ᐅᑐᐱᕆ 2018
ᓄᑖᖑᔪᑦ WSCC CONNECT ᐱᔨᑦᑎᕋᐅᑏᑦ
ᐃᑭᐊᖅᖠᒥᐅᑕᖅ ᐱᓕᕆᐊᖑᔪᖅ ᑐᓴᐅᒪᑎᑦᑎᔾᔪᑎ



WSCC Connect ᐃᓕᓯᓯᒪᔪᖅ ᓄᑖᒥ ᖃᕋᓴᐅᔭᒃᑯᑦ ᐱᔨᑦᑎᕋᐅᑎᒥ ᑐᓂᓯᔪᓐᓇᕐᓂᐊᕋᕕᑦ ᑐᓴᐅᒪᑎᑦᑎᔾᔪᑎᒥ ᐃᑭᐊᖅᖠᒥᐅᑕᕐᓂ ᐱᓕᕆᓂᐊᕐᓂᕐᒧᑦ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄ.

ᐱᓕᕆᐊᖃᕈᕕᑦ ᐱᓕᕆᐊᒃᓴᒥ ᐃᓚᖃᖅᑐᒥ ᐃᑭᐊᖅᖠᒥᐅᑕᕐᒥ ᐅᕝᕙᓘᓐᓃᑦ ᐃᓚᖃᕈᓂ ᐲᔭᐃᓂᕐᒥ ᐃᑭᐊᖅᖠᒥᐅᑕᒥᑦ ᐃᓗᓕᖃᖅᑐᑦ ᓱᓇᒃᑯᑖᓂᒃ, ᑐᓂᓯᒋᐊᖃᖅᑐᑎᑦ ᑐᓴᐅᒪᑎᑦᑎᔾᔪᑎᒥ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄ. ᑖᓐᓇ ᑐᕌᖓᔪᖅ ᖃᓄᐃᑦᑐᑐᐃᓐᓇᕐᒧᑦ ᐃᑭᐊᖅᖠᒥᐅᑕᕐᒥ ᐱᓕᕆᐊᖑᔪᒥ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ.

ᑖᓐᓇ  ᐃᑭᐊᖅᖠᒥᐅᑕᖅ ᐱᓕᕆᐊᖑᔪᖅ ᑐᓴᐅᒪᑎᑦᑎᔾᔪᑎ  ᐱᔨᑦᑎᕋᐅᑎ ᐱᕕᖃᖅᑎᑦᑎᔪᖅ ᐃᖅᑲᓇᐃᔭᖅᑎᖁᑎᓕᖕᓂ ᑐᓂᓯᓂᕐᒧᑦ ᑐᓴᐅᒪᑎᑦᑎᔾᔪᑎᓂ ᖃᕋᓴᐅᔭᒃᑯᑦ, ᕿᒥᕐᕈᐊᕈᓐᓇᕐᓂᕐᒥᓪᓗ ᑐᓴᐅᒪᑎᑦᑎᔾᔪᑎᓂ ᑐᓂᓚᐅᖅᓯᒪᔭᓐᓂ.

ᖃᓄᐃᒻᒪ ᑐᓴᖅᑎᑦᑎᔭᕆᐊᖃᖅᐱᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᐃᑭᐊᖅᖠᒥᐅᑕᕐᓂ ᐱᓕᕆᐊᖃᕐᓂᐊᕐᓂᓐᓂ?

ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᓴᓇᕝᕕᖕᒥ ᐱᓕᕆᔾᔪᓯᐅᔪᑦ ᐊᒻᒪᓗ ᐅᔾᔨᖅᓱᕐᓂᖏᑦ ᐲᔭᐃᑎᓪᓗᒋᑦ ᐃᑭᐊᖅᖠᒥᐅᑕᒥᑦ ᐃᓗᓕᖃᖅᑐᑦ ᓱᓇᒃᑯᑖᓂᒃ ᐊᔾᔨᒌᖏᕈᓘᔭᖅᑐᑦ ᓱᓇᒃᑯᑖᑦ ᐲᔭᖅᑕᐅᔪᑦ ᖃᓄᐃᑦᑑᓂᖏᑦ ᒪᓕᒃᖢᒋᑦ, ᖃᓄᑎᒋ ᑖᒃᑯᐊ ᐃᑭᐊᖅᖠᒥᐅᑕᒥᒃ ᐃᓗᓕᖃᕐᓂᖏᑦ, ᖃᓄᐃᓕᖓᓂᖏᓪᓗ ᐊᒻᒪᓗ ᓇᒦᓐᓂᖏᑦ. ᑐᓴᒪᑎᑦᑎᓂᕐᒥ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᖃᓄᐃᑦᑐᑐᐃᓐᓇᕐᒧᑦ ᐱᓕᕆᐊᖑᔪᒥ ᐃᓚᖃᖅᑐᒥ ᐃᑭᐊᖅᖠᒥᐅᑕᓕᖕᒥ, ᑲᔪᓯᑦᑎᐊᖅᑎᑦᑎᔪᑎ ᑲᒪᒋᔭᕆᐊᓕᖕᓂ ᐊᑖᒍᑦ  ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓕᖕᓂ, ᐊᒻᒪᓗ ᐱᕕᖃᖅᑎᑦᑎᔪᑎ ᐃᓕᖕᓂ ᐃᑲᔪᕈᓐᓇᕐᓗᑕ ᐱᓕᕆᓂᐅᔪᒧᑦ ᐃᑲᔪᖅᑕᐅᒋᐊᖃᕈᕕᑦ.

ᓇᓗᖅᑰᔨᒍᕕ ᑖᓐᓇ ᖃᕋᓴᐅᔭᒃᑯᑦ ᐱᔨᑦᑎᕋᐅᑎ ᐃᓕᖕᓄᑦ ᓇᖕᒥᓂᕆᔭᓐᓄᓪᓘᓐᓃᑦ ᑐᕌᖓᒻᒪᖔᖅ, ᖃᐅᔨᒋᐊᕐᕕᐅᔪᓐᓇᖅᑐᒍ ᐅᕙᓂ 1-800-661-0792 ᐅᖃᖃᑎᖃᕐᓂᐊᕋᕕᑦ ᐊᑦᑕᓇᔾᔭᐃᖅᓯᒪᔪᓕᕆᔨᑦᑎᓐᓂ.


ᑕᐃᑲᓃᖏᒃᑯᕕ ᓱᓕ  WSCC Connect, ᑲᔪᖏᖅᓴᐃᕗᒍᑦ ᓇᖕᒥᓂᕆᔭᐅᔪᓕᒫᑦ  ᐊᑎᓕᐅᕐᓗᑎ ᐃᓯᕈᑎᒧᑦ.
ᑭᓱ ᓄᑖᖑᕙ

ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ ᐊᑐᐃᓐᓇᐅᑎᑦᑎᓲᑦ ᐱᓪᓚᑦᑖᓂ, ᒪᓕᒋᐊᓕᖕᓂ ᐃᑲᔫᑎᓂ ᐊᔾᔨᒌᙱᑦᑐᓄᑦ ᐃᑲᔪᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᓂ ᐊᒻᒪᓗ ᐃᖅᑲᓇᐃᔭᖅᑎᓂ ᑐᑭᓯᐅᒪᖃᓪᓗᒋᑦ ᐊᒻᒪᓗ ᑎᑭᐅᒪᖁᓪᓗᒋᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐊᑐᕐᒃᑕᐅᕙᒃᑐᓂᒃ ᐱᓯᒪᔭᐅᔭᕆᐊᓕᖕᓂ ᒪᓕᒐᑦᑎᓐᓄ. ᓴᖅᑮᖏᓐᓇᐅᔭᖅᑐᒍᑦ ᓄᑖᓂᒃ ᒪᓕᒋᐊᓕᖕᓂ. ᐃᓕᓐᓂᐊᒃᑲᓐᓂᓂᕐᒧᑦ, ᑕᑯᒋᐊᕐᓗᒍ ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᑦ ᒪᑉᐱᖅᑐᒐᖅ.

ᓄᑖᖅ ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ: ᐋᖓᔮᕐᓇᖅᑐᖅ ᐱᕈᖅᑐᕕᓂᖅ

ᐃᖅᑲᓇᐃᔭᖅᑎᖁᑎᓖᑦ ᑲᒪᒋᔭᖃᐃᓐᓇᐅᔭᖅᐳᑦ ᓇᓗᓇᐃᖅᓯᔭᓂᕐᒥ ᐃᖅᑲᓇᐃᔭᖅᑎᖏᑦ "ᐱᓕᕆᔪᓐᓇᑦᑎᐊᕋᓗᐊᕐᒪᖔᑦ ᐃᖅᑲᓇᐃᔭᕐᓂᕐᒧᑦ", ᐅᕝᕙᓘᓐᓃᑦ ᐱᓕᕆᑦᑎᐊᕈᓐᓇᕐᓂᖏᓐᓂ ᐊᑦᑕᓇᙱᑦᑎᐊᕐᓂᐅᔪᒥ. ᑕᒪᓐᓇ ᐊᓯᔾᔨᙱᓚᖅ ᐱᕋᔭᖕᓂᐅᔪᓐᓃᖅᑐᒥ ᓱᓐᓂᐅᒪᑐᐃᓐᓇᕈᑕᐅᔪᓄᑦ ᐋᖓᔮᕐᓇᖅᑐᖅ ᐱᕈᖅᑐᕕᓂᕐᓄᑦ. ᑖᓐᓇ ᐋᖓᔮᕐᓇᖅᑐᒧᑦ ᐱᕈᖅᑐᕕᓂᕐᒧᑦ ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ ᐊᑐᐃᓐᓇᐅᑎᑦᑎᔪᖅ ᑐᑭᓯᒋᐊᕈᑎᓂ ᐃᖅᑲᓇᐃᔭᖅᑎᖁᑎᓕᖕᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᖃᓄᐃᓕᖓᕆᐊᖃᕐᒪᖔᑦ ᑲᔪᓯᑎᑦᓯᓂᕐᒧᑦ ᐊᑦᑕᓇᔾᔭᐃᖅᓯᒪᔪᒥ ᐃᖅᑲᓇᐃᔭᕐᕕᖕᒥ ᐋᖓᔮᕐᓇᖅᑐᖅ ᐱᕈᖅᑐᕕᓂᖅ ᒪᓕᒐᙳᖅᑎᑕᐅᓂᖓᓄᑦ, ᐊᒻᒪᓗ ᐃᓚᖃᖅᑐᖅ ᐆᒃᑑᑎᓂ ᓱᓐᓂᐅᒪᓂᕐᒧᑦ ᐊᑐᐊᒐᕐᓂᒃ ᐃᖅᑲᓇᐃᔭᖅᑎᖁᑎᓕᖕᓄᑦ ᐊᓯᔾᔨᖅᑕᐅᓗᑎ ᓇᖕᒥᓂ ᐊᑐᖅᑕᐅᓗᑎ.



ᑖᓐᓇ  ᐋᖓᔮᕐᓇᖅᑐᒧᑦ ᐱᕈᖅᑐᕕᓂᕐᒧᑦ  ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ ᑐᕌᖓᖃᓯᐅᑎᔪᖅ ᑖᒃᑯᓄᖓ ᐃᓚᖏᓐᓄᑦ ᒪᓕᒐᓕᐊᖑᓯᒪᔪᓂ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ:
  • ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓖᑦ, ᐃᓚᖓ 35.1, "ᓱᓐᓂᐅᒪᓂᖅ"
     
  • ᐅᔭᕋᖕᓂᐊᕐᕕᖕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓖᑦ, ᐃᓚᖓ 18.1.01 (ᓄᓇᑦᓯᐊᕐᒥ), ᓱᓐᓂᐅᒪᓂᖅ, ᐊᒻᒪ ᐃᓚᖓ 18.02.1 (ᓄᓇᕗᒻᒥ), ᓱᓐᓂᐅᒪᓂᖅ
ᑖᓐᓇ ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ ᐃᓚᓕᐅᑎᓯᒪᓕᖅᑐᖅ ᐊᓯᖕᓄᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐃᑲᔪᕈᑎᒃᓴᓄᑦ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓄ ᓴᖅᑭᓯᒪᔭᖏᓐᓂ ᐋᖓᔮᕐᓇᖅᑐᖅ ᐱᕈᖅᑐᕕᓂᖅ ᒪᓕᒐᙳᖅᑎᑕᐅᓂᖓᓄᑦ ᐊᒻᒪᓗ ᓱᓐᓂᐅᒪᓂᕐᒧᑦ ᐅᓪᓗᒥᒧ. ᐊᑐᐃᓐᓇᖃᕐᕕᐅᔪᑎ ᑖᒃᑯᓂᖓ ᐃᓕᓐᓂᐊᕈᑎᒃᓴᓂ ᐅᕙᓂ  http://www.wscc.nt.ca/iu/impairment-iu ᐅᕝᕙᓘᓐᓃᑦ  http://www.wscc.nu.ca/iu/impairment-iu.

ᐊᐱᖅᑯᑎᒃᓴᖃᕐᓂᕈᕕᑦ ᐱᔾᔪᑎᒋᓗᐳ ᐃᖅᑲᓇᐃᔭᕐᕕᖕᒥ ᐱᔭᒃᓴᕆᔭᐅᔪᓂ ᐊᑖᒍᑦ  ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓕᖕᓂ  ᐊᒻᒪᓗ  ᐅᔭᕋᖕᓂᐊᕐᕕᖕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓕᖕᓂ, ᐅᖄᓚᕕᐅᔪᓐᓇᖅᑐᒍ ᐅᕙᓂ 1-800-661-0792.


ᐋᓐᓂᖅᑐᓕᕆᓂᕐᒧᑦ ᐊᑎᓕᐅᕐᓂᖅ ᑎᑎᕋᕐᕖᑦ
ᐊᑐᐃᓐᓇᐅᓕᖅᑐᖅ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ!

ᖃᐅᔨᒪᕖ ᐃᖅᑲᓇᐃᔭᖅᑎᖁᑎᓖᑦ ᑕᐃᒪᐃᑎᑕᐅᕗᑦ ᐊᑖᒍᑦ  ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒃᑕᐅᔭᕆᐊᓕᖕᓂ  ᐱᓯᒪᑦᑏᓐᓇᕐᓗᑎ ᑎᑎᖅᑲᖁᑎᓂ ᐃᖅᑲᓇᐃᔮᒧᑦ ᑐᕌᖓᔪᓂ ᐋᓐᓂᕐᓂᐅᔪᓂᑦ ᐊᕐᕌᒍᓄᑦ ᐱᖓᓱᓄᑦ? ᐃᓕᖕᓂ ᐃᑲᔪᕐᓂᕐᒧᑦ ᑖᔅᓱᒥᖓ ᐊᑐᕆᐊᖃᖅᑐᒧᑦ ᑎᑭᐅᒪᓂᕐᒧᑦ, ᑖᒃᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐊᑐᐃᓐᓇᐅᑎᑦᑎᔪᑦ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᓕᕆᓂᕐᒧᑦ ᐊᑎᓕᐅᕐᓂᖅ ᑎᑎᕋᕐᕕᖕᓂ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᑐᑭᓯᐅᒪᔪᑦ ᐃᖅᑲᓇᐃᔭᕐᕕᖕᒥ ᐊᑦᑕᓇᔾᔭᐃᖅᓯᒪᓂᖅ ᐊᑐᐃᓐᓇᐅᑎᑕᐅᔭᕆᐊᓕᒃ ᑭᒃᑯᓕᒫᓄᑦ, ᐅᖃᐅᓯᕐᒧᑦ ᐅᕝᕙᓘᓐᓃᑦ ᐃᓕᖅᑯᓯᕐᒧᑦ ᐊᕝᕕᐊᕈᑎᖃᙱᓪᓗᑎ. ᑖᒃᑯᐊ ᐋᓐᓂᖅᑐᓕᕆᓂᕐᒧᑦ ᐊᑎᓕᐅᕐᓂᖅ ᑎᑎᕋᕐᕖᑦ ᐊᑐᐃᓐᓇᐅᓕᖅᑐᑦ ᐃᓄᒃᑎᑐᑦ, ᐃᓄᐃᓐᓇᖅᑐᓐ, ᐅᐃᕖᑎᑐᑦ, ᐊᒻᒪᓗ ᖃᓪᓗᓈᑎᑐᑦ.

ᑐᒃᓯᕋᕆᑦ ᑎᑎᕋᖅᓯᒪᔪᓂ ᐃᒡᕕᑦ ᐅᖃᐅᓯᖓᓂ ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕐᕕᐅᓗᑕ ᐅᕙᓂ info@wscc.nt.ca.
ᖁᐊᐃᔭᕿᓐᓃᑦ, ᐹᓪᓚᖕᓃᑦ, ᐊᒻᒪ ᑲᑕᖕᓃᑦ
ᐋᓐᓂᖅᑕᐃᓕᒪᓂᖅ ᑕᒪᑐᒪ ᐅᑭᐅᒥ

ᐊᕐᕌᒍᑕᒫᑦ ᐅᓄᖅᑐᑦ ᓴᓇᔩᑦ ᐋᓐᓂᖅᐸᒃᑐᑦ ᖁᐊᐃᔭᕿᓐᓂᕐᒧᑦ, ᐹᓪᓚᓐᓂᕐᒧᑦ, ᐊᒻᒪ ᑲᑕᖕᓂᕐᒧᑦ.  ᐊᑕᐅᓯᕐᒥ ᑕᓪᓕᒪᔪᓂ ᑮᓇᐅᔭᖅᑖᕋᓱᐊᖅᑐᓄᑦ ᑕᐃᒪᓐᓇ ᐋᓐᓂᕈᑎᖃᖅᑐᕕᓃᑦ. ᓂᒡᓚᓱᒃᑐᐊᓘᓕᖅᑎᓪᓗᒍ, ᐃᖅᑲᐃᑎᑦᑎᔪᒪᔪᒍᑦ ᑭᒃᑯᓕᒫᓂ ᐅᔾᔨᖅᓱᑦᑎᐊᕐᓗᓯ ᓇᒧᙵᐅᓕᕋᐃᒍᔅᓯ. ᖁᐊᐃᔭᕿᓪᓗᓂ ᐃᒡᓘᑉ ᐃᓗᐊᓂ ᐱᐅᖏᑦᑐᒻᒪᕆᐊᓗᒃ, ᑭᓯᐊᓂ ᓂᓚᐅᑉ ᖄᖓᒍᑦ ᑲᑕᓪᓗᓂ ᓄᓇᓯᐅᑎᒥ ᐊᓂᕙᓪᓕᐊᓗᓂ ᐊᒃᓱᐊᓗᒃ ᐋᓐᓂᕐᓇᕈᓐᓇᖅᑐᖅ!

ᖃᓄᕐᓕ ᑲᑕᒃᑕᐃᓕᒪᔪᓐᓇᖅᐱᑕ? ᐅᔾᔨᕈᓱᓐᓂᒃᑯᑦ ᐅᓗᕆᐊᓇᖅᑐᓂ ᐊᒻᒪ ᐊᐅᓚᑦᑎᔾᔪᑎᖏᓐᓂ:
  • ᑕᒪᕐᒥᑲᓴᑦ, ᖁᐊᐃᔭᕿᓐᓂᐅᔪᑦ, ᐹᓪᓚᓐᓂᐅᔪᑦ ᐊᒻᒪ ᑲᑕᖕᓂᐅᔪᑦ ᑕᐃᒪᐃᒍᑕᐅᒐᔪᓲᑦ ᓯᓚ ᐊᓯᔾᔨᖅᐸᓪᓕᐊᑎᓪᓗᒍ ᐅᑐᐱᕆᒥ ᐊᒻᒪ ᐊᐃᕐᕆᓕ.
     
  • ᓴᓗᒻᒪᖅᓴᖅᓯᒪᑦᑎᐊᕐᓂᖅ ᐱᒻᒪᕆᐅᕗᖅ ᖁᐊᐃᔭᕿᑦᑕᐃᓕᒪᓂᕐᒧᑦ, ᐹᓪᓚᒃᑕᐃᓕᓂᕐᒧᑦ ᐊᒻᒪ ᑲᑕᒃᑕᐃᓕᒪᓂᕐᒧᑦ. ᐱᓕᕆᕝᕕᐅᔪᑦ ᓴᓗᒻᒪᖅᓴᖅᑕᐅᕙᓪᓗᑎ ᓱᓇᕈᓘᔭᕐᓂ ᑕᒫᓃᕐᕆᑎᑦᑎᖏᓪᓗᓯ.

  • ᐅᑭᐅᒃᑯᑦ ᓯᓚ ᐅᓗᕆᐊᓇᓕᖅᑎᑦᑎᒃᑲᓐᓂᓲᖅ, ᐱᓗᐊᖅᑐᒥ ᓴᓃᑦ ᐊᒻᒪ ᓂᓚᒃ ᑕᑯᒃᓴᐅᙱᑎᓪᓗᒋᑦ ᐊᐳᒻᒧ. ᓂᓚᒃᑕᖃᖅᑎᓪᓗᒍ ᐅᓗᕆᐊᓇᕈᑎᓕᐅᒃᑲᓐᓂᓲᖑᒻᒪᑦ, ᓯᐅᕋᓕᖅᓱᐃᖃᑦᑕᕐᓗᑎ ᐊᒻᒪ/ᐅᕝᕙᓘᓐᓃᑦ ᑕᕆᐅᕐᒥ ᓂᓚᖃᖅᑐᓄᑦ.
     
  • ᓯᓚ ᖃᐅᓯᕐᓇᖅᑎᓪᓗᒍ ᐃᓯᒐᐅᔮᖕᓂᒃ ᒪᕋᙳᖅᑎᑦᑎᓲᖑᒻᒪᑦ, ᐊᓱᐃᓛᒃ ᖁᐊᐃᔭᕿᔾᔪᑕᐅᓕᕐᓗᑎ, ᐹᓪᓚᒍᑕᐅᓕᕐᓗᑎ, ᐊᒻᒪ ᑲᑕᒍᑕᐅᓕᕐᓗᑎ. ᐊᓗᕐᓗᐃᔭᖃᑦᑕᕐᓗᑎᑦ ᒪᔪᕋᓚᐅᙱᓂᕐᓂ ᐅᕝᕙᓘᓐᓃᑦ ᐃᓯᓚᐅᖏᓂᕐᓂ ᐃᖅᑲᓇᐃᔭᕐᕕᖕᓄᑦ.
     
  • ᐅᔾᔨᖅᓱᑦᑎᐊᕐᓗᑎᑦ ᐊᑐᖃᑦᑕᕐᓗᑎᑦ ᐱᖓᓱᓂ ᑐᙵᕕᖃᕐᓂᕐᒥᑦ (ᐃᓯᒑᒃ ᒪᕐᕉᒃ ᐊᒻᒪ ᐊᒡᒐᒃ ᐃᓪᓗᐃᓐᓇᖅ, ᐅᕝᕙᓘᓐᓃᑦ ᐊᒡᒑᒃ ᒪᕐᕉᒃ ᐊᒻᒪ ᐃᓯᒐᖅ ᐃᓪᓗᐃᓐᓇᖅ) ᒪᔪᕋᐅᑎᑯᑖᒃᑯᑦ ᒪᔪᕋᓂᐊᕐᓗᓂ, ᒪᔪᕋᐅᑎᒃᑯᑦ ᐊᖅᑲᖅᑎᓪᓗᓂ (ᑎᒍᒻᒥᕕᑯᑖᖓ ᑎᒍᒥᐊᕐᓗᒍ), ᓄᓇᓯᐅᑎᒧᑦ ᐃᑭᔭᖅᑐᕐᓗᓂ ᐊᒻᒪ ᓂᐅᓂᐊᕐᓗᓂ, ᓯᓚᒨᖅᐸᓪᓕᐊᑎᓪᓗᑎᓗ ᐃᓯᖅᓯᒪᓚᐅᖅᑎᓪᓗᑎ.
     
  • ᓈᖕᒪᒃᑐᓂ ᑲᒫᓗᖕᓂ ᐊᑐᖃᑦᑕᕐᓗᑎ ᓯᓚ ᐱᔾᔪᑎᒋᓪᓗᒍ ᖃᓄᐃᑦᑑᓂᖓᓄᓪᓗ.
ᐃᖅᑲᐅᒪᓂᐊᖅᐳᑎᑦ: ᐃᔩᒃᑭᑦ ᐃᑲᔫᑎᒋᓂᖅᐹᒃᑭ ᖁᐊᐃᔭᕿᑦᑕᐃᓕᒪᓂᕐᒧᑦ, ᐹᓪᓚᒃᑕᐃᓕᒪᓂᕐᒧᑦ, ᐊᒻᒪ ᑲᑕᒃᑕᐃᓕᒪᓂᕐᒧᑦ. ᐅᓪᓗᕐᕕᒋᔭᐃ ᐅᔾᔨᕆᑦᑎᐊᕐᓗᒍ ᐊᒻᒪ ᑕᐅᑐᑦᑎᐊᕐᓗᑎ ᓇᒧᙵᐅᒻᒪᖔᖅᐱᑦ!

         
ᖃᐅᔨᒪᓚᐅᖅᐱᑦ?
ᑕᖅᑭᑕᒫᖅᓯᐅᑏᑦ ᑭᒡᓕᓯᓂᐊᖅᑕᐅᔪᑦ ᓯᑎᐱᕆᒧᑦ

ᑕᕿᑕᒫᓐ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᓴᕿᑎᑦᑎᖃᑦᑕᖅᑐᑦ ᖃᐅᔨᓇᓱᒍᑎᓂᒃ ᐋᓐᓂᕐᑐᕕᓂᕐᓄᑦ ᑕᖅᑭᐅᓚᐅᕐᑐᒥᑦ ᐅᕙᑦᑎᓐᓂᒃ ᐃᖅᑲᐅᒪᔾᔪᑎᐅᓪᓗᓂ ᐊᑦᑕᓇᖅᑐᓂᒃ ᐊᑐᖅᑕᐃᓕᓂᖅ #worthit (ᐊᑑᑎᖃᕐᓂᖓᓂᒃ). ᒪᓕᖃᑦᑕᙱᒃᑯᕕᑦ ᐅᕙᑦᑎᓐᓂ ᕙᐃᔅᐳᒃᑯᑦ ᐊᒻᒪᓗ ᑐᐃᑐᒃᑯᑦ, ᑕᑯᒋᐊᒃᑭᑦ ᐊᑖᓃᑦᑐᑦ ᓯᑎᐱᕆᒧᑦ ᑭᒡᓕᓯᓂᐊᖅᓯᒪᔭᑦᑎᓐᓂ.



ᖃᐅᔨᒪᒋᐊᑦᑎᐊᕆᑦ. ᑭᒡᓕᓯᓂᐊᖅᑕᐅᓯᒪᔪᑦ ᖃᐅᔨᒪᒃᑭᑦ. ᐊᑦᑕᓇᔾᔭᐃᖅᓯᒪᑦᑎᐊᕆᑦ!

ᐃᓚᐅᖃᑕᐅᒋᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᖃᑎᒌᓐᓂᐅᔪᓂ ᐅᕙᓂ  ᕙᐃᔅᐳᒃ ᐊᒻᒪᓗ  ᑐᐃᑐ.
ᐊᑐᐊᒐᐃᑦ ᐊᓯᔾᔨᕐᓂᖏᑦ

ᐊᐅᓚᑦᑎᓂᕐᒧᑦ ᑲᑎᒪᔩᑦ ᕿᒥᕐᕈᓚᐅᖅᑐᑦ ᐊᒻᒪ ᐊᖏᖅᓯᓪᓗᑎ ᐅᑯᓂᖓ ᐊᑐᐊᒐᕐᓂᑦ ᐊᒻᒪ ᐊᐅᓚᑦᑎᓂᕐᒧᑦ ᑲᑎᒪᔩᑦ ᑐᑭᒧᐊᕈᑎᖏᑦ ᓯᑎᐱᕆ 2018 ᑲᑎᒪᓂᖃᖅᑎᓪᓗᒋᑦ:
  • ᐊᑐᐊᒐᖅ 03.06, ᐱᔪᓐᓇᕐᓂᖅ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᕐᓇᕐᒥᑦ ᑮᓇᐅᔭᖅᑖᕋᓱᐊᖅᑐᓄᑦ
  • ᐊᑐᐊᒐᖅ 03.10, ᐋᓐᓂᐊᖃᐃᓐᓇᐅᔭᕐᓂᖅ
  • ᐊᑐᐊᒐᖅ 04.11, ᐊᑭᓕᖅᑕᐅᔪᒪᔾᔪᑎᑦ ᐊᐅᓚᑦᑎᓂᕐᒧᑦ
  • ᐊᑐᐊᒐᖅ 04.14, ᓴᓇᕝᕕᖕᒧᑦ ᐅᑎᕐᓂᐊᖅᑐᓄᑦ
ᑕᑯᒋᐊᕐᓗᒍ ᑖᓐᓇ WSCC Policy Manual (ᐃᕐᒃᑲᓇᐃᔭᕐᒃᑎᓄᑦ ᐊᑦᑕᓇᕐᒃᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᕐᑲᐅᔨᓴᕐᒃᑏᑦ ᐊᑐᐊᒐᕐᓄᑦ ᐅᖃᓕᒫᒐᖅ) ᕿᒥᕐᕈᐊᓂᕐᒧᑦ ᑕᒪᐃᓐᓂ ᐃᕐᒃᑲᓇᐃᔭᕐᒃᑎᓄᑦ ᐊᑦᑕᓇᕐᒃᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᕐᑲᐅᔨᓴᕐᒃᑏᑦ ᐊᑐᐊᒐᖁᑎᖏᓐᓂᒃ ᐅᕝᕙᓘᓐᓃᑦ ᑖᓐᓇ Governance Council Directives (ᐊᐅᓚᑦᑎᓂᕐᒧᑦ ᑲᑎᒪᔨᑦ ᑐᑭᒧᐊᕈᑎᖏᑦ) ᕿᒥᕐᕈᐊᓂᕐᒧᑦ ᑕᒪᐃᓐᓂᒃ ᐊᐅᓚᑦᑎᓂᕐᒧᑦᑐᑭᒧᐊᕈᑎᓂ.
ᐊᒡᓚᒡᕕᑦ ᒪᑐᓯᒪᓂᖏᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᑦ ᐊᒡᓚᒡᕕᖏᑦ ᒪᑐᓯᒪᓛᖅᑐᑦ ᐃᖅᑲᐅᒪᓇᐅᑉ ᐅᓪᓗᖓᓂ ᓇᒡᒐᔾᔭᐅ, ᓄᕕᐱᕆ 12-ᒥ, ᐊᒻᒪ ᒪᑐᐃᒃᑲᓐᓂᕐᓗᑎ ᐊᐃᑉᐱᐅᓕᖅᑲᑦ, ᓄᕕᐱᕆ 13-ᒥ 8:30 ᐅᓪᓗᓛᒃᑯᑦ.

ᐅᖃᓗᒋᑦ 1-800-661-0792−ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.

ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ  WSCC Connect.
wscc.nt.ca   /  1.800.661.0792   *   wscc.nu.ca  /  1.877.404.4407