Հաւատով Խոստովանիմ ԺԲ․ աղօթք
Կը կարդայ՝ Նարինէ Պէրպէրեան
(Ս. Գրիգոր Լուսաւորիչ եկեղեցի, Կրանիթ Սիթի, Իլինոյ)
|
|
Հաւատով Խոստովանիմ ԺԳ․ աղօթք
Կը կարդայ՝ Նուշիկ Պարտիզպանեան
(Ս. Երրորդութիւն եկեղեցի, Ուստըր, Մասաչուսեթս)
|
|
ՄԻԱՑԵԱԼ ՆԱՀԱՆԳՆԵՐՈՒ ԾԵՐԱԿՈՅՏԸ
ԿԸ ՃԱՆՉՆԱՅ ՀԱՅՈՑ ՑԵՂԱՍՊԱՆՈՒԹԻՒՆԸ
|
|
Այսօր՝ Հինգշաբթի, 12 Դեկտեմբերի յետմիջօրէն, թրքական ժխտողականութիւնը պատմական հակահարուած մը ստացաւ, երբ Միացեալ Նահանգներու Ծերակոյտը միաձայնութեամբ վաւերացուց Հայոց Ցեղասպանութիւնը ճանչցող բանաձեւը (S. Res. 150)։ Այս բանաձեւը ամերիկեան քաղաքականութեան փոփոխութեան շունչ մը ունի, հակառակ Սպիտակ Տան բազմաթիւ առարկութիւններուն։
Բանաձեւը նոյնատիպ է անցեալ 29 Հոկտեմբերին Ներկայացուցիչներու Տան կողմէ 405-11 արդիւնքով վաւերացուած բանաձեւին (H.Res.296)։ Ան պաշտօնապէս կը մերժէ հայերու, յոյներու ասորիներու, քաղդէացիներու, արամէացիներու, մարոնիներու եւ այլ քրիստոնեաներու դէմ գործուած ցեղասպանութիւնը։ Այս բանաձեւով, որուն նախաձեռնած են ծերակուտականներ Ռոպըրթ Մենենտէզ (դեմոկրատ, Նիւ Ճըրզի) եւ Թէտ Գրուզ (հանրապետական, Թեքսաս), Ծերակոյտը առաջին անգամ ըլլալով կը ճանչնայ Հայոց Ցեղասպանութիւնը։
Թուրքիոյ ընդդիմութեան բոլոր ջանքերը ի դերեւ ելան Հինգշաբթի օր, երբ ծերակուտական Մենենտէզ վերստին առաջադրեց բանաձեւին վաւերացումը եւ որեւէ ծերակուտական չառարկեց։ Նախորդ երեք փորձերուն, տարբեր ծերակուտականներ իրենց միանձնեայ առարկութեամբ ձախողեցուցած էին ճանաչումը։
Ծերակոյտին բանաձեւը կը հաստատէ, իբրեւ ամերիկեան քաղաքականութիւն
․-
ա) Հայոց Ցեղասպանութեան ժխտման մերժումը, բ) այս ոճիրին՝ ԱՄՆ կառավարութեան պաշտօնական ու շարունակական ճանաչումն ու յիշատակութիւնը, եւ գ) Հայոց Ցեղասպանութեան մասին դաստիարակութեան աջակցութիւնը՝ մերօրեայ վայրագութիւններու կանխարգիլման օժանդակելու համար։
Ճանաչումէն անմիջապէս ետք, թեմիս բարեջան առաջնորդ՝ Գերշ. Տ. Անուշաւան արք. Դանիէլեան, հեռաձայն մը ստացաւ ծերակուտական Չարլզ Շումըրէն (դեմոկրատ, Նիւ Եորք), որ կը յայտնէր իր խնդակցութիւնները այս կարեւոր իրադարձութեան առիթով։ Անուշաւան Արքեպիսկոպոս յայտնեց, թէ ասիկա ո՛չ միայն իրագործում մըն է հայոց համար, այլ նաեւ յաղթանակ մը կը ներկայացնէ մարդկային իրաւանց համար ընդհանրապէս՝ դէպի արդարութեան եւ ճանաչում տանող երկար ճանապարհին վրայ։
|
|
ՍԱՀԱԿ ԵՊՍ. ՄԱՇԱԼԵԱՆ՝ ՊՈԼՍՈՅ ՀԱՅՈՑ ՆՈՐ ՊԱՏՐԻԱՐՔ
|
|
Անուշաւան Արքեպիսկոպոս շնորհաւորեց Նորին Ամենապատուութիւն Սահակ Բ. Պատրիարքը՝ Թուրքիոյ մէջ Հայ Եկեղեցւոյ բարձրագոյն պաշտօնին անոր ընտրութեան առիթով։
«Սրտի անհուն ուրախութեամբ իմացանք ձեր ընտրութեան աւետիսը որպէս 85րդ Պատրիարք՝ Կոստանդնուպոլոսոյ Հայոց դարաւոր Աթոռին», յայտնեց Առաջնորդ Սրբազան Հայրը։
«Պատմական այս ցնծալի առիթով, յանուն Արեւելեան Ամերիկայի Թեմի Ազգային Առաջնորդարանի Կրօնական Ժողովին եւ Ազգային Վարչութեան, մեր սրտազգաց շնորհաւորութիւնը կը յայտնենք ձեզի, ինչպէս նաեւ Պատկառելի Ազգային Պատգամաւորական Ժողովին ու Կրօնական Ժողովիդ, եւ հանուր Թուրքիոյ Հայութեան, աղօթելով որ Ամենակալ Տէրը ծաղկեալ պահէ Ձեր Գաւազանը՝ քաջառողջ կեանք պարգեւելով ձեզի եւ իր իմաստութեամբ զարդարելով ձեզ, որպէսզի ընդ երկայն աւուրս ուղիղ վարդապետութեամբ առաջնորդէք ձեզի վստահուած Տիրախնամ հօտը, որ հաւատացած ենք՝ ինչպէս անցեալին, նաեւ ներկայ ժամանակներուն իր բախտորոշ դերակատարութիւնը ունի Հայ կեանքին մէջ»։
Անցեալ 7 Դեկտեմբերին սկսած ընտրական գործընթացին իբրեւ արդիւնք, Պատգամաւորական Ժողովին մասնակցելու ընտրուած 119 պատգամաւորներէն 102ը թեր քուէարկեցին Սահակ եպս. Մաշալեանի ընտրութեան իբրեւ Պոլսոյ Հայոց 85րդ Պատրիարք։
Սահակ Պատրիարքը՝ 57 տարեկան, կը յաջորդէ հոգելոյս Պատրիարք Մեսրոպ Բ. Մութաֆեանին, որ վախճանած էր անցեալ Մարտին, 62 տարեկան հասակին, երկար հիւանդութենէ մը ետք, որ զինք լրիւ անկարող դարձուցած էր 2008 թուականէն ի վեր։
|
|
ՑԵՂԱՍՊԱՆՈՒԹԵԱՆ ՕՐՈՒԱՆ ՆՈՒԻՐՈՒԱԾ ՁԵՌՆԱՐԿ՝ ՄԱԿ-Ի ՄԷՋ
|
|
Երկուշաբթի, 9 Դեկտեմբերին, թեմիս բարեջան առաջնորդ՝ Գերշ. Տ. Անուշաւան արք. Դանիէլեան, եւ առաջնորդական փոխանորդ՝ Գերպ. Տ. Սահակ Ծ. վրդ. Եմիշեան, մասնակցեցան Ցեղասպանութեան զոհերու ոգեկոչման եւ ոճիրի կանխարգիլման օրուան նշումին Նիւ Եորքի ՄԱԿի կեդրոնին մէջ։
|
|
ԱՌԱՋՆՈՐԴ ՍՐԲԱԶԱՆ ՀՕՐ ԳՈՐԾՈՒՆԷՈՒԹԻՒՆԸ
ԱՅՍ ՇԱԲԱԹԱՎԵՐՋԻՆ
|
|
Շաբաթ, 14 Դեկտեմբերի երեկոյեան, Անուշաւան Արքեպիսկոպոս ներկայ պիտի գտնուի Հայաստանի Մանուկներու Հիմնադրամի (COAF) 16րդ տարեկան կալային, իսկ այնուհետեւ՝ Ս. Լուսաւորիչ Մայր Եկեղեցւոյ «Բաշալեան» սրահին մէջ տեղի ունենալիք «Գլապ 27» խրախճանքին։
Կիրակի, 15 Դեկտեմբերին, Առաջնորդ Սրբազան Հայրը պիտի նախագահէ Ս. Պատարագին՝ Տակլըսթընի (Նիւ Եորք) Ս. Սարգիս եկեղեցւոյ մէջ, իսկ յաւարտ Ս. Պատարագի՝ եկեղեցւոյ մէջ տեղի ունենալիք Ս. Ծննդեան աւանդական համերգին, որ իր տասնամեակր կը բոլորէ այս տարի։
|
|
ԿՈՉ՝ ԼԻԲԱՆԱՆԱՀԱՅ ԿԱՐԻՔԱՒՈՐ ԸՆՏԱՆԻՔՆԵՐՈՒ ՕԺԱՆԴԱԿԵԼՈՒ
|
|
Մեծի Տանն Կիլիկիոյ Կաթողիկոսութեան Քրիստոնէութեան Դաստիարակութեան բաժանմունքը՝ Արամ Ա. Վեհափառ Հայրապետի հովանաւորութեամբ, այս տարի եւս կը ծրագրէ նիւթապէս օժանդակել լիբանանահայ շուրջ 200 կարիքաւոր ընտանիքներու, որոնք, յատկապէս երկրի ներկայ անորոշ պայմաններուն մէջ, կեանքի ամենատարրական պէտքերը հոգալու դժուարութիւն ունին։
Գրասենեակը կը ձգտի իւրաքանչիւր ընտանիքի պահածոյ ուտեստեղէնէ, ընդեղէնէ, մսեղէնէ, մաքրութեան դեղերէ եւ այլ տարրական պէտքերէ բաղկացած նպաստ մատակարարել։ Այս նպաստը պիտի բաշխուի Նոր Տարուան օրերուն՝ Ս. Ծննդեան առիթով, յատուկ ուրախութիւն պարգեւելով մեր եղբայրներուն եւ քոյրերուն։
Ինչպէս անցեալ տարի, Քրիստոնէական Դաստիարակութեան բաժանմունքի վարիչ՝ Հոգշ. Տ. Զարեհ վրդ. Սարգիսեանը դիմած է Արեւելեան թեմին, որպէսզի մեր հաւատացեալները իրենց օժանդակութիւնը բերեն այս մարդասիրական նախաձեռնութեան, ինչ որ միեւնոյն ժամանակ պիտի խորհրդանշէ մեր զօրակցութիւնը Լիբանանի հայ համայնքին, որ կ՚անցնի դժուարին օրերէ։
Նկատի ունեցէք, որ 100 տոլարի նուիրատուութիւն մը պիտի ծառայէ վերոյիշեալ նպաստը հայթայթելու ընտանիքի մը համար, այլապէս՝ կրնաք ձեր ուզած գումարը նուիրել։
Տօնական օրերու առթիւ այս նուիրատուութիւնը մեծապէս պիտի գնահատուի։ Հաճեցէք ուղարկել ձեր վճարագրերը հետեւեալ հասցէին՝ Armenian Prelacy, 138 East 39
th
Street, New York, NY 10016։ Հաճեցէք ձեր չէքերը գրել Armenian Apostolic Church of Americaի անունին, իսկ memoի բաժինին մէջ արձանագրել՝ Gift for the Needy։ Ձեր նուիրատուութիւնը տուրքերէ զերծ է՝ ըստ օրէնքի արտօնած չափին։
|
|
ԱՆՈՒՇԱՒԱՆ ԱՐՔԵՊԻՍԿՈՊՈՍ՝ ԿՐԱՆԻԹ ՍԻԹԻԻ ՄԷՋ
|
|
Անուշաւան Արքեպիսկոպոս՝ Կրանիթ Սիթիի Ս. Գրիգոր Լուսաւորիչ եկեղեցւոյ խորանի ծառայողներուն եւ ծխականներուն հետ
|
|
Կիրակի, 8 Դեկտեմբերին, թեմիս բարեջան առաջնորդ՝ Անուշաւան Արքեպիսկոպոս, այցելեց Կրանիթ Սիթի (Իլինոյ), ուր պատարագեց ու քարոզեց Ս. Գրիգոր Լուսաւորիչ եկեղեցւոյ մէջ։ Յաւարտ Ս. Պատարագի, յատուկ ճաշկերոյթով նշուեցաւ եկեղեցւոյ 65ամեակը։
|
|
ԴՈԿՏ. ՎԱՐԴԱՆ ՄԱՏԹԷՈՍԵԱՆ ԿԸ ՆԵՐԿԱՅԱՑՆԷ
«ԿՈՄՒՏԱՍ-150» ՀԱՏՈՐԸ
|
|
«Կոմիտաս-150» հատորի կազմող եւ թարգմանիչ՝ դոկտ. Վարդան Մատթէոսեան,
նոր հրատարակութեան բովանդակութեան կ՚անդրադառնայ
|
|
Հինգշաբթի, 5 Դեկտեմբերի երեկոյեան, տեղի ունեցաւ նորատիպ «Կոմիտաս-150» երկլեզու գիրքին ներկայացումը՝ Ազգային Առաջնորդարանին մէջ:
«Կոմիտաս-150» Առաջնորդարանի հրատարակութիւնն է, որ կ՚ընդգրկէ Հայ Երաժշտութեան Հօր մասին յօդուածներու, նամակներու եւ յուշերու կոկիկ հաւաքածոյ մը՝ հայերէն եւ անգլերէն լեզուներով։ Այս նիւթերը մեծ մասամբ առաջին անգամն է որ կ՚ամփոփուին գիրքի մէջ եւ անգլերէնով։
Նիւթերու ընտրութիւնը, ծանօթագրումն ու անգլերէնի թարգմանութիւնը կատարած է Ազգ. Առաջնորդարանի դիւանապետ՝ դոկտ
․
Վարդան Մատթէոսեանը, որ նաեւ ներկայացուց գիրքն ու Կոմիտաս Վարդապետի կեանքն ու վաստակը: Երգիչ Վաղարշակ Օհանեան մեկնաբանեց կոմիտասեան երեք երգեր՝ «Անտունի», «Կռունկ» եւ «Հայաստան»։ Փակման խօսքը կատարեց թեմիս բարեջան առաջնորդ՝ Գերշ. Տ. Անուշաւան արք. Դանիէլեան։
Գիրքէն օրինակներ տրամադրելի են Ազգ. Առաջնորդարանի գրախանութէն, հեռաձայնելով (212) 689-7810 թիւին, տիկին Ռիթա Կիրակոսեանին, կամ գրելով
books@armenianprelacy.org
հասցէին։
|
|
Մաէսթրօ Վաղարշակ Օհանեան կոմիտասեան փունջ մը երգեր կը հրամցնէ գիրքին ներկայացումէն ետք
|
|
Երեկոյեան աւարտին, Անուշաւան Արքեպիսկոպոս կ՚անդրադառնայ նորատիպ հատորի կարգ մը հատուածներուն եւ փակման աղօթքը կը կատարէ
|
|
ԳՐԻԳՈՐ ՆԱՐԵԿԱՑԻԻ ՄԱՍԻՆ ՆՈՐ ԳԻՐՔԻ ՆԵՐԿԱՅԱՑՈՒՄ՝
19 ԴԵԿՏԵՄԲԵՐԻՆ
|
|
Ազգ. Առաջնորդարանը պիտի հովանաւորէ Մայքլ Փափազեան նոր գիրքին՝
“The Doctor of Mercy: The Sacred Treasures of St. Gregory of Narek”
ի ներկայացումը, որ տեղի պիտի ունենայ Հինգշաբթի, 19 Դեկտեմբերին, երեկոյեան ժամը 7:00ին, Առաջնորդարանին մէջ։
Հեղինակը ներկայ պիտի ըլլայ ու պիտի խօսի Հայց. Եկեղեցւոյ հանճարեղ բանաստեղծ սուրբին ու աստուածաբանին կեանքին հանդէպ իր հետաքրքրութեան ծնունդին մասին, յատկապէս այն պահէն ետք, երբ Ֆրէնսիս Պապը Գրիգոր Նարեկացին նշանակած է իբրեւ Եկեղեցւոյ Վարդապետ։ Նարեկացի Կաթողիկէ Եկեղեցւոյ Վարդապետներու ցանկին մէջ միակն է, որ Կաթողիկէ Եկեղեցւոյ չէ պատկանած։
“The Doctor of Mercy”
ներածութիւն մըն է Նարեկացիի գրական գործերուն, աստուածաբանութեան ու հոգեկանութեան, եւ ցոյց կու տայ անոր գործերուն մերօրեայ կարեւորութիւնը։
Դոկտ. Մայքլ Փափազեան փիլիսոփայութեան դասախօս է Պերրի Գոլէճի
ն մէջ (Ռոմ, Ճորճիա) 1998էն ի վեր։ Հոն կը դասաւանդէ փիլիսոփայութեան տարբեր նիւթեր, ինչպէս եւ Նոր Կտակարանի յունարէն։ Ուսանած է Ճոնզ Հոփքինզ եւ Վըրճինիայի համալսարանները, վերջինէն ստանալով իր դոկտորականի տիտղոսը։ Յունարէն փիլիսոփայական գրութիւններու հայկական թարգմանութիւններն ու մեկնութիւնները ուսումնասիրելու համար, գրաբար սորված է Օքսֆորտ համալսարանին մէջ, ուր ստացած է գրաբարի մագիստրոսի տիտղոս՝ 1995ին։ Հրատարակած է բազմաթիւ յօդուածներ եւ ուսումնասիրութիւններ հին յունական փիլիսոփայութեան եւ միջնադարեան հայկական աստուածաբանութեան մասին։
Դոկտ. Փափազեանի նոր գիրքէն օրինակներ վաճառքի պիտի դրուին։ Տրամադրելի պիտի ըլլան անոր երկու նախորդ գիրքերը՝ “
Light from Light: An Introduction to the History and Theology of the Armenian Church”
, եւ Ստեփանոս Սիւնեցիի «Չորս Աւետարանիչներու մեկնութեան» թարգմանութիւնը։
Տեղեկութիւններու եւ տեղ ապահովելու համար, հաճեցէք հեռաձայնել 212-689-7810 թիւին։
|
|
«ՄԻՒԶԻՔԸԼ ԱՐՄԻՆԻԱ»Ի 37ՐԴ ՀԱՄԵՐԳԸ՝ ՄԱՐՏ 15ԻՆ
|
|
«Միւզիքըլ Արմինիա»յի 37րդ տարեկան համերգը տեղի պիտի ունենայ Մարտ 15, կէսօրէ ետք ժամը 2:00ին, աշխարհահռչակ «Գառնըկի» համերգասրահի «Ուէյլ» սրահին մէջ։ Այս տարի երեք երիտասարդ արուեստագիտուհիներ այլազան ու հետաքրքրական ծրագիր մը պիտի ներկայացնեն, շարունակելով երկար տասնամեակներու աւանդութիւնը։
«Միւզիքըլ Արմինիա», որ 1982ին հաստատուած էր օրուան առաջնորդ՝ լուսահոգի Մեսրոպ արք. Աշճեանի եւ Ազգ. Առաջնորդարանի Տիկնանց Միութեան ջանքերով, նուիրուած է երիտասարդ հայ արուեստագէտներ ծանօթացնելու եւ հայ երգահաններու գործերու մեկնաբանութեան սատարելու։ Անցնող 38 տարիներուն, ելոյթ ունեցողներէն շատերը իրենց ասպարէզին մէջ յայտնի ու հաստատուն անուն ունեցող երաժիշտներ դարձած են։
Տաթեւ Ամիրեանի յօրինումները կ՚ընդգրկեն ձայնային եւ գործիքային երկեր, ինչպէս եւ համանուագային եւ սենեկային խումբերու համար գրուած գործեր։ Անոր մօտեցումը հաստատուած է՝ յեղաստեղծական (improvisational) կատարման եւ հայ ժողովրդական երաժշտութեան ուժական յատկանիշներով։ Իբրեւ դաշնակահարուհի, Տ. Ամիրեան թէ՛ իր եւ թէ՛ դասական ու ժամանակակից երգացանկերու գործեր ներկայացուցած է։
Սոփրանօ Աննա Հայրապետեան տպաւորած է լսարանները իր փայլուն ձայնով եւ մեկնաբանութիւններով, մեներգով ու խմբային ելույթներով հանդէս գալով՝ Հայաստանի, Միացեալ Նահանգներու եւ աշխարհի այլ վայրերու մէջ։ Իբրեւ ուսանող Երեւանի Կոմիտասի անուան պետական երաժշտանոցին մէջ, երգած է «Ռիկոլեթթօ», «Սեւիլլայի սափրիչը», «Եւգենի Օնեկին» եւ «Անուշ» օփերաներուն մէջ (վերջինիս պարագային՝ Անուշի դերերգը)։ «Միւզիքըլ Արմինիա»յի մէջ, ան պիտի մեկնաբանէ Տաթեւ Ամիրեանի ինքնատիպ գործերը։
Թաւջութակահարուհի Լաուրա Նաւասարդեան 10րդ դասարանի աշակերտ է Արհեստավարժ Մանուկներու Դպրոցին մէջ եւ «Ճուլիարտ» դպրոցի նախահամալսարանական բաժանմունքի երրորդ տարին է նաեւ։ 2018ին յաղթած է «Քաուֆման» երաժշտական կեդրոնի համերգային մրցոյթին, որմէ ետք ելոյթ ունեցած է կեդրոնի նուագախումբին հետ՝ ղեկավարութեամբ Նաթան Հեթերինկթընի։ 2018ի եւ 2019ի ամառներուն, Լ. Նաւասարդեան մասնակցած է «Փերլմըն» երաժշտական յայտագրին մէջ, որ նուիրուած է օժտեալ երիտասարդ երաժիշտներու։
Ինչպէս անցեալին, «Միւզիքըլ Արմինիա»յի հովանաւորներն ու աջակիցները կարեւոր նպաստ մը կրնան բերել՝ այս արուեստագէտներու զարգացման գործին։ Հովանաւորութեան չորս տարբեր դասակարգեր հաստատուած են՝ ադամանդ (1000 տոլարի նուիրուատուութիւն), լսնոսկի (platinum, 500 տոլար), ոսկի (300 տոլար) եւ արծաթ (200 տոլար)։ Առաջին երեք դասակարգերուն հովանաւորները երկու անվճար տոմսակ պիտի ստանան։
Համերգի տոմսակներուն գինը 25 տոլար է։ Յաւելեալ տեղեկութիւններու կամ տոմսակներ գնելու համար, հաճեցէք կապուիլ Ազգ. Առաջնորդարանին հետ 212-689-7810 թիւին կամ գրել
sophie@armenianprelacy.org
հասցէին։
|
|
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
|
|
ԿԻՐԱԿԻ, 16 ԴԵԿՏԵՄԲԵՐ
Դ. ԿԻՐԱԿԻ ՅԻՍՆԱԿԻ
ԱՒԵՏԱՐԱՆ ԸՍՏ ՂՈՒԿԱՍՈՒ (17:1-10)
Յիսուս իր աշակերտներուն ըսաւ.
–
Գայթակղութիւններ անպայման որ պիտի պատահին, բայց վա՜յ այն մարդուն, որուն ձեռքով ուրիշներ գայթակղութեան մէջ կ’իյնան: Նախընտրելի պիտի ըլլար, որ իր վիզին ջաղացքի քար անցընէին եւ զինք ծովը նետէին, քան թէ այս փոքրիկներէն մէկը գայթակղեցնէր: Հետեւաբար, զգուշացէ՛ք: Եթէ եղբայրդ մեղք գործէ՝ յանդիմանէ՛ զինք, եւ եթէ զղջայ՝ ներէ՛ իրեն: Նոյնիսկ եթէ մէկ օրուան մէջ եօթն անգամ քեզի դէմ մեղանչէ եւ եօթն անգամ քեզի գալով ըսէ՝ «Կը զղջամ», պէտք է ներես իրեն:
Առաքեալները ըսին Տիրոջ.
–
Աւելցո՛ւր մեր հաւատքը:
Տէրը ըսաւ.
–
Եթէ մանանեխի հատիկի մը չափ հաւատք ունենաք եւ ըսէք այս թթենիին. «Արմատախիլ եղիր եւ ծովուն մէջ տնկուէ», պիտի հնազանդի ձեզի:
–
Ենթադրենք որ ձեզմէ մէկը ծառայ մը ունի, որ հողագործ է կամ հովիւ: Երբ ծառան դաշտէն դառնայ եւ տուն մտնէ, տէրը իրեն կ’ըսէ՞. «Անմիջապէս գնա՛, ճաշդ կեր»: Բնականաբար ո՛չ: Ընդհակառակը, անոր կ’ըսէ. «Ընթրիքս պատրաստէ եւ գոգնոցդ կապելով սպասարկէ՛ ինծի, մինչեւ ընթրիքս վերջացնեմ, անկէ ետք կրնաս ուտել ու խմել»: Կը կարծէ՞ք որ տէրը իր ծառային երախտապարտ պէտք է ըլլայ իր հրահանգները կատարելուն համար: Չեմ կարծեր: Դուք ալ նոյնպէս, երբ կը կատարէք ինչ որ հրամայուած է ձեզի, ըսէք. «Անպիտան ծառաներ ենք, ինչ որ պարտաւոր էինք ընել՝ կատարեցինք»:
* * *
Բ. ԹՈՒՂԹ ԵԲՐԱՅԵՑԻՆԵՐՈՒՆ 1: 1-14
Անցեալին բազմաթիւ անգամներ եւ բազմաթիւ կերպերով Աստուած մեր հայրերուն խօսեցաւ մարգարէներուն միջոցաւ, իսկ այս վերջին օրերուն մեզի խօսեցաւ իր Որդիին միջոցաւ: Աստուած զինք ամէն բանի ժառանգորդ կարգեց եւ անոր միջոցաւ էր որ տիեզերքը ստեղծեց: Որդին, Հօրը փառքին լոյսը եւ անոր էութեան ճշգրիտ պատկերը, որ իր խօսքին զօրութեամբ տիեզերքը կը պահէ, իր անձով մեր մեղքերը սրբելէ ետք՝ երկինքի մէջ նստաւ Աստուծոյ՝ Գերագոյն Զօրութեան, աջ կողմը:
Անիկա շատ աւելի բարձր է հրեշտակներէն, ինչպէս Աստուծմէ իրեն տրուած գերազանց անունը ցոյց կու տայ. որովհետեւ ո՞ր մէկ հրեշտակին երբեւիցէ Աստուած ըսաւ. «Դուն իմ Որդիս ես, այսօր քեզ ծնայ»: Կամ ո՞ր մէկ հրեշտակին ըսաւ. «Ես անոր Հայր պիտի ըլլամ եւ անիկա՝ ինծի Որդի»: Դարձեալ, երբ իր անդրանիկ Որդին աշխարհ կը ղրկէր, ըսաւ. «Աստուծոյ բոլոր հրեշտակները թող պաշտեն զայն»:
Աստուած իր հրեշտակներուն մասին խօսած ատեն, կ’ըսէ.-
«Աստուած իր հրեշտակները ստեղծեց
որպէս պատգամաւոր հոգիներ,
եւ իրեն ծառայողները՝ կրակի բոցի պէս»:
Մինչդեռ Որդիին կ’ըսէ.-
«Քու աթոռդ, ո՛վ Աստուած, յաւիտենական է.
արդարութեամբ կ’իշխես թագաւորութեանդ վրայ:
Արդարութիւնը կը սիրես
եւ անիրաւութիւնը կ’ատես:
Ահա թէ ինչու, ո՛վ Աստուած,
քու Աստուածդ ուրախութեան իւղով օծեց քեզ,
քու ընկերներէդ աւելի»:
Դարձեալ, ուրիշ տեղ մը Որդիին կ’ըսէ.-
«Դուն, ո՛վ Տէր, սկիզբէն ստեղծեցիր երկիրը:
եւ երկինքը քու ձեռագործդ է:
Անոնք պիտի կորսուին.
բայց դուն կաս եւ կը մնաս:
Անոնք հագուստի պէս պիտի մաշին.
վերարկուի մը պէս պիտի ծալլես զանոնք
եւ հագուստի մը պէս փոխես:
Բայց դուն միշտ նոյնն ես
եւ քու տարիներդ վերջ պիտի չունենան»:
Բայց հրեշտակներէն որո՞ւն ըսաւ երբեք.-
«Աջ կողմս նստէ,
մինչեւ թշնամիներդ ոտքերուդ տակ դնեմ
որպէս պատուանդան»:
Չէ՞ որ հրեշտակները Աստուծոյ ծառայող հոգիներ են եւ իր կողմէ կը ղրկուին օգնելու համար անոնց՝ որոնք փրկութիւնը պիտի ժառանգեն:
ՃՇ. ԸՆԹԵՐՑՈՒՄ
Ես. 38:1-8
|
|
Շաբաթ, 16 Դեկտեմբերին, Ս. Յակոբ Մծբնացիի տօնն է։ Ս. Յակոբ Մծբնացի մասնակցած է Նիկիոյ Առաջին Տիեզերական Ժողովին (325 թ
․
), ուր մեծ յարգանքի արժանացած է Կոստանդին կայսեր եւ միւս մասնակցիներուն կողմէ։ Ծնած ու մահացած է Մծբին, որ պատմականօրէն Հայոց Միջագետքի մաս կազմած է ու ներկայիս Թուրքիոյ հարաւ-արեւելքը կը գտնուի։ Մծբին վաղ քրիստոնէական կարեւոր կեդրոն մըն էր Փոքր Ասիոյ մէջ եւ դէպի արեւելք ու արեւմուտք ուղղուող կարաւաններու հանգրուան մը։
Յակոբ Մծբնացի Հայց. Եկեղեցւոյ ամենասիրուած սուրբերէն մէկն է եւ նոյնպէս ի պատուի է Արեւելեան Ուղղափառ, Ասորի Ուղղափառ, Ղպտի եւ Արեւելեան Կաթողիկէ ու Հռոմէական Կաթողիկէ եկեղեցիներու կողմէ։ Մծբինի եպիսկոպոս ձեռնադրուած է 320 թուականին։
Ս. Յակոբ փորձած է Նոյեան տապանը գտնել՝ չհաւատացողներուն իբր ապացոյց։ Վերելքի նախօրեակին, հրեշտակ մը երեւցած ու յայտնած է իրեն, թէ գագաթը մագլցելու պէտք չունի, ու իրեն յանձնած՝ տապանի կտոր մը։ Կտորը կը պահպանուի Մայր Աթոռ Ս. Էջմիածնի մէջ։
«Ուրախացան զօրք երկնից ընդ քո մեծի ճգնութեան, որ ի մարմնի կառուցար նման վերին զուարթնոցն. զքեզ ունիմք բարեխօս առ հայր յերկինս վասն մեր։ (...) Այլ մեք ձայնիւ ցնծութեամբ տօնեմք զքո սուրբ զյիշատակս, պատուեալ վկայ քրիստոսի սուրբ Հայրապետ Յակոբ. զքեզ ունիմք բարեխօս առ հայր յերկինս վասն մեր։ Յանձն առեր զչարչարանս վասն նոյեան տապանին. ի հրեշտակէն ընկալար զփայտ փրկութեան աշխարհի. զքեզ ունիմք բարեխօս առ հայր յերկինս վասն մեր»։
(
Երկնքի զօրքերը ուրախացան քու մեծ ճգնութեամբ որ մարմնով երկնային հրեշտակներուն նմանեցար. Երկինքի մէջ, Հօր մօտ քեզ բարեխօս ունինք։ (...) Այլ մենք ցնծութեան ձայնով քու սուրբ յիշատակը կը տօնենք, Քրիստոսի պատուըւած վկայ սուրբ Յակոբ Հայրապետ. Երկինքի մէջ, Հօր մօտ քեզ բարեխօս ունինք։ Նոյի Տապանին համար չարչարանք յանձն առիր. հրեշտակէն աշխարհի փրկութեան փայտը ստացար. Երկինքի մէջ, Հօր մօտ քեզ բարեխօս ունինք)։
|
|
Այս շաբաթ նաեւ կը յիշուի՝
|
|
Երկուշաբթի, 16 Դեկտեմբեր՝ Ս. Իգնատիոս Անտիոքացի։
|
|
«ՍԻԱՄԱՆԹՕ» ԼՍԱՐԱՆԻ ԴԵԿՏԵՄԲԵՐ 7Ի ՀԱՆԴԻՊՈՒՄԸ
|
|
«Սիամանթօ» լսարանի աշակերտները՝ առաջնորդական փոխանորդ՝ Գերպ. Տ. Սահակ Ծ. վրդ Եմիշեանի եւ Ազգ. Առաջնորդարանի դիւանապետ՝ դոկտ. Վարդան Մատթէոսեանի հետ՝ լսարանի դասի աւարտին (նկարէն բացակայ՝ Ազգ. Ուսումնական Խորհուրդի տնօրէն՝ տիկ. Մարի Կիւլիւմեան)։
|
|
Շաբաթ առաւօտ, 7 Դեկտեմբերին, կրկին Ազգային Առաջնորդարանիս շէնքին մէջ հաւաքուեցան Նիւ Եորքէն եւ Նիւ Ճըրզիէն 10 պատանիներ։ Կը բացակայէին երկու հոգի բանաւոր պատճառներով, օրինակ՝ Անահիտ Ինճիկիւլեանը շատ գեղեցիկ պատճառով մը չկար, սակայն սիրտը հոս էր՝ իր վկայութեամբ։ Անահիտը ճամբորդած էր Ռիկա (Լատվիայի մայրաքաղաքը) մասնակցելու երաժշտական մրցոյթին, Նիւ Եորքի “
Pearl of Festival”
մրցոյթին առաջին տեղը գրաւելէ ետք։ Յաջողութիւն կը մաղթենք Անահիտին։
Նախաճաշէն առաջ, անոնք լուռ, յոտնկայս, մօտ վայրկեան մը, մեծ պաստառին վրայ դիտեցին 1988ի Հայաստանի հիւսիսային շրջանի երկրաշարժէն տեսերիզ մը ու արդէն ոմանց թաց աչքերը կարելի չէր չնկատել։ Ապա, Գերապատիւ Տ. Սահակ Վրդ
․
Եմիշեան հակիրճ բացատրականէ մը ետք արտասանեց «Հոգւոցն Հանգուցելոց» աղօթքը։
Անոնք վնասուած շրջանի ամենէն խեղճ դպրոցներէն մէկուն, իրենց առօրեայէն խնայելով նուիրատուութիւն մը պիտի ընեն։ Արդի կեանքի ու համացանցի շռայլութիւնը չէ վնասած մեր զաւակներուն մէջ մարդկայինն ու ազգայինը։
Նոր Տարուան ծառը այս տարի զարդարեցին նոյն իրենք՝ «Սիամանթո»յի աշակերտները, չէ՞ որ իրենք են Ազգային Առաջնորդարանի գալիք սերունդը ու այս՝ իրենց տան ծառը։
ՀՀՀ-ի (Հայկական Համացանցային Համալսարան) հետ Skype-ով կապի մէջ մտնելով, օրդ
․
Անի Տէկիրմենճեանի հաճելի ներկայացումով ունկնդրեցին Հայկական աւանդական Ամանորի (Նոր Տարի, Կաղանդ) մասին, թէ հին ու նոր Հայաստանի մէջ ինչ կը կատարուի ու ինչպէս կ՛ընդունուի Նոր Տարին։
Այս շաբաթուան դասախօսն էր դոկտ
․
Վարդան Մատթէոսեանը՝ Ազգ
․
Առաջնորդարանիս դիւանապետը։ Նիւթ ունենալով 2019ի 150ամեայ չորս մեծերէն՝ Կոմիտաս Վարդապետը, դոկտ
․
Մատթէոսեան շատ մատչելի, միաժամանակ շատ խոր կերպով իր խօսքը օժտեց պաստառին վրայ անցնող էջերով, նկարներով ու ապա՝ երաժշտական պահով մը, ջութակի կատարողութեամբ՝ Սերգէյ Խաչատրեանի։ Մեր աշակերտները այնքան տպաւորուած էին, որ ոմանք տուն երթալէ ետք ալ պրպտած էին կոմիտասեան այլ գործեր։ Գրգիռը դրուած էր անոնց մէջ
․
ուրեմն պատգամը՝ փոխանցուած։
Այս պատանիները մէկտեղ բերելու եւ եկեղեցական ու ազգային կեանքէն պատառիկներով շնչել տալու մեր ճիգերը չեն կրնար իրականանալ, եթէ չըլլան մեր հոգեւոր հովիւներուն ու կարգ մը ծնողներուն, այս շաբաթուան պարագային՝ տիար Գարեգին Շամլեանի, գիտակից զոհաբերութիւնը։ Կարելի չէ նկատի չառնել Ամերիկայի այս ափերուն հեռաւորութեան ընձեռած փոխադրական եւ ժամանակային դժուարութիւնները։
Վարձքը կատար բոլորին։
«Սիամանթօ» լսարանը իր յաջորդ հանդիպումը պիտի ունենայ 11 Յունուարին։
Ցտեսութիւն, պատանիներ։
|
|
«Սիամանթո»յի աշակերտները հայոց այբուբենի ու Կաղանդի հետ կապուած գործունէութեան մէջ
|
|
«Սիամանթօ» լսարանի աշակերտները զարդարեցին Ազգ. Առաջնորդարանի տօնածառը հայոց այբուբենի զարդանքներով
|
|
Յատկապէս Հայաստանէն բերուած ձեռագործ Կաղանդի զարդարանքներու մօտէն առնուած լուսանկար մը
|
|
“SALT & LIGHT” ԿԸ ՆԵՐԳՐԱՒԷ ՊԱՏԱՆԻՆԵՐԸ
Ս. ՍՏԵՓԱՆՈՍ ԵԿԵՂԵՑՒՈՅ ՄԷՋ
|
|
Ազգ. Առաջնորդարանի երիտասարդական ծառայութեան ծրագրի տնօրէն՝ տիկ. Անի Օվաննէսեան, կը ներկայացնէ ծրագիրը Ուոթըրթաունի համայնքին
|
|
Կիրակի, 8 Դեկտեմբերին, Ուոթըրթաունի (Մասաչուսեթս) Ս. Ստեփանոս եկեղեցին ներկայացուց “Salt and Light” յայտագիրը։ Հոգաբարձութեան կողմէ ճաշի սպասարկութենէ ետք, տիկ. Անի Յովհաննէսեան՝ Ազգ. Առաջնորդարանի երիտասարդական ծառայութեան տնօրէնը, խօսեցաւ բոլոր սերունդներէն աւելի քան 100 ծխականներու։ Ան ներկայացուց ծրագրի առաքելութիւնը եւ անոր գործադրութեան բարիքը՝ մեր երեխաներուն ու պատանիներուն կրօնական դաստիարակութեան մէջ։ Տեղի ունեցաւ հարց ու պատասխանի ընդարձակ բաժին մը։ Բանախօսութենէն ետք, վեց օգնականներ եւ 15 աշակերտներ արձանագրուեցան առաջին նիստին համար։ Ծրագրի պաշտօնական սկզբնաւորումը տեղի պիտի ունենայ Նոր Տարիին։
|
|
Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Անոնց նամակներէն նմոյշներ կը ներկայացնենք՝ միայն անունները յիշելով, ինքնութիւնը գաղտնի պահելու համար։
Այս շաբթուան նամակը գրած է Գոռը, որուն հովանաւորներն են Նէնսի Թելլալեան-Շրէտէր եւ Պապ Շրետէր։
|
|
Բարե՛ւ, յարգելի հովանաւոր,
Ես փոքրիկ Գոռն եմ, արդէն 2,4 տարեկան։ Ես տառաճանաչ չեմ, այդ պատճառով իմ փոխարէն մայրիկս է գրում։ Արդէն 1 տարի է ինչ ձեզ ճանաչում եմ, չնայած չեմ տեսել, բայց գիտեմ թէ ինչեր էք անում մեզ պէս փոքրիկների համար ու շատ-շատ շնորհակալ եմ։ Ես ապրում եմ տատիկիս ու պապիկիս տանը Էջմիածնում մայրիկիս՝ Զարուհու, եւ աւագ եղբօրս՝ Հայկի հետ։
Այնքան արագ անցաւ այս 1 տարին հայրիկիս զոհուելուց յետոյ, բայց այդպիսի րոպէ, ժամ ու օր չկայ որ չյիշեմ հայրիկիս, շատ-շատ եմ կարօտել նրան ու նրա հետ անցկացրած խաղերն ու իւրաքանչիւր պահը։ Չնայած մայրիկս, տատիկս ու պապիկս այնպէս են անում որ ինձ համար լաւ ու ուրախ լինի, բայց հայրիկիս տեղը ոչ ոք չի տայ։
Ես շատ եմ սիրում երգել ու պարել, մանկապարտէզ դեռ չեմ գնում։ Շատ եմ սիրում եղբօրս հետ խաղալ. նա 6 տարեկան է, նա էլ ինձ է շատ սիրում։
Յարգելի հովանաւոր, ես շնորհակալ եմ որ Դուք կաք եւ փորձում եք օգնել ինձ նման փոքրիկներին։ Թող Աստուած օրհնի Ձեզ եւ Ձեր կատարած աշխատանքը։
Սիրով՝
Գոռ
|
|
Եթէ կ՚ուզէք Ազգ. Առաջնորդարանի ցուցակին մէջ սպասող որբ երեխայ մը հովանաւորել,
սեղմեցէք այստեղ
արագ ու դիւրին առցանց հովանաւորութեան համար։ Այլապէս, կրնաք Առաջնորդարանիս հետ կապուիլ ելեկտրոնային նամակով
(
sophie@armenianprelacy.org
)
կամ հեռաձայնով (212-689-7810)՝ դիմելով Սոֆիին։
|
|
«ԿՈՄԻՏԱՍ. ՀՈԳԵԲԱՆԱԿԱՆ ՎԵՐԼՈՒԾՈՒՄ ՄԸ»
Մելինէ Գարագաշեան
|
|
|
|
Այս գիրքին մէջ, տոքթ. Մելինէ Գարագաշեան, նկատի ունենալով հանդերձ Կոմիտասի «հիւանդութեան» վերաբերեալ մինչ այս վերծանուած տեսութիւնները, նիւթը կ՚ուսումնասիրէ զանազան անկիւններէ, զանազան աղբիւրներ նկատի ունենալով։ Առաջին մասին մէջ կ՚ուսումնասիրէ Կոմիտասի անձնական ու մասնագիտական աճին պատմութիւնը, ինչպէս եւ գործունէութիւնը մինչեւ 1915 թուականը, եւ երկրորդ մասին մէջ կը վերլուծէ Կոմիտասի «հոգեկան հիւանդութիւն»ը հոգեբանական տեսութիւններու վրայ հիմնուելով։
Այս գիրքը տրամադրելի է Ազգային Առաջնորդարանի գրախանութէն։ Ստանալու համար, դիմեցէք
books@armenianprelacy.org
հասցէին կամ հեռաձայնեցէք 212-689-7810 թիւին։
|
|
ԱՆԴՐԷԱՍ ՏԷՐ ՄԱՐՈՒՔԵԱՆ
(մահ՝ 16 Դեկտեմբեր, 1919)
|
|
Անդրէաս Տէր Մարուքեան համարուած է հայ իրապաշտ քանդակագործութեան հիմնադիրը։ Ծնած է Երեւան, 23 Մարտ, 1871ին։ Հայրը՝ գրասենեակի պաշտօնեայ, մահացած է մանկութեան տարիներուն, եւ եօթը զաւակները՝ հինգ տղայ եւ երկու աղջիկ, մնացած են մօր խնամքին տակ։
Ապագայ քանդակագործը 1890ին վկայուած է Երեւանի ռուսական գիմնազիայէն։ 1892-1894ին ուսանած է Մոսկուա՝ գեղարուեստի, քանդակագործութեան եւ ճարտարապետութեան ուսումնարանին մէջ։ 1894ին աւարտելով, փոխադրուած է Ս. Փեթերսպուրկ, ուրկէ այնուհետեւ անցած է Փարիզ։ Այստեղ, ան աշխատած ու նախապատրաստական դասերու հետեւած է նկարիչ եւ քանդակագործ՝ Ալեքսանդր Ֆալկիէրի (1831-1900) արուեստանոցին մէջ, եւ այնուհետեւ մտած՝ Գեղարուեստի Բարձրագոյն Ազգային Դպրոցը, ուր չորս տարի ուսանած է։ 1899ին իր «Հայ գրողներու դափնեպսակ նուիրաբերող մուսան» արձանը ներկայացուցած է ֆրանսացի արուեստագէտներու Սալոնին։
Անոր գործերէն մէկ քանին կանգնեցուած են տարբեր հայաշատ վայրերու մէջ.- Նոր Նախիջեւան (Ռափայէլ Պատկանեան), Դոնի Ռոստով (Միքայէլ Նալբանդեան), եւ այլն։ 1906ի Սալոնին մէջ ներկայացուցած է Խրիմեան Հայրիկի կիսանդրի մը, որ գնուած է Փարիզի հայ համայնքին կողմէ ու նուիրաբերուած՝ Ս. Էջմիածնին, եւ դերասան Պետրոս Ադամեանի կիսանդրին։ 1906ին, համբաւաւոր երգչուհի Փօլին Վիարտոյի կիսանդրին ցուցադրուած է։
1913ին, Տէր Մարուքեան Բոգդան Դոլուխանեանի կիսանդրին ներկայացուցած է, ինչպէս եւ հատուած մը՝ Խաչատուր Աբովեանի արձանէն, որ իր ամենէն կարեւոր եւ ամենէն չարչարուած գործը պիտի հանդիսանար։ Քանդակագործը շահած է մրցոյթը՝ Աբովեանի արձան մը Երեւան տեղադրելու համար։ Այդ նպատակով, 1911ին մեկնած էր իր ծննդավայրը՝ հարկ եկած հետազօտութիւնը կատարելու, եւ երկու տարի ետք արձանը պատրաստ էր։ Սակայն, զայն Փարիզէն Երեւան փոխադրելու գումարը չէր գոյացած։
Անդրէաս Տէր Մարուքեան իր մահկանացուն կնքած է Փարիզի մէջ, 16 Դեկտեմբեր 1919ին, 48 տարեկանին։ Սակայն, Աբովեանի արձանը ֆրանսական մայրաքաղաքը մնացած է մինչեւ 1925, երբ Խորհրդային Հայաստանի կառավարութիւնը պէտք եղած գումարը հայթայթած է՝ փոխադրութեան համար։ Սակայն, սխալմամբ, արձանը փոխանակ Երեւան փոխադրուելու, տարուած է Թիֆլիս։ Ի վերջոյ, արձանը 6 Յուլիս 1933ին տեղադրուած է Աբովեան հրապարակին (այժմ՝ Շառլ Ազնաւուր հրապարակ) վրայ, ներկայ «Մոսկուա» շարժանկարի սրահին կից։
Արձանին ոդիսականը աւարտած չէր, սակայն։ Աբովեան փողոցի վերակառուցման պատճառով, արձանը նախ փոխադրուած է Երեւանի կրկէսի մերձակայքը 1950ին, իսկ այդ անշուք վայրէն՝ Ծիծեռնակաբերդի բլուրը, 1953ին։ Չորս տարի ետք, տեղի ունեցած է նոր տեղաշարժ մը՝ այս անգամ Աբովեանի զբօսայգին, մանկական երկաթուղիին մօտերը, մինչեւ 1964, երբ իր վերջնական հանգրուանը գտած է մեծ հայ գրագէտի ծննդավայրին՝ Քանաքեռի (այժմ՝ Աբովեան) մէջ, Խաչատուր Աբովեանի տուն-թանգարանին մօտ։
|
|
Լուսանկարին մէջ, ձախէն աջ՝ տիկ. Է. Տումանեան, Մեսրոպ արք. Աշճեան, դոկտ. Վարդան Գրիգորեան՝ գլխաւոր բանախօս, Գլիվլրնտ Ի. Տաճ եւ դոկտ. Արա Տումանեան։
|
|
Այս շաբթուան արխիւային լուսանկարը 1982 թուականէն է՝ Մեծի Տանն Կիլիկիոյ Կաթողիկոսարանի դպրեվանքի 50ամեակի օրերէն։ Ազգ Առաջնպրդարանը կազմակերպեց այս յոբելեանը Միացեալ Նահանգներու եւ Գանատայի մէջ, իսկ 14 Փետրուար 1982ն հռչակուեցաւ «Դպրեվանքի Օր»՝ իբրեւ միամեայ տօնակատարութեան աւարտը։
Նիւ Եորք քաղաքին մէջ, յոբելինական ճաշկերոյթին մեծարուեցաւ Գլիվլընտ Ի. Տաճ, որ Մերձաւոր Արեւելքի Նպաստամատոյցի հոգաբարձութեան նախագահ եւ ատենապետ եղած էր։ Ան ստացաւ Կաթողիկոսութեան բարձրագոյն պարգեւը՝ «Կիլիկիոյ իշխան»։ Պրն. Տաճ, որ այդ ժամանակ 94 տարեկան էր, դպրեվանքի հիմնադիր բարերար էր եւ միակ վերապրող անդամը՝ Մերձաւոր Արեւելքի Նպաստամատոյցի սկզբնական հոգաբարձութեան։ Կիլիկիոյ Աթոռի վայրը՝ Անթիլիասի մէջ, անցեալին Մերձաւոր Արեւելքի Նպաստամատոյցի որբանոց մը եղած է, ուր հազարաւոր հայ որբեր հաւաքուած են։ Այս առիթով, նաեւ մեծարանքի արժանացած էին տիկ. Տոլորէս Զօհրապ-Լիպման եւ տոքթ. եւ տիկ. Արա Տումանեան՝ դպրեվանքի մեծահոգի բարերարներ։
|
|
ՆԱՄԱԿՆԵՐ ԵՒ ԹՂԹԱԿՑՈՒԹԻՒՆՆԵՐ “CROSSROADS”Ի ՀԱՄԱՐ
|
|
Հաճոյքով կ՚ընդունինք ու կը հրատարակենք խմբագրութեան ուղղուած ձեր անգլերէն կամ հայերէն նամակները, որոնք
crossroads@armenianprelacy.org
հասցէին պէտք է յղուին։
“Crossroads”ին թղթակցութիւններ, լուսանկարներ եւ ժամանակացոյցի նիւթեր առաքելու պայմանաժամը՝ Չորեքշաբթի կէսօր է։
|
|
15 Դեկտեմբեր—
Նորատիպ "Praying with the Armenian Apostolic Orthodox Church" գիրքի ներկայացում Շանթ Ա. սրկ. Գազանճեանի կողմէ, յաւարտ Ս. Պատարագի, Ս. Լուսաւորիչ Մայր Եկեղեցւոյ մէջ, Նիւ Եորք։
19 Դեկտեմբեր—
Մայքլ Փափազեանի “The Doctor of Mercy: The Sacred Treasures of St. Gregory of Narek” նոր գիրքի (The Liturgical Press) ներկայացում՝ երեկոյեան ժամը 7:00ին, Ազգ. Առաջնորդարանին մէջ (138 E. 39th Street, New York City), հեղինակին ներկայութեամբ։
22 Դեկտեմբեր
—Ծննդեան երգահանդէս, ժամը 2։00ին, Ս. Լուսաւորիչ Մայր Եկեղեցւոյ մէջ (Նիւ Եորք)։ Հովանաւորութեամբ թեմիս բարեջան առաջնորդ՝ Գերշ. Տ. Անուշաւան արք. Դանիէլեանի եւ կազմակերպութեամբ՝ եկեղեցւոյ հոգաբարձութեան։ Ելոյթ կ՚ունենան՝ Անահիտ Զաքարեան (երգ), Հայկ Արսէնեան (դաշնակ) եւ Անահիտ Ինճիկիւլեան (երգ)։
31 Դեկտեմբեր
—Ս. Վարդանանց եկեղեցի (Ռիճֆիլտ, Նիւ Ճըրզի)։ Նոր Տարուան ընթրիք-պարահանդէս։
15 Մարտ, 2020
— Ազգ. Առաջնորդարանի 37րդ տարեկան «Միւզիքըլ Արմինիա» համերգ, կէսօրէ ետք ժամը 2:00ին, Carnegie Hallի Weill համերգասրահին մէջ (West 57th Street at Seventh Avenue, New York City)։
28 Մարտ, 2020
—“Faith Building Women 2020 Symposium”։ Աստուածաշունչի մէջ կիներու ներկայութիւնը ընդգծելու կոչուած համագումար մը՝ Ս. Պետրոս եկեղեցւոյ չափահասներու քրիստոնէական դաստիարակութեան բաժանմունքի կազմակերպութեամբ։ Համագումարը տեղի պիտի ունենայ Ս. Երրորդութիւն եկեղեցւոյ մէջ (Գեմպրիճ, Մասաչուսեթս)։ Գլխաւոր բանախօսներ՝ դոկտ. Ռոպերթա Ըրվայն եւ Արփի Նագաշեան։
13-16 Մայիս, 2020
—Արեւելեան թեմի Ազգային Երեսփոխանական Ժողով, հիւրընկալութեամբ՝ Ֆիլատելֆիայի Ս. Գրիգոր Լուսաւորիչ եկեղեցւոյ։ Հոգեւորականաց համագումարը պիտի սկսի Չորեքշաբթի, 13 Մայիսին, իսկ Երեսփոխանական Ժողովը՝ Հինգշաբթի, 14 Մայիսին։ Ժողովը իր աւարտին կը հասնի Շաբաթ, 16 Մայիսին։
31 Մայիս, 2020
—Տակլըսթընի (Նիւ Եորք) Ս. Սարգիս եկեղեցւոյ 30ամեակի ճաշկերոյթ։ Մանրամասնութիւնները յետագային։
|
|
Follow us on Social Media
|
|
The Armenian Prelacy
Tel: 212-689-7810 ♦ Fax: 212-689-7168 ♦ Email: email@armenianprelacy.org
|
|
|
|
|
|
|
