ᔪᓚᐃ 2019                                                                    
ᓯᓚᑖᓃᙶᖅᑐᒥᒃ ᑳᓐᑐᕌᒃᑎᑖᕐᓂᐊᖅᐱ?
ᖃᓄᐃᒻᒪ ᐊᔪᙱᑎᑕᐅᓂᕐᒧᑦ ᑎᑎᖅᑲᕆᐊᖃᕐᒪᖔᖅᐱᑦ

ᑕᐃᒪᐃᑉᐸ, ᑳᓐᑐᕌᒃᑎᒋᔭᐅᓪᓗᐊᑕᕈᕕᑦ, ᐃᖅᑲᓇᐃᔭᖅᑎᑖᕈᕕᑦ ᓯᓚᑖᓂᙶᖅᑐᓂᒃ ᑳᓐᑐᕌᒃᑎᓂᑦ ᐊᒻᒪᓗ ᑳᓐᑐᕌᒃᑎᒃᑲᓐᓂᕐᓂᒃ, ᐱᒻᒪᕆᐅᓘᕗᖅ ᖃᐅᔨᒋᐊᑦᑎᐊᕐᓗᑎᑦ ᑲᒻᐸᓂᐅᔪᖅ ᐃᖅᑲᓇᐃᔭᖅᑎᑕᑎᑦ ᐊᑐᓕᐅᖅᓯᒪᒐᓗᐊᕐᒪᖔᑦᑕ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᐊᒻᒪᓗ ᓈᒻᒪᒋᔭᐅᔪᒦᓪᓗᑎ. ᐊᔪᙱᑎᑕᐅᓂᕐᒧᑦ ᑎᑎᖅᑲᐃᑦ ᐃᓕᖕᓄᑦ ᐅᖃᐅᓯᖃᖅᐳᑦ ᑳᓐᑐᕌᒃᑎᒋᔭᐃᑦ ᐊᑎᓕᐅᖃᑕᐅᓯᒪᖕᒪᖔᖅ ᑖᒃᑯᓄᖓ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᐊᒻᒪᓗ ᐅᓪᓗᒥᒨᖓᑦᑎᐊᕋᓗᐊᕐᒪᖔᑦ ᐃᖅᑲᓇᐃᔭᖅᑎᓄᑦ ᐊᑭᓕᐅᑎᒃᓴᓄᑦ ᐊᒻᒪᓗ ᐊᑭᓕᔾᔪᑎᓄᑦ.

ᐃᖅᑲᓇᐃᔭᖅᑎᑖᕈᕕᑦ ᑳᓐᑐᕌᒃᑎᒥ ᒪᓕᑦᑎᐊᙱᑦᑐᒥ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ, ᐸᓯᔭᒃᓴᐅᔪᓐᓇᖅᑐᑎᑦ ᐊᑭᓕᖅᑕᐅᓯᒪᙱᑦᑐᓄᑦ ᖃᐅᔨᓴᕐᓂᐅᔪᓄᑦ ᑐᕌᖓᔪᓂ ᐱᓕᕆᐊᕆᔭᖏᓐᓄᑦ ᐅᕝᕙᓘᓐᓃᑦ ᐱᔨᑦᑎᕋᕐᓂᖏᓐᓄᑦ ᒪᑎᒪᑎᑕᖏᓐᓄᑦ ᐃᓕᖕᓄᑦ ᑳᓐᑐᕌᒃᒋᔭᐃ ᐊᑐᓐᓂᓕᒫᖓᓂ, ᑭᖑᓪᓕᖅᐹᒥ ᐊᑭᓖᓯᒪᓕᕋᓗᐊᖅᑎᓪᓗᑎ.

ᓴᐳᔾᔨᓯᒪᓂᕐᒧᑦ ᓇᖕᒥᓂᕆᔭᕐᓂᒃ ᖄᒃᑲᓐᓂᐊᒍᑦ ᐊᑭᓕᔾᔪᑎᓄᑦ, ᐊᔪᙱᑎᑕᐅᓂᕐᒧᑦ ᑎᑎᖅᑲᖅᑖᕙᒌᖃᑦᑕᕐᓗᑎᑦ ᐊᒻᒪᓗ ᐱᔨᑦᑎᕋᕈᑕᐅᔭᕇᕈᕕᑦ ᑳᓐᑐᕌᒃᑎᒧᑦ. 

ᐊᔪᙱᑎᑕᐅᑎᑖᕐᓂᖅ - ᒪᔾᔭ ᒪᑯᐊ ᐱᓕᕆᐊᕆᔭᕆᐊᖃᖅᑕᑎ:

ᐱᓕᕆᐊᖅ 1 - ᑳᓐᑐᕌᒃᑎᑖᕈᕕᑦ
  • ᑐᒃᓯᕋᕐᓗᑎᑦ "Letter of Good Standing" (ᑎᑎᖅᑲᕐᒥᑦ ᓈᒻᒪᒋᔭᐅᔪᒦᓐᓂᖓᓂ) (ᐊᔪᙱᑎᑕᐅᕐᖓᐅᑎ) ᖃᐅᔨᒪᑦᑎᐊᕆᐊᕐᓂᕐᒥᑦ ᑳᓐᑐᕌᒃᑎ ᐅᕝᕙᓘᓐᓃᑦ ᑳᓐᑐᕌᒃᑎᒃᑲᓐᓂᖅ ᐊᑎᓕᐅᖅᓯᒪᒐᓗᕐᒪᖔᖅ ᐊᒻᒪᓗ ᓈᒻᒪᒋᔭᐅᔪᒦᒃᑲᓗᐊᕐᒪᖔᖅ.
  • ᓱᒃᑲᓂᖅᐹᒃᑯᑦ ᐊᒻᒪᓗ ᐱᔭᕆᐊᑭᓐᓂᖅᐹᒃᑯᑦ ᐊᑎᓕᐅᕐᕕᒃᑯᑦ ᐃᓯᕐᓗᓂ ᐅᕗᖓ  WSCC Connect ᐊᒻᒪᓗ ᓇᕿᓪᓗᒍ "Obtain a Clearance" (ᐊᔪᙱᔾᔪᑎᑖᕐᓂᖅ). 
  • ᑐᒃᓯᕋᖅᓯᒪᓕᕈᕕᑦ ᑎᑎᖅᑲᕐᒥᑦ ᓈᒻᒪᒋᔭᐅᔪᒦᓐᓂᖓᓂ, WSCC Connect ᓇᒃᓯᐅᔾᔨᑲᐅᑎᒋᓂᐊᖅᑐᑦ ᐃᕐᖐᓐᓇᐅᑎᒃᑯᑦ ᑐᓴᐅᒪᑎᑦᑎᔾᔪᑎᒥ ᐊᑕᖃᓯᐅᑎᓗᓂ ᑎᑎᖅᑲᖅ ᑳᓐᑐᕌᒃᑎᐅᑉ ᖃᓄᐃᓕᖓᓂᕆᔭᖓᓄᑦ.
ᐱᓕᕆᐊᖅ 2 - ᑳᓐᑐᕌᒃᕈᑕᐅᔪᖅ ᐱᓕᕆᐊᖑᔪᖅ ᐱᔭᕇᖅᓯᒪᓕᕈᓂ
  • ᑭᖑᓪᓕᖅᐹᒥᑦ ᐊᑭᓖᓚᐅᙱᓐᓂᕐᓂ ᑳᓐᑐᕌᒃᑎᒋᔭᕐᓄᑦ, ᐊᑎᓕᐅᕐᕕᒃᑯᑦ ᐃᓯᕐᓗᑎ ᐅᕗᖓ  WSCC Connect ᐊᒻᒪᓗ ᑕᐃᑯᖓᕐᓗᑎ "Obtain a Clearance" (ᐊᔪᙱᔾᔪᑎᑖᕐᓂᖅ) ᓇᕿᒋᐊᓕᒃ ᑐᒃᓯᕋᕐᓂᕐᒧᑦ "Final Clearance Letter" (ᑭᖑᓪᓕᖅᐹᒥᑦ ᐊᔪᙱᑎᑕᐅᓂᕐᒧᑦ ᑎᑎᖅᑲᕐᒥ). 
  • ᑖᓐᓇ ᑎᑎᖅᑲᖅ ᓴᒃᑯᐃᑎᑦᑎᕗᖅ ᐃᓕᖕᓂ ᐊᑭᓖᑎᑕᐅᓂᕐᒧᑦ ᖃᐅᔨᓴᕐᓂᐅᔪᓄᑦ ᑳᓐᑐᕌᒃᒦᒋᐊᓕᖕᓂᒃ ᐃᒡᕕᑦ ᑲᒻᐸᓂᖓᓄᑦ ᐊᒻᒪᓗ ᐃᓕᖕᓂ ᐱᕕᖃᖅᑎᑦᑎᔪᖅ ᑭᖑᓪᓕᖅᐹᒥ ᐊᑭᓖᔪᓐᓇᕐᓗᓂ ᑕᐃᔅᓱᒧᖓ ᑳᓐᑐᕌᕐᒧᑦ. 
  • ᑭᖑᓪᓕᖅᐹᒥᑦ ᐊᔪᙱᑎᑕᐅᓂᕐᒧᑦ ᑎᑎᖅᑲᖅ ᐱᓕᕆᐊᖑᒐᔭᖅᑐᖅ ᐃᖅᑲᓇᐃᔭᕐᓇᐅᑎᓪᓗᒍ ᐅᓪᓗᓂ ᐱᖓᓱᓂ.
ᖃᓄᕐᓕ ᑳᓐᑐᕌᒃᑎᒐ ᐅᕝᕙᓘᓐᓃᑦ ᑳᓐᑐᕌᒃᑎᒃᑲᓐᓂᕋ ᓈᒻᒪᒋᔭᐅᔪᒦᙱᒃᑯᓂ? 

ᑳᓐᑐᕌᒃᑎ ᓈᒻᒪᒋᔭᐅᔪᒦᙱᒃᑯᓂ, ᓇᒃᓯᐅᔾᔨᕕᐅᑐᐃᓐᓇᕆᐊᖃᖅᑐᑎᑦ "Ineligible Letter" (ᐊᔪᖅᑎᑕᐅᓂᕐᒧᑦ ᑎᑎᖅᑲᕐᒥᑦ) ᐅᕝᕙᓘᓐᓃᑦ "Do Not Release Letter" (ᐱᒋᐊᖅᑎᑦᑕᐃᓕᒍᒃ ᑎᑎᖅᑲᕐᒥ). ᑕᒪᓐᓇ ᑐᑭᖃᖅᐳᖅ ᑳᓐᑐᕌᒃᑎ ᖃᐅᔨᒋᐊᕐᕕᖃᕆᐊᓕᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᒃᑯᓐᓂ ᖃᐅᔨᓇᓱᒡᓗᑎ ᖃᓄᐃᓕᐅᕆᐊᖃᕐᒪᖔᑦ ᐊᑐᖅᕕᖓ ᓈᒻᒪᒋᔭᐅᔪᒦᒃᑲᓐᓂᖁᓪᓗᒍ. ᖃᐅᔨᒪᔭᐅᓕ ᐃᖅᑲᓇᐃᔭᖅᑎᒧᑦ ᐋᓐᓂᖅᑐᖅᓯᐅᑎᓕᕆᔨᒃᑯᑦ ᐱᖁᔭᖅ ᐊᑖᒍᑦ, ᓇᖕᒥᓂᕆᔭᐅᔪᖅ ᓄᖅᑲᖓᑎᑦᑎᒍᓐᓇᖅᑐᖅ ᐊᑭᓕᖅᑕᐅᔾᔪᑎᒥ ᖃᔅᓯᐅᓂᖓᓂ ᐊᒥᐊᒃᑯᔪᓂ ᖃᐅᔨᓴᕐᓂᕐᒧᑦ ᐊᑭᓕᐅᑎᓂ. 

ᑭᓇᒧᑦ ᐅᖄᓚᒋᐊᖃᖅᐳᖓ ᑐᑭᓯᒋᐊᕈᑎᒃᓴᒃᑲᓐᓂᕐᓄᑦ?

ᐱᓕᕆᐊᖃᕐᓂᕐᒧᑦ ᒪᓕᒋᐊᓕᖕᓄᑦ ᑐᒃᓯᕋᕐᓂᕐᒥᑦ ᐊᔪᙱᑎᑕᐅᔾᔪᑎᒥ ᐅᕗᖓᕐᓗᑎ  ᐃᑲᔪᖅᑕᐅᓂᕐᒧᑦ ᒪᓕᒋᐊᓖᑦ.

ᐊᐱᖅᑯᑎᖃᕈᕕᑦ ᖃᓄᖅ ᐱᔭᕆᐊᖃᕐᒪᖔᖅᐱᑦ ᐊᔪᙱᑎᑕᐅᓂᕐᒧᑦ ᑎᑎᖅᑲᕐᒥᑦ, ᖃᐅᔨᒋᐊᕐᕕᐅᔪᓐᓇᖅᑐᑦ ᐃᖅᑲᓇᐃᔭᖅᑐᖁᑎᓕᖕᓄᑦ ᐱᔨᑦᑎᕋᖅᑎᒃᑯᑦ.
ᐃᖏᕐᕋᔭᒃᑐᓂᒃ ᐊᐅᓚᑦᑎᔨ
ᐊᕐᕌᒍ ᐊᓚᐃᓐᓇᖓᓂ ᓴᓇᔨᒧᑦ ᐊᑦᑕᓇᔾᔭᐃᖅᓯᒪᓂᖅ

ᐅᔭᐅᓕᕐᒥᖕᒪ, ᑕᒪᓐᓇ ᑐᑭᖃᖅᐳᖅ ᐊᖅᑯᓯᐅᕐᓂᖅ ᐱᓕᕆᐊᖑᓕᕐᒥᔪᖅ. ᐃᖅᑲᓇᐃᔭᖅᑎᖁᑎᖃᖅᑐᓕᒫᑦ ᐃᖅᑲᐃᑎᑦᑎᒋᐊᖃᖅᑐᑦ ᓴᓇᔨᖏᓐᓂᒃ ᐅᔾᔨᖅᓱᖃᑦᑕᖁᔭᐅᓗᑎᒃ ᐊᖁᓐᓂᖏᓐᓂᒃ, ᐱᓗᐊᙳᐊᖅᑐᒥ ᓇᑉᐸᖅᑎᕆᓂᕐᒧᑦ ᐃᓂᒋᔭᐅᔪᓂᒃ. ᑭᒃᑯᓕᒫᑦ ᐃᒃᐱᒍᓱᑦᑎᐊᕆᐊᓖᑦ ᐱᓕᕆᐊᒃᓴᕆᔭᐅᔪᓂᒃ ᓄᓇᒃᑰᕈᑎᓂᒃ ᐊᐅᓚᑦᑎᓂᕐᒧᑦ ᐃᓄᖁᑎᓂ ᐊᒻᒪᓗ ᑎᒃᑯᐊᖅᑕᐅᓯᒪᔪᑦ ᓇᓗᓇᐃᔭᐃᔩᑦ, ᐊᒻᒪᓗ ᖃᐅᔨᒪᑦᑎᐊᕆᐊᕐᓂᕐᒥᑦ ᒪᓕᑦᑎᐊᕋᓗᐊᕐᒪᖔᑦᑕ ᓄᓇᒃᑰᕈᑎᓄᑦ ᒪᓕᒐᕐᓂᒃ.

ᐃᖅᑲᓇᐃᔭᖅᑎᖁᑎᓖᑦ ᐊᒻᒪᓗ ᑲᒪᔨᐅᔪᑦ ᑲᒪᒋᔭᖃᓲᓂᑦ ᓄᓇᒃᑰᕈᑎᓂᒃ ᐊᐅᓚᑦᑎᓂᕐᒥᑦ ᐃᖅᑲᓇᐃᔭᖅᑎᓂ ᒪᑯᓂᖓ ᐊᑐᐃᓐᓇᐅᑎᑦᑎᔭᕆᐊᓖᑦ:
  • ᐊᑎᖓ ᐊᒻᒪᓗ ᖃᐅᔨᒋᐊᕐᕕᐅᔪᓐᓇᖅᑐᑦ ᑐᑭᓯᒋᐊᕈᑎᒃᓴᓂᑦ ᐃᖅᑲᓇᐃᔭᖅᑎᖁᑎᓕᖕᒧᑦ ᑲᒪᒋᔭᖃᖅᑐᒧᑦ ᐱᓕᕆᕝᕕᐅᔪᒥᑦ;
  • ᐃᖅᑲᓇᐃᔭᖅᑏᑦ ᖃᐅᔨᖃᑦᑕᐅᑎᑎᑕᐅᓗᑎᒃ;
  • ᐃᖅᑲᓇᐃᔭᖅᑏᑦ ᐊᓯᔾᔨᖃᑦᑕᖅᑕᖏᑕ ᐃᑲᕐᕋᖏᑦ;
  • ᖃᓄᐃᑦᑐᓂ ᐱᓕᕆᐊᖃᕐᒪᖔᑦ ᐱᓕᕆᕝᕕᖕᒥ;
  • ᖃᓄᐃᑦᑐᓂ ᓴᓇᕐᕈᑎᓂᑦ ᐊᑐᕐᒪᖔᑦᑕ, ᐊᒻᒪᓗ ᖃᓄᖅ ᐊᐅᓚᓂᖃᕐᓂᐊᕐᒪᖔᖅ;
  • ᐊᔾᔨᐅᙱᑦᑐᓂ ᖃᓄᐃᓕᖓᓂᐅᔪᓂᒃ ᐃᖅᑲᓇᐃᔭᕐᓂᕐᒧᑦ ᑳᓐᑐᕌᕐᒥᒃ ᐊᒻᒪᓗ ᐊᖅᑯᑎᒥ ᐊᑐᕐᓂᕐᒥᑦ; ᐊᒻᒪᓗ,
  • ᖃᓄᐃᑦᑐᓂ ᓇᖕᒥᓂᖅ ᐋᓐᓂᖅᑕᐃᓕᔾᔪᑎᓂᒃ ᐱᔭᕆᐊᖃᖅᐸᑦ ᐊᕙᑎᖓᓄᑦ ᐊᒻᒪᓗ ᐃᖅᑲᓇᐃᔭᕐᓂᕐᒥᒧᑦ ᖃᓄᐃᑦᑑᓂᖓᓄᑦ?
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᖃᖅᑐᑦ  ᒪᓕᒋᐊᖃᖅᑐᖅ ᐱᓕᕆᔾᔪᓯᐅᔪᓄᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᖅ ᓇᓗᓇᐃᔭᐃᓲᒥᒃ ᐃᖅᑲᓇᐃᔭᖅᑎᖁᑎᓕᐅᑉ, ᑲᒪᔨᐅᑉ, ᐊᒻᒪᓗ ᓴᓇᔨᐅᑉ ᑲᒪᒋᔭᕆᐊᓕᖏᓐᓂᒃ ᓄᓇᒃᑰᕈᑎᓂᒃ ᐊᐅᓚᑦᑎᓂᕐᒧᑦ ᓴᓇᔩᑦ ᒥᒃᓵᓄᑦ. ᐃᖅᑲᐅᒪᓂᐊᖅᐳᑎᑦ, ᑭᒃᑯᑭᓕᒫᑦ ᐱᓕᕆᒋᐊᓖᑦ ᐃᖅᑲᓇᐃᔭᕐᕕᒻᒥ ᐊᑦᑕᓇᔾᔭᐃᖅᓯᒪᓂᕐᒧᑦ, ᐃᖅᑲᓇᐃᔮᖅᐱᑦ ᐃᓚᒋᔭᖓ ᖃᐅᔨᒪᒋᐊᕐᓗᑎᑦ ᐱᓕᕆᐊᕆᔭᕆᐊᖃᖅᑕᕐᓂ.
ᐱᓕᕆᔾᔪᑎᒃᓴᑦ ᓯᕗᓂᒃᓴᒥ: ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᖅ

ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᑦ ᐊᑕᐅᓯᕐᒥᒃ ᒪᕐᕉᖕᓄᑦ ᒪᑉᐱᖅᑐᒐᐅᔪᑦ ᓴᖅᑭᑎᑕᐅᒍᓐᓇᖅᑐᑦ ᐸᐃᑉᐹᑦ (PDF) ᐃᓚᖃᖅᖢᑎ ᑐᑭᓯᒋᐊᕈᑎᒃᓴᓂᑦ ᐊᔾᔨᒌᙱᑦᑐᓄᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᐅᓯᐅᔪᓂᑦ. ᓴᖅᑭᔮᖅᑎᑦᑎᓲᑦ ᐊᑦᑕᕆᔭᐅᔪᓂ ᐃᖅᑲᓇᐃᔭᕐᕕᖕᒥ, ᐱᔾᔪᑕᐅᑐᐃᓐᓇᕆᐊᓕᖕᓂᒃ ᐱᕐᕈᓗᐊᕿᓂᕐᒧᑦ, ᐊᒻᒪᓗ ᐱᓕᕆᐊᖑᔭᕆᐊᓕᖕᓂᒃ ᑕᐃᒪᐃᑎᑦᑎᑦᑕᐃᓕᒪᓂᕐᒧᑦ.

   

ᒪᕐᕉᒃ ᐱᔾᔪᑎᒃᓵᒃ ᐊᑐᕐᓂᕐᒧᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᕐᓂᒃ:
  1. ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᑦ ᐃᑲᔫᑎᒃᓴᑦᑎᐊᕙᐅᔪᑦ ᑐᕌᖓᕈᑕᐅᓗᓂ ᐅᓪᓛᒃᑯᑦ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᕐᒧᑦ! ᐃᖅᑲᓇᐃᔭᕐᕕᓕᒫᑦ ᐅᖃᖃᑎᒌᒐᔪᖃᑦᑕᕆᐊᓖᑦ ᐊᑦᑕᓇᔾᔭᐃᖅᓯᒪᓂᕐᒧᑦ, ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᑦ ᐃᑯᔫᑎᒃᓴᐅᕗᑦ ᐱᒋᐊᕐᖓᐅᑎᒋᔭᐅᔪᓐᓇᖅᑐᑦ ᐅᖃᖃᑎᒌᓐᓂᕐᒧᑦ.
  2. ᑖᒃᑯᐊ ᐅᖃᓕᒫᒐᑦ ᓴᖅᑭᔮᖅᑎᒍᓐᓇᖅᑕᑎᑦ ᑲᒻᐸᓂᑉᐱᑦ ᑐᓴᖅᑎᑦᑎᒋᐊᕈᑎᖓᑕ ᓴᖅᑭᔮᕐᕕᖓᓂ. ᐃᓚᓯᓗᓂ ᐅᖃᓕᒫᒐᕐᓂᒃ ᐃᓄᓕᒫᓄᑦ ᓴᖅᑭᔮᑦᑎᐊᖅᑐᒥ ᐃᓂᒋᔭᐅᔪᒥᑦ ᑕᑯᔭᐅᓴᕋᐃᒍᓐᓇᖅᑐᖅ ᐃᖅᑲᐃᑎᑦᑎᒋᐊᕐᓗᓂ ᐃᖅᑲᓇᐃᔭᖅᑎᓂᒃ ᐱᓕᕆᐊᕆᔭᕆᐊᖃᖅᑕᖓᓂ ᐃᖅᑲᓇᐃᔭᕐᕕᖕᒥ ᖃᓄᐃᑎᑦᑎᑦᑕᐃᓕᒪᓂᕐᒧᑦ ᐊᒻᒪᓗ ᐋᓐᓂᖅᑎᑦᑎᑦᑕᐃᓕᒪᓂᕐᒧᑦ. 
ᑕᑯᔪᓐᓇᖅᑕᑎᑦ ᑎᑎᕋᖅᓯᒪᔪᑦ ᐊᑐᐃᓐᓴᐅᔪᓂᑦ ᐅᖃᐅᓯᐅᔪᓐᓇᖅᑐᓂ ᐅᕙᓂ  ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᖅ ᒪᑉᐱᖅᑐᒐᖓᓂ ᐃᑭᐊᖅᑭᕕᑦᑎᓐᓂ. ᑎᑎᕋᖅᓯᒪᔪᖁᑎᖃᖅᑐᒍᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᕐᓂᒃ, ᐊᔾᔨᓪᓗᐊᑕᖏᓐᓂᓪᓗ ᑎᑎᖅᑲᓂᑦ ᓴᖅᑭᑕᐅᓯᒪᔪᓂᑦ ᓯᓚᑖᓂᙶᖅᑐᓂᒃ ᐱᓕᕆᕝᕕᓐᓂ. ᐅᓪᓗᒥ ᒪᑉᐱᖅᑐᒐᕗᑦ ᑕᑯᒋᐊᕐᓗᒍ ᖃᐅᔨᒋᐊᕐᓗᑎᑦ ᐅᖃᐅᓯᐅᔪᓕᒫᓂᒃ ᑐᕌᖓᔪᓂᒃ ᐃᒡᕕᑦ ᐃᖅᑲᓇᐃᔭᕐᕕᖓᓄᑦ. ᐅᖃᐅᓯᐅᔪᓂᑦ ᒫᓐᓇᐅᔪᖅ ᐊᑐᐃᓐᓇᖅᑕᖃᙱᒃᑯᓂ, ᑭᓯᐊᓂ ᐃᑲᔫᑎᖃᕋᔭᕈᓂ ᐃᒡᕕᑦ ᐃᖅᑲᓇᐃᔭᕐᕕᖓᓄᑦ, ᐊᑏ ᖃᐅᔨᒋᐊᕐᕕᐅᑕ.

ᐊᑦᑕᓇᔾᔭᐃᖅᓯᒪᓂᕐᒧᑦ ᐅᖃᓕᒫᒐᑦ ᐃᑲᔫᑎᒃᓴᑦᑎᐊᕙᐅᑎᓪᓗᒋᑦ ᐱᒋᐊᕈᑎᖃᕐᓂᕐᒧᑦ ᐅᖃᖃᑎᒌᓐᓂᕐᒧᑦ, ᐃᓚᖃᙱᑦᑐᑦ ᐃᓗᐃᑦᑑᓕᖓᔪᓂ ᖃᓄᐃᓕᖓᓂᕆᔭᖓᓂ ᐅᖃᐅᓯᐅᔪᒥ. ᓇᓗᓇᐃᔭᖅᓯᒪᑦᑎᐊᖅᑐᓄᑦ ᐃᑲᔫᑎᒃᓴᓄᑦ ᐊᔾᔨᒌᙱᑦᑐᓄᑦ ᐅᖃᐅᓯᐅᔪᓄᑦ, ᑕᑯᒋᐊᕐᓗᒍ ᒪᓕᒋᐊᖃᖅᑐᑦ ᐱᓕᕆᔾᔪᓯᐅᔪᓄᑦ ᒪᑉᐱᖅᑐᒐᕗᑦ.
ᐊᒡᓚᒡᕕᑦ ᒪᑐᓯᒪᓂᖏᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᒡᓚᒡᕕᖏᑦ ᒪᑐᓯᒪᓛᖅᑐᑦ ᓯᕕᒃ ᕿᑲᕐᓇᒥ ᓇᒡᒐᔾᔭᐅᒥ, ᐋᒡᒌᓯ 5-ᒥ. ᐊᒡᓚᒡᕕᒃ ᒪᑐᐃᒃᑲᓐᓂᓛᖅᑐᖅ ᐊᐃᑉᐹ, ᐋᒡᒌᓯ 6-ᒥ 8:30 ᐅᓪᓛᒃᑯᑦ.

ᐅᖃᓗᒋᑦ 1-800-661-0792-ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.

ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ WSCC Connect.
wscc.nt.ca   /  1.800.661.0792   *   wscc.nu.ca  /  1.877.404.4407