Սեղմեցէք իւրաքանչիւր ձեռնարկի վրայ՝ համապատասխան կայքէջ երթալու համար |
|
ՎԵՐԱՆՈՐՈԳՄԱՆ ՏԻՐԱԿԱՆ ՈԳԻՆ |
|
ԼԻԲԱՆԱՆԱՀԱՅՈՒԹԵԱՆ ՎԵՐԱԿԱՆԳՆՈՒՄԻ ՄԱՐՄԻՆԸ
ԳՈՐԾԻ ՁԵՌՆԱՐԿԱԾ Է
|
|
Չորեքշաբթի, 12 Օգոստոսին, նախագահութեամբ Լիբանանի Հայոց թեմի առաջնորդ Շահէ արք. Փանոսեանի՝ Լիբանանահայութեան Վերականգնումի Մարմինը Ազգային Առաջնորդարանին մէջ գումարեց իր երկրորդ նիստը, որուն ընթացքին ճշդեց յառաջիկայ փուլի աշխատանքներուն բնոյթը եւ ընթացքը:
Ներկայացուցչական հանգամանքով, Մարմինի աշխատանքներուն կը մասնակցին՝ Գառնիկ Մկրտիչեան (Հայ Առաքելական համայնք), Արամ Գարատաղլեան (Հայ Կաթողիկէ համայնք), Ներսէս Պաղտոյեան (Հայ Աւետարանական համայնք), Յակոբ Հաւաթեան (Հայ Յեղափոխական Դաշնակցութիւն), Վանիկ Տաքեսեան (Սոցիալ Դեմոկրատ Հնչակեան Կուսակցութիւն), Վազգէն Ժամկոչեան (Ռամկավար Ազատական Կուսակցութիւն), Սիլվա Լիպարեան (Հայկական Բարեգործական Ընդհանուր Միութիւն), Նազելի Աւագեան (Լիբանանահայ Օգնութեան Խաչ) եւ Արամ Մալեան (Հայկական Կրթական Բարեսիրական Միութիւն)։ Մարմինը իր անդրանիկ նիստին դիւանը կազմելով, ատենապետ ընտրած է Գառնիկ Մկրտիչեանը, ատենադպիր` Նազելի Աւագեանը, իսկ հաշուապահ՝ Արամ Մալեանը:
Ազգային Առաջնորդարանին կողմէ նախկին Սրբոց Քառասնից Մանկանց վարժարանի շէնքին մէջ մարմինի աշխատանքներուն համար յատկացուած է մասնաւոր գրասենեակ։
Արամ Ա. Վեհափառ Հայրապետի ճշդած առաջնահերթութեան կարգով, լիբանանահայութեան վերականգնումի աշխատանքներուն մէջ նախապատուութիւն պիտի տրուի Պէյրութի նաւահանգիստի պայթումին պատճառով աւերուած բնակարաններու, խանութներու եւ կառոյցներու վերականգնումին, որ պիտի իրականացուի մասնագէտներու հսկողութեամբ: Մարմինը նաեւ պիտի հսկէ, որ լիբանանահայութեան համար եղած նպաստները իր խողովակով ստանձնուին եւ հաւասարապէս բաժնուին մեր ժողովուրդի կարիքաւոր զաւակներուն:
|
|
ՆԱԽԱԳԱՀ ԱՐՄԷՆ ՍԱՐԳՍԵԱՆԻ ՅԱՅՏԱՐԱՐՈՒԹԻՒՆՆԵՐԸ
ՍԵՒՐԻ ԴԱՇՆԱԳՐԻ ՄԱՍԻՆ ԵՒ ԹՈՒՐՔԻՈՅ ՀԱԿԱԶԴԵՑՈՒԹԻՒՆԸ
|
|
Սուրիական հեղինակաւոր «Ալ-Ազմինա» թերթը հրատարակած է Հայաստանի Հանրապետութեան նախագահ Արմէն Սարգսեանի հետ բացառիկ հարցազրոյց մը:
Յատկապէս անդրադառնալով Սեւրի դաշնագրի վերաբերեալ այն կարծիքին, թէ ան մնացած է թուղթի վրայ, նախագահը յայտնած է.
«Աւելի շուտ, Սեւրի պայմանագիրը չարժանացաւ լիակատար վաւերացման, հետեւաբար մնում է անկատար (unperfected) եւ, ճիշդ է, Հայաստանի մասով որոշումները միջազգային քաղաքական իրադրութեան փոփոխութեան պատճառով չեն իրականացուել, սակայն այն նաեւ երբեւէ չեղեալ չի յայտարարուել:
«Սեւրի պայմանագիրն օրինական, միջպետական, նաեւ de facto գործող փաստաթուղթ է, քանի որ այս փաստաթղթի վրայ են խարսխուած եղել կամ սրանից են ածանցուել միջինարեւելեան մի շարք երկրների Առաջին Աշխարհամարտին յաջորդող որոշ ժամանակահատուածի կամ ներկայ կարգավիճակները (...)»։
Ան դիտել տուած է նաեւ, որ Հայաստանն ու աշխարհասփիւռ հայութիւնը տէրը կը մնան հազարամեայ պատմութեան եւ քաղաքակրթութեան. «Ինչ էլ արել են եւ անեն, ինչքան էլ ժխտեն ակնյայտ փաստերը, ինչքան էլ պատմական Հայաստանի տարածքներում ոչնչացնեն եւ ջնջեն հայոց պատմութեան եւ քաղաքակրթութեան նիւթական յուշարձանները եւ հայերի հետքերը, նրանք չեն կարող ոչնչացնել հայ ժողովրդի յիշողութիւնը»: Սեւրի դաշնագիրն ալ «մնում է որպէս կարեւոր փաստաթուղթ՝ Հայկական Հարցի արդարացի լուծման հասնելու հայ ժողովրդի իրաւունքի մասին»։
Ինչ կը վերաբերի ուրիշ տարածուած տեսակէտի մը, թէ Լօզանի դաշնագիրը չեղեալ դարձուցած է Սեւրի դաշնագիրը, Արմէն Սարգսեան ընդգծած է.
«Բնաւ այդպէս չէ եւ չէր կարող այդպէս լինել: Լօզանի պայմանագրում ոչ միայն չկայ նման չեղարկում, այլեւ անգամ Սեւրի պայմանագրի մասին յիշատակում չկայ: Հայաստանի Հանրապետութիւնը չի ստորագրել, հետեւաբար մաս չէ Լօզանի պայմանագրին: Ըստ այդմ, այն որեւէ պարտաւորութիւն չի ստեղծում Հայաստանի Հանրապետութեան համար: Այս իրավիճակում գործում է միջազգային իրաւունքի Res inter alios acta (մասն չես, պարտաւոր չես) սկզբունքը: Սեւրի պայմանագիրը եւ Լօզանի պայմանագիրը երկու տարբեր իրաւական փաստաթուղթ են»:
Միւս կողմէ, Հայաստանի Արտաքին Գործոց նախարարութեան մամլոյ խօսնակ Աննա Նաղդալեան հրապարակեց պատասխան յայտարարութիւն մը՝ անդրադառնալով Թուրքիոյ Արտաքին Գործոց նախարարութեան յայտարարութեան, որ կը վերաբերի Հայաստանի մէջ Սեւրի դաշնագիրի 100ամեակի նշումին:
«Թուրքիայի ԱԳՆի յայտարարութիւնը մէկ անգամ եւս ի ցոյց է դնում այդ երկրի անկարողութիւնը` առերեսուելու իր անցեալի հետ», ըսաւ Նաղդալեան, աւելցնելով, որ «զարմանքի է արժանի, որ Թուրքիայի ներկայ կառավարութիւնը, որը առիթը բաց չի թողնում արժեւորելու Օսմանեան ժառանգութիւնը՝ այդօրինակ նեարդային արձագանգ է ցուցաբերում նոյն Օսմանեան կայսրութեան կողմից մի շարք պետութիւնների` այդ թւում Հայաստանի Հանրապետութեան հետ կնքուած Սեւրի պայմանագրի յիշատակումից»: Ան շեշտեց, թէ Սեւրի դաշնագիրը պատմական փաստ կը մնայ, զոր կարելի չէ վերախմբագրել կամ ջնջել։ Թուրքիա՝ «պատմութենէն թշնամանքի փոխարէն դասեր քաղել»ու կոչով, ըսաւ Արտաքին Գործոց նախարարութեան բանբերը, «շարունակում է Հայոց Ցեղասպանութիւնն արդարացնելու եւ հայ ժողովրդին նոր ոճրագործութիւններով սպառնալու աւանդական քաղաքականութիւնը», որ մաս կը կազմէ «հարեւան տարածաշրջաններն ապակայունացնելու Թուրքիայի ներկայ կառավարութեան ծաւալապաշտական քաղաքականութեան»։ Ան կոչ ուղղեց Թուրքիոյ որ ձեռք բերէ անցեալին հետ դէմ առ դէմ գալու կարողութիւնը, որ ճանապարհ պիտի հարթէ «մեր տարածաշրջանի ժողովուրդների միջեւ իրական հաշտութեան համար»:
|
|
ՆԱՐԴՈՒՀԻ (ՆՈՐԱ) ՍԵԼՎԵՐԵԱՆԻ
(1939-2020)
|
|
Անուշաւան Արքեպիսկոպոս, Ազգային Վարչութիւնն ու Կրօնական Ժողովը ցաւով իմացան Ս. Գրիգոր Լուսաւորիչ եկեղեցւոյ (Ֆիլատելֆիա) սիւներէն՝ օր. Նարդուհի (Նորա) Սելվերեանի մահուան գոյժը, որ տեղի ունեցած է Ուրբաթ, 14 Օգոստոսին։
Նարդուհի Սելվերեան դուստրն էր Եփրատ եւ Լուիզ Սելվերեանի։ Ծնած էր 25 Նոյեմբեր, 1939ին, Ֆիլատելֆիայի մէջ։ Ունեցած է երկու եղբայրներ՝ Սարգիս եւ Նազարէթ, այժմ հանգուցեալ։ Հինգ եղբօր զաւակներ կը վերապրին անոր՝ Ատամ, Էտի, Քեւըն, Տընիզ եւ Սթէյսի, ինչպէս եւ անոնց ինը զաւակները։
Հանգուցեալը իր ամբողջ կեանքի ընթացքին անձնուիրաբար ծառայած է իր եկեղեցւոյ, յատկապէս Տիկնանց Միութեան։ Երկար տարիներ երեսփոխան եղած է ու մասնակցած՝ Ազգային Երեսփոխանական Ժողովներու։
Կիրակնօրեայ դպրոցը անոր սրտին շատ մօտ էր։ Շուրջ յիսուն տարի, Նարդուհի Սելվերեան մայրական կերպար մըն էր անոր դասարաններուն մէջ, որ աշակերտները իր զաւակները կը նկատէր։
Հողը թեթեւ գայ վրան։ Աստուծմէ կը հայցենք, որ մխիթարութիւն պարգեւէ հանգուցեալի բոլոր հարազատներուն եւ Ս. Գրիգոր Լուսաւորիչ եկեղեցւոյ մեծ ընտանիքին։
Այս առիթով, Առաջնորդ Սրբազան Հայրը, յանուն Ազգային Վարչութեան, ցաւակցական նամակ յղեց Տ. Ներսէս Ա. Քհն. Մանուկեանին՝ հովիւ Ս. Գրիգոր Լուսաւորիչ եկեղեցւոյ։ Իր խօսքին մէջ, Սրբազան Հայրը, վեր առնելով հանգուցեալին նկարագրային կարգ մը գիծերը, ըսաւ. «Կը հիանամ հանգուցեալի բացառիկ նախանձախնդրութեան վրայ, երբ ամէն Կիրակի եկեղեցի ժամանող առաջին անդամը կ՚ըլլար, որպէսզի կիրակնօրեայ վարժարանի աշակերտներուն փոխանցէր հայ քրիստոնէական հաւատքի գերագոյն արժէքները»։
|
|
ԱՆՈՒՇԱՒԱՆ ԱՐՔԵՊԻՍԿՈՊՈՍ՝ ՄԱՅՐ ԵԿԵՂԵՑՒՈՅ ՄԷՋ |
|
Կիրակի, 23 Օգոստոսին, թեմիս բարեջան առաջնորդ՝ Գերշ. Տ. Անուշաւան Արքեպիսկոպոս պիտի նախագահէ Ս. Պատարագին եւ քարոզէ Ս. Լուսաւորիչ Մայր Եկեղեցւոյ մէջ (Նիւ Եորք)։ Ս. Պատարագը պիտի մատուցանէ Արժ. Տ. Մեսրոպ Քհն. Լագիսեան։ Մեր հաւատացեալները կրնան արարողութեան հետեւիլ ուղիղ հեռասփռումով։
|
|
ՀՈԳԵՀԱՆԳԻՍՏ՝ ՏԱՒՈՒՇԻ ՆԱՀԱՏԱԿ ԶԻՆՈՒՈՐՆԵՐՈՒՆ ՀԱՄԱՐ |
|
Յառաջիկայ Կիրակի, 23 Օգոստոսին, Թեմիս բոլոր եկեղեցիներուն մէջ, յաւարտ Սուրբ Պատարագի, հոգեհանգստեան յատուկ արարողութիւն պիտի կատարուի անցեալ Յուլիս ամսուն քաջարի հայ զինուորներու՝ Գարուշ Համբարձումեանի, Սօս Էլբակեանի, Սմբատ Գաբրիէլանի, Գրիշա Մաթեւոսեանի, Արթուր Մուրադեանի եւ Աշոտ Միքայէլեանի հոգիներուն համար, որոնք հերոսական կերպով դիմագրաւեցին մեր հայրենիքի ապահովութեան դէմ շղթայազերծուած զանգուածային յարձակումը։
Արհեստագիտական անհամեմատելի զինամթերքով յղփացած թշնամին նահանջ արձանագրեց շնորհիւ հայրենիքի սիրով ու պատերազմական հանճարով զինուած Հայ բանակին, որ նոր նուաճում մը աւելցուց 1918ով սկսող եւ 1994ով ու 2016ով շարունակուող մերօրեայ յաղթանակներու շարքին։
Փա՜ռք Աստուծոյ, պատի՛ւ Հայ զինուորին, հանգիստ նահատակներու հոգիներուն եւ մխիթարութիւն անոնց հարազատներուն։
|
|
ԱՍՏՈՒԱԾԱՄՕՐ ՎԵՐԱՓՈԽՄԱՆ ՏՕՆԸ
Առաջնորդ Սրբազան Հօր քարոզը
|
|
Կիրակի, Օգոստոս 16ին, Անուշաւան Արքեպիսկոպոս պատարագեց ու քարոզեց Ս. Աստուածածին եկեղեցւոյ մէջ (Ուայթընզվիլ, Մասաչուսեթս)։ Ստորեւ կու տանք Առաջնորդ Սրբազան Հօր քարոզը։
Հայաստանեայց Առաքելական Ս. Եկեղեցին այսօր կը տօնախմբէ մարմնացեալ Աստուածորդիին տաճար եւ բնակավայր Ս. Կոյս Մարիամի` Աստուածամօր վերափոխումը։ Տօն մը, որ բնոյթով սուրբ գրային չըլլալով հանդերձ, էութեամբ կ՚առնչուի մեր Տիրոջ Յիսուս Քրիստոսի տնօրինական խորհուրդին։
Ըստ Առաքեալներու կողմէ մեզի հասած աւանդութեան, երբ Տիրամայր Աստուածածինը բնութեան օրէնքին համաձայն կ՚աւանդէ հոգին ու կը թաղուի Երուսաղէմի մէջ, Բարթողիմէոս Առաքեալ քաղաքէն դուրս կը գտնուէր։ Վերադարձին՝ երբ շիրիմը կը բացուի անոր փափաքին վրայ, թափուր կը գտնեն զայն, եւ հաւատքի պրիսմակէն դիտելով կ՚եզրակացնեն, որ Տէրունական գերագոյն տնօրինութեամբ անոր մարմինը առանց ապականութիւն տեսնելու փոխադրուած էր երկինք։ Այս առթիւ, օրուան խորհուրդէն բխող երեք մտածումներ կ՚ուզեմ բաժնել․
ա․ Սուրբ Կոյսին ընծայուած այս առանձնաշնորհումը իսկապէս կ՚անդրանցնի Աստուծոյ ընտրեալներուն եղած բոլոր պատիւները։ Որպէս Աստուածորդիին ընտրեալ տաճար ու բնակարան, կը մնայ եզական, հողեղէն անզուգական հրեշտակ, անիմանալի խորհուրդ՝ «փառաւորեալ եւ օրհնեալ միշտ սուրբ կոյս եւ մայր»։
Մեր Տիրոջ Յիսուս Քրիստոսի մարդեղութեան եւ փրկագործական խորհուրդին որպէս մասնակից՝ Սուրբ Կոյս Մարիամ կը հանդիսանայ տիպար օրինակ մը բոլոր դարերու ո՛չ միայն իգական սեռին միայն, այլ նաեւ որպէս մայր` իր սուրբ արգանդէն ծնած մարդացեալ աստուածորդւոյն սուրբ արեամբ փրկուած համայն մարդկային ցեղին համար։ Ան բոլոր հաւատացեալներու յուսալքումներուն եւ ակնկալութեանց, ձախողութեանց եւ յաջողութեանց, տխրութեանց եւ ուրախութեանց բաժնեկից է։ Այո՛, որպէս մայր, ան սրտակից է բոլորիս, եւ աղօթող առ Աստուած մեզի համար՝ որպէս իր հոգեւոր զաւակները, ինչպէս սուրբ Խաչին առջեւ աղօթեց որպէս որդեկորոյս մայր: Նաեւ, ինչպէս որ Կանայի հարսանիքին, Աստուածամայրը՝ տեղեակ ըլլալով ներքին տագնապին, լռելեան ներկաներու ուրախութիւնը ամբողջացուց, նմանապէս ան թէպէտ անտեսանելի, սակայն ներկայութիւն է մեր կեանքին մէջ, պատրաստ միշտ բարեխօսելու մեզի համար իր Որդւոյն եւ մեր Տիրոջ Յիսուս Քրիստոսին։
բ․ Աստուածամայրը կոչուած է Աստուծոյ ընտրեալը։ Մարդկային հասկացողութիւնը մեզի մտածել կու տայ, թէ շատերու մէջէն անիկա զատուած եւ ըստ այնմ իր ունեցած արժանիքներուն համար գնահատուած է, որմէ զրկուած են մնացեալները։ Արդար չէ մտածելը, որ Աստուած աչառութիւն կ՛ընէ եւ կամ իր բարիքները ամէնքին համար չեն։ Այս ուղղութեամբ, մեր մտածելակեպը առաւել պիտի պայածառակերպուի երբ մտաբերենք Պետրոս Առաքեալի խօսքը որ կ՛ըսէ. «Դուք րնտրուած ցեղ մըն էք, թագաւորելու կոչուած քահանաներ, սուրբ ազգ մը՝ Աստուծոյ սեփական ժողովուրդը» (Ա Պետ 2.9)։ Ի՛նչ հոյակապ խոստում։ Ո՛չ թէ անձ մը, այլ բոլոր անոնք որոնք կը դաւանին Քրիստոսի փրկագործական խորհուրդը կը դառնան իր ընտրեալներն ու իր ժողովուրդը եւ կը լծուին սրբազան առաքելութեան։ Ուստի, Աստուծոյ արարչագործութենէն մինչեւ Քրիստոսի երկրորդ գալստեան ընտրեալներու երամին մենք եւս կը միանանք՝ արժանանալու համար Աստուածամօր եւ բոլոր սուրբերուն յաւերժական փառքին։
գ) Հայաստանեայց Եկեղեցւոյ շարականներուն մէջ Տիրամայր Աստուածածնին վերագրուած բնորոշ յատկանիշերէն մին է «Աստուծոյ Որդւոյն տաճար եւ բնակարան» վերագրումը։ Արդեօք շարականագիր վարդապետին կողմէ չափազանցութի՞ւն է սա. բացարձակապէս ո'չ։ Պօղոս Առաքեալի մտածողութեան մաս կը կազմէր այս գեղեցիկ պատկերը, երբ կ'ըսէր՝ «Չէք գիտեր թէ Աստուծոյ տաճար էք եւ Աստուծոյ Հոգին կը բնակի ձեր մէջ» ( Ա Կր Գ 16)։ Որեւէ փիլիսոփայութեան մէջ կա՞յ արդեօք մարդ արարածը վեհացնող նման արտայայտութիւն մը։ Ուստի, նման պայծառ հաստատումէ ետք, ո՛չ մէկ կասկած կը մնայ որ Արարիչ Աստուծոյ համար, զոր ո՛չ երկինքը եւ ո՛չ երկիրը կրնան պարփակել, սիրելի է գալ եւ որպէս տաճար բնակիլ իր իսկ արարածներուն մաքուր սրտերուն ու հոգիներուն մէջ։ Արդ, Քրիստոսով հաւատացեալներս, Աստուածամօր օրինակով մենք եւս սիրայօժար ընդառաջենք երկնային հրաւէրին, եւ աստուածահաճոյ կեանքով, մտածումներով, խօսքերով ու գործերով բնակարան եւ տաճար դառնանք Անոր։
Աստուածամօր Վերափոխման տօնին առթիւ, ձայնակցելով աղօթասաց վարդապետին, մենք եւս Սուրբ Կոյս Մարիամին աղերսենք եւ ըսենք՝ «Աղաչէ մեզի համար, ո՛վ Սուրբ Աստուածածին քեզմէ մարմնացեալ Աստուածորդւոյն, որպէսզի սէր եւ արդարութիւն աճեցնէ երկրի վրայ», առ հասարակ համայն աշխարհին, ի Հայաստան եւ ի սփիւռս աշխարհի, մանաւանդ արիւնաքամ եղած մայրիներու երկիր Լիբանանի մէջ։ Այո՛, սէր եւ արդարութիւն աճեցնէ հետզհետէ մարդկային քարացող սրտերուն մէջ, ի շինութիւն եւ ի պայծառութիւն համայն մարդկութեան եւ ի փառս Ամենասուրբ Երրորդութեան։ Ամէն։
ԱՄՆի Արեւելեան Թեմի Առաջնորդ
|
|
Նուիրատուութիւնները կը շարունակեն հասնիլ մեզի։ Ազգ. Առաջնորդարանս երախտապարտ է այն բազմաթիւ անդամներուն եւ բարեկամներուն, որոնք ազգային տուրքի մեր արշաւի սկզբնական այս շրջանին չեն զլացած իրենց առատաձեռն օժանդակութիւնը։ Նուիրատու մը հաւանաբար խտացուցած է շատերու զգացումը, գրելով. «Շնորհակալութիւն ձեր կատարած աշխատանքին, որպէսզի հաւատքը պահենք եւ յոյս ունենանք ապագայի հանդէպ…»։
Ձեր նիւթական քաջալերութիւնը մեզ կը խթանէ յարատեւելու մեր յանձնառութեան մէջ՝ առողջապահական աննախընթաց իրավիճակի բոլոր խոչընդոտներուն հակառակ։ «Իւրաքանչիւրը թող տայ՝ նայած իր սրտի յօժարութեան եւ ո՛չ թէ չկամութեամբ կամ պարտաւորուած զգալով. որովհետեւ Աստուած զուարթառատ կերպով նուիրողը կը սիրէ: Եւ Աստուած կրնայ ամէն պարգեւ տալ ձեզի առատօրէն, որպէսզի միշտ ալ ունենաք այնքան՝ որքան պիտի բաւէր ձեր բոլոր կարիքներուն եւ աւելնար՝ ամէն տեսակի բարի գործերու յատկացուելու» (Բ. Կր 9.7-8):
|
|
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ |
|
ԿԻՐԱԿԻ, 23 ՕԳՈՍՏՈՍ
Ա. ԿԻՐԱԿԻ ՎԵՐԱՓՈԽՈՒՄԷՆ ԵՏՔ
ՃՇ. ԸՆԹԵՐՑՈՒՄ
Առակներ 11:30-12:4
Զաքարիա 2:10-13
ԱՒԵՏԱՐԱՆ ԸՍՏ ՂՈՒԿԱՍՈՒ 1:39-56
Նոյն օրերուն, Մարիամ ճամբայ ելլելով՝ աճապարանքով գնաց Յուդայի լեռնային շրջանի քաղաքներէն մէկը: Հոն Զաքարիայի տունը մտնելով՝ Եղիսաբէթի ողջոյն տուաւ: Երբ Եղիսաբէթ Մարիամի ողջոյնը լսեց, իր որովայնին մէջ երեխան շարժեցաւ, եւ Եղիսաբէթ Սուրբ Հոգիով ներշնչուած՝ բարձրաձայն ըսաւ.
– Կիներուն մէջ օրհնեա՜լ ես դուն եւ օրհնեա՜լ է զաւակը որ կը կրես որովայնիդ մէջ: Ի՜նչ երջանկութիւն, որ Տիրոջս մայրը ինծի կ’այցելէ. որովհետեւ երբ ողջոյնդ լսեցի, երեխաս ուրախութեամբ շարժեցաւ որովայնիս մէջ: Երանի՜ քեզի որ հաւատացիր, որովհետեւ Աստուծոյ կողմէ քեզի ըսուածները պիտի կատարուին:
Մարիամ ըսաւ.
«Տէրը պիտի գովաբանեմ.
Ահա հոգիս կ’ուրախանայ
Աստուծմով, իմ Փրկիչովս,
որովհետեւ ան տեսաւ
իր աղախինին հեզութիւնը:
Ասկէ ետք բոլոր սերունդները
երանի պիտի տան ինծի,
քանի հզօրն Աստուած ինծի համար
մեծամեծ գործեր կատարեց.
սուրբ է անունը անոր:
Բոլոր ժամանակներուն մէջ
ողորմութեամբ ան կը նայի
աստուածավախ մարդոց վրայ:
Իր բազուկով ան զօրութիւն ցոյց տուաւ,
ոչնչացուց հպարտները՝
իրենց բոլոր խորհուրդներով:
Գահազրկեց արքաները
եւ բարձրացուց խոնարհները:
Անօթիները բարիքներով լիացուց,
մինչ հարուստները դատարկաձեռն արձակեց:
Պաշտպան եղաւ իր ծառային՝ Իսրայէլի,
հաւատարիմ մնալով իր ողորմութեան,
ինչպէս որ խոստացած էր մեր հայրերուն՝
Աբրահամի եւ անոր զաւակներուն»:
Մարիամ Եղիսաբէթի մօտ շուրջ երեք ամիս մնալէ ետք վերադարձաւ իր տունը:
Բ. ԹՈՒՂԹ ԿՈՐՆԹԱՑԻՆԵՐՈՒՆ 6:16-7:1
Ի՞նչ նմանութիւն կայ Աստուծոյ տաճարին եւ մեհեաններուն միջեւ:
Արդարեւ, մե՛նք ենք կենդանի Աստուծոյ տաճարը, ինչպէս Աստուած ինք ըսաւ.-
«Անոնց մէջ պիտի բնակիմ
եւ անոնց հետ պիտի ապրիմ:
Ես իրենց Աստուածը պիտի ըլլամ
եւ անոնք՝ իմ ժողովուրդս»:
Ահա թէ ինչո՛ւ Աստուած կը հրահանգէ մեզի.-
«Անջատ եւ հեռո՛ւ կեցէք հեթանոսներէն.
պիղծ բաներու մի՛ դպչիք,
եւ ես ձեզ պիտի ընդունիմ:
Ես ձեզի Հայր պիտի ըլլամ
եւ դուք իմ տղաքս ու աղջիկներս պիտի ըլլաք,-
կ’ըսէ ամենակալ Տէրը»:
Սիրելինե՛ր, այս խոստումները մեզի եղած են: Ուստի հեռո՛ւ մնանք մարմնական եւ հոգեկան ամէն պղծութենէ, մենք մեզ կատարելապէս մաքրենք՝ Աստուծոյ երկիւղովը ապրելով:
|
|
Ս. ՅՈՎԱԿԻՄ ԵՒ ԱՆՆԱ ԵՒ ԻՒՂԱԲԵՐ ՍՈՒՐԲԵՐԸ |
|
Երեքշաբթի, 25 Օգոստոսին, Հայաստանեայց Եկեղեցին կը յիշատակէ Աստուածամօր Մարիամի ծնողները՝ Յովակիմ եւ Աննա սուրբերը։ Բարպաթիրի որդի Յովակիմ՝ Դաւիթ թագաւորի ցեղէն էր, որուն Աստուած յայտնած էր, թէ աշխարհի Փրկիչը իր շառաւիղէն պիտի ծնէր։ Աննա Լեւիի ցեղի յետնորդ էր՝ հօր կողմէ, եւ Յուդայի ցեղի՝ մօր կողմէ։ Տարիներու ամուսնութենէ ետք, Յովակիմ եւ Աննա անզաւակ մնացած էին։ Ի վերջոյ, ապաւինելով Աստուծոյ կամքին՝ Յովակիմ ծոմ պահեց քառասուն օր անապատին մէջ եւ երկուքն ալ աղօթեցին զաւակի մը համար։ Հրեշտակ մը յայտնուեցաւ իւրաքանչիւրին յայտնելով, թէ հակառակ անոնց յառաջացած տարիքին՝ աղջկան մը ծնողքը պիտի ըլլային։
Միեւնոյն օրը, Եկեղեցին կը յիշէ իւղաբեր կիները։ Այս ութը կիները չորս Աւետարաններուն մէջ յիշուած են որպէս իւղ եւ զմուռս բերողները, որոնք տարբեր դերեր ունէին Քրիստոսի քարոզչութեան, Խաչի մօտ եւ գերեզմանին՝ Զատկուան առաւօտեան։ Ութը կիներն էին՝ Մարիամ Մագթաղենացի, Մարիամ (Աստուածամայր), Եոհաննա, Սողոմէ, Մարիամ (Կլէոպասի կինը), Սուսաննա, Մարիամ Բեթանիացի եւ Մարթա Բեթանիացի։
Խունկ ու զմուռսը «թագաւորական ընծաներ»ն էին՝ ոսկիէն աւելի արժէքաւոր։ Զմուռսը յաճախ կը յիշուի Հին եւ Նոր Կտակարաններուն մէջ։ Ինչպէս յայտնի է, երեք մոգերը ոսկի, խունկ եւ զմուռս բերած էին Մարիամին՝ իբրեւ երախտագիտութիւն Աստուծոյ Որդիին ծնունդ տուած ըլլալուն համար։ Զմուռսը երբեմն կը յիշուի Յիսուսի կեանքին ընթացքին. «Հոն զմուռսով խառնուած գինի տուին իրեն» (Մր 15.23)։ Անոր մահէն ետք, «Նիկոդեմոս իրեն հետ շուրջ երեսուն քիլօ հալուէով խառն զմուռս», որ գործածուեցաւ Յիսուսի մարմինը թաղման պատրաստելու համար (Յհ 19.39)։
Հայց. Եկեղեցւոյ՝ Յովակիմին եւ Աննայի նուիրուած շարականի կանոնը կ՚ըսէ.
«Որ նախիմաց իմաստութեամբ տնօրինեցեր զխորհուրդ սուրբ եկեղեցւոյ. խորագոյն արկեալ հիմունս հաստատութեան զդասս արդարոց. աղաչանօք սոցա խնայեա ի մեզ։
Որ զօրհնութիւն նախաստեղծիցն աստուածազոյգ արուաց եւ իգաց. պայծառացեալ վայելչապէս ծաղկեցուցեր այսօր ի Յովակիմ եւ ի յԱննա. աղաչանօք սոցա խնայեա ի մեզ։
Որ զխոստումն Աբրահամու նահապետին մեր ըստ հոգւոյ. քահանայական եւ թագաւորական գաւազանացն միացեալ ցուցեր այսօր ի յԱննայէ. աղաչանօք սոցա խնայեա ի մեզ։
Անսկիզբն աստուած անճառելի անբաւ զօրութիւն. որ ի սկզբանց յաւիտենից խնամարկեցեր զորդիս Ադամայ. գերագոյն այսօր շնորհիւ փայլեալ ցուցեր ծննդեամբ զմայր միածնիդ քո ընտրելոյ. աղաչանօք սորա խնայեա ի մեզ»։
(Դուն որ նախագէտ իմաստութեամբ սուրբ եկեղեցւոյ խորհուրդը տնօրինեցիր եւ արդարներուն դասերը խորագոյն հաստատ հիմք դրիր, անոնց աղաչանքներով ողորմէ մեզի։
Դուն որ նախաստեղծ աստուածազոյգ արուներուն եւ էգերուն օրհնութիւնը այսօր վայելուչ պայծառութեամբ Յովակիմի եւ Աննայի միջոցաւ ծաղկեցուցիր, անոնց աղաչանքներով ողորմէ մեզի։
Դուն որ մեր հոգեւոր նահապետին՝ Աբրահամին քու ըրած խոստումը քահանայական եւ թագաւորական իշխանութիւններուն միացած ցոյց տուիր այսօր Աննայէն, անոնց աղաչանքներով ողորմէ մեզի։
Անսկիզբ Աստուած, անճառելի անբաւ զօրութիւն, դուն որ յաւերժի սկիզբէն Ադամին որդիները խնամեցիր, այսօր ցոյց տուիր Միածինիդ մօր գերագոյն շնորհքով փայլքը իր ծնունդով. անոր աղաչանքներով ողորմէ մեզի)։
|
|
ՍԻԱՄԱՆԹՕ ԼՍԱՐԱՆԻ 2020-2021 ՏԱՐԵՇՐՋԱՆԸ |
|
«Սիամանթօ» լսարանը իր նոր տարեշրջանը կը սկսի 26 Սեպտեմբերին, հեռակայ կերպով (zoom classes)։
Դասընթացքը կազմակերպուած է Միացեալ Նահանգներու Արեւելեան Թեմի Ազգային Ուսումնական Խորհուրդի հովանաւորութիւնը վայելող գաղութներու 14էն 18 տարեկան պատանիներուն համար:
Հանդիպումները կը կայանան ամէն Շաբաթ օր, 2 ժամ՝ ներառեալ կարճ դադար մը։ «Սիամանթօ» լսարան յաճախողները, այլ առաւելութիւններու կողքին, կը ծանօթանան ուրիշ գաղութներու իրենց տարեկիցներուն:
Դիմումներու ժամկէտը 31 Օգոստոսն է։
Միւս կողմէ, ամառնային «Սիամանթօ» լսարանի երրորդ հանդիպումը տեղի ունեցաւ Ուրբաթ, 7 Օգոստոսի կէսօրէն ետք, հեռավար (Zoom) ձեւով։
Խմբային հանդիպման, աշակերտները յափշտակութեամբ լսեցին օր․ Սօսի Էսաճանեանին պատրաստած հայկական պարերու մասին սահիկներով ներկայացումը։ Ապա իւրաքանչիւրը իր համացանցային դասարանը մտաւ՝ տիկ. Սիլվա Պետեանին, օր. Նարինէ Ապրիմեանին եւ տիկ․ Մարի Կիւլիւմեանին հետ։ Ամէն ոք իր պարտականութիւնը կատարած եկած էր։ Աւարտին, կրկին միացան երկրորդ խմբային հանդիպման ու հաճելի զրոյց ունեցան ուսուցչուհիներուն պատրաստած նիւթերով։ Գոհունակ բաժնուեցան ու ոմանք նոյնիսկ իրենց դրական տպաւորութիւնը անմիջապէս ուղարկեցին։
«Սիամանթօ» լսարանի ամառնային չորրորդ եւ վերջին հաւաքը տեղի պիտի ունենայ 21 Օգոստոսին, կէսօրէ ետք ժամը 4:00ին։
|
|
Ս. ԱՍՏՈՒԱԾԱԾՆԻ ՎԵՐԱՓՈԽՄԱՆ ՏՕՆԸ ԵՒ ԽԱՂՈՂՕՐՀՆԷՔԸ |
|
Կիրակի, 16 Օգոստոսին, Արեւելեան թեմի ծուխերը նշեցին Ս. Աստածածնի Վերափոխման տօնը եւ կատարեցին խաղողօրհնէքը։ Պատեհ առիթ մըն էր տօնական աւանդական մթնոլորտը ստեղծելու, երբ համավարակը արդէն բազմաթիւ փոփոխութիւններ մուծած է բոլորիս կեանքին մէջ։
|
|
Թեմիս բարեջան առաջնորդ՝ Գերշ. Տ. Անուշաւան Արքեպիսկոպոս, յաւարտ Ս. Պատարագի խաղողօրհնէքը կատարեց Ս. Աստուածածին եկեղեցւոյ մէջ (Ուայթընզվիլ, Մասաչուսեթս)։ Առաջնորդ Սրբազան Հօր ընկերացան եկեղեցւոյ հոգեւոր հովիւ՝ Արժ. Տ. Միքայէլ Քհն. Տէր Խոսրովեան, եւ Ս. Ստեփանոս եկեղեցւոյ (Նիւ Պրիթըն, Քընէթիքըթ) պատուոյ հովիւ՝ Արժ. Տ. Արամ Քհն. Ստեփանեան։ |
|
Ս. Լուսաւորիչ Մայր Եկեղեցւոյ (Նիւ Եորք) հոգեւոր հովիւ՝ Տ. Մեսրոպ Քհն. Լագիսեան, Ս. Պատարագ մատուցանեց եւ խաղողօրհնէքը կատարեց։
|
|
Ս. Սարգիս եկեղեցին (Տակլըսթըն, Նիւ Եորք) իր աւանդութիւնը պահեց՝ Վերափոխման տօնին հարիսա մատուցանել յաւարտ Ս. Պատարագի։ Եկեղեցւոյ հոգեւոր հովիւ՝ Տ. Նարեկ Քհն. Թրթռեան, կատարեց խաղողօրհնէքն ու հարիսայի օրհնութիւնը եկեղեցւոյ մէջ։ Այնուհետեւ, բաժանումը տեղի ունեցաւ եկեղեցւոյ մայր դրան մօտ։
|
|
Ս. Վարդանանց եկեղեցւոյ (Փրաւիտընս, Ռոտ Այլընտ) մէջ, համավարակը եւ անձրեւը արգելք չեղան տիրող խանդավառութեան։ Եկեղեցւոյ հոգեւոր հովիւ՝ Տ. Գաբրիէլ Քհն. Նազարեան, Ս. Պատարագ մատուցանեց եւ խաղողօրհնէքը կատարեց։ Նուիրեալ կամաւորներ պատրաստեցին աւելի քան 350 հոգիի ճաշը, որ բաժնուեցաւ ինքնաշարժով եկող հաւատացեալներուն։ |
|
Հոգշ. Տ. Սահակ Ծ. Վրդ. Եմիշեան՝ Ս. Վարդանանց եկեղեցւոյ (Ռիճֆիլտ, Նիւ Ճըրզի) հոգեւոր հովիւ, պատարագեց ու այնուհետեւ կատարեց խաղողօրհնէքը։ Անոր ընկերացաւ Ս. Ստեփանոս եկեղեցւոյ (Նիւ Պրիթըն, Քընէթիքըթ) այցելու հովիւ՝ Արժ. Տ. Վահան Քհն. Գույումճեան։ |
|
Ս. Յակոբ եկեղեցւոյ (Ռէյսին, Ուիսքանսըն) հոգեւոր հովիւ՝ Տ. Տարօն Ա. Քհն. Ստեփանեան, յաւարտ Ս. Պատարագի կատարեց խաղողօրհնէքը, ընկերակցութեամբ Ստեփան Սրկ. Ֆրոնճեանի եւ Լեւոն Սրկ. Սարեանի։ |
|
Սարգիս Ա. Քհն. Ագթաւուգեան՝ Ս. Խաչ եկեղեցւոյ (Պեթեստա, Մէրիլէնտ) հոգեւոր հովիւ, Ս. Պատարագ մատուցանեց Վերափոխման տօնին առիթով, որուն հետեւեցաւ խաղողօրհնէքը։ Արարողութիւնը ուղիղ կերպով հեռասփռուեցաւ։ |
|
Ս. Գրիգոր եկեղեցւոյ (Նորթ Անտովըր, Մասաչուսեթս) հոգեւոր հովիւ՝ Տ. Ստեփան Քհն. Պալճեան, յաւարտ Ս. Պատարագի կատարեց խաղողօրհնէքը, Արեգ Սրկ. Գալայճեանի եւ Ճան Սրկ. Սարեանի հետ։ |
|
Ամենայն Սրբոց եկեղեցւոյ (Կլենվիւ, Իլինոյ) հոգեւոր հովիւ՝ Հոգշ. Տ. Ղեւոնդ Ծ. վրդ. Բէնդէզեան Ս. Պատարագ մատուցանեց ու խաղողօրհնէքը կատարեց։ |
|
Ս. Գրիգոր Լուսաւորիչ եկեղեցւոյ (Ֆիլատելֆիա, Փենսիլվենիա) հոգեւոր հովիւ՝ Տ. Ներսէս Ա. Քհն. Մանուկեան, խաղողօրհնէքը կատարեց յաւարտ Ս. Պատարագի։ |
|
Տ. Անդրանիկ Ա. Քհն. Պալճեան՝ Ս. Ստեփանոս եկեղեցւոյ (Ուոթըրթաուն, Մասաչուսեթս) հոգեւոր հովիւ, պատարագեց ու այնուհետեւ կատարեց խաղողօրհնէքը։ |
|
Ս. Սարգիս եկեղեցւոյ (Տիրպըրն, Միշիկըն) հոգեւոր հովիւ՝ Տ. Հրանդ Քհն. Գէորգեան, յաւարտ Ս. Պատարագի կատարեց խաղողօրհնէքը։ |
|
«Մեծն Ներսէս» բարեսիրական հասարակական կազմակերպութեան կողմէ կատարուող որբերու հովանաւորութիւնը կը շարունակէ մնալ Ազգ. Առաջնորդարանի Հայաստանի ու Արցախի ծրագիրներուն առանցքը՝ 1993էն ի վեր։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Այդ նամակներէն նմոյշներ կը ներկայացնենք ամէն շաբաթ, յիշելով միայն գրողներուն անունները՝ անոնց ինքնութիւնը գաղտնի պահելու համար։
Այս շաբթուան նամակի հեղինակը Ալեքսանդրի եւ Դաւիթ Համբարձումեանի մայրն է, որոնք կը հովանաւորուին տէր եւ տիկ. Դաւիթ Համբարձումեաններու կողմէ։
|
|
«Յուլիսեան պատերազմի զոհուած մայոր Գարուշ Համբարձումեանի այրին՝ Աննա Յակոբեանս, շնորհակալութեամբ իմացայ, որ մէկ օրուայ մէջ ի շնորհիւ Սրբազան Անուշաւան Դանիէլեանի միջամտութեամբ գտել է հովաանաւոր՝ տէր եւ տիկին Համբարձումեաններին, որի համար յայտնում եմ իմ խորին շնորհակալութիւնը։
Յարգելի հովանաւորներ, Ալեքսանդր Համբարձումեանը, թիւ 2611, ծնուել է 17. 08. 2013 թ., յաճախում է դպրոց։
[Բարեւ ձեզ, ես Ալեքսանդրն եմ, փոխադրուել եմ 2րդ դասարան։ Սիրում եմ կարդալ եւ նկարել։]
Գրում է մայրը՝ Աննան։ Դաւիթ Համբարձումեանը (2612) ծնուել է 23.03.2020, 4 ամսական է։
Ցաւօք, մենք ընտանիքում ունեցանք շատ մեծ կորուստ։ Մայոր Գարուշ Համբարձումեանը հայրենասէր էր, սովորել էր Վազգէն Սարգսեանի անուան ռազմական ինստիտուտում։ Աւարտելուց յետոյ անցել է աշխատանքի զինուած ուժերում։ 2017 թ.ին տեղափոխուել է Տաւուշ՝ առաջնագիծ, ընտանիքի հետ միասին։ 2020 թ. Յուլիսին պատահեց այս դէպքը։ Յետմահու պարգեւատրուեց 2րդ կարգի արիութեան մեդալով։
Կը գրեմ յաճախակի նամակներ։ Շատ շնորհակալութիւն, որ ընդգրկել էք իմ երեխաներին օժանդակութեան ծրագրի մէջ»։
|
|
ՁԵՐ ՀՈՎԱՆԱՒՈՐՈՒԹԵԱՆ ԿԸ ՍՊԱՍԵՆ |
|
«Մեծն Ներսէս» կազմակերպութեան որբերու հովանաւորութեան ծրագիրը կ՚ընդգրկէ անչափահաս որբեր (մինչեւ 18 տարեկան) եւ չափահաս որբեր, որոնք իրենց կրթութիւնը կը շարունակեն բարձրագոյն ուսման հաստատութեան մը մէջ։ Այժմ աւելցած են, դժբախտաբար, պսակաձեւ ժահրի զոհերու զաւակներ։
Մեր սպասման ցուցակին մէջ գտնուող որբ մը հովանաւորելու համար, Ազգ. Առաջնորդարանիս հետ կապուեցէք ելեկտրոնային նամակով՝ sophie@armenianprelacy.org հասցէին, կամ հեռաձայնով (212-689-7810)։ Անչափահաս որբերու պարագային, կրնաք նաեւ սեղմել այստեղ։
|
|
ԵՐԵՔ ՇԱԲԱԹ ՄՆԱՑԱԾ Է ԱԶԳԱՅԻՆ ԱՌԱՋՆՈՐԴԱՐԱՆԻ ՎԻՃԱԿԱՀԱՆՈՒԹԵԱՆ ՀԱՄԱՐ |
|
Ազգային Առաջնորդարանի աւանդական վիճակահանութիւնը տեղի պիտի ունենայ 12 Սեպտեմբերին՝ հինգ մրցանակներով։ Գլխաւոր մրցանակը 5.000 տոլար պիտի ըլլայ, երկրորդը՝ 2.000 տոլար, իսկ յաջորդական երեք մրցանակներ ալ պիտի ըլլան՝ 1.000ական տոլարի արժողութեամբ։
Ինչպէս սովոր ենք ըսել, վիճակահանութեան մէջ բոլորս կը շահինք, քանի որ եկամուտը կը նպաստէ Առաջնորդարանի դաստիարակչական եւ կրօնական ծրագիրներուն։
Վիճակահանութեան տոմսերը 100 տոլար են։ Տոմսեր գնելու համար, կրնաք դիմել ձեր շրջանի ծուխին կամ Առաջնորդարանի գրասենեակ (email@armenianprelacy.org կամ 212-689-7810)։
|
|
«ՀԱՅԿԱԿԱՆ ԼԵՌՆԱՇԽԱՐՀԸ ԵՒ ՄԻՋԱԳԵՏՔԸ»
(ՊԵՏՐՈՍ ԹՈՎՄԱՍԵԱՆ)
|
|
Միջագետքի բարեբեր տարածքր, շնորհիւ Հայկական լեռնաշխարհէն բխող երկուորեակ գետերու՝ Տիգրիսի եւ Եփրատի, եղած է պատմութեան սկիզբէն ի վեր Հայկական լեռնաշխարհի եւ Արաբական թերակղզիի ժողովուրդներու գաղթօճախը։
Այս ուսումնասիրութիւնը կը լուսաբանէ այդ տարբեր ժողովուրդներու եւ քաղաքակրթութիւններու շփման կապերու պատմութիւնը, աւելի լաւ կեանքի պայմաններ որոնելու՝ բարեբեր հող, յարմարաւէտ կլիմայ եւ ոռոգման ջուր, որոնք քաղաքակիրթ պետութիւններու յառաջացման եւ շփման հիմնական պայմաններն են։
Յատկանշական է, որ Հայկական լեռնաշխարհի եւ Միջագետքի ժողովուրդներու միջեւ եղած կապերը շատ հինէն կու գան, եւ ունին զգալի բացառիկութիւն մը. Անոնք կը սկսին ուղղակի հայ ժողովուրդի պատմութեան սկիզբէն՝ ծագման շրջանէն, ինչպէս որ ան խտացուած է Հայկի եւ Բէլի պատմութեան մէջ։
|
|
Այս գիրքը տրամադրելի է Ազգային Առաջնորդարանի գրախանութէն։
|
|
ՊԵՐՃ ԶԷՅԹՈՒՆՑԵԱՆ (մահ՝ 21 Օգոստոս, 2017)
|
|
Յայտնի թատերագիր ու վիպագիր, Պերճ Զէյթունցեան նաեւ հանրային կարեւոր պաշտօններ վարած է, ինչպէս նորանկախ Հայաստանի առաջին մշակոյթի նախարարի պաշտօնը։
Ծնած է 18 Յուլիս, 1938ին, Աղեքսանդրիա (Եգիպտոս)։ 1948ին իր ծնողներուն հետ Խորհրդային Հայաստան փոխադրուած է։ 1956ին Երեւանի Ղազարոս Աղայեանի անուան միջնակարգ դպրոցէն շրջանաւարտ եղած է՝ ոսկեայ մետալով։ Զէյթունցեան կանուխէն ցոյց տուած է իր գրական տաղանդը։ 1953ին իր առաջին պատմուածքը հրատարակելով «Պիոներ» ամսագրին մէջ, դպրոցը աւարտելու տարին՝ 1956ին, լոյս ընծայած է իր առաջին հատորը՝ «Նրա առաջին ընկերը» պատմուածքներու հաւաքածոն։ Նոյն տարին Հայաստանի երիտասարդական փառատօնի առաջին մրցանակը ստացած է, իսկ յաջորդ տարին՝ Խորհրդային Միութեան երիտասարդական փառատօնի երկրորդ մրցանակը։ 1959ին հրատարակեց «Մեր թաղի ձայները» (պատմուածքներ եւ վիպակ), իսկ 1963ին՝ «Մեզնից յետոյ» վէպը։
1963ին աւարտելէ ետք Պեատիգորսկի (Ռուսաստան) օտար լեզուներու հիմնարկի հեռակայ բաժինը, 1963-1964ին Զէյթունցեան Մոսկուայի բեմագրութեան երկամեայ բարձրագոյն դասընթացքին հետեւած է։ Մոսկուայէն վերադարձին, «Հայֆիլմ» շարժանկարի արուեստանոցի խմբագիր (1965-1968) եւ հեռատեսիլի շարժանկարներու «Երեւան» արուեստանոցի գլխաւոր խմբագիր եղած է (1968-1975)։ Ֆրունզէ Դովլաթեանի «Երեւանեան օրերի խրոնիկա» ժապաւէնը (1973) նկարահանուած է Պերճ Զէյթունցեանի բեմագիրով։
1975-1986ին Զէյթունցեան Հայաստանի Գրողներու Միութեան քարտուղար էր։ Այլ գործերու շարքին, 1977ին հրատարակած է «Արշակ Երկրորդ» պատմավէպը, իսկ 1980ական թուականներուն սկսած է լոյս ընծայել թատերախաղեր, որոնց առաջին նմոյշները ամփոփուած են «Ամենատխուր մարդը» (1981) եւ «Մեծ լռութիւն» (1985) հատորներուն մէջ։ Իր թատերական վաստակը կ՚ընդգրկէ 12 գործեր, որոնք բեմադրուած են Երեւանի թատրոններուն մէջ, ինչպէս եւ այլուր։ Հրատարակած է նաեւ հրապարակագրական յօդուածներու ժողովածուներ։ Անգլերէնէ թարգմանած է, ի շարս այլոց, Կրէհէմ Կրինի եւ Էռնեստ Հէմինկուէյի գործերը։
1986-1990ին «Պիոներ» ամսագրի խմբագրապետը եղած է, իսկ 1989ին Հայաստանի մշակոյթի վաստակաւոր գործիչի կոչումը ստացած է։ 1991-1992ին, Պերճ Զէյթունցեան վերանկախացած Հայաստանի Հանրապետութեան մշակոյթի առաջին նախարարը եղած է։ Արժանացած է բազմաթիւ մրցանակներու եւ մետալներու, ինչպէս «Մովսէս Խորենացի» մետալը (1998), Հայաստանի պետական մրցանակը 1999ին՝ «Խոր Վիրապ» թատերախաղի համար, «Մեսրոպ Մաշտոց» շքանշանը (2008), եւ այլն։ 2005ին ընտրուած է Երեւանի պատուաւոր քաղաքացի։
Ականաւոր վիպասանն ու թատերագիրը մահացած է Երեւանի մէջ, 21 Օգոստոս, 2017ին։
|
|
Յուլիս 1977ին Մեծի Տանն Կիլիկիոյ Աթոռակից Կաթողիկոս օծուելէ ետք, Ն.Ս.Օ.Տ.Տ. Գարեգին Բ. կատարեց իր առաջին ճամբորդութիւնը Լիբանանէն դուրս դէպի Ժընեւ, ուր մասնակցեցաւ Եկեղեցիներու Համաշխարհային Խորհուրդի գործադիր վարչութեան մէկ ժողովին։ Այս լուսանկարին մէջ զինք կը դիմաւորէ պատուելի դոկտ. Էտուըրտ Սքոթ՝ Գանատայի Անգլիկան Եկեղեցւոյ պետ եւ Եկեղեցիներու Համաշխարհային Խորհուրդի համակարգող (moderator)։ Հայց. Եկեղեցին միջ-եկեղեցական շարժումին գործօն մասնակցութիւն բերած է 1962էն ի վեր։ Գարեգին Բ. Կաթողիկոս մասնակցեցաւ տարբեր ձեւերով, իսկ 1975ին Եկեղեցիներու Համաշխարհային Խորհուրդի փոխ-համակարգող րնտրուեցաւ։ Այս մասնակցութիւնը շարունակուեցաւ Մեծի Տանն Կիլիկիոյ այժմու Կաթողիկոս՝ Ն.Ս.Օ.Տ.Տ. Արամ Ա.ի ղեկավարութեամբ, որ երկու շրջան ծառայեց իբրեւ Եկեղեցիներու Խորհուրդի համակարգող (moderator) եւ կը շարունակէ զօրավիգ կանգնիլ միջ-եկեղեցական շարժումին։
|
|
Սիրով կ՚ընդունինք ձեր հայերէն կամ անգլերէն նամակները, ինչպէս եւ թղթակցութիւններ, լուսանկարներ եւ ժամանակացոյցի համար նիւթեր։ Պայմանաժամը՝ Երեքշաբթի երեկոյ։ Մեր հասցէն՝ crossroads@armenianprelacy.org։
|
|
ՁԵՌՆԱՐԿՆԵՐՈՒ ԺԱՄԱՆԱԿԱՑՈՅՑ |
|
21 Օգոստոս —«Սիամանթօ» լսարանի ամառնային առցանց չորրորդ հանդիպում, Ուրբաթ, կէսօրէ ետք ժամը 4:00ին։ Տեղեկութիւններու համար, կապուեցէք Ուսումնական Խորհուրդի վարիչ տնօրէն՝ տիկ. Մարի Կիւլիւմեանին հետ (anec@armenianprelacy.org կամ 212-689-7810)։
24 Օգոստոս —Ս. Գիրքի առցանց սերտողութիւն (վերջին երկու մասեր)՝ նուիրուած՝ Պօղոս Առաքեալի Փիլեմոնին ուղղուած թուղթին։ Երկուշաբթի, երեկոյեան ժամը 8:00էն 9:00։ Սերտողութիւնը կը վարէ Ազգ. Առաջնորդարանի Քրիստոնէական Դաստիարակութեան բաժանմուքի տնօրէն՝ Շանթ Ա. Սրկ. Գազանճեան։ Արձանագրուելու համար, հաճեցեք գրել ձեր անունը, հասցէն ու հեռաձայնի թիւը shant@armenianprelacy.org հասցէին։
12 Սեպտեմբեր —Ազգային Երեսփոխանական Ժողով՝ առցանց, կազմակերպութեամբ՝ Ազգային Առաջնորդարանի։
4 Հոկտեմբեր —Նիւ Պրիթընի (Քընէթիքըթ) Ս. Ստեփանոս եկեղեցւոյ 95ամեակի տօնախմբութիւն։
28 Նոյեմբեր —Փրաւիտընսի (Ռոտ Այլընտ) Ս. Վարդանանց եկեղեցոյ 80ամեակի տօնախմբութիւն, հովանաւորութեամբ՝ Գերշ. Տ. Անուշաւան Արքեպիսկոպոսի։
|
|
Follow us on Social Media |
|
The Armenian Prelacy
Tel: 212-689-7810 ♦ Fax: 212-689-7168 ♦ Email: email@armenianprelacy.org
|
|
|
|
|
|
|
