9 Մայիս, 2019

ԱՌԱՋՆՈՐԴ ՍՐԲԱԶԱՆ ՀԱՅՐԸ ԼԻԲԱՆԱՆ ՃԱՄԲՈՐԴԵՑ

Ազգային Կեդրոնական Վարչութեան Քաղաքական եւ Կրօնական Ժողովներու անդամներ ժողով կը գումարեն Անթիլիասի մէջ։ Երէկ, երկու Ժողովները իրենց մեծարանքի տուրքը տուին Շուշիի ազատագրութեան յիշատակումին (8 Մայիս, 1992)։

Երկուշաբթի, 6 Մայիսի երեկոյեան, թեմիս բարեջան առաջնորդ` Գերշ. Տ. Անուշաւան արք. Դանիէլեան մեկնեցաւ Անթիլիաս, ուր կը մասնակցի Ազգային Կեդրոնական Վարչութեան Քաղաքական եւ Կրօնական Ժողովներու նիստերուն։ Առաջնորդ Սրբազան Հայրը Շաբաթ օր պիտի վերադառնայ Միացեալ Նահանգներ։

ՔԵՆԵԹԻՔԸԹԻ Ս. ՍՏԵՓԱՆՈՍ ԵԿԵՂԵՑՒՈՅ 94ԱՄԵԱԿԸ

Կիրակի, 5 Մայիսին, Նիւ Պրիթընի (Քենեթիքըթ) Ս. Ստեփանոս եկեղեցին ծուխի 94րդ ամեակը նշեց։ Ճաշկերոյթին ընթացքին, Ազգ. Առաջնորդարանի կողմէ գնահատագիրներ յանձնուեցան երգեհոնահար ու դպրապետ` Սիւզըն Շահպազեանին, Տիկնանց Միութեան ատենապետուհի` Սէնտի Ասատուրեանին եւ երէցկին Մարկրէթ Ստեփանեանին՝ իբրեւ գնահատանք եկեղեցւոյ հանդէպ անոնց նուիրումին ։

ՆԻՒ ՃԸՐԶԻԻ Ս. ՎԱՐԴԱՆԱՆՑ ԵԿԵՂԵՑՒՈՅ 60ԱՄԵԱԿԸ

Կիրակի, 5 Մայիսին, Անուշաւան արքեպիսկոպոս պատարագեց ու քարոզեց Ս. Վարդանանց եկեղեցւոյ մէջ (Ռիճֆիլտ, Նիւ Ճըրզի)՝ եկեղեցւոյ օծման 60ամեակի առիթով

Յ ոբելինական ճաշկերոյթին ընթացքին, մեծարանքի արժանացան Սարաճեան, Նաճարեան, Միրաքեան եւ Կարապետեան ընտանիքները, որոնք սերունդէ սերունդ շարունակած են մնալ եկեղեցւոյ հաւատարիմ ծխականներ ու աջակիցներ։ Վերը՝ չորս ընտանիքներէն ներկայացուցիչներ՝ (ձախէն աջ՝ Եսթեր Կարապետեան, Մարկրէթ Էնթրըփ (Միրաքեան), Սալի եւ Ճոն Նաճարեան, եւ Արաքս Սարաճեան )՝ Առաջնորդ Սրբազան Հօր, Տ. Յովնան քհնյ. Պօզոյեանի եւ հոգաբարձութեան ատենապետ՝ Պօղոս Մինոյեանի հետ։

Ճաշկերոյթէն տեսարան մը

Անուշաւան արքեպիսկոպոս եւ հոգաբարձութեան անդամները

Տ. ԱՆԴՐԱՆԻԿ Ա. ՔՀՆՅ. ՊԱԼՃԵԱՆ ԿԸ ՆԵՐԿԱՅԱՑՆԷ  ԱՐԵՒԵԼԵԱՆ ԹԵՄԸ

Ս. Ստեփանոս եկեղեցւոյ (Ուոթըրթաուն, Մասաչուսեթս) հոգեւոր հովիւ՝ Տ. Անդրանիկ Ա. քհնյ. Պալճեան (ձախ)՝ Արեւելեան թեմի (էջմիածնական) առաջնորդ՝ Հոգշ. Տ. Դանիէլ վրդ. Ֆնտըքեանի (կեդրոն) եւ Ուոթըրթաունի Ս. Յակոբ եկեղեցւոյ հոգեւոր հովիւ՝ Տ. Առաքել քհնյ. Ալճալեանի հետ։

Ս. Ստեփանոս եկեղեցւոյ (Ուոթըրթաուն, Մասաչուսեթս) հոգեւոր հովիւ Տ.Անդրանիկ Ա. քհնյ. Պալճեան Արեւելեան թեմիս ներկայացուցիչն էր՝ անցեալ շաբաթ Պըրլինկթըն (Մասաչուսեթս) տեղի ունեցած Արեւելեան թեմի (էջմիածնական) ընդհանուր ժողովին։ Ընդհանուր ժողովի հիւրընկալն էր՝ Ուոթըրթաունի Ս. Յակոբ եկեղեցին։ Տ. Անդրանիկ, որուն ներկայութիւնը ջերմօրէն ընդունուեցաւ Ընդհանուր Ժողովին կողմէ, հետեւեալ ուղերձը յղեց. «Խօսքերը անբաւարար են արտայայտելու այն հրճուանքն ու պատիւը, զորս կը զգամ ընտրուած ըլլալով ներկայացնելու Գերշ. Տ. Անուշաւան արք. Դանիէլեանը եւ ԱՄՆի Արեւելեան թեմը։ [Թեմիս] մեր նորընտիր առաջնորդը իր անկեղծ ու սրտանց ողջոյնները կը յղէ [Արեւելեան թեմի (էջմիածնական)] մեր նորընտիր առաջնորդին, ինչպէս եւ իր աղօթքները՝ յաջող ու արդիւնաւէտ Ընդհանուր Ժողովի մը կայացման եւ անոնց հիանալի նախորդներուն՝ Խաժակ արքեպիսկոպոսի եւ Օշական արքեպիսկոպոսի հաստատած սիրալիր անձնական յարաբերութեան շարունակութեան համար։ Ինծի ծանօթ հոգեւոր եղբայրները, ինչպէս եւ աւագ երեսփոխաններէն ոմանք, գիտեն, թէ միշտ եղած եմ ու պիտի շարունակեմ ըլլալ մեր՝ որպէս Եկեղեցի բուժման ամուր պաշտպանը՝ թէ՛ Միացեալ Նահանգներու մէջ եւ թէ՛ աշխարհի տարածքին։ Իբրեւ 43 տարուան քահանայ, խորապէս կը հաւատամ, որ մեր իսկական փրկութիւնը իբրեւ ազգ, իբրեւ եկեղեցի եւ իբրեւ ժողովուրդ մեր միասնութեան մէջ է՝ մեր ոգեկան մէկութիւնը եւ մեր կամքի միութիւնը՝ մէկ ընտանիք, մէկ եկեղեցի, մէկ ժողովուրդ ըլլալու, Աստուծոյ սիրով ու շնորհքով բուժուած ու ամբողջացած»։ 

ԶԱՏԿՈՒԱՆ ԶԱՄԲԻՒՂՆԵՐՈՒ ԲԱՇԽՈՒՄ

Բագարան գիւղի միջնակարգ դպրոցի աշակերտներուն չփճացող ուտելիքի ծրարներ բաժնուեցան Զատկուան օրերուն

Ըստ բարերարուհիի ցանկութեան, Ս. Լուսաւորիչ Մայր Եկեղեցւոյ հոգեւոր հովիւն ու հոգաբարձութիւնը «Ազատուհի Զարուկեան» հիմնադրամի միջոցով առատաձեռն նուիրատուութիւն մը կատարեցին, Հայաստանի Բագարան գիւղի միջնակարգ դպրոցի աշակերտներուն եւ անձնակազմին` աւելի քան 100 Զատկուան զամբիւղներ բաշխելով։ Յունուարին, նոյն բարերարուհին հովանաւորած էր համակարգչային բաժնի մը հաստատումը միեւնոյն դպրոցին մէջ։ Բագարանը կը գտնուի Թուրքիոյ սահմանին եւ Արաքս ու Ախուրեան գետերուն մօտ։ Աւելի քան 30 փաունտ կշռող ծրարները կը պարունակէին չփճացող ուտելիքներ, ինչպէս բրինձ, շաքար, սիսեռ, ձիթապտուղ, իւղ, շոքոլա, եւ փոշի կաթ ու հաւկիթ։ Ծրարները գնելու, պատրաստելու եւ բաշխելու աշխատանքին հսկած էր «Մեծն Ներսէս» բարեսիրական կազմակերպութիւնը, որ աւելի քան քառորդ դարէ ի վեր Ազգ. Առաջնորդարանի հովանիին տակ կը գործէ Հայաստանի մէջ ։

ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ

Ընթերցումներուն մասին. Երկուշաբթի, 29 Ապրիլէն մինչեւ Հոգեգալուստ (9 Յունիս), իւրաքանչիւր օր չորս աւետարանները հետեւեալ կարգով կը կարդացուին. 1) Առաւօտեան՝ Ղուկաս, 2) Կէսօրին՝ Յովհաննէս, 3) Երեկոյեան՝ Մատթէոս, 4) Երեկոյեան աւարտին՝ Մարկոս։ Հոգեգալուստին, չորս աւետարանները կը կարդացուին մինչեւ խաչելութեան պատումը։ ԳՈՐԾ. 13:16-43 Պօղոս ոտքի ելաւ, ձեռքով նշան ըրաւ որպէսզի լռեն, եւ ըսաւ. – Ո՜վ Իսրայէլացիներ եւ աստուածավախ մարդիկ, մտի՛կ ըրէք: Այս ժողովուրդին՝ Իսրայէլի Աստուածը, ընտրեց մեր հայրերը, բարձրացուց մեր ժողովուրդը՝ որ Եգիպտոսի մէջ որպէս պանդուխտ կ’ապրէր, եւ իր մեծ զօրութեամբ զանոնք հոնկէ հանեց: Շուրջ քառասուն տարի անապատին մէջ կերակրեց զանոնք: Ապա Քանաան երկրի բնակիչ եօթը ազգերը պարտութեան մատնելով՝ անոնց երկիրը մեր ժողովուրդին տուաւ որպէս ժառանգութիւն: Այս բոլորը եղան մօտաւորապէս չորս հարիւր յիսուն տարիներու ընթացքին: Այնուհետեւ դատաւորներ տուաւ անոնց, մինչեւ Սամուէլ մարգարէի ժամանակը, երբ մեր ժողովուրդը թագաւոր ուզեց, եւ Աստուած թագաւոր կարգեց Սաւուղը, Կիսի որդին, որ Բենիամինի ցեղէն էր, քառասուն տարուան համար: Սաւուղէն ետք անոնց վրայ թագաւոր կարգեց Դաւիթը, որուն մասին նաեւ վկայեց, ըսելով. «Դաւիթը, Յեսսէի որդին, սրտիս խօսող անձն է, որ ամբողջութեամբ իմ կամքս պիտի կատարէ»: Անոր սերունդէն էր որ Աստուած Իսրայէլի տուաւ իր խոստացած Փրկիչը՝ Յիսուսը: Բայց նախքան անոր հրապարակ գալը, Յովհաննէս Իսրայէլի ամբողջ ժողովուրդին կը քարոզէր որ ապաշխարեն եւ մկրտուին: Եւ իր պաշտօնը լրացնելու ժամանակ, Յովհաննէս ըսաւ. «Ո՞վ կը կարծէք զիս: Ես ձեր սպասած անձը չեմ: Ահա ինձմէ ետք կու գայ անիկա, որուն կօշիկները հանելու իսկ արժանի չեմ ես»: Եղբայրնե՛ր, Աբրահամեան տոհմի զաւակներ եւ ձեր մէջ գտնուող աստուածավա՛խ մարդիկ. փրկութեան այս պատգամը Աստուած ձեզի՛ ղրկեց: Որովհետեւ Երուսաղէմի բնակիչները եւ իրենց իշխանները չճանչցան Յիսուսը, եւ զայն դատապարտելով՝ կատարած եղան խօսքը մարգարէներուն, որ ամէն Շաբաթ օր կը կարդային: Եւ թէպէտ մահուան արժանի յանցանք մը չգտան անոր վրայ, սակայն Պիղատոսէն պահանջեցին որ սպաննուի: Երբ անոր մասին բոլոր գրուածները կատարած եղան, զայն խաչէն իջեցուցին եւ գերեզման դրին: Բայց Աստուած զայն մեռելներէն յարուցանեց, եւ Յիսուս բազմաթիւ օրեր երեւցաւ անոնց՝ որոնք իրեն հետ Գալիլեայէն Երուսաղէմ եկած էին, եւ որոնք հիմա իր վկաներն են ժողովուրդին առջեւ: Մենք ալ, ահա, ձեզի կ’աւետենք, թէ Աստուած մեր հայրերուն տուած իր խոստումը կատարեց մեր օրերուն, որ անոնց որդիներն ենք: Այդ խոստումը կատարեց՝ Յիսուսը յարուցանելով, ինչպէս երկրորդ սաղմոսին մէջ ալ գրուած է. «Իմ որդիս ես դուն, այսօր քեզ ծնայ»: Նոյն այն իրողութիւնը, որ Աստուած զայն մեռելներէն յարուցանեց եւ անիկա այլեւս բնաւ մահ պիտի չտեսնէ, խոստում մըն է՝ մեզի ուղղուած, որովհետեւ Աստուած այսպէս կ’ըսէ. «Ձեզի պիտի տամ այն իսկական եւ սուրբ օրհնութիւնը, որ Դաւիթի խոստացայ», եւ ինչպէս ուրիշ սաղմոսի մը մէջ Սաղմոսագիրը կ’ըսէ. «Պիտի չթողուս որ քու ծառայիդ մարմինը փտութիւն տեսնէ» : Արդ, Դաւիթ իր սերունդին մէջ Աստուծոյ ծառայելէ ետք մեռաւ եւ իր հայրերուն քով թաղուեցաւ, եւ իր մարմինը փտեցաւ: Բայց Աստուած յարուցանեց Յիսուսը, որուն մարմինը փտութիւն չտեսաւ: Ուստի իմացէ՛ք, եղբայրնե՛ր, Յիսուսի միջոցաւ մեղքերու թողութիւն կը քարոզուի ձեզի: Ով որ անոր կը հաւատայ՝ կ’արդարանայ իր բոլոր մեղքերէն, որոնցմէ չկրցաք արդարանալ Մովսէսի Օրէնքին միջոցաւ: Զգոյշ եղէք ուրեմն, որ ձեր վրայ չգայ այն՝ ինչ որ մարգարէները կ’ըսեն.-   «Տեսէ՛ք, ո՛վ արհամարհողներ, զարմացէք եւ կորսուեցէք. որովհետեւ ձեր օրերուն այնպիսի գործ մը պիտի ընեմ, որուն պիտի չհաւատաք, նոյնիսկ երբ մէկը պատմէ ձեզի»: Երբ Բառնաբաս ու Պօղոս ժողովարանէն դուրս ելան, մարդիկ կ’աղաչէին որ միւս Շաբաթ օր եւս նոյն նիւթին մասին խօսին: Ժողովուրդին ցրուելէն ետք, բազմաթիւ Հրեաներ եւ հրէութեան դարձած բարեպաշտ օտարազգիներ հետեւեցան Պօղոսի եւ Բառնաբասի, որոնք անոնց հետ խօսեցան եւ համոզեցին զանոնք, որ շարունակեն Աստուծոյ շնորհքին մէջ մնալ:   ՂՈՒԿ. 9:18-36 Օր մը Յիսուս առանձին կ’աղօթէր: Իրեն հետ էին նաեւ իր աշակերտները: Անոնց հարցուց. – Ժողովուրդը իմ մասիս ի՞նչ կ’ըսէ. ո՞վ եմ ես: Անոնք պատասխանեցին. – Ոմանք կ’ըսեն թէ Յովհաննէս Մկրտիչն ես, ոմանք՝ Եղիա մարգարէն, իսկ ուրիշներ կ’ըսեն թէ նախկին մարգարէներէն մէկն ես, որ յարութիւն առած է: Յիսուս հարցուց անոնց, – Իսկ դո՞ւք ինչ կ’ըսէք իմ մասիս: Պետրոս պատասխանեց. – Դուն Աստուծոյ Օծեալն ես, Քրիստոսը: Յիսուս խստիւ պատուիրեց անոնց, որ ոեւէ մէկուն չըսեն ասիկա: Ապա աւելցուց. – Մարդու Որդին պէտք է որ շատ չարչարուի եւ մերժուի աւագ քահանաներէն, երէցներէն եւ Օրէնքի ուսուցիչներէն. զինք պիտի սպաննեն, եւ սակայն երրորդ օրը յարութիւն պիտի առնէ: Եւ բոլորին ըսաւ. – Եթէ մէկը ուզէ ինծի հետեւիլ՝ թող ուրանայ իր անձը, ամէն օր իր խաչը առնէ եւ ետեւէս գայ: Որովհետեւ ով որ ուզէ իր կեանքը փրկել՝ պիտի կորսնցէ զայն, եւ ով որ ինծի համար կորսնցնէ իր կեանքը՝ պիտի փրկէ զայն: Ի՞նչ օգուտ, երբ մէկը ամբողջ աշխարհը շահի, բայց իր կեանքը կորսնցնէ կամ ինքզինքին վնասէ: Ով որ զիս եւ խօսքերս ընդունիլը ամօթ նկատէ՝ Մարդու Որդին ալ զայն ընդունիլը ամօթ պիտի նկատէ, երբ գայ իր փառքով, ինչպէս նաեւ իր Հօր եւ սուրբ հրեշտակներուն փառքով: Արդարեւ կ’ըսեմ ձեզի, թէ հոս գտնուողներէն ոմանք պիտի չմեռնին՝ մինչեւ տեսնեն Աստուծոյ թագաւորութիւնը: Այս խօսքերը ըսելէ շուրջ ութը օրեր ետք, Յիսուս իր հետ առնելով Պետրոսը, Յակոբոսը եւ Յովհաննէսը, լեռ ելաւ աղօթելու: Եւ մինչ կ’աղօթէր, անոր դէմքը այլակերպեցաւ եւ հագուստը փայլուն սպիտակ գոյն առաւ: Եւ ահա երկու հոգի՝ Մովսէսն ու Եղիան, երեւցան իրենց փառքով, կը խօսէին Յիսուսի հետ՝ իր մահուան մասին, որ պիտի պատահէր Երուսաղէմի մէջ: Պետրոսի եւ իրեն ընկերացողներուն աչքերը քունով ծանրացած էին, բայց սթափեցան եւ տեսան Յիսուսի փառքը եւ երկու մարդիկը, որոնք անոր հետ էին: Երբ Մովսէս ու Եղիա կը մեկնէին, Պետրոս ըսաւ Յիսուսի. – Վարդապե՛տ, լաւ է որ հոս մնանք. երեք վրաններ շինենք՝ մէկը քեզի, մէկը Մովսէսի եւ միւսը Եղիայի համար: Սակայն չէր գիտեր թէ ի՞նչ կ’ըսէր: Տակաւին Պետրոս կը խօսէր, երբ ամպ մը եկաւ եւ շուքի տակ առաւ զանոնք: Աշակերտները վախցան, երբ ամպը ծածկեց զիրենք: Ամպին մէջէն լսուեցաւ ձայն մը, որ կ’ըսէր. – Ա՛յս է իմ ընտրեալ Որդիս, անոր մտիկ ըրէք: Մինչ այս ձայնը կը լսուէր, Յիսուս առանձին էր: Աշակերտները այդ օրերուն լուռ մնացին եւ ոեւէ մէկուն չպատմեցին իրենց տեսածներուն մասին: ՃՇ. ԸՆԹԵՐՑՈՒՄ 1 Պետր. 5:1-14, Յովհ.5:19:30, Մատթ.11:25-30, Մարկ. 4:26-34

ԿԱՐՄԻՐ ԿԻՐԱԿԻ

Կիրակի, 12 Մայիս, երրորդ Կիրակին է Ս. Յարութենէն ետք։ Կը կոչուի Կարմիր Կիրակի, թէեւ անունը եկեղեցական ծագում չունի։ Կարմիր արեան գոյնը ըլլալով, ասիկա յարմար ժամանակ մըն է առաջին քրիստոնեայ նահատակներու յիշատակը մեծարելու։ Կը կարծուի, որ «Կարմիր Կիրակի» անուանումը կը վերաբերի հողէն գունաւոր բխումին, որ կը յաջորդէ անպտուղ ձմրան։ Անցեալ շաբթուան Կանաչ Կիրակիին նման, բնութեան ու կեանքի տօն մըն է, որ կը խորհրդանշէ վերածնունդը՝ մեր Տիրոջ Յարութենէն ետք։ 

ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎ

Արեւելեան թեմի Ազգային Երեսփոխանական Ժողովը տեղի պիտի ունենայ 16-18 Մայիսին՝ Ուայթընսվիլի (Մասաչուսեթս) Ս. Աստուածածին եկեղեցւոյ կազմակերպութեամբ։ Հոգեւորականներու համագումարը պիտի սկսի Չորեքշաբթի, 15 Մայիսին։ Տիկնանց Միութիւններու Ընկերակցութեան տարեկան համագումարը տեղի պիտի ունենայ Երեսփոխանական Ժողովին զուգահեռ։ Ազգային Երեսփոխանական Ժողովը Արեւելեան թեմի եկեղեցական ու վարչական բարձրագոյն մարմինն է։ Անոր կազմին մէկ եօթներորդը եկեղեցական են, իսկ մնացեալը՝ աշխարհական երեսփոխաններ։ Եկեղեցական երեսփոխանները կ՚ընտրուին հոգեւորականներու համագումարին, իսկ աշխարհական երեսփոխանները՝ համապատասխան ծուխերուն կողմէ։ Ծխական երեսփոխաններու թիւը կախում ունի ծխական անդամներու թիւէն։ Ծուխի մը երեսփոխաններու նուազագոյն թիւը երկու է, իսկ առաւելագոյնը՝ եօթը։ 

ԱԶԳ. ՈՒՍՈՒՄՆԱԿԱՆ ԽՈՐՀՈՒՐԴԻ ՏՆՕՐԷՆԸ՝ ՔԱԼԻՖՈՐՆԻՈՅ ՄԷՋ

Դոկտ. Մատթէոսեան իր զեկուցումը կը ներկայացնէ

Մայիս 4-5ին Ազգային Ուսումնական Խորհուրդի տնօրէն դոկտ. Վարդան Մատթէոսեան ճամբորդած էր Քալիֆորնիա, ուր հրաւիրուած էր զեկուցում մը ներկայացնելու Քալիֆորնիոյ համալսարանի Ըրվայնի ճիւղին մէջ տեղի ունեցած երկրորդ հայկական ֆեմինիստ ուսմանց աշխատանոցին։ Գիտաժողովը, որ կազմակերպուած էր համալսարանի դասախօսներ՝ Հուրի Պէրպէրեանի (Քալիֆորնիոյ համալսարան-Ըրվայն), Մելիսա Պիլալի (Հայաստանի Ամերիկեան համալսարան) եւ Լեռնա Էքմէքճիօղլուի կողմէ (MIT), կը համախմբէր Միացեալ Նահանգներէն, Հայաստանէն եւ Ճափոնէն 15 բանախօսներ։ Դոկտ. Մատթէոսեանի զեկոյցը խորագրուած էր «Արմէն Օհանեան. արուեստ ու յեղափոխութիւն Կովկասէն մինչեւ Մեքսիքօ»։  

«ՏԱԹԵՒ» ԱՄԱՌՆԱՅԻՆ ԾՐԱԳՐԻ ԱՐՁԱՆԱԳՐՈՒԹԻՒՆ

Ազգ. Առաջնորդարանի Քրիստոնէական Դաստիարակութեան բաժանմունքի «Ս. Գրիգոր Տաթեւացի» ամառնային ծրագրի արձանագրութիւնը բացուած է։ Կրօնական բովանդակութեամբ այս եզակի ծրագրին կը մասնակցին 13-18 տարեկան պատանիներ։ Այս տարի տեղի պիտի ունենայ 30 Յունիսէն մինչեւ 7 Յուլիս՝ Էլվըրսընի (Փենսիլվենիա) St. Mary of Providence կեդրոնին մէջ։ Տեղեկութեան եւ արձանագրութեան համար, հաճեցէք սեղմել այստեղ ։   

ՆԱՄԱԿՆԵՐ ՀԱՅԱՍՏԱՆԷՆ

Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Ծրագրին մաս կը կազմէ հովանաւորուած երեխաներուն թղթակցութիւնը իրենց հովանաւորին հետ։ Պարբերաբար այդ նամակներէն նմոյշներ կը ներկայացնենք “Crossroads”ի միջոցով։ Այս շաբթուան նամակը գրած է Ալէնը՝ չորրորդ դասարանի աշակերտ մը, անոր մօր յետգրութեամբ։ 

«Բարեւ, յարգելի անծանօթ բարեկամ, Ալէնն եմ (...), ապրում եմ Տաւուշի մարզի Մովսէս գիւղում։ Սովորում եմ Մոսէս գեղի միջնական դպրոցի 4-րդ դասարանում։ Սովորում եմ գերազանց։ Շուտով կը սկսուեն դպրոցական խենթ օրերը։ Անհամբերութեամբ սպասում եմ երբ ենք դպրոց գնալու։ Կարօտել եմ ընկերներիս, ուսուցչուհուս։ Դասերից բացի սիրում եմ պարել եւ ֆուտբոլ խաղալ։ Յարգանքներով, Ալէն Յարգելի հովանաւոր, Իմ խորին շնորհակալութիւնն եմ յայտնում Ձեզ։ Հպարտ եմ որ ունեմ Ձեր նման բարեկամ։ Աստուած պահապան Ձեզ։  Յարգանքներով՝ Ալէնի մայրը»

Ներկայիս մանուկներ կան, որոնք կը սպասեն որբերու հովանաւորութեան ցուցակին մէջ։ Եթէ կը փափաքիք հովանաւորել մանուկ մը, հաճեցէք կապուիլ Ազգ. Առաջնորդարանին հետ ելեկտրոնային նամակով ( sophie@armenianprelacy.org ) կամ հեռաձայնով (212-689-7810)՝ դիմելով Սոֆիին։  

SHADOW TOLE ԱՐՈՒԵՍՏԻ ՑՈՒՑԱՀԱՆԴԷՍ

Անուշաւան արքեպիսկոպոս՝ արուեստագիտուհի Արփի Նարտոնէի, Տ. Մեսրոպ քհնյ. Լագիսեանի (ձախ) եւ Տ. Վահան քհնյ. Գույումճեանի հետ, ցուցահանդէսի բացման հիւրասիրութեան ընթացքին

Ուրբաթ, 3 Մայիսին, երեկոյեան ժամը 7:00էն 9:00, տեղի ունեցաւ Արփի Նարտոնէի Shadow Tole արուեստի ցուցահանդէսին բացման հիւրասիրութիւնը Ազգ. Առաջնորդարանի «Վահագն եւ Յասմիկ Յովնանեան» սրահին մէջ՝ Անուշաւան արքեպիսկոպոսի հովանաւորութեամբ եւ «Համազգային»ի Նիւ Եորքի մասնաճիւղի կազմակերպութեամբ։ Արփի Նարտոնէ եւ իր արուեստը միջազգային ճանաչում ստացած են։ Անոր գործերը ցուցադրուած են «Քարթիէ» նշանաւոր ընկերութեան կողմէ, ինչպէս եւ տարբեր քաղաքներու պատկերասրահներու մէջ։ 

ՄԵՐ ԾՈՒԽԵՐԷՆ

Ս. ՊԱՏԱՐԱԳԻ ՈՒՍՈՒՑՈՒՄ ՈՒՈՔԻԿԸՆԻ ՄԷՋ

Ս. Պօղոս եկեղեցւոյ (Ուոքիկըն, Իլինոյ) եկեղեցւոյ հոգեւոր հովիւ՝ Տ. Տարօն Ա. քհնյ. Ստեփանեան Ս. Պատարագին նուիրուած դասախօսութեան մը առաջին մասը ներկայացուց վերջերս՝ ծխականները քայլ առ քայլ առաջնորդելով Պատարագի մեկնաբանութեան մէջ։ Յառաջիկայ ամիս, Տէր Հայրը պիտի ներկայացնէ դասախօսութեան երկրորդ մասը։  

ՍԵՄԻՆԱՐ՝ ԱՂՕԹՔԻ ՄԱՍԻՆ

Շաբաթ, 4 Մայիսին, Ինտիըն Օրչըրտի (Մասաչուսեթս) Ս. Գրիգոր Լուսաւորիչ եկեղեցին կազմակերպած է աղօթքի նուիրուած երեք ժամուան սեմինար մը։ Եկեղեցւոյ հովիւ Տ. Պետրոս քհնյ. Շիթիլեանը եւ հոգաբարձութիւնը հրաւիրած են Ազգ. Առաջնորդարանի Քրիստոնէական Դաստիարակութեան բաժանմունքի վարիչ՝ Շանթ Ա. սրկ. Գազանճեանը՝ սոյն սեմինարը վարելու։  Շանթ աւագ սարկաւագ քննարկեց Յիսուսի աղօթքներուն տարրերը, Յիսուսի՝ իր հետեւորդներուն տուած աղօթքը, եւ Հայ Եկեղեցւոյ աղօթքներ։ Ան եզրակացուց աղօթքի կանոններ հաստատելու հիմնական ուղեցոյց մը մատուցելով, որ գործնական ու կիրառելի ձեւ մըն է բոլոր անոնց համար, որոնք աղօթքի կարգապահութիւն մը կ՚ուզեն հաստատել։

ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍ ԽՈՐԷՆ Ա.Ի ՕԾՈՒՄԸ (12 Մայիս, 1963)

Մեծի Տանն Կիլիկիոյ Կաթողիկոս Զարեհ Ա.ի վաղահաս ու անակնկալ վախճանումէն ետք, Փետրուար 1963ին, 48 տարեկան հասակին, դպրեվանքի անոր դասընկերը՝ Խորէն արք. Բարոյեանը, Կիլիկիոյ Կաթողիկոսութեան նաւը վարելու դժուարին առաքելութիւնը ստանձնած է։ Նոյն տարուան Հոկտեմբերին, Երուսաղէմի ողջագուրումը Ամենայն Հայոց Կաթողիկոս Վազգէն Ա.ի հետ պիտի դարմանէր այն ճեղքը, որ յառաջացած էր Հայ Եկեղեցւոյ մէջ՝ 1956ին Զարեհ Ա.ի ընտրութենէն ետք։ Ապագայ Կաթողիկոսը աւազանի անունով՝ Մեսրոպ, ծնած էր 24 Նոյեմբեր, 1914ին, Նիկոսիա (Կիպրոս)՝ խարբերդցի ծնողներէ։ Իր մանկութիւնը Ատալիա գիւղը անցնելէ ետք, ծննդավայրը վերադարձած էր 1927ին ու յաճախած «Մելիքեան» ազգ. վարժարանը։ Աւարտելէ ետք, 1931ին մտած է Կիլիկիոյ Կաթողիկոսութեան դպրեվանքը։ Շրջանաւարտ ըլլալով, 1935ին սարկաւագ ձեռնադրուած է, իսկ 1937ին՝ կուսակրօն աբեղայ՝ Խորէն անունով։ 1938ին ստացած է վարդապետական կարգը։  Խորէն վարդապետ Կաթողիկոսարանին մէջ տարբեր պաշտօններ վարած է ․ - 1938-1942՝ դիւանապետ, գաւազանակիր, դպրեվանցի փոխտեսուչ եւ Տնօրէն Ժողովի անդամ ․ 1942-1947 վարած է Ճեզիրէի (Սուրիա) շրջանի առաջնորդական փոխանորդի պաշտօնը։ Հոս արդէն ցոյց տուած է իր վարչական ձիրքերը, կազմակերպելով շրջանի եկեղեցական, ընկերա-մշակութային եւ կրթական կեանքը այնպիսի շրջանի մը, երբ Սուրիա անկախութեան պայքարի մէջ կը գտնուէր։ Միջոցին, 1946ին ծայրագոյն վարդապետի կարգը բարձրացած է։ 1947ին Անթիլիաս վերադառնալով, Գարեգին Ա. կաթողիկոս զինք եպիսկոպոս ձեռնադրած է։ 1947-1951ին վարած է Կաթողիկոսարանի երկու ամենէն կարեւոր պաշտօնները՝ լուսարարապետ եւ դրան եպիսկոպոս։ Դեկտեմբեր 1951ին ընտրուած է Լիբանանի թեմի առաջնորդ։ Խորէն եպիսկոպոս անգամ այս անգամ ցոյց տուած է իր վարչական ու շինարարական կարողութիւնը, վերանորոգելով ու շինելով նոր եկեղեցիներ ու դպրոցներ։ 1952ին վախճանած Գարեգին Ա. կաթողիկոսի յաջորդին ընտրութիւնը երկարօրէն ձգձգուած էր։ Հոկտեմբեր 1955ին Խորէն եպս. Բարոյեան ընտրուած է կաթողիկոսական տեղապահ միաբանութեան ժողովին կողմէ, ու արագօրէն կազմակերպած է ընտրութիւնը՝ Փետրուար 1956։ Ան նորընտիր Զարեհ Ա. կաթողիկոսի աջ բազուկը պիտի դառնար։ Արքեպիսկոպոսական կարգի արժանանալով 1956ին, Խորէն արք. Բարոյեան կաթողիկոսական նուիրակի պաշտօնով այցելած է Միացեալ Նահանգներ ու Քանատա, Հոկտեմբեր 1957էն մինչեւ Յունիս 1958։ Ութամսեայ կեցութեան ընթացքին, բարձրաստիճան հոգեւորականը երկրի բոլոր հայաշատ կեդրոնները այցելած է՝ պատարագելով, քարոզելով, դասախօսելով եւ Կաթողիկոսարանի դերն ու առաքելութիւնը բացատրելով։ Կազմակերպական այս անխոնջ աշխատանքին շնորհիւ, 1958ին ծնունդ առած է Միացեալ Նահանգներու եւ Քանատայի թեմը։ Հիւսիսային Ամերիկա այցելելէ ետք, Խորէն արքեպիսկոպոս նաեւ այցելած է Յունաստանի, Թեհրանի, Սպահանի եւ Ատրպատականի՝ Կաթողիկոսութեան հովանիին տակ մտած նոր թեմերը։ Զարեհ Ա. Կաթողիկոսի վախճանումէն ետք, Խորէն արքեպիսկոպոս վերստին կաթողիկոսական տեղապահ ընտրուած է ու կազմակերպած՝ երեք ամիս ետք տեղի ունեցած ընտրութիւնը, որուն առաջին անգամ մասնակցած են Միացեալ Նահանգներու, Յունաստանի եւ Իրանի նոր թեմերու պատուիրակները։ Ընտրուելով Մեծի Տանն Կիլիկիոյ Կաթողիկոս, Խորէն Ա. օծուած է 12 Մայիս, 1963ին։ Վեհափառ Հայրապետի քսանամեայ պաշտօնավարութիւնը յատկանշուած է Անթիլիասի մայրավանքն ու Պիքֆայայի դպրեվանքը բարելաւելու եւ վերանորոգելու ճիգով։ Ան նաեւ շինած է ժողովրդային բնարականներ Ֆանարի շրջանին մէջ, եւ հիմնարկէքը կատարած՝ Ազգային Ծերանոցին։ Կատարած է տարբեր թեմերու այցելութիւններ, ներառեալ՝ չորս ամսուան այցելութիւն մը Միացեալ Նահանգներ ու Քանատա (1969)։ Ան նաեւ հանդիպած է Պօղոս Զ. Պապին Վատիկանի մէջ՝ 1967ին, միաժանանակ աշխատելով Կաթողիկոսարանի տեսանելիութիւնը բարձրացնել թէ՛ Հայ Կաթողիկէ ու Աւետարանական եկեղեցիներու հետ յարաբերութիւններուն եւ թէ՛ միջ-եկեղեցական ծիրէն ներս։ Խորէն Ա. Կաթողիկոսի առողջութիւնը իր խանգարման առաջին նշանները ցոյց տուած է սրտի հարցերով՝ 1969ի ամերիկեան շրջապատոյտի ընթացքին։ 1977ին, Վեհափառի քահանայական ձեռնադրութեան քառասնամեակի տօնակատարութենէն ետք, Միացեալ Նահանգներու եւ Քանատայի թեմի առաջնորդ՝ Գարեգին արք. Սարգիսեան ընտրուած է աթոռակից կաթողիկոս։ Ան պիտի դառնար Խորէն Ա.ի յաջորդը վերջինիս մահէն ետք՝ 9 Փետրուար 1983ին, նոր էջ մը բանալով Մեծի Տանն Կիլիկիոյ Կաթողիկոսութեան դարաւոր պատմութեան մէջ։ Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org )

16 Ապրիլ 1969ին, ամերիկեան իր երկար այցելութեան ընթացքին, Խորէն Ա. Վեհափառ Հայրապետ կ՚այցելէ ՄԱԿի ընդհանուր քարտուղար Ու Թանին։

“CROSSROADS”Ի ԺԱՄԿԷՏԸ

Կը յիշեցնենք, որ իւրաքանչիւր Չորեքշաբթի կէսօր պայմանաժամը կը լրանայ՝ նիւթեր եւ լուսանկարներ հասցնելու Հինգշաբթի օրուան “Crossroads” ելեկտրոնային լրատուին համար։ Ձեր գործակցութիւնը թոյլ կու տայ, որ “Crossroads”ի հրատարակութիւնը տեղի ունենայ ճիշդ ժամանակին: 

ԱՅՍ ԿԻՐԱԿԻ ՄԱՅՐԵՐՈՒ ՕՐՆ Է

Այս Կիրակի (12 Մայիս) Մայրերու Օրն է։ Մի՜ մոռնաք հեռաձայնել ձեր մօր։

ԺԱՄԱՆԱԿԱՑՈՅՑ

«Սիամանթօ» լսարանի  դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝  anec@armenianprelacy.org  կամ՝ 212-689-7810։ Յաջորդ դասը՝  Շաբաթ, 11 Մայիսին։ 11 Մայիս —Մայրերու Օրուան ճաշկերոյթ-պարահանդէս (Crowne Plaza, Ուորուիք, Ռոտ Այլընտ), որուն ընթացքին պիտի մեծարուի տարուան մայրը՝ տիկ. Մարօ Տիոնիսոփուլոս։ 16-18 Մայիս —Արեւելեան թեմի Ազգային Երեսփոխանական Ժողով՝ Ուայթընսվիլի (Մասաչուսեթս) Ս. Աստուածածին եկեղեցւոյ հիւրընկալութեամբ։ 30 Մայիս —«Հոգիիս երաժշտութիւնը» (Music of my Soul), Կարինէ Պօղոսեան (դաշնակ), Zankel Hall, Carnegie Hallի մէջ։ 30 Յունիս-7 Յուլիս —33րդ տարեկան «Ս. Գրիգոր Տաթեւացի» ամառնային ծրագիրը՝ 13-18 տարեկան պատանիներու համար, տեղի պիտի ունենայ St. Mary of Providence կեդրոնին մէջ (Էլվըրսըն, Փենսիլվենիա), կազմակերպութեամբ՝ Ազգ. Առաջնորդարանի Քրիստոնէական Դաստիարակութեան բաժնին։  9-12 Հոկտեմբեր —Սրբոց Թարգմանչաց տօնին առիթով, Արեւելեան, Արեւմտեան եւ Գանատական թեմերու եկեղեցականաց համաժողով, տեղի պիտի ունենայ՝ Մոնթեպելլոյի մէջ (Գալիֆորնիա)։ Մանրամասնութիւնները՝ յետագային։ 12 Հոկտեմբեր —Ս. Վարդանանց եկեղեցւոյ 60ամեակի շարունակութիւն՝ Էլի Պէրպէրեանի եւ իր նուագախումբի մասնակցութեամբ։  19 Հոկտեմբեր —«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մեսեչուսեթս)։   17 Նոյեմբեր —Կոմիտաս Վարդապետի 150ամեակի ծննդեան տօնակատարութիւն, կազմակերպութեամբ՝ Ազգ. Առաջնորդարանի։ Մանրամասնութիւնները՝ յետագային։

Follow us on Social Media

‌ ‌

The Armenian Prelacy  Tel: 212-689-7810 ♦ Fax: 212-689-7168 ♦ Email: email@armenianprelacy.org Visit the Catholicosate webpage at  http://www.armenianorthodoxchurch.org/en/