29 Նոյեմբեր, 2018

ԱՆՈՒՇԱՒԱՆ ՍՐԲԱԶԱՆ ՀԱՅՐԸ ԿԸ ՍՏԱՆԱՅ ԱՐՔԵՊԻՍԿՈՊՈՍԻ ՏԻՏՂՈՍ

Ուրախութեամբ կը հաղորդենք մեր բոլոր ընթերցողներուն, որ 22 Նոյեմբեր, 2018 թուակիր կոնդակով, Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա. թեմիս նորընտիր առաջնորդ Գերշ. Տ. Անուշաւան եպս. Դանիէլեանին շնորհած է արքութեան տիտղոսը։ Կոնդակին մէջ, Վեհափառ Տէրը մասնաւորապէս գրած է. «Մօտէն հետեւած ենք թեմէն ներս երկար տարիներու Ձեր գործունէութեան, որպէս Առաջնորդական Փոխանորդ եւ Միջ-եկեղեցական յարաբերութեան պատասխանատու, եւ Ձեր մէջ տեսած՝ մեր եկեղեցւոյ ու Ս. Աթոռին հաւատարիմ ու նուիրեալ միաբանը։ Արդ, առ ի գնահատութիւն անցնող տարիներու Ձեր նուիրեալ ծառայութեան եւ որպէս քաջալերանք Ձեր կեանքին առջեւ բացուող նորանոր ծառայութեանց, այսու Հայրապետական Կոնդակաւ Ձեզի կը շնորհենք ԱՐՔՈՒԹԵԱՆ պատիւ եւ տիտղոս։ Վստահ ենք որ Ձեզի տրուած այս տիտղոսը նոր մղում պիտի հանդիսանայ՝ վերանորոգ հաւատքով եւ ամբողջական նուիրումով կատարելու Ձեզի վստահուած առաքելութիւնը մեր Սուրբ Աթոռի ծառայութեան դաշտէն ներս»։ Կիրակի, 2 Դեկտեմբերի տօնակատարութիւնը, այսպիսով, կը դառնայ առաջնորդական ընտրութեան եւ աստիճանի բարձրացման կրկնակի տօնախմբութիւն։ Գերաշնորհ Սրբազան Հայրը պիտի պատարագէ ու քարոզէ Նիւ Եորքի Ս. Լուսաւորիչ Մայր Եկեղեցւոյ մէջ։ Ս. Պատարագը պիտի սկսի առաւօտեան ժամը 10։00ին։ Յաւարտ Ս. Պատարագի, մեծարանքի ճաշկերոյթ մը տեղի պիտի ունենայ Terrace on the Parkի մէջ (Ֆլաշինկ Մէտոզ, Նիւ Եորք)։ Ճաշկերոյթի տոմսերը արդէն մօտ երկու շաբաթ առաջ սպառած էին ։

ՀՈԳԵՀԱՆԳԻՍՏ՝ ՄԵՍՐՈՊ ԱՐՔ. ԱՇՃԵԱՆԻ ՀԱՄԱՐ

Հիւսիսային Ամերիկայի Արեւելեան եւ Գանատայի թեմի նախկին առաջնորդ հոգելոյս Տ. Մեսրոպ արք. Աշճեանի վախճանման 15-րդ տարելիցին առթիւ հոգեհանգստեան պաշտօն պիտի կատարուի Կիրակի, Դեկտեմբեր 2, 2018-ին, Նիւ Եորքի Սբ. Լուսաւորիչ Մայր Եկեղեցւոյ մէջ: Մեսրոպ արք. իր մահկանացուն կնքած էր 2 Դեկտեմբեր, 2003ին, Միացեալ Նահանգներ այցելութեան մը ընթացքին։ Ան թեմիս առաջնորդական պաշտօնը վարած էր 1978-1998 թուականներուն, իսկ այնուհետեւ փոխադրուած էր Հայաստան, ուր ղեկավարած էր քրիստոնէութեան իբրեւ պետական կրօնք ընդունման 1700ամեակի յանձնախումբը եւ բարեսիրական ու կրթական բազմաթիւ ծրագրեր կազմակերպած էր Հայաստանի ու Արցախի մեր ժողովուրդի ի նպաստ։

ԱՆՈՒՇԱՒԱՆ ՍՐԲԱԶԱՆ ՀԱՅՐԸ՝ ՓՐՈՎԻՏԸՆՍԻ ՄԷՋ

Անուշաւան Սրբազան Հայրը՝ Տ. Կոմիտասի ու Տ. Գաբրիէլի եւ Փրովիտընսի Սրբոց Վարդանանց եկեղեցւոյ սարկաւագներու, դպիրներու եւ դպրաց դասի անդամներուն հետ

Կիրակի, 25 Նոյեմբերին, Փրովիտընսի Սրբոց Վարդանանց ծուխը ցնծութեամբ ընդունեց նորընտիր առաջնորդը։ Անուշաւան Սրբազան Հայրը պատարագեց ու ներշնչող քարոզ մը տուաւ Գոհաբանութեան տօնի մասին, ընդգծելով Աստուծոյ երախտապարտ ըլլալու կարեւորութիւնը մեր քրիստոնէական կեանքին մէջ։ Խորանին կր ծառայէին Արժ. Տ. Կոմիտաս Ա. քհնյ. Պաղսարեան եւ Տ. Գաբրիէլ քհնյ. Նազարեան։ Յաւարտ Ս. Պատարագի, Սրբազան Հօր ի պատիւ հիւրասիրութիւն մը տրուեցաւ, որ պատրաստուած էր Տիկնանց Յանձնախումբին կողմէ։ Անուշաւան Սրբազան Հայրը ջերմ ընդունելութեան արժանացաւ ծխականներուն կողմէ։

Անուշաւան Սրբազան Հայրը՝ Տ. Կոմիտասի, Տ. Գաբրիէլի եւ Փրովիտընսի ՀՄԸՄի սկաուտական խումբի անդամներու հետ

ԱՌԱՋՆՈՐԴ ՍՐԲԱԶԱՆ ՀԱՅՐԸ Կ՚ԱՅՑԵԼԷ ՏԻՐՊՈՐՆԻ Ս. ՍԱՐԳԻՍ ԵԿԵՂԵՑԻՆ

Անուշաւան Սրբազան Հայրը եւ Տ. Հրանդ քհնյ. Գէորգեան՝ շրջապատուած Ս. Սարգիս եկեղեցւոյ սարկաւագներով, դպիրներով եւ դպրաց դասի անդամներով

Կիրակի, 18 Նոյեմբերին Անուշաւան Սրբազան Հայրը պատարագեց ու քարոզեց Տիրպորնի Ս. Սարգիս եկեղեցւոյ մէջ։ Յաւարտ Ս. Պատարագի, ընդունելութիւն մը տեղի ունեցաւ եկեղեցւոյ սրահին մէջ, նշելով ծուխին իր այժմու վայրի հաստատման 54ամեակը։ Ծխականները առիթը ունեցան նաեւ նորընտիր Առաջնորդին հանդիպելու եւ ողջունելու։ 

Սկաուտները՝ պատրաստ 

Տ. ՅՈՎՆԱՆ ԿԸ ՆԵՐԿԱՅԱՑՆԷ ԹԵՄԻՍ ԱՌԱՋՆՈՐԴ ՍՐԲԱԶԱՆ ՀԱՅՐԸ ՄԻՋԵԿԵՂԵՑԱԿԱՆ ՃԱՇԿԵՐՈՅԹԻ ՄԸ

Տ. Յովնան Պօզոյեան՝ Ն.Ս. Մորան Մար Փաուլոս Բ.ի եւ մետրոպոլիտ Զաքարիա Մար Նիքոլովոսի հետ

Նիւ Ճըրզիի Սրբոց Վարդանանց եկեղեցւոյ հոգեւոր հովիւ Տ. Յովնան քհնյ. Պօզոյեան Առաջնորդ Սրբազան Հօր անունով ներկայ էր անցեալ 17 Նոյեմբերին տեղի ունեցած ճաշկերոյթի մը, ուր կը մեծարուէր Մալանքարա Ուղղափառ Ասորի եկեղեցւոյ Հիւսիսային Ամերիկայի թեմի մետրոպոլիտ Զաքարիա Մար Նիքոլովոս ՝ եպիսկոպոսական ձեռնադրութեան 25ամեակին առիթով։ Անուշաւան Սրբազան Հօր անունով, Տ. Յովնան շնորհաւորեց մետրպոլիտ Զաքարիան եւ ողջունեց Ն.Ս. Մորան Մար Փաուլոս Բ.ը։

ՀՕՄ-Ի ՇՐՋԱՆԱՅԻՆ ՎԱՐՉՈՒԹԵԱՆ ԱՆԴԱՄՆԵՐ Կ՚ԱՅՑԵԼԵՆ ԱՌԱՋՆՈՐԴԱՐԱՆԸ

Անուշաւան Սրբազան՝ Սանտրա Վարդանեանի եւ Մէրիան Պոնճուքլեանի հետ

Երեքշաբթի, 27 Նոյեմբերին Անուշաւան արքեպիսկոպոս ընդունեց Հայ Օգնութեան Միութեան Արեւելեան ԱՄՆի Շրջանային Վարչութեան անդամուհիներ Սանտրա Վարդանեանի եւ Մէրիան Պոնճուքլեանի այցելութիւնը։ Հանդիպումին ընթացքին արծարծուեցան կրթական ու մշակութային ծրագիրներ, որոնք համատեղ հետաքրքրութիւն կը ներկայացնեն Առաջնորդարանի եւ ՀՕՄի համար։

ԱՍՏՈՒԱԾԱՇՈՒՆՉԻ ԸՆԹԵՐՑՈՒՄՆԵՐ

Բ. ԿԻՐԱԿԻ ՅԻՍՆԱԿԻ ԱՒԵՏԱՐԱՆ ԸՍՏ ՂՈՒԿԱՍՈՒ (13:1-9)   Ոմանք եկան Յիսուսի եւ պատմեցին այն Գալիլեացիներուն մասին, որոնք Պիղատոսի կողմէ սպաննուեցան, երբ Աստուծոյ զոհ կը մատուցանէին: Յիսուս անոնց ըսաւ. – Կը կարծէ՞ք թէ սպաննուող Գալիլեացիները միւս բոլոր Գալիլեացիներէն աւելի մեղաւոր էին, որ այդպիսի վախճան մը ունեցան: Ո՛չ: Կ’ըսեմ ձեզի, որ եթէ չապաշխարէք՝ դուք բոլորդ ալ նոյնպէս պիտի կորսուիք: Կամ ի՞նչ կը մտածէք այն տասնըութը մարդոց մասին, որոնց վրայ ինկաւ աշտարակը Սելովամի մէջ եւ սպաննեց զանոնք: Անոնք աւելի՞ յանցաւոր էին քան Երուսաղէմի բոլոր բնակիչները: Ո՛չ: Կ’ըսեմ ձեզի, որ եթէ չապաշխարէք՝ բոլորդ ալ նոյնպէս պիտի կորսուիք: Անոնց հետեւալ առակը պատմեց. – Մարդ մը կար, որ իր այգիին մէջ թզենի մը տնկած էր: Թուզ քաղելու գնաց, բայց թզենիին վրայ պտուղ չգտաւ: Այգեպանին ըսաւ. «Այս երրորդ տարին է որ կու գամ թուզ քաղելու, բայց չեմ գտներ: Ուստի կտրէ՛ զայն, ինչո՞ւ անիմաստ կերպով տեղ գրաւէ»: Այգեպանը պատասխանեց. «Տէ՛ր, թող այս տարի ալ մնայ. ես իր շուրջի հողը կրկին կր փորեմ եւ պարարտացուցիչ կը դնեմ: Այս ձեւով թերեւս պտուղ տայ. ապա թէ ոչ՝ յաջորդ տարի կտրէ զայն»: Ա. ԹԵՍԱՂՈՆԻԿԵՑԻՆԵՐՈՒՆ (4:1-11)   Վերջապէս, եղբայրնե՛ր, մենք ձեզի սորվեցուցինք թէ ի՛նչպէս պէտք է ապրիլ Աստուծոյ հաճելի ըլլալու համար: Թէպէտ այդպէս կ’ապրիք արդէն, սակայն կը խնդրենք եւ Տէր Յիսուս Քրիստոսի անունով կը թելադրենք՝ որ շարունակէք յառաջանալ ներկայ ձեր ընթացքին մէջ: Գիտէք թէ ի՛նչ պատուէրներ տուինք ձեզի Տէր Յիսուսի անունով, որովհետեւ Աստուծոյ կամքն է, որ դուք սրբուիք եւ ամենեւին հեռու մնաք պոռնկութենէ: Ձեզմէ իւրաքանչիւրը թող սրբութեամբ եւ պատուով ամուսնանայ: Կրքոտ ցանկութիւններու անձնատուր մի՛ ըլլաք հեթա-նոսներուն պէս, որոնք զԱստուած չեն ճանչնար. կամ չլլա՛յ որ մէկը եղբօր մը դէմ մեղանչէ՝ անոր կինը յափշտակելով, որովհետեւ այդ բոլորին համար Տէրը իր դատաստանին մէջ անողոք պիտի ըլլայ, ինչպէս սկիզբէն ըսինք ձեզի եւ ազդարարեցինք: Միթէ Աստուած մեր պղծալից կեանքը շարունակելո՞ւ հրաւիրեց մեզ, թէ՝ սրբութեամբ ապրելու: Անշուշտ թէ սրբութեամբ ապրելու: Հետեւաբար, ով որ սրբութեան այս պատուէրը կ’արհամարհէ՝ մարդ մը անարգած չ’ըլլար, այլ՝ նոյնինքն զԱստուած, որ իր Սուրբ Հոգին կու տայ մեզի: Գալով եղբայրսիրութեան, մեր գրելուն պէտք չունիք, որովհետեւ ինքնին դուք Աստուծմէ սորված էք իրար սիրել, ինչպէս արդէն գործնապէս այդ սէրը ցոյց կու տաք ամբողջ Մակեդոնիայի բոլոր եղբայրներուն նկատմամբ: Բայց դարձեալ, եղբայրնե՛ր, կը խնդրենք որ աւելի առատանաք ձեր սիրոյն մէջ, ջանաք հանդարտ կեանք մը վարել, միայն ձեր գործին նայիլ եւ ձեր աշխատանքի վաստակով ապրիլ, ինչպէս որ պատուիրեցինք ձեզի, որպէսզի ձեր պարկեշտ ընթացքով յարգուիք չհաւատացողներէն եւ ոեւէ մէկուն կարօտ չմնաք: ՃՇ. ԸՆԹԵՐՑՈՒՄ       Ես. 36:22-37:11

ԵԿԵՂԵՑԱԿԱՆ ՕՐԱՑՈՅՑ

ԹԱԴԷՈՍ ԵՒ ԲԱՐԴՈՒՂԻՄԷՈՍ ՍՈՒՐԲ ԱՌԱՔԵԱԼՆԵՐԸ ԵՒ ՄԵՐ ԱՌԱՋԻՆ ԼՈՒՍԱՒՈՐՒՉՆԵՐԸ

Շաբաթ, Դեկտեմբեր 1ին, Հայաստանեայց Առաքելական Եկեղեցին կ՚ոգեկոչէ Թադէոս ու Բարդուղիմէոս առաքեալները։ Անոնք Հայաստանի առաջին աւետարանիչներն էին, որոնք Հայ Եկեղեցիին տուած են իր առաքելական նկարագիրը եւ ճանչցուած են իբրեւ Հայաստանի առաջին լուսաւորիչներ։  Ս. Թադէոս Հայաստան եկած է 43 թուաականին շուրջ՝ քրիստոնէութիւնը քարոզելու համար։ Նահատակուած է հարաւ-արեւելեան Հայաստանի մէջ։ Անոր գերեզմանը կը գտնուի Ս. Թադէոսի վանքը (Իրան), ուր 3րդ դարուն մատուռ մը շինուած է։ Կը կարծուի, որ Բարդուղիմէոսը Հայաստան ժամանած է 66ին։ Նահատակուած է Հադամակերտի մէջ՝ Վանայ լիճի հարաւ-արեւելքը։

Այս շաբաթ նաեւ կը յիշուին՝ Ս. Կղեմես հայրապետ (29 Նոյեմբեր) Ս. Գենարիոս (3 Դեկտեմբեր) Ս. Աբգար՝ առաջին քրիստոնեայ թագաւոր (4 Դեկտեմբեր)

ՄԵՐ ԾՈՒԽԵՐԷՆ

ՆՈՐԹ ԱՆՏՈՎԸՐԻ ԾՈՒԽԸ Կ՚ԱՅՑԵԼԷ ՄԱՅՐ ԵԿԵՂԵՑԻՆ ԵՒ «ՄԵԹՐՈՓՈԼԻԹԸՆ» ԹԱՆԳԱՐԱՆԸ

Նորթ Անտովըրի Ս. Գրիգոր եւ Նիւ Եորքի Ս. Լուսաւորիչ եկեղեցիներու ծխականներ

Կիրակի, 11 Նոյեմբերին, Նորթ Անտովըրի Ս. Գրիգոր եկեղեցւոյ 45 ծխականներ, հոգեւոր հովիւ Տ. Ստեփան քհնյ. Պալճեանի գլխաւորութեամբ Նիւ Եորք ճամբորդեցին։ Անոնք մասնակցեցան Ս. Լուսաւորիչ Մայր Եկեղեցւոյ Ս. Պատարագին, ջերմօրէն ընդունուելով Տ. Մեսրոպ քհնյ. Լագիսեանի եւ ծխականներուն կողմէ։ «Բաշալեան» սրահին մէջ տեղի ունեցած ճաշկերոյթին երկու քահանաները խօսք առին։ Տ. Մեսրոպ բարի գալուստ մաղթեց հիւրերուն՝ Առաջնորդ Սրբազան Հօր, հոգաբարձութեան եւ համանքին անունով։ Ան յատկապէս նշեց, թէ 2018ի Մայիսին Նորթ Անտովըրի մէջ տեղի ունեցած Ազգ. Երեսփոխանական Ժողովը լաւագոյններէն էր, որուն ներկայ գտնուած էր իր քահանայական ծառայութեան տարիներուն։     Տ. Ստեփան, իր կարգին, ողջունեց Առաջնորդ Սրբազան Հայրը, Տ. Մեսրոպը, հոգաբարձութիւնը եւ բոլոր կազմակերպութիւնները, ներկայացնելով Ս. Գրիգոր եկեղեցւոյ հոգաբարձութենէն կարգ մը անդամներ։ Ան շնորհակալութիւն յայտնեց Տ. Մեսրոպին եւ Ս. Լուսաւորիչի համայնքին իրենց ջերմ հիւրասիրութեան համար, անդրադառնալով Տ. Մեսրոպի դերին որպէս իր աւագ հոգեւոր եղբայրը եւ յոյս յայտնելով, որ միեւնոյն կապը պիտի պահպանուի ապագային։  Այնուհետեւ, Նորթ Անտովըրի խումբը եւ Մայր Եկեղեցիէն փոքրաթիւ խումբ մը «Մեթրոփոլիթըն» թանգարանի «Հայաստա՛ն» ցուցահանդէսը այցելեցին։ Ուղեւորները տուն վերադարձան՝ հարստացած իրենց փորձառութեամբ։

ԱՆԹԻԼԻԱՍԻ ԵՐԻՏԱՍԱՐԴԱԿԱՆ ԴԱՍԸՆԹԱՑՔԻ ՄԱՍԻՆ ՆԵՐԿԱՅԱՑՈՒՄ՝ ՓՐՈՎԻՏԸՆՍԻ ՄԷՋ

Ձախէն աջ՝ Ռէյչլ Մինասեան, Գառի Մինասեան, Տ. Գաբրիէլ քհնյ. Նազարեան, Աննա-Մարի Տանայեան եւ Սարգիս Մենիսեան

Նոյեմբերի ցուրտ երեկոյ մը, Փրովիտընսի Ս. Վարդանանց եկեղեցւոյ «Ֆերմանեան» սրահին մէջ, բաւական մեծ լսարան մը հաւաքուած էր ողջունելու եկեղեցւոյ չորս երիտասարդ անդամները, որոնք մասնակցած էին Կիլիկիոյ Կաթողիկոսութեան ամառնային երիտասարդական դասընթացքին՝ Քրիստոնէական Դաստիարակութեան յանձնախումբի կազմակերպութեամբ։ Տ. Գաբրիէլ քհնյ. Նազարեանի բացման աղօթքէն ետք, չորս մասնակիցները՝ Աննա-Մարի Տանայեան, Սարգիս Մենիսեան, Գառի Մինասեան եւ Ռէյչլ Մինասեան, իրենց խոհերը կիսեցին ներկաներուն հետ։ Անոնք իրենց ջերմ գնահատանքը յայտնեցին եկեղեցւոյ, Առաջնորդարանին ու Կաթողիկոսարանին, որոնք առիթը տուած էին, իրենց իսկ խօսքերով, «անկիւնադարձային ձեռնարկ»ի մը մասնակցելու։ Երիտասարդները բացատրեցին, թէ ինչպէ՞ս Աստուծոյ, հաւատքի ու եկեղեցւոյ աւելի մօտ զգացած էին իրենք զիրենք՝ դասընթացքին մասնակցելէ ետք։ Յատուկ յիշատակութեան արժանի էր Արամ Վեհափառի հետ ժամանակակից հարցեր քննարկելու առիթը, ուր հարցումներ ընելու քաջալերանքը ստացած էին։ Անոնք նաեւ անդրադարձան վարդապետներու ստեղծած ջերմ մթնոլորտը։ Հարց ու պատասխանի բաժնին, չորս երիտասարդները միաձայնութամբ ըսին, թէ անպայման կրկին պիտի յաճախէին դասընթացքի մը, եթէ առիթը տրուէր։ Յոյս յայտնեցին, թէ ասիկա Կաթողիկոսարանի կողմէ մնայուն ձեռնարկ մը կը դառնայ, որպէսզի ուրիշ երիտասարդներ նման ներշնչող փորձառութիւն մը ունենան։ Վերջաւորութեան տեղի ունեցաւ հիւրասիրութիւն մը։ 

ՄԵՐ ԴՊՐՈՑՆԵՐԷՆ

Ս. ԼՈՒՍԱՒՈՐԻՉ ՄԱՅՐ ԵԿԵՂԵՑՒՈՅ ԿԻՐԱԿՆՕՐԵԱՅԻ ԱՇԱԿԵՐՏՆԵՐԸ «ՄԵԹՐՈՓՈԼԻԹԸՆ» Կ՚ԵՐԹԱՆ

Ս. Լուսաւորիչ Մայր Եկեղեցւոյ կիրակնօրեայ դպրոցի աշակերտները այս տարի որոշած էին «Մեթրոփոլիթըն» թանգարանի հայկական ցուցահանդէսը այցելել իբրեւ տարեկան զբօսապտոյտ։ Ցուցադրութեան ընթացքին, աշակերտները դիտեցին, թէ ինչպէ՞ս նշխարները, ձեռագիրները եւ իրերը կը կապուին իրենց սորվածին հետ։ Այս տարի անոնք կեդրոնացած են սուրբերուն վրայ, ուստի յատուկ հետաքրքրութիւն կը ներկայացնէր անոնց ներկայութիւնը ցուցադրութեան տարբեր բաժիններու մէջ։ Ուսուցիչներն ու աշակերտները շնորհակալութիւն յայտնեցին Տ. Մեսրոպ քհնյ. Լագիսեանին եւ հոգաբարձութեան՝ այս հիանալի պտոյտը արտօնելու համար։

«ՀԱՅԿԱԶԵԱՆ» ԴՊՐՈՑԸ ՖԻԼԱՏԵԼՖԻԱՅԻ ՄԷՋ

Աշակերտներուն գեղարուեստական գործերը կը ցուցադրուին

Վերջին երկու ամիսներուն, Ֆիլատելֆիայի Ս. Գրիգոր Լուսաւորիչ եկեղեցւոյ «Հայկազեան» շաբաթօրեայ դպրոցի աշակերտները երկու աշնանային տօներու մասին սորվեցան՝ Սրբոց Թարգմանչաց տօնը եւ Գոհաբանութեան օրը։ Սրբոց Թարգմանչացի առիթով, աշակերտները սորվեցան, թէ ինչպէ՛ս ստեղծուեցան հայ գիրերը եւ ինչպէ՛ս գիրերու գիւտը հիմքը դարձաւ Հայաստանի գրականութեան ոսկեդարուն։ Աշակերտները իրենց գեղարուեստական գործերը պատրաստեցին, որոնք ցուցադրուեցան դասարաններուն մէջ։

ԸՆՏԱՆԵԿԱՆ ՆԱԽԱՃԱՇԻ ԱՒԱՆԴՈՒԹԻՒՆԸ ԿԸ ՇԱՐՈՒՆԱԿՈՒԻ

Փրովիտընսի կիրակնօրեայ դպրոցը ընտանեկան նախաճաշ կը հրամցնէ տարին քանի մը անգամ

Աշակերտներն ու ծնողները յատուկ վզնոցներ կը պատրաստեն ծերանոցի մը բնակիչներուն համար

Փրովիտընսի Սբ. Վարդանանց եկեղեցւոյ կիրակնօրեայ դպրոցը, չորրորդ տարին ըլլալով, կը շարունակէ կազմակերպել ընտանեկան նախաճաշեր։ Այս նախաճաշերը, որոնք սիրուած ձեռնարկներ են, կիրակնօրեայի շուրջ բոլորուած ընտանիքները քով-քովի կը բերեն տարին քանի մը անգամ՝ ընկերային միջավայր մը ստեղծելու, յատուկ աստուածաշնչական պատգամ մը եւ ձեռային աշխատանքներ բաժնեկցելու համար։ Ծուխը յատուկ շնորհակալութիւն կը յայտնէ Արանց ակումբի անդամներէն Արմանտ Քիպարեանին, որ սիրայօժար իր ժամանակը կը տրամադրէ նախաճաշը պատրաստելու համար։  Կիրակի, 18 Նոյեմբերին բոլոր աշակերտներն ու իրենց ընտանիքները վայելեցին հիանալի նախաճաշ մը՝ աղօթքէն ետք։ Այնուհետեւ, բոլոր ընտանիքները միասնաբար յատուկ վզնոցներ պատրաստեցին, որոնք պիտի նուիրուին Կիրակի, 9 Դեկտեմբերին Cedar Crest ծերանոցին մէջ տեղի ունենալիք Կաղանդի յայտագրի մը ընթացքին։ Այս յայտագիրը ուղղուած է Ծննդեան օրերու սիրոյ ու յոյսի պատգամը բաժնեկցելու, երբ աշակերտները, իրենց ընտանիքներն ու բարեկամները աւանդական երգեր կ՚երգեն ու Յիսուսի ծննդեան պատմութիւնը կը պատմեն աւելի քան 50 տարեցներու։ Յայտագրէն ետք, իւրաքանչիւր բնակիչ անձնական Կաղադի բացիկ մը եւ վզնոց մը պիտի ստանայ։

ԿԻՐԱԿՆՕՐԵԱՅ ԴՊՐՈՑՆԵՐՈՒ ՄԻԱՍՆԱԿԱՆ ՁԵՌՆԱՐԿ ՌՈՏ ԱՅԼԸՆՏԻ ՄԷՋ

Աշակերտները դասը մտիկ կ՚ընեն

Ռոտ Այլընտի երեք հայկական եկեղեցիները քով-քովի եկան իրենց կիրակնօրեայ դպրոցներու միասնական ձեռնարկին համար, Կիրակի, 28 Հոկտեմբերին։ Այս տարուան ձեռնարկին հիւրընկալն էր Հայ Աւետարանական եկեղեցին, իսկ Սրբոց Վարդանանց ու Ս. Սահակ-Մեսրոպ եկեղեցիներու բազմաթիւ աշակերտներ ներկայ էին իրենց ընտանիքներուն հետ։ Աշակերտները սկզբնապէս հաւաքուեցան ժողովարանին մէջ՝ արարողութեան սկզբնաւորութեան համար։ Հայ Աւետարանական եկեղեցւոյ հովիւը՝ Պատ. Արա Հեղինեան, յատուկ պատգամ մը տուաւ, թէ ինչպէ՞ս բոլորս տարբեր ենք եւ թէ ինչպէ՞ս մեզմէ իւրաքանչիւրը եկեղեցիին մաս կը կազմէ։ Այնուհետեւ, աշակերտներն ու ծնողները վարի սրահը գացին, ուր մասնակցեցան Աւետարանական եկեղեցւոյ կիրակնօրեայ դպրոցի տնօրէնուհի Մելանի Զէյթունեանի դասին։ Այնուհետեւ, աշակերտները միասնաբար հիւրասիրուեցան։

Զարեհ Որբունի  (մահ՝ Դեկտեմբեր 1, 1980)

Սփիւռքահայ գրականութեան լաւագոյն դէմքերը համախմբուած էին Ֆրանսայի մէջ 1920-1930ական թուականներուն։ Շահան Շահնուրի, Նիկողոս Սարաֆեանի եւ Վազգէն Շուշանեանի կողքին, Զարեհ Որբունիի անունը, թէեւ աւելի նուազ ծանօթ ընթերցողին, պիտի արժանանար որոշ ուշադրութեան մինչեւ 1970ական թուականները։ Բուն անունով Զարեհ Էօքսիւզեան, Որբունի ծնած է Օրտու (Թուրքիա), Սեւ ծովու ափը, 24 Մայիս 1902ին։ Նախնական ուսումը ստացած է տեղւոյն «Մովսէսեան» դպրոցին մէջ։ Հայրը զոհ դարձած է Մեծ Եղեռնին, բայց մայրը յաջողած է իր չորս զաւակներով փախուստ տալ եւ ապաստան գտնել Սեւաստոպոլ (Խրիմ)։ Ա. Աշխարհամարտի աւարտին, ընտանիքը փոխադրուած է Կ. Պոլիս, ուր Զարեհ յաճախած է «Պէրպէրեան» վարժարանը 1919-1922ին։ Ան իր առաջին գործերը հրատարակած է «Ժողովուրդի Ձայնը» օրաթերթին մէջ, Զարեհ Որբունի ստորագրութեամբ (թրքերէն էօքսիւզ բառին հայացումը)։ Հազարաւոր հայերու շարքին, որոնք քեմալական շարժումէն փախուստ կու տային, Որբունի ու իր ընտանիքը Ֆրանսա ապաստան գտած են Օգոստոս 1922ին։ Երկու տարի Մարսէյլ մնալէ ետք, 1924ին ապագայ գրագէտը անցած է Փարիզ։ Նոյն տարին, «Նոր Հաւատք» անունով գրական կարճատեւ պարբերական մը հրատարակած է ուրիշ խոստմնալից երիտասարդի մը՝ Պետրոս Զարոյեանի հետ (1903-1986)։ Որբունի որոշ շրջան մը ֆրանսական համայնավար կուսակցութեան անդամակցած է, 1930ական թուականներուն լքելով զայն։ Ֆրանսահայ մամուլին աշխատակցութեան կողքին, Որբունի յղացած է «Հալածուածները» վիպաշարքը, որուն առաջին հատորը՝ «Փորձը», լոյս տեսած է 1929ին։ Հոն ներկայացուած է Մարսէյլ հաստատուած հայ գաղթական ընտանիքի մը դժուար կեանքը՝ բոլորովին օտար միջավայրի մը ներգործութեան տակ։ Որբունի մտած է «Մենք» խումբին մէջ, որ 1931-1932ին հրատարակած է համանուն հանդէսը՝ գրական հասկացութիւններու յեղաշրջում մը յառաջացնելու նպատակով։ Արդէն 1930ին ան փոխադրուած է Սթրազպուրկ, ուր պիտի մնար մինչեւ 1937։ Վերադառնալով Փարիզ, 1938-1939ին հրատարակած է «Լուսաբաց» անունով ուրիշ գրական թերթ մը Զարոյեանի հետ։ «Վարձու սենեակ» պատմուածքներու հատորը տպուած է 1939ին, բայց միայն հրապարակ ելած է պատերազմէն ետք։ Արդարեւ, Որբունի զինուորագրուած է ֆրանսական բանակին մէջ, բայց գերի ինկած է գերմանացիներուն ձեռքը եւ Մակտեպուրկ մնացած՝ մինչեւ 1945։  Փարիզ վերադարձին, 1946ին Որբունի հրաւիրուած է Հայաստանի՝ խորհրդահայ գրողներու Բ. Համագումարին, իբրեւ սփիւռքահայ հիւրերէն մէկը։ Իր տպաւորութիւնները հրատարակած է «Դէպի երկիր» հատորով (1947)։ Գրականութեան վերադարձած է պատմուածքներու երկրորդ հատորով մը՝ «Անձրեւոտ օրեր» (1958), որուն հետեւած է ուրիշ հաւաքածոյ մը՝ «Գոհարիկ եւ ուրիշ պատմուածքներ», 1966ին։ Այս պատմուածքները յատկանշուած են կերպարներու հոգեվիճակի հետազօտութեամբ, դառնալով տեսակ մը նախափորձ՝ 1960ական թուականներուն վիպական մեծ գործերու վերադարձին համար։ Արդարեւ, աւելի քան երեք տասնամեակ ետք, Որբունի կը վերադառնար վիպագրութեան, առաջին հերթին՝ «Եւ եղեւ մարդ» վէպով (1964), որ «Հալածուածներ»էն անկախ գործ մըն էր, ուր սակայն արդէն կը գծուէին ապագայ գործերը։ 1967-1974ին ֆրանսահայ գրագէտը լոյս պիտի ընծայէր իր եօթը հատորնոց շարքէն երեք հատոր՝ «Թեկնածուն» (1967), «Ասֆալթը» (1972) եւ «Սովորական օր մը» (1974), որոնք իր արտադրութեան ամենէն կարեւոր մասը կը ներկայացնէր, սփիւռքեան ինքնութեան աննախադէպ հարցադրումներով։ «Եւ եղեւ մարդ» վերնագրով ժողովածու մը, որ կը ներառէր համանուն վէպը, ինչպէս եւ «Փորձը» ու պատմուածքներու շարք մը, լոյս տեսած է Երեւանի մէջ, 1967ին։ Որբունի իր մահկանացուն կնքած է Դեկտեմբեր 1, 1980ին, Պանեօ փարիզեան արուարձանին մէջ։ «Հալածուածներ»ու շարքէն երկու հատոր՝ «Մահազդ» եւ «Զի քո է կարողութիւն», լոյս տեսած է «Կամ» վերլուծական հանդէսին մէջ (1980 եւ 1982), մինչ վերջին՝ եօթներորդ հատորը անտիպ կը մնայ։ Որբունիի գործը վերջին տասնամեակներուն սկսած է գրաքննադատական հետաքրքրութեան արժանանալ, իսկ 2016ին Սիրաքիւզի համալսարանի հրատարակչատունը լոյս ընծայած է առաջին թարգմանութիւնը՝ «Թեկնածուն» վէպը անգլերէնով, Ճէնիֆր Մանուկեանի եւ Իշխան Ճինպաշեանի կողմէ։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org )։

ԵԹԷ ԸՍԵԼԻՔ ՈՒՆԻՔ...

. . . գրեցէք մեզի crossroads@armenianprelacy.org հասցէին։   Մեր ելեկտրոնային շաբաթական լրատուի՝ “CROSSROADS”-ի մասին ձեր կարծիքն ու ձեր առաջարկները մեզ շատ կը հետաքրքրեն։ Ա՛յս նպատակով հաստատեցինք նամակագրութեան վերի յատուկ հասցէն։

ՍՈՒՐԻԱՀԱՅ ՀԱՄԱՅՆՔԸ ՍԿՍԱԾ Է ՎԵՐԱՇԻՆՈՒԹԵԱՆ

Կռիւն ու ռումբերը վերջ գտած են։ Հիմա վերաշինութեան դժուարին գործընթացը սկսած է։ Շարունակեցէք սուրիահայութիւնը ներկայ պահել ձեր աղօթքներուն ու քսակներուն մէջ Սուրիահայութեան Օգնութեան Ֆոնտին նուիրատուութիւնները կարելի է առցանց կատարել։  Անմիջապէս նուէր մը կատարելու համար, սեղմեցէ՛ք այստեղ եւ ընտրեցէ՛ք SYRIAN ARMENIAN RELIEF։ Այլապէս, ձեր նուիրատուութիւնը ղրկեցէք հետեւեալ հասցէին՝ Armenian Prelacy 138 E. 39 th Street New York, NY 10016 Չէքերը գրեցէք Armenian Apostolic Church of America անունին (Memo: Syrian Armenian Relief) Շնորհակալութիւն ձեր օժանդակութեան համար։

ԺԱՄԱՆԱԿԱՑՈՅՑ

«Սիամանթօ» լսարանի դասերը տեղի կ՚ունենան իւրաքանչիւր ամսուան երկրորդ Շաբաթ օրը «Յովնանեան» վարժարանին մէջ, Նիւ Ճըրզի։ Յաջորդ դասը՝ Շաբաթ, 8 Դեկտեմբերին։ Տեղեկութիւններու համար՝ anec@armenianprelacy.org կամ 212-689-7810։ Մինչեւ 13 Դեկտեմբեր (Հինգշաբթի օրերը) —Յայտնութեան գիրքի սերտողութիւն, եօթը մասով, Ս. Լուսաւորիչ մայր եկեղեցւոյ մէջ, Նիւ Եորք։ Բանախօս՝ Շանթ սրկ. Գազանճեան, Ազգային Առաջնորդարանի Քրիստոնէական Դաստիարակութեան վարիչ։ Տեղեկութիւններու համար, դիմեցէք եկեղեցւոյ գրասենեակին ելեկտրոնային նամակով ( office@stilluminators.org ) կամ հեռաձայնով՝ (212) 689-5880։ Մինչեւ 13 Յունուար, 2019 —Հայոց պատմութեան ու մշակոյթին նուիրուած «Հայաստա՛ն» ցուցահանդէսը կը շարունակուի Նիւ Եորքի «Մեթրոփոլիթըն» թանգարանին մէջ։ Ամբողջութեամբ Հայաստանի նուիրուած առաջին ցուցահանդէսն է այս նշանաւոր թանգարանին մէջ, պատրաստութեամբ՝ դոկտ. Հելըն Էվընզի։ 2 Դեկտեմբեր —Թեմիս առաջնորդ Գերշ. Տ. Անուշաւան եպս. Դանիէլեանի ի պատիւ ճաշկերոյթ՝ իր առաջնորդ ընտրուելուն առիթով։ Ընդունելութիւն՝ ժամը 2:30ին, ընթրիք եւ յայտագիր՝ ժամը 3:30ին։ ՏՈՄՍԱԿՆԵՐԸ ՍՊԱՌԱԾ ԵՆ։ 9 Դեկտեմբեր —“What’s in a Name? The Etymology of Armenian Surnames”։ Դասախօսութիւն՝ գրող եւ խմբագիր C. K. Garabed-ի կողմէ։ Կէսօրէ ետք ժամը 1։00ին, «Բաշալեան» սրահ, Ս. Լուսաւորիչ Մայր Եկեղեցի, Համազգային Հայ Մշակութային Միութեան Շրջանային Վարչութեան եւ Ս. Լուսաւորիչ Մայր Տաճարի հովանաւորութեամբ։ 16 Դեկտեմբեր —Ս. Սարգիս եկեղեցւոյ (Տիրպորն, Միշիկըն) կիրակնօրեայ դպրոցի Կաղանդի հանդէս «Առաքելեան» սրահին մէջ, յաւարտ Ս. Պատարագի։ 31 Դեկտեմբեր — Նոր Տարուան ճաշկերոյթ ու պարահանդէս Սրբոց Վարդանանց եկեղեցւոյ մէջ (Ռիճֆիլտ, Նիւ Ճըրզի), երեկոյեան ժամը 8։00էն սկսեալ։ 5 Յունուար — Ս. Սարգիս եկեղեցի (Տիրպորն, Միշիկըն), Ս. Ծննդեան տօնակատարութիւն։  17 Մարտ — “Musical Armenia” համերգ, ժամը 2:00ին, Carnegie Hallի Weill Recital Hallի մէջ։ Հետեւեցէ՛ք մանրամասնութիւններուն։   5 Մայիս —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակ։ Թուականը նկատի ունեցէք։

Follow us on Social Media

‌ ‌

The Armenian Prelacy  Tel: 212-689-7810 ♦ Fax: 212-689-7168 ♦ Email: email@armenianprelacy.org Visit the Catholicosate webpage at  http://www.armenianorthodoxchurch.org/en/