ելեկտրոնային լրատու

5 Ապրիլ, 2019

Ի ՅԻՇԱՏԱԿ

ԵՐԷՑԿԻՆ ՔԱՐՄԷՆ ԹԱՇՃԵԱՆԻ

1 Մարտ, 1921—27 Մարտ, 2019

Թեմիս բարեջան առաջնորդ՝ Գերշ. Տ. Անուշաւան արք. Դանիէլեան, Կրօնական Ժողովն ու Ազգային Վարչութիւնը ցաւով իմացան, որ անցեալ 27 Մարտին երէցկին Քարմէն Թաշճեանի իր մահկանացուն կնքած էր Կլենտէյլի մէջ (Քալիֆորնիա)։

Յուղարկաւորութիւնը տեղի ունեցաւ Հինգշաբթի, 4 Ապրիլին՝ Ս. Աստուածածին եկեղեցւոյ մէջ (Կլենտէյլ), նախագահութեամբ Արեւմտեան թեմի առաջնորդ՝ Գերշ. Տ. Մուշեղ արք. Մարտիրոսեան։ Թաղումը տեղի ունեցաւ Ֆորըսթ Լօն գերեզմանատան մէջ։

Քարմէն Խանճեան ծնած էր 1 Մարտ, 1921ին, Տիգրանակերտ։ Այնուհետեւ, ընտանիքը փոխադրուած է Հալէպ։ Հայրը կորսնցուցած ըլլալով 13 տարեկանին, ստիպուած էր նետուիլ գործի ասպարէզ՝ դերձակութիւն ընելով, իր այրի մօր եւ երկու կրտսեր քոյրերուն նիւթապէս զօրավիգ կանգնելու համար։ 1954ին ամուսնացած էր Տիրան Թաշճեանի հետ, եւ ունեցած երկու զաւակներ՝ Վաչէ եւ Յակոբ։

Ամուսնին ձեռնադրութենէն ետք, Տ. Մեսրոպ քհնյ. Թաշճեանի եւ զաւակներուն հետ 1961ին հաստատուած էին Փրաւիտընս, ուր աւելի քան 40 տարի անոր կողքին ծառայած էր համայնքին։ Հանգստեան կոչուելէ ետք, 2005ին փոխադրուած էին Քալիֆորնիա՝ զաւակներուն ու թոռներուն՝ Սեւանի եւ Տանիքայի մօտ ըլլալու։ 2016ին Տ. Մեսրոպ Ա. քհնյ. Թաշճեանի վախճանումէն ետք, երէցկնոջ առողջութիւնը սկսած էր քայքայուիլ։

Մեր ցաւակցութիւնները կը յայտնենք հանգուցեալի զաւակներուն, թոռներուն եւ ընտանիքին։ Աստուած հոգին լուսաւորէ։

Ի ՅԻՇԱՏԱԿ

ԱՆԴՐԱՆԻԿ ԳԱՐԱՏՕԼԵԱՆԻ

23 Մարտ, 1945—2 Ապրիլ, 2019

Առաջնորդ Սրբազան Հայրը, Կրօնական Ժողովը եւ Ազգային Վարչութիւնը խոր վիշտով իմացան Տիրպորնի (Միշիկըն) Ս. Սարգիս եկեղեցւոյ եւ համայնքի աշխոյժ անդամներէն Անդրանիկ Գարատօլեանի կսկծալի մահուան լուրը, Երեքշաբթի, 2 Ապրիլին։

Հանգուցեալը ծնած էր Հալէպ, 23 Մարտ 1945ին։ 1953ին ընտանիքով տեղափոխուած էր Այնճար (Լիբանան)։ Ամերիկա հաստատուելէ ետք, պրն. Քարատօլեան երկար տարիներ իբրեւ սարկաւագ ծառայած է Ս. Սարգիս եկեղեցւոյ, ուր իր հնչեղ ձայնը միշտ կ՚արժանանար բոլորի գնահատանքին։ Ան նաեւ ղեկավար պաշտօններ վարած է համայնքին մէջ, ներառեալ՝ իր ծառայութիւնը իբրեւ ազգային երեսփոխան։ Մեծն Տիթրոյթի Մուսալեռ ընկերակցութեան հիմնադիրն ու նախագահն էր, եւ հպարտութեամբ կը պահպանէր Մուսա Տաղի վերապրողներու ժառանգութիւնն ու աւանդութիւնները։

Տան կարգը տեղի պիտի ունենայ Ուրբաթ, 5 Ապրիլին, երեկոյեան ժամը 5:00էն 8:00 (արարողութիւնը՝ ժամը 7:30ին), Ս. Սարգիս եկեղեցւոյ մէջ, ուր նաեւ տեղի պիտի ունենայ յուղարկաւորութիւնը՝ Շաբաթ, 6 Ապրիլին, առաւօտեան ժամը 10:00ին։

Փոխան ծաղկեպսակի նուիրատուութիւնները կարելի է կատարել Տիթրոյթի Մուսալեռ ընկերակցութեան։

Մեր ցաւակցութիւնները կը յայտնենք հանգուցեալի հարազատներուն՝ 44 տարուան տիկնոջ Վարդուկին, երեք զաւակներուն՝ տէր եւ տիկ. Ճոզէֆ եւ Սեւան Սանճեանին, պրն. Յակոբ ԳՀարատօլեանին եւ տէր եւ տիկ. Վիգէն եւ Մարիամ Գարատօլեանին, չորս թոռներուն եւ վեց եղբայրներուն։ Աստուած հոգին լուսաւորէ։

ՀՈԳԵՀԱՆԳԻՍՏ՝ ԱՅՍ ԿԻՐԱԿԻ

Անուշաւան արքեպիսկոպոս հրահանգած է, որ Կիրակի, 7 Ապրիլին, Արեւելեան թեմի բոլոր ծուխերը յատուկ հոգեհանգիստ մատուցեն ի յիշատակ բոլոր զինուորներուն ու ոչ-զինուորներուն, որոնք զոհ գացին ատրպէյճանական վայրագ յարձակումին՝ 2-6 Ապրիլ 2016ի քառօրեայ պատերազմի ընթացքին, ինչպէս բոլոր անոնց, որոնք սպաննուած են այնուհետեւ տեղի ունեցած յարձակումներուն։ Այս առիթով, Սրբազան Հայրը խնդրած է, որ նուէրներու երկրորդ պնակ մը շրջի՝ նահատակներու ընտանիքներուն ի նպաստ։

ԱՌԱՋՆՈՐԴ ՍՐԲԱԶԱՆ ՀԱՅՐԸ ՅԱՌԱՋԻԿԱՅ ՇԱԲԱԹ ՈՒԱՇԻՆԿԹԸՆ ՊԻՏԻ ՃԱՄԲՈՐԴԷ

Անուշաւան արքեպիսկոպոս յառաջիկայ շաբաթ Ուաշինկթըն պիտի ճամբորդէ՝ Քոնկրէսի մէջ Հայկական Ցեղասպանութեան տարեկան ոգեկոչման բացման աղօթքը կատարելու, զոր կը կազմակերպէ ամերիկեան խորհրդարանի հայկական խմբակցութիւնը՝ Հայաստանի Հանրապետութեան դեսպանատան, Արցախի Հանրապետութեան գրասենեակի եւ ամերիկահայ կազմակերպութիւններու գործակցութեամբ։

Ձեռնարկը տեղի պիտի ունենայ 9 Ապրիլին, Ծերակոյտի Hart շէնքին մէջ, թիւ 902 սենեակ, երեկոյեան ժամը 6:00էն մինչեւ 8:30։ Ոգեկոչումը ուղղակի կերպով պիտի սփռուի Ամերիկայի Հայ Դատի Յանձնախումբի (ANCA) Դիմագիրքի էջին մէջ։

Մայրաքաղաք իր կեցութեան ընթացքին, Առաջնորդ Արբազան Հայրը պիտի միանայ Հայ Դատի Յանձնախումբին՝ հանդիպումներ ունենալով Քոնկրէսի կարեւոր ղեկավարներու հետ։ Հանդիպումները պիտի կեդրոնանան ԱՄՆ-Հայաստանի կապերու ծաւալումին, Արցախի Հանրապետութեան ապահովութեան եւ ազատութեան, եւ Հայկական Ցեղասպանութեան արդարութեան որոնումին վրայ։ Առաջնորդ Սրբազան Հայրը լուսարձակի տակ պիտի առնէ հայ եւ ուրիշ քրիստոնեայ ու փոքրամասնական համայնքներու խնդիրները՝ Միջին Արեւելքի մէջ, եւ Միացեալ Նահանգներու աւելի լայն օժանդակութեան կարեւորութիւնը շրջանի վերաշինութեան մէջ։

ԱՌԱՋՆՈՐԴ ՍՐԲԱԶԱՆ ՀԱՅՐԸ ԻՆՏԻԸՆ ՕՐՉԸՐՏ ՊԻՏԻ ՃԱՄԲՈՐԴԷ

Թեմիս բարեջան առաջնորդ՝ Գերշ. Տ. Անուշաւան արք. Դանիէլեան պիտի ճամբորդէ Ինտիըն Օրչըրտ, Մասաչուսեթս, ուր Կիրակի, 7 Ապրիլին պիտի պատարագէ ու քարոզէ Ս. Գրիգոր եկեղեցւոյ մէջ։ Սրբազան Հայրը պիտի նախագահէ ծուխի 85ամեակի տօնակատարութեան։

ԱՆՈՒՇԱՒԱՆ ԱՐՔԵՊԻՍԿՈՊՈՍ՝ ՊԱՇՏՊԱՆՈՒԹԵԱՆ ՆԱԽԱՐԱՐ

ԴԱՒԻԹ ՏՕՆՈՅԵԱՆԻ ՀԵՏ

Ուրբաթ, 29 Մարտին, Անուշաւան արքեպիսկոպոս, ընկերակցութեամբ Նիւ Եորքի Ս. Լուսաւորիչ Մայր Եկեղեցւոյ հոգեւոր հովիւ՝ Տ. Մեսրոպ քհնյ. Լագիսեանի, ներկայ եղաւ Ս. Վարդան Մայր Եկեղեցւոյ մէջ կայացած ժողովրդային հանդիպումին՝ Հայաստանի Պաշտպանութեան նախարար Դաւիթ Տօնոյեանին հետ։ Նախարարը խիստ շահեկան տեղեկութիւններ տուաւ Հայաստանի բանակին եւ երկրին ապահովութեան մասին։ Հարց ու պատասխանի բաժնէն ետք, պրն. Տօնոյեանը պարգեւատրեց Արցախի Վիրաւոր Հերոսներու Ֆոնտին հիմնադիր՝ պրն. Ռազմիկ Արզումանեանը, նաեւ՝ դրամահաւաքի ժրաջան կազմակերպիչներէն ու նուիրատուներէն՝ Տ. Մեսրոպ քհնյ. Լագիսեանը, բարերարուհի Ազատուհի Զարիկեանը, ի դիմաց Հայ Բժիշկներու Միութեան՝ դոկտ․ Հրանդ Մարգարեանը։ Հաւաքի աւարտին, Անուշաւան արքեպիսկոպոս բարձրօրէն գնահատեց հայկական բանակի անձնուրացութիւնը եւ խիզախութիւնը ի խնդիր՝ մեր հայրենիքի պաշտպանութեան։ Սրբազան Հայրը աւելցուց որ հայրենիքին օգնելը՝ իւրաքանչիւր հայու նուիրական պարտականութիւնն է, որովհետեւ հայ բանակը ո՛չ միայն Հայաստանի ու Արցախի տարածքային ապահովութեան, այլ՝ ի սփիւռս աշխարհի հայու ինքնութեան գրաւականն է։

Շաբաթ, 30 Մարտին, Անուշաւան Սրբազան եւ Տ. Մեսրոպ քհնյ. Լագիսեան Ս. Լուսաւորիչ Մայր Եկեղեցւոյ մէջ դիմաւորեցին նախարար Տօնոյեանը, որուն կ՚ընկերանային Հայաստանի ԱՄՆի մօտ դեսպան՝ տիար Վարուժան Ներսէսեան եւ ՄԱԿի մօտ մշտական ներկայացուցիչ՝տիար Մհեր Մարգարեան, ինչպէս եւ շքախումբի անդամներ։

Սրբազան Հայրը բարի գալուստի խօսքէն ետք, հակիրճ պատմականը ըրաւ Մայր Եկեղեցւոյ, եւ ըսաւ․ «Սուրբ Լուսաւորիչ, առաջնորդանիստ Մայր Եկեղեցի ըլլալով 1915էն ի վեր, հիւրընկալած է յետ-եղեռնեան տարաբախտ մեր ժողովուրդի զաւակները, յոյսի եւ յարատեւութեան ոգին բոցավառելով անոնց մէջ։ Այս սուրբ յարկին ներքեւ է, որ հայ կամաւորները իրենց օրհնութիւնը ստացան 1917ին, նախքան Դաշնակիցներու բանակին միանալը եւ Արարայի ու այլ ճակատամարտերուն մասնակցիլը։ Դարձեալ այս հոգեւոր օճախը հիւրընկալեց բազմահազար հայ ընտանիքներ, որոնք Արեւելեան Եւրոպայէն ու Միջին Արեւելքի զանազան երկիրներէն ափ առին այս ցամաքամասը, եւ զանոնք քաջալերեց նոր կեանքի սկսելու` նոր տեսլականով։ Եւ ամենէն նուիրականը՝ Եղեռնի մեր անթաղ ու անգերեզման նահատակներու նշխարներէն մասունքներ բերուելով, զետեղուեցան Նահատակաց Խորանին առջեւ»։

Յատուկ աղօթքէ ետք, Սրբազան Հայրը «Պահպանիչ»ով օրհնեց Պաշտպանութեան նախարարին անձնական խաչը, խաչակիր նախարարը, եւ Հայաստան աշխարհի անդորրութեան ու բարգաւաճման լծուած հայոց բանակը։

Յաւարտ արարողութեան, պատշաճ հիւրասիրութիւն տեղի ունեցաւ եկեղեցւոյ «Բաշալեան» սրահին մէջ, ուր ներկաներուն միացաւ Հ.Յ.Դ. Արեւելեան շրջանի Կեդր. Կոմիտէի Նիւ Եորքի ներկայացուցիչ՝ պրն. Վալոտ Աթախանեանը։

ՄԱՍՆԱԿՑՈՒԹԻՒՆ՝ ՀԱՄԱՇԽԱՐՀԱՅԻՆ ԱՂՕԹՔԻ ՕՐՈՒԱՆ

ՅԱՏՈՒԿ ԱՐԱՐՈՂՈՒԹԵԱՆ

Կիրակի, 31 Մարտին, Առաջնորդ Սրբազան Հայրը մասնակցեցաւ «համաշխարհային աղօթքի օր»ուան յատուկ արարողութեան, կազմակերպուած` Նիւ Եորքի Հնդիկ Մալապար եկեղեցւոյ Saint Thomas Ecumenical Federation of North America յանձնախումբին կողմէ։ Որպէս օրուան պատգամախօս, Անուշաւան արքեպիսկոպոս անդրադառձաւ այն իրողութեան, որ Մեծ Պահոց հինգերորդ Կիրակին, ծանօթ՝ Դատաւորի Կիրակի անունով, ըստ Հայ Եկեղեցւոյ տօնացոյցին, աղօթքի նուիրուած է։ Ան խօսեցաւ աղօթքի զօրութեան մասին, շեշտեց անոր դերակատարութիւնն ու անհրաժեշտութիւնը ներկայ աշխարհականացած ընկերութեան մէջ, եւ կոչ ըրաւ, որ իւրաքանչիւր քրիստոնեայ, անդրադառնալով՝ որ Քրիստոսի կողմէ իրեն յանձնարարուած է աշխարհի լոյսն ու աղը ըլլալ, անդադար աղօթէ՝ շնչելու նման։

Սրբազան Հօր պատգամէն ետք, տեղի ունեցաւ մոմավառութեան խորհրդանշական յատուկ արարողութիւն մը, Պօղոս Առաքեալի բառերով՝ որպէս Լոյսի եւ Ցերեկի որդիներ՝ հաւատքի լոյսով քալելու եւ լուսաւորելու խաւար հոգիները։

ԴԱՍԱԽՕՍՈՒԹԻՒՆ՝ ՄԱՆՀԱԹԸՆՎԻԼ ՔՈԼԷՃԻՆ ՄԷՋ

Երկուշաբթի-Երեքշաբթի, 1-2 Ապրիլին, Նիւ Եորքի Մանհաթընվիլ Քոլէճի փիլիսոփայական բաժանմունքի Մէրի Թ. Քլարք ամպիոնի կազմակերպութեամբ երկօրեայ խորհրդաժողով մը տեղի ունեցաւ՝ «Յետ-ճշմարտութեան աշխարհ» նիւթով, մասնակցութեամբ՝ Եւրոպայէն եւ Միացեալ Նահանգներու տարբեր նահանգներէն հրաւիրուած դասախօսներու, որոնց շարքին՝ իտալահայ գրականագէտ եւ վիպասան փրոֆ. Անթոնիա Արսլան։ Դասախօսները քննարկեցին փիլիսոփայական, ընկերա-քաղաքական պրիսմակէն դիտուած արդի ընկերութեան մօտեցումը ճշմարտութեան կիրարկման՝ ընթացիկ կեանքին մէջ, յատկապէս ցեղասպանութիւններու եւ ընկերային այլ տխուր իրավիճակներու պարագային։

Երեքշաբթի օր, եզրափակիչ դասախօսութիւնը ներկայացուց՝ Գերշ. Տ. Անուշաւան արքեպիսկոպոս, որուն նիւթն էր՝ «Բարեպաշտութեան եւ իմաստութեան արձագանգներ հայկական աւանդութենէն»։ Սրբազան Հայրը հակիրճ պատմականով ներկայացուց հայ ժողովուրդի երկհազարամեայ պատմութեան էջերէն դէմքեր ու դէպքեր, որոնք կը ցոլացնէին բարեպաշտութեան եւ իմաստութեան ընդմէջէն «ճշմարտութեան» թարգմանութիւնը կեանքի զանազան ճակատագրական իրավիճակներու մէջ:

Խորհրդաժողովի աւարտին, դասախօսներ ու ներկաներ հիւրասիրութեան ընթացքին առիթ ունեցան աւելի երկար քննարկելու արծարծուած նիւթերը։

ԱՌԱՋՆՈՐԴԱԿԱՆ ՓՈԽԱՆՈՐԴԸ ԸՆԴՈՒՆԵԼՈՒԹԵԱՆ ԿԸ ՄԱՍՆԱԿՑԻ

Շաբաթ, 30 Մարտին, Արեւելեան թեմի առաջնորդական փոխանորդ՝ Հոգշ. Տ. Սահակ Ծ. վրդ. Եմիշեան, ներկայացնելով Անուշաւան արքեպիսկոպոսը, մասնակցեցաւ Լիբանա-Ամերիկեան Ժողովրդավարութեան Խորհուրդի (L.A.C.D.) Մասաչուսեթսի մասնաճիւղի տարեկան ընդունելութեան։ Հ. Սահակին կ՚ընկերանար Նորթ Անտովըրի Ս. Գրիգոր եկեղեցւոյ հոգեւոր հովիւ՝ Արժ. Տ. Ստեփան քհնյ. Պալճեանը։ L.A.C.D.ի Մասաչուսեթսի մասնաճիւղը Լիբանանի հիւպատոսարանի Պոստընի շրջանին հետ միասին կը կազմակերպէ այս ձեռնարկը։

Պոստընի Մարոնի եկեղեցւոյ մէջ տեղի ունեցած ձեռնարկին նպատակն էր Ամերիկայի լիբանանեան համայնքը ակնառու դարձնել, միաժամանակ կապ հաստատելով Լիբանանի մէջ պատմականօրէն գոյութիւն ունեցող ու ծաղկող համայնքներուն ու կազմակերպութիւններուն հետ։

Միացեալ Նահանգներու մէջ Լիբանանի դեսպան՝ Կապրիէլ Իսա պատուոյ հիւրն էր։ Ներկայ էին նաեւ Լիբանանի հիւպատոսները, Պոստընի քաղաքապետ՝ Մարթի Ուոլշ, Նիւ Հէմփշիրի ծերակուտականի անդամ՝ Ժան Շահին եւ տարբեր համայնքներէ բարձրաստիճան անձեր ու եկեղեցականներ։ Ներկայ էր նաեւ Հ. Յ. Դաշնակցութեան ներկայացուցիչը։

Նիւ Ինկլընտի շրջանէն երեք նշանաւոր ամերիկա-լիբանանցի բժիշկներ մրցանակներ ստացան եւ մեծարուեցան դեսպան Իսայի կողմէ։ Երեկոյին նոյնպէս մեծարուեցաւ պատուոյ հիւպատոս՝ Իպրահիմ Հաննա՝ Cedar’s Foodsի (Հէյվըրհիլ, Մասաչուսեթսի մէջ գործող միջին-արեւելեան ուտելիքներու ընկերութիւն) հիմնադիր եւ գլխաւոր գործադիր պաշտօնատար, իր կեանքի իրագործումներուն եւ Ամերիկայի լիբանանեան համայնքին մատուցած ծառայութիւններուն համար։

ՀԱՅ ՄԱՄՈՒԼԻՆ ՆՈՒԻՐՈՒԱԾ ՀԱՄԱԺՈՂՈՎ՝ 2-4 ՅՈՒԼԻՍԻՆ

Մեծի Տանն Կիլիկիոյ կաթողիկոսութեան կազմակերպութեամբ, հայ մամուլին նուիրուած համաժողով մը տեղի պիտի ունենայ՝ յառաջիկայ 2-4 Յուլիսին, Անթիլիասի Մայրավանքին մէջ։

Համաժողովը, որ կ՚արձանագրուի Ն.Ս.Օ.Տ.Տ. Արամ Ա. Վեհափառ Հայրապետին կողմէ հռչակուած Հայ Մամուլի տարուան ծիրին մէջ, համահայկական բնոյթ պիտի ունենայ՝ Հայաստանի, Արցախի ու Սփիւռքի մամուլի խմբագիրներու եւ մամուլի գործիչներու մասնակցութեամբ։ Պիտի քննարկուին հայկական լրատուադաշտին մերօրեայ մարտահրաւէրները, համագործակցութեան ուղիները, արդիական մեթոտները, տեղեկատուական ապահովութեան խնդիրները, ապատեղեկատուութեան յարուցած դժուարութիւններն ու ընկերային ցանցերու դերը լրատուական աշխարհին մէջ, հայ տպագիր մամուլին այսօրուան տագնապները, հայապահպանման առաքելութեան վերիմաստաւորումը եւ միջազգային հանրային կարծիքի ձեւաւորման նպաստող գործնական աշխատանքները։

Համաժողովին մասնակցիլ փափաքողները պէտք է դիմեն Կաթողիկոսարան՝ պրն. Խաչիկ Տէտէեանին, մինչեւ 15 Ապրիլ, հետեւեալ հասցէին՝ info@armenianorthodoxchurch.org , կամ հեռաձայնին՝ +961 4 410001։ Մասնակցողները կը ստանձնեն ճանապարհածախսը, իսկ Կաթողիկոսարանը կը հոգայ կեցութիւնը։

“SALT & LIGHT YOUTH GROUP” ԱՐԵՒԵԼԵԱՆ ԹԵՄԻ YOUTH MINISTRY-Ի ՊԱՇՏՕՆԱԿԱՆ ԱՆՈՒՆԸ ԿԸ ԴԱՌՆԱՅ

Բոլոր ծուխերուն ղրկուած շրջաբերականով, թեմիս բարեջան առաջնորդ՝ Գերշ. Տ. Անուշաւան արք. Դանիէլեան յայտարարեց, թէ Արեւելեան թեմի Youth Ministryի պաշտօնական անունը “Salt and Light Youth Group” պիտի ըլլայ։ Առաջնորդ Սրբազան Հայրը դիտել տուաւ, թէ հասարակաց անուն մը շարունակականութիւն պիտի բերէ թէ՛ պատանիներուն եւ թէ՛ ղեկավարներուն համար։ Այնուհետեւ, ան նշեց շարք մը քայլեր, զորս բոլոր ծուխերը պէտք է առնեն՝ այս ծրագրի առնչութեամբ։ Սրբազան Հայրը աւարտեց իր հրահանգները յիշելով Մատթէոսի Աւետարանի այն դրուագը (5:13-16), ուր Քրիստոս մեզ կը հրահանգէ աղի պէս ըլլալ եւ մեր լոյսը շողացնել ուրիշներու առջեւ, որպէսզի անոնք տեսնեն լաւ գործերը եւ փառաբանեն Հայրը, եւ աւելցուց, որ կ՚աղօթէ, որպէսզի մեր երիտասարդներուն յիշեցնենք իրենց եզակի ժառանգութիւնը՝ թէ՛ իբրեւ հայ եւ թէ՛ իբրեւ քրիստոնեայ, եւ անոնք քալեն այս իրականութեան մէջ։

ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ

ԿԻՐԱԿԻ, 7 ԱՊՐԻԼ

ՄԵԾ ՊԱՀՔԻ Զ. ԿԻՐԱԿԻ

ԳԱԼՍՏԵԱՆ ԿԻՐԱԿԻ

ԿՈՂՈՍԱՑԻՆԵՐՈՒՆ 2:8 – 3:17

Զգո՛յշ եղէք, որ ոեւէ մէկը ձեր միտքը չգրաւէ իմաստասիրական տեսութիւններով եւ խաբեբայական սին խօսքերով, որոնք մարդկային աւանդութիւններու եւ բնութեան ոյժերուն վրայ կը հիմնուին եւ ո՛չ թէ Յիսուս Քրիստոսի ճշմարիտ վարդապետութեան վրայ: Որովհետեւ մարդացած Քրիստոսի մէջ կը բնակի աստուածային բնութեան ամբողջ լիութիւնը: Եւ դուք ձեր կեանքին լիութիւնը գտաք՝ միանալով անոր, որ գլուխն է ոգեղէն աշխարհի բոլոր իշխանութիւններուն ու պետութիւններուն: Հաւատքի ճամբով երբ Քրիստոսի միացաք, դուք ձեր մեղքերը թօթափեցիք եւ Քրիստոսի թլփատութեամբ ստացած եղաք սրտի թլփատութիւնը: Մկրտուելով՝ անոր հետ միասին թաղուեցաք, եւ անոր հետ ալ յարութիւն առիք, քանի հաւատացիք Աստուծոյ զօրութեան, որ զայն մեռելներէն յարուցանեց: Քրիստոսի հետ Աստուած ձե՛զ ալ կենդանացուց, քանի դուք հոգեւորապէս մեռած էիք ձեր մեղքերուն պատճառով, որովհետեւ անթլփատ հեթանոսներ էիք: Այո՛, Աստուած ներեց մեր բոլոր յանցանքները եւ իր իշխանութեամբ ջնջեց մեր օրինազանցութեան համար մեզի դէմ արձակուած դատապարտութեան վճիռը, զայն խաչափայտին գամելով: Այսպիսով անիկա զինաթափ ըրաւ ոգեղէն աշխարհի իշխանութիւններն ու պետութիւնները, յայտնապէս խայտառակելով ու պարտութեան մատնելով զանոնք Քրիստոսի ձեռքով, անոր յարութեան ատեն:

Կարեւորութիւն մի՛ տաք անոնց՝ որոնք ձեզ կը քննադատեն, թէ ինչո՛ւ չէք պահեր ուտելու եւ խմելու, տօնակատարութեանց, ամսամուտերու եւ Շաբաթ օրերու վերաբերող կանոնները. որովհետեւ այդ բոլորը գալիք իրականութեանց շուքն են, իսկ իրականութիւնը Քրիստոսի մէջ է:

Չըլլա՛յ որ ոեւէ մէկը իր կեղծ խոնարհութեամբ, հրեշտակներուն ընծայուած պաշտամունքով եւ զանազան տեսիլքներով ձեզ մոլորեցնէ եւ մրցանակէն զրկէ. որովհետեւ այդպիսիները մարդկային հպարտութենէ տարուած են եւ կ’ուզեն իրենք զիրենք պարտադրել ձեզի: Անոնք կապ չունին Գլուխին՝ Քրիստոսի հետ. մինչդեռ մարմինը՝ Քրիստոսի եկեղեցին, իր բոլոր յօդերով ու կապերով Գլուխին կապուած ու միացած, անկէ՛ կ’առնէ իր աճումը՝ Աստուծոյ կամքին համաձայն:

Քանի Քրիստոսի հետ մեռաք եւ բնութեան ոյժերու տիրապետութենէն դուրս եկաք, ինչո՞ւ կը շարունակէք ապրիլ այնպէս՝ որպէս թէ ձեր կեանքը աշխարհէն կախում ունենար, եւ կը հնազանդիք մարդոց կողմէ տրուած պատուիրաններու, ինչպէս՝ «Մի՛ մօտենար, մի՛ ուտեր, մի՛ դպչիր»: Ասոնք բոլորն ալ բաներ են՝ որոնք գործածութեամբ կը փճանան: Այդպէս պատուիրողները իմաստուն կրնան թուիլ՝ իրենց բարեպաշտական ինքնակամ արտայայտութիւններով, կեղծ խոնարհութեամբ եւ անխնայ կերպով մարմինը ճնշելով, բայց այս բաները ոեւէ արժէք չունին եւ միայն մարմինը բաւարարելու կը ծառայեն:

Քանի որ յարութիւն առիք Քրիստոսի հետ, այսուհետեւ ձեր ուշադրութիւնը երկինք դարձուցէք, որովհետեւ հո՛ն է Քրիստոս, Հօր Աստուծոյ աջ կողմը նստած: Երկնաւոր բաներու մասին խորհեցէք եւ ո՛չ թէ երկրաւոր բաներու. որովհետեւ դուք այս աշխարհին համար մեռաք, որպէսզի Քրիստոսի հետ միասին ապրիք այն կեանքով՝ որ Աստուած վերապահած է ձեզի: Իսկ երբ Քրիստոս՝ ձեր կեանքը՝ յայտնուի, այն ատեն դուք ալ փառքով պիտի յայտնուիք անոր հետ:

Հետեւաբար մեռցուցէ՛ք ձեր մէջ երկրաւոր ցանկութիւնները, այսինքն՝ ձեզմէ դուրս վանեցէք պոռնկութիւնը, պղծութիւնը, կիրքը, չար ցանկութիւնը եւ ագահութիւնը, ինչ որ կռապաշտութիւն է. որովհետեւ այդ բոլորը Աստուծոյ անհնազանդ մարդոց գործերն են, եւ Աստուած պիտի պատժէ զանոնք: Նախապէս դո՛ւք ալ այդ բոլորը կ’ընէիք, երբ տակաւին այդ ցանկութիւններով կ’ապրէիք: Բայց հիմա ձեզմէ դուրս նետեցէք այդ բոլորը.- բարկութիւնը, զայրոյթը եւ չարութիւնը: Ձեր բերանէն ոեւէ հայհոյութիւն կամ լկտի խօսք չլսուի: Սուտ մի՛ խօսիք իրարու: Մոռցէ՛ք ձեր հին կեանքն ու նախկին գործերը, եւ նոր մարդ եղէք՝ ձեր Արարիչին պատկերին համաձայն նորոգուելով, որպէսզի կարենաք զինք ճանչնալ: Անգամ մը որ նորոգուեցաք, ա՛լ չկայ Հրեայ կամ հեթանոս, թլփատուած կամ անթլփատ, բարբարոս, վայրենի, ծառայ կամ ազատ. կայ միայն Քրիստոս, որ ամէն ինչ է եւ բոլորին մէջ:

Հետեւաբար, իբրեւ Աստուծոյ կողմէ ընտրուած ու սրբուած եւ իր սէրը վայելող մարդիկ՝ գթասիրտ եղէք. եղէք ողորմած, քաղցր, խոնարհ, հեզ եւ համբերատար: Իրարու հանդէպ հանդուրժող եղէք, եւ ներեցէք իրարու՝ երբ մէկդ միւսին դէմ տրտունջ մը ունենաք: Ինչպէս Աստուած Քրիստոսի միջոցաւ ներեց ձեզի, այնպէս ալ դուք իրարու ներեցէք: Եւ այս բոլորին վրայ՝ աւելի սէր ունեցէք, որովհետեւ սէրը ամէն ինչի ամբողջացուցիչ շաղախն է: Ձեր սիրտերուն մէջ Քրիստոսի խաղաղութիւնը թող թագաւորէ, որովհետեւ Աստուած այդ խաղաղութեան կանչեց ձեզ՝ մէկ մարմինի մէջ, որ Քրիստոսի եկեղեցին է: Ուստի շնորհակալ եղէք Աստուծոյ:

Թող Քրիստոսի խօսքը ձեր մէջ բնակի իր ամբողջ հարստութեամբ, որպէսզի կատարեալ իմաստութեամբ սորվեցնէք իրարու եւ իրար խրատէք, եւ սաղմոսներով, օրհնութիւններով ու հոգեւոր երգերով ձեր սիրտերուն մէջ շնորհակալութեամբ զԱստուած օրհներգէք: Եւ ինչ որ ալ ընէք, խօսքով թէ գործով, միշտ Տէր Յիսուսի անունով ըրէք, անոր միջոցաւ գոհութիւն յայտնելով Հօր Աստուծոյ:

ՄԱՏԹԷՈՍ 22:34-23:12

Երբ Փարիսեցիները լսեցին թէ Յիսուս Սադուկեցիները պապանձեցուց, իրարու քով եկան: Անոնցմէ մէկը, Մովսիսական Օրէնքի մասնագէտ մը, Յիսուսը փորձելու համար հարցուց.

– Վարդապե՛տ, Օրէնքին մէջ ո՞րն է մեծագոյն պատուիրանը:

Յիսուս ըսաւ անոր.

– «Սիրէ՛ քու Տէր Աստուածդ ամբողջ սրտովդ, ամբողջ հոգիովդ եւ ամբողջ մտքովդ» : Ասիկա է մեծագոյն եւ կարեւորագոյն պատուիրանը: Երկրորդը ատոր նման է. «Սիրէ՛ ընկերդ քու անձիդ պէս» : Այս երկու պատուիրաններէն կախեալ են ամբողջ Օրէնքը եւ մարգարէներու ուսուցումները:

Երբ Փարիսեցիները հաւաքուեցան, Յիսուս հարցուց անոնց.

– Ի՞նչ կը խորհիք Քրիստոսին մասին: Որո՞ւն որդին է ան:

Անոնք պատասխանեցին.

– Դաւիթի:

Յիսուս ըսաւ անոնց.

– Ուրեմն ինչպէ՞ս Դաւիթ Սուրբ Հոգիէն ներշնչուած՝ զայն Տէր կը կոչէ ու կ’ըսէ.-

«Տէրը իմ Տիրոջս ըսաւ.-

Աջ կողմս նստէ,

մինչեւ որ թշնամիներդ ոտքերուդ տակ դնեմ

որպէս պատուանդան»:

Արդ, եթէ Դաւիթ զայն Տէր կը կոչէ, ինչպէ՞ս Քրիստոս անոր որդին կ’ըլլայ:

Ոչ ոք կրցաւ պատասխան տալ Յիսուսի, եւ այդ օրէն սկսեալ՝ ոեւէ մէկը չէր համարձակեր իրեն հարցում ուղղել:

Ապա Յիսուս ժողովուրդին եւ իր աշակերտներուն ըսաւ.

– Մովսէսի աթոռը նստան Օրէնքի ուսուցիչներն ու Փարիսեցիները: Իրենց ըսածներուն հնազանդեցէք եւ կատարեցէք զանոնք, սակայն մի՛ ընէք ինչ որ իրենք կ’ընեն ․ որովհետեւ անոնք կը սորվեցնեն, բայց չեն կատարեր: Անոնք ծանր եւ դժուարակիր բեռներ կը դնեն մարդոց ուսերուն, մինչ իրենք նոյն բեռները կրելու նուազագոյն ճիգն իսկ չեն ըներ: Ինչ որ կ’ընեն, մարդոց երեւելու համար կ’ընեն: Իրենց գրապանակները կը լայնցնեն եւ իրենց հագուստներուն ծոպերը կ’երկնցնեն: Ընթրիքներու ընթացքին պատուոյ տեղերը գրաւել կը սիրեն եւ ժողովարաններու մէջ՝ առաջին աթոռները: Կը սիրեն հրապարակներու վրայ մարդոցմէ բարեւներ ընդունիլ եւ «վարդապետ», այսինքն «ուսուցիչ» կոչուիլ: Բայց դուք ոեւէ մէկը «վարդապետ» մի՛ կոչէք, որովհետեւ դուք բոլորդ եղբայրներ էք եւ մէկ ուսուցիչ ունիք: Երկրի վրայ ոեւէ մէկը «հայր» մի՛ կոչէք, որովհետեւ դուք մէկ Հայր ունիք, որ երկինքի մէջ է: «Առաջնորդ» մի՛ կոչուիք, որովհետեւ ձեր միակ առաջնորդը Քրիստոսն է: Ձեր մէջէն մեծը թող ձեր սպասաւորը ըլլայ: Ով որ իր անձը կը բարձրացնէ՝ պիտի խոնարհի, եւ ով որ իր անձը կը խոնարհեցնէ՝ պիտի բարձրանայ:

ՃՇ. ԸՆԹԵՐՑՈՒՄ

Եսայի 66:1-24

Ս. ԱՍՏՈՒԱԾԱԾՆԻ ԱՒԵՏՄԱՆ ԸՆԹԵՐՑՈՒՄՆԵՐ

Երգ. 1:1-11, Առակաց 11:30-12:4, Եսայի 52-7:10, Զաքարիա 2:10-13, Մաղաքիա 3:1-2, Կորնթացիներուն 6:16-7:11, Ղուկաս 1:26-38

ԳԱԼՍՏԵԱՆ ԿԻՐԱԿԻ

Կիրակի, 7 Ապրիլին, Մեծ Պահքի վեցերորդ ու վերջին Կիրակին է, որ ծանօթ է Գալստեան Կիրակի անունով։ Այս Կիրակի կ՚անդրադառնանք Քրիստոսի առաջին գալուստի խորհուրդին եւ յատկապէս՝ երկրորդ գալուստին, որ քրիստոնէական մեր հաւատքի հիմնաքարերէն է, եւ որ կը յիշուի կարդացուած աղօթքներուն մէջ։ Քրիստոս աշխարհ եկաւ մարդկութեան փրկութեան համար։ Մեզի կ՚ըսուի, թէ պատրաստ ըլլանք որեւէ ատեն, որովհետեւ Ան դարձեալ պիտի գայ մեղաւորներու դատաստանին համար, երբ արդարները արժանի պիտի ըլլան Աստուծոյ թագաւորութիւնը մտնելու։ Այն ատեն պիտի տեսնեն Մարդու Որդին, որ կու գայ ամպերու վրայ՝ մեծ զօրութեամբ եւ փառքով: Այն ատեն իր հրեշտակները պիտի ղրկէ, որպէսզի աշխարհի չորս կողմերէն իր ընտրեալները հաւաքեն, աշխարհի մէկ ծայրէն մինչեւ միւս ծայրը(Մարկ. 13:26-27):

Գալստեան Կիրակին իր սեփական շարականը ունի, որ կը հռչակէ, թէ առաքեալները գիտէին Քրիստոսի գալստեան խորհուրդը։ Դրախտէն արտաքսումի պատմութիւնը կը կրկնուի եւ Քրիստոսի կոչ կ՚ըլլայ, որ Երկնային Հօրմէն խնդրէ երկրային խաղաղութեան հաստատումը։ Գալստեան Կիրակին նախապատրաստութիւնն է յաջորդ Կիրակի օրուան՝ Ծաղկազարդին, երբ կը տօնուին Տիրոջ փառաւոր մուտքը Երուսաղէմ եւ Աւագ Շաբթուան սկիզբը։

«Զահեղ փառաց քոց երեւումն որ լինելոց է յերկրորդումն, ետես դաւիթ յառաջագոյն ծանոյց կանխաւ ազդմամբ հոգւոյն. թէ յայտնապէս աստուած գայցէ հուր առաջին իւր բորբոքէ. յայնժամ յիսուս ի մեզ խնայեա գթա քրիստոս եւ ողորմեա։

Աստուածածին անհարսնացեալ յերկրէ յերկինս հարս ընծայեալ. յայնժամ բազմիս լուսոյ նման քո միածնիդ յաջակողմեան. յայնժամ մաղթեա ընդ մեր զնոյն փրկել զմեզ յահեղ բոցոյն, համադասիլ ընդ արդարոց երգել զփառս ընդ երկնայնոցն»։

(Քու ահեղ փառքիդ երեւումը որ պիտի ըլլայ երկրորդ գալուստիդ, Դաւիթ սկիզբէն տեսաւ, եւ Հոգիին ներգործութեամբ կանխաւ ծանուց թէ յայտնապէս Աստուած պիտի գայ եւ իր առջեւ հուր պիտի բորբոքէ, այն ատեն խնայէ մեզի Յիսուս Քրիստոս եւ ողորմէ։

Աստուածածին Կոյս, երկրէն երկինք հարս ընծայուած, երբ լոյսի նման Միածնիդ աջ կողմը բազմիս, այն ատեն, մեր փոխարէն նոյնը մեզի համար խնդրէ որ մեզ ահեղ բոցէն փրկէ, որպէսզի արդարներուն հետ համադասուինք եւ երկնայիններուն հետ փառք երգենք)։

Ս. ԳՐԻԳՈՐԻ ՄՈՒՏՔԸ ԽՈՐ ՎԻՐԱՊԻ ՄԷՋ

Մեծ Պահքի ընթացքին, սուրբերը միայն Շաբաթ օրերուն կ՚ոգեկոչուին։ Տարուան մնացեալ օրերուն, կարելի է սուրբերը պատուել Երկուշաբթի, Երեքշաբթի, Հինգշաբթի կամ Շաբաթ օրերուն։

Շաբաթ, 6 Ապրիլին, Հայաստանեայց Եկեղեցին կը նշէ իր տօնացոյցին երեք օրերէն մէկը, որ նուիրուած է Ս. Գրիգոր Լուսաւորիչին. Խոր Վիրապ մուտքի տօնը։ Միւս երկու տօներն են` Խոր Վիրապէն Ելքը եւ նշխարներուն Գիւտը։

Ինչպէս յայտնի է, Գրիգոր իր հաւատքը պահեց եւ մերժեց ուրանալ Քրիստոսը։ Իբրեւ արդիւնք, բազմաթիւ չարչարանքներու ենթարկուեցաւ, իսկ վերջին պատիժը խոր վիրապի մը մէջ բանտարկութիւնն էր, ուր մնաց տասներեք կամ աւելի տարիներ։ Ան հրաշքով վերապրեցաւ, շնորհիւ իր հաւատքին եւ, ըստ աւանդութեան, անյայտ ինքնութեամբ հրեշտակային կնոջ մը շնորհիւ, որ ուտելիք եւ ջուր կը նետէր վիրապին մէջ։

Խոր Վիրապի վանքը Հայաստան այցելող զբօսաշրջիկներու եւ ուխտաւորներու ժողովրդական հասցէ մըն է։ Վանքը շինուած է Ս. Գրիգորի բանտարկութեան ճիշդ վայրին վրայ։ Վիրապը մատչելի է այցելուներուն, որոնք 27 ուղղաձիգ աստիճաններով սանդուխէն պէտք է իջնեն։ Ս. Աստուածածնի եկեղեցին շինուած է 17րդ դարուն։ Շրջանը Հայաստանի ամենէն գեղեցիկ վայրերէն մէկն է եւ Մասիս լերան հիանալի տեսարաններ կը մատուցէ։ Խոր Վիրապի շրջակայքին կը գտնուին հայոց հինաւուրց Արտաշատ մայրաքաղաքին աւերակները։

«Այսօր զիմանալի լուսոյն ծագողն ի խաւարի նստելոցս. զգրիգորիոս սուրբ հայրապետն եկայք վերապատուեսցուք։

Այսօր զանապական հոգւոյն պարգեւս բաշխող որդւոց թորգոմայ, յորդիս լուսոյ նովաւ ծնեալք, եկայք վերապատուեսցուք։

Այսօր զաստուածային բանին պատմող ի հայաստան աշխարհի, աշակերտեալ նմա մանկունք, եկայք վերապատուեսցուք»։

(Այսօր խաւարի նստողներուս մէջ իմանալի Լոյսը ծագեցնողը, Գրիգոր սուրբ հայրապետը վերապատուենք։

Այսօր Թորգոմի որդիներուն եւ անկէ ծնած լոյսի որդիներուն՝ Հոգիին անապական պարգեւները բաշխողը վերապատուենք։

Անոր աշակերտած զաւակներ՝ եկէք այսօր Հայաստանի աշխարհին մէջ Աստուածային Բանը պատմողը վերապատուենք)։

Ս. ԱՍՏՈՒԱԾԱԾՆԻ ԱՒԵՏՄԱՆ ՏՕՆ

Կիրակի, 7 Սեպտեմբերին, Ս. Աստուածածնի Աւետման տօնն է, որ կը կատարուի Ս. Ծնունդէն ինն ամիս առաջ։ Այս տօնակատարութիւնը կը նշէ Քրիստոսի ապագայ ծնունդի աւետումը` Կոյս Մարիամին, ինչպէս արձանագրուած է Ղուկասի Աւետարանին մէջ.

«Ահա պիտի յղանաս եւ զաւակ մը ծնիս, որ Յիսուս պիտի կոչես: Անիկա մեծ պիտի ըլլայ եւ Բարձրեալին Որդին պիտի կոչուի: Տէր Աստուած անոր պիտի տայ իր հօրը՝ Դաւիթի գահը, եւ անիկա Յակոբի սերունդներուն վրայ յաւիտեանս պիտի թագաւորէ: Անոր թագաւորութիւնը անվախճան պիտի ըլլայ» (Ղուկաս 1:31-33):

«Խորհուրդն անճառ ծածկեալ յազգաց եւ յաւիտեանց, յայտնեցաւ իջմամբ հրեշտակապետին այսօր առ կոյսն մարիամ. զոր առ տէր ունիմք բարեխօս վասն անձանց մերոց»։

(Ազգերէն եւ յաւիտեաններէն ծածկուած անճառ խորհուրդը, այսօր հրեշտակապետին Կոյս Մարիամին մօտ իջնելով յայտնուեցաւ, որ մեզի համար Տիրոջ մօտ բարեխօս ունինք)։

ՇԱՆԹ ԱՒԱԳ ՍԱՐԿԱՒԱԳ ԿԸ ԴԱՍԱԽՕՍԷ ՖԻԼԱՏԵԼՖԻԱՅԻ ՄԷՋ

Ուրբաթ, 29 Մարտին, Բարշ. Շանթ Ա. սրկ. Գազանճեան՝ Ազգ. Առաջնորդարանի Քրիստոնէական Դաստիարակութեան բաժնի տնօրէն, Մեծ Պահքի առիթով դասախօսեց Ֆիլատելֆիայի Ս. Գրիգոր Լուսաւորիչ եկեղեցւոյ մէջ՝ հոգեւոր հովիւ՝ Տ. Ներսէս Ա. քհնյ. Մանուկեանի եւ հոգաբարձութեան հրաւէրով։ «Հաւատամք... հաղորդութեամբ սրբոց» նիւթին շուրջ դասախօսութիւնը կ՚անդրադառնար Ժամագիրքի սկիզբը գտնուող Հաւատամքին։

ԱՌԱՋՆՈՐԴԱՐԱՆԻ ՄԵԾ ՊԱՀՔԻ ՅԱՅՏԱԳԻՐԸ ԿԸ ՇԱՐՈՒՆԱԿՈՒԻ

Առաջնորդ Սրբազան Հօր նախագահութեամբ Մեծ Պահքի վեց դասախօսութիւններու շարքին հինգերորդը տեղի ունեցաւ Չորեքշաբթի, 3 Ապրիլին, Նիւ Եորքի Ս. Լուսաւորիչ Մայր Եկեղեցւոյ մէջ։

Երեկոյեան նիւթն էր «Ապրիլ Խաչի աստուածային կանչը», իսկ դասախօսը՝ Փրաւիտընսի Ս. Վարդանանց եկեղեցւոյ հոգեւոր հովիւ՝ Տ. Գաբրիէլ քհնյ. Նազարեան։ Եթէ դասախօսութեան ուղղակի պատկերասփռումը չէք դիտած, կրնաք դիտել զայն՝ սեղմելով այստեղ ։

Յաջորդ ու վերջին դասախօսը պիտի ըլլայ՝ փրոֆ. Շոպան Նաշ-Մարշալ, որ Չորեքշաբթի, 10 Ապրիլին պիտի խօսի «Քալել տուն տանող ճամբան» նիւթով։

Յայտագիրը կը հովանաւորեն՝ Ազգ. Առաջնորդարանի Քրիստոնէական Դաստիարակութեան բաժանմունքը եւ Ս. Լուսաւորիչ Մայր Եկեղեցւոյ Տիկնանց Միութիւնը։ Ան կը բաղկանայ երեք մասերէ՝

– եկեղեցական կարճ արարողութիւն մը՝ ժամը 7:00ին,

– 20 վայրկեաննոց դասախօսութիւն մը՝ ժամը 7:30ին

– ընթրիք՝ ժամը 8:00ին։

«ՏԱԹԵՒ» ԱՄԱՌՆԱՅԻՆ ԾՐԱԳՐԻ ԱՐՁԱՆԱԳՐՈՒԹԻՒՆ

Արդէն կարելի է արձանագրուիլ Ազգ. Առաջնորդարանի Քրիստոնէական Դաստիարակութեան բաժանմունքի «Ս. Գրիգոր Տաթեւացի» ամառնային ծրագրին։ Կրօնական այս եզակի ծրագիրը նախատեսուած է 13-18 տարեկան պատանիներու համար։ Տեղի պիտի ունենայ 30 Յունիսէն մինչեւ 7 Յուլիս՝ Էլվըրսընի (Փենսիլվենիա) St. Mary of Providence կեդրոնին մէջ։ Տեղեկութեան եւ արձանագրութեան համար, հաճեցէք սեղմել այստեղ ։

ՄԵՐ ԴՊՐՈՑՆԵՐԷՆ

Ս. ՍՏԵՓԱՆՈՍ ԱՄԷՆՕՐԵԱՅ ՎԱՐԺԱՐԱՆԸ ԿԸ ՅԱՂԹԷ ՈՒՈԹԸՐԹԱՈՒՆԻ ՈՒՂՂԱԳՐՈՒԹԵԱՆ ՄՐՑՈՒՄԻՆ

5րդ դասարանի աշակերտները ուղղագրութեան մրցումին՝ տնօրէնուհիին եւ ուսուցիչներու հետ

Կիրակի, 31 Մարտին, Ս. Ստեփանոս ամէնօրեայ վարժարանի 13 աշակերտներ մասնակցեցան Ուոթըրթաուն քաղաքի 9րդ ուղղագրական մրցումին։ Մասնակիցներն էին՝ Ժորժէթ Իշակեան (1ին դասարան), Արման Ստեփանեան, Էլսա Սարգիսեան եւ Նարան Պեհպահանի (3րդ դասարան), եւ Լիա Կարապետեան, Լարա Չէքիճեան, Անայիս Գահուէճեան, Ալլա Պետրոսեան, Նիքլաս Նալպանտեան, Ճուլիա Չափեան, Սարօ Իսկէնտէրեան, Կասիա Մինասեան եւ Նարինէ Մարտիրոս (5րդ դասարան)։

Լիայի, Լարայի եւ Անայիսի կազմած 5րդ դասարանի խումբը առաջին տեղը գրաւեց առաջին փուլին։ Հինգերորդ դասարանի միւս երկու խումբերը նոյնպէս շատ լաւ աշխատանք կատարեցին։ Երրորդ դասարանի խումբը առաջին տեղը կիսեց իրենց փուլին, իսկ Ճորճէթ Իշակեան ուրիշ դպրոցներէ աշակերտներու հետ մասնակցեցաւ ու առաջին տեղը գրաւեց։

Երրորդ դասարանի յաղթական խումբը

Հինգերորդ դասարանի յաղթական խումբը

ԱՅՑԵԼՈՒԹԻՒՆ՝ ՆԻՒ ՃԸՐԶԻԻ Ս. ՎԱՐԴԱՆԱՆՑ ԵԿԵՂԵՑՒՈՅ ԿԻՐԱԿՆՕՐԵԱՅ ՎԱՐԺԱՐԱՆԻՆ

Կիրակի, 31 Մարտին, Անուշաւան Սրբազան Հայր այցելեց Ս. Վարդանանց (Նիւ Ճըրզի) կիրակնօրեայ դպրոցը։ Աշակերտները տասը յիմար կոյսերու առակին նիւթով ներկայացում մը կը պատրաստէին՝ յառաջիկայ Գալստեան Կիրակիի առիթով, երբ Սրբազան Հայրը ողջունեց աշակերտները եւ անոնց հետ զրուցեց ձէթի լապտերներ պատրաստելու եւ վառելու մասին։ Խօսակցութեան ընթացքին, աշակերտները խորացուցին իրենց գիտելիքները Քրիստոսի երկրորդ գալուստին մասին։

Վարուժան Խտըշեան (ծնունդ՝ 7 Ապրիլ, 1937)

Վարուժան Խտըշեան սփիւռքահայ թատրոնի ամենէն նորարար բեմադրիչներէն մէկը եղած է՝ անցեալ դարու երկրորդ կէսին։

Ծնած է Ալէյ (Լիբանան), 7 Ապրիլ, 1937ին։ Տասնվեց տարեկանին, առաջին անգամ ելոյթ ունեցած է Համազգայինի «Գասպար Իփէկեան» թատերախումբին մէջ, զոր կը ղեկավարէր սփիւռքահայ թատրոնի ուրիշ յայտնի անուն մը՝ Ժորժ Սարգիսեան։

1960-1965 իր թատերական ուսումը ստացած է Լոնտոնի «Ուեպէր-Տոկլըս» թատերական արուեստի ակադեմիային մէջ։ Վերադառնալով Լոնտոն, միացած է Համազգային «Լեւոն Շանթ» թատերախումբին։ Երկու տարի ետք, հիմնած է «Թատրոն-67» թատերախումբը, որ շատ կարեւոր դեր մը խաղացած է լիբանանահայ համայնքին մէջ մինչեւ քաղաքացիական պատերազմին սկիզբը՝ 1975ին։ Խտըշեան ծանօթ դարձաւ աւանդութեան կաղապարները խախտող հայկական ու միջազգային թատերացանկի գործերու իր բեմադրութիւններով, հայ հանդիսատեսին ներկայացնելով ժամանակակից թատերագիրներու (Արթըր Միլլըր, Փիթըր Վայս, Էտուըրտ Օլպի, Նիլ Սայմըն) գործերը։ Ան այս մօտեցումը պահած է 1989-2000ին, երբ «Գասպար Իփէկեան» թատերախումբի բեմադրիչը եղած է։ Անգլերէնէ հայերէնի թարգմանած է 22 թատերախաղեր։

Անոր բեմադրած գործերուն շարքին են՝ Լեւոն Շանթի «Հին աստուածները» եւ «Կայսրը», Յակոբ Օշականի «Երկնքի ճամբով» եւ «Մինչեւ ո՞ւր», Յակոբ Պարոնեանի «Ալաֆրանկա», «Արեւելեան ատամնաբոյժ» եւ «Պաղտասար աղբար»ի, Համաստեղի «Հայաստանի լեռներու սրնգահարը»ի կողքին, համաշխարհային թատերական գործեր, ինչպէս՝ «Վենետիկի վաճառականը» (Ուիլիըմ Շէյքսփիր), «Ո՞վ կը վախնայ Վըրճինիա Վուլֆէն» (Էտուըրտ Օլպի), «Մարա/Սատ» (Փիթըր Վայս), «Սալեմի վհուկները», «Կամուրջէն դիտուած», «Գինը» եւ «Բոլոր զաւակներս» (Արթըր Միլլըր), «Երկրորդ պողոտային բանտարկեալը» եւ «Բոպիկ պարտէզին մէջ» (Նիլ Սայմըն), «Մեծ վարպետ Սոլնէս» (Հենրիկ Իպսէն), «Մեծն Հռոմուլոսը» (Ֆրիտրիխ Տիւրենմաթ), «Վենետիկեան երկուորեակները» (Գարլօ Կոլտոնի) եւ «Վերակացուն» (Հարըլտ Փինթըր)։

1979-1987ին Խտըշեան հինգ թատերական ներկայացումներ կատարած է Հայաստանի մէջ (Երեւան եւ Լենինական), եւ ստացած՝ «Պետրոս Ադամեան» մրցանակը 1987ին, դառնալով այս մրցանակը ստացող առաջին սփիւռքահայը՝ խորհրդային ժամանակաշրջանին։

Երկարամեայ թատերական վաստակը բազմաթիւ պատիւներու արժանացուցած է զինք կեանքի վերջին տարիներուն։ 2000ին ստացած է Մեծի Տանն Կիլիկիոյ «Ս. Մեսրոպ Մաշտոց» շքանշանը՝ Արամ Ա. Վեհափառին կողմէ եւ Համազգայինի շքանշանը՝ Համազգայինի Կեդր. Վարչութեան կողմէ։ 2008ին ստացած է Հայաստանի Մշակոյթի նախարարութեան ոսկեայ մետալը, իսկ Ամենայն Հայոց Կաթողիկոս Գարեգին Ա.ի կողմէ՝ «Ս. Սահակ-Ս. Մեսրոպ» շքանշանը։ Միջոցին, 2004ին ստացած էր Լիբանանեան համալսարանի Արուեստի հիմնարկի շքանշանը, ուր թատերական արուեստ դասաւանդած էր 1971-1999ին։

Վարուժան Խտըշեան իր մահկանացուն կնքած է Պէյրութի մէջ, 28 Դեկտեմբեր, 2015ին, 68 տարեկանին։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org )

ՔԱՅԼԱՐՇԱՒ ԱՐԴԱՐՈՒԹԵԱՆ ՀԱՄԱՐ

ԵԹԷ ԸՍԵԼԻՔ ՈՒՆԻՔ...

. . . գրեցէք մեզի crossroads@armenianprelacy.org հասցէին։

Մեր ելեկտրոնային շաբաթական լրատուի՝ “Crossroads”-ի մասին ձեր կարծիքն ու ձեր առաջարկները մեզ շատ կը հետաքրքրեն։ Ա՛յս նպատակով հաստատեցինք նամակագրութեան վերի յատուկ հասցէն։ Հաճոյքով պիտի հրատարակենք ձեր նամակները։

ԺԱՄԱՆԱԿԱՑՈՅՑ

«Սիամանթօ» լսարանի դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝ anec@armenianprelacy.org կամ՝ 212-689-7810։ Յաջորդ դասը՝ Շաբաթ, 13 Ապրիլին։

28 Մարտ-7 Ապրիլ —ՀՕՄի Նիւ Ճըրզիի «Ակնունի», Պըրկըն գաունթիի «Արմենուհի», «Շաքէ» եւ «Սպիտակ» մասնաճիւղերը առցանց աճուրդ մը կը կատարեն՝ ի նպաստ ՀՕՄի հիմնադրամին։ Տեղեկութիւններու համար՝ arseusaauction@gmail.com .

7 Ապրիլ —Դոկտ. Մելինէ Անումեանի “Acknowledgment and Condemnation: The Trials of Young Turks in 1919-1921 and 1926” գիրքը կը ներկայացնէ հեղինակը՝ հայերէն եւ անգլերէն լեզուներով։ Կազմակերպութեամբ՝ Ս. Լուսաւորիչ Մայր Եկեղեցւոյ եւ Համազգայինի Շրջ. Վարչութեան։ Եկեղեցւոյ «Բաշալեան» սրահին մէջ, ժամը 1։00ին։

1-2 Ապրիլ —«Մէրի Թ. Քլարք» ձեռնարկ (Reid Castle, Մանհաթընվիլ գոլէճ, Փըրչէյս, Նիւ Եորք)։ Տարբեր բանախօսներ պիտի քննարկեն «Յետ-ճշմարտութեան աշխարհի մը մէջ ապրիլ» նիւթը։ Ձեռնարկը կը վերջանայ 2 Ապրիլին, երեկոյեան ժամը 6:00ին, տարեկան «Մէրի Թ. Քլարք» դասախօսութեամբ՝ Գերշ. Տ. Անուշաւան արք. Դանիէլեանի։ Տեղեկութիւններու համար հեռաձայնեցէք 315-731-0958 թիւին։

7 Ապրիլ —«Մեր արմատները գտնելու համար՝ տոհմաբանութիւն», դասախօսութիւն՝ Ճորճ Աղճայեանի (անգլերէն), Ուոթըրթաունի (Մասաչուսեթս) Ս. Ստեփանոս եկեղեցւոյ մէջ, կէսօրէ ետք ժամը 1:00ին՝ ճաշէ ետք։

7 Ապրիլ —Ինտիըն Օրչըրտի Ս. Գրիգոր Լուսաւորիչ եկեղեցւոյ 85ամեակի նշում եւ ճաշկերոյթ։ Կը պատարագէ ու կը քարոզէ թեմիս բարեջան առաջնորդ՝ Գերշ. Տ. Անուշաւան արք. Դանիէլեան, առաւօտեան ժամը 10ին։

12-14 Ապրիլ —Ս. Նահատակաց ամէնօրեայ վարժարանը կազմակերպած է Արթըր Փինաճեանի (1914-1999) գործերու ցուցադրութիւն՝ Ս. Վարդան Մայր Տաճարին մէջ, Նիւ Եորք։ Վաճառքի եկամուտին մէկ մասը պիտի յատկացուի դպրոցին։

24 Ապրիլ —«Քայլարշաւ՝ Արդարութեան համար», յիշելով Հայկական Ցեղասպանութեան Նահատակները, Առաջնորդ Սրբազան Հօր՝ Անուշաւան արք․ Դանիէլեանի հովանաւորութեամբ։ Ս․ Պատարագ՝ ժամը 10։00ին, Ս․ Լուսաւորիչ Մայր Եկեղեցի, 221 E. 27 ^th Street, New York City։ Քայլարշաւը կը սկսի ժամը 12։30ին, Մայր Եկեղեցիէն մինչեւ թրքական հիւպատոսարան։

27 Ապրիլ —Հայկական Ցեղասպանութեան 104րդ տարելիցի յիշատակում Քենեթիքըթի Hall of the House-ի մէջ, State Capitol, 210 Capitol Avenue, Hartford, Connecticut, ժամը 11։00ին։ Գլխաւոր բանախօս՝ Սալբի Ղազարեան, տնօրէն՝ Հարաւային Քալիֆորնիոյ համալսարանի Հայկական Ուսմանց Հիմնարկին։

28 Ապրիլ —Հայկական Ցեղասպանութեան ոգեկոչում՝ Թայմզ Սքուէրի մէջ (Times Square, 43 ^rd Street եւ Broadway, New York), կազմակերպութեամբ՝ Վարդանանց Ասպետներու եւ Դուստրերու։ Նիւ Եորքէն ու Նիւ Ճըրզիէն ձրի հանրակառքով փոխադրութիւն Մանրամասնութիւններ համար, այցելեցէք www.kofv.org/main/april282019 կայքէջը։

28 Ապրիլ —Ռոտ Այլընտի Հայ Նահատակաց Յանձնախումբը Հայկական Ցեղասպանութեան 104ամեակը պիտի նշէ նահատակաց յուշարձանին կողքին՝ Փրաւիտընսի մէջ (North Burial Grounds), ժամը 12:45էն սկսեալ։ Երեք եկեղեցիներու հովիւներն ու խորանի ծառայողները պիտի մասնակցին ոգեկոչումին։ Գլխաւոր բանախօս՝ «Պոսթըն Կլոպ»ի վաստակաւոր խմբագիր եւ լրագրող Սթիվըն Քիւրքճեան։ Տեղեկութիւններու համար, գրեցէք joycey41@cox.net հասցէին։

5 Մայիս —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակի ճաշկերոյթ՝ «60 տարի՝ սերունդէ սերունդ» բնաբանով, եկեղեցւոյ գլխաւոր սրահին մէջ, որուն ընթացքին պիտի մեծարուին Կարապետեան, Միրաքեան, Նաճարեան եւ Սարաճեան ընտանիքները։

16-18 Մայիս —Արեւելեան թեմի Ազգային Երեսփոխանական Ժողով՝ Ուայթընսվիլի (Մասաչուսեթս) Ս. Աստուածածին եկեղեցւոյ հիւրընկալութեամբ։

30 Յունիս-7 Յուլիս —33րդ տարեկան «Ս. Գրիգոր Տաթեւացի» ամառնային ծրագիրը՝ 13-18 տարեկան պատանիներու համար, տեղի պիտի ունենայ St. Mary of Providence կեդրոնին մէջ (Էլվըրսըն, Փենսիլվենիա), կազմակերպութեամբ՝ Ազգ. Առաջնորդարանի Քրիստոնէական Դաստիարակութեան բաժնին։

9-12 Հոկտեմբեր —Սրբոց Թարգմանչաց տօնին առիթով, Արեւելեան, Արեւմտեան եւ Գանատական թեմերու եկեղեցականաց համաժողով տեղի պիտի ունենայ Մոնթեպելլոյի մէջ (Գալիֆորնիա)։ Մանրամասնութիւնները՝ յետագային։

12 Հոկտեմբեր —Ս. Վարդանանց եկեղեցւոյ 60ամեակի շարունակութիւն՝ Էլի Պէրպէրեանի եւ իր նուագախումբի մասնակցութեամբ։

19 Հոկտեմբեր —«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մեսեչուսեթս)։

17 Նոյեմբեր —Կոմիտաս Վարդապետի 150ամեակի ծննդեան տօնակատարութիւն, կազմակերպութեամբ՝ Ազգ. Առաջնորդարանի։ Մանրամասնութիւնները՝ յետագային։

The Armenian Prelacy

Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at http://www.armenianorthodoxchurch.org/en/