ᐋᖅᑭᒃᓱᐃᕙᓪᓕᐊᓂᖅ ᐃᖅᑲᓇᐃᔭᕐᕕᒋᔭᒥ ᖃᓄᐃᙱᑦᑎᐊᕋᓱᖕᓂᖅ ᐊᑦᑕᕐᓇᕐᑕᐃᓕᒪᓂᕐᓗ ᐱᓕᕆᐊᒃᓴᓂᒃ ᐃᖅᑲᓇᐃᔭᕐᕕᖕᓄᑦ ᓴᐱᕐᓇᕈᒥᓇᐳᖅ, ᑭᓯᐊᓂ ᐃᑲᔪᕆᐊᖅᓯᒪᕗᒍᑦ ᐃᓕᖕᓂᒃ. ᑕᒪᓐᓇ ᓄᑖᖅ ᒪᓕᒃᑕᐅᔭᕆᐊᓖᑦ ᖃᓄᐃᓕᐅᕈᑎᓄᑦ ᐃᖅᑲᓇᐃᔭᕐᕕᒋᔭᒥ ᖃᓄᐃᙱᑦᑎᐊᕋᓱᖕᓂᖅ ᐊᑦᑕᕐᓇᕐᑕᐃᓕᒪᓂᕐᓗ ᐱᓕᕆᐊᒃᓴᓄᑦ ᐃᑲᔪᖃᑦᑕᕐᓂᐊᖅᐳᖅ ᐊᐅᓚᑦᑎᔨᒥᒃ ᓴᖅᑭᑦᑎᕙᓪᓕᐊᓂᒃᑯᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᓕᕆᐊᒃᓴᓂᒃ ᐋᖅᑭᒃᓱᖅᑕᐅᔪᓐᓇᖅᑐᓂᑦ ᐱᔭᐅᔭᕆᐊᖃᖅᑐᓄᑦ ᐃᖅᑲᓇᐃᔭᕐᕕᖕᓂ. ᑕᕝᕙᓂ ᒪᓕᒃᑕᐅᔭᕆᐊᓕᖕᓂᑦ ᖃᓄᐃᓕᐅᕈᑎᓄᑦ, ᐃᓕᑦᑎᓂᐊᖅᐳᑎᑦ:

ᐅᓇ ᓇᕿᓪᓗᒍ ᐊᑐᕈᓐᓇᖅᓯᓂᕐᒧᑦ ᒪᓕᒃᑕᐅᔭᕆᐊᓕᖕᓄᑦ ᖃᓄᐃᓕᐅᕈᑎᓄᑦ ᐃᖅᑲᓇᐃᔭᕐᕕᒋᔭᒥ ᖃᓄᐃᙱᑦᑎᐊᕋᓱᖕᓂᖅ ᐊᑦᑕᕐᓇᕐᑕᐃᓕᒪᓂᕐᓗ ᐱᓕᕆᐊᒃᓴᓄᑦ.

ᑕᖕᒫᕐᕕᐅᓂᐊᖅᑐᓂᑦ ᐋᖅᑭᒃᓱᐃᕙᓪᓕᐊᓂᖅ ᐊᒻᒪ ᐋᖅᑭᐅᒪᑎᑦᑎᓂᖅ ᒪᓕᒃᑕᐅᔭᕆᐊᓕᖕᓄᑦ ᖃᓄᐃᓕᐅᕈᑎᓄᑦ ᐊᑐᐃᓐᓇᐅᕗᖅ ᐃᖅᑲᓇᐃᔭᕐᕕᒋᔭᐅᔪᓄᑦ ᐋᖅᑭᐅᒪᓂᖃᕆᐊᖃᖅᑐᓄᑦ ᐅᖓᓯᖕᓂᖅᓴᐅᔪᓄᑦ ᐃᖅᑲᓇᐃᔭᕐᕕᐅᔪᓄᑦ ᐃᖅᑲᓇᐃᔮᖏᓐᓂᒃ. ᐱᔪᓐᓇᖅᑎᑦᑎᓲᑦ ᑲᒪᒋᔭᖃᕐᓂᕐᒥᑦ ᑕᖕᒫᕐᕕᐅᓂᐊᖅᑐᓂᑦ ᐋᖅᑭᒃᓱᐃᕙᓪᓕᐊᓂᕐᒥᑦ ᐊᒻᒪ ᐊᐅᓚᑦᑎᓂᕐᒥᑦ ᓈᒻᒪᓛᒃᑯᑦ ᐱᓕᕆᔾᔪᓯᓂᑦ, ᒪᓂᒪᑎᑦᑎᓪᓗᑎᒡᓗ ᐊᑐᖅᑕᐅᕙᒃᑐᓂᑦ ᐱᑐᒡᕕᖕᓂᒃ ᐊᒻᒪ ᐱᔾᔪᑎᒃᓴᓂᑦ. ᑖᒃᑯᐊ ᒪᓕᒃᑕᐅᔭᕆᐊᓖᑦ ᖃᓄᐃᓕᐅᕈᑎᓄᑦ ᐅᖃᐅᓯᖃᖅᐳᑦ:

• ᓂᕈᐊᖅᖠᕐᓂᕐᒥᑦ ᓈᒻᒪᒃᑐᓂᑦ ᐱᓕᕆᐊᒃᓴᓂᑦ ᐅᕝᕙᓘᓐᓃᑦ ᑕᖕᒫᕐᕕᐅᓂᐊᖅᑐᓂᑦ, ᐊᒻᒪ ᐱᕕᒃᓴᕆᔭᐅᓇᔭᖅᑐᖅ ᑲᒪᒋᔭᖃᕈᓐᓇᕐᓂᕐᒥᒃ ᐱᔪᓐᓇᐅᑎᑖᕋᓱᖕᓂᕐᒥᒃ ᑕᑯᔭᒐᖃᕐᕖᑦ ᒪᒃᐱᖅᑕᐅᓚᐅᙱᓐᓂᖏᓐᓂᒃ;
• ᐃᓱᒪᒋᓗᐊᕆᐊᓕᖕᓄᑦ ᐱᔾᔪᑕᐅᔪᑦ ᐃᓱᒪᒋᔭᒃᓴᑦ, ᓲᕐᓗ: ᐊᐅᓚᑦᑎᔾᔪᑕᐅᓂᐊᖅᑐᓄᑦ ᐱᕕᒃᓴᖃᕆᐊᖃᕐᓂᖅ ᑕᖕᒫᕐᕕᖕᒥ (ᐊᕐᕌᒍ ᐃᓚᐃᓐᓇᖓᑕ ᐃᓗᐊᓂ/ᐊᕐᕌᒍᓕᒫᖅ); ᐊᑯᓂᐅᑎᒋᔪᓐᓇᕐᓂᖓ (ᐃᓂᒋᓚᐅᑲᒐᔭᖅᑕᖓᓂᒃ/ᐃᓂᑖᕆᑦᑎᐊᒻᒪᕆᒐᔭᖅᑕᖓᓂᒃ) ᖃᓄᖅ ᐊᖏᑎᒋᔭᕆᐊᖃᕐᒪᖔᑦ ᑕᖕᒫᕐᕕᐅᓇᔭᖅᑐᖅ; ᐊᒻᒪ ᐊᑐᐃᓐᓇᐅᓂᖏᑦ (ᐃᖏᕐᕋᔾᔪᑎᑦ ᐊᑐᖅᑕᐅᔭᕆᐊᓖᑦ);
• ᐊᑐᐊᒐᐃᑦ, ᐊᑦᑕᕐᓇᑐᐃᓐᓇᕆᐊᓖᑦ, ᐊᒻᒪ ᖁᐊᖅᓵᕐᓇᖅᑐᑦ ᐃᖅᑲᓇᐃᔭᕐᕕᒋᔭᐅᔪᓂᑦ ᐃᓱᒪᒋᔭᐅᔭᕆᐊᓖᑦ ᐱᕙᒌᔭᓂᕐᒧᑦ ᐱᓕᕆᑎᓪᓗᒋᑦ;
• ᖃᓄᐃᙱᑦᑎᐊᕋᓱᖕᓂᕐᒧᑦ, ᐊᑦᑕᕐᓇᖅᑐᒦᑦᑕᐃᓕᒪᓂᖅ, ᐊᒻᒪ ᐊᕙᑎᒧᑦ ᐃᓱᒪᒋᔭᐅᔪᑦ ᐊᒃᑐᐃᓂᖃᕐᓂᐊᖅᑐᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑕᖕᒫᕐᕕᒋᔭᕐᓂᑦ ᐋᖅᑭᒃᓱᐃᓂᕐᒧᑦ; ᐊᒻᒪ
• ᓈᒻᒪᒃᑐᒃᑯᑦ ᐋᖅᑭᒃᓱᖅᑕᐅᓯᒪᔪᑦ ᐊᑐᖅᑕᐅᔭᕆᐊᓖᑦ ᐱᓕᕆᓂᕐᒧᑦ, ᓂᕆᓂᕐᒧᑦ, ᐊᒻᒪ ᓯᓂᖕᓂᕐᒧᑦ ᐃᓂᖃᕆᐊᖃᕐᓂᕐᒥᒃ.

          

ᐊᐅᔭᒃᑯᑦ ᐅᑭᐅᖅᑕᑦᑐᒥ ᓇᐃᓗᐊᖃᑦᑕᖅᑐᑦ, ᑕᐃᒪᐃᒻᒪᑦ ᐅᑭᐅᖅᑕᖅᑐᕐᖕᒥᐅᑦ ᖃᐅᔨᒪᔪᑦ ᖃᓄᖅ ᐊᑑᑎᖃᖅᑎᑦᑎᑦᑎᐊᕈᓐᓇᕐᓂᖏᓐᓄᑦ. ᐊᓕᐊᓇᐃᒍᓱᒃᑲᓗᐊᕈᕕᑦ ᑕᐅᓇᓂ ᐃᒫᓂᑦ, ᓄᓇᑐᐃᓐᓇᕐᒥ, ᐅᕝᕙᓘᓐᓃᑦ ᐱᖃᓐᓇᕆᔭᕐᓂᑦ ᐊᒻᒪ ᖃᑕᙳᑎᓂᒃ ᑕᖕᒫᖃᑎᖃᖅᓯᒪᑎᓪᓗᑎᑦ, ᐱᕙᒌᔭᖅᓯᒪᔭᕆᐊᖃᖅᑐᑎᑦ. ᐊᑦᑕᕐᓇᖅᑐᒦᑦᑕᐃᓕᒪᓂᖅ ᑭᒃᑯᓕᒫᑦᑎᐊᑦ ᑲᒪᒋᔭᒃᓴᕆᕚ, ᐃᖅᑲᓇᐃᔭᕐᕕᖕᒥᑐᐊᖑᙱᑦᑐᖅ −ᑭᓱᓕᕆᔭᓕᒫᑦᑎᓐᓂᑦ ᐊᑐᖃᑦᑕᓪᓗᐊᖅᑕᕗᑦ.

ᓄᓇᑐᐃᓐᓇᕐᒥ: ᐱᓱᔪᖕᓂᖅ / ᑲᑎᖅᓱᐃᓂᖅ ᐊᑦᑕᕐᓇᖅᑐᒦᑦᑕᐃᓕᔾᔪᑎᓂᒃ

ᐊᓕᐊᓇᐃᒍᓱᒃᑎᓪᓗᑕ ᐃᓚᑰᔪᖅ ᑐᒃᑑᑉ ᓂᖄᓂᒃ ᐊᕝᕗᖅᑎ ᔭᓗᓇᐃᒥ ᓴᖅᓚᐅᕐᒪᑦ ᖃᓄᐃᙱᑦᑎᐊᖅᖢᓂ ᔪᒪᐃ ᐱᒋᐊᕐᓂᖓᓂ, ᐃᖅᑲᐃᓐᓇᖅᐳᖅ ᑭᓇᑐᐃᓐᓇᖅ ᐱᓱᔪᒡᓗᓂ ᓄᓇᐃᓐᓇᕐᒥ ᒪᓕᖃᑦᑕᕆᐊᖃᕐᓂᖏᓐᓂᒃ ᐅᑯᓂᖓ ᐊᑦᑕᕐᓇᙱᓐᓂᕐᒧᑦ ᑐᑭᓯᒋᐊᕈᑎᓂᒃ:

• ᐱᓱᔪᒋᐊᓚᐅᙱᓐᓂᕐᓂ, ᓇᓗᓇᐃᕐᓗᑎᑦ ᓇᒧᑦ ᐱᓱᔪᒋᐊᕐᒪᖔᕐᓂᕐᓂᒃ ᖃᖓᓗ ᐅᑎᖅᓯᒪᓕᕐᓂᐊᕐᒪᖔᖅᓂᕐᓂᒃ.
   
• ᐱᕙᒌᔭᓂᖅ ᐱᒻᒪᕆᐅᕗᖅ: ᑐᑭᓯᐅᒪᓗᒍ ᐊᖅᑯᑎᒋᓂᐊᖅᑕᑦ ᐊᐅᓪᓚᕐᓂᕆᓂᐊᖅᑕᕐᓄᑦ ᐸᕐᓇᒃᓯᒪᑦᑎᐊᕐᓗᑎᑦ ᐊᓐᓄᕌᖅᓯᒪᑦᑎᐊᓗᑎᓪᓗ. ᖃᐅᔨᒋᐊᕐᓗᒍ ᓯᓚᓐᓂᐊᖅᑎ ᐊᐅᓪᓚᓚᐅᙱᓐᓂᕐᓂ.
   
• ᑐᑭᖃᕐᓗᑎᑦ ᑐᓴᐅᒪᖃᑦᑕᐅᑎᔾᔪᑎᒋᓂᐊᖅᑕᕐᓄᑦ: ᐅᖄᓚᐅᑎᑦ ᐊᑲᐅᓛᖑᔪᑦ, ᑭᓯᐊᓂ ᑐᓴᐅᒪᖃᑦᑕᐅᑎᔾᔪᑎᑐᐃᓐᓇᓂᑦ ᐱᖃᕐᓗᓂ ᐊᑲᐅᓂᖅᓴᐅᕗᖅ ᐱᖃᙱᑦᑎᐊᒻᒪᕆᖕᓂᕐᒥᒃ.
   
• ᓇᒃᓴᖅᐸᒡᓗᑎᑦ ᑕᒻᒪᕆᒃᑯᑎᒥᒃ ᖃᐅᔨᒪᓗᒍᓗ ᖃᓄᖅ ᐊᐅᓚᑕᐅᔭᕆᐊᖃᕐᒪᖔᑦ. ᐹᑕᓖᖃᒃᑲᓐᓂᕋᓗᐊᕐᒪᖔᑦ ᖃᐅᔨᒋᐊᕐᓗᑎᑦ.
   
• ᓇᒃᓴᕐᓗᑎᑦ ᑭᓱᒥᒃᑭᐊᖅ ᖃᐅᒪᔪᒥᑦ, ᖃᐅᒻᒪᖅᑯᑎᒥᒃ, ᐅᕝᕙᓘᓐᓃᑦ ᓴᖅᑭᔮᑦᑎᐊᕐᓇᖅᑐᓂᑦ, ᐊᓐᓄᕌᖑᒐᓗᐊᖅᐸᑦ ᐅᕝᕙᓘᓐᓃᑦ ᒥᑭᑦᑐᒥᒃ ᐃᒃᐱᐊᕐᔪᖕᒥᐅᑕᒥ ᑕᕐᕋᖅᑑᑎᒥᒃ ᐊᑐᕈᓐᓇᖅᑕᕐᓂᒃ ᓇᓗᓇᐃᖅᓯᓂᕐᒧᑦ ᕿᓂᖅᑎᓂᒃ ᖃᖓᑕᔪᓂᒃ ᓄᓇᒦᑦᑐᓂᓪᓘᓐᓃᑦ.
   
• ᐊᐅᓪᓚᖃᑎᖃᕈᓐᓇᕌᖓᕕᑦ ᐱᖃᑎᖃᖅᐸᒡᓗᑎᑦ ᐊᔪᕐᓇᙱᑉᐸᑦ. ᑲᑎᖃᑎᒌᖕᓂᐊᕈᔅᓯ ᓂᕆᖃᑎᒌᖕᓂᐊᕈᔅᓯᓘᓐᓃᑦ, ᐊᑲᐅᓂᖅᐹᖑᕗᖅ ᐱᓕᕆᖃᑎᖃᖃᑦᑕᕐᓂᒃᑯᑦ ᐊᑐᓕᕐᓂᕐᒥᒡᓗ ᐱᖃᑎᒌᓕᖃᑦᑕᕈᓐᓇᕐᓂᕐᒥᑦ.
   
• ᐸᕐᓇᐃᓗᑎᑦ ᐋᓐᓂᖅᑐᓕᕆᔾᔪᑎᓄᑦ ᑲᑎᖅᓱᖅᓯᒪᔪᓂᑦ. ᐃᓚᒋᐊᖅᐸᒡᓗᒍ ᐋᓐᓂᖅᑐᓕᕆᔾᔪᑎᓄᑦ ᑲᑎᖅᓱᖅᓯᒪᔭᐃᑦ ᖃᑯᑎᒃᑯᑦ.
   
• ᓇᒃᓴᖅᐸᒡᓗᑎᑦ ᓈᒻᒪᒃᑐᓂᑦ ᓂᕿᓂᑦ ᐃᒪᕐᒥᒡᓗ. ᐃᒪᕐᒥᑦ ᓱᕈᐃᔭᐃᔾᔪᑎᑦ/ ᓴᓗᒻᒪᖅᓴᐃᔾᔪᑎᑦ ᐊᑲᐅᓕᕈᓐᓇᖅᑐᑦ ᖃᐅᔨᒪᒍᕕᑦ ᐊᐅᓪᓚᕐᓂᐊᕐᓂᕐᓂᒃ ᐃᒪᐅᑉ ᖃᓂᒋᔮᓄᑦ.
   
• ᐱᕙᒌᔭᖅᓯᒪᒋᑦ ᐊᑲᐅᙱᓛᑦᑎᐊᕐᒧᑦ ᓂᕆᐅᓇᙱᑦᑐᒧᑦ: ᐊᓯᐅᒍᕕᑦ, ᐃᓕᙵᒃᑯᕕᑦ, ᐅᕝᕙᓘᓐᓃᑦ ᑐᑭᖃᕈᓐᓃᕈᕕᑦ, ᐅᓪᓗᕐᒧᑦ ᐸᕐᓇᐅᑎᑦ ᓇᒃᓴᕋᓗᐊᕐᒪᖔᑦ ᐊᑐᒐᒃᓴᓂᒃ; ᐊᑯᓂᐅᑐᐃᓐᓇᕆᐊᖃᕐᒪᑦ ᕿᓂᖅᑎᓂᑦ ᓇᓂᔭᐅᓂᐊᕐᓂᕆᔭᐃᑦ.

ᐃᒫᓂ: ᐅᒥᐊᖅᑐᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᖅ

• ᐊᐅᓪᓚᕐᓂᐊᖅᑎᓪᓗᑎᑦ ᓇᒧᑐᐃᓐᓇᖅ, ᖃᐅᔨᑎᑦᑎᓗᑎᑦ ᑭᓇᑐᐃᓐᓇᒥᑦ ᐅᒥᐊᖅᑐᕆᐊᓚᐅᙱᓐᓂᕐᓂᒃ, ᓇᒧᙵᐅᖕᒪᖔᖅᐱᑦ ᐊᒻᒪ ᖃᖓ ᐅᑎᖅᓯᒪᓕᕐᓂᐊᕋᓱᒋᖕᒪᖔᑦ.
  
  
• ᖃᐅᔨᒪᓗᑎᑦ ᓇᒧᙵᐅᖕᒪᖔᖅᐱᑦ: ᖃᐅᔨᓗᒍ ᐃᓂᐅᔪᖅ, ᖃᐅᔨᒪᓕᕐᓗᑎᑦ ᓄᓇᐅᑉ ᓇᓗᓇᐃᒃᑯᑕᖏᓐᓂᒃ ᐊᒻᒪ ᓄᓇᓕᖕᓄᑦ ᖁᐊᖅᓵᕐᓇᖅᑐᑦ.
  
  
• ᐱᕙᒌᔭᕐᓗᑎᑦ ᐋᖅᑭᒃᓱᖅᓯᒪᕙᒌᕐᓗᑎᓪᓗ: ᖃᐅᔨᒋᐊᕐᓗᒋᑦ ᓯᓚᓐᓂᐊᖅᑎᒃᑯᑦ, ᐃᓱᒪᒋᔭᐅᖃᓯᐅᔾᔭᐅᓇᔭᖅᑐᑦ ᓂᒡᓚᓱᖕᓃᑦ, ᐊᓄᕆ, ᐊᒻᒪ ᒪᓕᐅᑉ ᑕᑭᓂᖏᑦ (ᑲᓇᑕᒥᑦ ᐊᕙᑎᓕᕆᔨᒃᑯᑦ ᑕᕆᐅᕐᒥᐅᑕᓄᑦ ᓯᓚᓐᓂᐊᕐᑎᑦ ᑕᕆᐅᕐᒥᐅᑕᓄᑦ ᓯᓚᓐᓂᐊᖅᑎᑦ ᐃᑲᔪᕈᓐᓇᖅᑐᑦ). ᐸᕐᓇᒡᓗᑎᑦ ᐊᓐᓄᕌᑦᑎᐊᕐᓗᑎᓪᓗ ᓈᒻᒪᒃᑐᓂᑦ.
  
  
• ᐸᕐᓇᒡᓗᑎᑦ ᓈᒻᒪᒃᑐᓂᑦ ᓱᓇᒃᑯᑖᓂᒃ ᐅᒥᐊᖅᑐᕐᓂᐊᕐᓂᕆᔭᕐᓄᑦ, ᐃᓚᖃᕐᓗᒋᑦ ᑐᐊᕕᕐᓇᖅᑐᓕᕆᓂᕐᒧᑦ ᓱᓇᒃᑯᑕᑦ.
  
  
• ᐃᒪᕐᒥ ᐊᑦᑕᕐᓇᖅᑕᐃᓕᒪᓂᖅ: ᐊᒥᒐᙱᑦᑐᓂᑦ ᐱᓯᒪᒐᓗᐊᕐᓗᓂ PFD−ᓂᒃ (ᐃᒻᒥᒧᑦ ᐳᒃᑕᓪᓚᖅᑎᑦᑎᓂᕐᒧᑦ ᐊᑐᖅᑕᐅᔪᓐᓇᖅᑐᑦ / ᐳᒃᑕᖅᑯᑎᓂᒃ ᔭᐃᑲᖕᓂᑦ) ᐊᑐᓂ ᐃᓄᖕᓄᑦ ᐃᑭᒪᔪᓄᑦ, ᑕᒪᐃᓐᓂᒃ ᐊᔪᙱᒃᑲᓗᐊᕐᒪᖔᑦ ᖃᐅᔨᒋᐊᕐᓗᒋᑦ ᐊᒻᒪ ᓈᒻᒪᒋᔭᐅᒐᓗᐊᕐᒪᖔᑦ ᐃᓄᖕᒧᑦ ᐊᑐᕆᐊᖃᖅᑐᒧᑦ: ᐃᑭᒪᔪᓕᒫᑦ ᐊᑐᐃᓐᓇᖅᑎᓪᓗᒋᑦ ᖃᖓᓕᒫᖅ −ᐃᓱᒪᑦᑕᐃᓕᒋᑦ ᐊᑎᐊᓂᒍᓐᓇᕆᐊᒃᓴᖅ ᓈᒻᒪᒃᑐᒃᑯᑦ ᑐᐊᕕᕐᓇᖅᑐᖃᓕᑳᓪᓚᒃᑯᓂ.
  
  
• ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᑎᑦ:ᖃᐅᔨᒪᓗᑎᑦ ᓇᒦᒻᒪᖔᑦ ᐊᑐᐃᓐᓇᐅᔪᑦ PFD ᑐᖅᑯᖅᑕᐅᓯᒪᖕᒪᖔᑦ ᐅᒥᐊᕐᒥ, ᐊᒻᒪᓗ ᐊᓯᖏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᖁᑎᑦ, ᓲᕐᓗ ᐸᐅᑎᑦ, ᐅᕕᙱᐊᕋᐅᑦ/ᖁᖁᐊᕈᑎ, ᐊᒃᖢᓈᖅ, ᐃᒪᐃᔭᐃᔾᔪᑎᒥᒃ. ᖃᐅᔨᒪᓕᕐᓗᑎᑦ ᐃᓕᖕᓂᒃ ᖃᓄᖅ ᐊᑐᕆᐊᖃᕐᒪᖔᑦ ᐊᑦᑕᕐᓇᙱᓐᓂᕐᒧᑦ ᐱᖁᑎᑦ ᐱᓯᒪᔭᑎᑦ.
  
  
• ᖃᐅᔨᒪᓗᒍ ᐅᒥᐊᕆᔭᑦ ᖃᓄᕐᓗ ᐊᐅᓚᑦᑕᕆᐊᖃᕐᒪᖓᑦ. ᕿᒥᕐᕈᕙᒡᓗᒍ ᐊᐅᓪᓚᓚᐅᙱᓐᓂᕐᓂᑦ ᖃᐅᔨᒋᐊᖅᑎᓪᓗᑎᑦ ᐊᔪᙱᑦᑎᐊᕋᓗᐊᕐᒪᖔᑦ. ᐅᖅᓱᒡᒋᒃᑲᓐᓂᖅᐸᒡᓗᑎᑦ, ᐹᑕᓖᒃᑲᓐᓂᕐᒥᒃ, ᐊᒻᒪ ᑭᖑᕝᕕᐅᑎᒃᓴᒥᒃ ᐊᐅᓚᐅᑎᒥᒃ.
  
  
• ᑐᑭᖃᕐᓗᑎᑦ ᑐᓴᐅᒪᔾᔪᑎᒃᓴᓄᑦ, ᖁᒻᒧᐊᒃᑎᑕᐅᓯᒪᔪᖅ ᐅᖄᓚᐅᒻᒥᒃ ᐅᕝᕙᓘᓐᓃᑦ ᐃᒫᒍᑦ ᐊᑐᖅᑕᐅᔪᓐᓇᖅᑐᑦ ᓈᓚᐅᑎᒥᒃ. ᐊᔪᕐᓇᙱᒃᑯᓂ, ᐱᓯᒪᕙᒡᓗᑎᑦ ᖁᒻᒧᐊᒃᑎᑕᐅᓯᒪᔪᕐᒥᑦ ᐅᖄᓚᐅᑎᒥᒃ ᐃᓕᖕᓂᒃ ᖃᖓᑐᐃᓐᓇᖅ −ᐱᕕᖃᙱᑐᐃᓐᓇᕆᐊᖃᕋᕕᑦ ᑐᐊᕕᕐᓇᖅᑐᖃᓕᖅᐸᑦ ᕿᓂᕆᐊᕆᐊᒃᓴᖅ.
   
• ᐳᐃᔾᔪᕌᕆᐅᖅᓴᓗᑎᑦ, ᐊᒻᒪ ᖃᐅᔨᒋᐊᕐᓗᑎᑦ ᑭᓇ ᐅᒥᐊᕆᔭᕐᓂᑦ ᐳᐃᔾᔪᕌᕈᓐᓇᙱᒻᒪᒑᑦ. ᐃᑭᒪᔪᑦ ᐊᑐᖅᑐᐃᓐᓇᐅᔭᕆᐊᓖᑦ ᐳᒃᑕᖅᑯᑎᓂᒃ ᔭᐃᑲᖕᓂᒃ, ᑭᓯᐊᓂ ᐱᒻᒪᕆᐅᓂᖅᓴᐅᕗᖅ ᐳᐃᔾᔪᕌᕈᓐᓇᙱᑦᑐᓄᑦ.

ᐃᑭᑦᑐᓕᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᖅ

ᐊᖏᕐᕋᒥ:

• ᐊᔪᕈᓐᓃᖅᓴᖅᐸᒡᓗᒋᑦ ᐃᑭᑦᑐᓕᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐱᕙᒌᔭᐅᑎᑦ ᐊᒻᒪ ᐅᐸᓗᖓᐃᔭᐅᑎᑦ ᖃᑕᙳᑎᖕᓂᑦ. ᓴᖅᑭᑎᑦᑎᓗᑎᑦ ᑲᑎᒪᕝᕕᒋᓂᐊᖅᑕᔅᓯᓐᓂᒃ ᐃᑭᑦᑐᖃᓕᖅᐸᑦ, ᐊᔪᕈᓐᓃᖅᓴᕐᓗᓯᓗ ᕿᑐᙵᕆᑦ.

• ᐃᒐᔾᔪᑏᑦ ᐃᒃᓯᓐᓇᑰᔭᕆᐊᖃᙱᓚᑦ. ᐃᒐᓚᐅᖅᑳᖕᓇᒃ, ᐊᔪᙱᒃᑲᓗᐊᕆᐊᒃᓴᖓᓂᑦ ᖃᐅᔨᓴᕐᓗᒍ, ᐃᑭᑦᑐᓐᓇᕐᓗᒍᓗ, ᖃᑦᑕᖃᕐᓗᑎᑦ ᐃᒪᖕᒥᑦ ᖃᓂᒋᔭᖕᓂᑦ. ᐃᒐᕝᕕᐅᔪᖅ ᐊᕝᕕᐊᕈᑎᖃᙱᓪᓗᓂ ᐱᓱᒃᑐᓄᑦ, ᓄᑕᖅᑲᓂᑦ, ᑎᒍᐊᓂᒡᓗ ᑕᒪᒃᑯᐊᓗ ᐳᓪᓚᐃᑦ ᐊᑦᑕᖕᓇᖅᑐᒦᑎᙱᓪᓗᒋᑦ.
   
• ᖃᑦᑎᕈᑎᖃᕐᓗᑎᑦ; ᖃᐅᔨᒪᙱᓐᓇᕕᑦ ᐊᑐᕆᐊᖃᓯᑳᓪᓚᒋᐊᖃᕐᓂᖓᓂᒃ. ᐃᓕᓐᓂᐊᖅᑎᓪᓗᒋᑦ ᐃᒡᓗᒥᐅᑕᓕᒫᑦ ᖃᓄᖅ ᐊᐅᓚᑦᑕᕆᐊᖃᕐᒪᖓᑦ, ᓇᒦᒻᒪᖔᓪᓗ. ᖃᐅᔨᒋᐊᖅᑕᐅᑎᑉᐸᒡᓗᒍ ᐊᑕᐅᓯᐊᕐᓗᒍ ᐊᕐᕌᒍᒥ.
   
• ᓴᓗᒻᒪᖅᓴᖅᐸᒡᓗᒍ ᐸᓂᖅᓰᕕᐅᑉ ᓱᕈᒃᑯᕕᐊ −ᐊᒃᓱᐊᓗᒃ ᐃᑭᓴᕋᐃᑦᑐᖅ. ᓴᓗᒻᒪᖅᓴᖅᐸᒡᓗᒍ ᐸᓂᖅᓰᕕᐅᑉ ᓱᓪᓗᐊ ᐃᒡᓗᕕᑦ ᓯᓚᑖᓄᓕᒫᖅ ᐊᑕᐅᓯᐊᕋᓗᐊᕐᓗᒍ ᐊᕐᕌᒍᒥ.
   
• ᐃᒋᑉᐸᙱᓪᓗᒋᑦ ᓯᒡᒐᓕᐊᕕᓂᖅᑎᑦ ᐱᕈᖅᑐᓄᑦ ᐅᒃᑯᓯᖕᓄᑦ, ᐱᕈᖅᑐᑦ ᐃᔾᔪᖓ ᐃᓚᖃᖅᑐᖅ ᐃᑭᔭᑦᑐᓂᑦ. ᐃᑭᔭᙱᑦᑐᒥᑦ ᐴᕐᓂᒃ ᓯᒡᒐᓕᐊᓄᑦ.

ᑕᖕᒫᕐᕕᖕᒥ:

• ᖃᒥᑦᑎᐊᕐᓗᒍ ᐃᑯᒪᑎᑕᐃᑦ ᕿᒪᓚᐅᙱᓐᓂᕐᓂ ᑕᖕᒫᕐᕕᒋᔭᐃᑦ. ᐃᑯᒪᑎᑕᐃᑦ ᕿᒪᒃᐸᙱᓪᓗᒍ ᑲᒪᒋᔭᐅᙱᓪᓗᓂ.

• ᑲᓕᖃᕈᕕᑦ ᑕᖕᒫᕐᕕᒋᔭᕐᓂᑦ, ᐃᑭᔭᑦᑐᑦ ᐅᕝᕙᓘᓐᓃᑦ ᐳᓪᓚᐅᓯᕝᕖᑦ ᖃᓂᒋᑎᙱᓪᓗᒋ ᐃᑯᒪᔪᒧᑦ.
   
• ᐊᔪᙱᑦᑎᐊᖅᑐᒥᑦ ᖃᑦᑎᕈᑎᒥᒃ ᐊᑐᐃᓐᓇᐅᑎᑦᑎᓗᑎᑦᖃᑦᑕᒥᒡᓘᓐᓃᑦ ᐃᒪᓕᖕᒥᑦ.

ᐃᖅᑲᓇᐃᔭᕐᕕᖕᒥ:

• ᐅᒃᑯᐃᙶᖅᑎᑦᑎᔪᒪᓐᓇᕋᓗᐊᕐᓗᓂ ᐅᖅᑰᑎᓪᓗᒍ,ᐃᑭᑦᑐᖃᓯᑳᓪᓚᒃᐸᑦ ᐹᑦ ᐊᑐᖅᑕᐅᓲᑦ ᑎᑎᕋᕐᕕᒋᔭᕕᑦ ᐃᒡᓗᔪᐊᖓᓂᑦ ᐱᔾᔪᑎᖃᖅᐳᑦ ᐊᒻᒪ ᒪᑐᓯᒪᐃᓐᓇᕆᐊᖃᖅᖢᑎᒃ: ᒪᔪᕋᐅᑎᓂᒃ ᐳᔫᓗᐊᖅᑎᑦᑎᓐᓇᙱᒻᒪᑦ ᐊᒻᒪ ᐃᑯᐊᓪᓚᓂᖏᓐᓂᒃ ᐃᑭᑦᑐᖃᖅᑎᓪᓗᒍ, ᐊᖅᑯᑎᖃᖅᑎᑕᐅᔭᕆᐊᖃᖅᖢᑎᒡᓗ ᐊᓂᔪᐃᓐᓇᐅᔭᕆᐊᖃᖅᑎᓪᓗᒋᑦ ᐊᒻᒪ ᖃᑦᑎᕆᔩᑦ ᐃᓯᕈᓐᓇᕐᓂᖏᓐᓄᑦ. ᒪᑐᓯᒪᐃᓐᓇᖅᑎᓪᓗᒋᑦ: ᑕᑯᒍᕕᑦ ᒪᒃᐲᖓᐃᓐᓇᖅᑎᑕᐅᔪᓂᒃ, ᓇᓗᓇᐃᕐᕕᒋᓗᒍ ᐃᖅᑲᓇᐃᔭᕐᕕᖕᒥ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᑲᑎᒪᔨ ᐅᕝᕙᓘᓐᓃᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑭᒡᒐᖅᑐᐃᔩᑦ, ᑐᕌᖅᑎᑕᐅᔪᓐᓇᕐᓂᐊᕐᒪᑕ ᐃᒡᓗᔪᐊᖅᑉ ᐊᐅᓚᑦᑎᔨᖓᓄᑦ.
   
• ᖃᐅᔨᒪᓗᒋᑦ ᓇᒦᒻᒪᖔᑦ ᖃᑦᑎᕈᑎᑦ ᐃᖅᑲᓇᐃᔭᕐᕕᒋᔭᕐᓂ, ᖃᓄᕐᓗ ᐊᐅᓚᑦᑎᔪᓐᓇᕐᒪᖔᑦ. ᖃᑯᑎᒃᑯᑦ ᖃᐅᔨᒋᐊᖅᐸᒡᓗᒋᑦ ᖃᑦᑎᕈᑎᑎᑦ: ᖃᐅᔨᓴᖅᐸᒡᓗᒋᑦ ᐊᕐᕌᒍᑕᒫᑦ.

ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᑎᑎᕋᕐᕕᖏᑦ ᐅᒃᑯᐊᖅᓯᒪᓛᖅᑐᑦ ᐃᖅᑲᓇᐃᔭᖅᑎᓄᑦ ᕿᑲᕐᓇᒥ ᓇᒡᒐᔾᔭ, ᐊᐅᒍᔅᑎ 7, ᐅᒃᑯᐃᒃᑲᓐᓂᕐᓗᑎᑦ ᐊᐃᑉᐹᑦ, ᐊᐅᒍᔅᑎ 8 8:30 ᐅᓪᓚᒃᑯᑦ.

ᐅᖄᓚᓗᑎᑦ 1-800-661-0792 ᖃᐅᔨᒃᑲᐃᔪᒪᓗᓂ ᐱᓂᕐᓗᑦᑐᖃᖅᐸᑦ ᐅᕝᕙᓘᓐᓃᑦ ᐋᓐᓂᖅᑐᖃᖅᐸᑦ ᐃᖅᑲᓇᐃᔭᕐᕕᒻᒥᑦ.