ᓇᓗᓇᐃᖅᓯᒋᑦ ᐅᕙᑉᑎᓐᓄᑦ ᐱᓕᕆᐊᒃᓴᕆᔭᕐᓂᒃ ᐊᐅᓚᑦᑎᔨᒃᑯᑦ ᑲᑎᒪᔨᖏᓐᓂᒃ.
ᑲᒪᒋᔭᕆᐊᖃᖅᑕᕋ ᐊᐅᓚᑦᑎᓂᕐᒧᑦ ᑲᑎᒪᔨᓂᑦ ᐃᖅᑲᓇᐃᔭᖅᑎᑦᑎᔪᒧᑦ ᑭᒡᒐᖅᑐᐃᔨ. ᑐᓂᓯᖃᑦᑕᖅᑐᖓ ᑐᓂᔭᐅᔪᓂᑦ ᐊᒻᒪ ᐃᓱᒪᒋᔭᐅᔪᓂᑦ ᐃᖅᑲᓇᐃᔭᖅᑎᑦᑎᔪᓄᑦ ᓄᓇᑦᓯᐊᒥᑦ ᐊᒻᒪᓗ ᓄᓇᕗᒻᒥ ᑐᓐᖓᓂᖃᖅᑐᓂ ᐅᕙᖓ ᐊᑐᖃᑦᑕᖅᓯᒪᓂᖓᓄᑦ ᐃᖅᑲᓇᐃᔭᖅᑎᑦᑎᔨᐅᓪᓗᖓ.
ᖃᓄᖅ ᐊᑯᓂᐅᑎᒋᔪᖅ ᐊᐅᓚᑦᑎᔨᒃᑯᑦ ᑲᑎᒪᔨᖏᓐᓂᒃ ᐃᓚᐅᖃᑕᐅᓕᖅᐱᑦ, ᐊᒻᒪᓗ ᓱᖕᒪᑦ ᐃᓚᐅᖃᑕᐅᔪᒪᓕᓚᐅᖅᐱᑦ?
ᐃᓚᒋᔭᐅᓯᒪᓕᖅᑐᖓ ᐊᐅᓚᑦᑎᓂᕐᒧᑦ ᑲᑎᒪᔨᓂᑦ ᑎᓴᒪᓂᑦ ᐊᕐᕌᒍᓂᑦ. ᕿᓚᓈᓚᐅᖅᑐᖓ ᓄᑖᒥᑦ ᐊᑐᓂᕐᒥᑦ ᐊᒻᒪ ᐊᔅᓱᕈᕈᑕᐅᔪᓂᑦ ᓴᖅᑭᑦᑎᒐᔭᖅᑕᖏᑦ. ᐃᓪᓗᓕᐅᕐᓂᕐᒥᑦ ᐱᓕᕆᖃᑦᑕᖅᓯᒪᓪᓗᖓ, ᐃᓱᒪᒋᓚᐅᖅᑕᕋ ᑐᓂᓯᓗᖓ ᐅᕙᖓ ᐊᑐᖃᑦᑕᖅᓯᒪᔭᖏᓐᓕᓂᑦ ᐊᒻᒪ ᐃᓱᒪᒋᔭᕐᓂᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᑯᓐᓄᑦ.
ᖃᓄᖅ ᐱᓕᕆᕝᕕᖕᒥ ᐊᑦᑕᓇᖅᑐᖃᖅᑕᐅᓕᒪᑎᑦᑎᓂᖅ ᑐᑭᖃᖅᐸ ᐃᓕᖕᓄᑦ?
ᐊᑦᑕᓇᐃᖅᓯᒪᓪᓗᓂ ᐃᖅᑲᓇᐃᔭᖅᑐᓂ ᐅᕙᓐᓄᑦ ᐱᒻᒪᕆᐅᔪᖅ (ᐃᓱᒪᒋᓪᓗᒍ ᓴᓇᕐᕈᑏᑦ ᐊᑐᖅᑕᐅᔪᑦ ᐅᕙᖓ ᐃᖅᑲᓇᐃᔭᕐᕕᖓᓂᑦ, ᐃᒻᒥᓂᒃ ᐋᓐᓂᕈᓐᓇᒻᒪᕆᑦᑐᖓ ᐊᒻᒪ/ᐅᕝᕙᓘᓐᓃᑦ ᐊᓯᓐᓂᑦ). ᐃᖅᑲᓇᐃᔭᕐᕕᒋᕙᑦᑕᕋ ᐊᕙᑎᖓ ᐊᑦᑕᓇᖅᑐᒦᑎᑦᑎᒍᓐᓇᖅᑐᖅ. ᐊᖏᕋᕈᒪᔪᖓ ᐋᓐᓂᖅᓯᒪᖏᓪᓗᖓ ᐅᓐᓄᑕᒫᑦ ᐊᒻᒪ ᐊᓯᒃᑲ ᑕᐃᒫᔅᓴᐃᓐᓇᖅ ᐱᖁᒻᒥᔭᒃᑲ. ᖃᐅᔨᒪᓗᒋᑦ ᐱᔪᓐᓇᐅᑎᑎᑦ ᐃᖅᑲᓇᐃᔭᖅᑎᐅᓪᓗᑎᑦ ᐱᒻᒪᕆᐅᒻᒥᔪᖅᑕᐅᖅ; ᒪᒃᑯᑦᑐᐃᑦ ᐃᖅᑲᓇᐃᔭᖃᑕᐅᓕᕋᑖᖅᑐᑦ ᐅᔾᔨᕈᓱᒋᐊᓖᑦ ᐱᔪᓐᓇᐅᑎᖏᓐᓂᑦ ᐃᖅᑲᓇᐃᔭᖅᑎᐅᓪᓗᑎᑦ ᐊᒻᒪ ᑲᒪᒋᔭᕆᐊᖃᖅᑕᖏᑦ ᐃᖅᑲᓇᐃᔭᖅᑎᑦᑎᔪᑦ.
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ 7-ᓂᒃ ᐱᒻᒪᕆᐅᑎᑦᑎᖕᒪᑕ. ᓇᓗᓇᐃᖅᓯᔪᓐᓇᖅᐱᑦ ᐊᑕᐅᓯᕐᒥᒃ ᐊᒻᒪᓗ ᑐᑭᓯᑎᑦᑎᒋᐊᕐᓗᑎᑦ ᓱᖕᒪᑦ ᐱᒻᒪᕆᐅᖕᒪᖔᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᐅᓚᑦᑎᔨᒃᑯᑦ ᑲᑎᒪᔨᖏᑦ?
ᐃᓚᐅᑎᑦᑎᓂᖅ. ᐃᓚᐅᖃᑕᐅᓂᖏᒃᑯᑎ ᓄᓇᓕᐅᔪᖅ ᐱᔨᑦᑎᖅᑕᕗᑦ, ᑲᑐᔾᔨᖃᑎᒌᖑᓪᓗᑕ ᐅᖃᐅᓯᖃᑐᐃᓐᓇᖅᑐᒍᑦ ᐃᓚᐃᓐᓇᖓᓂᑦ ᐅᓂᒃᑳᒥᑦ. ᐱᖃᑕᐅᑎᑦᑎᓂᖅ ᐱᔾᔪᑎᖃᖅᑐᖅ ᐅᖃᖃᑎᒌᓐᓂᕐᒥᑦ, ᑐᑭᓯᓗᒋᑦ ᐱᔭᐅᔭᕆᐊᖃᖅᑐᑦ ᑎᒍᒥᐊᖅᑎᐅᖃᑎᑦᑎᓐᓄᑦ ᐊᒻᒪ ᐱᐅᓛᒥᑦ ᐱᓇᓱᐊᕐᓗᑕ ᑎᑭᓐᓂᐊᕐᓗᒋᑦ ᑕᐃᒃᑯᐊ ᐱᔭᐅᔭᕆᐊᓖᑦ.
ᓱᓇ ᖁᕕᐊᒋᓂᖅᐹᕆᕕᐅᒃ ᐊᐅᓚᑦᑎᔨᒃᑯᓐᓄᑦ ᑲᑎᒪᔨᐅᖃᑕᐅᑎᓪᓗᑎᑦ, ᐊᒻᒪᓗ ᓱᖕᒪᑦ?
ᖁᕕᐊᒋᔭᕋ ᐃᓚᒋᔭᐅᓪᓗᖓ ᑖᔅᓱᒧᖓ ᑲᑐᔾᔨᖃᑎᒌᒧᑦ. ᐃᓱᒪᒋᔭᕋ ᐱᒻᒪᕆᐅᓪᓗᓂ ᐃᖅᑲᓇᐃᔮᖑᔪᖅ ᐊᒻᒪ ᐃᑲᔪᕈᒪᔪᖓ ᑲᔪᓯᑎᓪᓗᒍ ᑕᐃᒪᐃᒍᓐᓇᕐᓗᖓ, ᐱᓗᐊᖅᑐᒥᑦ ᒪᒃᑯᑦᑐᑎᓐᓄᑦ ᐃᖅᑲᓇᐃᔭᕆᐊᓕᕋᑖᖅᑐᓄᑦ. ᐃᓚᖏᓐᓂᑦᑕᐅᖅ ᐱᖃᓐᓇᓕᐅᖅᓯᒪᑦᑎᐊᖅᑐᖓ ᑲᑎᒍᓐᓇᓚᐅᕋᔭᖏᑕᕋᓗᐊᒃᑲ.
ᖃᕋᓴᐅᔭᒃᑯᑦ ᐊᐅᓚᑦᑎᓂᕐᒧᑦ ᑲᑎᒪᔩᑦ ᐃᓚᒋᔭᐅᔪᖅ ᕋᐃᔅᓱᓪ ᒪᑯᕼᐅᓂᐅᒃ.
ᑲᑎᒪᔩᑦ ᐊᐅᓚᑦᑎᔨᖏᑦ ᐱᔭᕆᐊᓕᖏᓐᓂᑦ ᐱᔪᒪᔭᖏᓐᓂᓪᓗ ᑭᒡᒐᖅᑐᐃᓲᑦ ᑎᒍᒥᐊᖅᑎᖁᑎᑦᑎᓐᓂᑦ. ᐱᒻᒪᕆᐅᔪᑦ ᑐᑭᒧᐊᑦᑎᑕᐅᓪᓗᑎᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑕᒪᐃᓐᓂ ᐃᓱᒪᒃᓴᖅᓯᐅᖃᑦᑕᕐᓂᖏᑎᒍᑦ ᐊᑐᐊᒐᑦᑎᓐᓂᑦ, ᐃᓕᖅᑯᓯᑦᑎᓐᓂᑦ, ᐊᒻᒪᓗ ᐊᐅᓚᓂᑦᑎᓐᓂᑦ ᐊᒻᒪᓗ ᖃᓄᖅ ᐊᑦᑐᐃᓂᖃᓲᖑᒻᒪᖔᕐᒥᒃ ᑎᒍᒥᐊᖅᑎᖁᑎᑦᑎᓐᓂᑦ. ᐊᐅᓚᑦᑎᔩᑦ ᑲᑎᒪᔨᖏᑦ ᑭᒡᒐᖅᑐᐃᓲᑦ ᐱᔭᕆᐊᓕᔅᓯᖕᓂᑦ ᐱᔪᒪᔭᔅᓯᓂᓪᓗ.
ᑎᑎᖅᑲᓕᐅᕐᓂᐊᑕᑦᑎᓐᓂᑦ, ᖃᐅᔨᒃᑲᓛᖅᐸᑦᑎᒋᑦ ᐊᑐᓂᑦ ᑭᒃᑰᒻᒪᖔᕐᒥᒃ ᐊᐅᓚᑦᑎᓂᕐᒧᑦ ᑲᑎᒪᔨᖁᑎᕗᑦ. ᓴᖅᑭᑎᑦᑎᓚᐅᖅᑳᖅᑎᓐᓇᑕᓕ, ᐃᓕᓐᓂᐊᒃᑲᓐᓂᕆᑦ ᐊᐅᓚᑦᑎᔩᑦ ᑲᑎᔨᖏᑕ ᒥᒃᓵᓄᑦ ᑕᑯᓂᐊᕐᓗᒍ ᐃᑭᐊᖅᑭᕕᕗᑦ.
