունի 125 գունաւոր լուսանկարներ եւ քարտէսներ։
Գինը՝ 39.95 տոլար, առաւել առաքման ծախս։
Այս կամ այլ գիրքեր ապսպրելու համար, հաճեցէք կապ հաստատել Ազգ. Առաջնորդարանի գրախանութին հետ՝ ելեկտրոնային նամակով (
books@armenianprelacy.org
) կամ հեռաձայնով Ռիթային (212-689-7810 x 20)։
|
|
«Սիամանթօ» լսարանի
դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝
anec@armenianprelacy.org
կամ՝ 212-689-7810։ Յաջորդ դասը՝
Շաբաթ, 11 Մայիսին։
3 Մայիս
—Արփի Նարտոնէի ցուցահանդէսի բացում Ազգ. Առաջնորդարանին մէջ, կազմակերպութեամբ՝ Նիւ Եորքի «Համազգային»ի մասնաճիւղին։ Ցուցահանդէսը բաց պիտի ըլլայ Հինգշաբթի, 2 Մայիսին, երեկոյեան ժամը 6:00էն 9:00, Ուրբաթ, 3 Մայիսին, երեկոյեան ժամը 5:00էն 9:00 եւ Շաբաթ, 4 Մայիսին, երեկոյեան ժամը 2:00էն 8:00։
4 Մայիս
—«Աղօթք՝ անձնական եւ համայնական»։ Սեմինարը պիտի վարէ Ազգ. Առաջնորդարանի Քրիստոնէական Դաստիարակութեան բաժանմունքի տնօրէն՝ Բարշ. Տ. Շանթ Ա. սրկ. ԳազանՃեան՝ Ս. Գրիգոր Լուսաւորիչ եկեղեցւոյ մէջ (Ինտիըն Օրչըրտ), առաւօտեան ժամը 10:30էն մինչեւ 2:00 (կէսօրին՝ ճաշ)։ Տեղեկութիւններու եւ արձանագրութեան համար, գրեցէ՛ք
stgregorymass@yahoo.com
հասցէին կամ հեռաձայնեցէք 413-543-4763 թիւին։
5 Մայիս
—Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակի ճաշկերոյթ՝ «60 տարի՝ սերունդէ սերունդ» բնաբանով, եկեղեցւոյ գլխաւոր սրահին մէջ, որուն ընթացքին պիտի մեծարուին՝ Կարապետեան, Միրաքեան, Նաճարեան եւ Սարաճեան ընտանիքները։ (
Տոմսերը սպառած են)։
5 Մայիս
—Ս. Ստեփանոս եկեղեցւոյ (Նիւ Պրիթըն, Քենեթիքըթ) 93ամեակ։ Ս. Պատարագ պիտի մատուցանէ Տ. Վահան քհնյ. Գույումճեան։ Յաւարտ Ս. Պատարագի, տեղի պիտի ունենայ ճաշկերոյթ The Wethersfield Country Club-ին մէջ։
5 Մայիս
—ՀՕՄի «Մայր» մասնաճիւղի Մայրերու Օրուան ճաշկերոյթ՝ Տակլըսթընի «Մանոր» ճաշարանին մէջ, որուն ընթացքին պիտի մեծարուի տիկ. Սոնիա Պզտիկեան։
11 Մայիս
—Մայրերու Օրուան ճաշկերոյթ-պարահանդէս (Crowne Plaza, Ուորուիք, Ռոտ Այլընտ), որուն ընթացքին պիտի մեծարուի տարուան մայրը՝ տիկ. Մարօ Տիոնիսոփուլոս։
16-18 Մայիս
—Արեւելեան թեմի Ազգային Երեսփոխանական Ժողով՝ Ուայթընսվիլի (Մասաչուսեթս) Ս. Աստուածածին եկեղեցւոյ հիւրընկալութեամբ։
30 Յունիս-7 Յուլիս
—33րդ տարեկան «Ս. Գրիգոր Տաթեւացի» ամառնային ծրագիրը՝ 13-18 տարեկան պատանիներու համար, տեղի պիտի ունենայ St. Mary of Providence կեդրոնին մէջ (Էլվըրսըն, Փենսիլվենիա), կազմակերպութեամբ՝ Ազգ. Առաջնորդարանի Քրիստոնէական Դաստիարակութեան բաժնին։
9-12 Հոկտեմբեր
—Սրբոց Թարգմանչաց տօնին առիթով, Արեւելեան, Արեւմտեան եւ Գանատական թեմերու եկեղեցականաց համաժողով տեղի պիտի ունենայ՝ Մոնթեպելլոյի մէջ (Գալիֆորնիա)։ Մանրամասնութիւնները՝ յետագային։
12 Հոկտեմբեր
—Ս. Վարդանանց եկեղեցւոյ 60ամեակի շարունակութիւն՝ Էլի Պէրպէրեանի եւ իր նուագախումբի մասնակցութեամբ։
19 Հոկտեմբեր
—«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մեսեչուսեթս)։
17 Նոյեմբեր
—Կոմիտաս Վարդապետի 150ամեակի ծննդեան տօնակատարութիւն, կազմակերպութեամբ՝ Ազգ. Առաջնորդարանի։ Մանրամասնութիւնները՝ յետագային։
|
|
Follow us on Social Media
|
|
The Armenian Prelacy
Tel: 212-689-7810 ♦ Fax: 212-689-7168 ♦ Email: email@armenianprelacy.org
|
|
|
|
|
|
|
