17 Յունուար, 2019

ԳԵՐՊ. Տ. ՍԱՀԱԿ Ծ. ՎՐԴ. ԵՄԻՇԵԱՆ ԱՌԱՋՆՈՐԴԱԿԱՆ ՓՈԽԱՆՈՐԴ ՆՇԱՆԱԿՈՒԱԾ Է

Անցեալ շաբաթավերջին, Կրօնական Ժողովը եւ Ազգային Վարչութիւնը յայտարարեցին, թէ Գերպ. Տ. Սահակ Ծ. վրդ. Եմիշեան Արեւելեան թեմի առաջնորդական փոխանորդ նշանակուած է։ Հ. Սահակը թեմիս միացած է Օգոստոս 2013էն ի վեր եւ ներկայիս կը ծառայէ իբրեւ Ուստրի Ս. Երրորդութիւն եկեղեցւոյ հոգեւոր հովիւ։ Ան պիտի շարունակէ իր ծառայութիւնը Ուստրի մէջ՝ առաջնորդական փոխանորդի իր պաշտօնին զուգընթաց։ Հ. Սահակ վրդ ․ ծնած է Երեւան, 1983ին։ Ինը տարի ուսում ստանալէ ետք Մեծի Տանն Կիլիկիոյ Կաթողիկոսութեան դպրեվանքին մէջ (Պիքֆայա), կուսակրօն քահանայ ձեռնադրուած է 2006ին։ Ան Կաթողիկոսարանին մէջ աշխատած է չորս տարի իբրեւ արխիւներու տնօրէն եւ դպրեվանքի դասատու։ Եղած է նաեւ Սելանիկի (Յունաստան) համայնքի հոգեւոր հովիւ։ 2010ին ստացած է վարդապետութեան աստիճանը։ Միացեալ Նահանգներ ժամանելէ ետք, Հայր Սուրբը սկզբնապէս ծառայած է թեմիս մէջ իբրեւ արտահաս հովիւ, մինչեւ իր նշանակումը իբրեւ՝ Ս. Երրորդութիւն եկեղեցւոյ հովիւ Ուստրի մէջ։ 2016ին Ն.Ս.Օ.Տ.Տ. Արամ Ա. Կաթողիկոսէն Հ. Սահակ վարդապետ ստացած է ծայրագոյն վարդապետի աստիճանը։ Աստիճանի ստացումը՝ ձեռամբ նախկին առաջնորդ Օշական արք. Չօլոլոյեանի, տեղի ունեցած է Ուոթըրթաունի Ս. Ստեփանոս եկեղեցւոյ մէջ, 29 Մայիս 2016ին, յընթացս Ս. Պատարագի, զոր կը մատուցէր Անուշաւան եպս. Դանիէլեան, որ այդ ժամանակ առաջնորդական փոխանորդն էր։ Հ. Սահակ Ծ. վրդ. Եմիշեան նաեւ ամբողջացուցած է իր աստուածաբանական ուսումը Պոստըն գոլէճին մէջ, 2018ին ստանալով մագիստրոսի տիտղոսը։  

Տ. ԱՐԱՄ ԱՒ. ՔՀՆՅ. ՍՏԵՓԱՆԵԱՆ ԹՈՇԱԿԻ Կ՚ԱՆՑՆԻ, ԲԱՅՑ ԳՈՐԾԸ ԿԸ ՇԱՐՈՒՆԱԿՈՒԻ

Տ. Արամ Աւ. քհնյ. Ստեփանեան իր վերջին Ս. Պատարագէ կը մատուցանէ իբրեւ՝ Նիւ Պրիթըինի Ս. Ստեփանոս եկեղեցւոյ հոգեւոր հովիւ

Կրօնական Ժողովն ու Ազգային Վարչութիւնը յայտարարեցին, թէ Արժ. Տ. Արամ Աւ. քհնյ. Ստեփանեան՝ Ուայթընսվիլի Ս. Աստուածածին եկեղեցւոյ երկարամեայ հովիւը, իսկ վերջին քանի մը տարիներուն՝ Քընեթիքըթի Ս. Ստեփանոս եկեղեցւոյ հովիւը, թոշակի կ՚անցնի։ Տ. Արամ պիտի ծառայէ թեմիս իբրեւ արտահաս հովիւ, միեւնոյն ժամանակ շարունակելով իր բարեսիրական աշխատանքները Հայաստանի ու Արցախի մէջ, որոնց շարքին՝ Աւետարանի քարոզչութիւնը, որբերու ուղղուած ամառնային ճամբարի մը կազմակերպութիւնը, գիւղական շրջաններու մէջ աշխատատեղեր բանալու ծրագիրներու սատարումը, դպրոցներու նորոգումը, որբանոցներու աջակցութիւնը եւ կրթական հնարաւորութիւններու ստեղծումը, ինչպէս՝ անգլերէնի դասերու մատուցումը համալսարանական ուսման դիմող աշակերտներու։ Տ. Արամ ծնած է Տէր-Զօր, Սուրիա։ Ընտանիքով 1945ին փոխադրուած է Հալէպ, ուր ստացած է իր նախնական կրթութիւնը եւ ծառայած է իբրեւ դպիր տեղւոյն եկեղեցւոյ մէջ։ 1957-1961 իր ուսումը շարունակած է Անթիլիասի դպրեվանքին մէջ, իսկ այնուհետեւ՝ Ուէյլզի (Անգլիա) Պայպլ գոլէճին մէջ։ 1962ին փոխադրուելով Միացեալ Նահանգներ, հաստատուած է Պոստընի շրջանը, իր կապերը պահելով Հայց. Եկեղեցւոյ հետ, գլխաւորաբար Ուոթըրթաունի Ս. Ստեփանոս եկեղեցւոյ եւ կիրակնօրեայ վարժարանին հետ։ 1967ին ան սարկաւագ ձեռնադրուած է օրուան առաջնորդ՝ լուսահոգի Հրանդ արք. Խաչատուրեանի կողմէ։ Այնուհետեւ, համայնքի կրօնական կեանքին մէջ անոր պարտականութիւնները սկսած են ծաւալիլ։ Տ. Արամ քահանայ ձեռնադրուած է 9 Յունուար, 1999ին, ձեռամբ օրուան առաջնորդ՝ Օշական արք. Չօլոյեանի։ Ան ծանօթ դէմք ու ձայն էր, քանի որ իր ձեռնադրութենէն առաջ, երկար տարիներ ծառայած էր իբրեւ հիւր քարոզիչ եւ դասախօս։ Տէր Հօր եւ երէցկին Մարկրէթին կը մաղթենք յաջողութիւն Հայց. Եկեղեցւոյ, Արեւելեան թեմի, Հայաստանի ու Արցախի ծառայութեան իրենց առաքելութեան մէջ։ Հայաստանի ու Արցախի մէջ անոնց բարեսիրական աշխատանքին մասին տեղեկութիւններու համար, հաճեցէք գրել The Voice of the Armenian Church, Inc., P.O. Box 321, Sutton, Massachusetts 01590 կամ aramstep2@gmail.com հասցէներուն։  

ՎԱՀԱՆ ՍՐԿ. ԳՈԻՅՈՒՄՃԵԱՆ ՔԱՀԱՆԱՅ ՊԻՏԻ ՁԵՌՆԱԴՐՈՒԻ

Կրօնական Ժողովը եւ Ազգային Վարչութիւնը յայտարարեցին, թէ յառաջիկայ 8 եւ 9 Փետրուարին Վահան սրկ. Գույումճեանի քահանայական ձեռնադրութիւնը պիտի կատարուի։ Կոչման արարողութիւնը տեղի պիտի ունենայ Ուրբաթ, 8 Փետրուարին, երեկոյեան ժամը 8:00ին, Ս. Վարդանանց եկեղեցւոյ մէջ (Ռիճֆիլտ, Նիւ Ճըրզի)։ Ձեռնադրութիւնը պիտի կատարէ թեմիս բարեջան առաջնորդ Անուշաւան արքեպիսկոպոս եւ տեղի պիտիունենայ Շաբաթ, 9 Փետրուարին, առաւօտեան ժամը 10:30էն սկսեալ, Ս. Վարդանանց եկեղեցւոյ մէջ։ Մանրամասնութիւնները հետագային։

ԼԻԲԱՆԱՆԻ ԸՆԴՀԱՆՈՒՐ ՀԻՒՊԱՏՈՍԻՆ ԱՅՑԵԼՈՒԹԻՒՆԸ

Այսօր՝ Հինգշաբթի, 17 Յունուարի առաւօտեան, Լիբանանի ընդհանուր հիւպատոսը՝ տիար Մաժտի Ռամատան, այցելութիւն մը տուաւ թեմիս առաջնորդ Գերշ. Տ. Անուշաւան արք. Դանիէլեանին՝ Առաջնորդարանին մէջ։ Դիւանագէտը շնորհաւորեց Անուշաւան Սրբազան Հօր իր ընտրութեան ու արքեպիսկոպոսական աստիճանին առիթով։ Այնուհետեւ, խօսակցութիւնը ընթացաւ Լիբանանի ներկայ իրավիճակին մասին, որ նոյնպէս կը շահագրգռէ հայերը՝ իբրեւ այդ երկրի բնակչութեան մէկ մասը։

ԱՍՏՈՒԱԾԱՇՈՒՆՉԻ ԸՆԹԵՐՑՈՒՄՆԵՐ

ԿԻՐԱԿԻ, 20 ՅՈՒՆՈՒԱՐ Ա. ԿԻՐԱԿԻ Ս. ԾՆՈՒՆԴԷՆ ԵՏՔ  ՅՈՎՀԱՆՆԷՍ 2: 1-11 Յիսուսի Գալիլեա հասնելուն երրորդ օրը հարսանիք մը կար Կանա քաղաքին մէջ, եւ Յիսուսի մայրը հոն էր: Յիսուս եւ իր աշակերտներն ալ հրաւիրուած էին հարսանիքին: Երբ գինին պակսեցաւ, Յիսուսի մայրը իրեն ըսաւ. – Գինի չունին: – Մա՛յր, մեզի ի՛նչ,- պատասխանեց Յիսուս,- իմ ժամանակս տակաւին չէ՛ հասած: Սակայն իր մայրը ըսաւ սպասաւորներուն. – Ինչ որ ըսէ ձեզի, կատարեցէ՛ք: Հրեաներու ծիսական մաքրութեան սովորութեան համաձայն, հոն քարէ վեց կարասներ կային, որոնցմէ իւրաքանչիւրը ութսունէն հարիւր լիթր կ’առնէր: Յիսուս ըսաւ սպասաւորներուն. – Կարասները ջուրով լեցուցէք: Եւ սպասաւորները լեցուցին մինչեւ բերան: Յետոյ ըսաւ անոնց. – Հիմա առէք եւ սեղանապետին տարէք: Անոնք ալ տարին: Սեղանապետը համտեսեց գինիի փոխուած ջուրը, բայց չգիտցաւ թէ ուրկէ էր. թէեւ սպասաւորները, որոնք ջուրը լեցուցած էին, գիտէին: Այն ատեն սեղանապետը փեսային ըսաւ. – Ամէն մարդ նախ ընտիր գինին կը հրամցնէ, իսկ երբ գինովնան՝ այն ատեն հասարակը, մինչ դուն ընտիր գինին պահեր ես մինչեւ հիմա: Յիսուս իր այս առաջին հրաշքը կատարեց Գալիլեայի Կանա քաղաքին մէջ: Հոն ան իր փառքը յայտնեց, եւ աշակերտները հաւատացին իրեն: *** Ա. ՏԻՄՈԹԷՈՍ 1: 1-11 Ես՝ Պօղոս, որ Քրիստոս Յիսուսի առաքեալն եմ՝ մեր  փրկիչ Աստուծոյ եւ մեր յոյսը եղող Քրիստոս Յիսուսի հրամանով, քեզի՛ կը գրեմ, հաւատքի հարազատ որդիս, Տիմոթէոս: Թող Հայրն Աստուած եւ մեր Տէրը Քրիստոս Յիսուս՝ շնորհք, ողորմութիւն եւ խաղաղութիւն պարգեւեն քեզի: Երբ Մակեդոնիա կ’երթայի, խնդրեցի որ Եփեսոս մնաս եւ խօսիս քանի մը հոգիներու, որպէսզի դադրին օտար վարդապետութիւններ ուսուցանելէ եւ չզբաղին սկիզբ ու վերջ չունեցող առասպելներով եւ ազգահամարներով, որոնք վէճերու դուռ կը բանան, փոխանակ օգնելու մարդոց հաւատքին եւ Աստուծոյ ծրագրին իրականացման: Գերագոյն պատուիրանը սէրն է. անարատ սրտէ, մաքուր խղճմտանքէ եւ անկեղծ հաւատքէն բղխած սէրը: Շատեր այս պատուէրները մոռցած, դատարկ վիճաբանութեանց մէջ մտնելով՝ մեզի Օրէնք սորվեցնելու ելեր են, մինչդեռ ո՛չ իրենց խօսածը գիտեն, ո՛չ ալ Աստուծոյ Օրէնքը, որուն մասին այնքան վստահութեամբ կը ճառեն: Գիտենք թէ Օրէնքը լաւ է՝ երբ պէտք եղած ձեւով գործադրուի: Սակայն գիտենք նաեւ, թէ Օրէնքը արդարներուն համար դրուած չէ, այլ՝ անօրէններուն եւ անհնազանդներուն, ամբարիշտներուն ու մեղաւորներուն, սրբութիւնները ոտնակոխ ընողներուն ու պիղծերուն, հայր ու մայր անարգողներուն, մարդասպաններուն, պոռնկութիւն ընողներուն, արուագէտներուն, մարդ առեւանգողներուն, ստախօսներուն, սուտ երդում ընողներուն, եւ բոլոր այն արարքներուն համար, որոնք հակառակ են իմ փոխանցած առողջ ուսուցումներուս. պատուէրներու՝ որոնք համաձայն են երանելի Աստուծոյ փառքը պատմող Աւետարանին, որ ես հաւատարմօրէն քարոզեցի: ՃՇ. ԸՆԹԵՐՑՈՒՄ Եսայի 54: 1-14

ԵԿԵՂԵՑԱԿԱՆ ՕՐԱՑՈՅՑ

Ս. ՎԱՀԱՆ ԳՈՂԹՆԱՑԻ

Երեքշաբթի, 22 Յունուարին, Հայց. Եկեղեցին կ՚ոգեկոչէ Ս. Վահան Գողթնացին։ Վահան հայ իշխանի մը որդին էր, որ չորս տարեկանին առեւանգուած էր արաբներուն կողմէ։ Մեծցած էր Դամասկոսի արքունիքին մէջ եւ իսլամական կրթութիւն ստացած։ Յովհաննէս Օձնեցի կաթողիկոսը համաձայնութիւն մը կնքեց արաբ էմիրին հետ՝ գերի պահուող շատ մը հայեր հայրենիք վերադարձնելու համար։ Վահան, որ գիտակից էր իր քրիստոնէական ժառանութեան, փափաքեցաւ Հայաստան վերադառնալ։ Տասը տարի հայրենիքի մէջ խաղաղօրէն ապրելէ ետք, արաբական արքայական ընտանիքը փորձեց զինք ետ բերել, բայց Վահան մերժեց։ Ուխտագնացութենէ մը ետք, ան ձերբակալուեցաւ, բանտարկուեցաւ, չարչարուեցաւ ու նահատակուեցաւ 737 թուականին։

Այս շաբաթ յիշուող սուրբեր Հինգշաբթի, 17 Յունուար՝ Ս. Անտոն ճգնաւոր։ Շաբաթ, 19 Յունուար՝ Ս. Թէոդոս թագաւոր։ Երկուշաբթի, 21 Յունուար՝ Ս. Կիրակոս եւ իր մայրը Յուղիտա։

ՄԵՐ ԾՈՒԽԵՐԷՆ

ՄԱՅՐ ԵԿԵՂԵՑԻՆ ՈՒՐԱԽՈՒԹԻՒՆ ԿԸ ՍՓՌԷ

Հայաստանի, Լիբանանի եւ Սուրիոյ ընտանիքներու նուէրներ ստացան Մայր Եկեղեցւոյ նուիրատուութեան շնորհիւ

Նիւ Եորքի Ս. Լուսաւորիչ Մայր Եկեղեցին շարունակեց Ս. Ծննդեան ուրախութիւն եւ յոյս տարածելու իր աւանդութիւնը՝ Հայաստան, Լիբանան եւ Սուրիա ապրող իր եղբայրներուն եւ քոյրերուն։ Ծխականներու աջակցութեան շնորհիւ, 5.000 տոլարէն աւելիին հասնող նուիրատուութիւնը աւելի քան 100 ընտանիքներու օգնութիւն դարձաւ տօնական օրերուն։ Բաշխումը կատարուեցաւ Առաջնորդարանի «Ս. Ներսէս» բարեսիրական կազմակերպութեան (Հայաստան), Մեծի Տանն Կիլիկիոյ Կաթողիկոսութեան Քրիստոնէական Դաստիարակութեան բաժանմունքի (Լիբանան), «Հալէպ» հայրենակցական բարեգործական կազմակերպութեան եւ «Հաուըրտ Գարակէօզեան» հիմնարկութեան օժանդակութեամբ։

Ս. ԾՆՈՒՆԴԸ ՌԷՅՍԻՆԻ ՄԷՋ

Կիրակնօրեայ դպրոցի աշակերտները հանդէս կատարեցին Ճրագալոյցին՝ Ռէյսինի (Ուիսքոնսըն) Ս. Յակոբ եկեղեցւոյ մէջ

Ս. Ծնունդի օրը, Տ. Տարօն Աւ. քհնյ. Ստեփանեան Ս. Պատարագ մատուցանեց եւ Ջրօրհնէք կատարեց

Ս. ԾՆՈՒՆԴԸ ՈՒՈՔԻԿԸՆԻ ՄԷՋ

Տ. Տարօն Աւ. քհնյ. Ստեփանեան Ս. Ծնունդն ու Ջրօրհնէքը նշեց Ուոքիկընի (Իլլինոյ) Ս. Պօղոս եկեղեցւոյ մէջ՝ Տ. Զարեհ Աւ. քհնյ. Սահակեանի մասնակցութեամբ

Եկեղեցականները եւ խորանի ծառայողները ծխականներու հետ

Ս. ԾՆՈՒՆԴԸ ՆՈՐԹ ԱՆՏՈՎԸՐԻ ՄԷՋ

Տ. Ստեփան քհնյ. Պալճեան, շրջապատուած՝ խորանի ծառաներով, Ջրօրհնէքի արարողութիւնը կը կատարէ Նորթ Անտովըրի (Մասաչուսեթս) Ս. Գրիգոր եկեղեցիին մէջ, Կիրակի, 6 Յունուարին։

Ս. ՍԱՐԳԻՍԻ ԴՊՐԱՑ ԴԱՍԻ ԵՒ ՍԱՐԿԱՒԱԳՆԵՐՈՒ ԳՆԱՀԱՏԱՆՔԻ ՃԱՇԿԵՐՈՅԹ

Տ. Նարեկ քհնյ. Թրթռեան կենաց մը կ՚առաջարկէ ծուխի սարկաւագներուն եւ դպրաց դասի անդամներուն համար

Կիրակի, 13 Յունուարին, Տակլըսթընի (Նիւ Եորք) Ս. Սարգիս եկեղեցին իր գնահատանքի ճաշկերոյթով հիւրասիրեց սարկաւագները, կիսասարկաւագները, դպրաց դասի անդամներն ու անոնց ընտանիքները՝ Պէյսայտի «Սեւան» ճաշարանին մէջ։ Ճաշկերոյթը, որուն ծախսերը հոգաց Ս. Սարգիսի երկարամեայ ծխականներէն՝ տիկ. Մարի Արսլանեան, կը վայելէր թեմիս առաջնորդ Գերշ. Տ. Անուշաւան արք. Դանիէլեանի հովանաւորութիւնը։ Անուշաւան Սրբազան Հայրը եւ Տ. Նարեկ քհնյ. Թրռեանը ջերմ խօսքերով գնահատեցին սարկաւագներուն, կիսասարկաւագներուն եւ դպրաց դասի նուիրումը եկեղեցւոյ եւ յիշեցին, թէ առանց անոնց Ս. Պատարագ պիտի չըլլար։ Ներկաները իրենց շնորհակալութիւնը յայտնեցին, ինչպէս եւ ուրախութիւնը՝ Ս. Սարգիսի մեծ ընտանիքի անդամները ըլլալու։ 

ՄԵՐ ԴՊՐՈՑՆԵՐԷՆ

ԿԻՐԱԿՆՕՐԵԱՅ ԴՊՐՈՑԻՆ ՀԱՆԴԷՍԸ

Նորթ Անտովըրի Ս. Գրիգոր եկեղեցւոյ կիրակնօրեայ դպրոցին աշակերտները Ս. Ծննդեան հանդէս մը ներկայացուցին Կիրակի, 6 Յունուարին։ Նկարին մէջ, աշակերտները կ՚երեւին Տ. Ստեփան քհնյ. Պալճեանի եւ իրենց ուսուցիչներուն ու տնօրէնութեան հետ։ 

ԱՇԱԿԵՐՏՆԵՐԸ ՀԱՂՈՐԴՈՒԹԻՒՆ Կ՚ԱՌՆԵՆ ՆԻՒ ՃԸՐԶԻԻ ՄԷՋ

Կիրակնօրեայ եւ «Նարեկ» շաբաթօրեայ վարժաններու աշակերտներ Ս. Վարդանանց եկեղեցւոյ մէջ (Ռիճֆիլտ, Նիւ Ճըրզի) հաղորդութիւնը ստացան Նոր Տարուան եւ Ս. Ծնունդի առթիւ։

Կիրակնօրեայ եւ շաբաթօրեայ վարժարաններու աշակերտները Տ. Յովնան քհնյ. Պօզոյեանի, ուսուցիչներու եւ օժանդակ անձնակազմի հետ՝ Ս. Վարդանանց եկեղեցւոյ մէջ

ԱՌՆՕ ԲԱԲԱՋԱՆԵԱՆ (Ծնունդ՝ 22 Յունուար 1921)

Առնօ Բաբաջանեան Խորհրդային Հայաստանի ամենէն կարեւոր երաժիշտներէն մէկն էր, բայց նաեւ լաւ ծանօթ էր Խորհրդային Միութեան մէջ, յատկապէս որպէս փայլուն դաշնակահար։ Ծնած է Երեւան, 22 Յունուար, 1921ին։ Մանկութեան ընկերը՝ երգահան Ալեքսանդր Յարութիւնեանը, յիշած է, թէ հինգ կամ վեց տարեկանին, ապագայ երաժիշտը փորձած է լրջօրէն նուագել մանկապարտէզի հին դաշնակին վրայ։  Բաբաջանեան պատմած է Արամ Խաչատուրեանի հետ իր առաջին հանդիպումին մասին։ Մանկապարտէզի տարիներուն, «Սուրերու պար»ի յօրինողը՝ Ա ․ Խաչատուրեան, այցելութիւն մը տուած է ու խնդրած, որ երեխաները երգէին՝ անոնց երաժշտական լսողութիւնը գնահատելու համար։ Փոքրիկ Առնոն կ՚երգէր ու գետինը կը զարնէր միաժամանակ։ Խաչատուրեանը ապշած էր, յայտնելով, թէ այդ երեխան պէտք է անպայման երաժշութեամբ զբաղէր։ 1929ին Բաբաջանեան մտած է Կոմիտասի անուան պետական երաժշտանոցին կից գործող երաժշտական դպրոցը, իսկ յաջորդ տարի գրած է իր առաջին յօրինումը՝ «Պիոներական մարշ», զոր Եղիշէ Չարենց օգնած է հրատարակել։ Այնուհետեւ, ան մեկնած է Մոսկուա, ուր մէկ անգամէն ընդունուած է Գնեսինեան ուսումնարանի վերջին դասարանը։ Ուսումնարանը աւարտելէ ետք, ուսանած է Մոսկուայի Չայկովսկիի անուան երաժշտանոցը (յատուկ դաշնակի բաժինը)։ 1942ին վերադառնալով Երեւան, մտած է պետական երաժշտանոց, զոր աւարտած է 1947ին, իսկ յաջորդ տարի նոյնպէս աւարտած է Մոսկուայի Չայկովսկիի անուան երաժշտնոցը։ Մինչ այդ, 1946-1948ին իր ուսումը կատարելագործած է Մոսկուայի Հայաստանի Մշակոյթի Տան կից արուեստանոցին մէջ։ Ան դարձած է նշանաւոր դաշնակահար մը, որ նշանաւոր էր իր սեփական գործերու կատարումներով։ Հայաստան վերադառնալով, 1950-1956ին Բաբաջանեան դասաւանդած է Կոմիտասի անուան երաժշտանոցին մէջ, որմէ ետք հաստատուած է Մոսկուա, ուր պիտի ապրէր ու աշխատէր մինչեւ կեանքին վերջը։ Անոր բնատուր տաղանդն ու վառ երաժշտական պատկերը զինք դարձուցած են խորհրդային երաժշտութեան հանրածանօթ դէմք մը։ Իր կազմաւորման տարիներուն, Բաբաջանեանի ոճը կրած է Խաչատուրեանի եւ Սերգէյ Ռախմանինովի ազդեցութիւնը, ինչպէս կը յայտնուի վաղ շրջանի յօրինումներուն մէջ, ինչպէս դաշնակի (1944) եւ ջութակի՝ նուախումբի համար (1949) համերգներուն մէջ։ Անոր կոթողական «Հերոսական բալլադ»ը (1950) տարի մը ետք Խորհրդային Միութեան պետական մրցանակին արժանացաւ։ Նոյն տարին, ան Ալ. Յարութիւնեանի հեղինակակցութեամբ յօրինեց լայն ժողովրդականութիւն վայելող «Հայկական ռապսոդիա»ն։ Դաշնակի ու ջութակի սոնաթը (1959) եւ թաւջութակի համերգը (1962) ուժական երաժշտական լեզուով եւ ուժեղ հակադրութիւններով բնորոշուած են։ Բաբաջանեանի դաշնակի յօրինումներէն շատեր, ինչպէս՝ «Էլեգիա» եւ «Վաղարշապատի պար», ամբողջ աշխարհի հայ դաշնակահարներու նախասիրած կտորներէն են։ 1960ին երգահանը Հայաստանի ժողովրդական արուեստագէտի, իսկ 1971ին՝ Խորհրդային Միութեան ժողովրդական արուեստագէտի տիտղոսները ստացած է։ Ան շահած է Հայաստանի պետական մրցանակը 1966ին՝ նորարարական «Վեց պատկեր» գործին համար (1965)։ Բաբաջանեան աշխատած է երաժշտական տարբեր սեռերով՝ դասական, էսդրատային եւ ճազ։ Գործակցած է ռուս լաւագոյն բանաստեղծներու հետ, ինչպէս Եւգենի Եւտուշենկօ, Անդրէյ Վոզնեսենսկի եւ Ռոբերտ Ռոժդեսվենսկի, յօրինելով ռուսերէն երգեր, բայց նաեւ յօրինած է էսդրատային ու ճազի երգեր՝ հայերէնով, որոնք լայն ժողովրդականութիւն վայելած են ատենին։ Ան գրած է Ուիլիըմ Սարոյեանի «Իմ սիրտը լեռներուն վրայ է» թատերախաղին երաժշտութիւնը, ինչպէս եւ բազմաթիւ համբաւաւոր շարժանկարներու երաժշտութիւնները՝ «Որոտման արահետներով» (1956), «Անձամբ ճանաչում եմ» (1957), «Առաջին սիրոյ երգը» (1958, համահեղինակ՝ Ղազարոս Սարեան), «Հարսնացուն հիւսիսից» (1975), «Երջանկութեան մեխանիկան» (1982, Հայաստանի պետական մրցանակ 1983ին) եւ այլն։ Առնօ Բաբաջանեան մահացած է Մոսկուայի մէջ, 11 Նոյեմբեր, 1983ին։ Մայրաքաղաքի փողոցներէն մէկը անոր անունը կը կրէ, ինչպէս եւ Կարապներու լիճին մօտ զետեղուած է իր արձանը։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ  ( www.armenianprelacy.org )։

ՍՈՒՐԻԱՀԱՅ ՀԱՄԱՅՆՔԸ ՍԿՍԱԾ Է ՎԵՐԱՇԻՆՈՒԹԵԱՆ

Կռիւն ու ռմբակոծումները վերջ գտած են։ Հիմա վերաշինութեան դժուարին գործընթացը սկսած է։ Շարունակեցէք սուրիահայութիւնը ներկայ պահել ձեր աղօթքներուն մէջ ու քսակներէն բաժին յատկացնել։  Սուրիահայութեան Օգնութեան Ֆոնտին նուիրատուութիւնները կարելի է առցանց կատարել։   Անմիջապէս նուէր մը կատարելու համար, սեղմեցէ՛ք այստեղ եւ ընտրեցէ՛ք SYRIAN ARMENIAN RELIEF։ Այլապէս, ձեր նուիրատուութիւնը ղրկեցէք հետեւեալ հասցէին՝ Armenian Prelacy 138 E. 39 th Street New York, NY 10016 Չէքերը գրեցէք Armenian Apostolic Church of America անունին (Memo: Syrian Armenian Relief) Շնորհակալութիւն ձեր օժանդակութեան համար։

ԴՈՒՍՏՐԸ ԱՆՀԵՏԱՑԱԾ ՉԷ Թերեւս ծանօթ է ձեզի, որ անգլերէն daughter (աղջիկ զաւակ) բառը իր նմանը ունի հայերէնի մէջ։ Կամ թերեւս՝ ո՛չ։ Անգլերէն daughter բառը կը բխի նախագերմանական *duhter բառէն (աստղանիշը կը յիշէ գրաւոր կերպով չաւանդուած բառեր), իսկ վերջինիս բուն արմատը նախահնդեւրոպական լեզուէն է ( *d ʰ ughter )։ Միեւնոյն արմատէն ծագած է գրաբարեան դուստր բառը, որ dustr կը հնչուէր Մեսրոպ Մաշտոցի ժամանակ, ինչպէս եւ արեւելահայերէն՝ այսօր։ Յիշենք, ի դէպ, որ դուստր բառը իր համապատասխան արական բառը ունէր՝ ուստր (մանչ զաւակ), որ արդի հայերէնէն բոլորովին անհետացած է այսօր, բացի երբ գրական լեզուի մէջ «ուստր եւ դուստր» կապակցութեան կը հանդիպինք։ Դուստր բառը տակաւին կը գործածուի արեւմտահայերէնի մէջ, թէեւ աւելի պաշտօնական կամ գրական լեզուով, քանի որ աղջիկ բառը զայն ամբողջութեամբ փոխարինած է խօսակցականին մէջ (կ՚ըսենք՝ «աղջիկ մը ունեցաւ», ո՛չ թէ «դուստր մը ունեցաւ»)։ Սակայն, դուստր բառէն ծագում առած ու մինչեւ այսօր գործածութեան մէջ է արքայադուստր բառը, որ «իշխանուհի» բառին աւելի ճշգրտուած ձեւն է (մէկը կրնայ իշխանական տան մը պատկանիլ եւ իշխանուհի ըլլալ, բայց ո՛չ՝ թագաւորական տան եւ թագաւորի աղջիկ ըլլալ)։ Ամէն պարագայի, դուստր բառը աւելի գործածական է արեւելահայերէնով, եւ Հայաստանի մէջ նոյնիսկ առեւտրական ընկերութիւններ կը գտնէք, որոնք «Դուստր Մարիաննա» կամ «Դուստր Յասմիկ» կը կոչուին։ Կ՚արժէ, վերջապէս, յիշել դուստր բառի հետաքրքրական կիրարկում մը անկախութեան տարիներուն։ Արեւելահայերէնը օգտագործած է զայն՝ անգլերէն subsidiary (ընկերութիւն մը, որ բաժնետէր ընկերութեան մը վերահսկողութեան տակ կը գտնուի) բառին հայերէնը ստեղծելու համար։ Ահա թէ ինչու այսօր ընդհանրացած է դուստր ձեռնարկութիւն բառակապակցութիւնը։ Լեզուն կենդանի արարած մը կարելի է սեպել, իսկ մեռած կամ անգործածական բառերը երբեմն կեանքի կը կոչուին անսպասելիօրէնս։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org )  

ԵՐԿՈՒՇԱԲԹԻ՝ ՊԵՏԱԿԱՆ ԱՐՁԱԿՈՒՐԴ

Երկուշաբթի, 21 Յունուար, Մարթին Լութըր Քինկի օրն է՝ պետական արձակուրդ մը, որ հաստատուած է քաղաքացիական իրաւունքներու ղեկավարին անունով, որ 1968ին սպանուած է Մեմֆիսի մէջ (Թենըսի նահանգ)։ “Կը յուսամ, որ կարենաք քիչ մը մխիթարութիւն գտնել քրիստոնէութեան այն հաստատումէն, թէ մահը վախճանը չէ։ Մահը վերջակէտ մը չէ, որ կեանքի մեծ նախադասութիւնը կ՚աւարտէ, այլ՝ ստորակէտ մը, որ աւելի վսեմ իմաստով կը կէտադրէ զայն։ Մահը անել փողոց մը չէ, որ մարդկային ցեղը անէութեան վիճակի մը կը կ՚առաջնորդէ, այլ՝ բաց դուռ մը, որ մարդը կ՚առաջնորդէ դէպի յաւերժական կեանք։ Թոյլ տուէք, որ այս յանդուգն հաւատքը, այս մեծ անյաղթ ենթադրութիւնը ձեզ կանգուն պահող ուժը ըլլայ փորձութեան այս օրերուն» ( Մարթին Լ. Քինկի արտասանած դամբանականէն, զոր խօսած է չորս սեւամորթ աղջնակներու համար, որոնք կիրակնօրեայ դպրոց կը յաճախէին Պիրմինկհըմի մէջ, Ալապամա, Քու Քլուքս Քլանի կողմէ ռմբահարումի մը զոհ դառնալէ առաջ)։

ԵԹԷ ԸՍԵԼԻՔ ՈՒՆԻՔ...

. . . գրեցէք մեզի crossroads@armenianprelacy.org հասցէին։   Մեր ելեկտրոնային շաբաթական լրատուի՝ “CROSSROADS”-ի մասին ձեր կարծիքն ու ձեր առաջարկները մեզ շատ կը հետաքրքրեն։ Ա՛յս նպատակով հաստատեցինք նամակագրութեան վերի յատուկ հասցէն։  

ԺԱՄԱՆԱԿԱՑՈՅՑ

«Սիամանթօ» լսարանի դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝ anec@armenianprelacy.org   կամ՝  212-689-7810։  26 Յունուար —«Կեանք ու կռիւ»՝ Արցախի հերոսամարտին նուիրուած ֆիլմի ցուցադրութիւն, Կրէնիթ Սիթիի Ս. Գրիգոր Լուսաւորիչ եկեղեցւոյ սրահին մէջ: 16 Փետրուար —Վալենթայնի օրուան ճաշկերոյթ-պարահանդէս, Նիւ Ճըրզիի «Շաքէ» մասնաճիւղի կազմակերպութեամբ, ի նպաստ ՀՕՄի ծրագիրներուն եւ Ս. Վարդանանց եկեղեցւոյ, Ս. Աստուածածին ասորի եկեղեցւոյ սրահին մէջ, Փարամըս։ 17 Մարտ —“Musical Armenia” համերգ, ժամը 2:00ին, Carnegie Hallի Weill Recital Hallի մէջ, Ազգ. Առաջնորդարանի հովանաւորութեամբ։ Երաժիշտներ՝ Էդուարդ Պօղոսեան (թաւջութակ), Քարա Պօղոսեան (ջութ), Վաչէ Ճամպազեան (դաշնակ)։  5 Մայիս —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակ։ Թուականը նկատի ունեցէք։

Follow us on Social Media

‌ ‌

The Armenian Prelacy  Tel: 212-689-7810 ♦ Fax: 212-689-7168 ♦ Email: email@armenianprelacy.org Visit the Catholicosate webpage at  http://www.armenianorthodoxchurch.org/en/