NIQILIQIVIK 2017                                                                FRANÇAIS
ILIHIMAVIT?
ILGAAT ATIMAYUT PATIKTIHIMAPLUGIT IINGNI HAVAKVIKMI

Ukuat SafetyNet (Aanniqtailiqiyit) havaktiit qangannuaq takuhimayut maligaptiknik ihumagiyaqqut ilitturipkaqtitauyukhaq itqaumatjutauluni, taimaatut uqautauraanginnaqtaunginmat. Takuhimaguvit aanniqtailinikkut maliganik ihumagiyatit quvianaqtut, ilihimalluaqtaungittut, naunaiyarumayatilluunniit, titiqqitjavaptigut qaritauyauyakkut; quviahungniaqtugut uqautigiyaami hivunikhani makpiraanginni SafetyNet!

Hapkunani upluni, ilgaat atimayut patiktihimaplugit iingni atuqtauraanginnaqtut inungnin takpikhiyaamikni. Ihuaqtut: hitualaittuk qingarni, patulaittuk, tammailimaitatillu atigupkik, hiqinirhiutiklu, aanniqtailinikkut ilgaak, ukuakluunniit aanniqtailinikkut anurhaangittuk ilgaak atimattauttaaqtut qulaani.

Kihimi: ilihimavit havakkuvit havakvikmi pitquyauhimaplutit atimatquyauplutit iingni akuliamiluunniit hapummitjutikhamik, una OHS Maligaghat uqarhimayut taapkuat ilgaat atimayut patiktihimaplugit iingni atimayauyukhaungittuk? (Takulugu OHS Maligaghat NT uvanilu NU, s.97 (4).)

Ihumagiyungnarhivutit naammaktuq atimayaamik inungmun hapummitjutikkut ikayuutinik (PPE) qaangani ilgaat atimayut patiktihimaplugit iingni, atimaniq ilgaanik patiktihimaplugit iingni ihuirutauttaaqtuq aanniqtauguvit. Aanniqtittaaqtatit iikkit atimahimaguvit ilgaat atimayut patiktihimaplugit iingni pipkaqtittaaqtuq akuniraaluk pitjutinik angikliyuummiqtirlugulu qayangnarnirmun iingnun taimainnirmun piiyaqtukhaugavit ilgaaknik pitinnatit aannirnikkut ikayuutinik.

Takulugu makpiraaqarvikput uvani Aanniqtailinikkut Maligani piyaami Havakvikni Aanniaqtailinikkut Aanniqtailinikkullu Maligat Nunatsiamun Nunavunmullu.
HUNAT NUTAANGUYUT?

Uumani tatqiqhiutimi katitirutini, naunaiqtittugut malruuknik nutaanik maligutinik havaknikut, itqaumaquplugillu havaktiit aallani aanniqtailinikkut aturutiknik havakvikni.

Maligutit havaknikkut tunivaktut ihuaqtunik, naunaiyaqpiarhimayunik hivulliutjutinik kituni uqaqtauyuni ikayuriami havaktipkaiyinik havaktiniklu kangihihimayaanginni angummatjutigilugillu aanniqtailinikkut aturutik pitquyauhimayut maligaptikni. Aulahimmaaraanginnaqtugut tuniqhaipluta nutaanik maligutikhanik; takulugu   Maligutit Havaknikkut makpiraaptiknik aallanik.

NUTAAQ MALIGUTI HAVAKNIKKUT: OHS PINAHUARUTIT



Piliurniq uuminnga Havakvikni Aanniaqtailinikkut Aanniqtailinikkullu Pinahuarutikhamik havakviknun inniarungnarhiyuq ayurhaqtumik havaakhaq, kihimi hamaniittugut ikayurumaplutit talvuuna. Una nutaaq maliguti havaknikkut uvani Havakvikni Aanniaqtailinikkut Aanniqtailinikkullu Pinahuaruti hivulliurniaqtait atannguyat pivallialiurnirmi uuminnga aanniqtailinikkulu pinahuarutimi ihuarhaqtauhimayuq ihariagiyauyunun havakviknin. Uvani maliguti havaknikkut, ilitturiniaqtutit:
    • Hunaungmat OHS Pinahuaruti qanuqtullu ikayurutiqaqtuq havakviknun;
    • Qanuqtun piliuriaqaqtatit aanniaqtailinikkut aanniqtailinikkullu maligaghatit;
    • Munariniqarutait atannguyat, angayukhiit, havaktiinnilu iluani OHS Pinahuarutimi pitjutingani;
    • Qayangnaqtunik naunaiyaqniq, qauyiharniq, amirinianiklu;
    • Qanuqtun piliuriami Amigarnarhinirmut Ikayuriaqtuutikkut Hivunikhamik; imaalu
    • Qanuqtun havagutigilugit qanuriliuqtauhimatjutit ihiviurhilunilu. 

NUTAAQ MALIGUTI HAVAKNIKKUT: TANGMAAQVIKHANIK UPALUNGAIYARNIQ MUNARINIQLU



Una Tangmaaqvikhanik Upalungaiyarniq Munarinirniklu maliguti havaknikkut aturutiqaqtuqquyaginnanun havaktipkaiyinun pipkaiyumayut iliuraqnirnik ungahiktuni havakvikhanik havakgutimiknik. Tunivaktuq hivulliutjutikhanik tangmaaqvikhanik upalungaiyarnirnik munarinirniklu nakuutqiyauyunik havagutinik tunihimayuqlu pitjutiqaqtunik atatjutinik aturutikhaniklu. Una maliguti havaknikkut uqautigiyait:
    • Piniit ihuaqtunik havaktauyukhanik tangmaaqvikhanikluunniit, uplukhainniklu piyukhat piyaami laisikhanik angirutiniklu tangmaaqvikhat angmaqtinnagit;
    • Qanuritjutikhat ihumagiyauyukhat, imaakiaq: havaknikkut hivitunikhaa tangmaaqvikhami (ilainnangani/ukiuq tamaat); tahamaniinningan (tahamaniillakaffukluni/tahamaniiraanginnarluni); angitilaanga tangmaaqvikhami ihariaginiq; upaktaunikkut (ingilratjutikhaitigut ihariagiyauyut).
    • Maligaghat, qayangnaqtut, qayangnarhittaaqtullu havaktipkaiyiit ihumagiyakhait hivunikhaliurutini;
    • Aanniaqtailinikkut, aanniqtailinikkut, avatikkullu ihumaaluutigiyauyut hulaqutiniaqtut aannirnainninganun tangmaaqvikharni upalungaiyarningani; imaalu
    • Ihuaqtut pitjutikhat ihariagiyauyut havagiami, niriyaami, hinikvikhanilu. 
NAKUUQPIAQTUQ! PIKSAKHAT HAVAKVIKNUN

Malikkupta Facebook-mi Twitter-miluunniit, takuyariirungnarhiyatit hapkuat, kihimi ilihimavit tuyuqtaaqtugut piksakhanik havaknun?

Uqarhimapluta ukunani hivuagut makpiraani uvani SafetyNet-mi , havakvikni aanniqtailiniit nakuuqpiaqtuq, aannirnaittuqlu itqaumaqunikkut havaktiknik huuq havagaanginnaqtukhat aanniqtailiplutik. Hapkuat piksakhat manimayut Qaplunaatut, Uiuitun, Inuktitut, Inuinnaqtunlu; uqaqatigiluta piyaami tamainnik ilaliutigulu titiqqitjutit.


          
AUYAMI AANIQTAILINIKKUT NAUNAITKUTIT

Auyat Ukiuqtaqumi naitpallaanguvaktut, taimaatut Ukiuqtaqtumiut quviahuutigiqpiaqpaktait. Naliinni quviahuutigitjutikni imarmi, nunami, tangmaaqvikmiluunniit ilauyut ilannatit ilagiyatilluunniit, upalungaiqhimayukhauyutit. Aanniqtailiniq tamainnin munaritjutiqaqtuq, havakviinnaungittumilu - ilauyukhauyuq tamainnik huliyaptikni.

NUNAMI: PIHUGAANGAT / PUKUKNIKKUT AANNIQTAILINIIT

Quviahuktilluta naluyauyuq tuktuit niqautainnik (mushroom) pukuktuq Yellowknife-mi utiqtuq aanniqhimaittumik atulihaaliqtillugu July, itqaumapkaiyuq itquumayumik kinaliqaak pihuktuq nunami maligaanginnaqtakhait hapkuat aanniqtailinikkut naunaitkutit:

    • Aullaqtinnatit, unniutilugu kinami humut pihungniarhimayutit qakugulu utirniarhimayutit.

    • Upalungaiyarniq nakuutqiyauyuq: ilihimalugu nuna aullaarvikhat upalungaiyaqlutit aannuraaqtuqlutillu maliklugu. Ilihimalugu hila niriuktauyuq aullaqtinnatit.

    • Pihimalutit uqautjutikhanik: satellite hivayautit nakuutqiyauyut, kihimi quyaginnait uqautikhat nakuuyut piqanginnirmin.

    • Pihimalutit GPS-mik ilihimalutillu qanuqtun hanaqitjutaanik. Pihimalutit aallanik paatuliikhaniklu.

    • Nakhaqlutit hunamik qaumayumik, qaummaaqtumik, qiplakkaaqtumikluunniit, aannuraamikiaq mikkauyumikluunniit tariyaunmik atuqtaaqtat ilitturipkarlugit qinirhiayut tingmitini nunamiluunniit.

    • Aullauqatiqaqlutit pittaaqpat. Pukuliruvit qinirhiaguvilluunniit, nakuutqiyauyuq malruuktaruffi piliurluhilu atauttikkut naunaitkutikhamik.

    • Nakhaqlutit aannirnikkut ikayuutikhanik. Ilaqattainnaqpaklugu aannirnikkut ikayuutikhatit qakugunnguraangat.

    • Nakhaqlutit naamyunik niqinik imarniklu. Imarmik halummarhitjutikhat ikayuutauniaqtut aullaarhimaguvit imait haniani.

    • Upalungaiqhimalutit qayangnarnirnun: ulamnauguvit, aanniruvit, naluliruvilluunniit, puukattarni nakhaqhimalutik ihariagiyauyunik; qinirhiayiit nalvaahainnalimaitkungnarhiyaatit.
IMARMI: QAYAQTURNIQ QAYANGNAITTUMIK
    • Taimatut aullaaliruvut humulliqaak, kinamun ilitturipkaitjavutit qayaqtuqtinnatit humungaunahuarutiknik qakugulu utirutikharnik.

    • Ilihimalugu humungauvikhat: ilitturilugu nuna, naunaiyaqlugit nunami naunaitkutit tamahamnilu qayariyauyukhat.

    • Hannaiyaqlutit hivuagut uplaunaiqhimalutillu: ilitturilugu hila qanurittukhauyuq, ihumaliurutigilugillu niglaumania/uunarnia, anuri, maliuplu anginingit (Environment Canadaup Imarmi Hilakkut Qanurittukhat ikayuqtaaqtuq). Naghaqlutit aannuraaqhimalutillu maliklugu.

    • Naghaqlutit naammayunik tamayakhanik hivitunianun qayaqturniup, ukuningalu amigarnarhikpat ikayurutikhanik.

    • Imarmi qayangnaittumik: piqaraluaqhuni naammayunik PFD-nik (inuup puqtallaarutikhainnik) tamainnun inungnun qayarmi, ilihimalutit tamaita PFD-t nakuuyut naammagiyauyut inungmun atuqtumun. Pipkarlugit tamaita qayaqtuqtut atimaraanginnaqtait - ihumagihuiqlutit atiyaaqtat amigarnarhikpat.

    • Qayangnaittumik tamayakhat: ilihimalutit humi tutquqhimayut aallat PFD-t qayarmi, aallallu qayangnaittumik tamayakhat, imaatut, pautit, kuummiuhaaruti/ququuruti, akhunaaq, qaluraut. Naunaiyaqlugit qanuqtut aturiami qayangnaittumik tamayakhat pihimayatit.

    • Ilihimalugu qayat qanuqtullu aturutaanik. Ihivriuqlugu aullaqtinnatit nakuuyaakhaanik. Naghaqlutit avatquhimayunik kaasiliinik, aallamiklu paatuliikhamik, aallamiklu ingniqutikhamik.

    • Pihimalutit uqarutikhanik, naliinnik ukuninnga satellite hivayautimik qayaqturumikluuunniit naalautimik. Pittaaqqat, pihimainnaraanginnarlugu satellite hivayaut - qinirhiavikhaqalimaitkungnarhigavit amigarnarhikpat.

    • Ayuirhaqlutit puuvyariami, ilihimalutillu kitkut qayarni puuvyalimaittut. Tamaita atimayukhat puktallaarutinik, kihimilu piqpiaqtukhauyut taapkuat puuvyalimaittut.
     
IKUALAARNIRNI QAYANGNAITTUMIK

Havakvikmi:
 
  • Ikualaarnikkut ukkuat havakvikni qanuriliurutiqaqtuq ukkuaqtauhimayukhallu: pipkaivaktut tunmiqqanik puyuqangittaanginni ingniqangittaanginnilu ikualaarnirmi, pipkaivaktullu qayangnaittumik anivikhanik inungnun 
  • taimaatullu qaptiriyiit itirvikhainnik. Ukkuaqhimavaklugit: takuhimaguvit ilanginnik ukkiungaaqtitauyut ilaani, unniutigilugu OHS Katimayiinnun uumungaluunniit qayangnaittumik havaktingnun, ilitturipkaiyaanginnik igluqpaup atannguyaanun.
     
  • Ilihimalugut huummiittaakhaita qaptiritjutinik havakvikni, qanuqtullu aturninganik. Ihivriuraanginnarlugit qaptirutitit: uuktuqpaklutit ukiuq tamaat
     
Aihimavikmi:
    • Uuktuqattaqpaklugit ikualaarnirni qayangnaittumik hivunikhat upalungaiyarhimatjutikhallu ilagiyarni. Piliuqlutit katiyaqtuqvikharnik tamainnun ikualaaqtuqaqqat, pipkailutillu ikualaarnikkut ayuirharutikhanik qanuriliurutikhanik nutaqqaffingnun.
    • Piqarlutit qaptiriyimik; ilihimannaittuq qakugu ihariaginiaqtat. Ayuirhaqtillugit tamaita iglumiutat qanuqtut aturiami, humilu tutquumavianik. Ihiviriuqtitauvaklugu ukiuq tamaat.

     
    • Halummaqtiqpaklugu panirhiivingni piluryavaliut - ikittarikpiaqtuq. Hummaqtirlugit panirhiiviup turhuanga tamaat hilatiknun igluqpangni atauhirmi ukiumi amigaitqiyanikluunniit.

     
Tangmaarvikmi:
    • Qamitpiarlugut kikhuukvit qimaktinnagu tangmaarviit. Kikhuukvit ighinnaruiqlugu munaqtiqangittumik.
     
    • Iglunnuamik nakhaqtaqaruvit tangmaarvikni, ikittariktut ukualluunniit propane-mik puplaktuqtut ahiniitpaklugit kikhuukvikmin.
     
    • Nakuuyumik qaptirutimik haningniittukhaq.
HAVAKVIKMI UMIKHIMAVIKHAQ

WSCC-kut havakviit umikhimaniaqtut Inungni Haalatiirutaani, Hivulliunmi, August 7, angmaffaalutiklu, Aippiunmi, August 8, 8:30 uplaami.

Unniriami qayangnaqtumik havakvikmi aannirnirmik hulinirmikluunnii, hivayaqlutit 1-800-661-0792.


wscc.nt.ca   /  1.800.661.0792   *   wscc.nu.ca  /  1.877.404.4407