ՏԻԿ. ԼՈՒԻԶ ՄԱՆՈՒԿԵԱՆ-ՍԻՄՈՆ ՈՉ ԵՒՍ Է

Ազգ. Առաջնորդարանը ցաւով իմացաւ Հայ Եկեղեցւոյ ու ազգի բարերար տիկ. Լուիզ Մանուկեան-Սիմոնի մահուան մասին, 85 տարեկան հասակին։ Թաղման արարողութիւնը տեղի պիտի ունենայ նեղ ընտանեկան շրջանակի մէջ։

Հանգուցեալը դուստրն էր Ալեք եւ Մարի Մանուկեանի, ու շարունակած էր իր ընտանիքի բարեգործական ժառանգութիւնը։ Հօրը յաջորդած է իբրեւ Հայկական Բարեգործական Ընդհանուր Միութեան (ՀԲԸՄ) նախագահ եւ Հայց. Առաքելական Եկեղեցւոյ, ի մասնաւորի՝ Ս. Էջմիածնի, իր մնայուն աջակցութիւնը ցուցաբերած։ Մասնաւոր յիշատակութեան արժանի է անոր կարեւոր դերակատարութիւնը 1988ի աւերիչ երկրաշարժէն ետք Հայաստանի օժանդակութեան գործին, ինչպէս եւ մարդասիրական անհրաժեշտ օգնութեան հայթայթումին մէջ՝ անկախութեան առաջին տարիներուն։

Աստուած հոգին լուսաւորէ։

ՀՈԳԵՀԱՆԳԻՍՏ՝ ԱՐԵՒԵԼԵԱՆ ԹԵՄԻՆ ԾԱՌԱՅԱԾ ՀՈԳԵՒՈՐԱԿԱՆՆԵՐՈՒ ՅԻՇԱՏԱԿԻՆ

Ս. Ղեւոնդեանց տօնին զուգընթաց, Արեւելեան թեմի ծուխերը յատուկ հոգեհանգիստ պիտի կատարեն այս Կիրակի, 24 Փետրուարին, թեմիս ծառայած հանգուցեալ հոգեւորականներու յիշատակին։

Երախտագիտութեամբ եւ մեծարանքով կը յիշենք՝

Ն.Ս.Օ.Տ.Տ. Զարեհ Ա. Կաթողիկոս, Ն.Ս.Օ.Տ.Տ. Խորէն Ա. Կաթողիկոս, Ն.Ս.Օ.Տ.Տ. Գարեգին Ա. Կաթողիկոս եւ Ծայրագոյն Պատրիարք Ամենայն Հայոց, Հրանդ արք. Խաչատուրեան, Մեսրոպ արք. Աշճեան, Սմբատ արք. Լափաճեան, Տ. Վաղինակ վրդ. Սիսակեան, Տ. Ղեւոնդ Ծ. վրդ. Մարդուկէսեան, Տ. Նշան վրդ. Փափազեան, Տ. Պարոյր վրդ. Էքմէքճեան, Տ. Օշական Ծ. վրդ. Մինասեան, Տ. Մեսրոպ քհնյ. Ամրիկեան, Տ. Արսէն քհնյ. Վարժապետեան, Տ. Մատթէոս Ա. քհնյ. Մաննիկեան, Տ. Պետրոս քհնյ. Մամբրելեան, Տ. Ստեփանոս քհնյ. Կարապետեան, Տ. Մեսրոպ քհնյ. Տէր Յովհաննէսեան, Տ. Յուսիկ քհնյ. Նախնիքեան, Տ. Ատոմ քհնյ. Մելիքեան, Տ. Եղիշէ քհնյ. Գասպարեան, Տ. Ղեւոնդ քհնյ. Խոսրովեան, Տ. Պետրոս քհնյ. Գասարճեան, Տ. Սահակ Ա. քհնյ. Պալեան, Տ. Ղեւոնդ Ա. քհնյ. Փափազեան, Տ. Բաբգէն Ա. քհնյ. Գասպարեան, Տ. Սահակ քհնյ. Եղիկեան, Տ. Ներսէս Ա. քհնյ. Շահինեան, Տ. Պսակ քհնյ. Սարգիսեան, Տ. Եղիշէ Ա. քհնյ. Մխիթարեան, Տ. Սուրէն Ա. քհնյ. Բաբախեան, Տ. Արսէն Ա. քհնյ. Սիմէոնեանց, Տ. Մովսէս Ա. քհնյ. Տէր Ստեփանեան, Տ. Մամբրէ քհնյ. Պիպեռեան, Տ. Խաչատուր Ա. քհնյ. Կիրակոսեան, Տ. Երուանդ Ա. քհնյ. Երէցեան, Տ. Կոմիտաս քհնյ. Տէր Թորոսեան, Տ. Մովսէս Ա. քհնյ. Շրիգեան, Տ. Տիգրան Ա. քհնյ. Խոյեան, Տ. Սմբատ Ա. քհնյ. Տէր Մխսեան, Տ. Վահան Ա. քհնյ. Ղազարեան, Տ. Աշոտ Ա. քհնյ. Գոչեան, Տ. Արշաւիր քհնյ. Սեւտալեան, Տ. Գուրգէն Ա. քհնյ. Եարալեան, Տ. Արսէն Ա. քհնյ. Յակոբեան, Տ. Սարգիս Ա. քհնյ. Անդրէասեան, Տ. Սահակ Ա. քհնյ. Անտէքեան, Տ. Հմայեակ Ա. քհնյ. Մինոյեան, Տ. Գրիգոր Ա. քհնյ. Հայրապետեան, Տ. Ասողիկ Ա. քհնյ. Գլըճեան, Տ. Վարանդ քհնյ. Պետրոսեան, Տ. Սահակ Ա. քհնյ. Վրթանէսեան, Տ. Վարդան քհնյ. Գասպարեան, Տ. Թորգոմ Ա. քհնյ. Յակոբեան, Տ. Անուշաւան Ա. քհնյ. Արթինեան, Տ. Գեղարդ Ա. քհնյ. Պապողլեան, Տ. Արշակ Ա. քհնյ. Տաղլեան, Տ. Վաչէ Ա. քհնյ. Նագգաշեան, Տ. Վահրիճ Ա. քհնյ. Շիրինեան, Տ. Վարդան Ա. քհնյ. Առաքելեան, Տ. Կորիւն Ա. քհնյ. Շրիգեան, Տ. Զաւէն քհնյ. Փոլատեան, Տ. Արմէն Ա. քհնյ. Իշխանեան, Տ. Մեսրոպ Ա. քհնյ. Թաշճեան, Տ. Նարեկ Ա. քհնյ. Շրիգեան։

Կ՚աղօթենք առ Բարձրեալն Աստուած, որ իր լուսոյ խորաններուն մէջ հանգչեցնէ վերոյիշեալ հոգեւորականներու հոգիները, եւ նոր հոգեւոր հովիւներ պարգեւէ՝ ի խնդիր Հայրատունկ այգւոյն հզօրացման։



ՀՈԳԵՀԱՆԳԻՍՏ՝ ՍՈՒՄԿԱՅԻԹԻ, ՊԱՔՈՒԻ ԵՒ ԿԻՐՈՎԱՊԱՏԻ ԶՈՀԵՐՈՒՆ ՅԻՇԱՏԱԿԻՆ

Թեմիս բարեջան առաջնորդ Գերշ. Տ. Անուշաւան արք. Դանիէլեանի հրամանով, բոլոր ծուխերը հոգեհանգիստ պիտի կատարեն այս Կիրակի, 24 Փետրուարին, ի յիշատակ բոլոր այն հայերուն, որոնք 1988-1990ին զոհ դարձան ատրպէյճանական ջարդերու Սումկայթի, Պաքուի եւ Կիրովապատի մէջ։ Այդ ջարդերուն հետեւանքով, հարիւրաւոր մարդիկ սպաննուեցան եւ աւելի քան 400.000 հոգի բռնագաղթի ենթարկուեցաւ։ Առաջնորդ Սրբազան Հայրը հրահանգած է երկրորդ պնակ մը շրջագայել՝ ի նպաստ զոհերու ընտանիքներուն։

ՀՕՄ-Ի ՅԻՇԱՏԱԿԻ ՕՐ

Անուշաւան արքեպիսկոպոս հրահանգած է բոլոր ծուխերուն նշել ՀՕՄ-ի յիշատակի օրը, այս Կիրակի, 24 Փետրուարին, հոգեհանգիստ կատարելով Հայ Օգնութեան Միութեան բոլոր մահացած անդամներուն եւ բարերարներուն յիշատակին։ Մասնաւորապէս պիտի յիշուին ՀՕՄ-ի հիմնադիրը՝ Է. Ակնունի (Խաչատուր Մալումեան), սպանութեան 104րդ ամեակին առիթով, ինչպէս եւ հետեւեալ բարերարները՝ Ճորճ եւ Պէաթրիս Լազարեան, Լեւոն եւ Սոֆիա Յակոբեան, Գարեգին եւ Վըրճինիա Սիրունեան, Սամուէլ եւ Ագնէս Երեմեան, Արաքսի Բրուտեան, Հայկանոյշ Կարապետեան, Տորիս Նորեան-Լենցի, Ալիս Նորեան, Արփգէս Քիլէրճեան, Յակոբ Ժագ Մուրատեան, Ալիս Հայկազեան-Պերման, Ժընեւիեւ Եքէշեան, Երուանդ եւ Հէլըն Թերզեան, Ալպըրթ եւ Թագուհի Պակեան, Կիրակոս Վափորսըեան, Գուրգէն Ասատուրեան եւ Մարկրէթ Ասատուրեան։

«Հայ Օգնութեան Միութիւնը աւելի քան մէկ դար առաջին գիծին վրայ գտնուած է՝ մարդասիրական օգնութիւն հասցնելով ուր որ պէտք եղած է։ Ան մշտապէս սատար հանդիսացած է մեր դպրոցներուն եւ առհասարակ կրթութեան։ Պատուենք յիշատակը բոլոր անոնց, որոնք ծառայած ու զօրավիգ կանգնած են այս ազնիւ կազմակերպութեան», ըսաւ Սրբազան Հայրը։ 

Տ. ՎԱՀԱՆ ՔՀՆՅ. ԳՈՒՅՈՒՄՃԵԱՆԻ ԱՌԱՋԻՆ Ս. ՊԱՏԱՐԱԳԸ

ՔԸՆԵԹԻՔԸԹԻ ՄԷՋ՝ ԱՌԱՋՆՈՐԴ ՍՐԲԱԶԱՆ ՀՕՐ ՆԱԽԱԳԱՀՈՒԹԵԱՄԲ

Այս Կիրակի, 24 Փետրուարին, Անուշաւան արքեպիսկոպոս պիտի նախագահէ Ս. Պատարագին՝ Նիւ Պրիթընի Ս. Ստեփանոս եկեղեցւոյ մէջ։ Նորօծ Տ. Վահան քհնյ. Գույումճեան իր առաջին Պատարագը պիտի մատուցանէ եւ քարոզէ։ Ձեռնադրութենէն ետք, Տէր Հայրը իր պահեցողութեան ու հոգեւոր պատրաստութեան շրջանը անցուց Ազգային Առաջնորդարանիս յարկին տակ՝ խոկումով, աղօթքով ու ընթերցումով։ Յաւարտ Ս. Պատարագի, ճաշկերոյթ մը տեղի պիտի ունենայ եկեղեցւոյ սրահին մէջ։ 



ԿԱԹՈՂԻԿՈՍԱՐԱՆԸ ՀԱՅ ՄԱՄՈՒԼԻ ՆՈՒԻՐՈՒԱԾ ՀԱՄԱԺՈՂՈՎ ՄԸ ԿԸ ԾՐԱԳՐԷ ՅԱՌԱՋԻԿԱՅ ՅՈՒԼԻՍԻՆ

Ն.Ս.Օ.Տ.Տ. Արամ Ա. Վեհափառ Հայրապետի հռչակած Հայ Մամուլի տարուան առիթով, Մեծի Տանն Կիլիկիոյ կաթողիկոսութեան կազմակերպութեամբ տեղի պիտի ունենայ Հայ Մամուլի նուիրուած համահայկական համաժողով, 2-4 Յուլիս, 2019-ին, Անթիլիասի Մայրավանքին մէջ։

Համաժողովը պիտի ունենայ համահայկական բնոյթ, հետեւաբար համաժողովին պիտի մասնակցին Հայաստանի, Արցախի եւ Սփիւռքի մամուլի խմբագիրներ եւ մամուլի գործիչներ։

Համաժողովը պիտի քննարկէ հայկական լրատուադաշտին այսօրուան մարտահրաւէրները, համագործակցութեան ուղիները, արդիական մեթոտները, տեղեկատուական անվտանգութեան խնդիրները, ապատեղեկատուութեան յարուցած դժուարութիւնները ու ընկերային ցանցերու ունեցած դերը՝ լրատուական աշխարհին մէջ, հայ տպագիր մամուլին այսօրուան տագնապները, հայապահպանման առաքելութեան վերաիմաստաւորումը եւ միջազգային հանրային կարծիքի ձեւաւորման նպաստող գործնական աշխատանքները։



Մամուլի այն գործիչները, որոնք կ ՚ ուզեն ներկայ ըլլալ համաժողովին, պէտք է իրենց դիմումը ուղարկեն Կաթողիկոսարան, մինչեւ 15 Ապրիլ, հետեւեալ հասցէին՝ info@armenianorthodoxchurch.org ։ Անհրաժեշտութեան պարագային կրնան կապ հաստատել Տիար Խաչիկ Տէտէեանին հետ (հեռաձայն՝ +961 4 410001)։



ԱՆՈՒՇԱՒԱՆ ՍՐԲԱԶԱՆ ՀԱՅՐԸ ՊԱՏԱՐԱԳԵՑ ՏԱԿԼԸՍԹԸՆԻ ՄԷՋ՝ 

Ս. ՍԱՐԳԻՍԻ ՏՕՆԻՆ ԱՌԻԹՈՎ

Անուշաւան Սրբազան Հայրը եւ Տ . Նարեկ քհնյ . Թրթռեանը Ս . Սարգիս եկեղեցւոյ խորանի ծառայողներու եւ դպիրներու հետ

Ազգ .  Առաջնորդարանի   գնահատագիրը   ստացող   ծխականները։   Ձախէն   աջ՝   պրն .  ՐաֆֆիՆէնէճեան ,  տիկ .  Էլսի   Հալլաճեան  ( տիկ .  Նայիրի   Պետրոսեանի   անունով ),  տիկ .  ՄաքրուհիԳալաճեան   եւ   տիկ .  Անէդ   Ճիվէլէկեան։

Կիրակի , 17  Փետրուարին ,  Հայց .  Եկեղեցին   նշեց   Ս .  Սարգիս   Զօրավարիտօնը։   Այս   առիթով ,  թեմիս   բարեջան   առաջնորդ `  Գերշ .  Տ .  Անուշաւան   արք . Դանիէլեան   պատարագեց   ու   քարոզեց   Տակլըսթընի  ( Նիւ   Եորք )  Ս .  Սարգիսեկեղեցւոյ   մէջ ։

Յաւարտ   Ս .  Պատարագի ,  հիւրասիրութիւն   մը   տեղի   ունեցաւ  « Չատրճեան » սրահին   մէջ։  « Շուշան   եւ   Յովսէփ   Յակոբեան »  շաբաթօրեայ   դպրոցիաշակերտները   գեղարուեստական   գողտրիկ   յայտագիր   մը   պատրաստածէին։   Անուշաւան   Սրբազան   Հայրը   գնահատագրեր   յանձնեց   ծխականներու՝Ս .  Սարգիս   եկեղեցւոյ   իրենց   երկարամեայ   նուիրումին   համար։



ԱՌԱՋՆՈՐԴ ՍՐԲԱԶԱՆ ՀԱՅՐԸ ՓԱՌԱՏՕՆԻ ՄԵԿՆԱՐԿԻՆ 

ԿԸ ՄԱՍՆԱԿՑԻ

Երեքշաբթի, 19 Փետրուարին, Անուշաւան արքեպիսկոպոս մասնակցեցաւ PostClassical Ensembleի 2020ի գարնան տեղի ունենալիք հայկական փառատօնի մեկնարկին Ուաշինկթընի մէջ։ Այս փառատօնին պիտի ներկայանան թաւջութահար Նարեկ Հախնազարեան, երգահան Վաչէ Շարաֆեան եւ արուեստագէտ Գէորգ Մուրատ, իսկ ձեռնարկները տեղի պիտի ունենան Ազգային պատկերասրահին եւ Ուաշինկթընի Մայր Տաճարին մէջ։ Երեկոն կը հիւրընկալէր Հայաստանի Հանրապետութեան դեսպան՝ Վարուժան Ներսէսեան, դեսպանատան շէնքին մէջ։ Բացման հիւրասիրութեան յաջորդեց կալա-համերգ մը, ապա՝ ընթրիք։ Առաջնորդ Սրբազան Հօր կ՚ընկերանար Պէթեստայի (Մէրիլէնտ) Ս. Խաչ եկեղեցւոյ հոգեւոր հովիւ՝ Տ. Սարգիս քհնյ. Ագթաւուգեան։ 



ԱՌԱՋՆՈՐԴԻ ՀԱՆԴԻՊՈՒՄԸ ՀԱՅ ԱՒԵՏԱՐԱՆՉԱԿԱՆ ԸՆԿԵՐԱԿՑՈՒԹԵԱՆ ՏՆՕՐԷՆԻՆ ՀԵՏ 

Անուշաւան Սրբազան Հայրը եւ Ամերիկայի Հայ Աւետարանչական Ընկերակցութեան գործադիր տնօրէն Զաւէն Խանճեան  

Հակառակ Նիւ Ճըրզիի մէջ տեղի ունեցած ձիւնամրրիկին, Չորեքշաբթի, 20 Փետրուարի յետմիջօրէին, Անուշաւան արքեպիսկոպոս այցելութիւն մը տուաւ Ամերիկայի Հայ Աւետարանչական Ընկերակցութեան (AMAA) կեդրոնատեղիին Փարամըսի մէջ։ Ան կեդրոնատեղիին տարբեր բաժինները այցելեց՝ Ընկերակցութեան գործադիր տնօրէն Զաւէն Խանճեանի ուղեցկութեամբ, որ շնորհաւորեց Առաջնորդ Սրբազան Հայրը իր ընտրութեան ու աստիճանի բարձրացման առիթով։ Թեմիս առաջնորդն ու պրն. Խանճեանը սիրալիր զրոյց մը ունեցան հայ ժողովուրդի իրավիճակին մասին Հայաստանի ու Սփիւռքի մէջ։ Անոնք նաեւ անդրադարձան միջ-եկեղեցական հարցերու եւ բոլոր քրիստոնեաներու միջեւ աւելի զօրաւոր կապի մը կարեւորութեան։



 «ՄԻՒԶԻՔԸԼ ԱՐՄԻՆԻԱ» 2019

1982էն ի վեր Ազգային Առաջնորդարանը կը ներկայացնէ տարեկան «Միւզիքըլ Արմինիա» համերգը՝ հայազգի բազմաթիւ տաղանդաւոր արուեստագէտներ բերելով լուսարձակի տակ։ Այս տարուան համերգը տեղի պիտի ունենայ Կիրակի, 17 Մարտին, կէսօրէ ետք ժամը 2:00ին։ Ասիկա շարքի 36րդ համերգն է, որուն պիտի մասնակցին Քարա Պօղոսեան (ջութ), Էդուարդ Պօղոսեան (թաւջութակ) եւ Վաչէ Ճամպազեան (դաշնակ)։

Քարա Պօղոսեան պրոնզէ մետալ ստացած է «Ֆիշոֆ» սենեկային երաժշտութեան ազգային մրցոյթին, որ նմանօրինակ ամենամեծ մրցոյթն է աշխարհի մէջ։ Ան վերջերս ելոյթ ունեցած է NPR ռատիոկայանի “From the Top” յայտագրին մէջ։ Ան ներկայիս «Քըրթիս» երաժշտական հիմնարկի երկրորդ տարուան ուսանող է եւ Հ.Բ.Ը.Մ.էն կրթաթոշակ ստացած։

«Ճուլիըրտ» դպրոցի համերգի մրցոյթի յաղթական հանդիսանալուն՝ Էդուարդ Պօղոսեան ելոյթ ունեցած է դպրոցի նուագախումբին հետ՝ Նիւ Եորքի «Լինքըն» կեդրոնի եւ Շիքակոյի «Հարրիս» թատերասրահին մէջ։ Պօղոսեան ուսանող է Պելճիքայի «Էլիզապէթ թագուհի» երաժշտական մատուռին մէջ եւ «Ճուլիըրտ» դպրոցի շրջանաւարտ է։

Յայտագրին մաս կը կազմեն Պախի, Պէթհովէնի, Պրամզի, Կոմիտաս վարդապետի, Միրզոյեանի եւ Սպենդիարեանի գործեր։ Համերգը տեղի պիտի ունենայ «Գառնըկի»ի Weill Recital Hall սրահին մէջ (West 57 ^th Street & Seventh Avenue, Նիւ Եորք)։ Տոմսակները (25 տոլար) կարելի է ապահովել «Գառնըկի» սրահէն (212-247-7800) կամ Ազգ. Առաջնորդարանէն (212-689-7810)։

Առաջնորդարանը այս տարեկան համերգը կը ներկայացնէ իբրեւ համայնքի գեղարուեստական իրագործումներու նպաստ մը, մեծ մասամբ շնորհիւ խումբ մը նուիրեալ հովանաւորներու, որոնք ամէն տարի իրենց նիւթական օժանդակութիւնը կը բերեն՝ ծախսերը հոգալու եւ տոմսակներու գինը մատչելի պահելու համար։

«Միւզիքըլ Արմինիա»յի հովանաւոր դարձէք



«Միւզիքըլ Արմինիա»ն հաստատուած է 1982ին, հոգելոյս Մեսրոպ արք. Աշճեանի եւ Ազգ. Առաջնորդարանի Տիկնանց Յանձնախումբի ջանքերով։ Ան նուիրուած է երիտասարդ հայ արուեստագէտներու համբաւը եւ հայ երգահաններու երաժշտութեան մեկնաբանութիւնը տարածելու։ Անցնող 37 տարիներուն, տարեկան այս համերգներուն մասնակիցներէն շատերը ամուր դիրք հաստատած են երաժշտական ասպարէզին մէջ։ 

Ինչպէս ըսինք, տարեկան այս համերգներուն մուտքի գինը մատչելի մնացած է, շնորհիւ՝ հովանաւորներու աջակցութեան։ Իբրեւ հովանաւոր, դուք կարեւոր նպաստ մը կրնաք բերել տաղանդաւոր երաժիշտներու զարգացումին ու յաջողութեան։ Նուիրատուներուն անունները հետեւեալ կարգով կը յիշուին համերգի յայտագրին մէջ ․-

Diamond $1.000        Platinum $500           Gold $300      Silver $200

Diamond, Platinum, եւ Gold հովանաւորները երկու անվճար տոմսակներ կը ստանան։ Յաւելեալ տեղեկութիւններ ստանալու կամ «Միւզիքըլ Արմինիա»յի հովանաւոր դառնալու համար, հաճեցէք կապ հաստատել՝ իմակով ( sophie@armenianprelacy.org ) կամ հեռաձայնով (212-689-7810 x26), Սոֆիին հետ։

BIBLE READINGS

ԿԻՐԱԿԻ, 24 ՓԵՏՐՈՒԱՐ

Զ. ԿԻՐԱԿԻ Ս. ԾՆՈՒՆԴԷՆ ԵՏՔ 

ՏԻՏՈՍ 1:1-11

Ես՝ Պօղոս, Աստուծոյ ծառան եւ Յիսուս Քրիստոսի առաքեալը, կոչուած եմ Աստուծոյ ընտրեալները բերելու հաւատքի եւ ճշմարտութեան ճանաչումին, այն ճշմարտութեան՝ որ աստուածպաշտութեամբ կը գտնուի, որպէսզի յաւիտենական կեանքի յոյսը ունենան: Յաւիտենական ժամանակներէն իսկ առաջ՝ անսուտն Աստուած ինք խոստացաւ այդ կեանքը, իսկ հիմա՝ յարմար ժամանակը հասած համարելով՝ այդ խոստումը յայտնեց իր Աւետարանով, որուն քարոզութեան կոչուեցայ մեր փրկիչ Աստուծոյն հրամանով:

Ո՛վ Տիտոս, մեր հասարակաց հաւատքի ճամբով իմ հարազատ որդիս, թող Հայրն Աստուած եւ մեր փրկիչը Քրիստոս Յիսուս շնորհք եւ խաղաղութիւն պարգեւեն քեզի:

Քեզ Կրետէ թողուցի, որպէսզի եկեղեցիին պէտքերը հոգաս եւ զայն կազմակերպես՝ իւրաքանչիւր քաղաքի մէջ երէցներ կարգելով, ինչպէս որ քեզի պատուիրեցի: Երիցութեան թեկնածուն պէտք է անմեղադրելի ըլլայ, մէկ կնոջ այր ըլլայ եւ հաւատացեալ զաւակներ ունենայ, որոնք անառակութեամբ եւ անհնազանդութեամբ ամբաստանուած չըլլան: Արդարեւ, եպիսկոպոսը՝ որպէս Աստուծոյ տնտես, պէտք է անմեղադրելի ըլլայ: Պէտք չէ յանդուգն, բարկացող, գինեմոլ, կռուազան կամ շահամոլ ըլլայ, այլ՝ հիւրասէր, բարին սիրող, զուսպ, արդար, մաքուր եւ ժուժկալ: Պէտք է ամրօրէն պահէ իր սորված վստահելի վարդապետութիւնը, որպէսզի կարենայ ուղիղ ուսուցումով յորդորել ուրիշները եւ յանդիմանել հակառակորդները:

Որովհետեւ բազմաթիւ անհնազանդներ, դատարկախօսներ եւ միտք պղտորողներ կան, մանաւանդ հրէութենէ դարձածներուն մէջ, որոնց բերանը պէտք է փակել, որովհետեւ անոնք ամբողջ տուներ կը քանդեն, շահամոլութենէ տարուած ուսուցանելով բաներ, որ պէտք չէ ուսուցանել:

 

ՅՈՎՀԱՆՆԷՍ 7:37-52

Տօնին վերջին եւ հանդիսաւոր օրը, Յիսուս ոտքի կանգնած՝ բարձրաձայն կ’ըսէր.

– Ով որ ծարաւ է՝ թող ինծի գայ եւ խմէ: Ով որ ինծի կը հաւատայ, ինչպէս Սուրբ գիրքը կ’ըսէ՝ «Անոր սիրտէն կենսատու ջուրի գետեր պիտի բղխին»:

Յիսուս ասիկա կ’ըսէր Հոգիին համար, որ իրեն հաւատացողները պիտի ընդունէին. իսկ Հոգին տակաւին չէր տրուած, քանի Յիսուս փառաւորուած չէր:

Ժողովուրդէն ոմանք երբ լսեցին այս խօսքերը, ըսին.

– Ասիկա է ճշմարիտ մարգարէն:

Ուրիշներ կ’ըսէին.

– Քրիստոսն է:

Իսկ ոմանք ալ կ’ըսէին.

– Միթէ Գալիլեայէ՞ն պիտի գայ Քրիստոսը: Սուրբ գիրքը չ’ը՞սեր՝ թէ Քրիստոս Դաւիթ թագաւորի սերունդէն պիտի ըլլայ եւ Դաւիթի քաղաքին՝ Բեթլեհէմի մէջ պիտի ծնի:

Եւ Յիսուսի պատճառով տարակարծութիւններ յառաջ եկան ժողովուրդին մէջ: Ոմանք ուզեցին ձերբակալել զինք, բայց ոչ ոք համարձակեցաւ ձեռք զարնել:

Երբ տաճարին պահակները վերադարձան, աւագ քահանաներն ու Փարիսեցիները հարցուցին անոնց.

– Ինչո՞ւ զինք հոս չբերիք:

Պահակները պատասխանեցին.

– Այս մարդուն պէս խօսող երբեք չենք տեսած:

Փարիսեցիները ըսին.

– Ի՞նչ, դո՞ւք ալ խաբուեցաք: Իշխանաւորներէն կամ Փարիսեցիներէն ոեւէ մէկը հաւատա՞ց անոր: Մեր Օրէնքը չգիտցող տգէտ ամբոխը միայն հաւատաց: Անոնք արդէն իսկ նզովուած են:

Նիկոդեմոս, Փարիսեցիներէն մէկը, որ նախապէս գիշերով եկած էր Յիսուսի մօտ, ըսաւ անոնց.

– Արդեօք մեր Օրէնքը մարդս կը դատէ՞ նախքան զինք լսելը եւ գիտնալը թէ ի՛նչ ըրած է:

Անոնք պատասխանեցին Նիկոդեմոսի.

– Միթէ դո՞ւն ալ Գալիլեայէն ես. քննէ՛ Սուրբ գիրքերը եւ պիտի տեսնես, թէ Գալիլեայէն մարգարէ չ’ելլեր:

 

ՃՇ. ԸՆԹԵՐՑՈՒՄ

Եսայի 63:18-64:12

Ս. ՈՍԿԵԱՆՔ

Այսօր, Հինգշաբթի, 21 Փետրուարին, Հայց. Եկեղեցին կը յիշէ Ս. Ոսկեանք քահանաները։ Այս հինգ տղամարդիկը հայոց Սանատրուկ թագաւորին կողմէ Հռոմ առաքուած էին իբրեւ դեսպաններ։ Ճամբուն վրայ, հանդիպած էին Թադէոս առաքեալին, որ զիրենք դարձի բերած ու մկրտած էր։ Անոնց ղեկավարին անունը Ոսկի էր։ Անոնք քառասուն տարի իբրեւ ճգնաւորներ ապրելով լեռներու մէջ, յետոյ քարոզած են արքունիքէն ներս։ Նահատակուած են 107 թուականին։



Ս. ՍԱՀԱԿ ՊԱՐԹԵՒ

Շաբաթ, 23 Փետրուարին, Հայց. Եկեղեցին կ’ ոգեկոչէ Սահակ Պարթեւ կաթողիկոսը, բուռն եւ մեծ առաջնորդ մը, որ կը ճանչցուի իբրեւ մեր եկեղեցւոյ մեծ սուրբերէն մէկը։ Անոր իրագործումները, քաղաքական դժուարագոյն պայմաններու տակ, հայ ազգի գոյատեւումը ապահովեցին։

Ան Ս. Մեծն Ներսէս կաթողիկոսի որդին էր եւ Ս. Գրիգոր Լուսաւորիչի մէկ շառաւիղը։ Որբ մնացած էր փոքր տարիքին, բայց ստացած էր բարձրակարգ կրթութիւն, յատկապէս արեւելեան լեզուներու մէջ։



Ան քաջալերած ու աջակցած է Մեսրոպ Մաշտոցին՝ գիրերու գիւտին մէջ։ Այս մեծ իրադարձութենէն ետք, Սահակ կաթողիկոսը ձեռնարկած է Աստուածաշունչի առաջին թարգմանութեան եւ ուղեցոյց հանդիսացած թարգմանական գրական շարժումին, որ Ոսկեդարու հիմքը դարձաւ։ Ան խորապէս կը հաւատար կրթութեան, ինչպէս եւ եկեղեցական կարգապահութեան ու օրէնքին։ Անոր շնորհիւ, Հայաստան պահեց իր եկեղեցական ու ազգային ինքնուրունութիւնը։ 

Կը կարծուի, թէ Ս. Սահակ մահացած է 437ին, 89 տարեկանին, թէեւորոշ աղբիւրներ աւելի ծեր կը նկատեն զինք։ Անոր մահով, Ս. Գրիգոր Լուսաւորիչի ժառանգական գիծը իր վախճանին հասաւ։



Ս. ՂԵՒՈՆԴԵԱՆՔ

Երեքշաբթի, 26 Փետրուարին, Հայց. Եկեղեցին կը նշէ Ս. Ղեւոնդեանց տօնը։ Վարդանանց պատերազմէն ետք, խումբ մը հոգեւորականներ եւ սարկաւագներ ձերբակալուեցան պարսից թագաւորին կողմէ եւ բանտարկուեցան, այնուհետեւ չարչարուելու եւ սպաննուելու համար։ Ղեւոնդ Երէցը կը յիշուի իբրեւ խումբին ղեկավարը, որովհետեւ ան Վարդան Մամիկոնեանի խորհրդականն էր, եւ Աւարայրի ճակատամարտի նախօրեակին ներշնչող պատգամ մը ուղղած էր հայոց զօրքերուն։ Ղեւոնդ, որ լայն կրթութիւն ունէր, օժանդակած էր Ս. Սահակին եւ Ս. Մեսրոպին՝ Աստուածաշունչի հայերէն թարգմանութեան ընթացքին։



454ին նահատակուած Ղեւոնդեաններն էին՝ Յովսէփ կաթողիկոսը, Սահակ եւ Թաթիկ եպիսկոպոսները, Ղեւոնդ, Մուշեղ, Արշէն, Մանուէլ, Աբրահամ եւ Խորէն երէցները, Գաճաճ եւ Աբրահամ սարկաւագները։

ԱՌԱՋՆՈՐԴԱՐԱՆԻ ՄԵԾ ՊԱՀՔԻ ՅԱՅՏԱԳԻՐԸ ԿԸ ՍԿՍԻ 6 ՄԱՐՏԻՆ

Մեծ Պահոց շրջանը կը սկսի 4 Մարտին։ Ըստ աւանդութեան, Ազգ. Առաջնորդարանի Մեծ Պահքի յայտագիրը պիտի կատարուի Նիւ Եորքի Ս. Լուսաւորիչ Մայր Եկեղեցւոյ մէջ, իրերայաջորդ վեց շաբաթներ, սկսելով Չորեշքաբթի, 6 Մարտին։

Յայտագրին մաս կը կազմեն՝

– եկեղեցական կարճ արարողութիւն մը՝ ժամը 7:00ին, ապա՝

– 20 վայրկեաննոց դասախօսութիւն մը՝ ժամը 7:30ին

– ընթրիք՝ ժամը 8:00ին։

Խօսք պիտի առնեն՝

– Այրիս Փափազեան (6 Մարտ)

– Տ. Նարեկ քհնյ. Թրթռեան (13 Մարտ)

– Տ. Վահան քհնյ. Գույումճեան (20 Մարտ)

– Տ. Ներսէս քհնյ. Մանուկեան (27 Մարտ)

– Տ. Գաբրիէլ քհնյ. Նազարեան (3 Ապրիլ)

– Փրոֆ. Շոպան Նաշ-Մարշալ (10 Ապրիլ)։

Յայտագիրը կը հովանաւորեն՝ Ազգ. Առաջնորդարանի Քրիստոնէական Դաստիարակութեան բաժանմունքը եւ Ս. Լուսաւորիչ Մայր Եկեղեցւոյ Տիկնանց Միութիւնը։ 

ՆԱՄԱԿՆԵՐ ՀԱՅԱՍՏԱՆԷՆ

Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներու առանցքը։ Ծրագրին մաս կը կազմէ հովանաւորուած երեխաներու թղթակցութիւնը իրենց հովանաւորին հետ։

Նամակները յուզիչ ընթերցանութեան նիւթ են։ Առաջին նմոյշը ներկայացուցինք անցեալ շաբաթ “Crossroads”ի մէջ, ինչ որ պիտի շարունակուի պարբերաբար։ Ինքնութեան տուեալները զանց պիտի ընենք հասկնալի պատճառներով։

Բարեւ, իմ սիրելի բարեկամ,

Շնորհաւորում եմ Ձեր եւ Ձեր ընտանիքի անդամների Ամանորը եւ Սուրբ ծնունդը։

Ես .................. եմ, փոխգնդապետ ..................ի դուստրը։ Հայրս զոհուել է 2016 թ. քառօրեայ պատերազմի ժամանակ։

Ես 11 տարեկան եմ, սովորում եմ Գիւմրու թիւ 25 հիմնական դպրոցի V դասարանում։ Դպրոցում սովորում եմ գերազանց, տարեվերջին միշտ ստանում եմ գովասանագիր եւ պատուոյ գիր։ Սիրում եմ բոլոր առարկաները, բայց ամենից շատ սիրում եմ մաթեմատիկա ն, մայրենի լեզուն, անգլերէնը, ռուսաց լեզուն, հայրենագիտութիւնը եւ կերպարուեստը։ Դպրոցում սովորում ենք 3 օտար լեզու՝ գերմաներէն, անգլերէն, ռուսաց լեզու։

Սեպտեմբեր ամսից ընդունուել եմ Ն. Տիգրանեանի անուան թիւ 1 արուեստի դպրոցի վոկալ բաժնի I դասարան։

Յաճախում եմ նաեւ պարի եւ հագուստի մոդելաւոր ման խմբակները։ Շատ եմ սիրում երգել, պարել եւ կարել։

Իմ ընտանիքը բաղկացած է 3 անդամից՝ մայրս, եղբայրս եւ ես։ Ես շատ եմ սիրում իմ ընտանիքին։ Մայրս չի աշխատում, սովորում է Շիրակի պետական համալսարանի կառավարում բաժնի III կուրսում։



Անչափ շնորհակալ եմ Ձեզ, որ ինձ վերցրել էք Ձեր հովանաւորութեան տակ, քանի որ հայրիկիս զոհուելուց յետոյ մենք շատ ենք զգում օգնող ուժի կարիք։

Ձեզ շատ սիրող եւ յարգող՝

Ա.

ՄԵՐ ԾՈՒԽԵՐէՆ

ՏԵԱՌՆԸՆԴԱՌԱՋՒ ՆՇՈՒՄ ՆՈՐԹ ԱՆՏՈՎԸՐԻ ՄԷՋ

Ուրբաթ, 15 Փետրուարին, ծխականները հաւաքուած էին Նորթ Անտովըրի (Մասաչուսեթս) Ս. Գրիգոր եկեղեցւոյ մէջ՝ Տեառնընդառաջը նշելու համար, նախագահութեամբ թեմիս առաջնորդական փոխանորդ՝ Գերպ. Տ. Սահակ Ծ. վրդ. Եմիշեանի։ Եկեղեցւոյ հոգեւոր հովիւ Տ. Ստեփան քհն.յ Պալճեանի կողքին, արարողութեան կը մասնակցէր նաեւ Ուայթընսվիլի Ս. Աստուածածին եկեղեցւոյ հոգեւոր հովիւ՝ Տ. Միքայէլ քհնյ. Տէր Խոսրովեանը։

 

Երեկոյեան աղօթքի արարողութեան ընթացքին, Հայր Սուրբը իր քարոզին ընթացքին շեշտեց Տեառնընդառաջի կարեւորութիւնը իբրեւ կոչ մը բոլոր քրիստոնեայ հայերուս՝ Աստուծոյ ներկայանալու եւ Անոր նուիրեալ ծառաները դառնալու։ Արարողութենէն ետք, եկեղեցականներն ու խորանի ծառաները գլխաւորեցին թափօրը դէպի եկեղեցւոյ շրջակայքը, ուր Հայր Սահակ վառեց խարոյկը։ Ներկաները հոգեւոր ու ազգային երգեր երգեցին։ Այնուհետեւ, բոլոր ծխականները հիւրասիրուեցան Տիկնանց Միութեան պատրաստած ընթրիքով։ Խօսք առնելով, Տ. Ստեփան քհնյ. ողջունեց Հայր Սահակի ներկայութիւնը, շեշտելով, որ ան՝ իբրեւ մօտակայ Ուստըրի Ս. Երրորդութիւն եկեղեցւոյ հովիւ, բազմիցս այցելած է Նորթ Անտովըի եկեղեցին։ Սակայն, ասիկա անոր առաջին այցելութիւնն էր իբրեւ առաջնորդական փոխանորդ, որուն առիթով Տէր Հայրը իր շնորհաւորութիւնները յայտնեց։ Տիկնանց Միութիւնը յատուկ կարկանդակով շնորհաւորեց Հայր Սահակի նոր պաշտօնը։



“SALT & LIGHT” ՊԱՏԱՆԵԿԱՆ ԽՈՒՄԲ

“Salt & Light” պատանեկան խումբը եւ Հ.Ե.Դ.ի Նիւ Եորքի «Հայորդիք» կրտսերներու մասնաճիւղը անցեալ շաբաթավերջին գիշերեցին Տակլըսթընի (Նիւ Եորք) Ս. Սարգիս եկեղեցւոյ մէջ։ Աւելի քան 50 պատանիներ մասնակցեցան՝ 15 չափահասներու ղեկավարութեամբ։ Եկեղեցւոյ հոգեւոր հովիւ Տ. Նարեկ քհնյ. Թրթռեանի, երէցկին Անիի եւ երկու կազմակերպութիւններու ղեկավարներու համատեղ աշխատանքով, կրօնական եւ մշակութային շահեկան յայտագիր մը պատրաստուած էր։

Շաբաթավերջը ա՛լ աւելի յիշարժան դարձաւ թեմիս առաջնորդ Անուշաւան արքեպիսկոպոսին այցելութեամբ՝ Շաբաթ, 16 Փետրուարի առաւօտեան։ Սրբազան Հայրը պատանիներուն խօսեցաւ Ս. Սարգիսի օրուան նշանակութեան եւ սուրբերը պատուելու հայկական սովորութեան մասին։ Տեղի ունեցաւ շահեկան հարց ու պատասխանի բաժին մը։

Անգլերէն ամբողջական մամլոյ հաղորդագրութիւնը կարդալու եւ յաւելեալ լուսանկարեր դիտելու համար, սեղմեցէ՛ք հոս։  



Գրիգոր Գուրզադեան 

(մահ՝ 22 Փետրուար, 2014)

Վիկտոր Համբարձումեանի անունը հոմանիշ դարձաւ աստղագիտութեան Հայաստանի մէջ։ Սակայն, անոր աշակերտներէն մէկը նշանաւոր պիտի դառնար տիեզերական աստղագիտութեան մէջ։



Գրիգոր Գուրզադեան ծնած է 15 Հոկտեմբեր, 1922ին, Պաղտատի մէջ, Մեծ Եղեռնէն վերապրողներու ընտանիքի մը մէջ։ Փոքր երեխայ մըն էր, երբ ընտանիքով ներգաղթած է Հայաստան։ Եղբայրը՝ Սարգիս (1929-2015), որ ծնած էր Երեւան, Կասկադի թաղամասի գեղեցկացման նախագծի համահեղինակը պիտի ըլլար 1970ական թուականներուն։

Գուրզադեան մտած է Երեւանի Պոլիտեխնիկ ինստիտուտը (այժմ՝ Երեւանի պետական ճարտարագիտական համալսարան) եւ շրջանաւարտ եղած է 1944ին՝ ջրային թեքնիքի եւ շինարարութեան ճիւղերէն։ Այնուհետեւ, սակայն, փոխած է ասպարէզը եւ հետեւած՝ աստղագիտութեան։ 1946ին Վ. Համբարձումեանի կողմէ ստեղծուած Բիւրականի աստղադիտարանի հիմնադիրներէն մէկն է, եւ համբաւաւոր աստղագէտի ղեկավարութեան տակ, 1948ին պաշտպանած է իր թեկնածուական ատենախօսութիւնը Մոսկուայի պետական համալսարանին մէջ։ 1948-1978ին դասախօսած է Երեւանի պետական համալսարանին մէջ, եւ 1950-1966ին Բիւրականի աստղադիտարանի աստղերու եւ միգամածութիւններու (nebulae) բնագիտութեան բաժնի վարիչը եղած։

Իր դոկտորական ատենախօսութիւնը 1955ին պաշտպանելով Լենինկրատի (այժմ՝ Ս. Փեթերպուրկ) պետական համալսարանին մէջ, նոյն տարին ամուսնացած է Մարիաննա Քալանթարի հետ, որ ռուսերէնի դասախօս էր եւ դուստրը՝ հայկական հնագիտութեան հիմնադիրներէն Աշխարհբէկ Քալանթարի՝ ստալինեան մաքրագործումներու զոհերէն։ Անոնց զաւակները՝ Վահագն եւ Գագիկ, նոյնպէս ծանօթ բնագէտներ են։

Գ. Գուրզադեան խորհրդային գիտութեան քաջածանօթ անուններէն մէկը դարձած է, հեղինակելով տասը ծաւալուն հատոր եւ աւելի քան 200 գիտական յօդուած՝ ռուսերէնով եւ անգլերէնով։ Ան ուսումնասիրած է միգամածութիւնները եւ մագնիդասական դաշտերու դերը կանխատեսած է 1960ական թուականներէն, աստղային պայթումներու տեսութիւն մը բանաձեւելով։ Ան նաեւ գլխաւորած է արեւու եւ աստղերու ճառագայթումներու ուսումնասիրութիւնը՝ 1960ական թուականներէն տիեզերական աստղադիտակներ արձակելով դէպի անջրպետ։ Յատկապէս նշանաւոր դարձան Գուրզադեանի նախագծած «Օրիոն-1» եւ «Օրիոն-2» աստղադիտակները, որոնք 1971-1973ին աշխատանքի դրուած են։

Հայ գիտնականը 1965ին Հայաստանի Գիտութիւններու Ակադեմիայի թղթակից անդամ ընտրուած է, իսկ 1967-1973ին Բիւրականի տիեզերական հետազօտութիւններու մասնաճիւղի վարիչն էր։ 1973-1978ին Գառնիի աստղագիտութեան աշխատանոցի տնօրէնը եղած է, ուր աւելի քան 40 խորհրդային աստղանաւորդներ իրենց նախաթռիչքային պատրաստութիւնը կատարած են։ 1978ին Բիւրականի արտամթնոլորտային աստղագիտութեան աշխատանոցի վարիչը եղած է՝ մինչեւ 1992, 1979ին՝ Պոլիտեխնիկ ինստիտուտի տիեզերական սարքաշինութեան ամպիոնի վարիչը, իսկ 1992-2004ին Գառնիի աստղագիտութեան ինստիտուտի տնօրէնը։

Իր գիտական բազում իրագործումներուն շարքին, Գուրզադեան 1980ական թուականներէն փնտռուած փորձագիր մը եղած է՝ փիլիսոփայական, գրական ու ժամանակակից նիւթերու մասին արժէքաւոր ուսումնասիրութիւններով, որոնք հաւաքուած են աւելի քան տասնեակ մը հատորներու մէջ։

Ան Հայաստանի գիտութեան վաստակաւոր գործիչ էր (1975), եւ ընտրուած էր Գիտութիւններու Ակադեմիայի ակադեմիկոս՝ 1986ին։ Մահացած է 92 տարեկանին, 22 Փետրուար 2014ին։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org ) 

ՍՈՒՐԻԱՀԱՅ ՀԱՄԱՅՆՔԸ ՍԿՍԱԾ Է ՎԵՐԱՇԻՆՈՒԹԵԱՆ

Կրնա՞ք դիմանալ

Տարբեր առիթներով այս սիւնակին մէջ գրած ենք անգլերէնէ որոշ բառեր եւ արտայայտութիւններ թարգմանելու հարցին մասին։ Ասոնք նոր գաղափարներ չեն, եւ մեզմէ առաջ բազմաթիւ հմուտ հայերէնագէտներ զբաղած են նման խնդիրներով։

Երբեմն՝ լաւ է անոնց վերադառնալ ու բան մը սորվիլ։ Անոնցմէ մէկը Ժիրայր Միսաքեանն էր։ Ժ. Միսաքեանը (1899-1968) կրտսեր եղբայրն էր նշանաւոր հրապարակագիր եւ Փարիզի «Յառաջ» օրաթերթի հիմնադիր Շաւարշ Միսաքեանի։ Շուրջ քառորդ դար Լոնտոն ապրելէ ետք, 1948ին ժամանած է Պոստըն, ուր ապրած է մինչեւ մահը։ Իբրեւ քրոնիկագիր աշխատակցած է «Հայրենիք» օրաթերթին, ուր լոյս տեսած են իր շուրջ 3.000 տոմսեր՝ Եւրոպացի գրչանունով։ (Իր եղբօր աղջիկը՝ Արփիկ Միսաքեանը, որ հօր մահէն ետք շարունակած է «Յառաջ»ը հրատարակել 52 տարի, հրատարակած է այդ տոմսերէն ծաղկաքաղ մը 1961ին)։ Ժիրայր Միսաքեան նաեւ ՀՕՄի «Հայ Սիրտ» պաշտօնաթերթի խմբագիրը եղած է եւ անտիպ ձգած է անգլերէն-հայերէն-ֆրանսերէն ծաւալուն բառարան մը։ 1950ին հրատարակած էր անգլերէն հատոր մը Հայկական Հարցին մասին։



«Եւրոպացի» նուիրած է վերոյիշեալ քրոնիկներէն մէկը («Հայրենիք», 23 Ապրիլ 1957) նորաբանութիւններու հարցին, եւ թէ ինչպէս մարդիկ չէին գիտեր ճիշդ կերպով հայացնել անգլերէն բառեր՝ հայերէնի իրենց աղքատ գիտելիքներուն պատճառով։ Ան բերած է օրինակը մէկու մը, որ անձնասպան դեսպանի մը վերջին խօսքերն են (“I can’t stand it any longer”)։

Ինքնակոչ թարգմանիչը հայերէնը «խաչ հանած» էր իր թարգմանութեամբ.  «Ասկէ աւելի չեմ կրնար կենալ» ։ Ի հարկէ, եթէ ասիկա բառացի թարգմանութիւն մը կրնայ նկատուիլ անգլերէն վերոյիշեալ նախադասութեան, սակայն ճի՛շդ թարգմանութիւն մը չէր։ «Կենալ» կը նշանակէ  to stand,  բայց այստեղ  to stand  չի նշանակեր «կենալ», այլ… «դիմանալ, հանդուրժել»։ Ահա թէ ինչու Միսաքեան ծաղրած է ենթական. «Ապո՛ւշը, երեւի, իմացած չէ, մեր «ա՛լ չեմ դիմանար»ը»։ Չէ՞ որ, եթէ ջերմաստիճանը շատ բարձր է, կ՚ըսէք՝  «Այս տաքին ա՛լ չեմ դիմանար» ։

« Եւրոպացի » մտադրած է նման թարգմանական «գոհարներ» հաւաքել հայ մամուլէն եւ քանի մը լեզուական դասեր տալ, բայց յայտնի չէ, թէ այս ծրագիրը իրականացուցա՞ծ է։ Ամէն պարագայի, ուսանելի է նման գոհարներ գտնել՝ անցեալէն ու ներկայէն։

Կ՚ուրախանանք եթէ ձեզմէ յղումներ ստանանք ։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org ) 

Ս. ՊԱՏԱՐԱԳԻ ՈՒՍՈՒՄՆԱՍԻՐՈՒԹԻՒՆ

Շաբաթ, 23 Մարտին, միօրեայ դասընթացք մը տեղի պիտի ունենայ Ս. Լուսաւորիչ Մայր Եկեղեցւոյ մէջ, Նիւ Եորք, Շանթ Ա. սրկ. Գազանճեանի ղեկավարութեամբ՝ «Հետազօտութիւն Ս. Պատարագի» վերնագրով։ Արձանագրութեան ժամկէտը 15 Մարտ է։ Մասնակցիլ փափաքողները տեղեկութիւններու եւ արձանագրութեան համար կրնան կապուիլ Մայր Եկեղեցւոյ գրասենեակին՝ հեռաձայնով (212-689-5880) կամ ելեկտրոնային նամակով՝ office@stilluminators.org։



ՇՆՈՐՀԱԼԻ ՊԱՐՈՒՀԻ ՈՒ ԱՒԱՆԴՈՒԹԵԱՆ ՊԱՇՏՊԱՆ

ՆՈՒԱՐԴ ՀԱՄԲԱՐԵԱՆԻ ՅԻՇԱՏԱԿԻՆ

«Լալու ալ ժամանակը կայ, ծիծաղելու ալ ժամանակը կայ, սուգ ընելու ալ ժամանակը կայ, պարելու ալ ժամանակը կայ» (Ժողովող 3:4)

Անցեալ շաբաթ, իր մահկանացուն կնքեց Նուարդ Համբարեան (1926-2019)՝ Ս. Լուսաւորիչ Մայր Եկեղեցւոյ երկարամեայ ծխական եւ ծանօթ պարուհի, որ անթիւ մանուկներու սորվեցուց իրենց բնիկ պարերը եւ բուռն կերպով պայքարեցաւ՝ աւանդական հայ պարը կենդանի պահելու համար համայնքի կեանքին մէջ։ Տան կարգն ու յուղարկաւորութիւնը տեղի ունեցան Ուրբաթ եւ Շաբաթ, 15-16 Փետրուարին։ Թաղումը տեղի ունեցաւ Պրոնքսի «Վուտլօն» գերեզմանատան մէջ։ Անոր ամուսինը՝ Նշան, մահացած էր շատ տարիներ առաջ։ Անոնց յիշատակը վառ կը պահեն երեք զաւակներ՝ Արամ, Անահիտ եւ Վարդան, ինչպէս եւ ամուսնոյն եղբօր՝ հանգուցեալ Արտաշէս եւ Մէրի Համբարեաններու զաւակները՝ Լորիկ, Արամ եւ Րաֆֆի։



Նուարդ՝ Մեծ Եղեռնէն վերապրողներու ամերիկածին զաւակը, գեղեցիկ ու շնորհալի պարուհի մըն էր, որուն հարազատ ու աւանդական հայկական պարերը մեծապէս խանդավառած են Նիւ Եորքի եւ շրջակայքի հայութիւնը։ Ան «հարազատ» հայ պարը պահելու եւ մեկնաբանելու ջերմ կողմնակից էր, փոխան՝ բեմական պարերու։ Ձեռքերու եւ ոտքերու, ինչպէս եւ գլուխի բարդ շարժումները ամբողջական բնոյթ ունին,- ան պիտի ըսէր, համբերութեամբ տարբեր գիւղերու եւ հայաշատ քաղաքներու պարերու օրինակները բերելով։ Թող ան յաւիտեանս պարէ մեր Տիրոջ ու Փրկչի երկնային լոյսին մէջ։

ԵԹԷ ԸՍԵԼԻՔ ՈՒՆԻՔ...

. . . գրեցէք մեզի crossroads@armenianprelacy.org հասցէին։



Մեր ելեկտրոնային շաբաթական լրատուի՝ “Crossroads”-ի մասին ձեր կարծիքն ու ձեր առաջարկները մեզ շատ կը հետաքրքրեն։ Ա՛յս նպատակով հաստատեցինք նամակագրութեան վերի յատուկ հասցէն։ Հաճոյքով պիտի հրատարակենք ձեր թղթակցութիւնները։

«Սիամանթօ» լսարանի դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝ anec@armenianprelacy.org   կամ՝  212-689-7810։ Յաջորդ դասը՝ Շաբաթ, 9 Մարտին։

2 Մարտ —Տարեկան Hye Hearts Dance-ի երրորդ պարահանդէսը ․ հովանաւորութեամբ՝ Մեծագոյն Հարթֆըրտի եւ Արեւմտեան Մասաչուսեթսի հինգ հայ եկեղեցիներուն, Holiday Inn պանդոկ, Հարթֆըրտ (Քընեթիքըթ)։

3 Մարտ —ՀՕՄի «Շաքէ» մասնաճիւղի Բուն Բարեկենդանի անուշեղէններու վաճառք, յաւարտ Ս. Պատարագի, Ս. Վարդանանց եկեղեցւոյ մեծ սրահին մէջ։

9 Մարտ —«Քիրքոսթաս» համերգ (երաժշտութիւն, պար, կատակերգութիւն եւ ընթրիք)։ Հայ-յոյն ամերիկացի դաշնակահար եւ երգահան Մարք Քիրքոսթասի յիշատակին։ 5710 Hewlett Street, Little Neck, New York, երեկոյեան ժամը 7:00ին։

17 Մարտ — “Musical Armenia” համերգ, ժամը 2:00ին, Carnegie Hallի Weill Recital Hallի մէջ, Ազգ. Առաջնորդարանի հովանաւորութեամբ։ Երաժիշտներ՝ Էդուարդ Պօղոսեան (թաւջութակ), Քարա Պօղոսեան (ջութ), Վաչէ Ճամպազեան (դաշնակ)։ 

23 Մարտ —Ս. Պատարագի մեկնաբանութիւն, առաւօտեան ժամը 10:00էն մինչեւ կէսօրէ ետք ժամը 3:00, Ս. Լուսաւորիչ եկեղեցւոյ մէջ, Նիւ Եորք, ղեկավարութեամբ՝ Շանթ Ա. սրկ. Գազանճեանի (Ազգ. Առաջնորդարանի Քրիստոնէական Դաստիարակութեան բաժնի վարիչ)։ Արձանագրութիւն՝ մինչեւ 15 Մարտ։

30 Մարտ —ՀՕՄի «Ակնունի» եւ «Պերկըն» մասնաճիւղերը եւ Նիւ Ճըրզիի Համազգայինը կը ներկայացնեն «Շատոյեան» նորաձեւութեան տան նոր հաւաքածոն, որ նուիրուած է Հայաստանի առաջին հանրապետութեան 100ամեակին։ Տեղի կ՚ունենայ սուրիական եկեղեցւոյ մէջ, Փարամըս, Նիւ Ճըրզի։

7 Ապրիլ —«Մեր արմատները գտնելու համար. Տոհմաբանութիւն մը», դասախօսութիւն՝ Ճորճ Աղճայեանի կողմէ (անգլերէն)։ Ուոթըրթաունի (Մասաչուսեթս) Ս. Ստեփանոս եկեղեցւոյ մէջ, կէսօրէ ետք ժամը 1:00ին՝ ճաշէ ետք։

12-14 Ապրիլ —Ս. Նահատակաց ամէնօրեայ վարժարանը կը ներկայացնէ Արթըր Փինաճեանի (1914-1999) գործերու ցուցադրութիւն Ս. Վարդան Մայր Տաճարին մէջ, Նիւ Եորք։ Վաճառքի եկամուտին մէկ մասը պիտի յատկացուի ի նպաստ դպրոցին։ 

5 Մայիս —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակ։ Թուականը նկատի ունենալ։

16-18 Մայիս —Արեւելեան թեմի Ազգային Երեսփոխանական Ժողով՝ Ուայթինսվիլի (Մասաչուսեթս) Ս. Աստուածածին եկեղեցւոյ կազմակերպութեամբ։

30 Յունիս-7 Յուլիս —33րդ տարեկան «Ս. Գրիգոր Տաթեւացի» ամառնային ծրագիրը՝ 13-18 տարեկան պատանիներու համար, տեղի պիտի ունենայ St. Mary of Providence կեդրոնին մէջ (Էլվըրսըն, Փենսիլվանիա), կազմակերպութեամբ՝ Ազգ. Առաջնորդարանի Քրիստոնէական Դաստիարակութեան բաժնին։

9-12 Հոկտեմբեր —Սրբոց Թարգմանչաց տօնին առիթով, Արեւելեան, Արեւմտեան եւ Գանատական թեմերու եկեղեցականաց համաժողով տեղի պիտի ունենայ Մոնթէպէլլոյի մէջ (Գալիֆորնիա)։ Մանրամասնութիւնները՝ յետագային։



19 Հոկտեմբեր —«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մասաչուսեթս)։ 

Follow us on Social Media

The Armenian Prelacy 

Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/